Akaputuputuanga ma te Aronga Inangaro i te Tu Rangatira tei Orongaia Mai e te Atua
E MEA umere tikai to te Au Kite o Iehova i te au tu e manganui. Te tuatua anake ra ratou i te “reo ma.” (Zephania 3:9, NW) Ko ratou anake ua te aronga te taokotaiia ra, te raukaanga te akairo o te aroa tei akatutuia e Iesu Karaiti. (Ioane 13:35) E te rekareka anake ra ratou i te tu rangatira ta Iesu Karaiti i karanga e ka apai mai te tuatua mou, mei tei papaia ia Ioane 8:32: “Ka kite ïa kotou i te tuatua-mou, e na te tuatua-mou kotou e akarangatira.”
Te au tuatua ta Iesu Karaiti, te Tamaiti a te Atua, i oronga ki tana au pipi, kua tika te reira. Te ariki maataia ra te reira i teianei e te Au Kite o Iehova tei putuputu atu ki te au Uruoaanga Tapere o te “Aronga Inangaro i te Tu Rangatira.” Kua akamarama mai te porokarama a te uruoaanga i te au tu tukeke o to ratou tu rangatira, e akapeea ratou i te taangaanga anga i te reira, te ka tupu i roto i te reira tu rangatira, e mei teaa ratou te akameitaki angaia ei iti tangata rangatira.
Kua akamata teia au uruoaanga i te tuatau tau e te taangaangaia i te tua Apatonga o Teianei Ao i roto ia Tiunu 7, 1991, i Los Angeles, California, U.T.M. Kua tuera te porokarama i te 10:20 i te popongi ma tetai oronga anga akatangitangi imene, e oti kua aru mai te imene e te pure. Kua riro te tuatua akatueraanga ei oronga anga maro tei akatumuia ki runga ia Iakobo 1:25. I tau ki The Jerusalem Bible, te tatau ra teia irava: “Ko te tangata tei akara marie i te ture tiama o te tu rangatira e te maani ra i te reira ei mea rave ua nana—kare te akarongoanga e oti te akangaropoina atu anga, mari ra te rave putuputu ra i te reira—ka mataora ia i te au mea ravarai tana ka rave.” Mei ia tatou e akara ra ki roto i tetai io no te akara e eaa te ngai i anoanoia no tatou kia akatikatika i to tatou tutu akara anga, e tau rai te anoanoia ra kia aruaru tatou i te akara ua rai ki roto i te ture tiama a te Atua te vai rangatira ra no te apii e eaa te ngai te anoanoia ra no tatou kia rave i te au taui anga i to tatou tu. E e tau tatou kia aruaru ua rai i te akara ki roto i te reira io.
E oti kua aere mai te tuatua a te tiamana, “Turou Mai, Kotou Katoatoa e te Aronga Inangaro i te Tu Rangatira.” Te inangaro ra te Au Kite o Iehova i te tu rangatira, e te inangaro ra ratou kia vai rangatira ua. Kua taiku mai te vaa tuatua i te au mana ture akaaere tei akaari mai e kare e tu rangatira me kare e ture. Ae, kare te au Kerititiano i rangatira ua no te rave ua i ta ratou i mareka inara te rangatira ua ra no te rave i to Iehova anoano. Ka inangaro ratou i te taangaanga maata i to ratou tu rangatira kare ra e takino i te reira. Mei te 1919 mai tikai te rekarekaanga te Au Kite o Iehova i te tu rangatira akamaataia. Kua kimi mai te vaa tuatua i te akamaata anga o te tu rangatira i roto i te au tumu tuatua o te uruoaanga e te au puka Kerititiano. E maata atu ta te aronga uruoaanga ka apii mai mei te tu rangatira orongaia mai e te Atua e akapeea te taangaanga anga i te reira.
Tei aru mai i te reira au tuatua i te tuatau tau ko te au uiui anga a te aronga inangaro i te tu rangatira tei rekareka no te mea kua tae ki te uruoaanga. Teia au uruoaanga e au tuatau no te rekarekaanga, mei te au oroa mataiti rai a to Iseraela i taito ra kua riro te reira ei rekareka anga maata. Kua riro te au uiui anga ei au tuatau akamaroiroianga i te pae vaerua e ei mea rekareka.
I reira kua akakiteia mai te tuatua puapinga ki te katoatoa, “Te Akakoroanga e te Taangaanga Anga i to Tatou Tu Rangatira Tei Orongaia Mai e te Atua.” Mei teia tuatua kua apii te au tangata o te uruoaanga e e tu rangatira anake to Iehova no te mea koia te Mana Akaaere Ngateitei Rava e te mana katoatoa. Inara no tona ingoa e tana au mea i anga, e akakotinga ana aia i etai taime i tona tu rangatira na te kore anga e viviki i te riri e te taangaanga anga i te akatere iaia uaorai. E tu rangatira akatikaia ta tona au mea anga katoatoaia, no te mea te kauraro ra ratou ia Iehova e kua kotingaia e tana au ture i te pae kopapa e te pae o te tu akono. Kua oronga a Iehova kia ratou te tu rangatira ei rekareka anga na ratou e rauka tikai ei ia ratou i te akangateitei iaia e te apai mai i te rekareka kiaia na te akamorianga iaia. No te raveanga i te taangaanga meitaki i to ratou tu rangatira, kua kiteaia te Au Kite o Iehova e e tu akono meitaki to ratou i teianei ao katoa e te maroiroi i roto i ta ratou angaanga orometua.
Avatea Varaire
Te tumu tuatua akakeu anga manako tei akatuera i te tuanga avatea i te Varaire ko te “Maroiroi—I Roto i te Au Angaanga Mate me i Roto i ta Iehova Angaanga?” Te kapiti atura ki te au angaanga mate kare ko to te pae kopapa anake ua pera katoa ra ko te aronga tei mate i te pae vaerua, puapinga kore, e te uua kore—mei te au angaanga kimi moni. I teia tu, te anoano maataia ra kia akara matatio tatou ia tatou uaorai ma te tiratiratu kia kite tatou e me te tuku ra rai tatou i te Patireia i te ngai mua i to tatou oraanga.
Ma te aiteite rai te akakoroanga i te tuatua tei aru mai, ko te “Akatupuanga i ta Tatou Rave Anga Angaanga ei Au Orometua no te Atua.” Kua akakite mai te vaa tuatua e auraka te au Kerititiano e akarava ua ia ratou uaorai ki te rave anga angaanga meangiti ua nei me kare te araveianga atu i te au ora tei anoanoia. E tau ratou kia inangaro kia mako meitaki ratou i te au tu ravarai o ta ratou angaanga orometua Kerititiano. Kua mou teia au manako na roto i tetai akatutu anga e te au uiui anga. Kua raurauia te katoatoa kia akatupu i ta ratou angaanga orometua ki te maata anga i ta ratou ka rauka.
I te tuatua “Tetai Iti Tangata Rangatira Mari ra te Iri ra te Apainga,” kua akakite te vaa tuatua e noatu te akono ra te au iti tangata o Iehova i te rangatira ta te tuatua mou i apai mai kia ratou, e tau ratou kia akamaara e ma te reira te iri ra te apainga. E tau ratou kia taangaanga i to ratou tu rangatira, kare ei kotoe anga no te tu akono tau kore, mari ra ei akapaapaa anga ia Iehova. Ei au Kerititiano, te iri ra te apainga ki runga i “te aronga mana taoonga” e e tau kia taokotai atu ki te aronga pakari o te putuputuanga. (Roma 13:1) E pera katoa, te iri ra rai te apainga ki runga i to ratou rakei, te akamaneaanga, e te tu akono. Auraka rava ratou e akangaropoina e “ka ope takiri rava tatou i te aaki i te tuatua iaia uaorai i te Atua ra.”—Roma 14:12; 1 Petero 2:16.
E oti kua aru mai tetai uriuri anga o te anoano no te au Kerititiano ravarai kia “Kore e Mataku i te Openga o Teianei Ao e Vaitata Maira.” Koi vai mataku ei te tangata nei e eaa ta te tuatau ki mua ka apai mai, te anoanoia ra te au Kerititiano kia kore e mataku i te rave anga i ta ratou angaanga orometua. Te mataku kore ka tupu mai te reira mei te irinaki anga ia Iehova, tei maata atu te mataku ra tetai Kerititiano i te akamareka kore anga i te Atua, ka meangiti mai i reira tana mataku anga i te au mea angaia. Te akamaaraaraanga i te au tuatua tapu pumaana ka akamaroiroi te reira i tetai peretana kia kore e mataku. E pakari ei i te pae vaerua e te mataku kore, te anoano katoaia ra te au tavini o te Atua kia taangaanga meitaki i te au tuatau ravarai no te piri atu ki te au taeake irinaki. Te anoano katoaia ra te katoatoa kia akamaara i te tuanga a te pure kia kore e mataku. Na te vai tamouanga kia kore e mataku, ka tamou te au Kerititiano i tetai pirianga memeitaki ma te Atua ko Iehova.
Kua taopenga te porokarama no te ra mua ki te nuku ikuiku meitaki koia oki Set Free to Promote True Worship (Akarangatiraia no te Akamaata i te Akamori Anga Mou). Kua akaari mai te reira e akapeea tetai ngutuare tangata o teia tuatau i te apiianga mei ia Ezera e tana pupu 7,000, tei rave i tetai mea no te oki ki Ierusalema. Kua maani teia i tei putuputu atu kia makitoro i tana au rave anga mua kia kite e akapeea aia i te akamaata anga i tana au apainga no te angaanga. Kua tano teia nuku no te aronga ruaine e te mapu anake.
Popongi Maanakai
I muri ake i tetai porokarama mutiki, imene, te pure e tetai uriuri anga irava Puka Tapu no te au ra, kua akakiteia te porokarama no te popongi Maanakai tetai kapitianga tuatua te ingoa “Tu Rangatira ma te Apainga i Roto i te Ngutuare Tangata.” I te tuanga mua, “Akapeea e Raukaʼi i te Au Metua Tane i te Aru ia Iehova,” kua akoia te au metua tane i te au mataara tukeke e raukaʼi ia ratou i te aru i to tatou Metua i te rangi. Te umuumu ra a Tai 1 Timoteo 5:8 e kia oronga ratou kare anake ua i te pae kopapa mari ra i te pae vaerua katoa. Te aru ra ratou ia Iehova ei au puapii memeitaki no to ratou ngutuare tangata e na te orongaanga i te ako anga tei anoanoia ma te aroa. Kua akatutuia teia au manako na roto i te au uiui anga.
Te tuanga tei aru mai o teia tuatua kapipiti ko “Ta te Vaine Apainga Turuturu.” Kua akamata te reira na te akakite papu anga e te mou ra te vaine i tetai turanga akangateiteiia i roto i te ngutuare tangata Kerititiano, koia oki te turuturu anga. Eaa ta teia e umuumu ra iaia? E kia kauraro aia ma te tau, auraka e taomi i tana tane kia rave i tetai mea i tana anake ua i inangaro. Te anoanoia ra aia kia akono meitaki i tana au apainga ki tana tane e te tamariki, e ka rauka iaia te merengo anga tikai mei te akonoanga i tona kainga ma te ma e te mako. E ei orometua Kerititiano, penei e maata tona tuatau no te tomo atu ki roto i te angaanga tutu aere. Kua akapapu mai tetai uiui anga i roto i tetai ngutuare tangata i te kite pakari o teia ako anga Tuatua Tapu.
Kua rauka i te aronga mapu tetai tuanga o “Te Tamariki Tei Akarongo e te Apii.” Na te akamatauanga i ta ratou tamariki kia akarongo e te apii, te apai maira te au metua i te ngateitei kia Iehova e te akaari i te aroa no to ratou au taeake e no ta ratou uaorai au tamariki. Ka tupu tetai tapeka anga ketaketa i rotopu i te au metua e te au tamariki me tuku ratou i te au tuatau tau no te kapiti taokotai. Kia papa te au metua i te pau i te au uiuianga a ta ratou au tamariki e te akakeu i to ratou kaki no te kite. Kua rave akaouia te au uiui anga e akapeea teia i te rave angaia.
Tei aru mai ko te ako anga memeitaki “E Akono ia Koe Uaorai Kia Va ua no te Tavini ia Iehova.” Akapeea teia i te rave angaia? Na te akonoanga kia va mai koe mei te aruaruanga i te au ngai angaanga a to teianei ao, te au angaanga inangaroia tei akapou taime, e te au akakoro anga i te pae kopapa. Kua tuku a Iesu raua ko te apotetoro ko Paulo i te nga akaraanga memeitaki no tatou na te oronga anga ia tatou uaorai. Te anoanoia ra to Iehova iti tangata kia tamou i te nga mata ngoie ua, te akatano anga ki runga i te au inangaro o te Patireia. Me tae mai ki te akaputuanga i te au mea i te pae kopapa, e pakari ake i te akaputu no teianei e te oko atu a tetai tuatau ki mua i te oko i teianei ka tutaki atu ei a tetai tuatau ki mua. Kia paruru te au mapu i te moemoeaanga no runga i te au mea navenave o te ainga e te au ngai angaanga a to teianei ao. Na tetai uiui anga ki tetai painia takaua i akaari mai i te au akameitakianga te ka tupu me akono tetai iaia uaorai kia va ua no te tavini ia Iehova.
Kua taopenga te porokarama no te popongi Maanakai ma te tumu tuatua “E Tomo ki te Tu Rangatira na Roto i te Akatapu Anga e te Papetito Anga.” Kua akamaaraia atu te aronga te ka papetitoia e koi tiriaiaʼi te au mea angaia ki roto i te tuikaa anga o ta Adamu patoi anga, kua akatuera te Akarangatira mana ra, a Iesu Karaiti, i te mataara ki te tu rangatira na roto i tona atinga. Kua akakite mai te vaa tuatua i te ka o ki roto i te tuku anga kia va ua no te rave i to te Atua anoano e kua akakite mai i te au apainga e te au akameitakianga te ka tupu ki te aronga tei papetitoia.
Avatea Maanakai
Kua akamata te porokarama i te avatea Maanakai ki te uianga akakeu manako koia oki “Toai Meitaki Taau e Kimi Ra?” Te akaata ra teianei ao i te kimi anga nona anake uaorai koia oki te vaerua o te Tiaporo. Inara, e tau te au Kerititiano kia aru i te vaerua oronga iaia uaorai o Iesu Karaiti. Mei teaa te akaraanga tana i tuku! Kua akaruke aia i te kaka i te rangi ra e kua akaatinga i tona oraanga ei tangata i puapingaʼi tatou. Ka kitea e noai te meitaki ta tatou e kimi ra na roto i te au akaaoanga o te au mea tei marama koreia i rotopu i te au Kerititiano i roto i te pitiniti me kare i te pae o te moni, me tupu te au maro anga o te tu tangata, e te vai atura. Ka timata teia au mea i te aroa Kerititiano. Inara na te kimianga i te meitaki no tetai pae atu, te papu ra e ka kite tetai tangata i te akameitakianga maata o te orongaanga, e ka rauka iaia te mareka anga a Iehova.
Tei aru mai ko te tumu tuatua tei piri atu ki te reira “Kiteanga e te Autuanga i te Au Apikepike Anga i te Pae Vaerua.” Kua akakite papu mai teia tumu tuatua i te anoano no te akataka i te au tu akamata anga o te apikepike i te pae vaerua e ka rave atu i te reira ma te tau no te ta anga i te autu atu ia Satani e tana au puereere. Kia tatanu te au tavini o Iehova i te aroa oonu kiaia e te rikarika i tei kino ra. Te umuumu ra teia e kia kite ratou ia Iehova na roto i te apii Puka Tapu putuputu na te ngutuare tangata ma te akakoro anga meitaki tikai. Kia kopae ratou i te au tu tamataora anga te akakaka ra i te ta ua e te ainga tau kore. (Ephesia 5:3-5) Te pure putuputu e te aere ki te au uipaanga e puapinga katoa teia ki te manuia anga i te aro i te au apikepike anga i te pae vaerua.
Penei te akatupuanga i te uriuri anga maata rava atu i tetai ua atu tuatua tei orongaia i ko i te uruoaanga ko te tumu tuatua “Ko te Akaipoipoanga Ainei te Taviri ki te Turanga Mataora?” E manganui o te aronga mapu te karanga ra e ae! Inara kua akapapu mai te vaa tuatua e e manganui te au mea ora vaerua akarongo te mataora ra inara kare i akaipoipo, pera katoa i te manganui o te au Kerititiano akatapuia te mataora tikai ra inara kare i akaipoipo. Tei maata atu, e manganui te au tokorua kare e mataora ana, mei tei akakiteia mai e te numero teitei o te aronga tei akatakake. Te anoanoia ra tetai kia akaata i te au akameitakianga e manganui ta te au Kerititiano akatapuia e rekareka ra kia kite e ko te akaipoipoanga, noatu e ka riro mai ei akameitakianga, kare te reira i te taviri ki te turanga mataora.
Tei aru mai ko tetai tuatua kapipiti “Te Tu Rangatira Kerititiano i to Tatou Tuatau.” Kua uriuri te vaa tuatua mua no te “Akara Marie Anga i te au Tu o to Tatou Tu Rangatira Kerititiano.” Te kapiti atura ki teia ko te rangatira mei te au apiianga akonoanga pikikaa mei te Toru Tai, te mate kore o te meta tangata, e te tamamae anga mutu kore. E oti te vaira te rangatira mei te tapeka anga tuikaa ki te ara. Noatu e e tiama kore te au Kerititiano, te matara ra ratou mei te au tu tau kore o te kai avaava, te pere moni, te kona kava, e te ainga akatika uaia. Te vai katoa ra te rangatira mei te manako puapinga kore, no te mea e manakonakoanga to ratou no te Parataito tei akakeu ia ratou kia akakite i tetai no runga i te reira.
Kua ui te vaa tuatua tei aru mai i te uianga “Te Akaperepere Ainei Tikai Koe i Teia Tu Rangatira?” Te aite anga o te akaperepere kia mou i te reira ma te inangaro, te akono i te reira ma te tau. Te rave i te reira, e tau kia paruru to te Atua tavini kia kore e timataia i te aere atu ki runga ake i te au kotinga o te tu rangatira Kerititiano. Te rangatira a to teianei ao e pikikaa ia, no te mea te tupu atura te reira ki te tuikaa anga ki te ara e te takore anga.
Kua tuatua te vaa tuatua openga o teia tuatua kapipiti no runga i te tumu tuatua “Tu Ngaueue Kore te Aronga Inangaro i te Tu Rangatira.” No te rave i te reira, kia piri vaitata atu te au Kerititiano ki to ratou au metua o te marama, ko Iehova e tana akaaerenga akatutuia mei te vaine rai. Kare e rauka i te iti tangata o Iehova i te tuku ua ia ratou kia takinoia e te au tuatua akaruke i te akarongo; kia patoi ratou i te aronga tei aere mai ma te au papau anga tau kore. E tu ngaueue kore ei i roto i te tu rangatira atua, e tau te au Kerititiano kia ‘aru i ta te Vaerua ra.’—Galatia 5:25.
Kua riro te tuatua openga ei tumu anga reka. Te ingoa “Te Tangata Maata Rava Atu Tei Ora Ana.” E tangata maata tikai a Iesu Karaiti, no te mea kua akakeu aia i te oraanga o te au tangata nei e ririnui rava atu i te au vaeau katoatoa, te au vaeau tai, te au paramani, e te au ariki katoatoa. Koia te Tamaiti a te Atua, tei noo ana i te rangi i mua ake ka aere mai ei ki te enua nei. No te mako i ta Iesu aru anga i tona Metua i te rangi ra i roto i tana i tuatua e te apii e te noo anga i te reira i raukaʼi iaia i te tuatua e: “Ko te akara mai iaku nei, kua akara ïa i te Metua.” (Ioane 14:9) Mei teaa te meitaki ta Iesu akaari anga e “ko te Atua oki te aroa”! (1 Ioane 4:8) I muri ake i te uriuri maata anga i te au tu o Iesu, kua akakite mai te vaa tuatua e kua neneiia tetai papaanga atikara “To Iesu Oraanga e te Angaanga Orometua” i roto i Te Punanga Tiaki (reo Peritane) mei ia Aperira 1985 mai. Te ariu atu ki te au pati anga e manganui, te oronga nei te Totaiete i te puka ou Te Tangata Maata Rava Atu Tei Ora Ana. E 133 ona au pene e kua neneiia ma te au kara. Kua etitiia te au papaanga tua, e kua taokotai katoatoaia ki roto i te 448 au kapi o te puka. E tikai, kua ope teia ra uruoaanga ma te rekareka anga maata!
Popongi Tapati
I te akamata anga o te tuanga o te popongi Tapati kua akamata te tuatua kapipiti “Tavinianga ei Aronga Tautai Tangata.” Na te tumu tuatua “Opuanga i te Ika—Tika Tikai e te Akatutu Ua” i akanoo i te tango no te au tuatua tei aru mai. Kua akakite te vaa tuatua e i muri ake i to Iesu akatupu anga i tetai opu anga ika na roto i te temeio, kua pati aia i te au tangata tautai tei o atu ki roto kia riro mai ei au tangata tautai tangata. No etai tuatau, kua akamatau a Iesu i tana au pipi kia riro mai ei au tangata tautai tangata, e kua akamata te reira ia Penetekote 33 T.N., kua manuia ratou i te tauturu anga te urupu ua atu au tane e te vaine kia riro mai ei au pipi.
Te vaa tuatua tei aru mai kua tuatua aia no runga i te parapore o te kupenga uuti tei papaia ia Mataio 13:47-50. Kua akakite aia e ko te kupenga uuti akatutu ua kua kapiti te reira i te au Kerititiano akatainuia e Kerititome, te mea openga, no te angaanga urianga tei raveia, te neneianga, e te tuaanga te au Puka Tapu, inara kua akaputu mai teia tauta anga i te urupu ua atu au ika tau kore. Mei te 1919 tikai i raveiaʼi te angaanga akatakakeanga, kua tiriaia te au ika tau kore, ko te au mea tau ra kua akaputuputuia mai te reira ki roto i te au putuputuanga vairanga tei tauturu i te paruru e te akono i te au Kerititiano mou no te angaanga mei te atua mai.
Te toru o te tuatua, “Tautaianga Tangata i Roto i te Au Vai o Teianei Ao,” kua akakiteia te apainga a te au Kerititiano akatapuia katoatoa no te piri ki roto i te angaanga tautaianga i teianei ao katoa. I teianei e tere atu i te 4,000,000 te piri atura ki roto i te angaanga e tere atu i te 200 au enua, e i te au mataiti i topa akenei kua tere maata atu i te 230,000 te papetitoia ra i te au mataiti katoatoa. Kua raurauia te iti tangata o Iehova kia akamako mai i ta ratou ravenga tautai, e e maata te au “tangata tautai” i manuia tikai tei uiuiia.
I roto i te tuatua tei aru mai, “Tamouanga Kia Ara Ua ‘i te Tuatau Openga,’” kua taiku mai te vaa tuatua e itu tauturu no te tauturu i te iti tangata o te Atua kia vai ara ua: te taanga atu i te au tamanamanata anga, te pureanga, te akakite i te akamatakiteanga no runga i te openga o teia akatereanga, e te pirianga ki ta Iehova akaaerenga, te makitoro anga iaia uaorai, te manakonakoanga i te au totou tei akatupuia, e te akamanakoanga e te vaitata maira to ratou mei to ratou riro anga mai ei aronga irinaki.
Kua taopenga te porokarama o te popongi ma tetai uriuri anga “Koai te ka Ora Atu i te ‘Tuatau Taitaia’?” Kua akakite mai te vaa tuatua e akapeea te totou a Ioela te tupu anga i te au tuatau o te apotetoro, e te tupu maata atura i teianei, e ka tupu ki katoa atu i te tuatau ki mua.
Avatea Tapati
Kua akamata te porokarama o te avatea ki te tuatua na te katoatoa, “Turouanga Mai i te Ao Ou Rangatira o te Atua!” kua tuatua uaia atu teia tumu tuatua uruoaanga koia oki te tu rangatira. Kua akakiteia mai e te akakite maira te Tuatua na te Atua i tetai ao ou te ngai ka vai te tu rangatira mei te takinokino anga a te au akonoanga pikikaa, te poritiki, te pae o te puapinga, e te au ravenga akapaeke. Ka vai katoa te tu rangatira mei te ara e te mate. Ka akaoki akaouia mai te turanga matutu ma te tiama e raukaʼi i te au tangata i te noo e tuatau ua atu ma te mataora i te enua parataito nei. No reira, e tumu anake ta te aronga inangaro i te tuatua tika i te akapaapaa i Tei Maani i teianei ao ou na te kapikianga: “Akameitaki ia koe, e Iehova, no te tu rangatira tikai!”
I muri ake i te tuatua ki te katoatoa kua aru mai tetai mea ou no te au uruoaanga tapere—ko tetai uriuri anga o te apii anga o te epetoma i roto i Te Punanga Tiaki. E oti kua taopenga te uruoaanga ma tetai tuatua akakeuanga e te ako anga “Aronga Inangaro i te Tu Rangatira, E Tamou i te Tere Ua Atu ki Mua.” Kua akakite poto ua te vaa tuatua ma te au manako puapinga tikai o te tumu tuatua o te uruoaanga koia oki te tu rangatira. Kua akakite aia e mei teaa te mataora to Iehova iti tangata no to ratou tu rangatira, te au mataara e manganui i raukaʼi i te au Kerititiano i te tere ki mua, e te raurau atu ia ratou kia tamou ua rai i te tere ua atu ki mua ma te taokotai e kokoti ei i te au akameitakianga. Kua taopenga aia ma te au tuatua: “Ia tatou e rave ra i teia, kia tamou ua rai Iehova i te akameitaki ia tatou katoatoa e raukaʼi ia tatou i te tamou ua atu i te tere ki mua ei aronga inangaro i te tu rangatira.”
“Kua akariroia oki te au mea angaia nei ei puapinga kore ua, kare ra i te mea anoano, nana ra, na tei akariro ra; Ma te tatarianga e kia akaora katoaia te au mea angaia nei i te tapeka o te mate, kia rauka te rangatira meitaki o te tamariki a te Atua ra.”—Roma 8:20, 21.
[Au Tutu i te kapi 25]
Tetai tereketi mapu ki te uruoaanga i Prague, Tekorovakia
[Au Tutu i te kapi 26]
1. Te au tangata te aere atura ki te ngai papetito anga i Prague, Tekorovakia
2. Papetito angaia ei tetai o te Au Kite o Iehova i Tallin, Estonia
3. No te au puka ou i rekareka ei te au tangata o te uruoaanga i Usolye-Sibirskoye, Tiperia
4. Orongaanga i te “New World Translation of the Holy Scriptures” i te reo Tieki e te Torovaka i te uruoaanga i Prague