Ko Iehova To Tatou Akapuanga

“No te mea kua akariro koe ia Iehova ei akapuanga, . . . Kare rava koe e rokoia e te kino.”​—SALAMO 91:9, 10.

1. Eaa ka raukai ia tatou kia tuatua e ko Iehova to tatou akapuanga?

A IEHOVA e akapuanga tikai no tona au tangata. Me te kauraro katoa ra tatou kiaia, penei ‘kua kako tatou i te mate, kare ra i apiapi: kua pekapeka, kare ra i ope te manakoanga: kua takinga-kinoia, kare ra i akarukeia: kua uriia ki raro, kare ra i mate rava.’ No teaa ra? No te mea te oronga maira Iehova kia tatou i “te mana maata meitaki.” (2 Korinetia 4:​7-9) Ae, te tauturu maira to tatou Metua i te rangi ia tatou kia aruaru i te oraanga tau i te Atua, e ka rauka ia tatou te tuku ki te ngakau te au tuatua a te tata taramo ra: “No te mea kua akariro koe ia Iehova ei akapuanga, Tei Teitei ra ei nooanga ora ra; Kare rava koe e rokoia e te kino.”​—Salamo 91:​9, 10.

2. Eaa te ka rauka kia tuatuaia no te Salamo 91 e tana i taputou maira?

² Ko taua au tuatua ia Salamo 91 penei na Mose i tata. Te tapa ra te tataanga i runga iaia e ko tei tata ia Salamo 90, e kua aru maira a Salamo 91 i te reira kare e tataanga i rotopu i tetai ingoa no tei tata. Penei kua imeneia te Salamo 91 e tetai tangata okotai i nga irava mua (91:​1, 2), ma tetai pupu i te imeneanga i te (91:​3-8). Penei e okotai ua reo tei akarongoia atu i te (91:9a) e kua pauia mai e tetai pupu i te (91:9e-13). E penei na tetai tangata okotai i imene mai i te au tuatua openga i te (91:​14-16). I tetai ua atu tu, te taputou maira te Salamo 91 i te tinamou pae vaerua ki te au Kerititiano akatainuia ei pupu e te oronga katoa maira i te akapapuanga aiteite no to ratou au oa akatapuia ra ei pupu katoa oki.a E akamanako tatou i teianei taramo mei te manako anga o te au tavini katoa o Iehova ra.

Tinamou i Roto i to ‘te Atua Tapoki o Tei Teitei’

3. (a) Eaa tei “raro ake i te tapoki o Tei Teitei ra”? (e) Eaa ta tatou ka kite na te ‘moe i raro ake i te Mana katoatoa ra’?

³ Kua imene te tata taramo: “Ko tei noo i raro ake i te tapoki o Tei Teitei ra, ka moe aia i raro ake i te Mana katoatoa ra. Te tuatua nei au kia Iehova, Ko koe toku akapuanga, e toku pinanga; toku Atua, e taku i irinaki nei.” (Salamo 91:​1, 2) “Te tapoki o Tei Teitei” ko tetai ngai akatutuia no te paruru anga ia tatou, e maata oki no te aronga akatainuia ra, ko ratou ra te takete taka ke a te Tiaporo. (Apokalupo 12:​15-17) Ka pou tatou katoatoa iaia naringa kare te paruru anga ta tatou e rekareka nei ei aronga tei noo ma te Atua ra ei au manuiri pae vaerua. Na te ‘moe i raro ake i te Mana katoatoa ra,’ ka kite tatou i te marumaru paruru anga, me kare te ata o te Atua ra. (Salamo 15:​1, 2; 121:5) Kare e akapuanga meitaki atu me kare e pinanga taea koreia i to tatou Atu Ngateitei, ia Iehova ra.​—Maseli 18:10.

4. Eaa te au apinga ta “te kimi manu ra” ko Satani, e taangaanga ra, e akapeea tatou e orai?

⁴ Kua tuatua katoa te tata taramo: “Nana [na Iehova] tika rai koe e akaora i te ereere a te kimi manu ra, i te maki-mate kino ra.” (Salamo 91:3) E putuputu te tangata kimi manu i Iseraela i taito ra i te opu i te au manu na te taangaanga i te au ereere. I roto i te au ereere a “te kimi manu ra,” ko Satani, ko tana akaaerenga rave kino e te “au ravenga kino” oki. (Ephesia 6:11, NW, tataanga i raro ake) Kua akanooia te au ereere uunaia ra ki roto i to tatou arataa kia kika atu ia tatou ki roto i te rave kino e kia akatupu i te mate pae vaerua no tatou. (Salamo 142:3) Inara, no te mea kua akakore tatou i te tuatua tika kore, kua “tau tatou ki te manu i ora i te ereere a te ere manu ra.” (Salamo 124:​7, 8) Mei teaa ra to tatou akameitaki anga e te akaora ra a Iehova ia tatou i te kino a “te kimi manu ra”!​—Mataio 6:13.

5, 6. Eaa te “maki-mate” tei akatupu ra i te “kino,” inara eaa te au tangata o Iehova i kore ei e o atu ki te reira?

⁵ Te taiku maira te tata taramo i “te maki-mate kino ra.” Mei tetai maki mate piri ra, te vaira tetai apinga te akatupu ra i “te kino” no te pamiri tangata nei e no te aronga mou i to Iehova ra ngateitei. No teianei tu, kua tata te tangata tata tuatua enua ko Arnold Toynbee: “Mei te ope anga mairai o te Tamaki II o te Ao ra kua takirua atu te numero o te au enua tataka ke ra . . . te tu manako o te au tangata i teianei kua maata roa atu te tataka keanga.”

⁶ I roto i te au anere mataiti katoa, kua akamura mai etai aronga tutara i te kino tataka ke i te pa enua ra. Kua maro katoa ratou kia orongaia atu te akatapu anga kia ratou me kare ki etai au tiki me kare ki te au akatutu anga. Inara kare a Iehova e tuku i tona au tangata tiratiratu kia piri atu ki taua “maki-mate” ra. (Daniela 3:​1, 2, 20-27; 6:​7-10, 16-22) Ei taokotai anga taeake aroa i te ao katoa nei, te oronga nei tatou i te akamori anga kia Iehova anake ua, te tamou katoa oki i te tu taka ke o te au Tuatua Tapu ra, e kare e akara i te tu o te tangata te akatika ra e “ko te mataku ra [i te Atua], e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:​34, 35; Exodo 20:​4-6; Ioane 13:​34, 35; 17:16; 1 Petero 5:​8, 9) Noatu rai te mamae ra tatou i te “kino” i te tu takinga kinoanga ei au Kerititiano, te rekareka ra tatou e te tinamou ra i te pae vaerua “i te tapoki o Tei Teitei ra.”

7. Akapeea ta Iehova ra paruruanga ia tatou “i tona ra uruuru”?

⁷ I te riroanga ko Iehova ei akapuanga no tatou, kua rauka ia tatou te akapumaana anga mei te au tuatua: “Ka tapoki aia ia koe i tona ra uruuru, e ka ora koe i raro ake i ona puke peau: ko tana ra tuatua-mou, ko toou ïa paruru, e te tapoki.” (Salamo 91:4) Te paruru ra te Atua ia tatou, mei te metua manu e akakoukou paruru ra i rungao i tana anaunga. (Isaia 31:5) ‘Ka tapoki aia ia tatou i tona ra uruuru.’ Te kite ateaia ra ko te “uruuru” o te manu ko tona nga peau ia. Ma te reira ka tapoki te manu i tana anaunga, i te paruruanga ia ratou mei tei rave kino ra. Mei te au manu ou ra, te tinamou ra tatou i raro ake i nga peau akatutuia mai o Iehova ra no te mea kua aere atu tatou ki te akapuanga i roto i tana akaaerenga Kerititiano mou ra.​—Ruta 2:12; Salamo 5:​1, 11.

8. Akapeea ta Iehova ra “tuatua-mou” i riro ei ei paruru maata e te punanga ketaketa?

⁸ Te irinaki ra tatou i te “tuatua-mou,” me kare te tiratiratu. Te aite ra te reira ki tetai paruru maata o te au tuatau taito ra, e putuputu te aite mei te ngutupa rai te tu e kua rava te maata kia arai i te kopapa katoa o te tangata ra. (Salamo 5:12) Na te irinaki anga i taua paruru anga ra e akakore atu i to tatou mataku. (Genese 15:1; Salamo 84:11) Mei to tatou akarongo ra, ko ta te Atua ra tuatua mou e paruru maata ia tei arai atura i te au tao ai a Satani e ka arai atu i te au moto a te enemi ra. (Ephesia 6:16) Ko tetai punanga ketaketa katoa ia, e paruru maroiroi ia te tu ngaueue kore ra tatou ki muri i reira.

‘Kare Tatou e Mataku’

9. Eaa te po i riro ei ei tuatau matakuanga, inara eaa tatou i kore ei e mataku?

⁹ I te manako anga i te paruru anga a te Atua ra, kua tuatua te tata taramo: “Kare koe e mataku i tei matakuia i te po ra; te kakao e rere i te ao ra; Te maki-mate e aere ua i te poiri ra; te pou e pou ei i te avatea ra.” (Salamo 91:​5, 6) I te mea e manganui te au angaanga kikino te raveia ra i raro ake i te tapoki anga o te poiri, ka riro te po ei tuatau matakuia. I roto i te poiri pae vaerua te tapoki nei i te enua i teianei, e putuputu to tatou au enemi i te rave i te au angaanga akavare i te tauta anga kia akapou i to tatou tu pae vaerua e kia tapu i ta tatou angaanga tutuanga. Inara ‘kare tatou e mataku i tei matakuia i te po’ no te mea te paruru ra a Iehova ia tatou.​—Salamo 64:​1, 2; 121:4; Isaia 60:2.

10. (a) I te akaraanga, eaa te akakiteia maira e “te kakao e rere i te ao ra,” e akapeea ta tatou akono atu i te reira? (e) Eaa te tu o “te maki-mate e aere ua i te poiri ra,” e eaa tatou i kore ei e mataku i te reira?

¹⁰ I te akara anga “te kakao e rere i te ao ra” te akakite maira i te tuatua akakino anga. (Salamo 64:​3-5; 94:20) Ia tatou e akakoromaki ra i te orongaanga i te akakite anga tuatua mou ra, ka riro taua patoianga atea i ta tatou tavinianga tapu ra ei mea puapinga kore. Pera katoa oki, kare tatou e mataku i “te maki-mate e aere ua i te poiri ra.” E maki mate akatutuia teianei tei akatupuia maira i roto i te poiri o teianei ao tau kore e te akonoanga makiia te vaira i roto i te mana o Satani. (1 Ioane 5:19) Te akatupu maira te reira i tetai tu kino no te manako e te ngakau, kua akaruke mai i te au tangata ki roto i te poiri no runga ia Iehova, tana au akakoroanga, e tana au akanoonoo anga aroa oki. (1 Timoteo 6:4) I roto i teianei poiri anga, kare tatou e mataku, i te mea te rekareka nei tatou i te marama maata i te pae vaerua.​—Salamo 43:3.

11. Eaa te tupuanga ki te aronga te kite ra i ‘te pouanga i te avatea’?

¹¹ “Te pou e pou ei i te avatea ra” kare katoa oki e akamataku mai ia tatou. “Te avatea” penei te akakite maira i tei manakoia e marama anga no te ao nei. Te aronga te ka o atu ki tona au manako noinoi apinga ka mamae i te akapouanga pae vaerua. (1 Timoteo 6:​20, 21) Ia tatou e akakitekite mataku kore ra i te tuatua Patireia, kare tatou e mataku i tetai ua atu o to tatou au enemi ra, no te mea ko Iehova to tatou Paruru.​—Salamo 64:1; Maseli 3:​25, 26.

12. Te “topa” ra te au tauatini i te pae iaai, e i teea tu?

¹² Kua tuatua ua atu te tata taramo: “E tausani te ka topa i to pae, e ngauru atura ïa te tausani i to rima katau: kare ra e vaitata mai kia koe. Ko to mata anake ra te ka akara, e ka kite koe i te tutaki a te aronga kino.” (Salamo 91:​7, 8) No te koreanga e akariro ia Iehova ra ei punanga no ratou, e manganui kua “topa” ki roto i te matenga pae vaerua i ‘to tatou pae.’ Ko te tika e, “ngauru atura ïa te tausani” kua topa i te pae “rima katau” o te Iseraela vaerua i teia tuatau nei. (Galatia 6:16) Inara noatu me e au Kerititiano akatainuia tatou me kare e au oa akatapuia no ratou ra, te tinamou ra tatou i roto i “te tapoki” o te Atua ra. Ko ‘to tatou mata anake ra te ka akara, e ka kite i te tutaki a te kino,’ tei kokoti i te taitaia i te pae okooko anga, te akonoanga, e etai atu au aerenga oki.​—Galatia 6:7.

‘Kare Rava Tatou e Rokoia e te Kino’

13. Eaa te au tumatetenga kare e rokoia kia tatou, e no teaa ra?

¹³ Noatu rai te pururu ra te tinamou o teianei ao, ka tuku tatou i te Atua ki mua e ka akamaroiroi mei te au tuatua a te tata taramo ra: “No te mea kua akariro koe ia Iehova ei akapuanga, Tei Teitei ra ei nooanga ora ra; Kare rava koe e rokoia e te kino, kare oki te maki-mate ra e akavaitata mai ki toou ra puakapa.” (Salamo 91:​9, 10) Ae, ko Iehova to tatou akapuanga. Inara, ka akariro katoa tatou i te Atua Tei Teitei ‘ei nooanga ora no tatou,’ te ngai e kite ei tatou i te ora. Ka akateitei tatou ia Iehova e ko te Ngateitei o te Ao Katoa e Pini Ua Ake, ‘e noo’ ki roto iaia e ko to tatou Tumu no te tinamou, e ka akakite i te evangeria o tona Patireia. (Mataio 24:14) No reira, ‘kare rava tatou e rokoia e te kino’​—kare etai o te au tu kino tei akatakaia mai i mua akenei i teianei taramo. Noatu rai me ka kapiti atu tatou ma etai ke ra i roto i taua au tumatetenga ra mei te ngaruerue enua, te uriia, te vaipuke, te onge, e te au tu kino no te tamaki anga, kare taua tu ra e akapou i to tatou akarongo me kare to tatou tinamou i te pae vaerua.

14. Ei au tavini no Iehova, eaa tatou i kore ei e rokoia e te au mate kino ra?

¹⁴ Te aite ra te au Kerititiano akatainuia ra ki te au tangata ke te noo ra i roto i te au puakapa taka ke mei teianei akatereanga o te au mea nei. (1 Petero 2:11) ‘Kare oki te maki-mate ra e akavaitata mai ki to ratou ra puakapa.’ Noatu me no te rangi to tatou manakonako anga me kare no te enua nei, kare tatou i to teianei ao, e kare tatou e rokoia e te au mate pae vaerua mei te ainga tau kore ra, te noinoi apinga, te akonoanga pikikaa, e te akamori i “te puaka taae ra” e tona “tutu,” koia te United Nations.​—Apokalupo 9:​20, 21; 13:​1-18; Ioane 17:16.

15. I roto i teea au tu tatou i rekarekai i te tauturu a te au angera

¹⁵ No runga i te paruru anga ta tatou e rekareka nei, te tuatua maira te tata taramo: “Ka ikuiku oki aia [a Iehova] i tana au angela ia koe, ei tiaki ia koe i toou au aerenga katoa ra. Ka mou oki ratou ia koe i to ratou ra rima, ko te tukia ua atu aea koe i to vaevae ki te toka.” (Salamo 91:​11, 12) Kua orongaia te mana ki te au angera kia paruru ia tatou. (2 Ariki 6:17; Salamo 34:​7-9; 104:4; Mataio 26:53; Luka 1:19) Te paruru ra ratou ia tatou ‘i to tatou au aerenga katoa.’ (Mataio 18:10) Te rekareka ra tatou i te arataki anga a te au angera e te tiaki anga ei aronga akakitekite i te Patireia e kia kore e turori i te pae vaerua. (Apokalupo 14:​6, 7) No ko te ‘au toka’ mei te au arairai anga i ta tatou au angaanga ra kare i akariro ia tatou kia turori e kia topa atu oki i te akaperepere anga tu-Atua ra.

16. Akapeea te tukeanga o te rereanga mai o te “liona taae” e te “asepi,” e akapeea ta tatou akono atu ia ratou ra?

¹⁶ Kua tuatua ua atu te tata taramo ra: “Ka takai ua atu koe ki runga i te liona taae, e te asepi; i te liona ou, e te ovi, taau ka takatakai.” (Salamo 91:13) Mei te riona ou ra ka rave atea mai i tana rere anga mai na mua, te akaari ra i te atea tetai papaki o to tatou au enemi i ta ratou patoianga na te akatikaanga i te au ture tei akapapaia ra kia arai i ta tatou angaanga tutuanga. Inara te au ravenga kare ra i manakoia atu mei ta te ovi ra i te tetai ngai pipini anga te rave katoaia ra kia tatou. I te pipini anga na muri maira, i etai taime te rere maira te au orometua kia tatou na roto i te aronga akanoo ture, te au akava, e etai ke ra. Inara ma ta Iehova ra turu anga, kua kimi au ua tatou kia akatikatika i roto i te au akavaanga, na reira te “akatika anga, e te akamou anga i te evangelia nei.”​—Philipi 1:7; Salamo 94:​14, 20-22.

17. Akapeea ta tatou takatakai anga i te “liona ou” ki raro?

¹⁷ Kua tuatua te tata taramo ra i te takatakai anga ki raro “i te liona ou, e te ovi.” Ka rauka kia riri kino tetai riona ou ra, e tetai ovi maata ka rauka kia riro ei manu taae maatamaata. (Isaia 31:4) Noatu ra e akapeea te riri kino o tetai riona ou i te rere mai anga na mua, ka rauka ia tatou te takatakai akatutu atu i te reira na te akarongoanga i te Atua ra auraka te au tangata mei te riona rai te tu me kare te au akaaerenga. (Angaanga 5:29) No reira te “liona” akakoko maira kare e akatupu i te kino pae vaerua kia tatou.

18. Penei koai ta “te ovi” e akamaaraara maira ia tatou, e eaa ta tatou ka tau kia rave me te takinga kinoia maira tatou?

¹⁸ I roto i te Septuagint Ereni, te karangaia ra “te ovi” e “taae maata.” Penei ka akamaara mai teia ia tatou i “te taae maata . . . , taua ovi taito ra ïa, ko tei karangaia i te diabolo ra, e ko Satani oki.” (Apokalupo 12:​7-9, Genese 3:15) Aiteite aia ki tetai manu taae maata tei rauka ra iaia te akapaii e te apukuanga i tana i opu ra. (Ieremia 51:34) Me te tauta ra a Satani i te takaikai i tona iku takapini ia tatou, kia akapaii ia tatou ma te au taomianga o teianei ao, e kia apuku atu ia tatou, e ruru tatou ia tatou uaorai kia matara mai e ka takatakai atu ei i teianei “taae maata” ki raro. (1 Petero 5:8) Ka tika te toenga o tei akatainuia ra kia rave i teia me kia o atu ratou i te akatupu anga ia Roma 16:20 ra.

Ko Iehova​—To Tatou Tumu no te Ora

19. Eaa tatou ka kimi akapuangai ki roto ia Iehova?

¹⁹ No te tangata akamori mou ra, kua akatutu mai te tata taramo ra i te Atua i te tuatuaanga: “No te mea te inangaro maira aia iaku, ka akaora au iaia: ka akateitei au iaia ki runga, no te mea te kite ra aia i toku ra ingoa.” (Salamo 91:14) Te takiota tuatua “ka akaora au iaia” te aiteanga tikai, “ka akateitei au iaia ki runga,” koia oki, kia kore e itaeia. Ka akariro tatou ia Iehova ei akapuanga i te aronga akamori iaia e maata atu oki no te mea ‘te inangaro ra tatou iaia.’ (Mareko 12:​29, 30; 1 Ioane 4:19) Ei tupu anga, kua ‘akaora maira te Atua ia tatou’ mei to tatou au enemi. Kare rava tatou e akapouia atu i te enua nei. Mari ra, ka akaoraia tatou no te mea kua kite tatou i te ingoa tu-Atua e kua kapiki i te reira i te akarongo. (Roma 10:​11-13) E kua tamanako tikai tatou kia ‘aaere i te ingoa o Iehova e tuatatau ua atu.’​—Mika 4:5; Isaia 43:​10-12.

20. Mei ta Salamo 91 i akaoti maira, eaa ta Iehova ra i taputou ki tona au tavini tiratiratu?

²⁰ I te akaoti anga a Salamo 91, kua tuatua atura Iehova no tona tavini tiratiratu: “E kapiki mai aia iaku ra, e naku e karanga atu kiaia; ei vaitatao au iaia kia rokoia e te tumatetenga; e akaora atu au iaia, e akangateitei atu au iaia. Ka akamataora atu au iaia i te aʼo roa, e akakite au kiaia i te ora naku.” (Salamo 91:​15, 16) Me kapiki tatou i te Atua na roto i te pure tei tau ki tona anoano, ka pau mai aia ia tatou. (1 Ioane 5:​13-15) Kua na roto mai tatou i te tumatetenga maata no te riri akatupuia mai e Satani. Inara na te au tuatua “ei vaitatao au iaia kia rokoia e te tumatetenga” te teateamamao ra ia tatou no te au timataanga a te tuatau ki mua e te akapapu maira ia tatou e ka akono te Atua ia tatou i te akapou anga o teianei akatereanga kino nei.

21. Akapeea te akakaka anga kua oti ke ra ki te aronga akatainuia ra?

²¹ Noatu rai ta Satani patoianga kino, ka akakakaia atu te katoa anga o te aronga akatainuia ra i roto ia tatou ki te rangi i ta Iehova ra tuatau tau​—i muri ake i “te aʼo roa” i te enua nei. Inara, ka apai ke mai ta te Atua ra au akaora anga maata i te kaka pae vaerua ki te aronga akatainuia ra. E mei teaa ra ratou i te akangateitei angaia kia rave i te arataki anga ei Au Kite no Iehova i runga i te enua nei i teia tuatau openga nei! (Isaia 43:​10-12) Ka tupu ta Iehova ra akaora anga maata katoa i tona au tangata i tana tamaki maata ia Aramakito me akatika aia i tona ngateitei e te akatapuanga i tona ingoa tapu ra.​—Salamo 83:18; Ezekiela 38:23; Apokalupo 16:​14, 16.

22. Koai ma ka ‘kite i te ora na Iehova’?

²² Me no te au Kerititiano akatainuia ra tatou me kare no to ratou au oa akatapuia ra, ka akara atu tatou ki te Atua no te ora. A te tuatau “i taua rā maata e te rikarika o Iehova ra,” ko te aronga te tavini tiratiratu ra i te Atua ka ora ratou. (Ioela 2:​30-32) Te aronga o tatou no te “aronga maata” te ka ora atu ki roto i ta te Atua ao ou e ka vai tiratiratu katoa i te timataanga openga ra ka ‘akamataoraia e ia ma te aʼo roa’​—te oraanga openga kore. Ka akatuakaou katoa mai aia i te aronga tini ra. (Apokalupo 7:9; 20:​7-15) Ka mareka maata katoa oki a Iehova i te ‘akakite kia tatou i te ora’ na roto ia Iesu Karaiti. (Salamo 3:8) Ma taua manakonako anga mekameka ra ki mua ia tatou, e akara tamou atu tatou ki te Atua ra no te tauturu i te tatauanga i to tatou puke ra ei akakaka iaia. Na ta tatou au tuatua e te au angaanga, kia rave ua atu tatou i te akapapu anga e ko Iehova to tatou akapuanga.

[Tataanga Rikiriki i Raro]

Akapeea Koe me Pau?

• Eaa tei “raro ake i te tapoki o Tei Teitei ra”?

• Eaa tatou i kore ei e mataku?

• Akapeea i riro ei ‘kare rava tatou e rokoia e te kino’?

• Eaa i raukai ia tatou kia tuatua e ko Iehova to tatou tumu no te ora?

[Tutu i te kapi 17]

Te kite ra ainei koe i akapeea ta Iehova ra tuatua mou i riro ei ei paruru maata no tatou?

[Au Tutu i te kapi 18]

Te tauturu ra Iehova i tona au tavini kia akono i ta ratou angaanga orometua noatu te au araianga manako koreia e te patoianga atea

[Akameitakianga]

Cobra: A. N. Jagannatha Rao, Trustee, Madras Snake Park Trust