Kua Tamata Ana Ainei Koe i te Akakitekiteanga i te Aiai?
1 E kite ana tatou pouroa i te rekareka me puapingaia ta tatou angaanga. I tetai tua, me kare tatou e kite atura i te au tupuanga meitaki, ka riro te angaanga ei mea roiroi e te reka kore. E mea meitaki uaorai te angaanga puapinga, e e akameitakianga te reira. (Akaaite ia Koheleta 3:10-13.) Ka rauka ia tatou kia taangaanga i teia kaveinga ki ta tatou angaanga tutu aere anga. Kua kite tatou mei te au tupuanga e me aere tatou mei tera are ki tera are e kua rauka i te pukapuka atu ki te tangata no runga i te Pipiria, kua akaangaia rai to tatou roi i te pae vaerua i te oki anga ki te kainga. To tatou manako kua rauka ia tatou i te akatupu tikai i tetai apinga.
2 I te au ngai e manganui kua riro ei mea ngata i te kite i te tangata i te kainga i tetai au ora i te ra. Te akaari maira te au ripoti e i te au ngai e manganui kua tere atu i te 50 patene o te tangata kare i te kainga me atoro vave atu tatou i te ra. E akono ana te au putuputuanga e manganui i teia manamanata na te rave anga i te au akanoonooanga no te akakitekiteanga i te aiai, e e puapinga meitaki ta ratou i kite. Kua ripoti mai te au papuritia e me atoro atu ratou i muri mai i taua ra rai, e maata atu te tangata i te kainga, e no te maata anga, e tu maru atu to te tangata e te varenga ua i te akarongo mai ki te karere o te Patireia. Kua tamata ana ainei koe i te akakitekiteanga i te aiai i roto i ta kotou ngai e angaanga ra?—Akaaite ia Mareko 1:32-34.
3 E Akaaere te Aronga Pakari i te Akakitekiteanga i te Aiai: I tetai au ngai e meitaki te turuturuanga no te au uipaanga no te tavini anga koro i te avatea aiai me kore i te ora aiai. Te akamanakoanga kia orongaia atu no te au papuritia mapu ou e aere mai ra mei te apii i te avatea e te aronga mamaata tei akaoti mai mei ta ratou ngai angaanga i muri mai. Tetai au papuritia kare e rauka ana kia tae ki te tavinianga koro i te au openga epetoma kua kite e ko te mataara tau no ratou kia piri putuputu atu ki roto i te angaanga tutu aere anga koia oki ko te akakitekiteanga i te aiai.
4 E tukeke te au angaanga te ka rauka ia koe kia piri atu ki roto i te taime akakitekiteanga i te aiai. Ka rauka ia koe kia aere mei tera are ki tera are ma te au makatini me kore i te taangaanga i te au puka ka oronga no te marama. E taime meitaki te aiai i te atoro i te tangata kare i te kainga i te atoro anga atu te au papuritia i mua ao i taua ra ra me kore i te au openga epetoma. Penei e ngai meitaki katoa tetai no te akakitekiteanga i te pae mataara, te ka akatika ia koe kia aravei atu i te aronga e oki maira ki te kainga mei te angaanga. E manganui tei kite e e taime meitaki te aiai i te rave i te au atoroanga akaou i te aronga tei akaari mai ra i te inangaro.
5 Kia Matakite e kia Pakari: I tetai au ngai e mea kino te aere ki vao i te taime e akapoiri atura me kore i muri ake i te poirianga. E mea pakari kia aere taki rua me kore e ta pupu na te au mataara turama meitakiia e e atoro ua i te au kainga me kore i te au are apatimani me e akapapuanga tetai e ka meitaki ua koe. Me topapa koe i te ngutupa, e tu ki te ngai ka kiteaia mai koe, e ka akakite taka meitaki ei ia koe uaorai. Kia karape. Me kite koe e kare i te taime tau noou i te atoro, mei te mea e te kaikai ra te ngutuare tangata, e pati kia oki akaou mai a tetai taime ke. Tei matauia e meitaki atu i te rave i taau akakitekiteanga ki te au ora avatea aiai, i to te taroaroa i te rave i te au atoroanga, i te taime e akapapa ra te aronga ngutuare i te akaangaroi no te po.
6 Ko te au aiai roa tikai o te tuatau vera te ka tau no te akakitekiteanga i te aiai. Ia tatou e oronga ra ki te Atua “i te angaanga tapu i te ao e te po,” ka akameitaki tika mai a Iehova i ta tatou au tautaanga.—Apo. 7:15, NW.