Tapao

Rave Anga i te Au Apiianga Pipiria Tere ki Mua

Teia kapi i roto ake e au akaputuanga o te au manako maata mei te au putunga atikara no runga i te rave anga i te au apiianga Pipiria tere ki mua tei kiteaia mai i roto i Ta Tatou Angaanga Patireia. Te akamaroiroiia ra te katoatoa kia tapao i teia kapi i roto ake e kia akara atu i te reira me te rave ra i te au apiianga Pipiria. Kapiti katoa mai, penei ka rauka te au manako mei teia kapi i roto ake i te akakiteia i te au uipaanga no te tavinianga koro, e penei ka rave te au akaaere tavini i te reira ei tumuanga no te au ako ta ratou ka oronga i te atoroanga i te au pupu no te apii puka.

Tuanga 1: Eaa te Apiianga Pipiria?

Me rave putuputu koe e te mako tikai i te au uriurianga Pipiria, noatu e poto ua, te taangaanga anga i te Pipiria ma te au puka tei akakiteia mai, te rave ra koe i tetai apiianga Pipiria. Kia ripotiia te apii me kua raveia ana e rua taime i muri ake i te akatutu angaia te akanooanga o te apiianga e me e tumu anga tetai kia irinaki e ka rave uaia atu rai te apiianga.​—km 7/04 kapi 1.

Au Puka Akakiteia Mai

◼ Eaa ta te Atua e Umuumu Maira ia Tatou?

◼ Te Kite te ka Arataki ki te Ora Mutu Kore

◼ Akamori i te Atua Mou Anake

◼ Penei ka rauka te Ka Riro Koe ei Oa no te Atua! kia taangaangaia kia apii ki te au tangata e e meangiti ua te apii me kore te kite no te tatau.

Tuanga 2: Akapapa Anga no te Rave i te Apiianga

Ka anoanoia tatou kia oronga i te akakiteanga na te mataara te ka akakeu i te ngakau o te tangata apiipii. No teia ka umuumuia te akapapaanga meitaki tikai ma te akamanako atu i te tangata apiipii.​—km 8/04 kapi 1.

Akapeea me Akapapa

◼ Akara matatio i te upoko tuatua, te au tumu manako, e te au tutu ei tauturu o te pene me kore te apii.

◼ Akataka i te au pauanga ki te au uianga tei tataia, te akairaira anga ua i te au tuatua maata e te au takiota tuatua.

◼ E iki ko teea te au irava akakiteia ka tatau i te taime o te apiianga. Kia tata poto ua i te au manako ki te pae mai o te puka e apiiia ra.

◼ Akapapa i tetai akamanakoanga poto ua o te au manako maata.

Akatano i te Apii ki te Au Anoano o te Tangata

◼ E pure no runga i te tangata apiipii e tona au inangaro.

◼ E tapapa atu i te au manako penei te ngata ra i te tangata apiipii kia marama me kore kia ariki.

◼ E akamanako: Eaa ra tana ka anoano kia marama me kore kia taangaanga kia tere ki mua i te pae vaerua? Akapeea e rauka ai iaku i te itae i tona ngakau?

◼ Me inangaroia, e akapapa i tetai akatutuanga, i tetai akamaramaanga, me kore i tetai au uianga ei tauturu i te tangata apiipii kia marama i tetai manako me kore i tetai irava.

Tuanga 3: Taangaanga Meitaki Anga i te Au Tuatua Tapu

To tatou akakoroanga i te rave anga i te au apiianga Pipiria koia oki kia ‘akariro i te pa enua ei pipi’ na te tauturu anga i te au tangata kia marama e kia ariki i te au apiianga no te Tuatua a te Atua e kia akono i te reira i roto i to ratou oraanga. (Mata. 28:19, 20; 1 Tesa. 2:13) No reira, ka tau te apii kia akamouia ki runga i te au Tuatua Tapu.​—km 11/04 kapi 8. (kapi 4 U.S tata.)

Apii mei ta te Atua Tuatua

◼ Akaari ki te tangata apiipii e akapeea i te kimi anga i tetai au irava tikai i roto i tana uaorai kopi o te Pipiria.

◼ Akara e kia tatau i te au irava Pipiria te akaari ra i te tumuanga Tuatua Tapu no to tatou au irinakianga.

◼ Taangaanga i te au uianga. Kare e akamarama atu i te au irava Pipiria ki te tangata apiipii ra, e tuku e nana e akamarama mai te reira kia koe.

◼ Akono ngoie ua i te reira. Auraka e tauta kia akataka atu i te au tu ravarai o tetai irava. E kapiti ua mai i te ka inangaroia kia akataka meitaki i te tumu manako.

◼ Tuku anga i te akonoanga tau. E tauturu i te tangata apiipii i te kite e akapeea te au irava Pipiria e akonoia ra kiaia uaorai.

Tuanga 4: Tereni Anga i te Aronga Apiipii i te Akapapa

Ko te tangata apiipii ka tatau i te apii i mua ake, ka akairaira i te au pauanga, e ka akamanako e akapeea te tuatua anga i te reira i roto i tana uaorai au tuatua ka viviki ua i te tupu i te pae vaerua. No reira, me oti ana tetai apiianga putuputu i te akanooia, e akapapa kapiti i te apii kia akaari ki te tangata apiipii e ka akapeea. Te maataanga i te aronga apiipii, ka tauturu maata te akapapa kapiti anga i tetai pene me kore i tetai apiianga katoa.​—km 12/04 kapi 1.

Au Akairaira Anga e te Au Tataanga

◼ Akamarama e akapeea me kimi i te au pauanga tika ua ki te au uianga i neneiia.

◼ Akaari ki te tangata apiipii i taau kopi o te puka apii tei akairaira koe i te au manako me kore i te au takiota tuatua maata.

◼ Tauturu iaia kia kite e te turu ra te au irava tataki tai i te manako i roto i te parakarapa e akaari kiaia e akapeea me tata i tetai au manako poto ua ki te pae mai i roto i tana puka apii.

Kimi Marie e te Akara Akaou

◼ Akaari i te tangata apiipii e akapeea i te makitoro anga i te pene me kore te apii o te tumu tuatua, tumu tuatua meariki, e te au akatutuanga i mua ake ka akamata ai i tana akapapa meitakianga.

◼ Akamaroiroi i te tangata apiipii kia akara poto akaou i te au manako maata i roto i te openga i te akapapaanga i te apii.

Tuanga 5: Akataka Anga i te Maata o te Apii ka Raveia

Tei runga te maata o te apii ka akamanakoia i te tu kite e te au turanga o te puapii e te tangata apiipii.​—km 1/05 kapi 1.

Patu i te Akarongo Ketaketa

◼ Auraka e akaatinga i te rauka anga te marama taka meitaki i te tangata apiipii no te Tuatua a te Atua na te rapurapu anga i te apii.

◼ E akapou i tetai ua atu taime ka tau i te tauturu i te tangata apiipii kia marama e kia ariki i tana e apii ra.

◼ Tuku kia rava te taime i te akamanako i te au irava puapinga e oronga maira i te tumuanga no te au apiianga.

Tamou Marie ki te Apiianga

◼ Me ka inangaro te tangata apiipii i te tuatua roa no runga i tetai au mea uaorai, penei e akanoo koe kia oti te apii ka uriuri ei i teia au mea.

◼ Auraka kia tuatua maata i te taime o te apii. E kotinga i te uriurianga o te au manako tauturu e te au tupuanga kia kore e riro mai ei tamanamanata i te rauka anga mai i te tangata apiipii te kite tika tikai o te au apiianga tumu a te Pipiria.

Tuanga 6: Me Ui Mai te Tangata Apiipii i Tetai Uianga

Me akanoo meitakiia ana tetai apii Pipiria, tei matauia e mea meitaki i te akamanako i te au apiianga Pipiria na roto i te tu mako auraka ra kia rererere ua mei tetai tumu manako ki tetai tumu manako. Ka tauturu teia i te tangata apiipii i te patu i tetai tango no te kite tika tikai e kia tere meitaki ki mua i te pae vaerua.​—km 2/05 kapi 6.

Kia Kite Meitaki

◼ Te au uianga te kapiti atura ki te apii tei akamanakoia ra ka rauka ua i te pauia i taua taime rai.

◼ Me kare te au uianga e kapiti atura ki te manako e apiiia ra me kore ka umuumuia tetai kimikimianga e mea meitaki atu i te akamanakoia a tetai tuatau ke. Penei e mea meitaki kia tata i taua au uianga ki raro.

◼ Me te ngata ra i tetai tangata apiipii i te ariki i tetai apii anga tikai, e akamanako atu i tetai atu au puka te uriuri meitaki ra i te tumu manako.

◼ Me kare rai te tangata apiipii e irinaki ana, akaruke ua i te tumu manako no tetai tuatau ke e tamou ua atu i te apii.

Kia Tau Ua

◼ Me kare koe e papu roa ana i te pauanga ki tetai uianga, auraka e oronga ua atu i tetai tamanakoanga.

◼ E apii ua atu rai i te tangata apiipii e akapeea i te raveanga i te kimikimi anga.

Tuanga 7: Oronga Anga i te Pure i te Apii

E rauka ai i te aronga apiipii Pipiria i te tere meitaki ki mua i te pae vaerua, e puapinga maata ta Iehova akameitakianga. No reira, e mea tau kia akatuera e kia taopenga i tetai apii akanoo meitakiia ma te pure.​—km 4/05 kapi 6. (3/05 kapi 4 U.S. tata.)

Akapeea me Oronga i te Pure

◼ Ma te aronga e inangaro to ratou i roto i te akonoanga ka rauka te pure i te orongaia mei te apii mua tikai.

◼ Ma tetai ke ra, ka inangaroia tatou i te akara meitaki i te tuatau tau i te oronga i te pure.

◼ Ka rauka i te taangaanga ia Salamo 25:4, 5 e 1 Ioane 5:14 kia akataka eaa ra i orongaia ai te pure.

◼ Ka rauka i te taangaanga ia Ioane 15:16 i te akaari e ka tau tatou kia pure kia Iehova na roto ia Iesu Karaiti.

Eaa te ka Kapitiia Mai i Roto i te Au Pure

◼ E mea tau kia oronga i te akapaapaaanga kia Iehova e ko te Tumu no te ikuikuanga.

◼ Akaari i te inangaro ngakau tae i roto i te tangata apiipii.

◼ Akaari i te arikianga no te akaaerenga ta Iehova e taangaanga ra.

◼ E pati i ta Iehova akameitakianga i runga i te tautaanga a te tangata apiipii i te akono i tana i apii.

Tuanga 8: Aratakianga i te Aronga Apiipii ki te Akaaerenga

Ta tatou akakoroanga i te rave anga i te au apii Pipiria kare e kia apii ua i te akakiteanga no te akonoanga mari ra kia tauturu katoa i te aronga apiipii kia riro mai ei tuanga no te putuputuanga Kerititiano. E akono nga mea miniti ua i te epetoma tataki tai i te apii atu i tetai manako no runga i ta Iehova akaaerenga.​—km 5/05 kapi 8. (4/05 kapi 8 U.S. tata.)

Au Uipaanga Putuputuanga

◼ Akataka tataki tai i te uipaanga putuputuanga. Mei te apii mua, e pati atu ia ratou kia aere mai.

◼ E oronga atu i te au manako takake tikai tei orongaia i te au uipaanga.

◼ Akamaroiroi i te tu maoraora no te Akamaaraanga, te au akaputuputuanga, e te atoroanga mei te akaaere kotinga.

◼ E taangaanga i te au tutu i roto i ta tatou au puka e tauturu atu ia ratou i te akamanako tikai eaa te tupu ra ki reira.

◼ Akamaroiroi ia ratou kia tatau i te poroutia Au Kite o Iehova​—Rave Taokotai ra i to te Atua Anoano i te Ao Katoa.

Taangaanga i te Au Vitio kia Akamaroiroi i te Arikianga

◼ Jehovah’s Witnesses​—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Tuanga 9: Akapapa Anga i te Aronga Apiipii kia Akakitekite Ua

Me akamata te aronga apii Pipiria i te tuku i te akarongo i roto i ta ratou e apii ra, ka akakeuia ratou kia tuatua no runga i te reira.​—km 5/05 kapi 1.

Akamaroiroi ia Ratou kia Akakitekite

◼ E au taeake e te au mema pamiri ainei tetai ka rauka iaia i te pati kia piri mai ki te apii?

◼ Te akaari maira ainei tetai o tona au oa angaanga, au oa i te apii, me kore etai au taeake i te inangaro?

Tereni ia Ratou kia Akakite i to Ratou Irinakianga

◼ I te au ngai tau i te taime apii, ui ki te tangata apii, “Akapeea koe me taangaanga i te Pipiria i te akamarama anga i te tuatua mou ki toou pamiri?”

◼ Tauturu i te tangata apii kia marama e ka anoanoia te tu akangateitei e te meitaki me tuatua ki etai ke no runga i te Atua ko Iehova e tona au akakoroanga.

◼ Te poroutia Au Kite o Iehova​—Rave Taokotai ra i to te Atua Anoano i te Ao Katoa ka rauka i te aronga apii i te taangaanga ei tauturu i te au taeake e te au mema pamiri kia marama i to tatou irinakianga e te au angaanga tei akatumuia ki roto i te Pipiria.

Tuanga 10: Terenianga i te Aronga Apiipii i Roto i te Angaanga Orometua

Me kite mai te aronga pakari e kua tau te tangata apiipii Pipiria ei papuritia kare i papetitoia ake, ka rauka iaia i te piri atu ki te putuputuanga i roto i te angaanga tutu anga papuriki.​—km 6/05 kapi 1.

Akapapaanga Kapiti

◼ E akaari i te tangata apiipii e ka kitea mai e ia iea te au tuatua akamataanga tamanakoia.

◼ Tauturu atu iaia i te iki i tetai araveianga mama ua te tau ra no te ngai tavinianga i reira.

◼ Akamaroiroi atu iaia kia taangaanga i te Pipiria i roto i tana angaanga orometua.

◼ Akamatau kapiti korua. E akaari kiaia e akapeea i te akono tau atu i te au pauanga matauia.

Tutu Kapiti Anga

◼ E tuku i te tangata apiipii kia akara mai ia koe e oronga ra te tuatua akamataanga ta korua i akapapa kapiti ei.

◼ E akamanako oki i te tu e te tu karape o te tangata apiipii. I tetai au taime, penei e mea meitaki kia tuku iaia kia oronga i tetai tuanga ua o te tuatua akamataanga.

◼ Tauturu i te papuritia ou i te akanoo i tetai papaanga tamou no te piri atu anga ki roto i te angaanga orometua.

Tuanga 11: Tauturu Anga i te Aronga Apiipii i te Akono i te Atoro Akaou Anga

Te akapapaanga no tetai atoro akaou anga ka akamata roa mai ma te atoro anga mua. E akamaroiroi i te tangata apiipii kia akono i tetai inangaro tikai i roto i te aronga tana e tuatua ra. E tereni marie ua iaia kia maani ia ratou kia akakite mai i to ratou manako, kia akarongo ki ta ratou au tuatua, e kia tamou i te au apinga te manata ra ratou.​—km 7/05 kapi 1.

Akapapa Anga kia Oki Akaou

◼ Akara akaou i te atoroanga mua, e tauturu i te tangata apiipii kia iki i tetai tumu manako te ka rekaia e te ngutuare tangata.

◼ E akapapa i tetai akamataanga tuatua poto ua te akaari ra e tai irava Pipiria e kapiti katoa mai tetai parakarapa i roto i te puka apii.

◼ E akapapa i tetai uianga te ka rauka i te uiia i te openga o te uriurianga.

Maroiroi i te Oki Akaou

◼ Akamaroiroi i te tangata apiipii kia oki viviki atu ki te katoatoa tei akaari mai i te inangaro.

◼ Tauturu i te tangata apiipii kia kite i te inangaro kia tamou marie i te itaeanga i te aronga e ngata i te kiteaia mai.

◼ E akaari ki te papuritia ou e akapeea i te akanooanga i te au taime, e tauturu iaia kia marama i te inangaro kia oki akaou atu mei tei taputouia.

Tuanga 12: Tauturuanga i te Aronga Apiipii kia Akamata e kia Rave i te Au Apii Pipiria

Toou aru anga ia Iesu na te akanoo anga i tetai akaraanga meitaki i roto i taau uaorai angaanga orometua e mea puapingaia. E te akarakara ua maira taau tangata apiipii i toou akaraanga i roto i te angaanga orometua, ka marama mai aia e te akakoroanga i te maani anga i te au atoro akaouanga koia oki kia akamata i te au apii Pipiria.​—km 8/05 kapi 1.

Orongaanga i Tetai Apii Pipiria

◼ Akataka atu ki te tangata apiipii e kare e umuumu tikaiia ana i te akataka maata i te akanoonooanga tikai no te apii.

◼ E maata te taime e mea meitaki atu i te akatutu ua i te apii taangaanga anga e tai me kore e rua paa parakarapa mei tetai puka apii.

◼ Akara akaou e akamatau i tetai o te au tamanakoanga no te akamataanga i te au apii Pipiria.​—km 8/05 kapi 8; km 1/02 kapi 6.

Terenianga i te Aronga Apiipii kia Riro mai ei Au Puapii

◼ Akamaroiroi i te aronga apiipii kia piri atu ki roto i te Apii Orometua Teokaratiki.

◼ Akanoo no te au papuritia ou kia aru i runga i tetai akaou atu au apii Pipiria e penei ka rauka ia ratou tetai pirianga meangiti ua i roto i te apiianga.