Au Patianga Akamaaraanga kia Tuaia i te Ao Katoa!
1. Eaa te kamupeini puapinga i te ao katoa e paraniia nei i mua ake i te Akamaaraanga?
1 “E akapera kotou ei manako anga iaku.” (Luka 22:19) I te akono anga i teia akauenga na Iesu, ka akaputuputu te aronga akamori ia Iehova e te aronga e inangaro ra a te ra 30 o Mati, 2010, i te akamaara i te matenga o Iesu. Ka tuaia tetai patianga puapinga ki te Akamaaraanga i te ao katoa mei te ra 13 ki te ra 30 o Mati.
2. Akapeea tatou me oronga i te patianga?
2 Peea Me Oronga: Penei ka oronga koe i te patianga ki te tangata ngutuare kia kite aia i te tutu o te kapi mua e ka karanga e: “A te ra 30 o Mati i te aiai, mirioni ua atu takapini i teia ao ka uipa i te akamaara i te matenga o Iesu. Te apai mai nei au i teia patianga naau e toou ngutuare tangata kia tae mai ki teia akamaaraanga. Ka ariki katoaia toou au taeake.” Me ka tika, e akakite i te taime e te ngai no teia akamaaraanga. Tei runga ua i te turanga o tera tangata, penei e tatau ia Luka 22:19 mei te Pipiria i te akaari atu i te akauenga Tuatua Tapu. Inara, e akamaara e kua kotingaia te taime i te kapi i te ngai tutuanga, no reira e meitaki i te tapoto ua i te tuatua.
3. Koai ma taau ka pati?
3 Me e aka ngai tutuanga to taau putuputuanga, penei ka akakite atu te aronga pakari kia koe kia akaruke i te au patianga ki te au ngutuare kare e tangata i te kainga, i te atoro anga mua. Me ka tau, oronga atu i te au makatini me oronga koe i te patianga. Akapapu i te pati i te aronga e atoro ana koe, te aronga apii Pipiria, te au taeake angaanga, te au oa apii, te kopu tangata, te au tangata tupu, e te aronga e piri atura koe.
4. Te ariki rekareka anga i te aroa o Iehova i te oronga anga mai i te oko ka akakeu ia tatou kia rave i teaa?
4 Akapapa kia Piri Pu Tikai: E taime meitaki rava te tuatau Akamaaraanga i te akamaata i ta tatou angaanga. Ka rauka ainei ia koe i te akanoo i taau papaanga kia painia tauturu? E tamariki me kore e aronga apii Pipiria ainei taau te tere meitaki ra i te pae vaerua? Me koia ia, aravei atu i te aronga pakari kia akara me ka tau teia aronga ou kia piri ki roto i teia kamupeini puapinga ei au papuritia kare i papetitoia ake. Te ariki rekareka anga i te aroa o Iehova i te oronga anga mai te oko, ka akakeu ia tatou kare e kia tae ua mai ki te Akamaaraanga, mari ra kia pati katoa i te maata anga te ka rauka kia piri mai kia tatou.—Ioa 3:16.