Akakitekiteanga no te Akamaaraanga te ka Akamata i te ra 17 o Mati
1. Eaa te akakitekiteanga maata te ka akamata i roto ia Mati ra 17?
1 Kua riro te akono anga i te Akamaaraanga i te au mataiti ei akakitekite anga i te mate o Iesu. (1 Kori. 11:26) No reira, ka inangaro tatou i tetai pae kia kapiti mai i te akarongo no runga i ta Iehova apinga aroa no te oko. (Ioa. 3:16) Teia mataiti ka akamata ta tatou akakitekiteanga maata i te Maanakai, ra 17 o Mati, no te pati anga i te au tangata kia aere mai ki te Akamaaraanga. Te tapapa atura ainei koe kia piri maata atu ki te reira?
2. Eaa ta tatou ka tuatua no te oronga anga i te patianga?
2 Ta Tatou ka Tuatua: Meitaki atu i te oronga i tetai akakiteanga poto ua. Penei ka karanga tatou e: “Kia orana, tae mai nei matou i te oronga atu i teia patianga na toou pamiri kia aere mai ki te akamaaraanga puapinga o te mataiti te ka raveia i te ao katoa i roto i te ra 5 o Aperira. Ka orongaia tetai akoanga Pipiria te akamarama ra eaa ta te mate o Iesu i akatupu ana e eaa ta te reira e akatupu ra i teianei. Te akaari maira teia patianga i te ngai e te ora no te uipaanga te ka raveia i te ngai ka akaputuputu mai te katoatoa.” Me piri atu tatou ki te tua anga i te au patianga i te au openga epetoma, kia oronga katoa tatou i te au makatini me ka tau te reira.
3. Akapeea tatou me pati kia maata te tangata?
3 Pati Kia Maata: To tatou akakoroanga kia pati kia maata te tangata. Akapapu e kia pati i taau aronga apii Pipiria, atoro akaouanga, kopu tangata, au oa angaanga, au oa apii, tangata tupu e te aronga e piri ana koe. Ka oronga mai te aronga pakari i te au aratakianga akapeea me akaoti meitaki i taau ngai tutuanga. Kua rauka mai tetai au tupuanga meitaki mei te patianga i te au tangata ki te Akamaaraanga i te tuatau o te akakitekiteanga maata o te mataiti. Te aere anga tetai vaine ki roto i te ngai o te akamaaraanga i te mataiti i topa akenei, kua tauturu atu te tavini tauturu iaia i te kimi i te papuritia tei pati atu iaia. Inara, kua akakite mai aia e kare ana tangata i kite i reira, kua orongaia mai tana patianga e tetai tangata e aere ra mei tera are ki tera are i mua atu ana.
4. Eaa te au tumu kia piri atu koe ki te akakitekiteanga maata?
4 Penei ka tae mai tetai tangata ki te Akamaaraanga no te mea kua oronga koe i tetai patianga kiaia. Noatu e ka ariu mai tetai tangata me kare, te oronga ra taau tauta anga maroiroi i tetai akakitekiteanga. Ko te au patianga taau ka oronga, te akakitekite ra e e Ariki mana ririnui a Iesu i teianei. Ka akaari taau piri maroiroi anga ki te aronga e akara maira i te ngai tutuanga, ki te au taeake papuritia e tei maata atu kia Iehova e te ariki oonu ra koe i te apinga aroa ko te oko.—Kolo. 3:15.