Akamata te Tua i te Au Patianga no te Akamaaraanga ia Aperira Ra 2
1. Aea tatou e tua ai i te au patianga no te Akamaaraanga i teia mataiti, e eaa te puapinga o teia kamupeini mataiti?
1 Mei te ra 2 ki te ra 17 o Aperira, ka tua atu tatou i te au patianga ki te tupuanga puapinga rava atu o te mataiti—te Akamaaraanga o te matenga o Karaiti. I te tuatau i topa, e manganui tei ariu mai ki teia kamupeini o te mataiti. Ei akaraanga, i te ra o te Akamaaraanga, kua ringi tetai vaine i te opati manga e kua karanga e: “Koi tae ua mai au ki te kainga, e patianga teia i raro ake i toku ngutupa. Inangaro au i te aere, inara kare i papu iaku te ora.” Kua akamarama atu te taeake e teiea te ngai ka kitea te au akakiteanga i runga i te patianga. Kua taopenga te vaine i tana pukapukaanga na te karanga anga e, “Ka aere au ki ta kotou Akamaaraanga i teia po!”
2. Eaa ta tatou ka tuatua me oronga i te patianga?
2 Peea Tatou me Rave i te Reira: I te mea e kua kotingaia te tuatau i te kapi i te ngai tutuanga, e meitaki kia tapoto ua i te tuatua. Penei ka karanga tatou e: “Kia orana. Inangaro matou i te oronga i te patianga ki toou pamiri ki tetai akamaaraanga puapinga tikai o te mataiti te ka raveia takapini i teianei ao a te Tapati, Aperira 17. [Oronga i te patianga ki te tangata ngutuare.] Ko te ra te reira no te akamaaraanga i te matenga o Iesu. Ka orongaia tetai akoanga Pipiria tei akataka mai akapeea tatou e puapinga ai mei te oko o Karaiti. Te akaari ra teia patianga i te ngai e te ora o te uipaanga te ka raveia i roto i to tatou oire.”
3. Akapeea tatou i te pati anga kia maata atu te tangata?
3 Me e maata te ngai tutuanga a te putuputuanga, penei ka akatika te aronga pakari ia koe kia akaruke i te au patianga i ko i te au kainga kare e tangata, i tetai ngai kare e kitea atu. Akapapu i te pati i ta kotou au atoro akaou anga, kopu tangata, oa angaanga, oa apii, e te aronga e piri atura koe. Me te piri atura ki roto i te tua anga i te au openga epetoma, oronga atu i te au makatini me kua tau. Ka rauka ainei ia koe i te painia tauturu i roto ia Aperira e kia akamaata atu i taau angaanga i roto i teia kamupeini mataora?
4. Eaa tatou ka inangaro ei i te aronga e inangaro maira kia tae mai ki te Akamaaraanga?
4 E akakitekiteanga ririnui te ka rauka i te aronga te ka tae mai! Ka akarongo ratou ki te aroa maata o Iehova na te oronga mai anga i te oko. (Ioa. 3:16) Ka apii ratou e akapeea te Patireia o te Atua i te akapuapinga anga i te tangata. (Isa. 65:21-23) Ka rauka katoa ia ratou te pati i te aronga raverave no tetai apii Pipiria kia maata atu te kite. Te pure nei tatou kia maata atu te aronga ngakau tika ka ariu mai ki teia kamupeini e kia piri mai kia tatou no te Akamaaraanga!