Ka Pau Mai Ainei a Iehova i Taku Pure?

1-2. Eaa ra tatou i manako ei kare a Iehova e pau mai i ta tatou pure?

“KIA mataora oki koe ia Iehova; e nana e oronga mai i ta to ngakau e anoano ra.” (Sala. 37:4) E taputou manea tikai! Te manako ra ainei koe e ka oronga viviki mai a Iehova i te au mea ta tatou i pati? Eaa tatou ka ui ei i taua uianga ra? Akamanako ana i teia au akaraanga. Kua pure tetai tuaine kare i akaipoipo kia patiia aia ki te Apii na te Aronga Tutu Evangeria. Kua pāti te au mataiti e kare akerai aia i patiia mai. Kua pure tetai taeake mapu kia meitaki mai tona maki kia rauka iaia i te tavini pu tikai i roto i te putuputuanga. Inara kare tona maki i meitaki mai. Kua pure te nga metua kia noo ta raua tamaiti ki roto i te tuatua mou. Inara kua akamutu ta raua tamaiti i te tavini ia Iehova.

² Penei kua pure katoa ana koe kia Iehova no tetai apinga, inara kare te reira i pauia mai. Penei ka manako koe e te pau ra a Iehova i te pure a tetai ke, kare ra i taau. Penei kua manako koe e kua rave koe i te tarevake. Kua tupu teia ki tetai tuaine ko Janice.b Kua pure raua ko tana tane kia tavini raua i ko i te Betela. Karanga aia: “Papu tikai iaku e kare e roa atu ana, ka aere maua ki Betela.” Inara kua pāti te au mataiti e kare rai raua i patiia mai ana. Karanga a Janice: “Kua maromaroa au e kua ekoko. Kua ui au e eaa taku i rave kia mareka kore a Iehova. Kua pure au no te aere ki Betela. Eaa aia kare i pau mai i taku pure?”

3. Eaa ta tatou ka uriuri i teia atikara?

³ I tetai taime, penei ka manako tatou me te akarongo maira a Iehova ki ta tatou pure. Kua manako akapera rai tetai aronga tiratiratu o mua ana. (Iobu 30:20; Sala. 22:2; Haba. 1:2) Eaa te ka akapapu mai kia koe e ka akarongo mai a Iehova i taau pure? (Sala. 65:2) Ei pau i teia uianga, ka uriuri tatou i teia au tumu manako: (1) Eaa ta Iehova ka rave? (2) Eaa ta Iehova e inangaro ra kia rave tatou? (3) Eaa tatou ka taui ei i tetai au patianga?

EAA TA IEHOVA KA RAVE?

4. Ia Ieremia 29:​12, eaa ta Iehova i taputou mai ka rave aia?

⁴ Taputou mai a Iehova e ka akarongo aia i ta tatou pure. (E tatau ia Ieremia 29:12.) Akaperepere to tatou Atua i tona aronga akamori mou, no reira ka akarongo mai aia i ta tatou pure. (Sala. 10:17; 37:28) Inara, kare te aiteanga e ka oronga mai aia i te au mea ravarai ta tatou e pati ra. Penei ka tiaki roa tatou i te ao ou e pau mai ei aia i ta tatou pure.

5. Eaa ta Iehova ka akamanako iaia e akarongo ra ki ta tatou pure? Akamārama mai.

⁵ Akamanako ra a Iehova i tona akakoroanga iaia e akarongo ra ki ta tatou pure. (Isa. 55:​8, 9) Ko tetai tuanga o tana akakoroanga, ko te akakī i te enua ki te aronga tei mareka i tana tutaraanga. Inara, karanga a Satani e meitaki atu te tangata i te akaaere ia ratou uaorai. (Gene. 3:​1-5) Kia akapapu e pikikaa ta Satani tuatua, kua ariu a Iehova kia akaaere te tangata ia ratou. Tei tupu, e maata te au manamanata ta te tutara a te tangata i akatupu i teia tuatau. (Kohe. 8:9) Kua kite tatou e kare a Iehova e takore pouroa i te kino i teia taime. Me ka rave aia i te reira, ka manako tetai aronga e te puapinga nei te tutara a te tangata, e ka rauka ia ratou i te akatikatika i to ratou au manamanata.

6. Eaa tatou i irinaki ei e ka rave a Iehova i te mea tau e te aroa?

⁶ Ka pau mai a Iehova i te pure na roto i te au mataara tukeke. Ei akaraanga, i te makiia anga te Ariki ko Hezekia, kua pure aia kia rapakau a Iehova i tona maki. Kua pau a Iehova na te akaoraanga iaia. (2 Ari. 20:​1-6) I tetai tua, te pati anga te apotetoro ko Paulo kia akakore a Iehova i te “tara i roto i [tona] kopapa,” penei e maki, kare ra a Iehova i akakore i te reira. (2 Kori. 12:​7-9) Akamanako katoa i te akaraanga o te nga apotetoro ko Iakobo e Petero. Kua inangaro te Ariki ko Heroda i te tamate ia raua. Kua pure te putuputuanga no Petero e Iakobo. Inara, kua tamateia a Iakobo e kua akaoraia a Petero e tetai angera. (Anga. 12:​1-11) Penei ka ui tatou, ‘Eaa ra a Iehova i akaora ei ia Petero, e kare ia Iakobo?’ Kare te Pipiria i akakite mai i te tumu.c Ka papu ra ia tatou e e “kino kore” ta Iehova au aerenga. (Deu. 32:4) Kua papu katoa ia tatou e kua akaperepere a Iehova ia Petero e Iakobo. (Apo. 21:14) I tetai taime, kare a Iehova e pau mai i ta tatou pure mei ta tatou i manako. No te mea kua irinaki tatou e ka rave ua rai a Iehova i te mea tau e te aroa, kare tatou e ekoko e ka pau mai aia i ta tatou pure.—Iobu 33:13.

7. Eaa ta tatou kare e rave, e no teaa ra?

⁷ Kare tatou e akaaite i to tatou turanga ki to tetai ke. Ei akaraanga, penei ka pati tatou kia tauturu a Iehova ia tatou, inara kare i pauia mai i ta tatou pure. I muri mai, kua kite tatou e kua pure tetai taeake i taua mea ra e kua pau a Iehova i tana pure. Kua tupu teia ki te tuaine ko Anna. Kua pure aia kia meitaki mai te maki cancer o tana tane ko Matthew. I te reira taime rai, kua tu tetai nga tuaine pakarikari i te maki cancer. Kua pure akatenga a Anna no Matthew e no te nga tuaine. Kua meitaki mai te maki o te nga tuaine, inara kua takake a Matthew. No reira, kua manako a Anna e kua meitaki te nga tuaine no te mea kua tauturu a Iehova ia raua. Me ko tera te tu, eaa ra a Iehova i kore ei i pau i tana pure kia meitaki tana tane? Kare tatou i kite i te tumu i meitaki mai ei te nga tuaine. Inara kua kite tatou e ka takore a Iehova i to tatou mamae, e te inangaro ra aia i te akatuakaou i tona au oa tei mate.—Iobu 14:15.

8. (a) Ia Isaia 43:​2, akapeea a Iehova me tauturu ia tatou? (e) Akapeea te pure me tauturu ia tatou i roto i tetai turanga ngatā? (Akara i te vitio Akamaroiroi te Pure ia Tatou.)

⁸ Ka turuturu ua rai a Iehova ia tatou. Ei Metua aroa no tatou, kare a Iehova e inangaro kia tupu te mamae kia tatou. (Isa. 63:9) Noatu rai, kare aia e takore i to tatou au manamanata, tei akaaiteia mei te vai ta’e e te mura a’i. (E tatau ia Isaia 43:2.) Inara, kua taputou mai aia i te tauturu ia tatou kia ‘aere na roto’ i te reira. Kare aia e akatika i to tatou manamanata kia akatupu i te kino kia tatou. Kua oronga katoa mai a Iehova i tona vaerua tapu ei tauturu ia tatou kia akakoromaki. (Luka 11:13; Phili. 4:13) No reira, papu ia tatou e ka oronga ua mai aia i ta tatou e anoano ra kia akakoromaki e kia vai tiratiratu kiaia.d

EAA TA IEHOVA E INANGARO RA KIA RAVE TATOU?

9. Kia tau kia Iakobo 1:​6, 7, eaa tatou i irinaki ei e ka tauturu mai a Iehova ia tatou?

⁹ Inangaro a Iehova kia irinaki tatou iaia. (Ebe. 11:6) I tetai taime, e maata to tatou au manamanata. Ka ekoko tatou me ka tauturu mai a Iehova ia tatou. Inara te akapapu maira te Pipiria e ka rauka ia tatou i te autu i te au manamanata na roto i te mana o te Atua. (Sala. 18:29) No reira kare tatou e ekoko, mari ra ka pure tatou ma te irinaki e ka pau mai a Iehova i ta tatou pure.—E tatau ia Iakobo 1:​6, 7.

10. Akatutu mai akapeea tatou me rave i ta tatou i pati.

¹⁰ Inangaro a Iehova kia rave tatou i ta tatou i pati. Ei akaraanga, penei ka pati tetai taeake kia Iehova i tetai tuatau vā mei tana angaanga kia aere aia ki te uruoaanga tapere. Akapeea a Iehova me pau i tana pure? Penei ka oronga Aia i te tu ngakau toa kia aravei te taeake i tona pu. Inara, ka anoanoia te taeake kia tuatua ki tona pu. Penei ka pati putuputu aia ki tona pu. Me kore, ka pati aia i tetai oa angaanga kia taui i to raua rā angaanga. E penei ka āriki te taeake kia kore e tutakiia no taua rā ra.

11. Eaa tatou ka pure putuputu ei no to tatou au manamanata?

¹¹ Inangaro a Iehova kia pure putuputu tatou no to tatou au manamanata. (1 Tesa. 5:17) Kua akaari mai ta Iesu i tuatua e kare tetai pure a tatou e pau vivikiia. (Luka 11:9) No reira auraka e tuku i te ‘au! E pure putuputu ma te ngakau tae. (Luka 18:​1-7) Me pure putuputu tatou, ka akaari tatou kia Iehova e e mea puapinga tikai ta tatou e pati nei. Te akaari katoa ra tatou i to tatou akarongo e ka tauturu mai aia ia tatou.

EAA TATOU KA TAUI EI I TETAI PATIANGA?

12. (a) Eaa tetai uianga ka ui tatou, e no teaa ra? (e) Akapeea tatou me akangateitei ia Iehova me pure tatou kiaia? (Akara i te pia “Te Akangateitei ra Ainei Taku Pure ia Iehova?”)

¹² Me kare i pauia mai ta tatou i pure ana, e ui tatou i teia au uianga e toru. Mea mua, ‘Kua tano ainei taku e pure ra?’ I te maataanga o te taime, ka manako tatou e kua kite tatou i te meitaki no tatou. Inara kare tatou e puapingaia mei te reira. Me pure tatou no tetai manamanata, penei e ravenga meitaki atu tetai i ta tatou i pure. Penei kare ta tatou pure i tau ki to Iehova anoano. (1 Ioa. 5:14) Akamanako ana i te akaraanga o te nga metua i taikuia i mua ana. Kua pati raua kia Iehova kia noo ta raua tamaiti i roto i te tuatua mou. Akara anga, e patianga meitaki te reira. Inara, kare a Iehova e māro ia tatou kia tavini iaia. Inangaro aia ia tatou e ta tatou tamariki kia iki i te akamori iaia. (Deu. 10:​12, 13; 30:​19, 20) No reira ka anoanoia te nga metua kia pati ia Iehova kia tauturu ia raua kia itae i te ngakau o ta raua tamaiti e te akakeu iaia kia akaperepere ia Iehova e kia riro ei oa Nona.—Mase. 22:6; Ephe. 6:4.

13. Ia Ebera 4:​16, eaa to Iehova tuatau no te tauturu ia tatou? Akamārama mai.

¹³ Te rua o te uianga, ‘Kua tae ainei to Iehova tuatau no te pau i taku pure?’ Penei ka inangaro tatou kia pau vivikiia ta tatou pure. Inara, kua kite a Iehova i te tuatau meitaki no te reira. (E tatau ia Ebera 4:16.) Me kare i pau vivikiia mai ta tatou i pure, penei ka manako tatou e ko ta Iehova pauanga, ‘Kare.’ Inara ko tana pauanga tikai, ‘Ariana.’ Ei akaraanga, e akamanako akaou i te taeake mapu tei pure kia meitaki mai tona maki. Naringa a Iehova i rapakau i tona maki, penei ka rauka ia Satani i te akaapa e te tavini ra aia ia Iehova no te mea kua meitaki aia. (Iobu 1:​9-11; 2:4) Tetai katoa, kua akanoo takere a Iehova i te tuatau no te akakore i te au maki ravarai. (Isa. 33:24; Apo. 21:​3, 4) No reira, kare tatou e tapapa ia Iehova kia rapakau i to tatou au maki i teianei. Penei ka pati te taeake ia Iehova kia oronga mai i te maroiroi e te ngakau ’au kia akakoromaki e kia tavini tiratiratu Iaia.—Sala. 29:11.

14. Eaa taau ka apii mei tei tupu kia Janice?

¹⁴ Akamanako ana i tei tupu kia Janice, tei pure kia tavini raua ko tana tane i Betela. E rima mataiti i pou, kua mārama aia i ta Iehova pauanga ki tana pure. Karanga aia: “Kua apii e kua tauturu mai a Iehova iaku kia akaari i te au tu Kerititiano. Kua anoanoia au kia irinaki kiaia e kia apii meitaki i te Pipiria. Kua anoano katoaia au kia mareka ua i te tavini ia Iehova.” Muri mai, kua patiia a Janice e tana tane kia tavini i roto i te angaanga kotinga. Karanga a Janice: “Kua pau mai a Iehova i taku pure, kare ra mei taku i manako. Kua roa rai au i kite mai ei i te manea o tana pauanga. E kua kite katoa au i tona aroa e te takinga meitaki.”

15. Eaa tatou ka taui ei i ta tatou patianga i tetai au taime? (Akara katoa i te tutu.)

¹⁵ Uianga toru, ‘Ka pure ainei au no tetai apinga ke?’ E mea tau kia taka meitaki ta tatou patianga, inara penei ka kite tatou i to Iehova anoano me taui i ta tatou patianga. Akamanako i te akaraanga o te tuaine kare i akaipoipo tei pure ana kia aere aia ki te Apii na te Aronga Tutu Evangeria. Inangaro aia i te aere ki te apii kia rauka iaia i te tavini i te ngai e anoanoia ra te tauturu. Iaia e pure ra kia aere ki te apii, ka pati katoa aia ia Iehova kia rauka iaia i te rave i tetai tuanga ke o te angaanga tutu aere. (Anga. 16:​9, 10) Muri ake i te pure anga no runga i teia, ka pati aia ki te akaaere kotinga me ka inangaroia tetai au painia i roto i tetai putuputuanga ke. Me kore, ka tata aia ki te opati Betela i te ui e ko teea te au ngai ka anoanoia te au papuritia.e

16. Eaa ta tatou ka irinaki papu?

¹⁶ Mei ta tatou i apii mai, papu ia tatou e ka pau mai a Iehova i ta tatou pure ma te tau. (Sala. 4:3; Isa. 30:18) I tetai taime, kare ta tatou pure e pauia mai mei ta tatou i manako. Inara kare e ngaropoina ia Iehova ta tatou pure. Te akaperepere maata ra aia ia tatou. E kare rava aia e akaruke ia tatou. (Sala. 9:10) No reira “e irinaki iaia, . . . i te au tuatau katoa! e riringi i to kotou ngakau ki mua iaia” na roto i te pure.—Sala. 62:8.