E Titiri Ua Rai i Taau Apainga kia Iehova

E MANGANUI te kite ra kua akaparuparuia ratou e te au apainga. Te au mea ngata o te pae puapinga, te au manamanata apiapi o te ngutuare tangata, te au manamanata oraanga kopapa, te mamae e te mamae o te takinokino anga e te akatere anga maro, e tetai atu au kino te tautau ra mei te au toka taviri takapini i to ratou au kaki. I te pae i te au taomi anga o vao ra, kua akateiaa katoaia etai pae e tetai manako anga puapinga kore e te autu kore uaorai no to ratou uaorai au tu ara. E manganui te timataia ra kia tuku takiri i te au no te tamaki atu. Akapeea koe i te autu anga atu me e ngata roa te au apainga i te akakoromaki?

Kua kite ana te Ariki ko Davida o Iseraela i tetai taime e kua vaitata te taomi anga i te ngata roa no te akakoromaki atu. Kia tau kia Salamo 55, kua arataki keia aia e te taitaia no te au taomi anga e te tu kino o tona au enemi. Kua kite aia i te mamae maata o tona ngakau e te mataku. Kua rauka ua iaia i te ngunguru i tona mamae ngakau. (Salamo 55:2, 5, 17) Noatu tona au tumatetenga, ra, kua kiteaia e ia tetai ara no te autu atu. Akapeea? Kua akara aia ki te Atua no te tauturu. Tana tuatua ako ki tetai atu tei kite i tana i kite ra: “E tuku koe i taau apainga kia Iehova ra.”​—Salamo 55:22.

Eaa te aiteanga o tana i tuatua “e tuku koe i taau apainga kia Iehova ra”? Na te aere ua anga ainei kia Iehova na roto i te pure e te akakiteanga i to tatou taitaia? Me kore ra ka rauka ainei ia tatou uaorai i te rave i tetai mea no te tauturu i te akamaru mai i te turanga? Akapeea me manako tatou e kare tatou i tau no te aere atu kia Iehova? Ka kite tatou i te aite anga o ta Davida tuatua na te akaraanga i etai au kite anga tana i maara meitaki i tona tata anga i taua au tuatua ra.

E Rave i te Au Mea i to Iehova Maroiroi

Te maara ainei ia koe akapeea a Golia i te akatupu anga i te mataku i te au ngakau o te au tangata tamaki o Iseraela? Kua riro teia tangata tuputupua, e tere atu i te 2.7 mita te roroa, ei tamataku ia ratou. (1 Samuela 17:4-11, 24) Inara kare a Davida i mataku ana. No teaa ra? No te mea kare aia i tauta ana i te ta atu ia Golia i tona uaorai maroiroi. Mei tona akatainu angaia ei ariki no Iseraela i te tuatau ki mua, kua tuku aia i te vaerua o te Atua kia arataki iaia e te akamaroiroi iaia i roto i tana au mea pouroa i rave. (1 Samuela 16:13) No reira kua karanga aia kia Golia: “Te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na. Na Iehova koe e tuku mai ki toku rima akonei.” (1 Samuela 17:45, 46) E tangata karape oki a Davida i te maka, inara papu ia tatou e na te vaerua tapu o Iehova i arataki e i akamaata rava atu i te kino o te toka tana i maka ra kia Golia.​—1 Samuela 17:48-51.

Kua tu atu a Davida i teia akaao anga maata e autu atura na te irinaki papu anga e ka tauturu te Atua iaia e ka akamaroiroi iaia. Kua akatupu aia i tetai pirianga meitaki e te irinakiia ma te Atua. Kare e ekoko anga kua akaketaketaia teia e te tu o ta Iehova akaora anga iaia i mua atu ana. (1 Samuela 17:34-37) Mei ia Davida ra, ka rauka ia koe i te akono tamou i tetai pirianga ketaketa uaorai ma Iehova e e raukaʼi te irinaki anga papu tikai i tana ravenga karape e te puareinga ua i te akamaroiroi e te akamatutu ia koe i te au turanga katoatoa.​—Salamo 34:7, 8.

E Rave i Taau ka Rauka no te Rapakau i te Manamanata

Kare ra te aiteanga, e kare rava e au tuatau mamae kino, te taitaia, pera katoa te mataku, mei ta Salamo 55 e akaari tika maira. I etai au mataiti i muri ake i teia akaari anga mataku kore o te irinaki papu anga ia Iehova, ei akaraanga, kua kite a Davida i te mataku maata i te aro anga atu i tona au enemi. Kare te Ariki ko Saula i mareka ana iaia e kua anoanoia aia kia oro e oraʼi. Ka tauta ana i te akamanako i te taitaia manako ngakau ta teia i akatupu kia Davida, te au uianga tei manakoia no te akatupu anga i ta Iehova akakoro anga. I te mea, kua akatainuia aia ei ariki no Iseraela i te tuatau ki mua, inara teia aia e tangata oro kimi ora i roto i te metepara, tei arumakiia mei tetai manu taae rai. I tona tauta anga i te kimi akapuanga i roto i te oire o Gata, te oire kainga o Golia, kua kiteia aia. Eaa tei tupu? Te karanga ra te papaanga “e mataku rava akera aia.”​—1 Samuela 21:10-12.

Inara kare aia i tuku ana i tona mataku e te taitaia oonu kia tapu iaia mei te akaraanga kia Iehova no te tauturu. Kia tau kia Salamo 34 (tei tataia ei openga no teia kiteanga), kua karanga a Davida e: “Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra. Kua kapiki atura taua tangata i mate nei, e kua akarongo mairā Iehova, e kua akaora atura iaia tona katoa ra au tumatetenga.”​—Salamo 34:4, 6.

E tikai, kua tauturu a Iehova iaia. Inara ka kite ana e kare a Davida i noonoo ua e te tiaki ia Iehova kia akaora mai iaia. Kua kite aia i te anoano nona kia rave i te au mea katoatoa tana ka rauka kia atea mai i te turanga ngata ra. Kua akatika aia i to Iehova rima i tona akaora angaia, inara kua rave uaorai aia i tetai mea, te akapikikaa anga e kua auouoia aia i reira te ariki o Gata i kore ei i tamate iaia. (1 Samuela 21:14–​22:1) Ka anoano katoaia tatou i te rave i te au mea katoatoa ka rauka no te autu atu i te au apainga, i te mea ka tiaki ua ia Iehova kia akaora mai ia tatou.​—Iakobo 1:5, 6; 2:26.

Auraka e Akamaata Atu i Taau Au Apainga

Kua apii katoa a Davida i tetai apiianga, tetai mea mamae tikai, i muri roa ake i tona oraanga. Eaa te reira? I tetai au taime na tatou rai e akamaata atu ana i ta tatou uaorai au apainga. I muri ake i te autu anga i rungao i te au Philiseti, kua tarevake te au mea no Davida i tona manako anga no te apai atu i te aruna taputou ki Ierusalema. Te akakite maira te papaanga tuatua enua kia tatou e: “Kua tu akerā Davida, e te au tangata katoa iaia ra, e kua aere ki Baale i o Iuda ra, e apai mai i te aruna a te Atua ra mei reira mai . . . Kua tuku iora ratou i te aruna a te Atua ki runga i tetai kariota ou, . . . e na Uza raua ko Ahio, nga tamariki a Abinadaba ra, i kave i taua kariota ou ra.”​—2 Samuela 6:2, 3.

Na te taangaanga anga i tetai kariota no te apai i te Aruna kua aati pouroa te reira i te au ikuiku anga ta Iehova i oronga no runga i te reira. Kua akataka meitakiia e na te aronga amo anake ua tei akamanaia, te ngati Kohata e te ngati Levi, e apai i te Aruna na runga i to ratou au umauma, te taangaanga anga i te au rakau amo tei tukunaia na roto i te au tatai tikai tei maaniia i runga i te Aruna. (Exodo 25:13, 14; Numero 4:15, 19; 7:7-9) Na te kopaeanga i teia au ikuiku anga ka apai mai te reira i te mate. I nga puakatoro e uuti ra i te kariota i te vaitata anga i te turori i te reira kia topa, ko Uza, e ngati Levi inara kare i te taunga, kua itae atu aia i te akatikatika i te Aruna e kua taiaia e Iehova no tona apa.​—2 Samuela 6:6, 7.

Kua anoanoia a Davida ei ariki kia akakoromaki i teia apa. Te akaari maira tona tu no te reira e noatu te aronga e pirianga meitaki to ratou ma Iehova i tetai au taime ka ariu kino atu ratou ki te au turanga timata anga. I te akamata anga kua riri a Davida. I reira kua mataku mai aia. (2 Samuela 6:8, 9) Kua timata pakariia tona pirianga irinakiia ma Iehova. Ko teia tetai ati anga i te akara anga kua autu kore aia i te titiri i tana apainga ki rungao ia Iehova, i te kore anga aia i aru i tana au akauenga. Ko te turanga ainei teia ia tatou i tetai au taime? E akaapa ana ainei tatou ia Iehova no te au manamanata tei tupu mai no te mea kua kopae tatou i tana au ikuiku anga?​—Maseli 19:3.

Autuanga ma te Apainga o te Apa

I muri mai, kua akatupu a Davida i tetai apainga apa maatamaata nona uaorai na te ara pakari anga i te au turanga akono a Iehova. I teia ati anga kua akaruke aia i tana apainga no te arataki i tona au tangata i roto i te tamaki. Kua noo aia ki Ierusalema i to ratou aere anga i te tamaki. Kua arataki atu teia ki te manamanata pakari.​—2 Samuela 11:1.

Kua kite atu te Ariki ko Davida i te vaine purotu roa ko Bateseba e pai ra. Kua rave raua i te ainga, e nui atura aia. (2 Samuela 11:2-5) Te tamata anga i te uuna i te tu akono kore, kua akanoo aia i tana tane, ko Uria, kia oki mai ki Ierusalema mei te tamaki. Kare a Uria i inangaro ana kia moe raua ko tana vaine koi vai ei a Iseraela i roto i te tamaki. (2 Samuela 11:6-11) I teianei kua kimi atu a Davida i te ravenga kikino e te viivii no te uuna i tana ara. Kua akanoo aia i te au oa vaeau o Uria kia akaruke ia Uria i roto i tetai turanga kino i roto i te tamaki i reira aia e taiaia atu ei. E ara makitakita viivii tikai e te kino!​—2 Samuela 11:12-17.

I te openga, e tikai, kua kiteaia mai ta Davida ara, e kua akamaeuia aia. (2 Samuela 12:7-12) Ka tamata ana i te akamanako i te teiaa o te mamae e te apa ta Davida i mii ra i te kite ake anga aia i te ara maata o tana i rave tei tupu mai mei tona inangaro. Naringa kare kua kakoia rai aia e tona uaorai manako anga autu kore, i te mea tikai e tangata kite ua aia i te mamae manako ngakau. Papu e kua manako puapinga kore takiri roa aia!

Inara, kua viviki ua a Davida i te akatika i tona tarevake, te akakiteanga ki te peroveta ko Natana: “Kua ara au ia Iehova.” (2 Samuela 12:13) Te akakite maira a Salamo 51 kia tatou i tona tu i tona pati akatenga anga ki te Atua ko Iehova kia tama mai iaia e e akakore mai i tana ara. Kua pure aia: “E orei takiri mai koe iaku i toku nei kino; e tamā mai iaku i taku nei ara. Te aaki nei oki au i taku nei ara, e te vai ua nei rai toku kino i mua iaku.” (Salamo 51:2, 3) No te mea kua tataraara tikai aia, kua rauka iaia i te patu akaou i tona pirianga ketaketa e te vaitata kia Iehova. Kare a Davida i manako ua ana i tona au manako ngakau taitaia ma te apa e te puapinga kore. Kua titiri aia i tana apainga kia Iehova na te akatika akaaka ua anga i tona apa, te akaarianga i te tu tataraara tae tikai, e te pure pakari anga ia Iehova kia akakore mai i tana ara. Kua rauka iaia ta te Atua mareka anga.​—Salamo 51:7-12, 15-19.

Autuanga i te Pikikaa

Ka apai mai teia ia tatou ki te tuanga tei akakeu ia Davida kia tata ia Salamo 55. Tei raro ake aia i te taitaia maata o te manako ngakau. “Kua mamae roa toku ngakau i roto iaku nei,” i tata ei aia, “kua rokoia au e te rikarika mate ra.” (Salamo 55:4) Naai i akatupu i teia mamae anga? Na Abasaloma, te tamaiti a Davida, tei parani ra no te rave i te taoonga ariki mei ia Davida. (2 Samuela 15:1-6) Teia pikikaa anga a tana uaorai tamaiti e ngata rava no te akakoromaki, inara tei kino rava atu to Davida tauturu tuatua irinaki ravaia, e tangata tona ingoa ko Ahitophela, kua piri aia ki roto i te parani no te patoi ia Davida. Ko Ahitophela ta Davida i akatutu i roto ia Salamo 55:12-14. Tei tupu mai mei te parani e te pikikaa anga, kua anoanoia a Davida kia oro ki Ierusalema. (2 Samuela 15:13, 14) Mei teaa atura te mamae ta teia i akatupu kiaia!

Noatu rai, kare aia i tuku ana i tona manako ngakau e te mamae kino kia akaparuparu i tona irinaki anga e te tu papu ki roto ia Iehova. Kua pure aia kia Iehova kia takino i te au parani a te aronga akakoko. (2 Samuela 15:30, 31) I konei akaou te kite nei tatou e kare a Davida i noonoo ua i te tiaki ia Iehova kia rave i te au angaanga katoatoa. I te ngai i raukaʼi te tuatau, kua rave aia i te ka rauka tikai iaia i te tamaki atu i te parani akakoko anga iaia. Kua tuku aia i tetai akaou o tona au tauturu tuatua, ko Husai, kia oki ki Ierusalema kia akapikikaa e kua aere mai aia i te piri ki roto i te akakoko anga, inara, te tika anga tikai, kua aere mai aia i te takino i te reira. (2 Samuela 15:32-34) Ma to Iehova tauturu, kua angaanga teia parani. Kua akaroaroa atu a Husai i te taime kia rava no Davida i te akapupu akaou e e akapapa meitaki i te paruru iaia uaorai.​—2 Samuela 17:14.

Mei teaa atura to Davida ariki tikai anga i to Iehova akono anga paruru i tona oraanga katoa e tona akakoromaki katoa e te puareinga ua i te akakore i te ara! (Salamo 34:18, 19; 51:17) No teia papaanga oki i akamaroiroi papu ei a Davida ia tatou i to tatou au taitaia anga kia akara kia Iehova no te tauturu, e ‘tuku tatou i ta tatou apainga kia Iehova.’​—Akaaite ia 1 Petero 5:6, 7.

E Patu e e Akono Tamou i Tetai Pirianga Ketaketa, Irinakiia ma Iehova

Akapeea e raukaʼi ia tatou tetai tu pirianga ma Iehova tei rauka ra ia Davida, e pirianga tei akamatutu iaia i te au tuatau timata anga e te tumatetenga maata? Ka patu tatou i teia tu pirianga na te riro anga mai ei aronga apii aruaru i te Tuatua na te Atua, koia te Puka Tapu. Ka tuku tatou iaia kia apii mai ia tatou i tana au ture, au kaveinga, e tona tu. (Salamo 19:7-11) Ia tatou e manakonako ra i te Tuatua na te Atua, ka tupu vaitata roa tatou kiaia e te apii i te irinaki papu tikai iaia. (Salamo 143:1-5) Ka oonu e te ketaketa te reira pirianga ia tatou e piri atura ki te au oa akamori kia apii maataia atu e Iehova. (Salamo 122:1-4) Ka akamaata tatou i to tatou pirianga ma Iehova na roto i te pure ma te ngakau tae.​—Salamo 55:1.

E tika, mei ia tatou rai, e au taime taitaia to Davida, te kore anga tona pirianga ma Iehova e ketaketa ana mei tei anoanoia. Ka akariro te takinokino anga ia tatou kia “akanenevaia oki.” (Koheleta 7:7) Inara te kite maira Iehova i te tupu ra, e kua kite aia eaa to roto i to tatou ngakau. (Koheleta 4:1; 5:8) Ka anoanoia tatou i te angaanga pakari no te akono i to tatou pirianga kia Iehova kia ketaketa. No reira, noatu eaa ta tatou au apainga e apai ra, ka rauka ia tatou i te irinaki ki runga ia Iehova no te akamaru mai i te taomi anga me kore te oronga mai i te maroiroi kia tatou no te autu i to tatou turanga. (Philipi 4:6, 7, 13) Tei runga ua i to tatou piri vaitata anga kia Iehova. I te rave anga a Davida i teia, kua tinamou tikai tona noo anga.

No reira, noatu eaa toou au turanga, i na Davida ei, e tuku ua rai i taau apainga kia Iehova. I reira tatou e kite ei i te tika anga tikai o tana taputou: “E nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.”​—Salamo 55:22.