Te Ao Ou​—Ko Koe Ainei Tetai i Reira?

“Kare atu e meitaki i taua au mea ra, mari ra kia rekareka te tangata e kia takinga-meitaki i te ora anga nei. Kareka ra kia kaikai anake ra te tangata e kia inu, e kia rave aia i te meitaki no tana katoa ra au angaanga; e mea o maiia mai ïa e te Atua.”​—KOHELETA 3:​12, 13.

1. Eaa ra ka raukai kia irinaki tikai tatou no te tuatau ki mua?

E MANGANUI te au tangata te manako ra i te Atua Mana Katoatoa ei ketaketa, ei mareka kore. Inara, ko te irava i runga akenei e tuatua mou te ka kitea e koe i tana Tuatua akauruia ra. Te tau ra ia ma tona riroanga ei “te Atua mataora” e ma tona tukuanga i to tatou nga metua mua ra ki roto i tetai parataito i te enua nei. (1 Timoteo 1:11, NW; Genese 2:​7-9) I te kimianga i te kite oonu ki roto i te tuatau ki mua ta te Atua i taputou no tona au tangata, kare tatou e tau kia poitirere kia kite i te au tu te ka apai mai i te rekareka anga mutu kore no tatou.

2. Eaa etai apinga taau e akara atura ki mua?

² I te atikara i mua akenei, kua akara matatio tatou e toru o te a tataanga i te ngai te totou ra te Pipiria i “te rangi ou e te enua ou.” (Isaia 65:17) Tetai o aua totou anga tau ra kia irinakiia kua tataia ia Apokalupo 21:1. Te tuatua maira aua irava ra no te tuatau e taui takiri ei te Atua Mana Katoatoa ra i te au tu o te enua nei kia meitaki atu. Nana e orei ke atu i te au roimata mamae ngakau. Kare te au tangata e mate akaou mei te ruaine anga, te maki, me kare te au tumatetenga ra. Ka kore atu te aue anga, te aue maata, e te mamae oki. Mei teaa ra tetai manakonako anga marekaanga! Inara ka papu ainei ia tatou e ka tae mai ia, e eaa te tupu anga kia tatou no taua manakonako anga ra i teianei tikai?

Au Tumu no te Irinaki Anga

3. Eaa ka raukai ia tatou kia irinaki i te au taputou Pipiria no te tuatau ki mua ra?

³ E akamanako ana i ta Apokalupo 21:5 tuatua ua atu anga. Te akakite maira i to te Atua noo anga, ki runga i tona terono i te rangi ra, i te tuatuaanga: “I na, te akariro nei au i te au mea ravarai ei mea ou.” E meitaki atu taua taputou tu-Atua ra i tetai ua atu akakiteanga no te takakeanga, e tetai ua atu pira no te au tika o teia tuatau nei, me kare tetai au atu inangaro o te au tangata no te tuatau ki mua ra. Ko tetai akakite anga tau kia irinakiia na Tei tuatuaia i te Pipiria ra e “kore e tika kia pikikaa.” (Tito 1:2) Ka tika ra, penei ka manako ngakau koe e ka rauka kia tapu tatou i konei tikai, i te rekarekaanga i teianei manakonako anga tau e te irinakianga i te Atua ra. Inara kare tatou e tau kia tapu ua. E maata atu ta tatou no te apii no to tatou tuatau ki mua ra.

4, 5. Eaa te au totou Pipiria kua akamanakoia te ka turu i to tatou irinaki anga no te au mea e vai maira ki mua?

⁴ E akaata ki runga i ta te atikara i mua akenei i akanoo mai i ta te Pipiria au taputou no te rangi ou e tetai enua ou. Kua totou maira Isaia i taua akatereanga ou ra, e kua tupu tana totou i te oki anga te au ngati Iuda ra ki to ratou enua kainga e te akanoo akaou anga i te akamori mou ra. (Ezera 1:​1-3; 2:​1, 2; 3:​12, 13) Inara, ko tera anake ainei ta Isaia totou i tou atura? Kare rava ia! Te au apinga tana i totou ra ka akatupuia i roto i tetai tu meitaki atu i te tuatau mamao ki mua. Eaa ra tatou i tae ei ki tera manakoanga? No ta tatou i tatau ra ia 2 Petero 3:13 e Apokalupo 21:​1-5. Kua tou mai aua tataanga ra ki te rangi ou e tetai enua ou ra te ka akapuapinga i te au Kerititiano i te enua katoa nei.

⁵ Mei tei akakiteia i mua akera, te taiku ra te Pipiria i te takiota tuatua “rangi ou e te enua ou” e a taime. Kua akamanako tatou i te toru o teianei e kua itaeia te au manako akamaroiroianga ra. Te taka meitaki ra e, te totou maira te Pipiria e ka takore atu te Atua i te au rave anga kino e etai atu tumu no te mamaeanga e ka akameitaki atu aia i reira i te au tangata ra i roto i tana akatereanga ou i taputou maira.

6. Eaa ta te a o te totou te taiku maira i “te rangi ou e te enua ou” e akakite maira?

⁶ E akara matatio tatou i teianei i te toenga atu o te tataanga o te tuatuaanga ‘te rangi ou e te enua ou,’ ia Isaia 66:​22-24: “Mei te rangi ou nei oki, e te enua ou, taku e anga, e vai ua mai ki mua iaku nei, te tuatua mairā Iehova, ka pera rai to kotou uanga, e to kotou ingoa, i te vai ua anga. E mei tetai marama ou oki e tae ua atu ki tetai marama ou, e mei tetai sabati e tae ua atu ki tetai sabati, ko te aere anga mai ia o te tangata katoatoa, ka akamori ei ki mua i toku aroaro, te tuatua mairā Iehova. E aere oki ratou ki vao ka akaraʼi i te au ivi o te tangata i meameaau mai iaku: kare oki to ratou tunga e mate, e to ratou ai kare e tamateia; e riro oki ratou ei rikarika anga na te tangata katoa.”

7. Eaa tatou ka tau ei kia irinaki e ka tupu ta Isaia 66:​22-24 i te tuatau te aere mai nei?

⁷ E pirianga to teianei totou ki roto i te akanoo anga te au ngati Iuda ki roto i to ratou enua, inara e akatupu anga tetai a muri akera. Ka riro te reira i muri roa mai i te rua o ta Petero reta e te puka oki o Apokalupo i tataiai, no te mea kua tou atu raua ki tetai tuatau ki mua no ‘te rangi ou e te enua ou.’ Ka rauka ia tatou kia akara atu no taua tupu anga oti takiri e te meitaki oki i roto i te akatereanga ou ra. E akamanako i etai o te au tu ta tatou ka akara atu ki te rekarekaanga.

8, 9. (a) I roto i teea turanga e “vai ua mai” te au tangata o te Atua ra? (e) Eaa te tumu maata o te totou e ka akamori te au tavini o Iehova mei “tetai marama ou oki e tae ua atu ki tetai marama ou, e mei tetai sabati e tae ua atu ki tetai sabati”?

⁸ Kua akakite mai a Apokalupo 21:4 e e kare rava te mate. Te akatika ra te tataanga ia Isaia pene 66 ki te reira. Ka kite tatou mei te irava 22 e te kite ra a Iehova e kare te rangi ou e te enua ou no tetai tuatau poto ua, no te tuatau kotingaia. Pera katoa oki, ka tinamou ra tona au tangata; ka “vai ua mai” ki mua iaia. Na ta te Atua i rave no tona au tangata ikiia ra e oronga mai i te tumu no te irinaki no tatou. Kua aro atu te au Kerititiano mou i te au takinga kino maata noatu rai i te au tauta anga tau kore kia takore atu ia ratou. (Ioane 16:2; Angaanga 8:1) Inara, noatu ko te au enemi ririnui maata o te au tangata o te Atua, mei ia Nero te Emepera o Roma ra e Adolf Hitler oki, kare i rauka kia takore atu i to te Atua aronga tiratiratu ra, tei mou ra i tona ingoa. Kua akaora a Iehova i te putuputuanga o tona au tangata, e ka rauka ia tatou kia irinaki e ka rauka iaia kia tamou i te tuanga o te reira.

⁹ Aiteite katoa, te aronga tiratiratu ki te Atua ei tuanga no te enua ou, te taiate o te aronga akamori mou i te ao ou ra, ka tamou marie i te tuanga tataki tai no te mea ka akono ratou i te akamori ma ki Tei Anga mai i te au mea ravarai. Kare te reira i etai au atinga anake me kare i etai akamori anga anake ra. Kua oronga mai te Ture a te Atua ki to Iseraela na roto ia Mose, i etai au angaanga no te akamori anga i te au marama tatakitai, tei akairoia maira e te marama ou, e i te au epetoma takitai, tei akairoia maira e te ra Tapati. (Levitiku 24:​5-9; Numero 10:10; 28:​9, 10; 2 Paraleipomeno 2:4) No reira kua tou maira Isaia 66:23 kia putuputu, te akamori tamou marieanga i te Atua, i tetai epetoma i muri ake i tetai epetoma e tetai marama i muri ake i tetai marama. Kare te akamori kore i te Atua e te akonoanga pikikaa e vai mai i reira. “Te aere anga mai ïa o te au tangata katoatoa, ka akamori ei ki mua” ia Iehova ra.

10. Eaa koe ka irinaki ei e kare te ao ou e akakino mutu koreia e te aronga rave kino ra?

¹⁰ Kua akapapu maira Isaia 66:24 kia tatou i te au e te tuatua tika o te enua ou ra kare rava ia e o ki roto i te tu kino. Kare rava ia e akakinoia e te aronga rave kino. Kia maara e te tuatua ra 2 Petero 3:7 e i mua ia tatou nei ko “te rā akavaanga, e te mate o te aronga akono kore i te Atua ra.” Te aronga te ka tae ki to ratou openga ko te aronga akono kore i te Atua ra. Kare e kino e rokoia ki te aronga apa kore ra, kare mei te rokoia putuputu ra i te au tamaki a te tangata nei, e maata atu te aronga noa nei i mate, i to te aronga o te vaeau ra. Te akakite papu maira te Akava Maata kia tatou e i tona ra ko te akapou anga i te au tangata akono kore i te Atua anake ra.

11. Eaa ta Isaia i akakite maira ka riro ei te tuatau ki mua no te aronga te ka patoi i te Atua ra e tana akamori anga?

¹¹ Ka kite oki te aronga tuatua tika te ka ora atu e e tika te tuatua totou a te Atua ra. Te totou maira te irava 24 e ko “te au ivi o te tangata i meameaau mai” ia Iehova ka riro ei akapapu anga no tana akavaanga. Penei ka akara anga poitirere te tuatua akataka anga ta Isaia i taiku maira. Inara, te tau ra ia ma te au tika o te tuatua enua ra. I vao ake i te au patu paruru o Ierusalema ra ko te au titiri anga teita e, i etai taime, no te au kopapa mate o te aronga rave kino tei tamateia tei akavaia e kare i tau no tetai tanumanga meitaki.a I reira to ratou tunga e te ai no ratou ra ka akakore atu i te teita e taua au kopapa mate ra kare e roaia. Ei akara anga te akakite maira ta Isaia akatutu anga i te openga no ta Iehova akavaanga ki runga i te aronga rave meameaau ra e te kino.

Tana i Taputou Maira

12. Eaa ta Isaia e akakite katoa maira no runga i te oraanga ki roto i te ao ou ra?

¹² Te akakite maira Apokalupo 21:4 kia tatou i etai apinga kare e vai mai ki roto i te akatereanga ou te aere maira. Inara, eaa te ka vai mai i reira? Eaa te tu o te ora anga? Ka rauka ainei ia tatou etai akataka anga tau kia irinakiia? Ae. Te akataka totou maira Isaia pene 65 i te au tu te ka rekarekaia e tatou me tei ia tatou to Iehova ra mareka anga kia ora me, i te tu openga ra, ka anga mai aia i te au rangi ou ra e te enua ou. Te aronga te ka akameitakiia ma tetai ngai tamou i roto i te enua ou ra kare e ruaine ia e ka mate atu ei. Te akapapu maira Isaia 65:20 kia tatou: “Kare e kitea akaouia ki reira te tamaiti no nga rā iti ua, e te tangata metua kare i akaopeia tona au rā: e tamariki ua tei mate i te mataiti okotai anere ra, e te tangata rave ara tei mate i te mataiti okotai anere ra, e taumaaia ïa.”

13. Akapeea ta Isaia 65:20 akapapu anga kia tatou e ka rekareka te au tangata o te Atua ra i te tu tinamou?

¹³ I te akatupu anga mua teianei ki runga i te au tangata o Isaia ra, kua riro e te meitaki ra te au pepe i te enua ra. Kare e au enemi tei aere maira ki roto, mei to Babulonia ra i tetai tuatau, kia apai ke atu i te au pepe me kare kia tipu ke i te au tangata tei pakari maira to ratou oraanga. (2 Paraleipomeno 36:​17, 20) I te ao ou te aere maira, ka meitaki ia te au tangata, ka tinamou, ka rauka kia rekareka te oraanga. Me ka iki tetai tangata kia meameaau ki te Atua, kare aia e akatikaia kia ora ua atu. Ka akaatea ke atu te Atua iaia. Ka peea me e okotai anere mataiti taua tangata ara meameaau ra? Ka mate aia “ei tamariki ua” me akaaiteia atu ki te ora mutu kore ra.​—1 Timoteo 1:​19, 20; 2 Timoteo 2:​16-19.

14, 15. Akatumuia ki runga ia Isaia 65:​21, 22, ki teea au angaanga puapinga taau ka akara atu ki mua?

¹⁴ Kare e kia tamanako e akapeea te akaatea anga i tetai tei akakoro ra kia ara, te akataka maira Isaia i te au tu ora anga te ka vai mai i te ao ou ra. E tauta kia akatutu ia koe uaorai i roto i taua ngai ra. Ko te mea mua penei ka aere mai ki te mata o toou manako ko te au apinga vaitata ki te kainga. Kua akono a Isaia i te reira i nga irava 21 e te 22: “E patu ratou i te au are, e na ratou uaorai e noo; e na ratou e tanu i te au kainga vine, ka kai ei i te kai i reira. Kare ratou e patu, e na tetai ke e noo; kare ratou e tanu, e na tetai ke e kai: mei te au rā o te rakau nei te au rā o toku ra iti-tangata; e rekareka tei ikiia e au ra, i te angaanga a to ratou uaorai rima.”

¹⁵ Me kare i rauka ia koe te kite i te patuanga me kare te tanutanuanga, akakite maira ta Isaia totou e te tatari maira tetai apiianga ia koe. Inara, ka mareka ainei koe kia apii ma te tauturu anga a te aronga kite ra, penei te aronga takinga meitaki i te pae mai te ka tauturu mataora ua mai ia koe? Kare a Isaia i akakite me e au maramarama mamaata no to are e kare e io ma te au arai, kia rekarekai koe i te matangitangi, me kare te au maramarama topiriia ma te io kia raukai ia koe te akara atu i te au tauianga tuatau ra. Ka akapapa ainei koe i tetai are ma te tapoki topa mai tetai tua ki raro kia aere mai te au e te kiona ki raro? Me kare na te tu reva ainei e akataka tetai tapoki paraaraa ua​—mei to te Itinga Rotopu rai​—tetai tapoki e raukai ia koe kia akaputu ma toou ngutuare tangata ki reira no te kaikai anga mareka e te tuatua kapitianga oki?​—Deuteronomi 22:8; Nehemia 8:16.

16. Eaa ka raukai ia koe kia manakonako atu i te ao ou kia riro kia akamerengo mutu kore mai?

¹⁶ E maata atu te puapinga i te kite anga i taua au tumu ra ko te tika e ka rauka ia koe tetai are noou uaorai. Ka riro ia noou​—kare mei teia tuatau penei ka rave maata koe kia patu are e ka riro i tetai ke atu te au puapinga. Kua tuatua katoa a Isaia 65:21 e ka tanu koe e ka kai ei i te kai i reira. Te taka meitaki ra, e te akakite maira te reira i te turanga tikai. Ka rauka ia koe te merengoanga tau tikai mei taau au tauta anga, te au ua o taau uaorai angaanga. Ka rauka ia koe i te rave i te reira i tetai oraanga roa katoa​—“mei te au rā o te rakau” ra. Ka tau tikai te reira ki te akataka anga i “te au mea ravarai ei mea ou”!​—Salamo 92:​12-14.

17. Eaa te taputou ta te au metua i kite e ei akamaroiroianga tikai?

¹⁷ Me ko koe tetai e metua, ka akatukia teianei au tuatua i toou ngakau: “Kare ratou e angaanga puapinga kore ua; kare e anau tamariki kia mate vave ua: e uanga oki ratou i akameitakiia mai e Iehova, ratou e ta ratou katoa ra au tamariki. E riro oki ïa, ou ratou e kapiki mai ei, kua akatika takere atu au; e te tuatua ua maira ratou, te akarongo ra au.” (Isaia 65:​23, 24) Te kite ra ainei koe mei te tupu anga tikai te mamae no te “anau tamariki kia mate vave ua”? Kare e tau e kia akapapa tatou i te papaanga au manamanata no te tamariki penei ka apai mai i te pekapeka ki te au metua e etai atura. Piri katoa atu ki te reira, kua kite tatou katoatoa i te au metua tei akapou ra i to ratou taime ma ta ratou uaorai au ravenga, te au angaanga, me kare tarekareka e e mea ngiti ua te tuatau ma ta ratou tamariki. Ei tukeanga, te akapapu maira Iehova kia tatou e ka akarongo aia e ka akono i to tatou au umuumu anga, e ka manako katoa mai ia ratou.

18. Eaa ka raukai ia koe kia manako atu i te rekarekaanga i te au manu i te ao ou ra?

¹⁸ Ia koe e manako ra e eaa taau ka rekareka i te ao ou, e akatutu i tetai ngai ta te tuatua totou a te Atua i akanoo maira: “Ko te luko e te punua mamoe okotai rai kai katoa anga, e kai oki te liona i te ngangaere mei te puakatoro ra: kareka te ovi, ko te one-pueu tana kai. Kare ratou e kanga, kare oki e mea e mate ei i toku katoa nei maunga tapu, te tuatua maira Iehova.” (Isaia 65:25) Kua tauta te aronga peni karape kia peni i taua ngai ra, inara kare teia i tetai tuatua akatutu ua tei raveia ma te raitini peni tutu. Ka riro teia ei mea tika tikai. Ka tupu te au ki roto i te au tangata e ka aiteite atu oki te au ma te au manu ra. E manganui te au tangata apii i te au mea ora e te aronga akaperepere i te manu te akapou i etai mataiti meitaki o to ratou oraanga i te apiianga kia kite i etai au tu animara tokoiti ua me kare okotai tu me kare pamiri manu. Ei tuke anga, e tamanako eaa taau ka rauka kia kite me ka kore te au manu e tutaraia na te mataku i te au tangata. A reira ka rauka ia koe kia aravei atu i te au manu rere e te au mea ora rikiriki ko te vao rakau to ratou ngai nooanga​—ae, e akara, e apii, e rekareka oki mei ia ratou ra. (Iobu 12:​7-9) Ka rauka ia koe kia rave meitaki ua i te reira, ma te kore e tu kino mei te tangata maira me kare i te au manu oki. Te tuatua ra a Iehova: “Kare ratou e kanga, kare oki e mea e mate ei i toku katoa nei maunga tapu.” Mei teaa ra tetai taui anga te reira mei ta tatou e akara nei e te kite nei i teianei tuatau!

19, 20. Eaa ra te au tangata o te Atua i tuke roai mei te maataanga o te au tangata i teia tuatau nei?

¹⁹ Mei tei taikuia ra i mua akenei, kare e rauka i te au tangata i te totou tika i te tuatau ki ua ra, noatu rai te au manako totoa ateaia tei piri atura ki tetai mareniamu ou. Te akaruke maira te reira i te aronga e manganui kia pekapeka, kia oripu ua, me kare kia manakonako kore ua. Kua tata a Peter Emberley, koia tetai akaaere i tetai Apii Teitei i Kanata: “E manganui te aronga [kua pakari mai] tei aro atura i te openga i etai au uianga maata te puapinga no te ora anga. Koai au? Eaa tikai taku e tauta nei? Eaa te ipukarea taku e akaruke mai na te uki i muri akenei? Te rave pakari nei ratou i rotopu i to ratou oraanga kia rauka te tu tau e te puapinga i to ratou au ora anga.”

²⁰ Ka kite koe eaa te reira i riro ei ei tu ma te aronga e manganui. Penei ka kimi ratou kia rekareka te oraanga na te au ravenga akaki taime me kare te au tu tamataora marekaia ra. Inara, kare ratou e kite eaa ta te tuatau ki mua e mou maira, no reira penei te ngere ra te oraanga i te puapinga maata, te papa meitaki, me kare i te akakoro anga tikai. I teianei e akatuke atu i te reira ma taau manako anga no te oraanga, i te marama anga o ta tatou i akamanako akenei. Kua kite koe e i ta Iehova rangi ou e te enua ou i taputou maira, ka rauka ia tatou kia akarakara takapini e ka tuatua mei to tatou ngakau maira, ‘E tika tikai, kua anga ou mai te Atua i te au mea ravarai!’ Mei teaa ra to tatou rekareka anga i te reira!

21. Eaa te tumu aiteite te kitea ra e tatou ia Isaia 65:25 e ia Isaia 11:9?

²¹ Kare i te mea kino kia irinaki vave atu ki te nooanga ki roto i te ao ou a te Atua ra. Te pati maira aia, e te raurau maira, ia tatou kia akamori iaia i te tuatua mou i teianei e kia tau no te oraanga me tae te tuatau e ‘kare ratou e kanga, kare oki e mea e mate ei i tona maunga tapu.’ (Isaia 65:25) Inara, i kite ainei koe, e kua tuatua aiteite a Isaia i mua akera e kua kapiti katoa aia i tetai tika tei puapinga maata ra ki to tatou rekarekaanga tikai i te ao ou ra? Te tuatua ra Isaia 11:9 e: “Kare ratou e kanga, kare oki e mea e mate ei, i toku katoa nei maunga tapu: no te mea, ka ki te enua i te kite ia Iehova, mei te vairanga tai e ki i te tai ra.”

22. Na ta tatou akamanako anga i nga totou Pipiria e a ra ka tau kia akaketaketa i to tatou tamanakoanga kia rave i teaa?

²² “Te kite ia Iehova.” Me akariro te Atua i te au mea ravarai ei mea ou, kua rauka i te aronga noo i te enua te kite tika iaia e tona anoano oki. Ka kapiti te reira kia tere atu i te apiianga mei i te au manu angaia maira. Te o atura tana Tuatua. Ei akatauanga, e akaata ki runga i te maata ta tatou i kite i te akara matatioanga i nga totou e a ua tei taiku ra i “te rangi ou e te enua ou.” (Isaia 65:17; 66:22; 2 Petero 3:13; Apokalupo 21:1) Tei ia koe tetai tumu meitaki no te tatauanga i te Pipiria i te au ra takitai. Ko te reira ainei tetai tuanga o taau ravenga? Me kare ia, eaa te au akatikatika anga taau ka rave kia raukai ia koe te tatau i etai o ta te Atua tuatua i te au ra takitai ra? Ka kitea e koe te reira e mamao ke atu i te akara atuanga ki te rekarekaanga i te ao ou ra, ka rauka ia koe te rekareka maata i teianei tikai, mei to te tata taramo rai.​—Salamo 1:​1, 2.

[Tataanga Rikiriki i Raro]

Akapeea Koe me Pau?

• Eaa tatou ka manako ei e te totou maira Isaia 66:​22-24 i te au mea te vai maira ki mua?

• Eaa taau e akara tika atura ki mua i te au mea tei taikuia maira i nga totou ia Isaia 66:​22-24 e Isaia 65:​20-25?

• Eaa taau au tumu no te irinaki anga i toou tuatau ki mua ra?

[Au Tutu i te kapi 15]

A Isaia, a Petero, e Ioane kua totou mai i te au tu o te “rangi ou e te enua ou”