Eaa Ka Papetitoiai?

“Ka aere . . . e akariro i to te pa enua katoa ei pipi; ka bapetizo atu ei ia ratou.”​—MATAIO 28:19.

1, 2. (a) I raro ake i teea au turanga te raveanga i etai papetitoanga? (e) Eaa te au uianga te uiia ra no runga i te papetito anga?

KUA maro te Ariki o Frank ko Charlemagne kia papetito katoatoaia te au Saxon tei upokotu ra i te 775-77 T.N. “Kua maro atura aia ia ratou kia riro ei akonoanga kare i te Kerititiano tikai,” ta te tangata tuatua enua ko John Lord i tata. Ma te aiteite, i muri ake i te akaipoipoanga i te tamaine ariki Otototi Ereni i te 987 T.N., kua iki te tutara Rutia ko Vladimir I e ka tika te au tangata i raro ake iaia kia riro ei “au Kerititiano.” Kua akaue aia i te papetito anga maata no tona au tangata katoatoa​—ka tamateia i te koke me ka umuumuia!

² Kua tau ainei taua au papetito anga ra? E aiteanga tikai ainei to ratou? Ka tau ainei kia papetitoia tetai ua atu?

Papetito Anga​—Akapeea?

3, 4. Eaa ra te pipianga me kare te riringianga i te vai ki runga i te upoko i kore ei e mea tika no te papetito anga Kerititiano?

³ I ta Charlemagne e Vladimir I maro anga i te au tangata kia papetitoia, kua rave aua nga tutara ra i te angaanga kare i rotai ma te Tuatua a te Atua. Ko te tika, kare e puapinga o te reira papetito anga me te o atura te pipianga, e te riringianga i te vai ki runga i te upoko, me kare noatu ko te taruku anga i te aronga tataki tai kare ra i apiiia i te tuatua mou o te Tuatua Tapu.

⁴ E akamanako ana eaa tei tupu i to Iesu o Nazareta ra aere anga kia Ioane Papetito ra i te 29 T.N. te papetito ra a Ioane i te au tangata i te Kauvai i Ioridana. Kua aere ua mai ratou kiaia no te papetito anga. Kua akatu ua ainei aia ia ratou ki roto ia Ioridana ra e nana i riringi atu i tetai manga vai ki runga i to ratou upoko me kare i akapipi ia ratou i te reira? Eaa tei tupu i ta Ioane papetito anga ia Iesu? Kua ripoti a Mataio e oti akera a Iesu i te papetitoia “kake maira aia ki runga mei raro mai i te vai.” (Mataio 3:16) I raro aia i te vai i tarukuia i roto i te Kauvai i Ioridana. Mei te reira katoa oki, te eunuka Etiopia ra kua papetitoia i roto i te “vai.” Kua umuumuia taua roto vai ra no te mea ko te papetito anga o Iesu e tana au pipi e taruku takiri anga ia.​—Angaanga 8:36.

5. Akapeea ta te au Kerititiano mua ra papetito anga i te tangata?

⁵ Te au tuatua Ereni tei uriia ra “e papetito,” “papetito anga,” e te vai atura, te taiku ra i te tarukuanga, te tukuanga ki raro, me kare te rukuanga ki raro i te vai. Te tuatua ra te Smith’s Bible Dictionary e ko: “Te aite anga tikai o te papetito anga e tarukuanga.” No reira etai au urianga Pipiria te taiku ra ia “Ioane tei Taruku ra” e “ko Ioane tei tuku ra ki raro i te vai.” (Mataio 3:1, Rotherham; Diaglott i rotopu i te raini) Te na ko ra ta Augustus Neander’s History of the Christian Religion and Church, During the Three First Centuries e: “Kua akamataia mai te papetito anga na te tarukuanga.” Te angaanga Varani tei matauia ra ko Larousse du XX^e Siècle (Paris, 1928) te tuatua ra: “Kua rauka i te au Kerititiano mua ra te papetito anga na te taruku anga i te au ngai ravarai e kiteai te vai.” E te tuatua ra te New Catholic Encyclopedia e: “Te papu ra e kua raveia te Papetito anga i te ekaretia mua ra na te taruku anga.” (1967, Voriumu II, kapi 56) No reira i teia tuatau, ko te papetito anga ko tetai o te Au Kite o Iehova e takainga rave uaia na te taruku takiri anga i te vai.

E Tumu Anga Ou no te Papetito Anga

6, 7. (a) No teea akakoroanga ta Ioane ra papetitoanga? (e) Eaa te mea ou no runga i te papetitoanga a te au pipi a Iesu?

⁶ Te au papetito anga tei raveia ra e Ioane e tuke te akakoro anga mei te taruku anga tei raveia ra e te au pipi a Iesu. (Ioane 4:​1, 2) Kua papetito a Ioane i te au tangata ei akatutu akakite anga i to ratou tataraara no te au ara i te Ture ra.a (Luka 3:3) Inara e mea ou tei o atura ki te papetito anga o te au pipi a Iesu. Ia Penetekote 33 T.N., kua raurau atura te apotetoro ko Petero i te aronga akarongo atura kiaia: “E tataraara, e kia bapetizoia, kotou ravarai, i roto i te ingoa o Iesu Mesia, kia matara te ara.” (Angaanga 2:​37-41) Noatu rai te tuatua ra aia ki te au ngati Iuda e te au poroteraita, kare a Petero e tuatua ana no te papetito anga kia akatutu i te tataraara no te au ara i te Ture; kare katoa te aite anga e ko te papetito anga i te ingoa o Iesu te akatutu ra i te oreianga i te au ara.​—Angaanga 2:10.

⁷ I taua atianga ra, kua taangaanga a Petero i te mea mua “o nga taviri no te basileia ra.” No teea akakoroanga? No te akatuera anga ki te aronga akarongo atura kiaia i te tika no ratou kia kite i te tomoanga ki te Patireia o te rangi. (Mataio 16:19) I te mea kua kopae te au ngati Iuda ra ia Iesu ei Mesia, ko te tataraaraanga e te taangaanga i te akarongo kiaia e tika anga ou e te puapinga i te kimianga e kia rauka i te Atua kia akakore i te ara. Ka rauka ia ratou i te akakite i taua akarongo ra na te taruku anga ki roto i te vai i te ingoa o Iesu Karaiti ra. Na roto i tera tu ka akatutu ratou i to ratou uaorai akatapuanga ki te Atua na roto ia Karaiti. Te aronga katoatoa te anoano ra i te mareka anga o te Atua i teia tuatau ka tika kia akono i te akarongo aiteite, kia akatapu ia ratou uaorai ki te Atua ko Iehova e kia rave i te papetito anga i te akatutu i te akatapuanga arai koreia ki te Atua Tei Teitei ra.

Te Umuumuia ra te Kite Tika

8. Eaa ra te papetitoanga Kerititiano i kore ei e tau no te au tangata ravarai?

⁸ Kare te papetito anga Kerititiano no te au tangata ravarai. Kua ikuiku atura Iesu ki tana au pipi: ‘Ka aere . . . e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; ma te apii atu ia ratou, kia akono i te au mea katoa taku i akaue atu kia kotou.’ (Mataio 28:​19, 20) I mua ake ka papetitoiai, ka tika te au tangata kia ‘apiiia kia akono i te au mea katoa ta Iesu i akaue atu ki tana au pipi.’ No reira, ko te au papetito anga tei maroia atu ki te aronga te ngere ra i te akarongo akatumuia ki runga i te kite tika i te Tuatua a te Atua e puapinga kore e te tuke ra ki te akauenga ta Iesu i oronga ra ki tana au pipi mou.​—Ebera 11:6.

9. Eaa te aite anga kia papetitoia “i te ingoa o te Metua”?

⁹ Eaa te aite anga e kia papetitoia “i te ingoa o te Metua”? Te aite anga e kua kite tei papetitoia ra i te taoonga e te mana o to tatou Metua i te rangi ra. No reira kua kiteia te Atua ko Iehova Tei Anga mai ia tatou, “Tei Teitei i te enua katoa nei,” e Tei Ngateitei i te Ao Katoa e Pini Ua Ake.​—Salamo 83:18; Isaia 40:28; Angaanga 4:24.

10. Te papetitoanga ‘i te ingoa no te Tamaiti’ eaa te aite anga?

¹⁰ Kia papetitoia ‘i te ingoa no te Tamaiti’ te aite anga kia kite i te taoonga e te mana o Iesu ei Tamaiti anau tai na te Atua. (1 Ioane 4:9) Te aronga tau no te papetito anga ka ariki ia Iesu tei na roto mai iaia ta te Atua ra oronga anga i te “oko no te tangata e manganui.” (Mataio 20:28; 1 Timoteo 2:​5, 6) Ka tika katoa oki te aronga papetitoia kia akatika e e “maata ua atu i te teitei” ta te Atua ra akateitei anga atu i tana Tamaiti.​—Philipi 2:​8-11; Apokalupo 19:16.

11. Eaa te akakiteia maira na te papetito anga ‘i te ingoa o te vaerua tapu ra’?

¹¹ Eaa te puapinga maata no te papetito anga ‘i te ingoa no te vaerua tapu’? Te akakite maira teia e kua kite te aronga papetitoia e ko te vaerua tapu te mana rave angaanga o Iehova, tei taangaangaia i te au tu tuke tuke i te rotai anga ma tona akakoro anga. (Genese 1:2; 2 Samuela 23:​1, 2; 2 Petero 1:21) Kua akatika te aronga tei tau ra no te papetito anga e te tauturu ra te vaerua tapu ia ratou kia kite i “te au mea oonu rai o te Atua ra,” kia rave ua atu i te angaanga tutuanga Patireia, e kia akakite oki i te au ua o te vaerua “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.”​—1 Korinetia 2:10; Galatia 5:​22, 23; Ioela 2:​28, 29.

Puapinga Maata no te Tataraara e te Taui Anga

12. Akapeea te taokotaianga te papetitoanga Kerititiano ma te tataraara anga?

¹² E okotai ua turanga i tuke ko to te tangata ara kore ra ko Iesu, te papetito anga e akatutu anga no tetai tu marekaia e te Atua tei taokotaiia atu ma te tataraara ra. Me tataraara tatou, te mii ngakau oonu ra tatou me kare te manako ngakau apa maata ra, no tetai apinga ta tatou i rave me kore kare i rave. Kua anoano te au ngati Iuda o te anere mataiti mua ra kia akamareka i te Atua e kua tataraara i ta ratou au ara kia Karaiti. (Angaanga 3:​11-19) Ko etai aronga Kenitara akarongo i Korinetia ra kua tataraara i te akaturi, te akamori itoro, te keia, e etai atu au ara kikino. No to ratou tataraara anga, “kua oreiia” ratou i te toto o Iesu; e kua “akatapuia,” me kare kua akataka keia, no te tavini anga i te Atua; e “kua akatikaia” i te ingoa o Karaiti e te vaerua o te Atua ra. (1 Korinetia 6:​9-11) Ko te tataraara anga tetai takainga puapinga maata i te raukaanga te akava ngakau meitaki e ta te Atua ra akamatara anga mei te apa i te ara.​—1 Petero 3:21.

13. No runga i te papetitoanga, eaa te o atura i te taui anga?

¹³ Ka tika te taui anga kia raveia i mua ake i to tatou papetito anga ei Au Kite no Iehova. Ko te taui anga e mea rave uaia e tetai tei iki ra ma te ngakau katoa kia aru ia Iesu Karaiti. Kua akaruke taua aronga ra i ta ratou aerenga tarevake i mua ana e kua tamanako kia rave i te tika ki mua i te Atua ra. I roto i te au Tuatua Tapu, te Epera e te Ereni ko te au verepa te tuatua ra i te taui anga te akakite maira i te tu ariuanga ki muri, te ariu keanga. Ko teianei angaanga te akakite ra i tetai ariuanga ki te Atua mei tetai aerenga tarevake ra. (1 Ariki 8:​33, 34) Te akakite ra te taui anga i te ‘au angaanga tei tau ei i te tataraara ra.’ (Angaanga 26:20) Te umuumuia ra kia akaruke tatou i te akamori pikikaa, kia angaanga rotai ma ta te Atua ra au akauenga, e kia rave i te akamori anga mou anake kia Iehova. (Deuteronomi 30:​2, 8-10; 1 Samuela 7:3) Te akatupu ra te taui anga i te au tauianga i to tatou manakoanga, te au akakoroanga, e te tu tangata oki. (Ezekiela 18:31) Te “ariu mai” ra tatou i te mono anga i te au tu akono tau kore i te Atua na te akatangata ou anga.​—Angaanga 3:19; Ephesia 4:​20-24; Kolosa 3:​5-14.

E Puapinga Maata te Akatapuanga ma te Ngakau Katoa

14. Eaa te akakiteia maira e te akatapuanga o te au pipi a Iesu ra?

¹⁴ Ka tika te akatapuanga ma te ngakau katoa ki te Atua i mua ake i te papetito anga i te au pipi a Iesu. Te akakite maira te akatapuanga i te akataka keanga no te akakoroanga tapu. E puapinga maata teianei takainga ka tau tatou kia akakite kia Iehova na roto i te pure i ta tatou ikianga kia akamori iaia e mutu kore ua atu. (Deuteronomi 5:9) Inara, kare ta tatou akatapuanga ki tetai angaanga me kare ki tetai tangata mari ra ki te Atua uaorai.

15. Eaa ra te aronga papetitoia ra i tarukuiai?

¹⁵ Me akatapu tatou ia tatou uaorai ki te Atua na roto ia Karaiti, te akakite ra tatou i te tamanakoanga kia taangaanga i to tatou oraanga i te raveanga i te anoano o te Atua tei akanooia maira i te au Tuatua Tapu. Ei akatutu anga i te reira akatapuanga, ka rave te aronga papetitoia i te taruku anga i te vai, mei ia Iesu i papetitoia i te Kauvai i Ioridana kia akatutu i te oronga anga iaia uaorai ki te Atua. (Mataio 3:13) E mea tau kia maaraia e te pure ra a Iesu i taua atianga puapinga maata ra.​—Luka 3:​21, 22.

16. Akapeea te akaari anga tau i to tatou rekareka me akara tatou i te papetitoanga o te au tangata ra?

¹⁶ E tupu anga rekareka e te manako anga pakari to Iesu papetito anga. Pera katoa oki te papetito anga Kerititiano o teianei tuatau. Me akara tatou i te akatutu anga te au tangata i to ratou akatapuanga ki te Atua, penei ka akaariia to tatou rekareka na te pokarakara akangateitei anga e te akapaapaa anga pumaana. Mari ra ko te kapikipikianga, e te puipuianga, e tetai tu atu kare e raveia no te tu tapu no teianei akakite anga i te akarongo. Te akaariia ra to tatou rekareka na roto i te tu ngateitei.

17, 18. Eaa te tauturu ra kia akataka e me kua tau te aronga tataki tai ra no te papetito anga?

¹⁷ Kare mei te aronga te pipi ra i te au pepe me kare te maro ra i te aronga tini kare ra i apiiia i te tuatua tapu kia papetitoia, kare te Au Kite o Iehova e maro ana i tetai ua atu kia papetitoia. Ko te tika, kare ratou e papetito i te aronga kare ra i tau i te pae vaerua. I mua ake ka riro ei tetai ei tutu aere i te evangeria kare i papetitoia, ka akapapu te aronga pakari Kerititiano na mua e te kite ra aia i te au tumu anga apii Pipiria, e te akono rotai ra i te reira, e te oronga ra i te pauanga tika ki tetai uianga o teianei tu, “Te anoano tika ra ainei koe kia riro ko tetai o te Au Kite o Iehova ra?”

¹⁸ E tokoiti ua te au turanga, te rave ra te aronga tataki tai i te angaanga tutuanga Patireia e te akakite ra i te anoano e kia papetitoia, e rave ei te aronga pakari Kerititiano i te uriuri anga ma ratou ra kia akapapu e e aronga akarongo ratou tei akatapuia kia Iehova e te ka tau i te umuumuanga a te Atua no te papetito anga. (Angaanga 4:4; 18:8) Te au pauanga tei tere atu ki te 100 uianga no runga i te au apiianga Pipiria te tauturu ra i te aronga pakari kia akataka e me te tau ra taua aronga e pau maira i te au umuumuanga Tuatua Tapu no te tarukuanga. Kare tetai papaki i tau e no reira kare katoa e arikiia no te papetito anga Kerititiano.

E Apinga Ainei Tetai te Tapu ra ia Koe?

19. Kia tau ki te manako ia Ioane 6:44 ra, koai ma te ka riro ei aronga akatuangaia ma Iesu?

¹⁹ Penei e manganui te aronga tini tei maroia ki roto i te au papetito anga kua akakiteia e ka aere ratou ki te rangi i te matenga. Mari ra no runga i te au pipi tei aru i tona takainga tapuae, kua tuatua a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia.” (Ioane 6:44) Kua akatae mai a Iehova kia Karaiti e 144,000 te ka riro ei aronga tuangaia ma Iesu i te Patireia i te rangi. Te papetito anga maroia kare i akatapu ana i tetai ua atu no taua ngai kaka i ta te Atua ra akanoonoo anga.​—Roma 8:​14-17; 2 Tesalonia 2:13; Apokalupo 14:1.

20. Penei eaa te ka tauturu i etai kare ra i papetitoia ake?

²⁰ Mei te au mataiti i rotopu i te 1930 rai, e aronga tini tei manakonako ra kia ora atu i “te mate maata” e kia noo ki runga i te enua e tuatau ua atu kua kapiti atu ki te au pupu o te “mamoe ke atu” a Iesu ra. (Apokalupo 7:​9, 14; Ioane 10:16) Kua tau ratou no te papetito anga no te mea kua akono ratou i to ratou oraanga kia tau ki te Tuatua a te Atua e kua inangaro atu iaia ma ‘to ratou ngakau katoa, te vaerua, te ririnui, e te manako katoa.’ (Luka 10:​25-28) Noatu e kua kite tetai papaki tangata e ‘te akamori ra te Au Kite o Iehova i te Atua ma te vaerua e te tuatua mou,’ kare ratou i aru ake i te akatauanga a Iesu e te oronga anga i te akakite anga ki te ngai tangata i te inangaro anga tikai e te akamorianga ia Iehova na te papetito anga. (Ioane 4:​23, 24; Deuteronomi 4:24; Mareko 1:​9-11) Te pure akatenga e te taka meitaki no runga i teianei takainga puapinga maata penei ka oronga kia ratou i te akakeu anga e te maroiroi kia aru ki katoa i te Tuatua a te Atua, kia rave i te akatapuanga arairai kore ki te Atua ko Iehova, e kia papetitoia oki.

21, 22. No teea au tumu i tapupu ei tetai papaki mei te akatapuanga e te papetitoanga?

²¹ Te tapupu ra tetai papaki i te akatapuanga e te papetito anga no te mea te rave oonu ra ratou i te au mea o te ao nei me kare i te aruaru anga i te apinganui e e meangiti to ratou taime no te au mea vaerua. (Mataio 13:22; 1 Ioane 2:​15-17) Mei teaa ra to ratou mataora me ka taui ratou i to ratou au manako e te au akakoro anga! Na te akavaitataanga kia Iehova ka akaapinganui ia ratou i te pae vaerua, ka tauturuia kia takore atu i te apiapi, e ka apai mai i te au kia ratou e te merengo anga te ka tupu mai no te raveanga i te anoano o te Atua ra.​—Salamo 16:11; 40:8; Maseli 10:22; Philipi 4:​6, 7.

²² Te tuatua ra etai e te inangaro ra ratou ia Iehova inara kare e rave i te akatapuanga e kia papetitoia no te mea te manako ra ratou e ka kopae ke i te apainga. Inara ka tika tatou tataki tai kia aaki ki te Atua ra. Kua aere mai te apainga ki runga ia tatou i to tatou akarongoanga i te tuatua a Iehova. (Ezekiela 33:​7-9; Roma 14:12) Ei ‘iti tangata ikiia,’ kua anauia mai to Iseraela i taito ra ki roto i tetai iti tangata akatapuia kia Iehova, e no reira e apainga ta ratou kia tavini tiratiratu iaia kia tau ki tana au ture. (Deuteronomi 7:​6, 11) Kare ua e tangata i anauia mai ki roto i taua tu iti tangata ra i teia tuatau, inara me kua rauka mai ia tatou te au apiianga tika i te Tuatua Tapu, ka tau tatou kia rave i te reira i roto i te akarongo.

23, 24. Eaa te au tu mataku kare e tau te aronga tataki tai kia tapupu i te papetito anga?

²³ No te mataku e te ngere ra ratou i te kite penei kua tapupu i tetai papaki kia kore e papetitoia. Inara, e maata ta tatou katoatoa kia apii no te mea ‘kare te au tangata katoa e kite i te angaanga a te Atua mou mei te akamataanga mai e tae ua atu ki te openga.’ (Koheleta 3:11) E akamanako ana i te eunuka Etiopia ra. Ei poroteraita, e manga kite tona i te au Tuatua Tapu, inara kare i rauka iaia i te pau i te au uianga ravarai no ta te Atua au akakoroanga. Inara i muri ake i te kiteanga i ta Iehova ra oronga anga no te ora na roto i te atinga oko o Iesu, kua viviki ua te eunuka ra i te akono ua atu na te papetito anga i te vai.​—Angaanga 8:​26-38.

²⁴ Te ekoko ra tetai papaki i te akatapuanga ki te Atua no te mea te mataku ra ratou e ka kore e rauka ia ratou te akono i to ratou akatapuanga. Mei ia Monique e 17 mataiti i tuatua ra: “Kua tapupu au i te papetito anga no te mataku anga e penei kare e rauka iaku te akono kia tau ki taku akatapuanga.” Inara, me te irinaki ra tatou ia Iehova ma to tatou ngakau katoa, ‘nana e akatika i to tatou au arataa.’ Nana e tauturu ia tatou kia aere “na te tuatua-mou” ei au tavini tiratiratu nona tei akatapuia ra.​—Maseli 3:​5, 6; 3 Ioane 4.

25. Eaa te uianga te tau ra i teianei kia akamanakoia?

²⁵ No te irinaki tikai ia Iehova e te manako ngakau inangaro iaia ra, e au tauatini ua atu te akakeuia ra i te au mataiti tataki tai kia akono i te akatapuanga e kia papetitoia. E tika tikai e te anoano ra te au tavini akatapu katoatoaia o te Atua kia tiratiratu kiaia. Tera ra te noo nei tatou i te tuatau kino, e te aro atura tatou i te au timataanga tuke tuke no te akarongo. (2 Timoteo 3:​1-5) Eaa ta tatou ka rave kia akono ei kia tau ki to tatou akatapuanga kia Iehova ra? Ko ta tatou teianei ka akamanako i te atikara e aru mai nei.

[Tataanga Rikiriki i Raro]

Maara Ainei ia Koe?

• Akapeea te rave anga i te papetito anga Kerititiano?

• Eaa te kite anga te umuumuia ra no tetai kia papetitoia?

• Eaa te au takainga te ka taki atu ki te papetito anga o te au Kerititiano mou ra?

• Eaa tetai papaki i tapupu ei mei te papetito anga, inara akapeea nei ra i te tauturu anga ia ratou?

[Au Tutu i te kapi 14]

Kua kite ainei koe eaa te aite anga kia papetitoia ‘i te ingoa o te Metua, e no te Tamaiti, e te vaerua tapu oki’?