Ka Papa ua Ainei Koe i te Taui?
1. No te mea te taui ua nei teia ao, eaa te au tauianga ka anoanoia tatou kia rave?
1 Roto ia 1 Korinetia 7:31, akaaite te Pipiria i teia ao ki te ngai akatutu teata, tauiui ua te akatutuanga pera te aronga akatutu. Te taui ua nei te au mea ravarai i teia ao, no reira mei tera taime ki tera taime ka anoanoia kia taui i te au mataara e tutu ana tatou, pera ta tatou papaanga e te tuatuaanga. Ka papa ua ainei koe i te taui?
2. No teaa ka anoanoia ai tatou kia taui viviki, kia rauka i te akatano atu ki te akaaerenga a Iehova?
2 Au Mataara no te Tutu Aere: E rauka ua ana i te putuputuanga Kerititiano kia rave i tetai au tauianga. Te taime mua i tono ei a Iesu i tana au pipi kia tutu aere, akakite aia kia ratou e auraka e apai kai me kore auraka e apai moni. (Mata. 10:9, 10) Inara i muri mai, kua taui aia i taua ikuikuanga ra i te tapapa atu anga e a te tuatau ka aereia, ka makitakitaia mai tana au pipi, e pera katoa te akatotoaanga i te angaanga tutu aere ki te au ngai ke. (Luka 22:36) I te anere mataiti i topa, tuketuke te au mataara e taangaanga ana te akaaerenga o Iehova i te tutu aere, ei akaraanga—na roto i te kati testimony, te ratio, e te au motoka akatangi ponikarapa—kia tau ki te anoano o taua taime ra. Teia tuatau, e maata te ngai kare e tangata i te kainga, te akamaroiroiia maira kia kapitiia mai te angaanga akakitekite i te ngai papuriki e i tetai ua atu taime, ki te tutu aere anga mei tera are ki tera are. Te akamaroiroi katoaia maira kia aere mei tera are ki tera are i te aiai, me kua aere te tangata ki te angaanga i te avatea. I te mea e te taui ua nei rai te kaveinga o to Iehova kariota i te rangi, te taui viviki ra ainei koe kia rauka i te aru i te reira?—Eze. 1:20, 21.
3. Akapeea te tu papa ua i te taui, i te tauturu anga ia tatou kia uua roa atu i roto i ta tatou ngai tutuanga?
3 Taau ka Tuatua: Eaa ra te au mea e manamanata ra te tangata i te ngai e noo ra koe? Ko te akaaereanga ainei o te moni? Te pamiri? Te maata o te aati ture? E mea meitaki kia kite e eaa te au manamanata e te au turanga matauia i roto i ta tatou ngai tutuanga, kia rauka ia tatou te akapapa i tetai manako ka tau i te tuatua. (1 Kori. 9:20-23) Me akakite mai te pu ngutuare i to ratou manako, mea meitaki kia taui e kia tuatua no runga i to ratou manako, i to te tuatua ua atu rai i taau manako i akapapa.
4. No teaa tatou ka taviviki ei i te taui?
4 Kare e roa atu ana ka kore te “tu” koia oki te tuanga openga o teia ao e ka akamata mai te mate maata. “Te poto nei te tuatau.” (1 Kori. 7:29) E mea puapinga tikai i reira kia taui tatou e kia taviviki i te rave i te reira, kia maata ta tatou ka oti i te rave i te tuatau poto ua e vai nei!