Kia Riro ei Oa no te Atua e Tuatau ua Atu!

Ka anoanoia te tauta anga e raukai tetai oa; ka anoano katoaia te tauta anga no te akono tamou i tetai oa. Ka akameitaki maataia taau au tauta anga e kia riro mai e kia vai rai ei oa no te Atua. Kua tuatua atu a Iesu ki te aronga tei irinaki iaia: “Na te tuatua-mou kotou e akarangatira.” (Ioane 8:32) Eaa te aite anga i te reira?

Ka rauka ia koe te rekareka i te tu rangatira i teianei. Ka akarangatiraia koe mei te au apiianga pikikaa e te au pikikaa tei akatotoaia e Satani. Ka akarangatiraia koe mei te tu puapinga kore te akaki nei i te au oraanga o te au mirioni tangata tei kore i kite ia Iehova. (Roma 8:22) Te akarangatiraia nei te au oa o te Atua mei te “mataku i te mate.”—Ebera 2:14, 15.

Ka rauka ia koe te rekareka i te tu rangatira i roto i te ao ou o te Atua. Mei teaa ra te rangatira umere tikai taau ka rekareka a te tuatau ki mua! I roto i te enua Parataito, ka vai te tu rangatira mei te tamaki, te maki, e te ta ua. Rangatira mei te putaua e te matepongi. Rangatira mei te ruaine anga e te mate. Rangatira mei te mataku, te taomianga, e te tuatua tika kore. Te tuatua ra te Pipiria no te Atua: “Te oora nei koe i to rima, e te akamerengo nei i te kaki o te au mea ora katoa nei.”—Salamo 145:16.

Ka ora te au oa o te Atua e tuatau ua atu. E apinga aroa akaperepere te ora mutu kore ta te Atua ka oronga ki te katoatoa te kimi ra i te pirianga oa kiaia. (Roma 6:23) E akamanako ana e eaa te aite anga o te ora mutu kore kia koe!

Ka rauka ia koe te taime no te rave i te au apinga e manganui. Penei ka inangaro koe i te apii e ka akapeea me akatangi i tetai apinga akatangi. Me kare penei ka inangaro koe i te apii i te peni i te au tutu me kare kia riro ei kamuta. Penei ka inangaro koe i te apii no runga i te au animara me kare te au rakau. Me kare ra penei ka inangaro koe i te teretere aere e kia kite i te au enua tukeke e te au tangata. Te raukaanga te ora mutu kore ka akariro e kia rauka teia au apinga katoatoa!

Ka rauka ia koe te tuatau no te akariro e kia maata ua atu te au oa. Ka akariro te ora mutu kore e kia rauka ia koe te tuatau kia kite atu i tetai ke tei riro mai ei oa no te Atua. Ka kite mai koe i to ratou au tu karape e te au tu meitaki, e ka riro katoa ratou ei au oa noou. Ka inangaro koe ia ratou, e ka inangaro mai ratou ia koe. (1 Korinetia 13:8) Te raukaanga te ora mutu kore ka oronga kia koe i tetai taime kia akaoaoa i te katoatoa i runga i te enua nei! Tei meitaki roa atu, ka tupu ua atu toou pirianga oa ma Iehova ma te pakari i te au anere mataiti e topa ra. Kia riro koe ei oa no te Atua e tuatau ua atu!