Akapeea me Akataka i te au Kerititiano Mou

E pirioni ua atu tangata te karanga ra e e Kerititiano ratou. Inara kare ta ratou irinakianga e aiteite ana, e kare katoa ratou e aru ana i te reira. Akapeea tatou me akataka i te au Kerititiano mou?

1. Eaa te Kerititiano?

E au pipi, me kare e aronga akarongo, te au Kerititiano na Iesu Karaiti. (E tatau ia Angaanga 11:26.) Akapeea ratou me akapapu e e au pipi ratou na Iesu? Karanga aia: “I tāpu tika kotou i taku tuatua, e pipi tikai kotou naku i reira.” (Ioane 8:31) Tera te aiteanga ka akarongo te au Kerititiano mou i te au apiianga a Iesu. Mei ta Iesu irinakianga ki runga i te au Irava kia turu i tana au apiianga, ka akatumu te au Kerititiano mou i ta ratou irinakianga ki runga i te Pipiria.​—E tatau ia Luka 24:27.

2. Akapeea te au Kerititiano mou me akaari i te aroa?

Akakite a Iesu ki tana au pipi: “Kia aroa kotou ia kotou uaorai mei iaku i aroa ia kotou.” (Ioane 15:12) Akapeea a Iesu te akaari anga e te akaperepere ra aia i tana au pipi? Kua akapou aia i tetai taime kia ratou, kua akamaroiroi ia ratou e kua tauturu ia ratou. E kua akaatinga i tona oraanga no ratou. (1 Ioane 3:16) Ka pera katoa te au Kerititiano mou. Na roto i ta ratou tuatua e ta ratou e rave ra te akaari ra e te aroa ra ratou i tetai e tetai.

3. Eaa te angaanga te maroiroi ra te au Kerititiano mou i te rave?

Kua oronga a Iesu i te angaanga na tana au pipi. “Kua tono atura aia ia ratou kia tutu aere i te basileia no te Atua.” (Luka 9:2) Kua tutu aere te au Kerititiano mua, i te au ngai akamorianga, te au ngai tangata e te au ngutuare o te tangata. (E tatau ia Angaanga 5:42; 17:17.) Pera katoa i teia rā, te tutu aere ra te au Kerititiano mou i te tuatua mou Pipiria ki te tangata. Te aroa ra ratou i to ratou tangata tupu, e te mataora ra i te taangaanga i to ratou taime e te maroiroi no te tutu aere i te karere Patireia no te manakonakoanga e te akapumaana anga.​—Mareko 12:31.

KIMI OONU

4. Te kimi ra ratou i te tuatua mou Pipiria

Kare te maata anga tei karanga e Kerititiano ratou, e taangaanga ana i te tuatua mou Pipiria. Akatangi i te VITIO, e oti uriuri i teia uianga ka aru mai.

VITIO: Tupu te Pikikaa i Roto i te Akonoanga Kerititiano (5:11)

• Akapeea tetai au akonoanga Kerititiano te arai anga kia kore te tangata e kite i ta Iesu apiianga?

Kua apii a Iesu i te tuatua mou mei te Tuatua a te Atua. E tatau ia Ioane 18:37, e oti uriuri i teia uianga:

• Kia tau ki ta Iesu, akapeea tatou me akataka i te au Kerititiano e “no te tuatua mou” ratou?

5. Tutu aere ratou i te tuatua mou Pipiria

I mua ake ka oki ei a Iesu ki te rangi, kua oronga aia i tetai angaanga na tana au pipi e tae mai ki teia rā. E tatau ia Mataio 28:​19, 20 e Angaanga 1:8, e oti uriuri i teia uianga:

• Eaa te maata o te angaanga tutu aere te ka raveia?

6. Taangaanga ratou i ta ratou e tutu aere ra

Eaa tei akakeu ia Tom kia kitea te akonoanga Kerititiano mou? Akatangi i te VITIO, e oti uriuri i te au uianga ka aru mai.

VITIO: Akaruke Au i Taku Akonoanga (5:20)

• I roto i te vitio, eaa tei akakeu ia Tom kia akaruke i tana akonoanga?

• Eaa i papu ei iaia e kua kitea e ïa te tuatua mou?

Puapinga rava atu taau e rave ra i taau e tuatua ra. E tatau ia Mataio 7:21, e oti uriuri i teia uianga:

• Eaa te mea puapinga rava atu kia Iesu​—me karanga e te irinaki ra tatou, me kia akapapu na roto i ta tatou e rave ra?

7. Aroa ratou i tetai e tetai

Kua akaatinga ainei te au Kerititiano i to ratou oraanga no tetai e tetai? Akatangi i te VITIO, e oti uriuri i teia au uianga ka aru mai.

VITIO: Kua Akaatinga Aia i Tona Oraanga (2:55)

• I roto i te vitio, eaa tei akakeu ia Lloyd kia akaatinga i tona oraanga no te Taeake ko Johansson?

• I toou manako kua aite ainei aia mei te Kerititiano mou?

• Akapeea te au pipi a Iesu (au Kerititiano mou) te akono anga i te iti tangata ke?

• Eaa ta ratou i rave i te tuatau o te tamaki?

APIIANGA

Ka akarongo te au Kerititiano mou i te au apiianga Pipiria, ka akaari i te aroa akaatinga ua, e ka tutu aere i te tuatua mou Pipiria.

Uriurianga

• E akatumu ana te au Kerititiano mou i ta ratou irinakianga ki runga i teaa?

• Eaa tetai tu te akataka ra i te au Kerititiano mou?

• Eaa te angaanga ta te au Kerititiano mou e rave ana?

KIMI KIMI

Apii kia kite maata atu no runga i tetai pupu e tauta pakari ra i te aru i te akaraanga e te au apiianga a Iesu Karaiti.

Au Kite o Iehova​—Koai ra Matou? (1:13)

Akara akapeea tetai vaine paretenia te kimi anga i te “taokotaianga taeake.”

“Taangaanga Raua i te Pipiria Kia Pau i Taku au Uianga!” (Te Punanga Tiaki, Me 1, 2014)

Apii kia kite akapeea te au Kerititiano mou me akaari i te aroa ki te au taeake tei anoanoia te tauturu.

Tauturu Anga i te au Taeake me Tupu te Tumatetenga​—Potonga Ua (3:57)

Akamanako akapeea te au Kerititiano mua e te au Kerititiano mou i teia tuatau, i aite ei ki ta Iesu i tuatua e ka kiteia tana au pipi.

“E tu “Kerititiano” Ainei to te au Kerititiano?” (Te Punanga Tiaki, Mati 1, 2012)