Mouanga Tiratiratu i te Tuatua Akauruia a te Atua

“Kua akaruke ra matou i te au peu munangaro akama ra, e kare oki to matou i te aerenga pakari, kare oki i pikikaa i te rave anga i te tuatua a te Atua.”​—2 KORINETIA 4:2.

1. (a) Eaa tei umuumuia ra ei akatupu anga i te angaanga tei akanooia maira ia Mataio 24:14 e te 28:19, 20? (e) Eaa te maata o te au Pipiria i roto i te au reo o te au tangata ra i te akamata anga mai te tuatau openga nei?

I TANA totou anga maata no runga i te tuatau o tona parutia ei ariki e te openga o te akatereanga taito o te au mea nei, kua totou maira Iesu Karaiti: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” Kua akaue katoa aia ki tana au pipi: “E akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.” (Mataio 24:14; 28:19, 20) Te kapiti ra te akatupu anga i aua nga totou ra i te angaanga maata i te urianga e te neneianga i te Pipiria, i te apiianga i te au tangata i tona aite anga, e i te tauturuanga ia ratou kia akono i te reira i to ratou oraanga. Mei teaa ra tetai raveanga meitaki kia kapiti atu i taua angaanga ra! Kua oti ke ana i te 1914 te nenei anga i te Pipiria me kare etai tuanga o te reira ki roto i e 570 au reo. Inara mei reira maira e au anere ua atu au reo ke ke e e manganui te au tuanga reo tei kapitiia atu, e i te au reo e manganui e tere atu i te okotai uri anga kua maaniia.a

2. Eaa te au akakeu anga ngakau ke ke tei mana ra ki runga i te aronga uri reo Pipiria e te aronga nenei oki?

² E akaaoanga ia no tetai ua atu tangata uri reo kia rave atu i te au manako no roto i tetai reo e kia akariro i te reira kia maramaia e te aronga tatau e te akarongo ra oki i tetai reo ke. Kua rave tetai papaki o te aronga uri i te Pipiria i ta ratou angaanga ma te matakite tikai e ko ta ratou e uri ra ko te Tuatua ia a te Atua. Ko etai atu kua mareka ua na te akaaoanga i te pae o te kite apiianga o taua angaanga ra. Penei kua manako ratou i te au tumu tuatua o te Pipiria ei tetai tataanga puapinga ipukarea. No tetai papaki, ko te akonoanga ta ratou pitiniti, e ko te neneianga i tetai puka tei tataia to ratou ingoa ei tangata uri reo me kare ei nenei ko tetai tuanga ia e raukaʼi te apinga no te ora anga. I te akara anga te mana ra to ratou akakeu anga ngakau e ka akapeea ta ratou rave anga i ta ratou angaanga.

3. I akapeea ta te Kumiti Uri Anga Pipiria Ao Ou manako anga no tana angaanga?

³ E mea tau kia manakoia teianei tuatua na te Kumiti Uri Anga Pipiria Ao Ou: “Te aite anga o te urianga i te au Tuatua Tapu e urianga ki tetai atu reo i te au manako e te au tuatua anga na te Atua ko Iehova . . . Ko tetai manako akono meitaki tikai ia. Te aronga uri i teianei angaanga, tei mataku e tei inangaro i te Tata Tu-Atua o te au Tuatua Tapu, te manako ngakau atura Iaia i tetai apainga taka ke kia tuku i tona au manako e tana au akakite anga i te tu tika rava te ka rauka. Te manako katoa ra ratou i te apainga na te aronga tatau kimikimi ra tei irinaki ki runga i tetai urianga i te Tuatua akauruia a te Atua Teitei Rava ra no to ratou ora mutu kore. Ma taua tu manako apainga tapu ra i te au mataiti e manganui ta teianei kumiti o te au tangata akatapuia ra akono anga i te New World Translation of the Holy Scriptures.” Te akakoro anga a taua kumiti ra kia rauka tetai urianga i te Pipiria te ka taka meitaki e ka maramaia e ka mou piri vaitata ki te reo Epera e te Ereni akamata anga e kia oronga mai te reira i tetai pange no te tupu anga i te kite tika rava.

Eaa Tei Tupu ki te Ingoa o te Atua?

4. Akapeea te puapinga maata o te ingoa o te Atua ra i roto i te Pipiria?

⁴ Ko tetai o te au akakoro anga maata o te Pipiria kia tauturu i te au tangata kia kite i te Atua mou ra. (Exodo 20:2-7; 34:1-7; Isaia 52:6) Kua apii a Iesu Karaiti i tana au pipi kia pure e “kia tapu” te ingoa o tona Metua, kia mou tapuia, me kare kia akonoia ei tapu. (Mataio 6:9) Kua tukuia e te Atua tona uaorai ingoa ki roto i te Pipiria e tere atu i te 7,000 taime. Te anoano ra aia kia kite te au tangata i taua ingoa ra e te au tu meitaki oki o Tei tapaia ra koia ia.​—Malaki 1:11.

5. Akapeea te oronga anga a te aronga uri reo ke ke i te ingoa tu-Atua ra?

⁵ E manganui te aronga uri Pipiria kua akaari i te akangateitei ngakau tae no te ingoa tu-Atua ra e kua taiku putuputu i te reira i roto i ta ratou angaanga. Kua akaperepere tetai papaki o te aronga uri reo ia Yahweh. Kua iki etai atu i tetai tu o taua ingoa tu-Atua ra tei taikuia ra i to ratou uaorai reo e te vai taka meitaki ra ma tei mama maira i te tataanga Epera, penei ko te tu ia tei matau meitakiia no te roa te taangaangaia. Kua taiku te New World Translation of the Holy Scriptures ia Iehova e 7,210 taime i roto i tana tataanga tikai.

6. (a) I te au mataiti ua akenei, eaa ta te aronga uri reo i rave ma te au taiku anga i te ingoa tu-Atua ra? (e) Eaa te atea o te totoa anga o teia rave anga?

⁶ I teianei au mataiti ua akenei, noatu rai e te mou ra te aronga uri Pipiria i te au ingoa atua peikani mei ia Baala e Moleka oki, ma te putuputu anga te akakore atura ratou i te ingoa tikai o te Atua mou ra mei te au urianga i tana Tuatua akauruia ra. (Exodo 3:15; Ieremia 32:35) I te au tataanga mei ia Mataio 6:9 e ia Ioane 17:6, 26, ra kua uriia tetai tataanga Arapania tei tua ateaia ra i te tuatua Ereni no “te ingoa ko koe” (koia oki, ko te ingoa o te Atua ra) ko “koe” ua, mei te mea rai e kare aua nga irava ra i taiku ana i tetai ingoa. Ia Salamo 83:18, te takore takiri ra The New English Bible e Today’s English Version i te ingoa tikaʼi o te Atua e tetai ua atu taiku anga ki te tika e e ingoa to te Atua ra. Noatu rai e kua mama mai te ingoa tu-Atua ra i roto i te au urianga taito o te au Tataanga Tapu Epera i te maata anga te au reo ra, e putuputu te au urianga ou i te takore atu i te reira me kare ka taiku ua i te reira i te tataanga i te pae mai. Ko teianei te tu i te reo Engarani, pera katoa i te au reo e manganui o Europa, o Aperika, o Marike Apatonga, i Initia, e te au airani oki o te Patipika.

7. (a) Akapeea te akonoanga a te aronga uri reo i te ingoa tu-Atua no etai Pipiria Aperika ra? (e) Akapeea toou manako no te reira?

⁷ Te aere ra te aronga uri reo o te Pipiria ki roto i etai reo Aperika na tetai takainga mamao atu. Kare e mono ua i te ingoa tu-Atua ma tetai taoonga Tuatua Tapu, mei te Atua ra me kare Atu, te tauru atura ratou i te au ingoa no roto mai i te au irinaki anga akonoanga o te reira ngai. I The New Testament and Psalms in Zulu (Tataanga 1986), kua taikuia te taoonga Atua (uNkulunkulu) ma tetai ingoa ke atu ko (uMvelinqangi) ta te au Zulu i kite te taiku ra i ‘te tupuna maata tei akamoriia ra na roto i te au tupuna tangata nei.’ Kua ripotiia mai i tetai atikara i te makatini The Bible Translator, no Okotopa 1992, e i te teateamamao anga i te Pipiria Chichewa te ka tapaia e Buku Loyera, kua taiku te aronga uri reo ia Chauta ei tetai ingoa ei mono i to Iehova ra. Kua akataka maira te atikara e ko Chauta, “te Atua ta ratou i kite ana e kua akamori atu oki iaia.” Inara, e manganui o teia au tangata kua akamori katoa oki i ta ratou i irinaki ko te au vaerua o tei mate ra. E tika ainei e me ka pure te au tangata ki tetai “Tei Teitei” ra, i reira noatu eaa te ingoa ta ratou e taiku no “Tei Teitei” ra ko tetai tu aiteite tau ia no te ingoa tikai ko Iehova, noatu rai eaa te o atura ki ta ratou akamori anga? Kare rava ia! (Isaia 42:8; 1 Korinetia 10:20) Ko te mono anga i te ingoa tikai o te Atua ra ma tetai atu apinga te ka akariro kia manako te au tangata e e tika ta ratou au irinaki anga ikuiku na te tangata kare ia e tauturu ia ratou kia akavaitata atu ki te Atua mou ra.

8. Eaa ra ta te Atua ra akakoro anga kia akakitekiteia tona ingoa i kore ei e puapinga koreia?

⁸ Kare teia pouroa i taui kare oki i akaongoongo i ta Iehova akakoro anga kia akakitekite aere i tona ingoa. I te au reo tuatua o Europa, to Aperika, to Marike, to Orieni, e to te au airani o te moana oki, te vaira te au Pipiria e manganui tei kapiti katoa ra i te ingoa tu-Atua. Te vai katoa ra e tere atu i te 5,400,000 Au Kite o Iehova i te au enua e te au ngai e 233 tei rave kapipiti ra e tere atu i te okotai pirioni ora i te mataiti i te tuatuaanga kia etai ke ra i te ingoa e te akakoro anga a te Atua mou ra. Te nenei ra ratou e te tua ra i te au Pipiria​—te taiku ra i te ingoa tu-Atua​—i te au reo tuatuaia ra e etai 3,600,000,000 o te au tangata o te enua nei, kapiti katoa te reo Engarani, Tinito, Rutia, Paniora, Potukara, Varani, e te Orani. Te nenei katoa ra ratou i te au puka tauturu apii Pipiria i roto i te au reo te matauia ra e te maata anga o te au tangata o te enua nei. Kare e roaia ka rave te Atua i tetai tu te ka akatupu takiri i tana akakite anga e to te pa enua “e kite oki ratou e ko Iehova [aia].”​—Ezekiela 38:23.

Me na te Au Irinaki Anga Tangata e Akapapa i te Urianga

9. Akapeea ta te Pipiria akakite anga i te apainga teiaa te vaira ki runga i te aronga te akono ra i te Tuatua a te Atua?

⁹ Te vaira te apainga teiaa ki rungao i te aronga uri i te Tuatua a te Atua pera katoa ki runga oki i te aronga te apii ra i te reira. Kua tuatua te apotetoro ko Paulo no tana angaanga orometua e ta tona au taeake oki: “Kua akaruke ra matou i te au peu munangaro akama ra, e kare oki to matou i te aerenga pakari, kare oki i pikikaa i te rave anga i te tuatua a te Atua, te akameitaki nei ra matou ia matou uaorai i te akava-ngakau o te tangata ravarai, i te akakite anga atu i te tuatua-mou i mua i te aroaro o te Atua.” (2 Korinetia 4:2) Te aite anga o te pikikaa kia taviivii atu na te kairoanga ki roto i tetai apinga ke me kare apinga tau kore. Kare te apotetoro ko Paulo i aite atu ki te au tiaki tiratiratu kore o Iseraela i te tuatau ia Ieremia ra tei akoia ra e Iehova ra ta ratou tutu anga i to ratou uaorai manako kare ra i ta te Atua i tuatua atura. (Ieremia 23:16, 22) Inara eaa te tupu nei i teianei tuatau?

10. (a) I akapeea te au manako akakeu anga kare ra i te tiratiratu ki te Atua i te mana anga ki runga i tetai papaki o te aronga uri reo i teianei tuatau nei? (e) Eaa te tuanga ta ratou i rave tarevake ra?

¹⁰ I te tuatau o te Tamaki II o te Ao ra, kua taokotai atu tetai kumiti aronga apii akonoanga e te au orometua ma te kavamani Nati i Tiamani kia maani akaou i tetai “Koreromotu Ou” tei takore atura i te au taiku anga akaperepere katoa i te au ngati Iuda ra e te au akakite anga katoatoa i to Iesu Karaiti akapapa anga tupuna ngati Iuda maira. I mua ua akenei, kua irinaki atu te aronga uri tei maani ra i te urianga i The New Testament and Psalms: An Inclusive Version na roto i tetai aerenga tuke ra, i te tauta anga kia takore i te au akakiteanga e na te au ngati Iuda ra i rave te apainga tei kapitiia atura ma te matenga o Karaiti. Kua manako katoa taua aronga uri reo ra e ka mataora atu te aronga vaine te tatau ra me ka tuatuaia te Atua, kare ei te Metua, mari ra ei Metua-Metua Vaine e me kia tuatuaia a Iesu, kare ei Tamaiti na te Atua, mari ra ei Tama nana. (Mataio 11:27) Ia ratou e rave ra i te reira, kua akakore atu ratou i te kaveinga kia kauraro te au vaine i ta ratou au tane e kia akarongo oki te tamariki i te au metua. (Kolosa 3:18, 20) Kare te aronga i maaniiaʼi taua au urianga reo ra i rave kapiti i to te apotetoro ko Paulo ra manako anga papu kia kore oki e “pikikaa i te rave anga i te tuatua a te Atua.” Kua ngaropoina ia ratou te tuanga a te aronga uri reo, e kua rave i te turanga ei tata, i te maanianga au puka ei taangaanga i tei manakoia ra e no te Pipiria ei tetai apinga kia akakite i ta ratou uaorai au manako ra.

11. Akapeea te au apiianga a Kerititome i te patoi anga i ta te Pipiria i tuatua ra no te meta e te matenga oki?

¹¹ Te mea matauia e te apii ra te au ekaretia o Kerititome e ko te meta tangata nei e vaerua ia, e ka akaruke mai te reira i te kopapa i te matenga ra, e e mate kore oki ia. Ei tuke anga, te akataka meitaki maira te au urianga Pipiria taito i te maata anga o te au reo ra e e au meta te au tangata, e e au meta te au manu, e ka mate ua te meta. (Genese 12:5; 36:6; Numero 31:28; Iakobo 5:20) Kua taakamaia te au orometua e te reira.

12. Na roto i teea tu ta etai au urianga ou akapoiri anga i te au tuatua mou tumu anga no te Pipiria?

¹² I teianei te akapoiri ra etai au urianga ou i teianei au tuatua mou. Akapeea? Te kopae ua ra ratou i te uri anga tika tikai i te nauna Epera e neʹphesh (meta) i roto i etai au irava ra. Ia Genese 2:7, penei ka tuatua ratou e “kua akamata te ora” te tangata mua ra (kare e i “riro akera te tangata ei [“meta,” NW] ora”). Me kare penei ka taiku ratou ei “mea ora” kare i te “meta” i te tu no te oraanga manu ra. (Genese 1:21) I te au irava mei ia Ezekiela 18:4, 20, rai te tuatua ra ratou i “te peretana” me kare “te tangata” (kare ra e i “te meta”) i te mateanga. Penei, ko taua au urianga, te tika ra ki te tangata uri reo ra. Inara eaa te maata te tauturu ta ratou e oronga atura ki tei kimi i te tuatua mou ma te ngakau tae koi riro ke ra tona manakoanga i ta Kerititome au apiianga tau kore i te tuatua tataia ra?b

13. Na teea au ravenga ta etai au urianga Pipiria i te uuna anga i ta te Atua ra akakoroanga no te enua nei?

¹³ I te tauta anga kia turu i ta ratou irinaki anga e ka aere te au tangata meitaki katoatoa ki te rangi, penei kua tamata katoa oki te aronga uri reo​—me kare te aronga apii akonoanga tei akamanako akaou ra i ta ratou angaanga​—kia uuna i ta te Pipiria tuatua no ta te Atua ra akakoro anga no te enua. Ia Salamo 37:11, te vaira etai urianga Pipiria te tatau ra e te aronga maru ra, ka noo ia i “te enua.” Te “enua” ko tetai urianga tau ia i te tuatua (ʼeʹrets) te taikuia ra i te tataanga Epera. Inara, i te Today’s English Version (tei oronga ra i te tumu anga no te au urianga reo ki roto i etai atu reo ke e manganui) kua mamao atu te aerenga. Noatu rai te uri ra teianei tataanga i te tuatua Ereni ge ei “enua” e 17 taime i te Evangeria a Mataio, ia Mataio 5:5 kua monoia e te reira te tuatua “enua” ma te takiota tuatua “ta te Atua i taputou ra.” No reira ka manako ua te au mema ekaretia e ko te rangi ia. Kare ratou i akakite tiratiratuia e, i tana Tuatua Anga ki runga i te Maunga ra kua tuatua a Iesu Karaiti e ko te aronga maru, me kare e taakaaka, te ka “riro ia ratou te enua.”

14. Eaa te akakeu anga noinoi te kitea ra i etai au urianga Pipiria?

¹⁴ I te akara anga ko etai au urianga o te au Tuatua Tapu kua akatakaia ma te manako kia tauturu i te aronga tutu aere kia rauka te tutaki moni meitaki. E tika ra e te tuatua ra te Pipiria: “E tau te rave angaanga i tana tutaki.” (1 Timoteo 5:18) Inara ia 1 Timoteo 5:17, te ngai te tuatua ra e ko te au aronga orometua i arataki meitaki ra, “kia maata atu ïa i te akateitei atu,” ko te akateitei anake ta tetai papaki o ratou e manako ra e ka tau kia taikuia ko te pae ia o te moni. (Akaaite ia 1 Petero 5:2.) E no reira, te tuatua ra The New English Bible e ko teianei aronga pakari “ka tau kia akateiteiia atu ta ratou moni tutaki,” e te tuatua ra te Contemporary English Version e “ka tau ratou kia tutakiia kia rua taime te maata atu.”

Mouanga Tiratiratu i te Tuatua a te Atua

15. Akapeea e raukaʼi ia tatou i te akataka e ko teea au urianga Pipiria ta tatou e taiku ei?

¹⁵ Eaa te aite anga o teianei au tu katoatoa no tei tatau tataki tai i te Pipiria e no te aronga te taangaanga ra i te Pipiria kia apii atu ia etai ke ra? I te maata anga o te au reo tuatua maataia ra, e tere atu i te okotai urianga Pipiria no te ikiia. E akaari i te kite karape i te iki anga i te Pipiria taau ka taangaanga. (Maseli 19:8) Me kare tetai urianga reo i tiratiratu i te akataka anga i te Atua uaorai​—e kua akakore i tona ingoa mei roto atu i tana Tuatua akauruia na tetai ua atu kotoe anga pikikaa​—penei ainei e kua akatarevake katoa te aronga uri ra i etai atu tuanga o te tataanga Pipiria ra? Me te ekoko ra i te tika o tetai urianga, e tamata kia akaaite ia ma te au urianga taito atu ra. Me ko koe tetai e puapii no te Tuatua a te Atua ra, e akaperepere i te au Pipiria te mou piri vaitata ra ki te tataanga Epera e te Ereni i te akamata anga ra.

16. Akapeea tatou tataki tai i te akakite anga i te tiratiratu ia tatou e taangaanga ra i te Tuatua akauruia a te Atua ra?

¹⁶ Pouroa tatou tataki tai ka tau kia tiratiratu ki te Tuatua a te Atua ra. Ka akono tatou i te reira na te rava te manakoanga no te au apinga i roto i reira e, me ka rauka, ka akapou tatou i tetai tuatau i te au ra ravarai i te tatauanga i te Pipiria. (Salamo 1:1-3) Ka rave tatou i te reira na te akonoanga i ta te reira au tuatua katoa i to tatou uaorai oraanga, ma te apiianga kia taangaanga i tana au kaveinga e te au akaraanga ei tumu anga no te tukuanga au ikianga tau. (Roma 12:2; Ebera 5:14) Ka akaari tatou e e au akakitekite tiratiratu tatou i te Tuatua a te Atua na te tutuanga maroiroi i te reira kia etai ke ra. Ka rave katoa tatou i te reira ei au puapii na te taangaanga matakite i te Pipiria, auraka e taruri ke i te reira me kare auraka e akatotoa atu i ta te reira au tuatua kia tau ki to tatou au manako. (2 Timoteo 2:15) Ko ta te Atua ra i totou ka tupu rai te reira. E tiratiratu aia i te akatupuanga i tana Tuatua. Kia tiratiratu ra tatou i te mouanga i te reira.

[Au Tataanga Rikiriki i Raro]

Maara Ainei ia Koe?

◻ Eaa te au akakeu anga tei mana ki runga i te angaanga a te aronga uri reo Pipiria i teia tuatau nei?

◻ Eaa ra te au ravenga urianga reo ou o teianei tuatau i kore ei e akapuapinga kore i ta te Atua ra akakoro anga no tona uaorai ingoa?

◻ Akapeea ra etai au urianga reo i te akapoiri anga i te au tuatua mou no runga i te meta, te matenga, e te enua oki?

◻ Na teea au tu e raukaʼi ia tatou te akaari e te mou tiratiratu ra tatou i te Tuatua a te Atua?

[Tutu i te kapi 16]

Ko teea urianga Pipiria taau ka tau kia taangaanga?