E Imene Akapaapaa Kia Iehova
“E peʼe au ia Iehova, kua teitei roa oki aia.”—EXODO 15:1.
1. Eaa te au tu akono e te au turanga o Iehova te oronga maira i te tika kia akapaapaaia aia ra?
E TAI ngauru ma toru au taime i oronga mai ei a Salamo 150 i te akauenga kia akapaapaa ia Iehova me kare ia Ia. Te akakiteia maira i te irava openga: “Ko tei uti i te aʼo ra, kia akapaapaa anake ïa ia Iehova. Alelu Ia.” Ei Au Kite no Iehova, te kite nei tatou e e mea tau kia akapaapaa tatou ia Iehova. Koia Tei Ngateitei i te Ao Katoa e Pini Ua Ake, te Teitei Rava, te Ariki mutu kore, Tei Anga mai ia tatou, Tei Oronga apinga ua mai na tatou. E arite koreia aia, e taka ke, kare e akaaiteia atu ki te au tu e manganui. Koia tei ki i te kite e te mana katoatoa, e e apa kore i te tu tau, e ko te tu aroa ia. Koia tei rungao i etai ke katoa i te meitaki; e tiratiratu aia. (Luka 18:19; Apokalupo 15:3, 4) E tau ainei aia no ta tatou akapaapaa anga? E tika rava aia no te reira!
2. Eaa ta tatou au tumu no te akakiteanga i te akaperepere anga kia Iehova?
2 Kare a Iehova i tau anake ua no ta tatou akamori anga e te akapaapaa anga mari katoa ra no ta tatou akaperepere anga e te akameitaki anga no tana au mea ravarai i rave no tatou nei. Nana “te au mea memeitaki i o maiia ra, e te au mea tika ravarai.” (Iakobo 1:17) Koia te Puna, e te Tumu, no te ora katoa ra. (Salamo 36:9) Te au mea ravarai ta tatou e rekareka nei ei au mema no te uanga tangata no ko mai iaia ra, no te mea koia Tei Anga meitaki mai ia tatou. (Isaia 42:5) Koia katoa oki Tei Oronga mai i te au akameitakianga katoatoa te aere maira kia tatou na roto i tona vaerua, i tana akaaerenga, e tana Tuatua oki. Tei ia tatou te akakore anga ara no runga i te tumuanga o tana oronga anga i tana Tamaiti ei oko no tatou. (Ioane 3:16) Tei ia tatou te manakonako anga Patireia no te ‘au rangi ou e tetai enua ou i te vai tika anga o te tuatua-tika ra.’ (2 Petero 3:13) E kapitianga meitaki to tatou ma te au taeake Kerititiano. (Roma 1:11, 12) Tei ia tatou te akangateitei anga e te au akameitakianga i te riroanga ei Au Kite nona. (Isaia 43:10-12) E tei ia tatou katoa oki te turanga oko maata no te pure. (Mataio 6:9-13) E tika tikai, e manganui te au tumu tei ia tatou no te akameitaki anga ia Iehova!
Te Au Mataara Tau ei Akapaapaa na Tatou ia Iehova
3. Na teea au mataara ke ke e raukai ia tatou i te akapaapaa ia Iehova e te akakite i to tatou akaperepereanga ki aia ra?
3 Ei au tavini akatapuia no Iehova, ka akapeea tatou i te akapaapaa anga iaia e te akakite anga i ta tatou akaperepere anga? Ka rauka ia tatou te rave i te reira ra te raveanga i te angaanga Kerititiano—te akakiteanga mei tera are ki tera are, te rave anga i te au oki akaouanga i te aravei, te akonoanga i te au apii Puka Tapu, e te rave akakiteanga i te arataa. Ka rauka katoa ia tatou i te akapaapaa iaia na te akakite ua anga me va mai tetai tuatau ra. Pera katoa oki, ka rauka ia tatou i te akapaapaa ia Iehova na to tatou tu akono tau tikai, e na te tu manea e te mako to tatou kakau e te akamanea anga ia tatou uaorai. E putuputu te Au Kite o Iehova i te akapaapaaia no te akaraanga meitaki i teia au tu nei. E pera katoa oki, ka rauka ia tatou i te akapaapaa ia Iehova e te akameitaki iaia na roto i te pure.—E akara ia 1 Paraleipomeno 29:10-13.
4. Eaa tetai o te au mataara manea maata na tatou kia akapaapaa i to tatou Metua aroa i te rangi ra?
4 Kapiti katoa oki, ko tetai o te au mataara manea maata na tatou no te akapaapaa i to tatou Metua aroa i te rangi ra na te akateiteianga iaia e tona au tu tau tikai ma te au imene Patireia reka ra. Te akatika ra te aronga akatangi imene e te aronga akapapa imene e ko te apinga akatangi anga imene meitaki maata roa ko te reo tangata ia. Kua akakeuia te aronga karape i te akatangi imene kia tata i te au opera no te imene no te mea e maata te merengo anga i te akarongoanga ki te reo tangata i te imeneanga.
5. No teea au tumu i tau ei tatou kia manako ma te ngakau tae tikai i ta tatou imeneanga i te au imene Patireia ra?
5 Mei teaa ra to Iehova rekareka i te akarongoanga i te au tangata e imene ra, e maata atu oki me te imene ra ratou i te au imene no te akapaapaa e te akaperepere! E mea papu i reira, ka tau tatou kia manako pakari tikai i ta tatou imeneanga i te au imene Patireia i ta tatou au akaputuputuanga tukeke—te au uipaanga putuputuanga, i te au akaputuputu anga kotinga, i te au ra akaputuputu anga takake, te au uruoaanga tapere, e te au uruoaanga mamaata ra. Te ki ra ta tatou puka imene i te au imene mareka tikai, ko te meitaki o te reira kua akapaapaa putuputuia e te aronga o vao ra. Ko te maata atu o to tatou tomo anga ki roto i te vaerua no te imeneanga i te au imene Patireia, ko te maata ia o ta tatou akatupu anga i te mareka anga kia etai ke ra e te akapuapinga oki ia tatou uaorai.
Imene Akapaapaa Anga ia Iehova i te Au Tuatau Puka Tapu Ra
6. Akapeea to Iseraela ra akakite anga i te ariki anga no to ratou akaora angaia i te Tai Muramura ra?
6 Te akakite maira te Tuatua a te Atua kia tatou e kua imene autu ua atu a Mose e te katoa anga o to Iseraela ra i te akaora angaia mei te vaeau o Pharao ra i te Tai Muramura. Kua akamata mai ta ratou imene ma te au tuatua: “E peʼe au ia Iehova, kua teitei roa oki aia; ko te oroenua e tona akaoro, tei uriia e ia ki raro i te tai. Ko Iehova toku maroiroi, e toku peʼe anga, e kua riro aia ei ora noku: koia toku Atua, e koia taku e akapaapaa.” (Exodo 15:1, 2) Ka rauka ua ia tatou te tamanako i te maroiroi e te rekareka o to Iseraela ia ratou e imene ra i taua au tuatua ra i muri ake i to ratou akaora angaia na te tu temeio!
7. Eaa etai atu atianga meitaki tei rekoti ia e te au Tuatua Tapu Epera ra no te akapaapaaanga to Iseraela ra ia Iehova na roto i te imene?
7 Ia 1 Paraleipomeno 16:1, 4-36, ka tatau tatou e, kua akapaapaaia a Iehova na te imeneanga e na te akatangianga i te au apinga akatangi imene i ta Davida apai anga mai i te Aruna ki Ierusalema. E atianga rekareka tikai te reira. E imeneanga akapaapaa katoa oki tetai ia Iehova kapiti katoaia te au mea akatangianga imene i te tuatau i akatapuiaʼi e te Ariki ko Solomona te iero i Ierusalema ra. Ka tatau tatou ia 2 Paraleipomeno 5:13, 14 e: “Kua kapiti akera te aronga akatangi pu e te aronga imene i te reo okotai, i te akapaapaa anga, e te akameitaki anga ia Iehova: e kia akateitei akera ratou i te reo ma te au pu, e te au sumebalo, e te au mea e akatangiia ra, i te akapaapaa anga ia Iehova, i te na ko anga e, E meitaki oki tona, ka tu oki tona aroa e rimua; kua ki maira taua are ra ki te tumurangi, te are o Iehova; E kare atura te kau taunga e mou i te raverave no taua tumurangi ra: kua ki oki te are o te Atua ki te kakā o Iehova.” Eaa ta te reira i akari mai? Te akarongo maira Iehova i te reira imene akapaapaa anga e te mareka katoa ra i te reira, mei tei akakiteia maira e te tumurangi taka ke ra. I muri iora, e imeneanga tetai na nga pupu imene e rua i te tuatau o te akatapuanga i te au paruru o Ierusalema i te tuatau o Nehemia ra.—Nehemia 12:27-42.
8. Eaa te akari maira e kua rave to Iseraela i te imeneanga ma te ngakau tae tikai?
8 Ko te tika, e tuanga puapinga maata te imeneanga no te akamori anga i te iero e e 4,000 to ngati Levi tei akatakaia no te akono i te akatangi anga imene. (1 Paraleipomeno 23:4, 5) Kua kapitiia mai teia aronga ma te aronga imene katoa ra. Ko te akatangi anga imene e e maata to te aronga imene ra, ia ratou tetai ngai puapinga maata i roto i te akamori anga, kare mei te mea ei apai i te au tumu teiaa o te Ture, mari ra ei oronga i te vaerua tika no te akamori anga. Na te reira i tauturu i to Iseraela kia akamori ia Iehova na tetai mataara mataora. E tamanako ana i te teateamamao anga e te akamanako anga no te akapapa anga tei akonoia ki teia tu: “To ratou maata kia tatau ra, e to ratou ai taeake katoa ra, ko tei apiiia i te imene ia Iehova ra, ko te aronga katoa i karape ra, e rua ïa anere, e varu ngauru, e varu ara.” (1 Paraleipomeno 25:7) E tamanako ana i akapeea te tau tikai o ta ratou rave anga i te imeneanga akapaapaa kia Iehova. Kua apiiia ratou i te imene e kua riro ei aronga karape!
9. Eaa te akaketaketa anga te orongaia maira no te imeneanga i roto i te au Tuatua Tapu Kerititiano Ereni ra?
9 I te tae mai anga ki te anere mataiti mua o to tatou tuatau noa nei, eaa ta tatou i kite? Ko Iesu, i te po o tona pikikaa angaia, ma te manganui oki o te au tumu teiaa i tona manako ra, kua manako ngakau rai aia kia akaotiia tana akono anga i te Pasa e te oronga anga i te Akanaaroa Anga i tona matenga na te imene akapaapaa anga kia Iehova ra. (Mataio 26:30) Pera katoa oki, ka tatau tatou “e turuaipo akera,” i muri ake i to raua papa angaia e te tapeka angaia, “kua pure iorā Paulo raua ko Sila, imene atura ma te akameitaki i te Atua: ae te akarongo maira te au tangata i tapekaia ra ia raua.”—Angaanga 16:25.
Imene Akapaapaa Anga—E Tuanga Puapinga Maata no ta Tatou Akamori Anga
10. Eaa te au akauenga te orongaia maira e te Tuatua a te Atua no te akapaapaaanga iaia na roto i te imene?
10 Te manako ngakau nei ainei koe ko te imeneanga i te au imene Patireia kare e rava ana te puapinga noou kia oronga atu i toou manako anga ngakau? Me koia ia, kare ainei koe e tau kia tamanako akaou i te reira tumu, i te mea e puapinga maata ta te Atua ko Iehova raua ko Iesu Karaiti e tuku ana ki runga i te au imene akapaapaa anga? Eaa oki, te ki ra te Tuatua a te Atua i te au akauenga kia akapaapaa ia Iehova e kia imene akapaapaa kiaia! Ei akatauanga, ia Isaia 42:10, ka tatau tatou e: “E imene i te imene ou kia Iehova; te akameitaki iaia mei te openga mai o te enua ra; ko kotou ko tei aere ki te moana, e to reira ki katoa ra; te au enua taatai ra, e te noo i reira.”—E akara katoa ia Salamo 96:1; 98:1.
11. Eaa te akamaroiroi anga ta te apotetoro ko Paulo i oronga maira no te imeneanga?
11 Kua kite te apotetoro ko Paulo e ka rauka i te imeneanga i te taki i to tatou vaerua ki runga, e no reira kua akamaroiroi aia ia tatou e rua taime no te reira tumu. Ka tatau tatou ia Ephesia 5:18, 19: “Kia ki ra kotou i te Vaerua; ma te karangaranga oki kotou kotou uaorai i te salamo e te imene oki ma te tau o te ngakau i te Atu [“kia Iehova,” NW].” E ia Kolosa 3:16, ka tatau tatou: “Kia noo tika rai te tuatua a te Mesia i roto ia kotou e kia maata, ma te pakari; i te apii anga e te ako anga tetai ki tetai ma te salamo e te imene e te peʼe a te Vaerua, i te imene anga ma te aroa ua i roto i to kotou ngakau i te Atu [“kia Iehova,” NW].”
12. Eaa te au akatauanga tei ia tatou nei no te tauturuanga ta tatou au imene kia apii e kia akamaroiroi tatou tetai i tetai?
12 E akamanako ana i ta Paulo tuatua putuputu anga i te imeneanga, i tana taiku anga ‘i te salamo, akapaapaa anga i te Atua, peʼe a te vaerua, imene oki ma te tau o te ngakau.’ Pera katoa oki, kua akamata aia i tana au tuatua anga ki to Kolosa ra na te tuatuaanga e na teia tu ka rauka ia tatou “i te apii anga e te ako anga tetai ki tetai.” Ka rave puia e tatou te reira, mei te kiteia ra i te ingoa tikai o ta tatou au imene—“Pouroa te Au Mea Angaia, Akapaapaa ia Iehova!” (numero 5), “Kia Ngaueue Kore, Ngaue Kore!” (numero 10). “Kia Rekareka i te Manakonako Anga Patireia!” (numero 16), “Auraka e Mataku ia Ratou!” (numero 27), “E Akapaapaa ia Iehova to Tatou Atua!” (numero 100), ei akatauanga tokoiti ua.
13. Akapeea “te tavini akono meitaki e te pakari” i te akari mai anga i te puapinga maata o te imeneanga ei tuanga no ta tatou akamori anga?
13 Kia rotai ma teia au akauenga, kua akanoonooia e “te tavini akono meitaki e te pakari” e i ta tatou akaputuputuanga—te au uipaanga putuputuanga, te au akaputuputu anga kotinga, te au ra akaputuputu anga takake, te uruoaanga tapere, e te au uruoaanga mamaata—ka akamataia e ka akaopeia ma te imeneanga i te au imene Patireia. (Mataio 24:45) Kapiti katoa oki, kua akapapaia te au imene no te imeneia i etai atu taime i taua au akaputuputuanga ra. I te mea ra e akamata ana ta tatou au uipaanga e ma te imeneanga i tetai taime i te imene Patireia, kare ainei i te mea tau kia tauta tatou kia tae i te taime no te reira, kia tae vave atu no te rave i te reira tuanga no ta tatou akamori anga? E i te mea te akaotiia ra te au uipaanga ma te imeneanga, kare ainei tatou e noo ua atu e tae roa ki te imene akaotianga e te pure e aru maira i muri ua ake i te reira?
14. Eaa te au akatauanga na tatou i te au imene tano tikai i ikiia ra no ta tatou au porokarama?
14 Kua iki akatanoia te au imene i ta tatou au uipaanga kia rotai ma te porokarama katoa oki. Ei akatauanga, i te Uruoaanga Tapere “Apiianga Tu-Atua” i te 1993, ko te imene numero 191, “E Akariro i te Tuatua Mou e Naau Uaorai,” te akamaroiroi maira i te au Kerititiano kia maro atu ia Satani, i teianei ao, e te kopapa apa ua, kua aru mai i muri ua ake i nga tuatua e toru tei tuatuaia ra no teia nga enemi. Pera katoa oki, te imene numero 164, “Tamariki—E Au Mea Aroa Akaperepere Mei ko Mai i te Atua,” tei ki ra i te akamaroiroi anga i te au metua, tei aruia maira i muri ua ake i tetai tuatua te akaketaketa anga i te apainga a te au metua kia apii i ta ratou tamariki. Ko te imene numero 70, “Kia Aite Mei ia Ieremia Ra,” no mua ua ake i nga tuatua tei akatumuia ra ki runga i te au totou a Ieremia. E i muri ake i tetai tuatua anga no etai tu o ta tatou angaanga Patireia kua aru maira te imene numero 156, “Ka Inangaro Au,” ko tetai imene tau no te rave anga i te angaanga tutu aere. Ko te reira tu katoa rai te akonoia ra i te ikianga i te au imene no te Apii Punanga Tiaki, te Uipaanga no te Angaanga Tutu aere, e te Apii Angaanga Orometua Tutaraatua. Mei te reira katoa e me ka rave te aronga pakari i te au tuatua ki te katoatoa ra e ka akakite mai i te imene kia imeneia ei akamata i te porokarama, ka tau ratou kia iki i te imene tei turu ra i te tumu manako no ta ratou tuatua.
15. Akapeea te tiamana o te uipaanga ra akakeu anga i te ariki anga no te imene te ka imeneia ra?
15 I te akakiteanga i te imene te ka imeneia, penei ka tau te tiamana i te akamata i te arikianga i te imene na te oronga anga i te ingoa me kare te tumu manako. Kare oki tatou e imene numero ana mari ra ko te au tumu manako Tuatua Tapu. Pera katoa ka tauturuia te putuputuanga kia maata te ariki anga i te imene ra me ka akakiteia mai te irava tuatua tapu tei orongaia mai i raro ake i te tumu manako ra. Pera katoa, penei ka tau kia tuatuaia etai tumu tokoiti, mei te tu rai e ka tau te katoatoa kia tomo atu ki roto i te vaerua o taua imene ra.
E Akari i te Ariki Anga no to Iehova Meitaki na te Imeneanga
16. Akapeea tatou ka tomo atu ei ki roto i te vaerua o ta tatou au imene ra?
16 I te mea te ki ra te au tuatua o ta tatou au imene Patireia i te aiteanga, ka tika tatou kia manako maata ki runga i te au tuatua ia tatou e imene ra ia ratou. Kia anoano tikai tatou i te tomo atu ki roto i te vaerua o te au imene tataki tai ra. Ko etai, mei te au imene te tuatua ra i te aroa, e ua no te vaerua, e mea akatuki ngakau ia. (Galatia 5:22) Ko teia ta tatou ka imene ma te maroiroi e te pumaana. Ko etai e rekareka anga, e ka tau tatou kia tauta i te imene mataora i te reira. Te vaira etai e ririnui e au imene no te matianga, e ko te reira ka tau kia imeneia ma te tu oraora e te irinaki anga maata. I ta tatou Apii Angaanga Orometua Tutaraatua, te akoia maira tatou kia tuatua ma te pumaana e te manako ngakau e pera katoa te tu oraora i ta tatou oronga anga. Ko te akakite anga i te pumaana, te manako ngakau e te tu oraora i te imeneanga i ta tatou au imene e maata atu ia te puapinga anga.
17. (a) Eaa te tu tei akaapaia ra te au Iseraela tiratiratu kore kare tatou e anoano kia akapiriia mai ki ta tatou imeneanga? (e) Eaa te tupu anga me ka rave tatou ma te ngakau tae tikai i te akamaroiroi anga i roto i ta tatou au imene ra?
17 Me ka imene tatou i ta tatou au imene Patireia ma to tatou manako ki runga i etai atu apinga ke, ma te kore e arikianga tikai i te aiteanga o te au tuatua ra, kare aina tatou e aite atu ki to Iseraela tiratiratu kore tei akaapaia ra no te mea, ia ratou e akapaapaa ra i te Atua ma to ratou vaa, e mamao ke atura to ratou ngakau iaia? (Mataio 15:8) Kare roa tatou e anoano i te reira tu kia akapiriia mai ki te tu o ta tatou imeneanga i te au imene Patireia ra, ka akatika ainei tatou? Na te raveanga i te tika ki te imeneanga i ta tatou au imene Patireia, ka akamaroiroi tatou kare ia tatou anake uaorai mari ra i te aronga katoa takapini ia tatou, kapiti katoa oki te aronga ou. Ae, me ka manako marie tatou ravarai i to tatou au Are Uipaanga Patireia i te akamaroiroi anga no roto i teia au imene, ka riro teia ei mana ririnui i te akamaroiroi anga kia rave totomapu i te angaanga orometua e kia kopae ke i te au ereere no te rave anga tarevake ra.
18. Eaa te tupu anga no te imeneanga i te au imene Patireia ki runga i tetai vaine ra?
18 E putuputu, te aronga no vao ra i te manako meitaki i ta tatou imeneanga i te au imene Patireia ra. Kua neneiia i Te Punanga Tiaki teia tumu tuatua i tetai taime: “E ka rauka katoa oki i [ta tatou] imeneanga i te apai mai i te au tangata ki tetai tu kite i te Atua ko Iehova te akariia maira e tetai tupuanga ki tetai vaine tei papetitoia ra i te Akaputuputuanga ‘Autu Anga Tu-Atua’ i te 1973, i Yankee Stadium, i te oire ko New York. Kua aere atura aia no tona aerenga mua ki tetai Are Uipaanga Patireia i tona ngai koia anake ua e kua noo atu aia no nga uipaanga e rua. I te imene anga te putuputuanga e . . . ‘E Tamou i Toou Nga Mata ki Runga i te Re!,’ kua manako rekareka aia i te au tuatua e pera katoa i te tu o te imene anga e kua iki aia e ko teia tikai te ngai te anoano ra aia nona. I muri akera kua aravei atu aia i tetai o te Au Kite ra e kua pati atu i tetai apii anga Puka Tapu, e kua tupu ua atu tona kite e tae roa kia riro [aia] ei kite Kerititiano no Iehova.”
19. Eaa te akamaroiroi anga te orongaia maira no ta tatou imeneanga i ta tatou au imene Patireia ma te ngakau katoa?
19 I te maata anga o ta tatou au uipaanga, e tokoiti ua te au tuatau no te aronga akarongorongo ra i te akakite anga i to ratou manako ngakau e te ariki anga oki. Inara ka rauka ia tatou pouroa i te akakite i te tu o to tatou manako no to Iehova ra tu meitaki na te kapitianga ma te ngakau katoa i te imeneanga i te au imene Patireia ra. Pera katoa oki, me akaputuputu mai tatou, kare ainei e e vaerua rekareka to tatou? E no reira ka tau rai tatou kia inangaro i te imeneanga! (Iakobo 5:13) E tika rava, ko te maata to tatou ariki anga i to Iehova ra tu meitaki e tona aroa takinga meitaki, mei te reira katoa ta tatou ka imene ma te meta katoa i te akapaapaa anga ki aia.
Akapeea Koe me Pau?
◻ Eaa nga tumu anga e rua no te akapaapaa anga ia Iehova?
◻ Na teea au mataara ke ke e raukai ia tatou i te akapaapaa ia Iehova?
◻ Eaa tetai o te au mataara manea maata no tatou kia akapaapaa ia Iehova?
◻ Eaa te au akatauanga o te Tuatua Tapu tei ia tatou no te akapaapaa anga ia Iehova na roto i te imene?
◻ Akapeea tatou i te rave anga tau tikai i ta tatou imeneanga i te au imene Patireia ra?
[Pia i te kapi 12]
Kia Rekareka i Taua Au Imene Ra!
I te akara anga e te vaira tetai papaki tei kite ra i tetai manga tu ngata i te apiianga i etai o te au imene ou ra. Inara, ko tetai papaki o te au putuputuanga kare o ratou manamanata maata i te imeneanga i te maata anga o te reira au imene katoatoa ra. Penei kia tere atu te tauta anga i te apii anga i tei manakoia ra i te akamata anga e kare e matauia penei ko te reira ua te anoanoia ra. Kia riro mai kia kite i taua au imene ra, e putuputu te putuputuanga i te ariki anga i te reira kia maata atu i to te au imene kare ra i umuumuia te tauta anga i te apii. Ei reira ka rauka i te katoatoa i te putuputuanga i te imene ma te irinaki tikai i te reira. Ae, ka rekareka ratou i taua au imene ra!
[Pia i te kapi 12]
E Imene i te Au Imene Patireia i te Au Akaputuputuanga Tamataora
Kare e tau kia kotingaia ta tatou imeneanga i te au imene Patireia ki te Are Uipaanga Patireia anake ua. Kua imene akapaapaa a Paulo raua ko Sila kia Iehova ia raua i roto i te are tapekaanga. (Angaanga 16:25) Kua tuatua te pipi ko Iakobo e: “Te rekareka na tetai? ka imene aia i te imene” akapaapaa i te Atua. (Iakobo 5:13, tataanga i raro ake) I te au akaputuputuanga tamataora te rekareka ra te katoatoa. E no reira eaa ka kore ei e imene i te au imene Patireia? Ka riro teia ei mareka anga me ka kapitiia mai te piani me kare te kita ki te imeneanga. Me kare ra, te vaira te au tepe piani no ta tatou au imene Patireia; e manganui te au ngutuare tangata e Kite tei ia ratou ra te pia no teia au tepe nei. Kare te reira e ka meitaki anake no te kapiti anga i te imeneanga mari ra e meitaki katoa ia no te turu anga i te imene anga manea.
[Tutu i te kapi 8, 9]
I muri ake i to ratou akaora angaia i te Tai Muramura ra, kua akakite to Iseraela i to ratou rekareka na roto i te imene
[Tutu i te kapi 10]
Ko te imene rekareka tetai tuanga no te akamori anga Kerititiano i teia tuatau nei