Paruruanga i to Tatou Akarongo

“Ka akatapu ra kotou [i te Atu ra ia Iesu] i to kotou ngakau; e kia tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na.”​—1 PETERO 3:15, akaaite ia NW.

1, 2. Eaa ra te Au Kite o Iehova i kore ei e poitirere i te patoi anga, inara eaa ta ratou e anoano ra?

I TE maata anga o te au enua te kiteia ra te Au Kite o Iehova ei au tangata tiratiratu, e te nooanga akono ma. E manganui te manako maira ia ratou ei au tangata tupu meitaki kare ra e akatupu pekapeka. Inara, ei tukeanga, kua mamae teianei au Kerititiano inangaro i te au, i te takinga kinoanga tau kore​—i te au tuatau tamaki e te tuatau au oki. Kare ra ratou e poitirere i taua patoianga ra. Ko te tika te tapapa maira ratou i te reira. No te mea, kua kite ratou e ko te au Kerititiano tiratiratu i te anere mataiti mua T.N. kua riro ei aronga “makitakitaia,” no reira eaa te aronga te tauta ra kia riro ei au pipi mou na Karaiti i teia tuatau nei e manako ei kia tuke te akono maianga ia ratou? (Mataio 10:22) Pera katoa oki, te tuatua ra te Pipiria: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.”​—2 Timoteo 3:12.

² Kare te Au Kite o Iehova e kimi i te takinga kinoanga, kare katoa oki ratou e rekareka i te au tu ngata​—te au akautunga anga, te au tapekaanga, me kare te akono kinoia​—penei ka apaiia mai e te reira. Te anoano ra ratou ‘kia noo kanga koreia mai ma te au’ kia raukai ia ratou kia tutu aere i te tuatua meitaki no te Patireia o te Atua ma te arairai koreia. (1 Timoteo 2:1, 2) Te ariki ra ratou i to ratou tu rangatira i te akonoanga i te maata anga o te au enua i ta ratou akamori anga, e te rave marie ra ratou i te ka rauka ia ratou kia ‘noo au ua i roto i te tangata katoa nei,’ kapiti mai i te au tutara o te au kavamani tangata ra. (Roma 12:18; 13:1-7) Eaa ra, i reira, i riro ei ratou ei aronga “makitakitaia”?

3. Eaa tetai tumu i makitakita tau koreiai te Au Kite o Iehova ra?

³ Ei tumu anga, te makitakita tau koreia ra te Au Kite o Iehova no taua au tumu rai tei takinga kinoia ra te au Kerititiano mua ra. Te mea mua, te rave ra te Au Kite o Iehova i to ratou au irinaki anga akonoanga na roto i te tu te akariro ra ia ratou kia reka koreia e tetai papaki. Ei akatauanga, te tutu maroiroi ra ratou i te tuatua meitaki o te Patireia o te Atua, inara e putuputu te kite kore te au tangata i to ratou maroiroi anga, ma te manakoanga i ta ratou tutu aereanga ei “rave tutu aere anga maroiroi.” (Akaaite ia Angaanga 4:19,​20.) E turanga neutara to ratou i te au poritiki e te au tamaki oki a to te au pa enua ra, e i etai tuatau kua manako tarevakeia teia e ko te Au Kite e aronga tangata tiratiratu kore.​—Mika 4:3, 4.

4, 5. (a) I akapeea te Au Kite o Iehova i riro ei ei au takete no te au akaapa anga pikikaa? (e) Koai ma te aronga akatupu putuputu i te takinga kino i te au tavini o Iehova ra?

⁴ Te rua, kua riro te Au Kite o Iehova ei au takete akaapa anga pikikaaia​—ma te au pikikaa e te au akakiteanga tarurike i to ratou au irinaki anga. Ei tetai tupu anga, kua riro ratou e kia takinokino tika koreia i etai enua. E pera, no to ratou kimi i te rapakau anga kare e toto te rotai ra ma to ratou anoano kia akono i te akauenga a te Pipiria kia ‘kore e rave i te toto,’ kua tapa tarevakeia ratou e “e aronga ta tamariki” e “ko tetai akonoanga ta ia ratou uaorai.” (Angaanga 15:29) Mari ra ko te tika te tuku ra te Au Kite o Iehova i tetai puapinga teitei ki runga i te oraanga, e te kimi ra ratou kia rauka te utuutu anga meitaki rava no ratou uaorai e ta ratou tamariki. Ko te akaapaanga e e manganui te au tamariki a te Au Kite o Iehova te mate ra i te mataiti takitai ei tupuanga no te akakoreanga i te pamu toto kare takiri ia i te tika. Pera katoa, no te mea kare e aiteite te tupu anga no te tuatua mou o te Pipiria ki runga i te au mema ravarai o te ngutuare tangata, kua akaapa katoaia te Au Kite i te akangaangaa anga i te au pamiri. Inara, ko te aronga te matau ra i te Au Kite o Iehova te kite ra e te manako teitei ra ratou i te oraanga ngutuare tangata e te tauta ra kia aru i te au akauenga a te Pipiria e kia aroa te tane e te vaine tetai i tetai e kia akangateitei atu i tetai i tetai e kia akarongo te au tamariki i to ratou nga metua noatu me e aronga akarongo e me kare.​—Ephesia 5:21–​6:3.

⁵ I te au atianga e manganui, kua kiteaia e ko te aronga akatupu maata i te takinga kinoanga i te au tavini o Iehova ko te aronga akonoanga patoi tei taangaanga ra i to ratou mana ma te aronga taoonga poritiki e te aronga akakite nuti oki ei tauta kia arai i te au angaanga a te Au Kite ra. Akapeea tatou, te Au Kite o Iehova, i te akono tau anga i taua patoi anga ra​—me ko tetai tupuanga ia no to tatou au irinaki anga e te au ravenga oki me kare no te au akaapa anga pikikaa ainei?

“Kia Kitea Meitakiia Oki to Kotou Maru i te Tangata Katoa”

6. Eaa ra i puapinga maatai kia manako tau i te aronga i vao mai i te putuputuanga Kerititiano ra?

⁶ Ei akamata anga, ka umuumuia kia rauka ia tatou te manako tika​—to Iehova manako​—no te aronga kare ra i piri mai ki to tatou au irinaki anga akonoanga. Me kare ra, penei ka pati tau kore ua tatou i te riri me kare i te akakino mei ko mai ia etai ke ra. “Kia kitea meitakiia oki to kotou maru i te tangata katoa,” ta te apotetoro ko Paulo i tata. (Philipi 4:5) No reira, te akamaroiroi maira te Pipiria ia tatou kia tau te manako anga no te aronga no vao mai i te putuputuanga Kerititiano ra.

7. Eaa te o atura i te tiaki anga ia tatou uaorai “auraka ei viivii i teianei ao”?

⁷ I tetai pae, te akamaroiroi taka meitaki maira te au Tuatua Tapu ia tatou kia “tiaki [ia tatou uaorai] auraka ei viivii i teianei ao.” (Iakobo 1:27; 4:4) Ko te tuatua “ao” i konei, mei te au ngai e manganui i roto i te Pipiria ra, te taiku ra i te au tangata tini i te pae atu i te au Kerititiano mou ra. Te noo nei tatou i roto i teia taiate tangata; te aravei atura tatou ia ratou i te angaanga, i te apii, i te pae mai oki ia tatou. (Ioane 17:11, 15; 1 Korinetia 5:9, 10) Inara, te tiaki ra tatou ia tatou uaorai kia kore e viivii i teianei ao na te kopaeanga i te au tu manako, te tuatua, e te tu akono te patoi ra i ta te Atua au tu tuatua tika. E mea puapinga maata katoa oki kia kite tatou i te tu kino o te pirianga vaitata ma teianei ao, kia maata atu oki ma te aronga te akaari ra i te manako kore takiri no ta Iehova ra au turanga.​—Maseli 13:20.

8. Eaa ra te akoanga kia tiaki iaia uaorai auraka e viivii i teianei ao i kore ei e oronga kia tatou i tetai tumu no te akaraanga akameangiti ia etai ke ra?

⁸ Inara, kare te akoanga kia tiaki e auraka kia viivii i teianei ao e oronga mai i tetai tumu kia tatou no te akataka keanga akameangiti atu i te aronga kare ra i te Au Kite o Iehova. (Maseli 8:13) Kia maara i te akatauanga a te au arataki akonoanga ngati Iuda, tei uriuri manakoia i te atikara i mua akenei. Kare i rauka i ta ratou tu akonoanga i te akatupu i te akaperepere anga ma Iehova; kare katoa oki i tauturu i tetai pirianga meitaki ma te aronga kare ra i te ngati Iuda. (Mataio 21:43, 45) Mei to ratou manako tuatua tika no ratou uaorai, kua akara akameangiti mai teianei aronga akateitei i te aronga Kenitara. Kare matou e manako akapera ana, i te akonoanga i te aronga kare i te Au Kite ma te aviri anga. Mei te apotetoro ko Paulo, ko ta matou e varevare ua atu nei koia oki kia rauka i te aronga te akarongo ra i te tuatua mou Pipiria i to te Atua mareka anga.​—Angaanga 26:29; 1 Timoteo 2:3, 4.

9. Eaa tetai tupuanga manako tau i te Tuatua Tapu i te tu o ta tatou tuatua anga no te aronga kare ra e piri mai ki to tatou irinaki anga?

⁹ Ka tau tetai manako tau i te Tuatua Tapu kia arataki i te tu o ta tatou tuatua anga no te aronga kare i te Au Kite. Kia apii a Paulo ia Tito kia akamaara atu i te au Kerititiano i te enua o Kereta ra “auraka rava e akakino atu i te tangata ravarai, eiaa ei tauetono, kia maru ra, e te akono i te mea maru i te tangata katoa ra.” (Tito 3:2) E akara e ‘auraka te Kerititiano e akakino atu i te tangata ravarai’​—kare katoa oki i te aronga kare i te Kerititiano i Kereta ra, kua matauia oki tetai papaki no ta ratou pikikaa, te kaituauau, e te kope. (Tito 1:12) No reira kare i tau ki te tuatua tapu no tatou kia taiku i te au tuatua akakino i te tuatuaanga no te aronga kare ra e piri mai ki to tatou au irinaki anga. Kare teia tu akateitei e arataki mai ia etai ke ra ki te akamori ia Iehova. Kareka ra, me manako tatou e me akono oki ia etai ke ra kia tau ma te au kaveinga o te Tuatua a Iehova, ‘ka akamanea tatou i te apiianga’ a te Atua.​—Tito 2:10.

A Naea ka Muteki ei, a Naea ka Tuatuai

10, 11. Akapeea ta Iesu akakite anga e kua kite aia e ko teea (a) “te tuatau no te muteki ua”? (e) “te tuatau no te tuatua”?

¹⁰ Te vaira “e tuatau to te muteki ua, e e tuatau to te tuatua,” ta Koheleta 3:7 i tuatua. Tei konei, i reira, te akaaoanga: te ikianga i te tuatau no te manako kore ua atu i te aronga patoi e te tuatau oki kia tuatua paruru i to tatou akarongo. Ka rauka kia maata ta tatou ka kite mei te akatauanga a tei kite apa kore ua ra i te akataka anga tau​—koia Iesu. (1 Petero 2:21) Kua kite aia ko teea te “tuatau to te muteki ua.” Ei akatauanga, i ta te kau taunga nunui e te aronga pakari akaapa pikikaa anga iaia ki mua ia Pilato, “kare ua ra [a Iesu] i ki atu.” (Mataio 27:11-14) Kare rava aia i anoano kia tuatua atu i tetai apinga penei ka arai i te raveanga i to te Atua ra anoano nona. Mari ra, kua iki aia, kia tuku i tana angaanga i te ngai tangata ra kia tuatua nona uaorai. Kua kite aia noatu ko te tuatua mou kare e taui i to ratou manako e te ngakau parau oki. No reira kua manako kore ua aia i ta ratou akaapaanga, na te koreanga e tuatua, no tana akakoro anga kia muteki ua.​—Isaia 53:7.

¹¹ Inara, kua kite katoa oki a Iesu “e tuatau to te tuatua.” I etai atianga, kua tuatua ua atu aia ki te aronga akaapa mai iaia, ma te pauanga i ta ratou au akaapa anga pikikaa. Ei akatauanga, i ta te aronga tata tuatua e te au Pharisea tauta anga kia tapepe iaia i mua i tetai urupu ra na te akaapaanga iaia i te akakoreanga te au temoni na roto ia Belezebuba, kua iki a Iesu auraka e tuku kia mou taua tapepe anga ra. Ma tetai tu akataneaanga e tetai akatutuanga ririnui ra, kua tarurike aia i taua pikikaa ra. (Mareko 3:20-30; akara katoa ia Mataio 15:1-11; 22:17-21; Ioane 18:37) Mei te reira katoa oki, i muri ake i tona pikikaa angaia e te tapeka anga, kua kikaia atura Iesu ki mua i te Sunederi, kua akaue kikite atura a Kaiapha Taunga Maata: “Te akataputouia nei koe e au i te Atua ora ra e, e akakite mai koe kia matou nei, ko koe aina te Mesia, te Tamaiti a te Atua?” Ko teia katoa e ‘tuatau no te tuatua,’ no te mea me vai muteki ua ka rauka kia manakoia ei tetai akakore anga e koia te Karaiti. No reira kua pau atura Iesu: “Koia ïa.”​—Mataio 26:63, 64; Mareko 14:61, 62.

12. Eaa te au turanga tei akakeu ra ia Paulo raua ko Banaba kia tuatua ma te mataku kore i Ikonio?

¹² Akamanako katoa i te akatauanga a Paulo raua ko Banaba. Te tuatua ra ia Angaanga 14:1, 2: “Aere katoa atura raua ki roto i te sunago o te ngati Iuda i Ikonio, e no ta raua tuatua i akarongo ei to te ngati Iuda e te Eleni katoa e manganui. To te ngati Iuda ra, kare i akarongo ra, taoriori atura ratou i te au etene, e akaki atura oki i to ratou ngakau ki te riri i te au taeake ra.” Te tatau ra The New English Bible: “Mari ra kua taoriori atura te au ngati Iuda, kare ra i tauiia, i te au Kenitara e kua poitini atura i to ratou manako anga i te au Kerititiano ra.” Kare i mareka i ta ratou uaorai kopaeanga i te tuatua ra, kua rave atu te au ngati Iuda patoi ra i tetai ravenga tairo anga, i te tauta anga kia akariri i te aronga Kenitara ra ki te au Kerititiano ra.a Mei teaa ra te oonu to ratou makitakita i te akonoanga Kerititiano ra! (Akaaite ia Angaanga 10:28.) Kua manako ngakau a Paulo raua ko Banaba ko teianei “e tuatau to te tuatua,” kia kore te au pipi ou ra e riro kia ngakau kore no te akakino anga a te au tangata ra. “E noo anga roa to raua [to Paulo raua ko Banaba] i reira i te tuatua anga i te tuatua a te Atu [a Iehova] ma te mataku kore,” tei akaari ra i tona mareka anga na te akamaroiroianga ia raua kia rave i te au akairo temeio ra.​—Angaanga 14:3, 4.

13. I te akonoanga ma te akakinoia maira, ko teea tikai “te tuatau no te muteki ua”?

¹³ Eaa, i reira, ta tatou ka tau kia rave me ka akakinoia mai tatou? Tei runga te reira i te au turanga. Te akakite maira etai turanga ia tatou kia akono i te kaveinga ra e “e tuatau to te muteki ua.” E maata oki to teia tu me tauta te aronga patoi ra kia kika atu ia tatou ki roto i te au taumaroanga tumu kore ua. Kare tatou e tika kia akangaropoina e ko tetai papaki tangata kore ua e anoano ana kia kite i te tuatua mou. (2 Tesalonia 2:9-12) Ko te tautaanga kia uriuri manako ma te aronga kua tamou marieia to ratou ngakau ki te irinaki anga kore e mea puapinga kore ia. E tere atu oki i te reira, me ka tauru atu tatou ia tatou uaorai ki roto i te taumaroanga i te aronga akaapa pikikaa ua tei patoi mai ia tatou, penei ka riro tatou kia tapae ke mei tetai angaanga puapinga maata e tutakianga oki​—koia te tauturuanga i te aronga ngakau tiratiratu te anoano tika ra kia kite i te tuatua mou Pipiria. No reira me rokoia atu ma te aronga taitoito tei akakoro ra kia akatotoa aere i te au pikikaa no tatou, ko te akoanga akauruia kia: “Ariu ke atu ia ratou.”​—Roma 16:17, 18; Mataio 7:6.

14. Na roto i teea au tu e paruru ei tatou i to tatou akarongo i mua i etai ke ra?

¹⁴ Inara, kare te aiteanga o teianei, e kare tatou e paruru i to tatou akarongo. No te mea, te vaira e “tuatau to te tuatua.” Te manako tika ra tatou no te au tangata ngakau tae tei akaaroia atura ki te akaapa anga akakino ia tatou nei. Te mareka ra tatou i te oronga i tetai akataka anga tika i to tatou au irinaki anga ngakau kia etai atu; ae, te ariki nei matou i te tuatau. Kua tata a Petero: “Ka akatapu ra kotou [i te Atu ra ia Iesu] i to kotou ngakau; e kia tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na.” (1 Petero 3:15, akaaite ia NW.) Me ka ui mai te aronga inangaro tikai no te akapapu anga i te au irinaki anga ta tatou e akaperepere ra, me uiui mai ratou no te au akaapa anga pikikaa a te aronga pikikaa ra, e apaianga ia na tatou kia paruru i to tatou akarongo, na te orongaanga te pauanga tau no te Pipiria. Kapiti katoa oki, ka maata atu te akakiteanga a to tatou tu akono meitaki. Kia akara mai te aronga manako tuera ua ra e te tauta tika ra tatou kia akono rotai ma te au turanga tuatua tika a te Atua, ka kite viviki ua ratou e e pikikaa te au akaapa anga ia tatou ra.​—1 Petero 2:12-15.

Akapeea te Au Akakite Anga Akakino Anga?

15. Eaa tetai akatauanga i te riroanga te Au Kite o Iehova ei takere no te au akakiteanga tarevake i roto i te nuti ra?

¹⁵ I etai taime, kua riro te Au Kite o Iehova ei takete no te akakiteanga tarevake i roto i te nuti. Ei akatauanga, ia Aukute 1, 1997, kua neneiia i tetai nutipepa i Rutia tetai atikara akakinoanga, tei akakite ra i roto i etai atu apinga, e te umuumu ra te Au Kite kia akataka ke te au mema kia ‘kopae ke i ta ratou au vaine, au tane, e te ai metua me kare ratou e kite e kare oki e piri atu ki to ratou akarongo.’ Tetai ua atu te kite tika ra i te Au Kite o Iehova te kite ra e e pikikaa taua akaapaanga ra. Te akakite maira te Pipiria e kia akono te au Kerititiano i te au mema akarongo kore o te ngutuare ma te aroa e te akangateitei atu, e te tauta ra te Au Kite kia aru i taua arataki anga ra. (1 Korinetia 7:12-16; 1 Petero 3:1-4) Noatu rai e, kua neneiia taua atikara ra, e e manganui te aronga tatau tei akakite tarevakeia ra. Akapeea tatou i te paruru anga i to tatou akarongo me ka akakino pikikaaia mai tatou?

16, 17, e te pia i te kapi 16. (a) Eaa ta Te Punanga Tiaki i tuatua i tetai tuatau ra no te pauanga i te au akakiteanga pikikaa i te nuti ra? (e) I raro ake i teea au turanga e pau ei te Au Kite o Iehova i te au ripoti tau kore i roto i te nuti ra?

¹⁶ I konei katoa oki, te vaira “e tuatau to te muteki ua, e e tuatau to te tuatua.” Kua akakite mai Te Punanga Tiaki i te reira i tetai tuatau na teia tu: “Me ka akaruke ua tatou i te akakiteanga pikikaa i roto i te nuti e me ka paruru ainei i te tuatua mou na te au tu tau te vaira ia ki runga i te au turanga, ki tei akapapa ra i te akaapa anga, e tana akakoro anga oki.” I etai tu penei e meitaki atu kia akaruke ua atu i te au ripoti tau kore ra, e na te reira kare e akatere atu i te akakite anga i te au pikikaa.

¹⁷ I etai atu tu penei ka riro e ‘e tuatau no te tuatua.’ Penei ko tetai tangata tata me kare tangata ripoti tei akakite tarevakeia atu no runga i te Au Kite o Iehova e penei ka mareka aia i te akakiteanga tika no tatou. (Akara i te pia “Akatikatikaanga i Tetai Akakiteanga Tarevake.”) Me ka akatu mai te au ripoti tau kore i te nuti ra i te manako kino te ka arairai i ta tatou angaanga tutu aere, penei ka tau te au mema o te opati manga o te Taiate Punanga Tiaki kia rave i te paruru i te tuatua mou na etai rave anga tau.b Ei akatauanga, penei ka akapapaia na te aronga pakari tau e oronga i te au tika, mei to te porokaramu tivi ra, no te mea penei no te kore e akakiteia te tika ka riro kia manakoia e kare a te Au Kite o Iehova ra pauanga. Ka rave taokotai pakari te Au Kite takitai ra i te arataki anga a te Taiate Punanga Tiaki e tona au mema akaaere oki i taua au tumu ra.​—Ebera 13:17.

Paruruanga i te Tuatua Meitaki i te Pae Ture

18. (a) Eaa tatou ka kore ei e umuumu i te akatikaanga a te au kavamani tangata nei kia tutu aere? (e) Eaa te ravenga ta tatou te ka aru me ka araiia mai te tika kia tutu aere?

¹⁸ No te rangi mai te akamana anga ia tatou kia tutu aere i te tuatua meitaki o te Patireia o te Atua ra. Kua orongaia kia Iesu ‘te mana katoa o to te rangi e te enua nei’ e nana i akaue mai ia tatou kia rave i teianei angaanga. (Mataio 28:18-20; Philipi 2:9-11) No reira, kare tatou e umuumu i te akatika anga a te au kavamani tangata nei kia tutu aere. Inara, te kite ra tatou e te raukaanga te tu rangatira i te pae akonoanga e meitaki ia no te akatotoaanga i te tuatua Patireia. I te au enua tei ia tatou te tu rangatira kia akono i ta tatou akamori anga, ka taangaanga tatou i te akatere anga i te pae ture ei paruru i te reira. I te ngai kua araiia taua tu rangatira ra, ka tauta tatou na roto i te papaanga ture, kua rauka mai te reira. Ko ta tatou akakoroanga kare ko te taokotai ua, mari ra ko te “akatika anga, e te akamou anga i te evangelia nei.”c​—Philipi 1:7.

19. (a) Penei eaa te tupu anga no ta tatou ‘apaianga ki te Atua i ta te Atua au apinga ra’? (e) Eaa ta tatou manakoanga papu kia rave?

¹⁹ Ei Au Kite o Iehova, te akatika ra tatou e ko Iehova te Ngateitei o te Ao Katoa e Pini Ua Ake. Ko tana te ture teitei rava. Te akarongo ra tatou i te au kavamani tangata nei, no reira te ‘apai ra i ta Kaisara kia Kaisara.’ Mari ra kare tatou e tuku i tetai apinga kia tamanata i ta tatou akatupuanga i tetai apainga maata roa atu te puapinga,​—‘koia ta te Atua ra, kia apaiia ki te Atua.’ (Mataio 22:21) Te kite pu ra tatou e na te raveanga i te reira ka akariro ia tatou ei aronga “makitakitaia” na to te au pa enua, inara te ariki nei tatou i teianei ei tuanga no te riro anga ei pipi. Ko te tataanga i te ture no te Au Kite o Iehova i te 20 anere mataiti nei e akakiteanga ia i to tatou manako anga papu kia paruru i to tatou akarongo. Ma te tauturu a Iehova e tana turuanga, ‘kare e rā e tukua e tatou i te apii anga atu e te tuatuaanga i te tuatua meitaki.’​—Angaanga 5:42.

[Au Tataanga Rikiriki i Raro]

Maara Ainei ia Koe

◻ Eaa te Au Kite o Iehova i riro ei ei aronga “makitakitaia”?

◻ Eaa te manako tau no tatou i te aronga kare ra i piri mai ki to tatou au irinaki anga akonoanga?

◻ I te akono atuanga i te aronga patoi ra, eaa te akatauanga tau ta Iesu ra i akanoo?

◻ Me akakinoia mai tatou, akapeea ka raukai ia tatou te akono i te kaveinga e te vaira “e tuatau to te muteki ua, e e tuatau to te tuatua”?

[Pia i te kapi 16]

Akatikatikaanga i Tetai Akakiteanga Tarevake

“I Yacuiba, i Bolivia, kua akapapa tetai pupu akakite evangeria i reira i tetai are tivi kia akaari i tetai teata tei maaniia ra e te aronga apoteiti. I te manako anga i te au tupuanga kikino o taua porokaramu ra, kua iki te aronga pakari kia aravei atu i nga are tivi e rua ra e kua akapapa kia tutaki atu ia ratou kia akaari ki te au tangata ra i nga vitio Jehovah’s Witnesses​—The Organization Behind the Name e The Bible​—A Book of Fact and Prophecy. I muri ake i te akaraanga i nga vitio a te Taiate ra, kua riri te pu o te are ratio ra i te au akakiteanga tarevake i te porokaramu a te aronga apoteiti ra e kua oronga mai i te tika kia rave i te au akakiteanga tutaki kore na te Au Kite o Iehova ra no runga i ta ratou uruoaanga tapere te vaitata maira. E maata te aronga i aere atu ki reira, e e manganui te aronga ngakau tiratiratu tei akamata i te uiui atu i te au uianga ngakau tae i ta te Au Kite ra aravei anga ia ratou i te angaanga orometua ra.”​—1997 Yearbook of Jehovah’s Witnesses, kapi 61-2.

[Tutu i te kapi 17]

I tetai atianga, kua maro atea atura Iesu i te au akaapa anga a te aronga akaapa iaia ra