Eaa ra i Meangiti ei te Tuatau?

TUATAU. Penei ka ngata ia tatou i te akataka tikai i taua tuatua, inara kua kite papu tatou e kare e maata ana to tatou tuatau. Kua kite katoa tatou e te aere viviki ra te reira. Ko te tika, e aue putuputu ana tatou, “E viviki te tuatau.”

Noatu rai, te papu ra e kua tika tikai te tangata atu pee Papaa ko Austin Dobson i te kite anga aia i te 1877: “Te aere ra te Tuatau, te tuatua ra koe? A kare! Aue, te noo ra te Tuatau, te aere ra tatou.” Mei tona matenga i te 1921, kua ngaro a Dobson vaitata rai e 80 mataiti; te aere nei rai te tuatau.

Maata te Tuatau

No Tei Anga i te tangata ra, te akakite maira te Pipiria kia tatou: “Kare ua te au maunga nei i anau, kare oki te enua e te ao katoa nei i angaia e koe ra, ko koe rai koe, e te Atua, mei tupua roa mai e tuatau ua atu.” (Salamo 90:2) Me kare te taiku ra The New Jerusalem Bible i te reira, “mei te mutu kore ki te mutu kore ko koe rai te Atua.” No reira ka vai ua te tuatau mei te Atua uaorai ka vai​—e tuatau ua atu!

Ei tukeanga ki te Atua, tei iaia te mutu kore o te tuatau, ka tatau tatou no te tangata ravarai: “Kua topa akenei to matou au rā katoa i toou ra riri: Kua pou to matou au mataiti mei te manako ra: Te au rā o to matou au mataiti, e itu ïa ngauru i te mataiti; e kia tae ki te varu i te ngauru i te mataiti i te maroiroi, e riro ra taua maroiroi ra ei roiroi e ei taitaia anga; kare oki e mamia, motu ke atura, rere atura matou.”​—Salamo 90:9, 10.

Eaa ra i poto ei te oraanga i teia tuatau, mei te mea te apii meitaki maira te Pipiria e ko ta te Atua akakoroanga koia oki kia ora ua atu te tangata ma te mutu kore? (Genese 1:27, 28; Salamo 37:29) Kare i tetai oraanga kotingaia mei ta te Atua i akakoro, eaa ra i raukai i te au tangata i te averiti, i raro i te turanga meitaki, e meangiti atu i te 30,000 au ra? Eaa ra i meangiti ei te tuatau no te au tangata? Koai me kare eaa tei apa no teia turanga maromaroa? Te oronga maira te Pipiria i te au pau anga taka meitaki e te merengoanga.a

Maata te Meangiti o te Tuatau

Ka rauka i te aronga pakarikari i te akapapu e i roto i te au ngauru mataiti i ou ake nei e kua viviki te aerenga o te oraanga. Kua tuatua tetai vaine tata tianara, ko Dr. Sybille Fritsch, i te 200 mataiti i topa ake nei, kua topa te epetoma angaanga mei te 80 ki te 38 ora, “inara kare teia i akamutu i ta tatou koumuumuanga.” Kua akataka mai aia: “Kare e tuatau; ko te moni te tuatau; te opuanga i te tuatau e mei te opuanga i tetai akaea; e oraanga manamanata.”

Kua akatuera te au apinga ou tei maaniia i te au tuatau e te au rauka anga kare i moemoeaia ana e te au uki i mua ana. Inara no te maata i te ka rauka i te piri atu ki roto i te au angaanga maata, ka maata ia te taitaia no te meangiti te tuatau no te rave i te reira. I teia tuatau, i te au tuanga ngai e manganui o te ao, te akono ra te tangata i te akapapa anga pakari, te rapurapu anga mei tetai tuatau ki tetai. Kia akaruke a Papa no te angaanga i te 7:00 a.m., kia akateateamamao a Mama i te tamariki no te aere ki te apii i te 8:30 a.m., e akapapaanga ta Papa ruau i ko i te taote i te 9:40 a.m., e kia akapapa tatou katoatoa no tetai uipaanga puapinga i te 7:30 p.m. I te rapurapu anga kia taeria te tuatau i akanooia mei tetai, kare e maata ana te tuatau no te akaangaroi anga. E ka kopekope tatou no runga i te angaanga i te au ra, te angaanga roiroi.

Kare Tatou e ko Tatou ua no te Meangiti i te Tuatau

Ko to te Atua Enemi, ko Satani te Tiaporo, ko tei taki ra tana ravenga i te akameangiti anga i te oraanga o te tangata, kua riro i teianei e ko tei akakinoia e ia uaorai. (Akaaite ia Galatia 6:7, 8.) Te tuatuaanga i te anaunga o te Patireia o te Mesia i te rangi ra, te oronga maira a Apokalupo 12:12 kia tatou i tetai tumu manakonakoanga i te na ko anga: “E teianei, kia rekareka, e te au rangi e, e ko kotou katoa oki ko tei noo i reira. E mate ra oki to te enua e to te tai! tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”

Kia tau ki te akapapaanga Pipiria irinakiia e te tupuanga o te totou Pipiria, te noo nei tatou i te vaitata o te “tuatau poto ua.” Mei teaa ra te rekareka i te kite e kare e roa atu ka ope to Satani tuatau! Me akaateaia aia, ka akaoki akaouia te au tangata akarongo ki te tu apa kore, e ka rauka ia ratou te ora mutu kore ta Iehova i akakoro no ratou i te akamata anga. (Apokalupo 21:1-4) Kare e riro te kore anga tuatau ei manamanata.

Ka rauka ainei ia koe i te akamanako e mei teaa ra te reira kia rauka te ora mutu kore​—kia ora e tuatau ua atu? Kare koe e tamanamanataia e te au apinga kare i oti ia koe i te rave. Me te anoano maata ra koe i te tuatau, te vaira apopo, me kare tera epetoma, me kare tera mataiti—​te tika, te mutu kore e totoa ra i mua ia koe!

Taangaanga Meitaki i te Tuatau tei Rauka ia Tatou i Teianei

I te kiteanga e kua kotingaia tona tuatau no te akamana i te tangata ravarai, kua tauta a Satani i te akono e kia angaanga maroiroi te tangata e kare o ratou tuatau no te akarongo mai i te tuatua meitaki o te Patireia tei akatumuia e te Atua. No reira, ka meitaki tatou i te aru i te ako anga tu-Atua: “E tenana, kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia. E auraka kotou ei manako kore, kia kite ra kotou i to te Atu ra anoano.”​—Ephesia 5:15-17.

Mei teaa ra te puapinga e kia taangaanga meitaki tatou i to tatou tuatau no te au apinga puapinga maata roa atu e i te kaimoumou anga i te reira ki runga i te au aruaru anga puapinga kore te ka kore e apai mai i te puapinga mutu kore! Kia tatanu tatou i taua tu tei rauka ia Mose i te pati anga aia ia Iehova na roto i teia au tuatua ngakau tae: “E apii mai ia matou i te tatau i to matou puke rā, kia riro to matou ngakau ki te pakari.”​—Salamo 90:12.

E tika, i roto i teia ao te angaanga maroiroi nei te tangata. Noatu rai, te raurau pakari nei te Au Kite o Iehova ia koe kia akapou i etai o toou tuatau akaperepere kia kite no runga i ta te Atua umuumu anga e raukai te ora mutu kore i raro ake i tona Patireia. E tai ora i te epetoma ka pou i te apii putuputu i te Pipiria, te ‘kite ra i to te Atu ra anoano’ penei ka akariro ia koe kia kite tikai i te tupuanga o teia au tuatua: “E akaruke i te kino, ka rave i te meitaki; kia noo ua rai koe e tuatau ua atu. Ka riro te enua no te aronga tuatua-tika, ka noo tamou rai ratou i reira.”​—Salamo 37:27, 29.

[Tataanga Rikiriki i Raro]