Ka Tomo Ainei Koe ki Roto i te “Ngutupa Maata te Taki Atura ki te Angaanga”?
1. Eaa te “ngutupa maata te taki atura ki te angaanga” e tuera maira kia tatou?
1 I te tuera mai anga te “ngutupa maata te taki atura ki te angaanga” ki te apotetoro ko Paulo, kua akono maroiroi aia i te tuatau i te akakite i te au inangaro Patireia noatu te aronga patoi e manganui. (1 Kori. 16:9, NW) I teia tuatau mei etai 642,000 papuritia Patireia takapini i te ao tei tomo atu ki roto i te ngutupa maata no te angaanga na te riro mai anga ei au painia tamou.
2. Eaa i meitaki ei kia akamanako i to tatou turanga i tetai au taime?
2 Taui Ana te Au Turanga: Noatu e e akakotinga ana to tatou uaorai au turanga i teianei i ta tatou angaanga, e taui ana te au turanga. No reira, e mea meitaki no tatou kia akamanako i to tatou uaorai turanga i tetai au taime e auraka e tiaki ua kia mako mai te au turanga. (Kohe. 11:4) E mapu ainei koe te vaitata ra i te karatuati mei te apii teitei? E metua ainei koe e kare e roaia ka akamata taau tamariki i te aere ki te apii? Te vaitata ra ainei koe i te ritaea anga mei taau angaanga? Ka akamaata atu taua tauianga i te taime va e te akatika ra ia koe i te tomo atu ki roto i te tavinianga painia tamou. Tetai tuaine tei kite mai i te au makimaki i mua atu ana, kua manako mai i te piri atu ei painia e e 89 ona mataiti. Eaa te tumu? I te mea e kare aia i peke ana ki roto i te are maki e tai mataiti e tere atu, kua manako mai aia e te akatika ra tona oraanga iaia i te painia.
3. Akapeea tetai i te akonoanga i te au tauianga kia rauka i te painia tamou?
3 No runga ia Paulo, i te akamataanga kua akakoro aia i te atoro atu i tona au taeake i Korinetia. Inara, kua taui aia i tana au parani no te tuatua meitaki. Te manganui e painia tamou ra i teia tuatau, kua akono i tetai au tauianga kia rauka i te painia. Kua akamama mai tetai pae i to ratou oraanga ki te tua rava e e angaanga tuatau poto ua te anoanoia ra i te tutaki i ta ratou au kaiou no te oraanga. Kua kite mai ratou i te rekareka i roto i ta ratou tavinianga akaperepere. (1 Timo. 6:6-8) Kua akono tetai au tokorua akaipoipo i te au tauianga e e okotai ua te angaanga moni ra, i te akatikaanga i te vaine kia painia.
4. Eaa ta tatou ka rave me kare e papu ia tatou e ka taeria ia tatou te ora e umuumuia ra?
4 Auraka e akakore viviki i te manako no te painia anga no te mataku e kare e taeria ia koe te ora e umuumuia ra. I runga ua ake i te rua ora te anoanoia ra i te ra okotai. Me kare e papu ana ia koe e ka rauka ia koe, e tamata i te painia tauturu e tai me kore e rua marama inara ma te akakoroanga uaorai e e 70 ora. Te akatika ra teia ia koe i te tongi i te au rekareka no te painia. (Sa. 34:8) E tuatua atu ki te aronga e painia nei. Penei kua autu ana ratou i te au akaaoanga tei aiteite ki toou. (Maseli 15:22) E pati kia Iehova kia akameitaki i taau au tautaanga i te akamaata atu i taau angaanga orometua.—1 Ioane 5:14.
5. Eaa te painia tamou anga ei aruaru anga puapinga maata?
5 Tetai Aruaru Anga Puapinga: Te apai maira te tavinianga ei painia tamou i te au akameitakianga maata. Te akatika ra te reira ia koe i te kite i te mataora maata te kapiti maira ki te oronga anga maata. (Anga. 20:35) Ka akameitaki atu te painia anga i toou kite i te akono meitaki i te Tuatua a te Atua. (2 Timo. 2:15) Ka oronga mai te reira i te au atianga maata i te kite i to Iehova rima i te tauturuanga ia koe. (Anga. 11:21; Philipi 4:11-13) Ka tauturu katoa te painia anga ia koe i te akatupu i te au tu pae vaerua, mei te akakoromaki, e ka tauturu ia koe i te akavaitata atu kia Iehova. (Ia. 4:8) Ka rauka ainei ia koe i te tomo atu ki roto i teia ngutupa maata no te angaanga e kia riro mai ei painia tamou?