Аракх тут тари темница — ачхов ки светлина

1-2. а) Кај аракхљола сине о Павле кеда пишинѓа о писмо е пхраленге ко Ефес? б) Кола пучиба ка дикха?

ЏИКОТЕ сине пханло ко јекх кхер ко Рим, о апостол Павле мангља те охрабринел пле пхрален хем пхењен. Адалеске со нашти сине лично те посетинел лен, пишинѓа ленге писмија. Јекх лендар пишинѓа ле е пхраленге ко Ефес околу 60-то или 61-то берш а.е (Еф. 1:1; 4:1).

² Англедер деш берш адава, о Павле несаво време сине ко Ефес, коте со проповединѓа хем сикавѓа е јаверен башо шукар хабери (Апо. 19:1, 8-10; 20:20, 21). Ов бут мангела сине е пхрален хем е пхењен хем мангља те поможинел лен те ачхон верна е Јеховаске. Ама соске пишинѓа е помазиме пхраленге баши темница хем и светлина? Хем саве поуке шај те овен са е христијанен таро адава со пишинѓа ле? О одговор башо акала пучиба ка дикха лен ки акаја статија.

ТАРИ ТЕМНИЦА КИ СВЕТЛИНА

3. Кола лафија користинѓа о Павле ко пло писмо џи ко Ефешања?

³ Е христијаненге ко Ефес о Павле пишинѓа: „Некогаш сиен сине темница, акана сиен светлина“ (Еф. 5:8). О Павле акате користинела о лафија темница хем светлина те шај те објаснинел дуј скроз различна буќа. Те дикха соске о Павле вакерѓа кај о Ефешања некогаш сине ки темница.

4. Ки сави смисла о Ефешања сине ки духовно темница?

⁴ Духовно темница. Англедер те дознајнен о чачипе хем те овен христијања, о Ефешања коленге со о Павле пишинѓа сине дело тари ховавни религија хем верујнена сине ко суеверие. Ко Ефес аракхљола сине о пенџардо храми е грчко божицакоро Артемида, бут мануша ко адава време дикхена сине ки лесте сар јекх таро ефта чудија. О мануша со џана сине ко адава храми обожавинена сине идолија. Адала со керена сине хем бикинена тикне храмија тари Артемида заработинена сине бут паре (Апо. 19:23-27). Освен адава, бут мануша ко Ефес керена сине магие (Апо. 19:19).

5. Ки која смисла о Ефешања сине ки духовно темница?

⁵ Морално темница. О мануша ко Ефес живинена сине неморално хем понашинена пе сине безобразно. Ко театарска претставе па чак ко верска прославе сине најнормално те користинен пе непристојна лафија (Еф. 5:3). Бут џене таро Ефешања „нашавѓе секова чувство башо морал“, лафија со дословно значинена „чхинавѓе те осетинен дукх“ (Еф. 4:17-19). Англедер те дознајнен е Јеховаскере мерилија башо исправно хем погрешно, ленгири совест на мучинела лен сине кеда керена нешто погрешно, исто аѓаар ола мислинена сине кај нане лен нисави одговорност англо Јехова. Адалеске о Павле шај сине те вакерел кај ленгере „гоѓа тане ки темница хем тане дурјарде таро живото со дела о Девел“.

6. Соске о Павле шај сине те вакерел е Ефешаненѓе „акана сиен светлина?“

⁶ Ама, несаве таро Ефешања на ачхиле ки темница. О Павле баши ленде пишинѓа „акана сиен светлина ко јекхипе е Господареа“ (Еф. 5:8). Ола почминѓе те живинен спрема е Јеховаскоро лафи кова со сине сар светлина со водинела лен (Пс. 119:105). Акала Ефешања мукле пумаре ховавне верска обичаија хем о неморално понашибе. Ола геле „пало е Девлескоро пример“ хем керѓе са со шај те служинен е Јеховаске хем те радујнен ле (Еф. 5:1).

7. Сар амари ситуација тани слично е ситуацијаја буте христијаненгири таро Ефес?

⁷ Слично, амен да англедер те дознајна о чачипе сием сине ки темница ко духовно хем ко морално поглед. Несаве амендар славинена сине празникија кола со сине поврзиме ховавне религијаја а јавера живинена сине неморално. Ама, откеда дознајнѓем башо е Јеховаскере мерилија башо исправно хем погрешно керѓем промене. Почминѓем те живина аѓаар сар со мангела о Девел, а адава користинѓа аменге ко бут начинија (Иса. 48:17). Ама, нане секогаш локхо те аракха амен тари темница колатар со иклилем хем те продолжина те живина сар „чхаве е светлинакере“. Сар шај те кера адава?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

АРАКХ ТУТ ТАРИ ТЕМНИЦА

8. Спрема Ефешања 5:3-5, таро со ваљани сине те аракхен пе о христијања ко Ефес?

⁸ Читин Ефешања 5:3-5. Те шај те ачховен со подур тари темница, о христијања ко Ефес ваљани сине понадари да те отфрлинен са о постапке со мрзинела о Јехова. Ко акава на сине вклучимо само о сексуално неморал, него те на керен лафи ко непристојно начин. О Павле сетинкерѓа е Ефешанен кај ваљани те аракхен пе таро асавке буќа ако мангена те овел лен „наследство ко Царство е Христосескоро хем е Девлескоро“.

9. Соске ваљани те пазина те на кера ништо со шај те чхивел амен те кера неморал?

⁹ Амен да мора понадари те пазина амен те на кера о „буќа кола со припадинена е темницаке“ (Еф. 5:11). О искуство бут пути сикавела кај кобор повише некој дикхела, шунела или керела лафи башо мелале хем неморална буќа, побари тани и веројатност кај ка постапинел погрешно (1. Мој. 3:6; Јак. 1:14, 15). Ки јекх пхув, бари група пхраља хем пхења, почминѓе те пишинен пе преку јекх социјално мрежа. Ко почеток, бут џене лендар керена сине лафи башо Јехова хем башо чачипе. Ама, сар со накхела сине о време ола почминѓе те керен лафи башо буќа кола со на свиџинена пе е Јеховаске. Ленгири главно тема почминѓа те овел башо секс. Несаве лендар покасно признајнѓе кај адала разговорија чхивѓе лен те керен неморал.

10. Сар пробинела о Сатана те ховавел амен? (Ефешања 5:6).

¹⁰ Е Сатанаскоро свето мангела те ховавел амен, те чхивела амен те мислина кај о буќа коленге со о Јехова вакерела кај тане неморална хем мелале, ни хари нане погрешна (2. Пет. 2:19). Акава на изненадинела амен. Јекх таро е Бенгескере тактике кола со бут време користинела лен, тани те бунинел е манушен те шај те на разликујнен сој тано исправно а сој тано погрешно (Иса. 5:20; 2. Кор. 4:4). Ни хари нане чудно со ко бут филмија, телевизиска програме хем интернет странице, ширинена пе ставија кола со нане спрема е Јеховаскере праведна мерилија. О Сатана мангела те чхивел амен те мислина кај о мелале постапке хем о неморално живото, на само сој тане прифатлива него тане интересна хем нане опасна. (Читин Ефешања 5:6.)

11. Сар е Анџелакоро искуство сикавела кобор тано важно те применина о мудро совет таро Ефешања 5:7? (Дикх хем и слика).

¹¹ О Сатана мангела те накхава време манушенцар кола со ка керен аменге пхаро те икера амен ко е Јеховаскере мерилија. Адалеске, о Павле поттикнинѓа е Ефешанен: „Ма те овел тумен ништо ленцар“, околенцар со керена адава сој тано погрешно англо е Девлескере јакхја (Еф. 5:7). На ваљани те бистра кај амаре амала нане само окола касаја со дружинаја амен лично. Машкар ленде тане хем окола касаја со комунициринаја преку социјална мреже — опасност која со ко пурано време Ефешанен на сине лен. И Анџелаa која со живинела ки Азија, халили кобор опасна шај те овен о социјална мреже. Ој признајнела: „Ола шај те овен стапица, кола со хари похари шај те менине амаро начин сар размислинаја. Аљум џи ко адава степен те на сметинен ман више те овен ман ’амала‘ кола со на поштујнена о библиска начелија. Ко крајо, почминѓум манге те мислинав кај нане страшно те живинав ко начин кова со на свиџинела пе е Јеховаске“. Ама, несаве старешине ко јекх љубезно начин поможинѓе е Анџелаке те керел о промене со ваљани сине. Ој вакерела: „Акана, пхерава ми годи духовна буќенцар наместо буќенцар таро социјална мреже“.

12. Со ка поможинел амен те икера амен ко е Јеховаскере мерилија башо исправно хем погрешно?

¹² Амен мора те борина амен те шај те на размислина сар о мануша таро акава свето, кај о неморално понашибе тано прифатливо. Амен џанаја кај адава тано погрешно (Еф. 4:19, 20). Шукар тано те пуч амен: „Дали трудинава ман те на накхавав време бизи потреба ме колегенцар, соучениконцар или јаверенцар кола со на поштујнена е Јеховаскере праведна мерилија?“ „Дали храбро икерава ман ко е Јеховаскере мерилија чак ако о јавера мислинена кај сиум круто ко адава?“ Спрема о лафија таро 2. Тимотеј 2:20-22, шај чак ка ваљани те пазина касаја ка ова паше амала ко собрание. Амен на мангаја те бистра кај несаве шај нане те поможинен амен те ачхова верна е Јеховаске.

ЖИВИНЕН САР „ЧХАВЕ Е СВЕТЛИНАКЕРЕ“

13. Со значинела те живина сар „чхаве е светлинакере?“ (Ефешања 5:7-9).

¹³ О Павле поттикнинѓа е христијанен ко Ефес на само те продолжинен те циден пе тари темница, него понадари да те живинен сар „чхаве е светлинакере“. (Читин Ефешања 5:7-9.) Со значинела адава? Адава значинела секогаш те понашина амен сар чачутне христијања. Јекх начин сар шај те кера адава тано аѓаар со редовно ка читина хем ка проучина и Библија исто хем о публикацие со темелинена пе ки лате. А посебно тано важно те проучина шукар о пример хем о сикљојба е Исусескере, „и светлина е светоскири“ (Јован 8:12; Изр. 6:23).

14. Сар шај те поможинел амен е Девлескири сила?

¹⁴ Исто аѓаар, ваљани аменге помош тари е Девлескири сила те шај понадари да те понашина амен сар „чхаве е светлинакере“. Соске? Адалеске со ни хари нане локхо те ачхова чиста ко акава неморално свето (1. Сол. 4:3-5, 7, 8). Е Девлескири сила шај те поможинел амен те борина амен те шај те на размислина сар о мануша таро акава свето, коте сој тане вклучиме ленгере филозофие хем ставија кола со нане спрема е Девлескоро начин сар размислинела. Исто аѓаар, е Девлескири сила шај те поможинел амен те сикава секова шукарипе хем праведност (Еф. 5:9).

15. Ко саве начинија шај те добина е Девлескири сила? (Ефешања 5:19, 20).

¹⁵ Јекх начин сар шај те добина е Девлескири сила тано аѓаар со ка молина амен баши лате. О Исус вакерѓа кај о Јехова „ка дел пли сила околенге со родена лестар“ (Лука 11:13). Исто аѓаар, е Девлескири сила добинаја ла кеда заедно амаре пхраленцар хем пхењенцар фалинаја е Јехова ко амаре состанокија. (Читин Ефешања 5:19, 20.) Адава со е Девлескири сила влијајнела шукар упри аменде ка поможинел амен те живина аѓаар сар со мангела о Девел.

16. Со ка поможинел амен те ана мудра одлуке? (Ефешања 5:10, 17).

¹⁶ Кеда ваљани те ана важна одлуке, мора те хаљова „сој тани е Јеховаскири волја“ хем пало адава те постапина спрема лате. (Читин Ефешања 5:10, 17.) Кеда трудинаја амен те аракха библиска начелија сој поврзиме амаре ситуацијаја, амен уствари, трудинаја амен те хаљова сар о Девел размислинела баши адаја бути. Пало адава, ако применинаја лескере начелија ка шај те ана шукар одлуке.

17. Сар шај шукар те користина амаро време? (Ефешања 5:15, 16; дикх хем и слика).

¹⁷ О Павле исто аѓаар советинѓа е христијанен ко Ефес шукар те користинен пумаро време. (Читин Ефешања 5:15, 16.) „О лошно“ — амаро душмани о Сатана — мангела те ова добором бут зафатиме е буќенцар таро акава свето со ко крајо нане те овел амен време баши амари служба е Девлеске (1. Јов. 5:19). Јекх христијани локхе шај те почминел те концентриринел пе ко паре, образование или ки бути, наместо ко разна прилике со иси ле те шај те служинел е Јеховаске. Ако керела адава ов ка сикавел кај почминела те размислинел сар о мануша таро акава свето. Џанѓола пе, акала буќа нане погрешна. Ама ола на ваљани никогаш те овен аменге ко прво тхан ко живото. Те шај те живина „сар чхаве е светлинакере“, ваљани шукар те користина амаро време, јавере лафенцар те концентририна амен ко адава со чаче тано важно.

18. Со керѓа о Доналд те шај пошукар те користинел пло време?

¹⁸ Роде начинија те служине е Јеховаске ки панда побари мера. Акава керѓа ле о Доналд кова со служинела ки Јужноафриканско Република. Ов вакерела: „Размислинѓум башо мло живото хем бут молинѓум ман е Јеховаске те шај те поможинел ман те керав повише ки служба баши лесте. Молинѓум ман те аракхав бути која со ка поможинел ман те овел ман повише време проповедибаске. Адалеске со поможинѓа ман о Јехова, успејнѓум те аракхав шукар бути. Оттегани заедно мле ромњаја почминѓем полновремено те служина е Јеховаске.“

19. Сар шај понадари да те живина „сар чхаве е светлинакере“?

¹⁹ О писмо со о Павле пишинѓа е Ефешаненге сигурно бут поможинѓа ленге те живинен сар христијања. Адава со ов пишинѓа, водимо тари е Девлескири сила, шај те поможинел аменге да. Сар со дикхлем, шај те поможинел аменге мудро те бирина амари забава хем друштво. Шај те поможинел амен редовно те проучина и Библија те шај и светлина таро чачипе понадари да те водинел амен ко са со кераја. Исто аѓаар, сикавела кобор тани важно е Девлескири сила, која со поможинела амен те сикава шукар особине. Ако применинаја адава со пишинѓа о Павле, ка поможинел аменге те ана мудра одлуке кола сој спрема е Јеховаскоро начин сар размислинела. Ако кераја акала буќа, адава ка поможинел амен те аракха амен тари темница акале светоскири хем те ачхова ки светлина!