Ов сигурно кай о Йехова простингяс туке

1-2. Со керел о Йехова кана синям пишмани амаре безехенге? (Дикх и картинка-да.)

О цар Давид сине бут тъжно ашал о кханиле букя колато кергясас. (Пс. 40:12; 51:3) Ов сикавгяс кай наистина си пишмани тай о Йехова простингяс леске. (2 Царе 12:13) Тогава е Давидеске бут локило. (Пс. 32:1)

² Аменге-да сар о Давид ащи те локьол кана дикхас кай о Йехова сикавел пи милост кариг аменде. Даже ако керас баро безех, ка анел аменге бари утеха давкха те жанас кай о Йехова ка простинел аменге ако наистина синям пишмани, молинас амен те простинел аменге, хоратинас е старейшиниенца тай дас всичко амендар те дикхас те на керас пак о също безех. (Пр. 28:13; Деян. 26:20; 1 Йоан 1:9) Бут синям щастлива кай кана о Йехова простинел амаро безех нанай по-бут те родел аменге сметка леске или те накажинел амен. (Езек. 33:16)

3-4. Сар чувствинелас пес йекх пхен след като покръстисайли тай со ка дикхас калке урокиесте?

³ Подекхана ащи те на овас сигурна кай о Йехова простингяс аменге. Дикх со ачшило е пхеняса Дженифър. Лакери дай тай лакоро дад отцикнярла сикавенас ла е Йеховаске. Ама кана по-барили ой сине до монгери тай керелас кханиле букя. По-късно ой променисайли, диняс по животос е Йеховаске тай покръстисайли. Ой пхенел: „Преди керавас мръсна букя, макяравас ман, синьомас бут чшингарали тай о най-важно сине манге те икалав парес. Жанавас кай ашал е Исусескери жертва о Йехова ащи те простинел аменге. Ама въпреки кай синьомас пишмани тай молингьом е Йеховас те простинел манге нащине те верувинав кай наистина простингяс манге.“

⁴ Ащи подекхана те мислинес кай о Йехова си туке още холяме е безехенге колато кергян преди. Ама о Йехова мангел те овас сигурна сар о Давид кай ов си бут милостиво. Калке урокиесте ка дикхас соске си важно те овас сигурна кай о Йехова простингяс амаре безеха тай со ка помагинел аменге далкхеске.

СОСКЕ СИ ВАЖНО ТЕ ВЕРУВИНАС КАЙ О ЙЕХОВА ПРОСТИНГЯС АМЕНГЕ?

5. Состе мангел те верувинас о Бенг? Пхен йекх примери.

⁵ Ако синям сигурна кай о Йехова дехел амен тай простингяс аменге, нанай те мукас о Бенг те хохавел амен. Ма бистер кай о Бенг ка керел всичко за те спиринел амен те служинас е Йеховаске. Например ов ка дикхел те традел амен те верувинас кай амаре безеха си боркха баре кай о Йехова нанай те простинел аменге. Дикх со ачшило йекхе мрушеса андо Коринт ковато кергяс мръсна букя тай сине икалдо таро сбори. (1 Кор. 5:1, 5, 13) Кана ов вече сине пишмани, о Бенг мангляс окола таро сбори те на манген те простинен леске тай те на приеминен лес ко сбори. О Бенг жанелас кай ако о сбори на простинел леске, о мануш ка мислинел песке кай о Йехова-да нисар нанай те простинел леске. Ащине те овел леске боркха пхаро кай те на мангел те служинел е Йеховаске. О Бенг на променисайло тай авдиес-да керел о също. Ама аме „жанас со мангел те керел“ ов тай сар те заачшовас мамуй лесте. (2 Кор. 2:5-11)

6. Со ащи те помагинел аменге ако мислинас кай о Йехова на простингяс аменге е букиенге колато кергям преди?

⁶ Ако синям сигурна кай о Йехова простингяс аменге, ка ащи пак те овас щастлива. Кана керас безех бут съжалинас. (Пс. 51:17) Давкха ащи те традел амен те променинас амен тай те керас со си шукар е Девлеске андо якха. (2 Кор. 7:10, 11) Ама ако продължинас те хас холи бут време, ащи те спиринас те служинас е Йеховаске. Кана верувинас кай ов простингяс аменге ащи те спиринас те хас холи. Тогава ащи те продължинас те служинас леске, те овас сигурна кай анас леске радост тай те овас пак щастлива. Точно давкха мангел о Йехова. (Кол. 1:10, 11; 2 Тим. 1:3) Ама со ащи те помагинел аменге те верувинас кай ов простингяс аменге?

СО АЩИ ТЕ ПОМАГИНЕЛ АМЕНГЕ ТЕ ВЕРУВИНАС КАЙ О ЙЕХОВА ПРОСТИНГЯС АМЕНГЕ?

7-8. Со пхенгяс о Йехова за песке тай состе ащи те овас сигурна? (Изход 34:6, 7)

⁷ Мислине далкхеске со пхенел о Йехова за песке. Дикх например со пхенгяс о Йехова е Моисейеске ки планина Синай.a (Четине Изход 34:6, 7.) О Йехова ащине те пхенел бут букя за песке, ама ов решингяс те пхенел е Моисейеске кай си „милостиво тай лачшо Дел“. Тогава мислинес ли кай кана декхой ковато дехел е Йеховас керел безех тай си пишмани, о Йехова нанай те простинел леске? Ако о Йехова на простинел салке манушеске нанай сар те пхенел кай си лачшо тай милостиво.

⁸ Ащи те овас сигурна кай кана о Йехова пхенел кай си милостиво ов на хохавел. (Пс. 31:5) Аме ащи те верувинас леске. Ако си аменге трудно те спиринас те хас холи амаре безехенге, ащи те пучас амен: „Верувинав ли кай о Йехова наистина си милостиво тай лачшо тай ка простинел секаске ковато си пишмани пе безехенге? Тогава соске на верувинав кай ов простингяс манге-да?“

9. Со означинел кай амаре безеха си простиме? (Псалм 32:5)

⁹ Мислине со сикльовас тари Библия далкхеске сар простинел о Йехова. Дикх например со пишингяс о Давид далкхеске сар простинел о Йехова. (Четине Псалм 32:5.) Ов пхенгяс: „Ту простингян ме безеха.“ И еврейско дума „простинав“ означинел също „ваздав“ или „пхиравав“. Кана о Йехова простингяс е Давидеске ов все едно лиляс о пхарипе ковато ов пхиравелас, демек лескере безеха, тай е Давидеске локило. (Пс. 32:2-4) Аменге-да ащи те локьол. Кана вогиестар синям пишмани амаре безехенге на требе те продължинас те хас холи за ленге. Требе те овас щастлива кай о Йехова лиляс амаро пхарипе.

10-11. Со ахальовас е Йеховаске таро думес „готово те простинел“? (Псалм 86:5)

¹⁰ Четине Псалм 86:5. О Давид пхенгяс кай о Йехова си „готово те простинел“. Давкха означинел кай о Йехова на нерверинел пес сиго кана керас грешкес тай винаги мангел те простинел калкенге колато си пишмани. Соске? Ко стихи пишинел: „[Ту] сикавес верно любов кариг саворенде, колато роден тут.“ Сарто дикхлям ко предно уроки о Йехова обещинел те сикавел любов кариг калкенде колато дехен лес тай нисар те на мукел лен. Ако он керен безех тай си пишмани далкхеске, о Йехова ка продължинел те дехел лен тай ка простинел ленге. (Иса. 55:7) Ако си туке трудно те верувинес кай о Дел простингяс туке, ащи те пучес тут: „Верувинав ли кай о Йехова си готово те простинел саворенге колато си пишмани пе безехенге тай молинен лес те сикавел милост кариг ленде? Тогава на требе ли те верувинав кай ов простингяс манге-да кана асвенца молингьом лес далкхеске?“

¹¹ Аменге локьол далкхестар кай о Йехова бут шукар ахальовел кай синям безехале. (Пс. 139:1, 2) Ахальовас давкха авере-да псалмиестар ковато о Давид пишингяс тай ковато също помагинел аменге те верувинас кай о Йехова простингяс аменге.

МА БИСТЕР ДАВКХА СО О ЙЕХОВА ПОМНИНЕЛ

12-13. Со на бистерел о Йехова тай со керел ашал далкхеске? (Псалм 103:14)

¹² Четине Псалм 103:14. О Давид пхенгяс кай о Йехова „на бистерел кай синям керде пхувятар“. Калка думес сикавен кай о Йехова нисар на бистерел кай синям безехале тай адалкхеске си готово те простинел калкенге колато си пишмани. Акана ка ахальовас по-лачшес со означинел давкха.

¹³ О Давид пхенгяс кай о Йехова „лачшес жанел состар синям керде“. Ов кергяс е Адамиес пхувятар тай жанел сар си керде о мануша тай со требел ленге. Например даже йекх съвършено мануш требе те дишинел, те хал тай те совел. (Бит. 2:7) Ама ашал далкхеске кай о Адам тай и Ева керде безех давкха кай синям керде пхувятар означинел авер-да. Аме синям пхувятар соскето синям безехале тай требе те дас всичко амендар те на керас кханиле букя. О Йехова ма само жанел ама о Давид пхенгяс кай ов „на бистерел-да“ кай синям безехале. Давкха со пхенгяс о Давид означинел също кай о Йехова жалинел амен. Демек все едно о Давид пхенгяс: „О Йехова жанел кай подекхана ка керас грешкес тай кана дикхел кай синям пишмани ов ка сикавел милост тай ка простинел аменге.“ (Пс. 78:38, 39)

14. а) Со пхенгяс о Давид далкхеске кибор бари си е Йеховаскери прошка? (Псалм 103:12) б) Со сикльовас далкхестар сар о Йехова простингяс е Давидеске? (Дикх о блокчес „Сар о Йехова простинел тай бистерел?“.)

¹⁴ Кибор бари си е Йеховаскери прошка? (Четине Псалм 103:12.) О Давид пхенгяс кай кана о Йехова простинел аменге ов „чшиел амаре безеха боркха дуре кибор дур си о изтоки таро запади“. О изтоки си най-дуре таро запади тай он нисар нащи те киден пес. Со ахальовас далкхестар е безехенге, колато о Йехова простинел? Йекхе лилесте пхенел пес кай о Йехова чшиел о безех зомкха дур амендар кай нищо на ачшол лестар. Подекхана давкха со сунгас ащи те дел амен годи букиенге, колато ачшиле преди. Ама кана о Йехова простинел нищо нащи те дел лес годи е безехеске ковато кергям тай те родел аменге сметка. (Езек. 18:21, 22; Деян. 3:19)

15. Со ащи те керас ако още хас холи е безехенге колато кергям преди?

¹⁵ Сар е Давидескере думес ко Псалм 103 помагинен аменге те верувинас кай о Йехова простингяс аменге? Ако още хас холи е безехенге колато кергям преди, ащи те пучас амен: „Бистерав ли давкха со о Йехова помнинел? Бистерав ли кай ов помнинел кай синьом безехало тай ка простинел калкеске ковато си пишмани сар манде? Помнинав ли давкха со о Йехова решинел те бистерел? Помнинав ли о безеха колато ов бистергяс тай коленге нанай те родел манге сметка?“ О Йехова на продължинел те мислинел е безехенге колато кергям преди. Аме-да на требе те мислинас за ленге. (Пс. 130:3) Кана верувинас кай о Йехова простинел аменге нанай те хас холи амаре безехенге тай ка ащи те продължинас те служинас леске.

16. Пхен йекх примери ковато сикавел соске си опасно те продължинас те мислинас е безехенге колато о Йехова вече простингяс. (Дикх и картинка-да.)

¹⁶ Дикх йекх примери. Кана декхой традел лека кола ащи подекхана те дикхел о аняс колеса дикхел пес напалпале за те дикхел со авел палал лесте. Ама ка овел опасно ако дикхел само калке анясте. За те на ачшол катастрофа требе те дикхел о дром англал песте. О също требе те керас аме-да. Шукар си подекхана те мислинас е грешкенге колато кергям преди. Давкха ащи те помагинел аменге те на керас лен пак. Ама ако продължинас те мислинас е безехеске ковато о Йехова простингяс, ка овел аменге пхаро те дес всичко амендар ки служба. По-шукар си те дикхас наангле. Аме синям ко дром кариг о нево светос ковато обещингяс о Дел тай колесте нанай те дас амен годи е букиенге колато дукхавен амен. (Иса. 65:17; Пр. 4:25)

ПРОДЪЛЖИНЕ ТЕ ВЕРУВИНЕС

17. Соске требе те продължинас те верувинас кай о Йехова дехел амен тай кай простинел аменге?

¹⁷ Требе те верувинас кай о Йехова дехел амен тай кай винаги си готово те простинел аменге. (1 Йоан 3:19) Соске? Соскето о Бенг нанай те откажинел пес те традел амен те верувинас кай щом синям безехале о Йехова нащи те дехел амен тай нисар нанай те простинел аменге. Ов мангел те спиринас те служинас е Йеховаске тай дел всичко пестар далкхеске соскето жанел кай ачшол лес хари време. (Откр. 12:12) Аме на требе те мукас лес те побединел!

18. Со ащи те керес за те барярес ти вяра кай о Йехова дехел тут тай простинел туке?

¹⁸ За те барярес те вяра кай о Йехова дехел тут кер со сиклилян таро предно уроки. За те барярес ти вяра кай ов простинел туке мислине е букиенге колато пхенгяс о Йехова за песке. Мислине хоресте со пхенел и Библия далкхеске сар ов простинел. Ма бистер кай ов жанел шукар кай синян безехало тай кай ка овел милостиво кариг туте. Ма бистер също кай кана простинел ов бистерел амаре безеха. Тогава ка овес щастливо соскето синян сигурно кай о Йехова сикавел милост. Ту-да сар о Давид ка ащи те пхенес: „Благодаринав туке Йехова кай „простингян ме безеха“! (Пс. 32:5)