Февралё

Сар пистромэ андэ Библия, тэ терэс справедливо, када тэ терэс кадя, сар правильно англа лэ Дэвлэстирэ яқа и тэ на гиндос пала авэр вэрыто. Погиндосарам, сар лэ Иисусостири справедливость дицолас андэ лэстири дила. Андэ лэстири время и барэ мануша анда иудейско вера вэрыцынас кодэлэн, ко сас найевреёря. Кадяжэ вонэ вэрыцынас простонэ манушэн и на стонас патив пэ жувля. Но о Иисусо ни пала кастэ на гиндояс вэрыто и никас на вэрыцыяс. Во сас радо, кала и найевреёря лэнас тэ патян андэр лэстэ (Матфея 8:5—10, 13). Во росԥэнэнас и лащи весть всаворэнди, и лэ барвалэнди и лэ чорорэнди (Матфея 11:5; Луки 19:2, 9). Лэ жувлянца во никала на дэлас дума ӷрубо. Во дажэ терэлас лашимос кацавэ жувлянди, пала савэ авэр гиндонас, кай вонэ нисо на ашэн (Луки 7:37—39, 44—50). Амэ, кадя жэ сар и о Иисусо, на гиндосарас пала авэр вэрыто и росԥэнас важ о Дэл всаворэнди, ко камэл амэн тэ ашунэл. Амэ на шас сама, сави лэндэ вера и ашунглэ вонэ чи най. Сар и о Христос, и ԥрала стон патив пэ жувля. w19.05 2, абз. 1; 5, абз. 15—17

Андэ амарэ деса и старейшыноря, сар дэй, жалуин и подритярэн лашэ алавэнца анда Библия кодэлэн, касти када фартэ трэбуй. Тэ подритярэн кодэлэн, каса нахально тердэ билажавардимос, моӷут най кати и старейшыноря. Када трэбуй тэ терэн всаворэ (1 Фессалоникийцам 4:18). И христианки, савэндэ састи вера, моӷут драго тэ подритярэн лэ ԥэян, савэнди фартэ трэбуй помощь. О Иегова ԥэндя, кай во, сар дэй, сави подритярэл, пэстирэ шавэс (Исаия 66:13). Андэ Библия пистромэ пала жувля, савэ подритярэнас кодэлэн, ко сас андэ бида (Иов 42:11). Сар жэ лошавэл о Иегова, кала диқэл, кай и христианки подритярэн лэ ԥэян, савэндэ по ди ԥаримос! Андэ дэсавэ случаёря и старейшыноря моӷут тэ мангэн ла христианка, савятэ састи вера, кай вой тэ поможый ла ԥэяти, савяти фартэ трэбуй помощь. Но амэнди трэбуй тэ авас осторожни, кай тэ на залас тэ роспушас лэ манушэс пала кода, пала со во на камэл тэ дэл дума (1 Фессалоникийцам 4:11). w19.05 16, 17, абз. 10—12

Кай и старейшыноря тэ розлэнпэ, чаче о мануш стердя баро бэзэх чи най, трэбуй само набут дуй свидетеля. Васо? Важ кода кай кадя авэла справедливо па Библия. Кала пэ манушэстэ ԥэнэн, кай во стердя баро бэзэх, ай во на прижандёл, и старейшыноря моӷут тэ стидэн правово камитето тоди, кала подтвердина дуй мануша (Второзаконие 19:15; 1 Тимофею 5:19). Кала о дошало отԥэндёлпэ и на прижанэл пэстири дош, тоди и старейшыноря виашунэн лэ свидетелёнэн. Кала подтвердин само набут дуй мануша, кодэва, ко дошалярэл и инке варико, ко можэт тэ подтвердий, кай кодэва, кас дошалярэн, тердя билажавардимос, тоди и старейшыноря стидэн правово камитето. Ай со если кати ек свидетелё? Када на сыкавэл, кай кодэлэ манушэс дошалярэн евья. Дажэ кала кай дуй свидетеля най соса тэ подтвердин, кай сас нахально билажавардимос, и старейшыноря всаек полэн, кай сас стердо баро бэзэх. И старейшыноря вся и время подритярэн кодэлэн, касти када трэбуй и старыинпэ тэ фэрин и собрания (Деяния 20:28). w19.05 11, абз. 15, 16

Трэбуй тэ сыкавэн лэ бэятонэнди, сар тэ сытён па Библия. Трэбуй тэ сыкавэс лэнди, сар ӷотовица каринг и собрании и сар тэ виарақэн инфармацыя пэ вопросоря, савэ лэндэ моӷут тэ авэн андэ школа (Евреям 5:14). Кала и бэяцэ проандярэн дэсави время, кай май драго тэ уӷанэн и библейски темы, лэнди авэла май вушэро тэ полэн кода, со ашунэн пэ собрании и пэ канӷрэсоря. Ай скати время трэбуй тэ сытён лэ ереса па Библия? Када зависит кодэлэстар, скати бэрш лэ бэятонэнди и савэ вонэ. Касти инке трэбуй тэ сыкавас, сар тэ сытён па Библия? Кодэлэнди, кас амэ сытярас па Библия. Канешно, амэ радосавас, кай сначала, кала вонэ ӷотовяца каринг и изучения или каринг и собрании, вонэ просто подчоркивают и атветоря. Но всаек амэнди трэбуй тэ сытярас лэн, кай вонэ екжэнэ тэ виарақэн май бут инфармацыя, кай май драго тэ полэн и тэ сытён па Библия. Тоди, кала лэндэ авэла ԥаримос, вонэ екжэнэ старыинапэ андэ амари литература тэ виарақэн и инфармацыя, сави лэнди трэбуй. w19.05 26, абз. 2; 28, абз. 10, 11

О Сатана старыийпэ, кай амэ тэ гиндосарас сар во. Во замарэл амэнди гиндоря, кай амэндэ май набут тэ ашэлпэ о лашимос, савэстэ амэ сытелям анда Библия. Андэ люма, савяса хулаий о Сатана, амэндар часто пушэн кода, со варикала о Сатана пушлясас ла Еватар андо Эдэмско садо: «Ай чаче, о Дэл ԥэндя?..» (Бытие 3:1). И када можэт амэн тэ змарэл лэ чачимастар. Часто ԥэнэн: «Ай чаче, о Дэл на камэл, кай тумэ тэ терэн о Кричуно и день рождения? Ай чаче, тумаро Дэл на камэл, кай тумэ тэ пэрэшон о рат? Ай чаче, о Дэл, саво любий лэ манушэн, на камэл, кай тумэ тэ дэн дума лэ родоса чи лэ друӷонэнца, савэн исключисардэ анда собрания? Ай чаче, о Дэл против кода, кай тэ авэн бут хулая?» Амэндэ трэбуй тэ авэл састи вера. Васо? Исин важни вопросоря, савэ поможын амэнди тэ полас, андэр со амэ патяс. Если амэ на виарақаса атветоря пэ кадэла вопросоря, вонэ анэна амэнди авэр гиндоря, через савэ амэ ласа тэ на допатяс лэ Иеговасти. w19.06 12, 13, абз. 15—17

О Иегова фартэ амэн любий (Иоанна 3:16). Амэ камас тэ терас кадя, сар амаро любящё Дад. Важ када амэ старысавас тэ полас, со лэ манушэндэ по ди, и тэ сыкавас ԥралицко любовь, и тэ жалуисарас аврэн, ай май фартэ кодэлэн, «каса амэ патяс андо ек Дэл» (Галатам 6:10). Кала андэ жызня кай амарэ ԥрала и ԥэя терэлпэ бида, амэ камас лэнди тэ поможысарас. Сар тэ подритярас кодэлэс, кастэ муля о хулай чи и хулаи? Пэрво, со трэбуй тэ стерас, лэса трэбуй тэ подас дума, дажэ кала на ӷанас, со тэ терас и со тэ ԥэнас. И Пола, савятэ йто муля о хулай, ԥэнэн: «Мэ полав, кай и мануша часто на ӷанэн, сар пэс тэ андярэн кодэлэнца, кастэ муля о хулай чи и хулаи. Вонэ даран, кай ԥэнэна варисо най кадя. Но фэдэр тэ дэн дума варисо най кадя, чем совсем нисо тэ на дэн дума». Кала лэ манушэсти ԥарэс, во на аштярэл амэндар, кай амэ ԥэнаса варисави годявэрни дума. И Пола росԥэнэн: «Манди хутилэлас кода, кай и друӷоря просто ԥэнэнас: „Манди тут фартэ жалко“». w19.06 20, абз. 1; 23, 24, абз. 14

Если амэн на мэкэн тэ росԥэнас важ о Дэл, и старейшыноря позаботинапэ, кай и мануша, савэ жан против амэндэ тэ на полэн, кай прожал и собрания. Можэт вонэ мангэна тумэн, кай тэ стидэнпэ май набут мануша и лэна тэ парувэн часто и время и о ҭан, кай авэла и собрания. Ай сар амэ ласа тэ росԥэнас важ о Дэл? Вся зависит кодэлэстар, кай амэ жувас. Варикай, кала росԥэнас важ о Дэл, амэ фартэ на фэрисавас, ай аврэтэ трэбуй тэ фэрисавас. Но сар бы тэ на авэл, амэ всаек виарақаса, сар тэ росԥэнас лэ манушэнди важ о Дэл, важ кода кай амэ любисарас лэ Иеговас и камас тэ росԥэнас аврэнди важ лэско Царство (Луки 8:1). Акэ, со пистросардя ек историко, савя ақарэн Эмили Бэран пала лэ Иеговастирэ свидетеля, савэ жувэнас андо Советско Союзо: «Кала и власти стодэ запрето тэ на росԥэнэн важ о Дэл, лэ Иеговастирэ свидетеля линэ тэ росԥэнэн лэ сосидонэнди, кодэлэнди, каса терэн пэ бути и лэ друӷонэнди. Ай кала важ када лэ Иеговастирэ свидетелёнэн стодэ андо баруно, вонэ линэ тэ росԥэнэн важ о Дэл лэ барунаренди». Хоть и сас о запрето, и ԥрала всаек на ашэнас мулком. Давайте сытюваса па лэнго райкано примеро. w19.07 11, абз. 12, 13

Сар тэ поможысарас лэ манушэнди, савэ на патян андо Дэл, тэ сытён тэ любин лэ Дэвлэс и тэ ашэн лэ Христостирэ ученикоря? Трэбуй тэ полас, о мануш ашунэл амэн чи най, нэ зависит кодэлэстар, катар во сыно. Например, кодэва, ко вибареля андэ Европа, можэт тэ шол сама пэ амарэ алава совсем най кадя, сар кодэва, саво вибареля андэ Азия. Васо? Важ кода кай андэ Европа бут ко хоть варисо ӷанэн важ и Библия и кай исин Создателё. Ай андэ Азия бут мануша почти нисо на ӷанэн важ о Дэл и на патян, кай исин Создателё. Но на умэкэн и вас. Кажно бэрш кодэла, ко май англал на патянас андо Дэл, ашэн лэ Иеговастирэ свидетеля. Дэсавэ андар лэндэ ужэ варисостэ приритярдёнас, но лэнди фартэ на чалёлас, сар найдраго пэс андярэнас и мануша андэ веры. Ай авэр андярэнас вэрыто жызня и бутэндэ андар лэндэ сас найлашэ привычки. Сар дицол, кати лэ Иеговастирэ зорэса можно тэ виарақэс кодэлэн, «кас цырдэлас каринг о чачимос, саво дэл вечно жызня» (Деяния 13:48; 1 Тимофею 2:3, 4). w19.07 21, абз. 3, 4

Всаек по нэбо чи андо раё пэ ԥув, амэ надеисавас тэ жувас вечно, амэнди трэбуй и май дур тэ домардювас кода, каринг со амэ жас. Никала на жалуисарам пала кода, со сас. Мэк нисо на одмарэл амэн тэ парашас тэ служысарас лэ Иеговасти (Филиппийцам 3:16). Можэт тумэ фартэ долӷо аштярэн кода, пала со о Дэл дя алав. Можэт тумэ ужэ ԥурэ, и о зор най кодэва. Ай можэт тумэ тэрпин ԥаримос бут бэрша и тумэн ӷонин. Со бы тумэндэ тэ на авэл, «ни пала со нэ пэрэжывайте». Андэ молитва ясвэнца «важ вся росԥэнэн лэ Дэвлэсти», и во дэла тумэнди кацаво спокойство, саво тумэ дажэ на аштярэн (Филиппийцам 4:6, 7). Кодэва, ко прастэл, стол вся пэско зор, кай тэ допрастэл о дром до конца. Амэнди кадяжэ трэбуй тэ стас вся о зор, кай тэ допрастас каринг и вечно жызня. Пэ скати хутилэла амаро зор и возможности, ласа анда вся зор тэ служысарас лэ Иеговасти и тэ на бистрас пала лашимос, саво аштярэл амэн англэ. w19.08 7, абз. 16, 17

Дэкала на ӷанэс, со тэ ԥэнэс, кай тэ улэс манушэс, савэстэ фартэ бари бида. Но май бут чем варисавэ алава, када и ясва. Кала муля о Лазарё, друӷо лэ Иисусоско, и Мария, и Марфа и лэндирэ друӷоря сас умардэ бидатар. Через штар дес лэндэ авеля о Иисусо. Кала во додиқля, кай вонэ ровэн, лэстэ кадяжэ «линэ тэ питян и ясва», хоть во и ӷанэнас, кай рия лэ Лазарёс каринг и жызня (Иоанна 11:17, 33—35). Кода, со сас лэ Иисусоса сыкадя, со сас по ди кай о Иегова. Лэ Иисусостирэ ясва сыкавэнас, кай во фартэ любий кадэва ери. Кадэлэстар, канешно, по ди ашэля май вушэро кай и Мария и кай и Марфа. Кадяжэ, кала амарэ ԥрала и ԥэя диқэн, кай амэ лэн любисарас и заботисавас пала лэндэ, вонэ полэн, кай най екжэнэ, кай паша лэндэ друӷоря, савэ лэн любин. Дэкала кодэлэсти, кастэ муля варико анда чаче, трэбуй тэ дэс, кай во тэ виԥэнэн, со лэстэ по ди. На холяв, если лэстирэ алава резки (Иов 6:2, 3). Можэт лэсти дувар май ԥарэс кодэлэстар, кай пэр лэстэ тасавэл о родо, саво на патял лэса андо ек Дэл. Мангэнпэ вмести лэса. Мангэн кодэлэс, «ко ашунэл и молитвы», кай тэ дэл лэсти зор и во драго тэ полэл, со тэ терэл (Псалом 65:2). w19.04 18, 19, абз. 18, 19

Кай бы амэ тэ на служысарас, андо Вефилё чи андэ авэр ҭан, амэ можэм фартэ тэ присытювас каринг и мануша и каринг о ҭан, кай служысарас. И важ када, кала уладас, можэт тэ авэл фартэ ԥарэс. Амэнди ԥарэс тэ ашавас кодэлэн, ко ашэля амэнди куч. И амэ можэм тэ пэрэжываем пала лэндэ. Ай инке май фартэ, кала уладас, важ кода кай ӷонин (Матфея 10:23; 2 Коринфянам 11:28, 29). Можэт тэ авэл фартэ ԥарэс кадяжэ кодэлэстар, кай нэви назначения или кала рисавас цэрэ. Васо? Важ кода кай трэбуй упалэ тэ присытювас каринг пэсти культура. Дэсавэ ԥралэнди и ԥэянди посли кода, сар пэрэладэн, ашэл ԥарэс лэ ловэнца. Важ када вонэ на патян андэр пэстэ, умэкэн и вас и гиндон, кай вонэ нисо на ашэн. Со тоди можэт тэ поможый? Фэрин и дружба лэ Иеговаса (Иакова 4:8). Сар? Росԥэнэн, со тумэндэ по ди кодэлэсти, «Ко ашунэл и молитвы» (Псалом 65:2). О Иегова «можэт тэ стерэл пэ бутэстэ май бут, пала со амэ мангас или можэм кати тэ погиндосарас» (Эфесянам 3:20). Во терэл най кати кода, пала со амэ мангас андэ молитва. Во можэт амэн кадя тэ удивий, кала ришыя амарэ проблемы, сар амэ и на аштярасас. w19.08 20, 21, абз. 5, 6

Тумэ, файма, ашундэ, кай о алав «Армагеддоно» ԥэнэн пэ ядерно война чи кала терэлпэ варисави бида андэ природа. Но андэ Библия пистромэ, кай о Армагеддоно анэна каринг о лашимос (Откровение 1:3). Кадэя война на умарэла всаворэн манушэн, ай фэрия лэн ла смэртятар, важ кода кай улэла манушыканэ правлении. О Армагеддоно улэла па ԥув лэ найлашэ манушэн, ай ашэнапэ кати кодэла, ко кандэл лэ Иеговас. Кадяжэ о Армагеддоно фэрия амари ԥув (Откровение 11:18). О алав «Армагеддоно» кати еқварэс пистромэ андэ Библия и жал лэ еврейсконэ алавэстар, саво сыкавэл «плай Мегиддо» (Откровение 16:16, андэ сноска). О Мегиддо сас форо андо Израилё (Иисус Навин 17:11). Но о Армагеддоно, када най варисаво ҭан пэ ԥув. Можно тэ ԥэнас, када время, кала и «царёря всаворя ԥувьятирэ» стидэнапэ, кай тэ жан против о Иегова (Откровение 16:14). w19.09 8, 9, абз. 1—3

Кадэла манушняти сас фартэ ԥарэс и вой ужэ камля тэ умэкэл и вас. Кай тэ виличийпэ вой сас кай бут врачоря. Прожыля 12 бэрш, ай вой всаек сас насвали. Па Законо кадэя манушни сас найвужи (Левит 15:25). И акэ вой ашунэл, кай о Иисусо исцэлий лэ насвалэн, и важ када вой жал каринг лэстэ. Кала кадэя манушни виарақля лэ Иисусос, вой ляпэ каринг упруни йда кай и бахрома и сразу ашэля здорово! Но о Иисусо най кати исцэлисардя ла. Во лати поможысардя, кай вой упалэ тэ стол пэр пэстэ патив. Андэ дума ласа о Иисусо анда оди и пативалэс ԥэндя пэр латэ «мэрни щей». Лэстирэ алава динэ лати зор (Луки 8:44—48). Шон сама, кай кадэя манушни екжэни пашэля каринг о Иисусо. Важ када лати сас трэбуй тэ стол зор. Кадяжэ амэнди адес трэбуй тэ стас зор, кай тэ авас каринг о Иисусо. Андэ амари время о Иисусо на исцэлий о насвалимос через и чуда кодэлэн, ко авэл каринг лэстэ. Но во всаек ақарэл: «Авэн каринг мандэ... и мэ стерава тумэнди май вушэро по ди» (Матфея 11:28). w19.09 20, 21, абз. 2, 3

Пала кацаво жэ пистросардясас и о пророко Захария: «Андэ кодэла деса дэш мануш анда всаворэ нацыи, савэ дэн дума пэ разни шыба, астардёна пала лэ иудеёнэнди йда, астардёна и ԥэнэна: „Амэ жаса тумэнца, важ кода кай амэ ашундям, кай тумэнца о Дэл“» (Захария 8:23). Лэ Иеговастирэ свидетеля полэн, кай тэ стидэн лэ манушэн, савэ дэн дума пэ разни шыба, трэбуй тэ росԥэнэн и лащи весть пэ кадэла шыба. Кода, кай амэ пэрэандярас и литература пэ фартэ бут шыба, кадэя дила нико и никала на терэлас и на терэл. Амарэ яқэнца амэ диқас, сар о Иегова терэл чуда и стидэл кодэлэн, пэр кастэ ԥэнэн и фартэ бут мануша анда всаворэ народоря. Исин и Библия и литература, сави стерди пар латэ, пэ фартэ бут шыба. Через када, кадэла мануша тэлён лэ Иеговасти сар ек, хоть вонэ и анда разни народоря. Вонэ ашундён кодэлэса, кай вся и время росԥэнэн важ о Дэл и любин ек аврэс. Кадэлэстар амэ фартэ лошавас! (Матфея 24:14; Иоанна 13:35). w19.09 30, 31, абз. 16, 17

Кала авэла и само бари бида, о миро фартэ пэрэдарала. Вонэ лэна тэ диқэн, сар кода, пэр со вонэ надеинаспэ и гиндонас, кай авэла вечно, лэла тэ росԥэрэлпэ. Вонэ лэна тэ мучинпэ и тэ даран важ пэсти жызня, важ кода кай авэл и само ԥари время важ и мануша (Софония 1:14, 15). Андэ кадэя время авэла ԥарэс дажэ кодэлэнди, ко служый лэ Иеговасти. Важ кода кай амэ никала на терасас кадя, сар терэнас и мануша андэ люма, савяса правий о Сатана, амэнди можэт тэ авэл ԥарэс. Файма, амэндэ на авэла дажэ кода, со трэбуй важ и жызня. «О годявэрно и кандино рабо» сытярэл амэн, со тэ терас, кай тэ на парашас тэ кандас лэ Иеговас андэ само бари бида (Матфея 24:45). Важ када амэндэ бут со исин. Диқам, со сас пэ региональни канӷрэсоря, савэ сас андэ кодэя время, кала трэбуй и савэ прожанас андэ 2016—2018 бэрша. И речи и видео пэ кадэла канӷрэсоря сытярдэ, кай тэ авэн амэндэ май бут лашэ качестворя, савэ авэна трэбуй амэнди англа лэ Иеговаско дес. w19.10 14, абз. 2; 16, абз. 10; 17, абз. 12

Посли кода, сар амэ нақадям о хамос, о жэлудко залэл тэ терэл пэстири дила, сави амэндар нисар нэ зависит. Прожал время, и о хамос ашэл кодэлэса, со амэндэ андо орӷанизмо. Лашо хамос, дэл зор, ай найлашо хамос римой о зор. Лашо хамос халям чи най, амэ сразу на поласа, ай кала прожала и время, амэ поласа када па амаро зор. Точно кадяжэ, кала витидас и развличении, трэбуй тэ полас, соса амэ камас тэ замарас амарэ гиндоря. Посли кода, сар варисавэ гиндоря зажылэ андэ амаро шэро, и годи залэл тэ терэл пэстири дила, и кода со андэ годи влияет пэ амарэ гиндоря и пэ амаро ди. Лашэ развличении моӷут тэ дэн амэнди зор, ай и найлашэ развличении кати терэн вэрыто (Иакова 1:14, 15). О найлашимос лэ развличениендар сразу можэт тэ на дицол, но кала прожала время, тоди дицола. Важ кода андэ Библия пистромэ: «Со посадия о мануш, кода и вибарёла. Кала о мануш жувэл кадя, сар камэл лэсти ӷрешно тила, во тернёла» (Галатам 6:7, 8). Акэ васо важно тэ отшос люби развличении, андэ савэ исин кода, со вэрыцый о Иегова! (Псалом 97:10). w19.10 29, 30, абз. 12—14

О Иегова сыкадя, кай фартэ амэн любий, кала отдя пэстирэ Шавэс, кай тэ витинэл амэн (Иоанна 3:16). Сости амэ можэм тэ сытювас кай о Иегова? Амэнди фартэ куч кажно амаро ԥрал или ԥэй, и амэ фартэ лошавас, кай кодэла, савэ варикала ашадэсас лэ Иеговас, ринпэ каринг лэстэ (Псалом 119:176; Луки 15:7, 10). Амэ сыкавас, кай любисарас лэ ԥралэн и лэ ԥэян тоди, кала отдас пэстири время и о зор, кай тэ поможысарас лэнди (1 Иоанна 3:17). О Иисусо приԥэндя пэстирэ учениконэнди, кай машкар лэндэ тэ авэл чачуни любовь (Иоанна 13:34, 35). Андэ кадэва нэво законо сас кода, со на сас андэ лэ Моисеёско законо. Када, кай тэ авэл каринг и ԥрала, савэнца ту патяс андо ек Дэл, кацави жэ любовь, сави сыкадя амэнди о Иисусо. Амэнди трэбуй тэ любисарас лэ ԥралэн и лэ ԥэян май фартэ, чем корко пэс, и тэ авас ӷотови тэ отдас ради лэндэ пэстири жызня. Именно кадя тердя о Иисусо. w19.05 4, 5, абз. 11—13

Кай о свынто духо амэнди тэ поможый, амэнди трэбуй тэ на парашас тэ мангас пала када (Луки 11:13). Лэ Иисусостири притча, сави запистромэ андэ Луки 11:5—9, поможый тэ полас, васо о Иегова дэла амэнди о свынто духо. Мануш, пала саво росԥэнэнпэ андэ притча, камля тэ шол сама пэстирэ ӷостёс, саво авеля поздно. Во полэлас, кай лэ ӷостёс трэбуй тэ праварэл, ай о хамос лэстэ на сас, важ када жыля каринг о сосидо. Па лэ Иисусостирэ алава, о сосидо дя кодэлэ манушэсти марно, важ кода кай во на парашэлас тэ мангэл. Сости амэн камля тэ сытярэл о Иисусо? Если о найсовершэно мануш поможысардя лэ сосидости, саво на парашэлас тэ мангэл, тоди инке май фартэ амаро добро небесно Дад поможыя кодэлэнди, ко на парашэл тэ мангэл лэстар о свынто духо! Сар дицол андэ кадэя притча, амэ можэм тэ мангаспэ и тэ патяс, кай о Иегова ашунэл амарэ молитвы, кала амэ анда оди мангас о свынто духо (Псалом 10:17; 66:19). Амэ патяс, кай амэндэ вижала тэ виритярас о ԥаримос лэ Сатанастар. w19.11 11, 13, абз. 17—19

О Иисусо полэлас, кай дэкала лэсти и лэ апостолонэнди трэбуй сас тэ отцыён. Но сар тоди, кадя и акана, дэко андярэл пэс, сар о барвало мануш анда лэ Иисусостири притча, саво ԥэндя пэсти: «Ха, пи, отцыю и радосав» (Луки 12:19; 2 Тимофею 3:4). Кадэва мануш гиндояс кати пала кода, кай тэ отцыёл и тэ радуийпэ ла жызняти. Ай о Иисусо и апостолоря на камэнас, кай ӷлавно важ лэндэ андэ жызня тэ авэл тэ отцыён и тэ терэн кода, со камэлпэ. Амэ старысавас тэ сытювас кай о Иисусо, сар правильно тэ проандярас и время, андэ сави амэ на терас и бути, най кати кай тэ отцыювас. Ай инке, важ кода кай тэ росԥэнас важ о Дэл и тэ ԥирас пэ собрании.Тэ сытярас лэ манушэн па Библия и тэ ԥирас пэ собрании, када важ амэндэ фартэ важно (Евреям 10:24, 25). Дажэ, кала амэ андо отпуско и кай бы амэ тэ на авас, амэ всаек ԥирас пэ собрании и росԥэнас важ о Дэл (2 Тимофею 4:2). w19.12 7, абз. 16, 17

О Иегова дя амэнди тэ витидас, сар тэ жувас. Во сытярэл амэн правильно тэ витидас, со тэ терас и тэ приритярдювас кодэлэсти, со витидям, кай тэ радосарас лэс (Псалом 119:173). Важ када, кала амэ прилас и лашэ советоря анда лэ Дэвлэско Алав, анда Библия, кадэлэса амэ сытювас правильно тэ витидас, со тэ терас (Евреям 5:14). Но дажэ, кала амэ правильно витидас, амэндэ можэт тэ авэл кадя, кай нащи дотерас и дила, сави залям. Акэ дэсавэ примероря. Тэрно ԥрал закамля тэ проадиной вся и Библия. Лэстэ вижал тэ адиной ла дэсавэ курте, но потом парашэл. Ԥэй витидя важ пэстэ тэ служый пианероса, но вся и время отстол, кала тэ залэл тэ служый. Всаворэ ԥрала анда совето старейшын ришыли, кай май часто тэ жан кай и ԥрала и ԥэя, кай тэ подритярэн лэн. Но прожылэ бут шона, ай вонэ нисо на стердэ. Кадэла примероря разни, но андэр лэндэ и ԥрала и ԥэя ришыли тэ терэн варисави дила, но на дотердэ до конца. w19.11 26, абз. 1, 2

О Иисусо сыстосардя амари время кодэла времяса, кала жувэлас о Ноё, и амэ кадяжэ патяс, кай жувас андэ «фартэ ԥари время» (Матфея 24:37; 2 Тимофею 3:1). Кала дэсаво хулай и хулаи погиндосардэ пала када, вонэ витидэ, кай лэндэ пока тэ на авэн бэяцэ, кай май бут тэ терэн дила андэ служэния. Авелоп годявэрнэс тэ погиндон пала кода, камэн бэятонэн чи най, ай если камэн, тоди скати (Луки 14:28, 29). Дада и дэя, савэ ужэ вибарярдэ пэстирэ бэятонэн, росԥэнэна, кай тэ вибарярэс лэ бэятос трэбуй най кати ловэ, но и фартэ бут время и зор. Через када лэ хуласти и ла хулаяти важно тэ подэн дума пала кацавэ вопросоря: «Прижалапэ чи най амэнди лэ дуенди тэ терас пэ бути, кай тэ авэл важ о ери вся, со трэбуй? Гиндосарас амэ еқэндар пала кода, со фартэ трэбуй? Если амэ лэдуя тераса пэ бути, ко диқэла пала бэяцэ? Ко лэн лэла тэ сытярэл?» О хулай и хулаи, савэ спокойно дэн дума пала кадэла вопросоря, терэн кадя, сар пистромэ андо стихо по дес. w19.12 23, 24, абз. 6, 7

О апостоло Павло най еқварэс чуть на муля (2 Коринфянам 11:23—28). Кадяжэ бут ԥаримос лэсти анэнас и «колючка». Файма, лэстэ сас варисо най кадя лэ зорэса (2 Коринфянам 12:7). Ай инке, лэсти сас фартэ ԥарэс по ди, кала о Димасо, саво андэ ек время терэлас лэса ек дила, ашадя лэс, важ кода кай лэсти «фартэ чалеля кода, со андэ кадэя люма» (2 Тимофею 4:10). О Павло сас смило помазано христианино, саво анда вся зор поможыяс аврэнди. Но дажэ во дэкала умэкэлас и вас (Римлянам 9:1, 2). Подритярдя варико лэ Павлос, кала лэсти када сас трэбуй? Да, о Иегова лэс подритярдя пэстирэ свынтонэ духоса (2 Коринфянам 4:7; Филиппийцам 4:13). Кадяжэ о Дэл подритярэлас лэс через авэр христианоря. О Павло пистросардя пала дэсавэ мануша, каса во терэлас и дила: «И вонэ линэ фартэ ман тэ подритярэн» (Колоссянам 4:11). Машкар кодэла мануша, пала савэ во ԥэндя, сас о Аристархо, о Тихико и о Марко. Вонэ подритярэнас лэ Павлос и поможынас лэсти тэ пэрэандярэл ԥари время. w20.01 8, 9, абз. 2, 3

О Иисусо ԥэндя, кай на росԥэнэса точно кодэлэсти, ко най помазано, со када тэ арақадёлпэ упалэ через о свынто духо (Иоанна 3:3—8). Сар парудёл о гиндо кай и христианоря, кала вонэ ашэн памазаникоря? Жы каринг кода, сар вонэ ашэлэ памазаникоря, важ лэндэ сас фартэ куч о лашимос, саво авэла вся и вечность пэ ԥув. Вонэ фартэ долӷо аштярэнас кодэя время, кала о Иегова улэла вся о найлашимос и рия о раё пэ ԥув. Вонэ, файма, аштярэнас тэ диқэн, кала ринапэ каринг и жызня лэндирэ чаче. Но кала вонэ ашэлэ памазаникоря, вся паруделя. Васо? На ԥэнэса, кай лэнди на ля тэ чалёл лашимос, саво авэла англэ пэ ԥув. Вонэ линэ кадя тэ гиндон най кодэлэстар, кай пэрэандярдэ варисаво баро ԥаримос. Вонэ на гиндон, кай и вечно жызня пэ ԥув авэла скучно. Вонэ кадя фартэ паруделэ через кода, кай о Иегова пэстирэ свынтонэ духоса парудя лэндирэ гиндоря и кода, со вонэ аштярэнас англэ. w20.01 22, 23, абз. 9—11

Па законо, саво о Дэл дя лэ Моисеёсти, и старейшыноря андо Израилё трэбуй сас тэ розлэнпэ най кати андэ кода, сар и мануша трэбуй тэ служын лэ Иеговасти. Вонэ кадяжэ трэбуй сас тэ розлэнпэ андэ биды, савэ терэлас о народо. Када, кала марэнаспэ, умарэнас варикас, терэнас авэр варисавэ биды или споринаспэ машкар пэстэ. Андэ амари время и старейшыноря, савэ ритярэн «лэ Христоско законо», розлэнпэ кати андэ кода, кала и мануша андэ собрания терэн кадя, сар на чалёл лэ Иеговасти (Галатам 6:2). Вонэ полэн, кай андэ авэр дилы о Дэл дя тэ розлэнпэ и власти андо ӷосударство, савэ моӷут тэ стон штрафоря чи тэ бэшарэн кодэлэн, ко терэл най па законо (Римлянам 13:2—4). Сар и старейшыноря розлэн и дила, кала варико тердя баро бэзэх? Вонэ па Библия драго розлэн кода, со стердя о мануш и тоди витидэн, со тэ терэн. Вонэ сэрэн, кай лэ Христоско законо ритярдёл пэ любовь. Важ када вонэ гиндон, сар тэ поможын лэ христианонэнди, савэнца авэр обжылэпэ найдраго. Кадяжэ и любящи старейшыноря роздиқэн кацавэ вопросоря. Каийпэ кодэва, ко стердя бэзэх чи най, и можно тэ поможысарас кадэлэ манушэсти, кай лэстири дружба лэ Иеговаса упалэ тэ авэл лащи? w19.05 7, абз. 23, 24

О Иисусо прижанэлас, кай лэско Дад дя лэсти жызня и жувэл блаӷодаря лэсти. О Иисусо андэ вся патялас пэстирэ Дадэсти, и о Иегова дэлас лэсти вся, со трэбуй важ и жызня. Но со май ӷлавно, о Иегова поможыяс лэ Иисусости тэ на парашэл тэ кандэл лэс (Матфея 4:4). О Иегова кадяжэ заботийпэ пала кода, кай и амэ тэ дружысарас лэса. Андэ Библия о Иегова ԥэрнадя амэнди о чачимос пала пэстэ и пала кода, со камэл тэ стерэл. Во росԥэндя, васо о мануш трэбуй тэ жувэл и со амэн аштярэл англэ. Кала ту пэрво разо ашундян о чачимос, кадя во шутя сама пэр тутэ. Файма, ту ашундян о чачимос важ о Дэл лэ дадэстар и ла датар, чи варикастар аврэстар, ко поможысардя тути тэ уӷанэс важ лэстэ. О Иегова идоси диқэл пала тутэ через и старейшыноря, савэ любин тут и через авэр ԥрала и ԥэя, савэ фартэ патян лэсти. Инке о Иегова сытярэл тут пэ собрании, котэ ту сытёс еқэҭанэ лэ ԥралэнца и лэ ԥэянца. Када кати дэсо, сар о Иегова сыкавэл, кай заботийпэ пала амэндэ (Псалом 32:8). w20.02 3, абз. 8; 5, абз. 13

Котэ, кай исин бут зависть, нинай ладо машкар и ԥрала. Амэнди трэбуй ку корнё тэ вишынас и зависть амэндар анда оди и тэ старысавас тэ на терас нисо, кай вой тэ авэл аврэндэ. Но со трэбуй тэ терас, кай тэ поможысарас аврэнди тэ на завидуин? И со тэ терас, кай тэ авэл мирно? Кода, сар амэ диқас пэ вся и со амэ камас тэ терас, фартэ дицол аврэнди. И люма, савяса правий о Сатана, камэл, кай амэ тэ хвалисавас кодэлэса, со амэндэ исин (1 Иоанна 2:16). Через када и мануша лэн тэ завидуин. Тэ поможысарас аврэнди тэ на завидуин можно, если на ласа вся и время тэ дас дума пала кода, со амэндэ исин чи пала кода, со камас тэ тинас. Инке, сар можно тэ поможысарас тэ на завидуин, када тэ на путювас, кай амэндэ исин варисави дила андэ собрания. И кала амэ вся и время дас дума пала када, тоди амэнди лэн тэ завидуин. Авелоп драго тэ дас дума анда вся оди лэ ԥралэнца и лэ ԥэянца и тэ хвалисарас лэн, важ кода со вонэ терэн. Кадэлэса амэ поможысарас лэнди тэ цэнин кода, со лэндэ исин и терас, кай тэ авэл мирно андэ собрания. w20.02 18, 19, абз. 15, 16

Тумэ можэте тэ уӷанэн пала Иегова через кода, со во стердя (Откровение 4:11). Шув сама пэ жывотни, пэ кода, со барёл, и сытюв тэ диқэс и мудрость кодэлэсти, ко вся када годявэрнэс стердя. Май бут уӷан, сар дэ интересно создано о мануш (Псалом 139:14). Погиндосар, саво дэ баро зор кай о Қам, хоть во найбари черӷай, ек анда милиардоря (Исаия 40:26). Кала ту пала када гиндос, ту лэса тэ стос май бари патив по Иегова. Но тэ ӷанэс, кай о Иегова зорало и мудро, када най вся, со трэбуй, кай тэ авэл бари любовь каринг о Иегова и тэ ашэс лэстирэ друӷоса. Трэбуй инке май бут пала лэстэ тэ уӷанэс. Ту трэбуй тэ патяс, кай о Иегова любий тут. Сэр и алава, савэ о Давидо ԥэндя пэстирэ шавэсти лэ Соломоности: «Сар ту лэса тэ родэс лэс [лэ Дэвлэс], во домэкэла, кай ту тэ виарақэс лэс» (1 Летопись 28:9). О Иегова ԥэндя: «Мэ ақардэм тут каринг пэстэ» (Иеремия 31:3, када пэрэандярдэ анда Библия па английско шыб, сави вимэклэ андо 2013 бэрш). Со май фартэ ту цэнис кода, со важ тутэ терэл о Иегова, со май фартэ ту лэса лэс тэ любис. w20.03 4, 5, абз. 6, 7

О апостоло Павло сыкадя лашо примеро, сар тэ стос и служэния пэ пэрво ҭан. О Павло до дуйто жылясас дур па разни фороря тэ росԥэнэн и лащи весть. Андэ кадэя время во жувэлас андо Коринфо, и лэстэ сас совсем набут ловэ, тоди во ля тэ терэл катуны. Кадя во затерэлас, кай лэстэ тэ авэл, со необходимо важ и жызня, кай тэ росԥэнэн и лащи весть лэ коринфянонэнди и никасти андар лэндэ тэ на авэл покута (2 Коринфянам 11:7). И служэния важ лэстэ всаек сас май важно всаворэстар, и кажно суббота во росԥэнэнас и лащи весть. Ай кала и ситуацыя паруделя, о Павло ля инке май бут время тэ росԥэнэн и лащи весть. Во «отдэлас вся пэско зор, кай тэ росԥэнэн и лащи весть и тэ доԥэнэн лэ иудеёнэнди, кай о Иисусо, када Христос» (Деяния 18:3—5; 2 Коринфянам 11:9). Прожыля варисави время, и кала о Павло андо Римо сас дуй бэрш тала домашнё аресто, во всаек росԥэнэнас важ о Дэл кодэлэнди, ко авэлас лэстэ и пистрояс письморя (Деяния 28:16, 30, 31). О Павло на домэкэлас, кай пэ варисо тэ шол сама и кай када тэ мишыий лэсти тэ служый. w19.04 4, абз. 9