Апрелё

О Аристархо, христианино анда македонско форо Фессалоника, сас лэ апостолоско лэ Павлоско лашо друӷо, саво лэс на ашавэлас. Пэрво разо пала Аристархо пистромэ, кала во сас машкар кодэла, ко сас лэ Павлоса. Када сас андо Эфесо, кала о Павло жылясас до трито разо дур па разни фороря тэ росԥэнэн и лащи весть. Котэ лэ Аристархос астардэ бут мануша (Деяния 19:29). И кала лэс одмэклэ, во на грабияс тэ загарадёл варикай, ай ашэляпэ лэ Павлоса. Прожылэ шона, ай о Аристархо кадяжэ сас лэ Павлоса андэ Греция. Кадяжэ во на диқля дажэ пэ кода, кай и вороӷоря най еқварэс камэнас тэ умарэн лэ апостолос (Деяния 20:2—4). Варикай андэ 58 бэрш лэ И. Х. лэ Павлос, саво ужэ бэшэлас андо баруно, одбишалдэ андо Римо. Андэ кадэва баро дром, о Аристархо сас паша лэстэ. Па дром вонэ пэрэжудэ кода, кай о кораблё розмарделясас (Деяния 27:1, 2, 41). Андо Римо о Аристархо варисави время бэшэлас андо баруно лэ Павлоса (Колоссянам 4:10). Кодэлэса, кай о Аристархо на ашавэлас лэ Павлос, во фартэ подритярэлас лэс. И када трэбуй сас лэ Павлости. Сар и о Аристархо, амэ кадяжэ можэм тэ авас лашэ друӷоря, савэ на ашавэн, важ пэстирэ ԥрала и ԥэя, най кати андэ лащи время, но и «андэ бида». w20.01 9, абз. 4, 5

Файма, дэсавэ памазаникоря гиндон, кай вонэ на ашэн кода, кай пэр лэндэ стодэ кацави патив. Но вонэ фартэ патян, кай о Иегова лэн витидя. Вонэ фартэ бахталэ и блаӷодарин лэ Дэвлэс, кала гиндон пала лашимос, саво лэн аштярэл англэ (1 Петра 1:3, 4). Сыкавэл када, кай и памазаникоря камэн тэ мэрэн? Пэ кадэва вопросо дя атвето о апостоло Павло. Во сыстосардя лэ памазаниконэндири тила ла катунаса и пистросардя: «Амэ сам андэ кадэя катуна, и андэр латэ амэ ровас лэ ԥаримастар, най важ кода, кай камас тэ ашавас ла, сар бы тэ злас и йда пар пэстэ, ай важ кода, кай камас, кай тэ авэл амэндэ небесно катуна, кай и тила, сави мэрэл, тэ парудёл пэ тила, сави на мэрэл» (2 Коринфянам 5:4). Кадэлэ христианонэнди чалёл, кай вонэ жувэн пэ ԥув, и на аштярэн, кай май йто тэ мэрэн. Лэнди чалёл тэ жувэн и важ лэндэ куч кажно дес, саво вонэ проандярэн лэ ереса и лэ друӷонэнца андэ служэния лэ Иеговасти. Но вонэ вся и время сэрэн пала лашимос, саво лэн аштярэл англэ (1 Коринфянам 15:53; 2 Петра 1:4; 1 Иоанна 3:2, 3). w20.01 23, абз. 12, 13

Амаро любящё Дад сытярэл амэн и кала када трэбуй подԥэнэн амэнди. Тэ сытярэл о Иегова можэт по разному. Например, кала амэ адиносарас и Библия чи ашунас кода, со росԥэнэн пэ собрания, амэ полас, кай амэнди трэбуй тэ парувас пэстирэ гиндоря и кода, сар амэ пэс андярас. Кадяжэ амэнди моӷут тэ поможын и старейшыноря. Сар бы о Иегова тэ на сытярэл амэн, во вся и время терэл када, кай любий амэн (Иеремия 30:11). О Иегова поможый тэ пэрэандярас о ԥаримос. Сар о любящё дад подритярэл пэстирэ бэятонэн, кала лэнди ԥарэс, кадяжэ и амаро небесно Дад подритярэл амэн андо ԥаримос. О Иегова дэл амэнди свынто духо, саво фэрий амэн всаворэстар, со можэт тэ римой амари дружба лэса (Луки 11:13). Амаро любящё Дад подритярэл амэн, кала амэ пэрэжываем. Во дэл амэнди зор, кай тэ аштярас о лашимос, саво авэла англэ. Када дэл амэнди зор тэ пэрэандярас о ԥаримос. Погиндосар, саво бы ԥаримос тутэ тэ на авэл, о Иегова улэла вся, со тути прижыляпэ тэ пэрэандярэс. О ԥаримос, саво амэндэ исин, на авэла вся и время, ай о лашимос лэ Иеговастар авэла вечно! (2 Коринфянам 4:16—18). w20.02 5, абз. 14, 15

Амэ можэм тэ победисарас и зависть! Вспомним лэ Иосифостирэ ԥрала. Прожыля бут время посли кода, сар вонэ битиндэ лэс андо рабство. Кала о Иосифо диқля лэн андо Египто, во на виԥэндя лэнди, ко во, ай май англал камля тэ диқэл, паруделэ вонэ чи най. Во ақардя лэн тэ хан. И кала вонэ ханас, во май фартэ шолас сама лэ цыкнэдэрэс ԥралэс, лэ Вениаминос (Бытие 43:33, 34). Но и ԥрала на линэ тэ холявэн, кай лэ Вениаминос во шутя май фартэ сама. Ай линэ фартэ тэ пэрэжывают пала пэско цыкнэдэр ԥрал, ай кадяжэ пала пэско дад (Бытие 44:30—34). Важ кода кай лэ Иосифостирэ ԥрала улинэ пэстар и зависть, андэ лэнго ери ашэля драго (Бытие 45:4, 15). Кадя и амэ, кала диқас, кай и зависть кати лэл тэ мэкэл и корнёря, ла трэбуй тэ вишынас. Кадэлэса амэ поможысараса тэ авэл мирно андо ери и андэ собрания. О Иегова камэл, кай амэндэ тэ на авэл зависть и амэ тэ терас вся, кай тэ авэл вся драго. Кала амэ терас вся, кай тэ на гиндосарас пала пэстэ бут, тэ цэнисарас кода, со исин, и тэ авас блаӷодарни, тоди амэндэ андо ди на авэла ҭан важ и зависть. w20.02 19, абз. 17, 18

Сар тэ сыкавэс, кай цэнис кода, кай тут любий о Иегова? Трэбуй тэ дэс дума лэса андэ молитва. Ту лэса тэ любис лэ Иеговас май фартэ, кала лэса тэ росԥэнэс лэсти, васо пэрэжываеш и тэ блаӷодарис лэс пала вся, со во важ тутэ терэл. Тири дружба лэ Иеговаса авэла май лащи, кала ту лэса тэ диқэс, кай во ашунэл тирэ молитвы. Ту патяса, кай во тут полэл. Но кай тэ авэс май пашэ каринг о Иегова, кадяжэ трэбуй тэ полэс, сар во гиндой. И трэбуй тэ ӷанэс, со во тутар аштярэл. Вся када ту полэса кати тоди, кала сытёса па Библия. Важ када сытюв тэ цэнис лэ Дэвлэско Алав. Кати и Библия росԥэнэн о чачимос важ о Иегова и пала кода, со во камэл тэ стерэл важ и мануша. Сар тэ сыкавэс, кай важ тутэ куч и Библия? Адиносар ла кажно дес и ӷотовься каринг и изучения, сави туса проандярэл ек анда свидетеля. Тер кадя, сар уӷанглян (Псалом 119:97, 99; Иоанна 17:17). Тутэ исин ӷрафико, па саво адинос и Библия? Адинос ту пар лэстэ? Вижал тутэ кажно дес тэ адинос и Библия? w20.03 5, абз. 8, 9

Если тумэнди ԥарэс долӷо тэ ԥирэн, можно тэ бэшэн котэ, кай прожан бут мануша и тэ дэн дума лэнца важ о Дэл. Кадяжэ можно тэ служысарас котэ, кай амэ находисавас, тэ пистросарас письморя или тэ росԥэнас важ о Дэл па телефоно. Бут ԥрала и ԥэя, савэ нэ моӷут бут тэ росԥэнэн важ о Дэл па цэра, вонэ фартэ лошалэ, кай всаек исин возможность тэ служын лэ Дэвлэсти. Дажэ, кала исин ԥаримос лэ зорэса, тумэ всаек можэте тэ служын лэ Дэвлэсти май бут. О Павло ԥэндя: «Пэ вся мандэ исин зор, важ кода кай исин кодэва, ко лэс манди дэл» (Филиппийцам 4:13). Кадэва зор сас трэбуй лэ Павлости андэ кодэя время, кала во жылясас дур тэ росԥэнэн па разни фороря и лащи весть, тоди во занасвайлясас. Во пистросардя лэ галатонэнди: «Кай через о насвалимос, саво сас мандэ, мэ пэрво разо росԥэндэм тумэнди и лащи весть» (Галатам 4:13). Со тумэ можэте тэ сытён лэ Павлостар? Тумэ можэте тэ росԥэнэн важ о Дэл кодэлэнди, ко терэл андэ больница, например, када и врачоря и медсёстры, обычно вонэ цэрэ ридко бывают. w19.04 4, 5, абз. 10, 11

Андо 2018 бэрш, андэ кацавэ страны сас май бут чем 223 000 манушэн, савэ росԥэнэнас важ о Дэл. Кода, кай и власти найдраго обжанпэ лэ Иеговастирэ свидетелёнэнца, амэ кадэлэстар на удивисавас. И чачунэ христианоря ӷанэн, кай лэн лэна тэ ӷонин. Кай бы амэ тэ на жувас, и власти моӷут тэ стон запрето, кала на аштярас, кай амэ тэ на тэлювас амарэ любящёнэ Дэвлэсти, лэ Иеговасти. Кала амэндэ запрето пэ амари дила, амэ можэм тэ гиндосарас, кай о Иегова пар мэндэ холявэл. Но када най кадя. Подам дума пала апостоло Павло. О Иегова лэс блаӷословияс. Во дя лэ Павлости кацави честь тэ пистрой 14 письморя, савэ ашэлэпэ андэ Христиански Гречески Писании, и кадяжэ тэ ашэл апостоло важ авэр народоря. И всаек лэ Павлос фартэ ӷонинас (2 Коринфянам 11:23—27). Кода, со сас лэ Павлоса, сыкавэл, кай о Иегова домэкэл, кай лэстирэ служытелёнэн тэ ӷонин. w19.07 8, 9, абз. 1, 3

О Иегова заботийпэ пала амэндэ по разному. Например, во поможый амэнди тэ одмардювас амарэ вороӷонэндар. Со май баро андар лэндэ, када о Сатана и бэнга. О Иегова фэрий амэн кодэлэса, кай ԥэнэн, пэ скати вонэ вэрыти и дэл амэнди вся, со трэбуй, кай тэ мараспэ лэнца (Эфесянам 6:10—13). Кала амэ прилас лэ Иеговастар помощь и андэ вся патяс лэсти, тоди амэндэ вижала тэ одмардювас лэ Бэнгэстар. Тоди амэ кадяжэ патяса, сар патялас и о апостоло Павло, саво ԥэндя: «Кала о Дэл амэнца, тоди, ко авэла против амэндэ?» (Римлянам 8:31). Лэ чачунэ христианонэнди на чалёл тэ гиндон пала Сатана и пала бэнга. Май фартэ амэ камас вся и время тэ сытювас кай о Иегова и тэ служысарас лэсти (Псалом 25:5). И всаек амэнди трэбуй тэ ӷанас, сар о Сатана дилярэл лэ манушэн, кай во тэ на обхохавэл и амэн (2 Коринфянам 2:11). w19.04 20, абз. 1, 2

Ӷанэс ту драго тэ ашунэс? Кала варико росԥэнэн, со лэстэ по ди, трэбуй май бут, чем просто тэ бэшэс паша лэстэ, тэ диқэс пэр лэстэ, тэ ашэс мулком и тэ ашунэс. Амэ можэм тэ сыкавас, кай полас, со лэ манушэстэ по ди. Дэкала важ када трэбуй набут лашэ алава. Можно тэ ԥэнэс: «Кадя ԥарэс када тэ ашунав!» Ай дэкала авелоп драго тэ задэс найбут вопросоря, кай тэ уӷанэс, правильно ту лэс полэс чи най. Например, можно тэ пушэс: «Если найԥарэс, мангав тут, росԥэн, со ту камэс тэ ԥэнэс» или «Мэ правильно тут полэм, кай?..» Кацавэ алава моӷут тэ сыкавэн лэ манушэсти, кай ту драго лэс ашунэс и старыиспэ лэс тэ полэс (1 Коринфянам 13:4, 7). На пэрэмар лэ манушэстири дума, кай варисо тэ подԥэнэс или тэ ԥэнэс, кай во нэправильно гиндой. На грабисав и виашун! На трэбуй тэ ԥэнэс, со во тэ терэл, кай тэ улэл кадэва ԥаримос. Фэдэр авэла тэ сыкавэс, кай ту полэс лэс и жалуис (1 Петра 3:8). w19.05 17, 18, абз. 15—17

О хулай трэбуй тэ любий пэстиря хулая, сар «о Христос полюбисардя и собрания» (Эфесянам 5:28, 29). О хулай трэбуй тэ терэл сар о Христос и тэ любий пэстиря хулая кадя, кай пэ пэрво ҭан тэ стол най кода, со лэсти трэбуй, ай кода, андэр со вой нуждаеца. Дэсавэ муршэнди ԥарэс кадя тэ любин. Васо? Можэт андо ери кай лэско дад на обжанаспэ ек аврэса драго и справедливо. Важ када и лэсти ԥарэс тэ гиндой пала пэско ери кадя, сар о Христос. Но если во камэл тэ ритярэл лэ Христоско законо, во трэбуй тэ парудёл. Кала о хулай любий пэстиря хулая, сар о Иисусо любий и собрания, тоди и вой лэла тэ стол пэр лэстэ патив. О дад, саво па чачимастэ любий пэстирэ бэятонэн, никала на лэла тэ обжалпэ лэнца жэстоко чи тэ ԥэнэн найлашэ алава пэр лэндэ (Эфесянам 4:31). Во ла диласа и алавэнца сыкавэла, кай любий лэн. Кадяжэ во лэла тэ хвалий лэн и тэ жалуий, кай вонэ нисостар тэ на даран и лэндэ по ди тэ авэл спокойно. Тоди и бэяцэ лэна тэ любин лэс и тэ стон патив пэр лэстэ. w19.05 5, 6, абз. 21

Савэ гиндоря моӷли тэ авэн кай и Мария посли кадэла лэ Гавриилостирэ алава. Ришыла вой, кай о Иисусо лэла тэ правий вместо Иродо или вместо лэстирэ наследникоря? Вой моӷла тэ погиндой: «Если о Иисусо па чачимастэ авэла царё, мэ авава царица, лэ царёсти дэй и всаворэ мэрно ери жувэла андо дворцо». Но и Мария, никала на мангэлас пэсти лашо ҭан андо Царство. Вой сас фартэ сэжо манушни. Трэбуй тэ сэрас, кай ӷлавно цэль, васо амэ сытювас па Библия и па библейско литература, када кай тэ ашас май пашэ каринг о Иегова. Амэ кадяжэ камас тэ полас, савэ амэ па чачимастэ и андэр со амэнди трэбуй тэ парудювас, кай тэ радосарас лэ Дэвлэс (Иакова 1:22—25; 4:8) Кажно разо, кала лэс тэ сытёс па Библия, тути трэбуй тэ мангэс лэ Иеговастар свынто духо. Трэбуй тэ мангэс лэ Дэвлэс тэ поможый тути тэ полэс май бут лашимос анда литература, сави адинос и тэ диқэс пэр пэстэ кадя, сар пэр тутэ диқэл во. w19.05 30, 31, абз. 18, 19

Дэкала о ԥаримос авэл ек пала ек аврэстэ. Акэ дуй примероря. Ԥрал, савэс ақарэн Джон, савэстэ рассеяно склерозо, лэс мэкля и хулаи, савяса во прожудя 19 бэрш. Посли када дуй лэстирэ щея парашэлэ тэ служын лэ Иеговасти. Ай аврэ ерестэ, савэн ақарэн Боб и Линда, лэндэ сас авэр ԥаримос. Вонэ хасардэ и бути, ай потом хасардэ и о цэр. Ай инке кай и Линда ашэля насвало оди, через када вой моӷла тэ мэрэл. Кадяжэ латэ ляпэ насвалимос, артрито, када кала римонпэ и кокаля. Можно тэ патяс, кай амаро Создателё и любящё Дад, о Иегова, полэл, сар хал амэн зорэстар и бари пэрэжывания. И во камэл тэ поможый амэнди (Филиппийцам 4:6, 7). Андэ Библия пистромэ, саво ԥаримос сас кай лэ Иеговастирэ служытеля и сар во лэн подритярэлас. w19.06 14, 15, абз. 2, 3

Кала ту терэс варисаво лашимос важ кодэла, ко ашэляпэ екжэно, ту сыкавэс, кай любис лэс. Лэсти, сар никала, трэбуй друӷоря. Сар тэ авэс важ лэндэ лашо друӷо? Можно тэ ақарэс пэстэ цэрэ, тэ стос тэ хал, или тэ ақарэс лэс тэ жан варикастэ тэ побэшэн. Кадяжэ тэ жас андэ служэния чи тэ ақарэс, кала тидэспэ лэ ереса тэ сытёс па Библия. Кадэлэса ту радуиса лэ Иеговас, важ кода кай во «паша кодэва, ко бидаса умардо» и фэрий кодэлэн, кастэ муля о хулай чи и хулаи (Псалом 34:18; 68:5). Кала лэла тэ правий лэ Дэвлэско Царство, пэ ԥув «и биды, савэ сас, бистрэна». Амэ фартэ аштярас кодэя время, кала «кода, со сас, на лэна тэ сэрэн», и «на авэла по ди» (Исаия 65:16, 17). Ай пока давайте тэ подритярас ек аврэс. Мэк андэ амарэ алава и дила дицол, кай амэ анда оди любисарас лэ ԥралэн и лэ ԥэян! (1 Петра 3:8). w19.06 25, абз. 18, 19

Бут бэрша палпалэ андэ «Сторожэво башня» сас пистромэ: «Кодэва, ко драго ӷанэн лэ Дэвлэс, андэ вся лэла лэсти тэ патял, дажэ кала авэла ԥаримос». Савэ жэ чачунэ кадэла алава! Со тэ терас, кай тэ виритярас, кала амэн лэна тэ ӷонин? Амэнди трэбуй тэ любисарас лэ Иеговас и андэ вся лэсти тэ патяс (Матфея 22:36—38; Иакова 5:11). Кажно дес адинон и Библия, кай тэ авэн май пашэ каринг о Иегова (Иакова 4:8). Кала адинос и Библия шу сама, сар о Иегова любий и жалуий. Ай инке шу сама пэ кода, со о Дэл ԥэнэнас и терэлас, старысав тэ полэс, сар во любий и заботийпэ пала амэндэ (Исход 34:6). Дэкасти ԥарэс тэ патян, кай о Дэл лэн любий, важ кода кай лэн нико никала на любияс. Если тутэ сас кацаво, стер акэ со. Кажно дес запистросар, саво лашимос о Иегова стердя важ тутэ и сар во жалуий тут анда вся оди (Псалом 78:38, 39; Римлянам 8:32). Кала адинос анда Библия, саво лашимос о Иегова терэл, сыстосар каринг пэстэ, тоди ту диқэса, скати лашимос о Иегова терэл важ тутэ. И со май фартэ ту лэса тэ цэнис и дружба лэ Дэвлэса, со май састи вой тутэ авэла (Псалом 116:1, 2). w19.07 2, 3, абз. 4, 5

О Иегова на дя амэнди, кай амэ тэ витидас важ авэр, со тэ терэн. Кодэла, ко стон пэстирэ законоря, савэ на трэбуй, на фэрин лэ ԥралэн, ай камэн тэ хулаин пэ лэндири вера. О Сатана Бэнг, и май дур лэла тэ ӷоний лэ Иеговастирэ служытелёнэн (1 Петра 5:8; Откровение 2:10). О Сатана и кодэла, ко пэ лэстири риг, терэна вся, кай тэ запретин тэ тэлювас лэ Иеговасти. Но, хоть амэндэ и исин дар, амэ никала на парашаса тэ служысарас лэ Иеговасти (Второзаконие 7:21). О Иегова амэнца, и во лэла тэ подритярэл амэн, дажэ кала амари дила запретина (2 Летопись 32:7, 8). Давайте амэ тэ сытювас кай и христианоря, савэ ԥэндэ кодэлэнди, кастэ сас и власть: «Диқэн екжэнэ, ай драго авэла англа лэ Дэвлэстирэ яқа тэ кандас тумэн, ай най лэ Дэвлэс? Ай со жы каринг амэндэ, амэ нэ можэм тэ парашас тэ росԥэнас пала кода, со диқлям и со ашундям» (Деяния 4:19, 20). w19.07 13, абз. 18—20

Трэбуй тэ старысавас тэ полас, сар гиндон и мануша, савэн амэ диқас андэ служэния, и тэ полас, васо вонэ кадя гиндон. О апостоло Павло бареля машкар иудеёря, и важ када, кала росԥэнэнас и лащи весть лэ манушэнди анда авэр народоря, лэсти трэбуй сас тэ полэл, сар вонэ гиндон. Васо? Важ кода кай вонэ почти нисо на ӷанэнас пала Иегова и пала Свынто Писания. Кала амэ камас май драго тэ полас лэ манушэн, савэ жувэн пэ тиритория кай амари собрания, трэбуй лэн май драго тэ уӷанас или тэ мангас совето кодэлэндар, ко най ек бэрш росԥэнэн важ о Дэл (1 Коринфянам 9:20—23). Амэ камас тэ виарақас «кодэлэн, ко ашэл» (Матфея 10:11). Важ када амэнди трэбуй тэ поможысарас лэ манушэнди тэ виԥэнэн пэско гиндо и драго лэн тэ виашунас. Ек ԥрал, саво жувэл андэ Англия, пушэл лэ манушэндар пала кода, сар андо ери тэ авэн бахталэ, и сар тэ барярэн лэ бэятонэн чи со тэ терэн, кала тумэнца обжылэпэ найсправедливо. И кала во виашунэл лэ манушэс, во ԥэнэн: «Сар ту гиндос, поджала кадэва совето, савэсти почти 2 000 бэрша?» Посли када, во нисо на дэл дума пала Библия, и сыкавэл анда телефоно и стихоря, савэ трэбуй. w19.07 21, 22, абз. 7, 8

Сави дэ бари трэбуй тэ авэл амари любовь каринг о Дэл? Тэ полас када поможына лэ Иисусостирэ алава, савэ во ԥэндя лэ фарисеёнэнди: «Любисар пэстирэ Дэвлэс лэ Иеговас всаворэ одеса, всаворя жызняса, всаворя годяса» (Матфея 22:36, 37). Да, амэ камас всаворэ одеса тэ любисарас лэ Дэвлэс. Кадяжэ амэ камас, кай амари любовь дес десэстар тэ ашэл май бари. Кай тэ любисарас лэ Дэвлэс, спэрва трэбуй тэ уӷанас лэс. Андэ Библия пистромэ: «Ко на любий, кодэва на уӷангля лэ Дэвлэс, важ кода кай о Дэл исин любовь» (1 Иоанна 4:8). О апостоло Павло росԥэндя, кай амари любовь ашэла май бари кодэлэстар, кала амэ май бут уӷанас о чачимос пала Дэл и полас, сар во диқэл пэ разни вопросоря (Филиппийцам 1:9). Кала амэ кати лям тэ сытювас па Библия, амэ набут ӷанасас важ о Дэл, но и тоди амэ ужэ лям тэ любисарас лэс. И со май бут уӷанасас пала о Иегова, со май бари ашэлас амари любовь каринг лэстэ. Акэ, васо кадя важно вся и время тэ сытювас па Библия и тэ гиндосарас пала кода, сости сытелям (Филиппийцам 2:16). w19.08 9, абз. 4, 5

Если тутэ авэр назначения андэ служэния, тоди акана тути трэбуй тэ виарақэс аврэ друӷонэн. На бистэр, кай тутэ тэ авэн лашэ друӷоря, трэбуй екжэно тэ авэс лашо друӷо. Росԥэн лэ ԥралэнди и лэ ԥэянди, сави радость тути анэнас кода, кай ту служыс лэ Иеговасти. Если жэ тути прижыляпэ тэ ашавэс и служэния, или тэ пэрэладэс через кода, кай о хулай чи и хулаи занасвайлэ, на дошаляр лэс. Авря ригатар, если варисо най кадя лэ зорэса тутэ, на дошаляр пэс, кай через када о хулай чи и хулаи парашэлэ тэ служын. На бистэр, кай тумэ сар ек мануш и тумэ динэ алав лэ Иеговасти, тэ заботинпэ ек пала ек аврэстэ андэ бида и андэ радость (Матфея 19:5, 6). Если тумэ улаглэ через кода, кай трэбуй тэ арақадёлпэ бэято, савэс на аштярэнас, мэк тумаро бэято ӷанэн, кай во тумэнди май куч чем любо назначения. Вся и время ԥэнэн лэ бэятости, кай лэс тумэнди «дя о Иегова» (Псалом 127:3—5). Росԥэнэн лэсти, сави лащи сас тумэндэ и служэния. Через када во можэт тэ закамэл кадяжэ тэ служый лэ Дэвлэсти и тэ стол кацавэ жэ цэли. w19.08 22, 23, абз. 10, 11

О Вавилоно Велико, када хохавнэ веры пэ вся и ԥув, мэлярэл лэ Дэвлэско алав. Кадэя роспутно манушни (хохавнэ веры) росԥэнэн хохаимос важ о Дэл. И хохавнэ веры на кандэнас лэ Иеговас кодэлэса, кай подритярэнас и манушыканэ правительства. Через кода, кай латэ (кай и хохавнэ веры) исин власть, вой тасавэл пэ аврэндэ, кай тэ затерэл ловэ па мануша, савэ латэ авэн. Ай скати вой поумардя манушэн, кардэ ужан и лэ Дэвлэстирэ служытеля! (Откровение 18:24, 19:2). О Иегова, кай тэ умарэл ла «роспутнона манушня» (и хохавнэ веры) стерэла када через лэ «лолэ зверёстирэ дэш роӷоря». О зверё, када ООН, ай и дэш роӷоря, када правительства, савэ подритярэн кодэла роспутнона манушня. Андэ время, сави стодя о Дэл, кадэла правительства жана против о Вавилоно, када и хохавнэ веры. Вонэ «вся латар одлэна и злэна пар латэ вся и йда», залэна лако барвалимос и сыкавэна всаворэнди, пэ скати вой дэ вэрыто (Откровение 17:3, 16). О Дэл розмарэла када вся кадя йто, кай здэлапэ, када авэла «андэ ек дес» и кодэла, ко подритярэл и хохавнэ веры фартэ пэрэдарана. Важ кода кай вой долӷо абурояс и ԥэнэнас: «Мэ и бида никала на диқава» (Откровение 18:7, 8). w19.09 10, 11, абз. 10, 11

Кадэя приӷлашэния важ всаворэ, важ кода кай о Иисусо никала на отԥэндёлапэ кодэлэндар, ко па чачимастэ камэл тэ служый лэ Дэвлэсти (Иоанна 6:37, 38). Важ кажно христианино, саво терэл и дила, сави дя о Иегова лэ Иисусости, када бари патив. Амэ можэм тэ патяс, кай о Христос вся и время авэла амэнца, кай тэ поможый амэнди тэ стерас кадэя дила (Матфея 28:18—20). Мануша, савэ на заваздэнас о шэро, цырдэнаспэ каринг о Иисусо (Матфея 19:13, 14; Луки 7:37, 38). Васо? Машкар о Иисусо и фарисеёря сас фартэ бари разница. И барэ мануша анда вера на любинас лэ манушэн и сас ӷорди (Матфея 12:9—14). Ай о Иисусо драго обжаласпэ и на заваздэлас о шэро. И фарисеёря любинас, кай тэ ашундён и путёнас, кай лэндэ бари власть. Ай о Иисусо ԥэнэнас, кай када найдраго, тэ путён пэстиря властяса и сытярэлас пэстирэ учениконэн тэ служын аврэнди най завазглэ шэрэса (Матфея 23:2, 6—11). И фарисеёря обжанаспэ лэ манушэнца кадя, кай вонэ тэ даран и тэ кандэн лэн (Иоанна 9:13, 22). Ай о Иисусо подритярэлас лэ манушэн лашэ алавэнца и диласа. Сости тумэн сытярэл лэ Иисусоско примеро? w19.09 20, абз. 1; 21, абз. 7, 8; 23, абз. 9

И собрании поможын амэнди тэ авас май пашэ каринг о Иегова. Па кода, сар амэ ԥирас пэ собрании, дицол, вижала амэндэ тэ виритярас о ԥаримос, кала лэна тэ ӷонин чи най (Евреям 10:24, 25). Если амэ адес промэкас и собрании важ варисо со най фартэ важно, тоди, со авэла англэ? Ай со авэла, кала и власти на мэкэна амэн тэ стидаспэ амарэ ԥралэнца и ԥэянца, савэнца патяс андо ек Дэл? Если амэ полас, кай амэнди трэбуй тэ на промэкас и собрании ужэ акана, тоди, кай амарэ вороӷоря на вижала тэ тердярэн амэн, кай тэ на стидаспэ вмести. Адес кацави время, кай трэбуй май драго тэ сытювас тэ любисарас и христиански собрании. Если амэ лэн цэнисарас, тоди нисавэ вороӷоря и дажэ и власти, савэ запрещяют, на заставина амэн тэ кандас лэн, ай най лэ Дэвлэс: «Амэ трэбуй тэ кандас лэ Дэвлэс, сар правителёс, ай най лэ манушэн» (Деяния 5:29). Висытён анда Библия тумарэ любими стихоря (Матфея 13:52). Дажэ если тумэндэ и память найлащи, о Иегова пэстирэ свынтонэ духоса, поможыя лэн тэ вспомните (Иоанна 14:26). Кода, кай гиндосарас пала библейски стихоря, поможыя амэнди тэ фэрисарас и дружба лэ Иеговаса и тэ на ашавас лэс. w19.07 2, 3, абз. 5; 4, абз. 8, 9

Если тумэ арақаделэпэ посли 1914 бэрш, тоди тумэ жувэн андэ «послидни деса» андэ люма, савяса правий о Сатана. Всаворэ амэ ӷанас пала кода, со лэла тэ терэлпэ андэ послиднё время, сар ԥэндясас о Иисусо. Када войны, боқалимос, землетрясения, насвалимос, бут терэн най па законо, ай кадяжэ, кай ӷонин лэ Иеговастирэ народос (Матфея 24:3, 7—9, 12; Луки 21:10—12). Ай инке амэ диқас, кай и мануша андярэн пэс кадя, сар ԥэндя о апостоло Павло. Вся када дэл амэнди тэ патяс, кай амэ жувас андэ «послидни деса» андэ люма, савяса правий о Сатана (Михея 4:1). Лэ 1914 бэршэстар ужэ прожылэ бут бэрша. Вижал, амэ жувас андэ послиднё время андэ «послидни деса». Важ кода кай вся йто кончияпэ, амэнди трэбуй тэ ӷанас и атветоря пэ важни вопросоря. Со лэла тэ терэлпэ, кала лэна тэ кончинпэ и «послидни деса»? Со о Иегова камэл амэндар, пока амэ аштярас, кала када вся авэла? w19.10 8, абз. 1, 2

О ԥаримос трэбуй тэ виритярэн най кати андэ лащи время. Кай тэ виритярас о ԥаримос трэбуй анда вся тэ патяс лэ Иеговасти (Римлянам 12:12). Анда алава, савэ дясас о Иисусо дицол, кай амэнди трэбуй тэ на парашас тэ кандас лэ Дэвлэс, дажэ кала исин бут ԥаримос. Кала виритярас о ԥаримос акана, кадэлэса амэ сытювас каринг кодэя время, кала авэла и само бари бида. О мануш па чачимастэ авэла смило и виритярэла о ԥаримос тоди, кала анда вся патял лэ Иеговасти. Со дэла зор амэнди инке май фартэ тэ патяс лэ Иеговасти? Кажно дес тэ адиносарас и Библия и тэ гиндосарас пала кода, сар о Иегова спасыяс пэско народо андэ дэлмутни время (Псалом 68:20; 2 Петра 2:9). Андэ само бари бида, кала дэна по Дэвлэско народо, трэбуй авэла сар никала тэ патяс лэ Иеговасти и тэ на дарас (Псалом 112:7, 8; Евреям 13:6). Если амэ патяс лэ Иеговасти ужэ акана, тоди амэ на дараса, и виритяраса, кала дэла пар мэндэ о Гого. Амэ патяс, кай кала амэн фэрия о Иегова, амэндэ вся и время авэла по ди спокойно (1 Коринфянам 13:8). w19.10 17, 18, абз. 15, 16

Кадэла люмаса правий о Сатана, и через када во терэл кадя, кай амэ тэ цырдаспэ каринг кода, со камэл кажно мануш и дажэ каринг кода, со най фартэ трэбуй (Эфесянам 2:1—3). О Сатана камэл тэ домардёл, кай амэ тэ любисарас най ек лэ Иеговас, ай инке варисо. Тоди амэ ужэ на канглоп кати лэ Иеговас. Кала о апостоло Пётро пистросардя пала время, кала кончияпэ люма, савяса правий о Сатана, и пала кода, кала авэла раё пэ ԥув, во ԥэндя: «Кучутнэ, кала аштярэн када, терэн вся, со можно, кай потом во тэ виарақэл тумэн вужэн англа лэстирэ яқа, найзамэлярдэн и тэ ладин всаворэнца» (2 Петра 3:14). Кала терас кадя и анда вся зор старысавас тэ авас вужэ англа лэ Дэвлэстирэ яқа, амэ ла диласа сыкаваса, кай тэлювас кати лэ Иеговасти. О Сатана и люма, савяса во правий терэна вся, кай тэ бистрас пала само ӷлавно (Луки 4:13). Но на домэкам никасти и нисости тэ залэн лэ Иеговаско ҭан андэ амаро ди. Амэ фартэ камас тэ любисарас и тэ тэлювас кати лэ Иеговасти, кати во ек када ашэл! w19.10 27, абз. 4; 31, абз. 18, 19

Най всаворэ пэрэжывании найлашэ. Например, када, кала амэ пэрэжываем, терас амэ варисо, со на чалёл лэ Иеговасти и лэ Иисусости чи най (1 Коринфянам 7:32). Ай если амэ тердям баро бэзэх, амэ пэрэжываем, сар тэ рисарас и дружба лэ Дэвлэса. Ай инке амэ пэрэжываем пала амаро хулай чи хулаи, пала родо, пала ԥрала чи ԥэя андэ собрания (1 Коринфянам 7:33; 2 Коринфянам 11:28). Ай, если амэ пала варисо фартэ пэрэжываем, через када амэ можэм вся и время пэрэжывать пала кода, кай тэ хутилэл о хамос, и тэ авэл, со тэ лас пэр пэстэ (Матфея 6:31, 32). Через када амэ вся и время ласа тэ гиндосарас пала када. Если амэ домэкаса кацаво, амэ ласа май набут тэ патяс лэ Иеговасти и можэм тэ хасарас лэса и дружба (Марка 4:19; 1 Тимофею 6:10). Кадяжэ амэ можэм фартэ тэ пэрэжываем, со пала амэндэ гиндон и мануша. Через када амэ можэм тэ дарас, кай амэндар лэна тэ асанпэ, чи кай амэн лэна тэ ӷонин. Кадэя дар можэт тэ ашэл май бари, чем и дар лэ Иеговастар. Кай тэ фэрисарас пэс кадэлэстар, амэнди трэбуй тэ мангас лэ Иеговас, тэ дэл амэнди вера и смилость, кай вонэ тэ поможын тэ виритярас о ԥаримос (Притчи 29:25; Луки 17:5). w19.11 15, абз. 6, 7

Дэсавэ важни ришэнии амэ никала на ласа тэ парувас. Например, амэ никала на ласа палпалэ о алав, саво дям тэ служысарас лэ Иеговасти и никала на ашаваса амарэ хулас чи ла хулая (Матфея 16:24; 19:6). Но дэсавэ ришэнии трэбуй тэ парувас. Васо? Важ кода кай варисо парудёл андэ жызня. Савэ советоря поможына амэнди май драго тэ витидас, со тэ терас? Андэ варисостэ амэнди всаворэнди «на хутилэл и мудрость». Важ када амэнди трэбуй тэ мангаспэ лэ Иеговасти, кала амэ прилас варисави ришэния и, кала трэбуй ла тэ парувас. Тоди о Иегова поможыя амэнди правильно тэ витидас. Погиндон всаворэ ригэндар. Виарақэн совето анда Библия, проадинон, со пистромэ андэ литература, сави вимэкэл лэ Иеговастири арӷанизацыя, и подэн дума кодэлэса, касти тумэ фартэ патян (Притчи 20:18). Када фартэ важно, кала тумэнди прижалпэ тэ парувэн и бути чи, кала пэрэладэн, чи витидэн, кай тэ сытён, кай када тэ поможый тэ затерэн и ловэ тэ служын лэ Иеговасти. w19.11 27, абз. 6—8

Амэ бахталэ, важ кода кай о Иегова позаботисайля пала кода, кай тэ улэл амэндар лэ бэзэхэстири власть. Ӷлавно, ко вся када улэл, када о Иисус Христос. Май бут чем 700 бэрш жы каринг кода, сар арақаделяпэ о Иисус Христос, о пророко Исаия ԥэндя, кай май англэ кай и мануша авэла май бут свобода, чем кодэя, сави сас кай израильтяноря, андо особенно бэрш. О Исаия ԥэндя: «О духо кодэлэско, ко Хулай пэ вся, лэ Ӷосподоско лэ Иеговаско пэр мандэ, важ кода кай о Иегова помазал ман тэ росԥэнав и лащи весть кодэлэнди, кастэ ковло ди. Во бишалдя ман тэ исцэлисарав кодэлэн, касти ԥарэс по ди, тэ росԥэнав, кай, ко андо плено, авэна свободни» (Исаия 61:1). Касти поджал кадэва пророчество? Кадэва важно пророчество важ и свобода ля исполняца посли кода, сар о Иисусо ля тэ служый. Кала о Иисусо авеля андэ синагога андэ пэско форо Назарето, во проадиносардя лэ иудеёнэнди, савэ котэ стидэпэ, и алава, савэ пистросардя о Исаия и приля каринг пэстэ кадэла алава (Луки 4:16—19). w19.12 9, 10, абз. 6—8

Кала лэна тэ ӷонин, амэнди трэбуй смилость, би кадэлэско на обжасапэ. Но со тэ терас, если амэнди на хутилэл смилость? Сэрэн, кай и смилость най кодэлэстар, саво тумэндэ росто, со тумэ ӷанэн чи скати тумэндэ зор. Погиндон пала тэрно Давидо, саво вижыля тэ марэлпэ лэ Голиафоса. Паша кодэва филистимлянино о Давидо дицолас цынёнё, слабо и лэстэ на сас бари оружыя! Лэстэ дажэ на сас мечо. Но во всаек сас смило. О Давидо на дарайля и жыля тэ марэлпэ лэ Голиафоса, саво сас фартэ ӷордо. Васо о Давидо сас смило? Во фартэ патялас, кай лэса Иегова (1 Самуила 17:37, 45—47). О Давидо на гиндояс пала кода, саво дэ баро сас о Голиафо и пэ скати во май баро лэстар. Ай во гиндояс пала кода, саво цынёнё кадэва великано англа Иегова. Сости амэ сытювас анда када? Если амэ патяс, кай амэнца о Иегова, и во пэ бутэстэ май зорало лэ манушэндар, савэ жан против лэстэ, тоди амэ на дараса лэндар (2 Летопись 20:15; Псалом 16:8). w19.07 4, 5, абз. 11—13

О Тихико, на ашавэлас лэ апостолос лэ Павлос (Деяния 20:4). Варикай андо 55 бэрш лэ И. Х. о Павло ԥэндя тэ стидэн и ловэ, кай тэ поможын лэ христианонэнди, савэ жувэнас андэ Иудея. О Тихико, файма, поможыяс лэсти андэ кадэя бари дила (2 Коринфянам 8:18—20). Прожыля время, и кала о Павло пэрво разо бэшэлас андо баруно андо Римо, во приԥэндя лэ Тихикости тэ одындярэл лэ собраниенди андэ Азия пэстирэ письморя, кай тэ подритярэл лэ ԥралэн, савэ котэ жувэнас (Колоссянам 4:7—9). О Тихико вся и время сас лэ Павлости лашо друӷо, саво никала на ашавэлас (Титу 3:12). Андэ кодэя время най пэ всаворэ можно сас тэ надеиспэ кадя, сар по Тихико. Варикай андо 65 бэрш лэ И. Х., кала о Павло бэшэлас до дуйто андо баруно, во пистросардя, кай бут ԥрала анда Азия на камэнас тэ диқэнпэ лэса. Файма, вонэ даранас лэ вороӷонэндар (2 Тимофею 1:15). Но о Павло ӷанэнас, кай ек о Тихико лэс на подвэдия, и важ када дя лэсти инке ек важно дила (2 Тимофею 4:12). Можно тэ патяс, кай лэ Павлости сас куч кацаво друӷо. w20.01 10, абз. 7, 8

Можэт ту пушэс пэстар: «Ай можэт и ман о Иегова помазал лэ свынтонэ духоса?» Если тути кадя здэлпэ, тоди погиндосар пала кадэла вопросоря. Фартэ ту камэс чи най тэ терэс кода, со камэл о Иегова? Стос ту фартэ бут зор андэ служэния чи най? Чалёл тути чи най тэ сытёс па Библия и тэ полэс май драго лэ Дэвлэско чачимос? Блаӷословий чи най тут о Иегова андэ служэния? Полэс ту андо ди, кай тути фартэ трэбуй тэ поможыс аврэнди, кай лэндэ тэ авэл лащи дружба лэ Дэвлэса? Патяс ту чи най, кай о Иегова най еқварэс поможыяс тути, и када драго дицэля андэ тири жызня? Если ту дян атвето пэ кадэла вопросоря «да», доԥэнэн када чи най, кай ту памазанико? Най. Васо? Важ кода, кай кацаво можэт тэ авэл кай всаворэ лэ Дэвлэстирэ служытеля. Если ту гиндос, памазанико ту чи най, када ужэ сыкавэл, кай ту най памазанико. Кодэла, кас о Иегова витидя тэ жувэн по нэбо, вонэ кадя на гиндон. Вонэ драго полэн, кай помазани лэ свынтонэ духоса! w20.01 23, абз. 14