Апрелё

Можэт акана андэ тумари жызня фартэ бут ԥаримос. Можэт варико холярдя тумэн андэ собрания (Иак. 3:2). Или можэт тумэндар подасанпэ андэ школа или пэ бути, важ кода кай тумэ служын лэ Иеговасти (1 Пет. 4:3, 4). Или о родо тасавэл, кай тумэ тэ парашэн тэ служын лэ Иеговасти (Матф. 10:35, 36). Если тумэндэ исин кацаво, тумэ можэте тэ гиндон, кай фэдэр ужэ тэ ашавэн лэ Иеговас и тэ на служын лэсти. Но сэрэн, кай о Иегова ӷанэн пала тумаро ԥаримос, и во дэла тумэнди зор и мудрость, сар пэс тэ андярэн, кай тэ виритярэн када. О Иегова стердя кадя, кай андэ Библия тэ авэл запистромэ пала мануша, савэндэ сас ԥаримос и савэндар амэ можэм тэ сытювас. И кала амэ адиносараса пала кадэла мануша, амэндэ по ди авэла май драго, и амэ ласа всаворэ одеса тэ аштярас о лашимос, саво авэла англэ. Но если амэ просто ласа тэ адиносарас и Библия, када на хутила. Трэбуй кай и алава андар латэ тэ парувэн амарэ гиндоря и кода, со амэндэ андо ди. w21.03 14, 15, абз. 1, 2

Гиндон тумэ, кай и мануша, савэнди амэ росԥэнас важ о Дэл, сар о зэрно, саво ужэ трэбуй тэ стидэс? Если када кадя, тоди када лэла тэ дицол пэ тумари служэния лэ Дэвлэсти. Сар? Пэрво, тумэ лэна тэ росԥэнэн важ о Дэл инке май бут. На хасарэн и время, важ кода кай, кала и мануша стидэн о зэрно, вонэ терэн када со май йто! Дуйто, тумэ авэна тэ лошавэн, кала лэна анда вся оди тэ стидэн о уражаё. Андэ Библия пала када пистромэ, кай и мануша «лошавэн, кала стидэн о уражаё» (Ис. 9:3). И трито, тумэ лэна тэ полэн лэ манушэн, сар кодэлэн, ко ужэ патял тумэнца андо ек Дэл. Важ када старыинпэ тэ росԥэнэн кадя, кай о мануш тэ закамэл тэ ашунэл. Дэко анда лэ Иисусостирэ ученикоря, файма, гиндонас, кай и самаритяноря никала на ашэна лэстирэ учениконэнца. Но о Иисусо кадя на гиндояс. Во гиндояс, кай и самаритяноря моӷут тэ патян андэр пэстэ. Амэ кадяжэ трэбуй тэ диқас пэ мануша, кай вонэ моӷут тэ ашэн христианоря. Со май лашо примеро дя амэнди о апостоло Павло. Во столас патив пэ кода, андэр со патян кодэла, касти во росԥэнэнас, полэлас, со лэнди чалёл и диқэлас, кай вонэ моӷут тэ ашэн лэ Иисусостирэ ученикоря. w20.04 8, 9, абз. 3, 4

Вместо кода, кай тэ сындон аврэ манушэс, фэдэр терэн вся, со па тумаро зор, кай тэ полэн, со лэстэ по ди. Андэ вся амэн полэл кати о Иегова. Важ када мангэн лэ Иеговас тэ поможый тумэнди тэ додиқэн андэ авэр мануша кода, со диқэл во, и тэ полэн, сар тэ сыкавэн лэнди, кай тумэ лэн жалуин. Амэ нэ можэм тэ ришаем, ко анда ԥрала и ԥэя затердя, кай амэ лэс тэ полас, ай ко най. Лэндэ всаворэндэ исин кацаво жэ ԥаримос, саво сас кай о Иона, о Илья, и Агарь и кай о Лото. Дэкала вонэ екжэнэ дошалэ андэ пэско ԥаримос. Но трэбуй тэ прижанас, кай дэкала кацаво жэ сас и амэнца. Акэ васо о Иегова ԥэнэн амэнди, тэ полас, со по ди ек еқэстэ (1 Пет. 3:8). Кала амэ кандас лэ Иеговас, тоди амэ инке май фартэ аваса ек пала ек андэ амаро ери, саво ек па вся и люма и андэ саво разни ԥрала и ԥэя. Важ када виашунам амарэ ԥралэн и ԥэян, май драго уӷанам лэн и полам, со лэндэ по ди. w20.04 18, абз. 15—17

О Иисусо сыкадя со май лашо примеро, сар тэ кандас лэ Иеговас. Вижал, если амэ камас тэ кандас лэ Иеговас, амэнди трэбуй май драго тэ сытювас лэ Иисусостар (Иоан. 8:29). Кай тэ на парашас тэ жувас па лэ Дэвлэско законо, амэ трэбуй фартэ тэ патяс, кай о Иегова никала на хохавэл. Вся, со во ԥэндя амэнди через и Библия, када чачимос. Кадяжэ амэ трэбуй тэ патяс, кай о Иисусо, када о Христос. Адес бут мануша на патян, кай о Иисусо, када Царё андэ лэ Дэвлэско Царство, савэс стодя о Иегова. Андэ пэско письмо о Иоанно ԥэндя, кай андэ люма ашэля фартэ бут манушэн, савэ хохавэн, и савэ моӷут тэ змарэн кодэлэн, ко най фартэ патял андо Иегова и андо Иисусо (2 Иоан. 7—11). Во пистросардя: «Ко хохавно, если най кодэва, ко ԥэнэн, кай о Иисусо, када най о Христос?» (1 Иоан. 2:22). Ек со можэт тэ фэрий, кай амэн тэ на обхохавэн, када если амэ сытювас па Библия. Кати кадя амэ драго уӷанаса лэ Иеговас и лэ Иисусос (Иоан. 17:3). И кати кадя амэ поласа, кай ӷанас о чачимос пала лэндэ. w20.07 21, абз. 4, 5

Со поможыя амэнди тэ на терас кадя, кай через амэндэ тэ пэрэн кодэла, ко нашэл амэнца па правильно дром? На трэбуй вся и время тэ тердювас пэ пэско, ай дэкала, кала када можно, мэк авэр терэн па пэстирятэ (Рим. 14:19—21; 1 Кор. 8:9, 13). Кадэлэса амэ фартэ на шаспэ пэ спорцменоря, савэ нашэн пала пэстири наӷрада и камэн, со бы тэ на авэл, тэ победин. Важ када вонэ моӷут тэ толкыин аврэн, кай тэ допрастэн пэрви. Амэ на терас, сар вонэ и на терас, кай машкар амэндэ тэ авэл холи, важ кода кай варико май лашо амэндар (Гал. 5:26; 6:4). Амэ камас тэ поможысарас май бутэ манушэнди, кай и вонэ тэ допрастэн о дром и тэ получин и наӷрада, када и вечно жызня. Важ када амэ старысавас тэ терас кода, со ԥэндя о Дэл. Во ԥэндя, кай амэ тэ терас «драго най кати важ пэстэ, ай и важ авэр» (Флп. 2:4). О Иегова дэл алав, кай лэстирэ служытеля, савэ допрастэна о дром, лэна и наӷрада, када вечно жызня по нэбо чи андо раё пэ ԥув. w20.04 28, абз. 10; 29, абз. 12

И милионоря лэ Иеговастирэ служытеля лэна тэ жувэн андо раё пэ ԥув. И кадэла мануша диқэна, сар лэна тэ ринпэ каринг и жызня фартэ бут мануша, савэ дэлмут мулинэ. Кати погиндон, сави дэ бахтали авэла время! (Деян. 24:15). И всаворэ мануша, савэ на парашэн тэ кандэн лэ Дэвлэс, победина и смэрть и лэна тэ жувэн вечно. Кажно лэ Дэвлэско служытелё, трэбуй тэ авэл блаӷодарно важ лэ Павлостирэ алава, савэ во пистросардя пала кода, кай ринапэ каринг и жызня кодэла, ко муля. И амэ камас тэ терас кадя, сар ԥэндя о Павло: «Вся и время терэн бут лэ Ӷосподостири дила» (1 Кор. 15:58). Если амэ анда вся оди терас кадэя дила, амэ диқаса о лашимос, саво аштярэл амэн англэ. Када авэла фартэ лащи время, сави амэ кати пэсти можэм представить. И амэ поласа, кай най евья вся терасас важ о Ӷосподо. w20.12 13, абз. 16, 17

Анда пророчества, савэ запистромэ андэ Иезекииль 38:10—23; Даниил 2:43—45; 11:44—12:1 и Откровение 16:13—16, 21, амэ поласа, кай котэ май ӥто всаворэстар, ԥэнэнпэ пала ек время. Важ када амэ можэм тэ полас, со трэбуй тэ аштярас англэ. Через дэсави время посли кода, сар залэлапэ и бари бида, «и царёря всаворя ԥувьятирэ» стерэна коалицыя нацый (Отк. 16:13, 14). И Библия пэр латэ ԥэнэн «о Гого па ԥув Магого» (Иез. 38:2). Кадэя коалицыя нацый дэла по лэ Дэвлэско народо и стола вся пэско зор, кай лэс будэр тэ на авэл. Кала о апостоло Иоанно пистрояс пала кадэя время, во ԥэндя, кай пэ Дэвлэстирэ вороӷоря пэрэла «баро ӷрадо» (Отк. 16:21). Кадэва ӷрадо можэт тэ сыкавэл фартэ строӷо приӷоворо, пала саво лэна тэ ԥэнэн лэ Иеговастирэ служытеля. Важ када о Гого па ԥув Магого дэла по лэ Дэвлэско народо, кай тэ сқосэл лэн па вся и ԥув. w20.05 15, абз. 13, 14

О свынто духо, када фартэ кучутно подарко лэ Иеговастар. Амэ май фартэ цэнисарас о свынто духо, кала гиндосарас, со амэндэ исин акана через лэстэ. Англа кода, сар тэ ваздэлпэ по нэбо, о Иисусо ԥэндя пэстирэ учениконэнди: «Но тумэндэ авэла зор, кала пэр тумэндэ сжала о свынто духо, и тумэ авэна мэрнэ свидетеля... жы кай само дурутнэ ҭана пэ ԥув» (Деян. 1:8). Важ кода кай о Иегова дэлас свынто духо, па вся и ԥув восемь епашэса милионоря мануша ашэлэ лэ Иеговастирэ служытеля. Кадяжэ о свынто духо терэл кадя, кай амэ тэ авас май радосни, тэ на грабисавас тэ холявас и тэ ӷанас тэ аштярас. Кадяжэ во поможый амэнди тэ терас лашимос, и тэ терас лэс, дажэ кала амэн пала када на мангэн. Инке через о свынто духо амаро ди ашэл май ковло и амэ ӷанас тэ ритярас пэс андэ вас инке май драго. Кадяжэ амэ май фартэ лас тэ патяс лэ Иеговасти (Гал. 5:22, 23). Важ кода кай амэндэ вся када исин, амэ ужэ жувас, сар андо раё. Да, о свынто духо, када фартэ кучутно даро лэ Иеговастар! w20.05 28, абз. 10; 29, абз. 13

Васо амэ гиндосарас, кай сможэм тэ ӷатярас кодэлэн, ко жундёна? Важ кода кай кадя сас най еқвар, кала о Иегова рияс каринг и жызня лэ манушэн, савэ жувэнас дэлмут. Вижал, о Иегова рия лэ манушэн каринг и жызня кацавэ жэ гиндонэнца, вонэ авэна кацавэ, савэ сас пар пэстэ, и вонэ лэна кадя жэ тэ дэн дума, сар и дэнас дума. О Иисусо сыстосардя и смэрть лэ сунэса. Ай кала о мануш рийпэ каринг и жызня, во сыстосардя кодэлэса, сар о мануш прошолпэ (Матф. 9:18, 24; Иоан. 11:11—13). Кала варико прошолпэ лэ сунэстар, лэстэ кацаво жэ видо, ӷолосо и во вся сэрэл. Погиндосарам, со сас лэ Лазарёса. Во на сас жундо штар дес, и лэсти тила ужэ қандэлас. Но кала о Иисусо рисардя лэ Лазарёс каринг и жызня, лэстирэ ԥэя сразу лэс ӷатярдэ, и екжэно о Лазарё лэн сэрэлас (Иоан. 11:38—44; 12:1, 2). w20.08 14, абз. 3; 16, абз. 8

Хоть и памазаникоря жана по нэбо, ай авэр бакрорэ жувэна пэ ԥув, важ о Иегова вонэ одинаково куч, важ кода кай во потиндя ек цэмин пала лэндэ, отдя пэстирэ Шавэс. И всаек, кай вонэ авэна тэ жувэн, вонэ трэбуй тэ на парашэн тэ кандэн лэ Дэвлэс и лэ Иисусос (Пс. 31:23). Инке трэбуй тэ сэрас, кай о Иегова дэла кажнонэ пэстирэ служытелёсти пэско свынто духо, скати лэнди трэбуй. Кажнонэ пэстирэ служытелёсти о Иегова подарисардя лащи надежда (Иер. 29:11). Через кода, со важ амэндэ стердя о Иегова и о Христос, амэ можэм тэ жувас вечно. Важ када амэ можэм лэн тэ слависарас и тэ сыкавас пэстири блаӷодарность, кала авас пэ Вечеря, кай тэ сэрас пала лэ Иисусостири смэрть. Да, и Вечеря, када само важно мероприятия важ всаворэ чачунэ христианоря. w21.01 18, абз. 16; 19, абз. 19

Май бут анда кодэла, ко авэл пэ Вечеря, лэна тэ жувэн пэ ԥув. Если када кадя тоди, васо вонэ авэн? Лэн цырдэл каринг када оди, кадя жэ сар амэн, кала амэ жас по ябьяв кай о друӷо. Кадэлэса амэ сыкавас, кай амэ любисарас лэ тэрнэс и ла тэрня и подритярас лэн. Кадяжэ и авэр бакрорэ, кала авэн пэ Вечеря, сыкавэн, кай любин лэ Христос и лэ памазаниконэн, и подритярэн лэн. Ай кадяжэ вонэ сыкавэн пэстири блаӷодарность, кай о Иисусо отдя пэстири жызня, кай вонэ тэ жувэн вечно пэ ԥув. Инке ек, васо вонэ авэн пэ Вечеря, важ кода кай када приԥэндя о Иисусо. Во ԥэндя пэстирэ апостолонэнди: «Терэн када, кай тэ сэрэн пала мандэ» (1 Кор. 11:23—26). Пока и памазаникоря жувэн пэ ԥув, и авэр бакрорэ на парашэна тэ ԥирэн пэ Вечеря и тэ ақарэн всаворэн. w21.01 17, 18, абз. 13, 14

Сар о мануш можэт тэ сыкавэл, кай любий варикас? Варико гиндой, кай хутила просто тэ ԥэнэн, кай любий. Но и чачуни любовь дицол пэ дила. (Диқэн Иакова 2:17, 26.) Подам дума пала Иегова. Во любий амэн (1 Иоан. 4:19). Ай сар во када сыкавэл? Лэстири любовь дицол андэ алава, савэ амэ адиносарас андэ Библия (Пс. 25:10; Рим. 8:38, 39). Но пэстири любовь во доԥэндя най кати лэ алавэнца, ай и ла диласа. О Иегова отдя пэстирэ Шавэс, кай во тэ мэрэл важ амэндэ (Иоан. 3:16). Амэ диқас, кай о Иегова фартэ любий амэн! Кала амэ кандас лэ Иеговас и лэ Иисусос, амэ сыкавас, кай любисарас лэн (Иоан. 14:15; 1 Иоан. 5:3). О Иисусо приԥэндя амэнди тэ любисарас ек еқэс (Иоан. 13:34, 35). Амэ трэбуй най кати тэ ԥэнас лэ ԥралэнди и лэ ԥэянди, кай любисарас лэн, но и тэ сыкавас када диласа (1 Иоан. 3:18). w21.01 9, абз. 6; 10, абз. 8

И памазаникоря лэна тэ правин лэ Иисусоса андэ лэ Дэвлэско Царство. Вонэ смоӷут вся и время тэ авэн лэ Иисусоса, тэ диқэн лэс, тэ дэн дума лэса и тэ проандярэн лэса и время (Иоан. 14:2, 3). Кодэлэн, ко лэна тэ жувэн пэ ԥув, лэн кадяжэ любия о Иисусо и лэла пала лэндэ тэ заботийпэ. Хоть вонэ никала на диқэна лэ Иисусос, всаек дес десэстар лэндэ авэла май лащи дружба лэса. Вонэ лэна тэ лошавэн ла жызняти, сави лэндэ авэла блаӷодаря лэсти и лэстирэ Дадэсти, лэ Иеговасти (Ис. 9:6, 7). Кала амэ лас тэ дружысарас лэ Иисусоса, амари жызня ашэл май лащи. Амэ ужэ акана диқас и любовь лэ Иисусостири и кода, кай во амэн подритярэл. Амэ можэм тэ жувас вечно. Но со май куч всаворэстар, када, кай амэ ласа май фартэ тэ дружысарас лэ Иисусостирэ Дадэса, лэ Иеговаса. Сави када бах, тэ авас лэ Иисусостирэ друӷонэнца! w20.04 25, абз. 15, 16

Кадэва письмо о апостоло Павло пистросардя лэ памазаниконэнди андо Коринфо, савэ посли смэрть, ринапэ каринг и жызня, кай тэ жувэн по нэбо. О Павло ԥэнэн, кай лэн витидэ лэ свынтонэ духоса, кай вонэ тэ авэн свынти, сар о Христос. Во кадяжэ дэл дума пала лэ «Христостирэ ученикоря, савэ мулинэ» (1 Кор. 1:2; 15:18; 2 Кор. 5:17). Андэ авэр письмо о Павло ԥэндя, кай «если амэ лэса мулям, сар во муля, тоди амэ аваса лэса кадя жэ, сар во рисайля каринг и жызня» (Рим. 6:3—5). О Иисусо рисайля каринг и жызня сар анӷело и вазгляпэ по нэбо. Кадяжэ авэла и лэ памазаниконэнца. Инке о Павло пистросардя, кай о Иисусо пэрво, ко муля и рисайля каринг и жызня по нэбо. О Иисусо сас пэрво, кас о Иегова рисардя каринг и вечно жызня по нэбо, сар анӷелос. w20.12 6, абз. 15, 16

Адес, кала и памазаникоря мэрэн пэ ԥув, вонэ сразу жэ ринпэ каринг и жызня по нэбо. Кадэва гиндо запистросардя о апостоло Павло андэ 1 Коринфянам 15:51, 52. И памазаникоря, кала ринпэ каринг и жызня, фартэ лошалэ. Со лэна тэ терэн и памазаникоря по нэбо? О Иисусо ԥэндя лэнди: «Кодэва, ко победия, стерэла вся, со мэ камав, кодэлэсти мэ дава тэ правий лэ народонэнца, кадяжэ, сар и манди дя кадэя власть мэрно Дад. Во лэла тэ пасый лэн ла саструня рувляса, сави кай и царёря, кадя, кай вонэ розмардёна, сар посуда анда ӷлина» (Отк. 2:26, 27). w20.12 12, 13, абз. 14, 15

О апостоло Павло ԥэндя, кай о Иисусо сас пэрво плодо. Кадэла алава на сыкавэнас, кай кати о Христос рияпэ каринг и жызня по нэбо. Кадяжэ трэбуй сас тэ ринпэ каринг и жызня и апостолоря и авэр памазаникоря, савэ тожэ трэбуй сас тэ жан по нэбо. Кала о Павло пистрояс пэско письмо лэ коринфянонэнди, во ԥэндя, кай и памазаникоря инке на ринаспэ каринг и жызня по нэбо (1 Кор. 15:18). Во ԥэндя, кай када инке трэбуй тэ авэл англэ: «Но кажно [рияпэ каринг и жызня] андэ пэстири время. О Христос, када пэрво плодо, ай потом, кала во авэла, [ринапэ] и кодэла, ко лэ Христостирэ» (1 Кор. 15:23; 1 Фесс. 4:15, 16). И алава «кала во авэла», сыкавэн и время, андэ сави амэ жувас. Важ када и апостолоря и авэр памазаникоря нэ моӷли тэ жан по нэбо и тэ авэн лэ Иисусоса, пока во на ля тэ правий (Рим. 6:5). w20.12 5, абз. 12; 6, абз. 16, 17

Катэ о апостоло Павло на ԥэнэн пала кодэла мануша, савэн о Дэл рисардя каринг и жызня, кай тэ жан по нэбо андэ тила, сави сар кай и анӷелоря (1 Кор. 15:43—44). Кала о Иисусо сас пэ ԥув, лэстэ и тила сас, сар манушэстэ. Но кала во рисайля каринг и жызня по нэбо, котэ лэстэ и тила ашэля, сар кай и анӷелоря. Кадяжэ кай и памазаникоря. Кала вонэ ринпэ каринг и жызня, кай тэ жувэн по нэбо, лэндэ и тила ашэл, сар кай о Иисусо. О Павло ԥэндя, кай пэ ԥув лэндэ сас ек тила, ай по нэбо авэла авэр (1 Кор. 15:45—49). Амэ ӷанас, кай кала о Иисусо рисайля каринг и жызня, лэстэ ужэ на сас тила, сар кай о мануш. О Павло камля тэ сыкавэл, кай «о рат и тила нэ моӷут тэ авэн андэ лэ Дэвлэско Царство» (1 Кор. 15:50). Важ када кай и апостолоря и кай и памазаникоря, посли кода, сар вонэ ринапэ каринг и жызня по нэбо, тожэ на авэла тила анда рат и мурцы, сави тернёл. w20.12 11, абз. 10—12

О Дэл дя пэско свынто духо лэ Иисусостирэ учениконэнди, кай вонэ тэ пистрон, кай дэсавэ мануша ринапэ каринг и жызня, кай тэ жан по нэбо. Машкар лэндэ и о апостоло Иоанно, саво пистросардя: «Кучутнэ, акана амэ лэ Дэвлэстирэ бэяцэ, но инке на ӷанас, савэ ашаса. Амэ ӷанас кати кода, кай кала о Дэл сыкавэла пэс, амэ ашаса, сар во» (1 Иоан. 3:2). Анда кадэва стихо дицол, кай и памазаникоря на ӷанэн, савэ вонэ авэна, кала ринапэ каринг и жызня, сар анӷелоря. Но кала вонэ авэна кацавэ, вонэ додиқэна лэ Иеговас. Андэ Библия на росԥэнэнпэ вся пала кода, сави жызня авэла по нэбо. Но набут о Павло росԥэндя пала када. Кадэла памазаникоря авэна лэ Иисусоса, кала во улэла «всаворэ правительстворя, власти и зора», ай кадяжэ улэла лэ послиднёнэ вороӷос, када и смэрть. Тоди о Иисусо и кодэла, ко лэса авэна тэ правин, тэлёна лэ Иеговасти и вся отдэна лэсти (1 Кор. 15:24—28). Скати жэ радость када анэна всаворэнди амэнди! w20.12 8, абз. 2

Андэ Библия ԥэнэнпэ, кай о апостоло Павло и авэр памазаникоря, авэна кодэла, кас пэрвонэн «рина каринг и жызня» (Отк. 20:6). Но инке трэбуй сас и авэр мануша тэ ринпэ каринг и жызня, и пала када ԥэнэнас о Иов (Иов 14:15). И памазаникоря авэна лэ Христоса по нэбо, «кала во улэла всаворэ правительстворя, власти и зора», улэла дажэ лэ послиднёнэ вороӷос, «када и смэрть». Кодэла, ко ринапэ каринг и жызня, кай тэ жувэн по нэбо, будэр никала на мэрэна (1 Кор. 15:24—26). Лэ манушэнди, савэ надеинпэ тэ жувэн вечно пэ ԥув, придэн зор лэ Павлостирэ алава, савэ амэ адиносарас андо адесутно стихо. Амэ полас, кай и нэправедни мануша нэ моӷут тэ жувэн по нэбо. Вижал, кода, со ԥэндя о Павло, поджал каринг кода, кай ринапэ каринг и жызня кодэла мануша, савэ авэна тэ жувэн пэ ԥув. w20.12 6, 7, абз. 18, 19

Можэт, ту пушэс пэстар: «Сар мэ тэ полав, простисардя ман о Иегова чи най?» Если амэ када пушас, када сыкавэл, кай амэ камас тэ уӷодисарас лэ Иеговасти и камас, кай во амэнди тэ поможый. Андэ «Сторожэво башня» бут бэрш палпалэ сас пистромэ: «Амэ можэм най еқвар тэ умэкас и вас, важ кода кай варисави найлащи привычка, сави сас амэндэ варикала, можэт упалэ тэ авэл амэндэ. Если тутэ кадя, тоди на умэк и вас и на гиндосар, кай ту стердян кацаво бэзэх, саво никала на простияпэ. Када и аштярэл о Сатана. Кода, кай тут дошалярэл оди, ужэ сыкавэл, кай ту на зажылян фартэ дур. Никала на параш анда вся оди тэ мангэс лэ Иеговас тэ простий и тэ поможый, кай тиро ди будэр тэ на дошалярэл тут. О Апостоло Павло англа кода, сар тэ ашэл христианино, тожэ терэлас бут ӷрехоря. Во сэрэлас, со во терэлас варикала (1 Тим. 1:12—15). Но о Павло ӷанэнас, кай лэ Иисусостири жэртва, када подарко, саво о Дэл подарисардя и лэсти. Важ када во на домэкэлас, кай лэс фартэ тэ дошалярэл оди. Ай наоборот, во терэлас важ о Иегова вся, со па лэско зор. w20.11 28, абз. 14; 29, абз. 17

О Сатана подстол и разни ловушки, кай амэ тэ стерас варисо найлашо. Сар амэ пэ када диқас? Чаче, вушэро тэ лас тэ гиндосарас, кай када най кадя вэрыто. Амэ можэм тэ погиндосарас: «Ман жэ через када на исключина анда собрания. Вижал када най кадя и страшно». Кадя тэ гиндосарэс нэправильно. Фэдэр тэ пушас пэстар: «Можэт о Сатана через када терэл, кай мэ най всаворэ одеса тэ авав лэ Иеговаса? Если мэ стерава кода, со нащи, через када лажаварава мэ лэ Дэвлэс чи най? Ашава мэ май паша каринг о Иегова чи отжава лэстар?» Погиндон пала кадэла вопросоря. Мангэнпэ пала мудрость, кай ворта тэ дэн атветоря пэ кадэла вопросоря и тэ на обхохавэн пэс. Када тумэн па чачимастэ фэрия и поможыя, кай тумэ тэ на терэн кода, со камэлпэ, но нащи. Кадя жэ стердя о Иисусо, кала ԥэндя: «Отжа, Сатана!» (Матф. 4:10).На бистрэн, кала най всаворэ одеса лэ Дэвлэса, када найдраго. w20.06 12, 13, абз. 16, 17

Амэ кандас лэ Иеговас и на заваздас о шэро, важ кода кай полас, кай во май драго ӷанэн, со важ амэндэ фэдэр (Эф. 4:22—24). Кала амэ на гиндосарас пала пэстэ бут, тоди амэ полас, кай тэ терас кода, со камэл о Иегова, када само важно андэ амари жызня. Ай кадяжэ амэ на гиндосарас, кай май лашэ аврэндар. Важ када амэндэ исин лащи дружба лэ Дэвлэса и амарэ ԥралэнца и ԥэянца андэ собрания (Флп. 2:3). Если амэ на фэрисаваса, амэ можэм тэ лас тэ гиндосарас кадя жэ, сар и мануша, савэ на ӷанэн лэ Иеговас, савэ заваздэн о шэро и гиндон кати пала пэстэ. Кадя сас дэсавэ христианонэнца андэ пэрво вико. О апостоло Павло пистросардя лэ римлянонэнди: «Ԥэнав тумэнди, кай на трэбуй тэ гиндон, кай тумэ май лашэ аврэндар. Но гиндон кадя, кай тэ дицол, кай тумэ на гиндон пала пэстэ май бут, чем трэбуй». О Павло полэлас, кай тэ гиндосарас пала пэстэ трэбуй. Но кай тэ на гиндосарас пала пэстэ бут, амэ трэбуй тэ на заваздас о шэро. И смирения поможыя амэнди тэ на гиндосарас пала пэстэ май бут, чем трэбуй. w20.07 2, 3, абз. 1, 2

Кала жувэлас о Аса, и спокойно время прожыля. Пэр лэндэ динэ фартэ бут эфиопоря, савэ патянас, кай вонэ победина. Но о Аса на пэрэдарайля лэндар. Во патялас лэ Иеговасти. Во мангэласпэ: «Поможысар амэнди, амаро Дэл Иегова, важ кода кай амэ патяс тути и тирэ алавэса вижылям против бут мануша» (2 Лет. 14:11). Хоть кай и эфиопоря лэ воинонэн сас дувар май бут, чем кай и иудеёря, о Аса всаек патялас, кай о Иегова само зорало Дэл. И о Иегова поможысардя лэнди тэ победин (2 Лет. 14:8—13). Хоть амэ на ӷанас, со авэла кажнонэса андар мэндэ, но ек амэ ӷанас точно. Кай рано или позно и спокойно время прожала. Васо амэ када ӷанас? Важ кода кай о Иисусо ԥэнэнас, кай андэ послидни деса «вса́ворэ народоря лэна тэ вэрыцын» лэстирэ учениконэн (Матф. 24:9). w20.09 17, абз. 14—16

Никасти на чалёл, кай пэр лэстэ тэ ԥэнэн найлашэ алава. Но если амэ фартэ пэрэжываем пала кода, кай кадэла алава амэнди ԥэнэн и вороӷоря, тоди амэ можэм тэ умэкас и вас (Прит. 24:10). Со тоди трэбуй тэ терас? Амэ, сар и о Павло, можэм тэ лошавас, кала амэн холярэн. Васо? Важ кода кай, кала пар мэндэ ԥэнэн найлашэ алава и ӷонин важ и вера, када сыкавэл, кай амэ лэ Иисусостирэ ученикоря (1 Пет. 4:14). О Иисусо ԥэндя, кай лэстирэ учениконэн лэна тэ ӷонин (Иоан. 15:18—20). Кадя и сас андэ пэрво вико. Андэ кодэя время и мануша, савэ ритярдёнас пала ӷреческо культура, гиндонас кай и христианоря найгодявэрнэ и бут со на полэн. Кадяжэ гиндонас и иудеёря. Еқвар вонэ ԥэндэ, кай о Пётро и Иоанно найӷрамотни и прости мануша (Деян. 4:13). Бут ко гиндояс, кай и христианоря слаби и нико пала лэндэ на зашолапэ. Важ кода кай вонэ на ӷаминаспэ андэ политика, вонэ нэ моӷли тэ зашонпэ пала пэстэ англа правительство. Кадяжэ вонэ на жанас андэ халавдэ и важ када вонэ нэ моӷли пэс тэ фэрин, если пэр лэндэ варико дэла. Через када и мануша на стонас пэр лэндэ патив. Тердярдя чи най лэ христианонэн кода, сар обжанаспэ лэнца и вороӷоря? Най. w20.07 15, абз. 3, 4

Кала адиносарас и письморя, савэ пистросардя о апостоло Иоанно через лэ Дэвлэско свынто духо, амэ диқас, сар дэ фартэ во любияс лэ ԥралэн и лэ ԥэян. Ай кадяжэ диқас, сар во камэлас, кай вонэ фартэ тэ патян лэ Дэвлэсти. Амэ радосавас, кай кацавэ лэ Дэвлэстирэ служытеля, сар о Иоанно, лэна тэ правин еқэҭанэ лэ Иисусоса! (1 Иоан. 2:27). Амэнди трэбуй тэ сэрас лэстирэ алава и тэ на парашас тэ жувас па лэ Дэвлэско законо, вся и время и андэ вся тэ кандас лэ Иеговас. Сытён па лэ Дэвлэско алав, па Библия, и патян кодэлэсти, со котэ запистромэ. Май фартэ патян андо Иисусо. На домэкэн, кай тумэ тэ лэн тэ гиндон кадя жэ, сар о миро, саво на ӷанэн лэ чачунэ Дэвлэс, и на патян кодэлэсти, сости сытярэн и отступникоря. Сэрэн, на вижала тэ служын лэ Иеговасти и андэ кадэя жэ время тэ терэн кода, со на чалёл лэ Дэвлэсти. Важ када на подэнпэ, кала пэр тумэндэ тасавэн и мануша, кай тумэ тэ стерэн бэзэх. Кандэн лэ Иеговас и на терэн кода, со билажавардо. Простин кодэлэн, ко тумэн холярдя и подритярэн кодэлэн, касти када трэбуй. Кадя тумэ поможына, кай лэндэ тэ на авэл ԥарэс по ди, кай вонэ тэ на умэкэн и вас, и кай вонэ тэ на парашэн тэ служын лэ Иеговасти. Тоди саво бы ԥаримос тэ на авэл, амэ на парашаса тэ жувас па лэ Дэвлэско законо. w20.07 24, абз. 15—17

Амаро любящё Дэл о Иегова стердя кадя, кай кажно служытелё, саво на парашэл лэс тэ кандэл, тэ авэл куч андэ собрания. Хоть амэ терас разно дила андэ собрания, всаворэ амэ одинаково куч лэ Иеговасти и трэбуй ек еқэсти. Амэ нащи тэ ԥэнас лэ Иеговастирэ служытелёнэнди: «Тумэ манди на трэбуй» (1 Кор. 12:21). Если амэ камас, кай андэ собрания тэ авэл ладо, тоди амэнди трэбуй тэ стас патив пэ всаворэ ԥрала и ԥэя и тэ терас еқэҭанэ лэнца дила (Эф. 4:16). Тоди андэ собрания всаворэ лэна тэ полэн ек еқэс, всаворэ авэна куч ек еқэсти и андэ собрания лэ манушэнди авэла фартэ драго. Всаворэн старейшынонэн андэ собрания стодэ лэ свынтонэ духоса, саво лэ Иеговастар. Но кажнонэстэ драго вижал тэ терэн разно дила и кажнонэстэ пэстири жызня (1 Кор. 12:17, 18). Дэко служый старейшынаса найдэлмут, и важ када инке на ӷанэн, сар драго тэ диқэн пала собрания. Дэко нэ можэт тэ терэл кода, со камэл, важ кода кай най во о зор чи бэрша. Но лэ старейшынонэнди нащи тэ ԥэнэн ек еқэсти: «Тумэ манди на трэбуй». Ай наоборот, кажно андар лэндэ трэбуй тэ терэл кадя, сар ԥэндя о Павло андэ Римлянам 12:10. w20.08 26, абз. 1, 2; 27, абз. 4

Да, амэ па чачимастэ камас и терас кадя, сар ԥэнэнпэ андэ лэ Иеговастири арӷанизацыя. Амэ када терас, кала уӷанас, кай варисаво гиндо анда Библия трэбуй тэ полас па аврятэ, чи кала сыкавэн, сар инке о мануш трэбуй тэ жувэл па Библия. Но сар амэ андярас пэс, кала парудёлпэ варисо андэ арӷанизацыя, и када парувэл варисо и андэ амари жызня? Например, и ришэния тэ битинэн о Зало Царство, андэ саво амэ ԥирасас. Со поможыя амэнди тэ на хасарас и радость, кала варисо парудёл андэ арӷанизацыя? Важно тэ сэрас, кай амэ терас дила важ о Иегова и во диқэл пала латэ (Кол. 3:23, 24). Амэ можэм тэ сытювас кай о царё Давидо, саво бут со отдя, кай тэ строин о храмо. Во ԥэндя лэ Иеговасти кацавэ алава: «Ко мэ кацаво и ко мэрно народо, кай тэ терас кацавэ пожэртвования екжэнэ пэстар? Вся тутар, и амэ кати отдас тути кода, со тиро вас дя амэнди» (1 Лет. 29:14). Амэ тожэ отдас лэ Иеговасти кода, со во амэнди дя и терас када анда вся оди. И о Иегова фартэ лошавэл, кала диқэл, кай амэ отдас лэсти о зор, и время и ловэ, кай тэ жал лэстири дила (2 Кор. 9:7). w20.11 22, абз. 14—16

Амэ на гиндосарас, кай амэ служысарас драго тоди, кала поможысардям бутэ манушэнди тэ ашэн лэ Иеговастирэ свидетелёнэнца (Луки 8:11—15). Амэ сыкавас, кай кандас лэ Иеговас и лэстирэ Шавэс, кала на парашас тэ росԥэнас важ лэстэ и тэ сытярас аврэн па Библия. И када само ӷлавно важ о Иегова (Мар. 13:10; Деян. 5:28, 29). Трэбуй тэ грабинпэ, важ кода кай йто кадэя люма будэр на авэла! Ашэлпэ совсем набут время, кай тэ спасынпэ и мануша. На отстон кадэя дила, сави фэрий лэ манушэнди жызня, и на гиндон, кай фэдэр тэ подаштярэн, кала авэла и май лащи время. На бистрэн, васо трэбуй тэ росԥэнэн важ о Дэл. Уӷанэн май драго пала кода, со пистромэ андэ Библия. Стон зор, кай тэ стерэн и дила, сави трэбуй, хоть дэкала и на камэлпэ. Май бут чем восемь милионоря мануша па вся и люма линэ тэ росԥэнэн пала Дэл. Терэн кадя жэ сар и вонэ и тоди тумэндэ авэла радость, сави дэл о Иегова (Неем. 8:10; Луки 5:10). Терэн вся, кай бут тэ служын жы каринг кодэя время, пока о Иегова на ԥэнэна, кай вся и дила достердэ. w20.09 7, абз. 18—20

Амэ тожэ трэбуй тэ на цырдаспэ пала барвалимос, важ кода кай через лэстэ амэ парашаса тэ любисарас лэ Иеговас, тэ росԥэнас пала лэстэ и на аваса блаӷодарни важ и Библия (Матф. 13:22). Если амэ полям, кай авэла варисави бида, амэ йто трэбуй варисо тэ стерас, кай тэ фэрисарас кода, со дя амэнди о Иегова. Амэ трэбуй май англал тэ ӷанас, со амэ тераса, если амэнди пэ яқа попэрдёлапэ андо интэрнэто или андо телевизоро билажавардимос или жэстоко кино, ай кадяжэ кода, со ԥэнэн и отступникоря. Если амэ ӷанас, со йто тэ терас, амэ фэрисараса амари дружба лэ Иеговаса и ашасапэ лашэ андэ лэстирэ яқа (Пс. 101:3; 1 Тим. 4:12). Амэ трэбуй тэ цэнисарас кода, со дя амэнди о Иегова. Када о чачимос анда Библия и кода, кай амэ поможысарас лэ манушэнди тэ уӷанэн лэ Дэвлэс. Тоди амэндэ авэла вужи совесть и амэ поласа, васо жувас, ай андо ди авэла бари радость кодэлэстар, кай поможысарас аврэнди тэ уӷанэн лэ Дэвлэс. w20.09 30, абз. 16—19

Кала о мануш болдёл, во англа всаворэ сыкавэл, кай патял лэ Иеговасти и кай камэл тэ служый вмести лэстирэ народоса. Па кода, сар о Иегова диқэл пала пэстири арӷанизацыя, можно тэ полас, саво во и савэ лэстэ законоря. Ай кадяжэ можно тэ полас, со во камэл тэ стерэл. Шаса сама, саво о Иегова. Пэрво, о Иегова справедливо Дэл (Деян. 10:34). Важ кода кай о Дэл любий амэн, во отдя пэстирэ Шавэс, кай тэ витинэл всаворэн лэ ӷрехостар (1 Тим. 2:6; Иоан. 3:16). О Иегова приԥэндя пэстирэ служытелёнэнди, кай вонэ тэ росԥэнэн пала Царство всаворэнди. И кадя можэт тэ спасыйпэ кажно, ко патял, кай о Дэл витиндя лэс. Дуйто, о Иегова любий, кай тэ авэл вся мирно и андэ вся порядко (1 Кор. 14:33, 40). Важ када и кай лэстирэ служытеля трэбуй тэ авэл мирно и андэ вся порядко. И трито, о Иегова «Само Баро Учителё» (Ис. 30: 21). Акэ васо андэ лэстири арӷанизацыя сытярэн, кай амэ тэ ӷанас о чачимос анда Библия и тэ поможысарас аврэнди тэ уӷанэн кадэва чачимос. w20.10 20, абз. 1—3