Июлё

Амэнди трэбуй тэ ашас лэ Иисусостирэ друӷоря, кай о Иегова тэ ашунэл амарэ молитвы. Важ када на хутилэла просто, сар доманглямпэ, тэ ԥэнас: «Ашун через о Иисус Христос». Амэ трэбуй тэ диқас по Иисусо кадя жэ, сар о Иегова. О Иисусо ԥэндя лэ апостолонэнди: «Со бы тумэ тэ на манглоп важ мэрно алав, мэ стерава када» (Иоан. 14:13). Ек о Иегова ашунэл амарэ молитвы и дэл атвето пэр лэндэ. Но кода, со о Иегова загиндосардя важ о мануш, во дя тэ терэл лэ Иисусости. Инке о Иегова дэла атвето пэ амарэ молитвы, кала диқэла, кай амэ кандас лэ Иисусос. О Иисусо ԥэндя: «Кала тумэ простин лэ манушэнди, кай вонэ терэн варисо най кадя, тоди тумаро небесно Дад простия тумэн. Ай сар тумэ на простин лэ манушэнди кода, кай вонэ варисо най кадя терэн, тоди и тумаро Дад на простия тумэнди, со тумэ най кадя терэн» (Матф. 6:14, 15). Важ када амэ трэбуй тэ обжаспэ аврэнца драго, кадяжэ сар о Иегова и о Иисусо обжанпэ амэнца. w20.04 21, абз. 6

О апостоло Павло май англал уӷанэнас, со чалёл кодэлэнди, ко лэс ашунэн, ай тоди дэлас дума пала када. Мануша, савэ жувэнас андэ Листра, набут ӷанэнас пала Свынто Писания. Важ када о Павло дэлас дума кадя, кай вонэ тэ полэн. Во дэлас дума пала баро уражаё и пала кода, со дэл бах и лош андэ жызня. Лэстирэ алава и примероря сас вушэро тэ полэн кодэлэнди, ко котэ жувэлас. Старыинпэ тэ уӷанэн, со чалёл лэ манушэнди котэ, кай тумэ росԥэнэн пала Дэл, и погиндон, пала со и мануша камэн тэ дэн дума. Но сар тэ полас, со чалёл лэ манушэсти? Трэбуй тэ шас сама манушэс и пэ кода, сар во жувэл. Можэт во терэл бути андо садо, адиной и книжка чи терэл и вурали, чи инке варисо. Тоди, васо тэ на задэн дума пала кодэя дила, сави о мануш терэл? (Иоан. 4:7). Дажэ па кода, сар о мануш утидэлпэ, можно бут со тэ полас, сави лэстэ нацыя, соса во залэлпэ и сави команда анда спорто лэсти чалёл. w20.04 11, абз. 11, 12

Исин ԥрала и ԥэя, савэ дажэ тоди, кала найбари дила, всаек фартэ пэрэжывают и лэндэ исин дар. Кадяжэ вонэ моӷут черезчур тэ лажан аврэндар. Лэнди можэт тэ авэл ԥарэс, кала паша лэндэ бут миро, но вонэ всаек на промэкэн тэ ԥирэн пэ собрании и канӷрэсоря. Тэ задэн дума лэ манушэса, савэс вонэ на ӷанэн, лэнди фартэ ԥарэс, но вонэ всаек ԥирэн и росԥэнэн лэ мирости важ о Дэл. Если тумэндэ исин кацаво, тоди сэрэн, тумэ най екжэнэ. Кацаво терэлпэ бутэнца. Патян, кай о Иегова цэний кода, кай тумэ анда вся оди стон зор. Кода, кай тумэ на умэкэн и вас сыкавэл, кай о Иегова тумэн блаӷословий и дэл тумэнди зор, саво трэбуй (Флп. 4:6, 7). Хоть тумэндэ нинай зор и по ди пэрэжывания, тумэ всаек на парашэн тэ служын лэ Иеговасти, кадэлэса тумэ радуин лэ Иеговас. Бутэндэ андар мэндэ, най фартэ лашо зор, и всаек амэ на парашас тэ прастас (2 Кор. 4:16). Лэ Иеговастирэ зорэса амэндэ вижала тэ допрастас о дром до конца! w20.04 31, абз. 20, 21

Лэ Дэвлэсти мудрость драго дицол андэ кода, сар во стердя амари Ԥув. Вой о цэр важ всаворэ (Евр. 3:4). Кати пэр латэ исин вся важ лэ манушэстири жызня. Амари ԥув набут шолпэ по космическо кораблё, саво стердэ и мануша. Но исин кода, соса вонэ на шонпэ. Погиндон, скати прожудоп и мануша, савэ андо космосо, если бы лэнди тэ на анэн нисо и лэнди нащи авелоп тэ вишон о мусоро анда космическо кораблё? Прожала дэсави время, и лэндэ кончисайлоп о кислородо, о паи и о хамос. Ай о мусоро, саво лэндэ стидэласпэ, авелоп инке май бут. Йто и мануша котэ мулиноп. Ай пэ ԥув исин вся, кай пэр латэ тэ жувэн милиардоря мануша и жывотни. Пэ амари ԥув никала на кончийпэ о кислородо, о хамос и о паи. Вся и мэл, сави исин лэ манушэндар пэ ԥув, на вишон андо космосо. Но всаек и ԥув ашэлпэ шукарни и вужи, и пэр латэ можно тэ жувэс. Сар кадя вижал? О Иегова стердя и ԥув кадя, кай вся о мэлалимос лэ манушэндар, упалэ тэ вижал андо лашимос, савэстар польза всаворэнди. w20.05 20, 22, абз. 3, 4

О Сатана ԥэндя ла Евати, кай о Дэл хохавэл. Кадя о Сатана ашэля Хохавно. И Ева подяпэ лэ хохаимасти и патяя лэ Сатанасти, ай най лэ Иеговасти (1 Тим. 2:14). Кодэлэстар вой приля, со май найлащи ришэния, тэ жал против кода, со приԥэндя лэнди о Дад. Вой зумадя о плодо, саво о Иегова приԥэндя тэ на хан, ай тоди дя лэс лэ Адамости (Быт. 3:6). Погиндон, со авелоп, если и Ева тэ ԥэндоп лэ Сатанасти па аврятэ. Ай со, сар вой тэ ԥэндоп кадя: «Мэ на ӷанав тут, но мэ ӷанав пэстирэ Дадэс, лэ Иеговас. Мэ любисарав и патяв лэсти. Сар ту можэш тэ ԥэнэс пала лэстэ варисо найлашо? Вижа!» Сар о Иегова авелоп лошало, если лэстири любимо щей тэ ԥэндоп кацавэ алава! (Прит. 27:11). Но и Ева и о Адамо на любинас лэ Иеговас и на камэнас тэ кандэн кати лэс. Вонэ ни ек лашо алав на ԥэндэ, кай тэ зашонпэ пала пэско Дад и пала лэско алав Иегова. w20.06 4, абз. 10, 11

Амарэ ԥэян трэбуй тэ хвалисарас пала вся, со вонэ терэн андэ служэния лэ Иеговасти. Вонэ строин и диқэн пала здании, андэ савэ тэлён лэ Иеговасти. Вонэ поможын, кала тердяпэ бида андэ природа. Вонэ сытён авэр шыб, кай тэ росԥэнэн важ о Дэл, пэрэандярэн и литература пэ авэр шыба, ай кадяжэ вонэ служын сар добровольцоря андо Вефилё. Ай инке, кай дэсавэ ԥэя кай о хулай исин бут почотно дила андэ собрания или андэ лэ Дэвлэстири арӷанизацыя. И если кадэла ԥэя тэ на подритярдоп лэн, файма, лэндэ на вижылоп тэ терэн драго кадэя дила и тэ авэн кацавэ манушэнца, «савэ сар подаркоря» (Эф. 4:8). И мудри старейшыноря полэн, кай и ԥэя со май драго ӷанэн тэ росԥэнэн важ о Дэл и андэ Библия ԥэнэнпэ, кай и ԥэя, сар «баро войско», саво анда вся оди служый лэ Иеговасти. Ай инке и старейшыноря полэн, кай май взросли ԥэя, савэндэ лащи дружба лэ Иеговаса, моӷут тэ поможын лэ тэрнэ ԥэянди, савэндэ исин ԥаримос (Титу 2:3—5). Лэ ԥэян трэбуй тэ блаӷодарисарас и тэ цэнисарас! w20.09 23, 24, абз. 13, 14

О Иегова на бистрэл кодэлэн, ко служыяс лэсти, но парашэля када тэ терэл пэ дэсави время. Кадяжэ во на бистрэл вся кода, со вонэ терэнас важ лэстэ (Евр. 6:10). О пророко Исаия фартэ шукарнэ алавэнца ԥэндя пала кода, сар о Иегова любий пэстирэ служытелёнэн и заботийпэ пала лэндэ: «Во лэла тэ пасый пэско стадо, сар пастухо. Во екжэно лэла тэ стидэл лэ бакрорэн и тэ ԥиравэл лэн пэ пэско колин» (Ис. 40:11). Со по ди кай о Иегова, Велико Пастырё, кала ек анда лэстирэ служытеля парашэл лэсти тэ служый? Акэ, сар о Иисусо росԥэндя пала када пэстирэ учениконэнди: «Сар тумэ гиндон, если варисавэ манушэстэ авэла сто бакрэ и ек андар лэндэ хасардёлапэ, хэба на ашавэла во и девяносто девять андэ плая и на жала тэ родэл кодэлэ бакрорэс, саво хасарделяпэ? И если лэстэ вижала тэ виарақэл лэс, чаче ԥэнав тумэнди, во лэла тэ радуийпэ лэсти май фартэ, чем кодэлэ девяносто девяти, савэ на хасарделэпэ» (Матф. 18:12, 13). w20.06 19, 20, абз. 8, 9

Важ амэндэ любо дила андэ служэния лэ Иеговасти, када бари бах (Пс. 27:4; 84:10). Если о ԥрал камэл тэ терэл май бут почотно дила андэ лэ Иеговастири арӷанизацыя, када драго. Но кала лэсти дэн варисави дила, лэсти нащи тэ гиндой пала пэстэ май бут, чем трэбуй (Луки 17:7—10). Во трэбуй тэ терэл кадэя дила, важ кода кай камэл тэ поможый аврэнди, ай най важ кода, кай тэ абурой андэр пэстэ (2 Кор. 12:15). Андэ Библия пистромэ пала мануша, савэ гиндонас пала пэстэ бут. О Диотрефо на сас сэжо и камэлас тэ авэл ӷлавно андэ собрания (3 Иоан. 9). О Озия фартэ патялас андэр пэстэ, кала ля тэ терэл и дила, сави о Иегова на мэкля лэс тэ терэл (2 Лет. 26:16—21). О Авессаломо камэлас тэ ашэл царёса, и важ када притерэласпэ, кай любий лэ народос, кай вонэ тэ подритярэн лэс (2 Сам. 15:2—6). Анда кадэла случаёря дицол, кай о Иегова на любий лэ манушэн, савэ камэн тэ авэн ашунглэ (Пр. 25:27). Лэ манушэндэ, савэ фартэ абурон андэр пэстэ и савэ камэн, кай вся и время тэ авэл па лэндирятэ, авэла ԥаримос (Прит. 16:18). w20.07 4, абз. 7, 8

Дэсавэ христиански еря пэрэлаглэ андэ авэр страна, кай тэ виарақэн ҭан, кай ӷарадён, или важ кода кай тэ виарақэн пэсти бути. Если и бэяцэ андэ кадэва ери ԥирэн андэ школа, тоди, май йто всаворэстар, вонэ лэна тэ сытён пэ кодэя шыб, пэ сави дэн дума андэ кодэя страна. Лэ родителёнэнди кадяжэ трэбуй тэ сытён кодэя шыб, кай лэн тэ лэн пэ бути андэ кадэя страна. Ай со, если пашэ исин собрания чи ӷруппа, андэ сави дэн дума пэ лэндири шыб? Сави собрания лэнди тэ витидэн? Кодэя, кай и мануша дэн дума пэ лэндири шыб, чи кодэя, пэ сави дэн дума и мануша андэ кодэя страна? О хулай андо ери трэбуй тэ ришый, андэ сави собрания вонэ лэна тэ ԥирэн лэ ереса. Но во трэбуй тэ полэл, со авэла май драго именно важ лэско ери. Када кажно витидэл екжэно, ай амэнди трэбуй тэ стас патив пэ кода, со витидя о хулай андо ери и тэ авас лошалэ тэ прилас кадэлэ ерес андэ пэстири собрания (Рим. 15:7). w20.08 30, 31, абз. 17, 18

Амэ камас, кай о Иегова тэ поможый амэнди и тэ дэл зор. Тоди на трэбуй тэ гиндосарас, кай амэ аваса май куч лэсти кати важ кода, кай амэндэ лашо зор, лащи образования, бут ловэ чи важ кода катар амэ. Машкар лэ Дэвлэско народо найбут кодэлэн, ко «годявэрно андэ лэ миростирэ яқа, най кадя бут кодэлэн, ко барэ мануша и ко анда ашунглэ еря» (1 Кор. 1:26). Важ када на гиндон, кай тумэндэ на вижала тэ служын лэ Иеговасти, если тумэндэ нинай кода, пала со сас ԥэндо май упрэ. Ай фэдэр диқэн пэ када лащя ригатар. На бистрэн, тумэ най слаби, важ кода кай о Иегова дэл тумэнди зор. Можэт тумэ даран лэ манушэндар, савэ камэн, кай тумэ тэ на допатян андэ кода, со пистромэ андэ Библия. Тоди мангэнпэ лэ Иеговасти, кай о Иегова тэ дэл тумэнди смилость, кай тэ росԥэнэн лэнди, андэр со тумэ патян (Эф. 6:19, 20). Ай можэт тумэндэ проблема лэ зорэса чи лэ нервэнца, чи депрессия и через када тумари жызня ашэля фартэ ԥари. Тоди мангэн лэ Иеговас тэ дэл зор, саво трэбуй, кай тэ на парашэн тэ терэн лэсти дила. Кажно разо, кала диқэн, сар о Иегова поможый тумэнди, тумэ лэн инке май фартэ тэ патян лэсти и полэна, кай лэ Иеговастирэ зорэса тумэ можэте тэ стерэн кода, со сас най па тумаро зор. w20.07 17, абз. 9

Если амэ камас, кай лэ Дэвлэско Царство тэ авэл май важно всаворэстар андэ амари жызня, тоди амэ трэбуй, сар и о Авраамо, тэ авас ӷотови тэ отԥэндювас варисостар, кай о Иегова тэ авэл лошало (Мар. 10:28—30; Евр. 11:8—10). На гиндон, кай тумэндэ на авэла ԥаримос. Дажэ кодэлэндэ, ко вся и жызня служый лэ Иеговасти, всаек исин ԥаримос (Иак. 1:2; 1 Пет. 5:9). На бистрэн пала лашимос, саво тумэндэ авэла англэ. Кала лэла тэ правий о Царство, амэн аштярэл бут лашимос. Амэ упалэ диқаса амарэн чачен, савэ мулинэ. Андэ кодэя жэ время о Иегова дэла о лашимос лэ Авраамости, важ кода кай во ӷанэнас долӷо тэ аштярэл лэс и на холявэлас. О Иегова дэла лэсти и лэстирэ родости тэ жувэн вечно пэ ԥув. Сар дэ драго авелоп лэн тэ диқас, чаче? Тумэ диқэна вся када, если лэна тэ терэн акэ со. Пэрво, если тумэ, сар и о Авраамо, авэна ӷотови тэ отԥэндёнпэ варисостар важ лэ Дэвлэско Царство. Дуйто, если на парашэна тэ патян лэ Дэвлэсти андэ кадэя ԥари время и трито, если сытёна тэ аштярэн лэ Иеговас и тэ на холявэн (Мих. 7:7). w20.08 5, 6, абз. 13, 14; 7, абз. 17

Амэ ӷанас, если дажэ амарэ враӷоря одлэна амари жызня, о Иегова рия ла амэнди. Амэ ӷанас, кай нико и нисо нэ можэт тэ заставий амэн тэ парашас тэ служысарас лэ Иеговасти (Рим. 8:35—39). О Иегова дя алав, кай рия каринг и жызня кодэлэн, ко муля. Андэ када дицол лэстири бари мудрость! Важ када амэ на дарас, кала кодэла, ко кандэл лэ Сатанас, даравэн, кай умарэна амэн, если амэ на ласа тэ терас кода, со вонэ ԥэнэн. Када дэл амэнди зор, со бы тэ на авэл, тэ на парашас тэ кандас лэ Иеговас. Патяса ту, кай о Иегова сможэт тэ рий тут каринг и жызня, если лэстирэ вороӷоря ԥэнэна, кай камэн тэ умарэн тут? Сар тэ полэс, ӷотово ту каринг када чи най? Можно тэ пушэс пэстар: «Дицол па кода, со мэ витидав кажно дес, кай мэ патяв лэ Иеговасти?» (Луки 16:10). Инке можно тэ пушэс: «Сыкавэл кода, пэр со ужал мэрни время и мэрнэ ловэ, кай андэ мэрни жызня лэ Дэвлэско Царство пэ пэрво ҭан? И дицол па мэрни жызня, кай мэ патяв, кай о Иегова дэла манди вся, со трэбуй важ и жызня?» (Матф. 6:31—33). Если ту дэс атвето пэ кадэла вопросоря «да», када сыкавэл, кай ту ӷотово каринг любо ԥаримос (Прит. 3:5, 6). w20.08 17, 18, абз. 15, 16

Амэ трэбуй драго тэ ӷанас тэ пользуемся ла Библияса. Андэ када амэнди поможына амарэ собрании. Кадяжэ кала амэ екжэнэ сытювас па Библия и амэндэ исин ӷрафико важ када. Инке амэндэ када драго вижала, если амэ адиносарас и Библия, ай кадяжэ и литература, сави стерди пар латэ и стас зор тэ полас, со пистромэ андэ амари литература. Кала амэ када вся терас, тоди амари дружба лэ Дэвлэса ашэла май лащи. Кала амэ на промэкас тэ сытювас екжэнэ па Библия, тоди амэ сможэм тэ сытярас аврэн, кай вонэ тэ полэн, со ԥэнэнпэ андэ Библия (2 Тим. 3:16, 17). Кала амэ адиносарас о стихо анда Библия, амэ трэбуй най кати лэс тэ проадиносарас, ай инке тэ росԥэнас, сар о мануш лэс трэбуй тэ полэл и тэ прилэл каринг пэстэ (1 Тим. 4:13—15). w20.09 28, абз. 12

Амэ на бистраса, сави дила со май ӷлавно, если ласа тэ гиндосарас, сар дэ фартэ амэнди поможый о Иегова. О Иегова бут со дэл, кай амэ тэ уӷанас лэс. Када амари литература, сави кадяжэ исин пэ амаро сайто, аудио и видео, ай кадяжэ Бродкастинго. Кати погиндон, пэ амаро сайто можно тэ виарақас бут со пала Дэл и май бут чем пэ 1 000 шыба! (Матф. 24:45—47). Лэ Иисусоско примеро поможый амэнди тэ на бистрас, кай тэ росԥэнас пала Дэл фартэ важно. Во отшолас вся, со лэсти на дэлас тэ росԥэнэн о чачимос пала Дэл (Иоан. 18:37). О Иисусо на подяпэ, кала о Сатана ԥэндя лэсти, кай во тэ хулаий понад всаворэ ла люматирэ царстворя и кодэлэса, со лэндэ исин. Кадяжэ во на подяпэ, кала и мануша закамлэ тэ стерэн лэс пэстирэ царёса (Матф. 4:8, 9; Иоан. 6:15). О Иисусо на камэлас тэ розбарвадёл и во на даралас, кай лэс жэстоко ӷонина (Луки 9:58; Иоан. 8:59). Кала проверяеца, сави амэндэ вера, амэ трэбуй тэ шас сама пэ Павлостирэ алава, савэ запистромэ андо адесутно стихо. Тоди амэндэ вижала тэ на парашас тэ росԥэнас пала Дэл. w20.09 10, абз. 6, 7

Андэ собрания и ԥэя фартэ поможын. Вонэ дэн каминтарии, росԥэнэн пала Дэл, диқэн пала Зало Царства и подритярэн аврэн андэ собрания. Амэ фартэ лошалэ, кай андэ собрания исин кацавэ ԥэя. Но андэ лэндири жызня исин и ԥаримос. Пэ варикастэ тасавэл о родо важ лэндири вера. Варико диқэл пала пэстирэ родителя, савэ андэ бэршэндэ. Ай дэсавэ ԥэянди прижалпэ би хуласко тэ барярэн лэ бэятонэн и тэ терэн бут бути. Васо трэбуй тэ подритярас лэ ԥэян андэ собрания? Важ кода кай о миро на стол патив пэ жувля. Ай и Библия сытярэл па аврятэ. Дажэ о апостоло Павло, кала сас фарисеё, на столас патив пэ жувля. Ай кала во ашэля христианино, во ля тэ терэл, сар о Иисусо, и ля тэ стол пэр лэндэ патив (1 Кор. 11:1). Например, кала во пистрояс пэско письмо андо Римо, во пистросардя, кай ла ԥья, савя ақарэнас Фива, тэ прилэн драго андэ собрания и «тэ поможын лати андэ вся» (Рим. 16:1, 2). w20.09 20, абз. 1, 2

Амэ можэм тэ поможысарас лэ манушэсти, савэса изучаем и Библия, кай во тэ закамэл тэ росԥэнэн важ о Дэл. Можно тэ пушэс лэ манушэстар, сар и Библия поможысардя лэсти тэ парудёлпэ? Трэбуй и авэр тэ уӷанэн кода, со во уӷангля? Сар во можэт андэ када лэнди тэ поможый? (Прит. 3:27; Матф. 9:37, 38). На бистрэн, кай о Иисусо приԥэндя амэнди тэ поможысарас аврэнди, кай вонэ тэ терэн вся, со во лэнди приԥэндя. Кадэлэса амэ сыкавас, кай ритярас дуй само барэ законоря. Када тэ любисарас лэ Дэвлэс и лэ манушэн (Матф. 22:37—39). Васо када кадя важно? Амэ жас андэ служэния, важ кода кай любисарас лэ Иеговас и лэ манушэн. Дэсавэ мануша, савэ изучают и Библия, сар кати лэн тэ гиндон, кай жана тэ росԥэнэн пала Дэл, ужэ лэн тэ даран. Но амэ трэбуй тэ ԥэнас лэнди, кай о Иегова на ашавэла лэн и поможыя лэнди, кай вонэ по набут тэ парашэн тэ даран лэ манушэндар (Пс. 18:1—3; Прит. 29:25). w20.11 3, абз. 6—8

Кала ту ӷотовишся каринг и изучения, мангпэ пала изучающё. Манг лэ Иеговас тэ поможый тути тэ сытярэс кадя, кай лэсти тэ дожал када андо ди. На бистэр, кай ту камэс тэ поможыс лэ манушэсти тэ болдёл. Инке о изучающё трэбуй екжэно кажно дес тэ дэл дума лэ Иеговаса андэ молитва и тэ ашунэл, со во лэсти ԥэнэн. Тэ ашунэл лэ Иеговас во можэт, кала кажно дес адиной и Библия (Иис. Н. 1:8; Пс. 1:1—3). Кадяжэ старысав, кай о изучающё кажно дес тэ мангэлпэ лэ Иеговасти. Важ када англа изучения и посли латэ анда вся оди мангпэ и ԥэн андэ молитва пала изучающё. Анда тирэ молитвы во полэла, кай трэбуй тэ мангэлпэ через о Иисусо, и сытёла тэ дэл дума лэ Иеговаса анда вся оди (Матф. 6:9; Иоан. 15:16). Кати погиндосар, сар поможыя лэ манушэсти, если во лэла кажно дес тэ ашунэл лэ Дэвлэс, кала лэла тэ адиной и Библия, и лэла тэ дэл дума лэса андэ молитва! (Иак. 4:8). w20.10 8, абз. 8; 9, абз. 10, 11

Адес лэ Иеговастири арӷанизацыя кадяжэ, сар и христианоря андо пэрво вико, стол бут зор, кай андэ собрания тэ авэл мирно и порядко (Деян. 16:4, 5). Например, дажэ если амэ жаса пэ авэр собрания или дажэ ладаса андэ авэр страна, всаек пэ собрания авэна тэ прожан кода жэ, со и пэ тири собрания! Кацаво можэт тэ авэл, кати через лэ Дэвлэско свынто духо (Соф. 3:9). Пуш пэстар, ладис ту всаворэнца андэ собрания? Кандэс ту лэ старейшынонэн? Моӷут тэ дэн тути почотно дила андэ собрания и тэ патян, кай ту ла стерэса? Терэс ту вся вовремя? Поможыс ту анда вся оди аврэнди? (Иак. 3:17). Если исин андэр со тэ парудёс, трэбуй тэ мангэс кай о Иегова свынто духо. Со май фартэ лэла тэ влияет пэр тутэ о свынто духо, со май фартэ и ԥрала и ԥэя лэна тэ цэнин и тэ любин тут. w20.10 23, абз. 12, 13

Часто и мануша англа кода, сар тэ вижан анда цэр, диқэнпэ андэ юнглинда, кай варисо тэ лашарэн. Кадяжэ и Библия, сар юнглинда, поможый тэ додиқас, со трэбуй тэ лашарас. (Иак. 1:23—25) Латирэ советоря моӷут тэ поможын тэ полас, андэр со трэбуй тэ парудювас. Если кажно дес тэ адиносарас и Библия, тоди можно тэ полас, со трэбуй тэ парувас андэ пэско гиндо. Бутэ ԥралэнди и ԥэянди чалёл тэ адинон тэсараса о стихо по дес. Кадя лэнди май вушэро тэ прилэн андэ пэстири жызня и советоря анда Библия и тэ гиндон кадя, сар чалёл лэ Дэвлэсти. Инке амэнди трэбуй тэ сытювас па Библия кажно дес и тэ гиндосарас пала, со адиносардям. Тэ терэс када найԥарэс, но фартэ важно, и би кадэлэско амэ нэ сможэм тэ жас па дром, саво андярэл каринг и вечно жызня. И Библия, сар ренгенто, саво додиқэл кода, со на додиқэса лэ яқэнца. Но кай о совето анда Библия или о совето лэ ԥралэндар тэ анэн амэнди лашимос, амэнди трэбуй тэ авас най ӷорди. w20.11 18, абз. 3; 20, абз. 8

Хоть лэ христианонэн андэ пэрво вико ӷонинас, лэндэ андэ жызня сас время, кала вонэ моӷли спокойно тэ служын лэ Иеговасти. Со вонэ терэнас андэ кадэя время? Вонэ на парашэнас тэ росԥэнэн важ о Дэл. Кадэла ԥрала и ԥэя на парашэнас анда вся оди тэ служын лэ Иеговасти и тэ стонас лэс пэ пэрво ҭан. Дицол, кай о Иегова блаӷословияс лэн, кай вонэ анда оди служынас андэ кодэя спокойно время и лэн ашэлас май бут и май бут (Деян. 9:26—31). Кадяжэ и о Павло на умэкэлас и время тэ росԥэнэн пала Дэл. Во ашэляпэ андо Эфесо, кала поля, кай котэ во можэт тэ стерэл бут со андэ служэния (1 Кор. 16:8, 9). И ԥрала и ԥэя пристонас инке май бут зор, кай тэ росԥэнэн пала Дэл (Деян. 15:30—35). Андо адесутно стихо амэ адиносарас пала кода, савэ плодоря када андя. w20.09 16, абз. 6—8

Кода, кай о Адамо на кангля лэ Дэвлэс, андя бида и лэсти и всаворэ манушэнди. Через кода, кай о Адамо на кангля лэ Дэвлэс, во андя бари бида амэнди. Но блаӷодаря кодэлэсти, кай о Иегова рисардя лэ Иисусос каринг и жызня, амэндэ исин пэр со тэ надеисавас. О апостоло Павло пистросардя: «Кадя и мулэ ринапэ каринг и жызня через о мануш. Сар через о Адамо всаворэ мэрэн, кадя через о Христос всаворэ жундёна» (1 Кор. 15: 22). Со о Павло камля тэ сыкавэл, кадэлэ алавэнца: «Через о Адамо всаворэ мэрэн»? Во камля тэ ԥэнэн, кай лэ Адамостирэ потомконэнди пэрэжыля лэско бэзэх. Вонэ ашэлэ най совершэни (Рим. 5:12). Ай о Иисусо витиндя анда бэзэх лэ манушэн, савэ сас най совершэни. Хоть о Адамо сас совершэно, во всаек жыля против о Дэл. И важ када о Иегова лэ Адамос на рия каринг и жызня, сар всаворэ манушэн. Лэса авэла кода жэ, со и аврэ манушэнца, савэ жан против о Иисусо, и «лэн умарэна пэ вся и вечность» (Матф. 25:31—33, 46; Евр. 5:9). w20.12 5, 6, абз. 13, 14

Если тумэнди на дэн тэ терэн почотно дила, погиндон пала примеро, саво амэнди сыкадэ и анӷелоря, савэ на парашэн тэ кандэн лэ Иеговас. Еқвар о Иегова пушля лэндар: «Ко можэт тэ обдилярэл лэ найлашэ царёс лэ Ахавос?» О Иегова виашундя всаворэ анӷелонэн, но витидя кати еқэс и ԥэндя лэсти, кай во стерэла кадэя дила (1 Цар. 22:19—22). Авэр анӷелоря на холяйлэ пэ када. Лэндэ на сас гиндо: «Ай состэ амэнди сас тэ тратисарас скати время пэ када?». И анӷелоря на гиндон пала пэстэ бут. Важ лэндэ ӷлавно, кай вся и слава тэ дорэсэлпэ лэ Иеговасти (Суд. 13:16—18; Отк. 19:10). Сэрэн, кай важ амэндэ бари бах тэ авас лэ Иеговастирэ свидетеля и тэ росԥэнас пала лэско Царство. О Иегова цэний амэн, сави бы задания амэндэ тэ на авэл. Важ лэстэ важно, кай амэ тэ на гиндосарас пала пэстэ бут. Именно важ када амэн любий о Иегова, и ԥрала и ԥэя андэ собрания. Важ када мангэн, кай о Иегова тэ поможый тумэнди тэ на заваздэн о шэро. Сэрэн пала лэстирэ служытеля, пала савэ пистромэ андэ Библия, савэ на заваздэнас о шэро. Гиндон, сар тумэ можэте тэ терэн лашимос лэ ԥралэнди андэ собрания (1 Пет. 5:5). w20.12 25, 26, абз. 16, 17

И саструни стади, када кала гиндосарас и аштярас, сар о Дэл спасыя амэн. Амэ патяс, кай о Иегова блаӷословий всаворэн, ко кандэл лэс. И дажэ если лэско служытелё мэрэла, во рия лэс каринг и жызня (1 Фес. 5:8; 1 Тим. 4:10; Титу 1:1, 2). И саструни стади амэн фэрий, кала амэ гиндосарас и аштярас кода, кай о Дэл спасыя амэн. Например, кала амэ аштярас о лашимос англэ, када поможый амэнди тэ виритярас любо ԥаримос. Амэ, ԥэнэса, лас пэр пэстэ кадэя стади, кала старысавас тэ диқас пэ вся кадя, сар о Иегова. Например, кала надеисавас най по барвалимос, ай по Дэл (1 Тим. 6:17; Пс. 26:2; 104:34). О мечо, када лэ Дэвлэско алав и Библия. Вой поможый амэнди тэ полас со хохаимос, ай со чачимос пала Дэл. И через и Библия амэ поможысарас лэ манушэнди тэ полэн када и тэ парувэн пэстири жызня андэ лащи риг (2 Кор. 10:4, 5; 2 Тим. 3:16, 17; Евр. 4:12). Кай май драго тэ росԥэнас лэ манушэнди пала Дэл, амэнди трэбуй тэ сытювас пэ собрания, сар май драго тэ пользуемся ла Библияса и тэ проандярас лично изучения (2 Тим. 2:15). w21.03 27, абз. 4; 29, абз. 10, 11

Дажэ, кала о апостоло Иоанно бэшэлас андо баруно, во на парашэлас тэ гиндой пала авэр. Во пистросардя и книӷа Откровение и бишалдя ла лэ ԥралэнди и лэ ԥэянди, кай вонэ тэ уӷанэн пала кода, со ӥто трэбуй тэ авэл (Отк. 1:1). Файма, кала лэс одмэклэ, во пистросардя и Евангелия, андэ сави росԥэндя пала лэ Иисусостири жызня и служэния. Кай тэ подритярэл и тэ дэл зор лэ ԥралэнди и лэ ԥэянди, во кадяжэ пистросардя трин письморя. Сости амэ сытювас лэ Иоанностар? Тумари любовь каринг и мануша дицол андэ кода, пэр со май бут ужал тумари время. И люма, савяса хулаий о Сатана, сытярэл, кай вся пэско зор и время тэ отдэс кодэлэсти, кай май бут тэ затерэс или тэ ашэс ашунгло. Но лэ Дэвлэско народо па вся и люма витидэл авэр дром. Вонэ на жалуин пэско зор и время, кай тэ росԥэнэн кода, со пистромэ андэ Библия и тэ поможын лэ манушэнди тэ авэн май пашэ каринг о Иегова. w21.01 10, абз. 9, 10

О Ионафано на завидуияс лэ Давидости, хоть во, сар лэ Саулоско шаво, сас трэбуй тэ авэл царё (1 Сам. 20:31). О Ионафано на сас ӷордо. Во кандэлас лэ Иеговас и подритярэлас кода, кай о Иегова витидя лэ Давидос царёса. Ай инке, о Ионафано сас преданно лэ Давидости. Хоть через када лэско дад пэр лэстэ холявэлас (1 Сам. 20:32—34). Важ кода кай о Ионафано анда вся оди любияс лэ Давидос, во лэсти на завидуияс. О Ионафано сас лашо лучнико и воино. Пала лэстэ и пала лэско дад ԥэнэнас, кай вонэ май быстри, чем о орло, и май зоралэ, чем о лево (2 Сам. 1:22, 23). Кай о Ионафано сас, васо тэ абурой, но во на сас ӷордо и на завидуияс. Лэсти чалёлас, кай о Давидо сас смило и фартэ патялас лэ Иеговасти. Шон сама, кай о Ионафано полюбисардя лэ Давидос посли кода, кала во умардя лэ Голиафос. w21.01 21, абз. 6; 22, абз. 8, 9

Хулай пэ вся и собрания, када о Иисус Христос. И во драго терэл пэстири дила, важ кода кай во совершэно. Но кала и христианка жал миростэ, лати прижалпэ тэ кандэл найсовершэнонэ манушэс. И када тэ терэл найвушэро. Важ када, кала и христианка витидэл пала кастэ тэ жал, лати трэбуй тэ пушэл пэстар, васо вой патял, кай кадэва мануш авэла лашо хулай андо ери? Можно тэ ԥэнэс, кай и служэния лэ Иеговасти лэстэ по пэрво ҭан андэ жызня? Ай если най, тоди васо вой гиндой, кай посли ябьяв во поможыя, кай латири дружба лэ Иеговаса тэ авэл май лащи? Инке вой трэбуй тэ полэл, саво латэ характеро, и авэла вой лащи хулаи андо ери. Можно тэ ԥэнэс, кай вой на грабий тэ холявэл? Най жадно вой мануш? Лащи латэ дружба лэ Иеговаса? (Эккл. 4:9, 12). Авэла вой бахтали андо ери или най, зависит кодэлэстар, савэ ришэнии вой прилэлас жы каринг о ябьяв. Амэндэ андэ собрания бут сомнакунэ, райканэ ԥэя. И кажно андар лэндэ кандэл пэстирэ хулас. Важ када трэбуй анда вся оди тэ хвалисарас лэн. w21.02 8, 9, абз. 1, 2

Андэ послидни бэрша бут вазвещятеля стодэ цэль тэ висытён авэр шыб, кай май бут тэ служын, и пэрэжылэ андэ собрании, кай дэн дума па авэр шыб и андэ савэ трэбуй май бут ԥрала и ԥэя, савэ росԥэнэн пала Дэл. Када вонэ витидэн екжэнэ и анда када дицол, кай вонэ камэн май бут тэ терэн важ о Иегова. Хоть прожана бут бэрша англа кода, сар вонэ лэна драго тэ дэн дума пэ авэр шыб, вонэ всаек фартэ подритярэн и собрания. Лэндирэ лашэ качестворя и кода, кай вонэ драго ӷанэн тэ служын, подритярэл лэ ԥралэн и лэ ԥэян. Амэнди куч кацавэ ԥрала и ԥэя, савэ бут пэр со жан важ и служэния! Лэ ԥралэнди андо совето старейшын на трэбуй тэ гиндон, кай о ԥрал нэ можэт тэ служый старейшынаса чи служэбнонэ помошникоса, важ кода кай во инке най фартэ драго ӷанэн тэ дэл дума пэ кодэя шыб, пэ сави дэн дума андэ собрания. И старейшыноря диқэна, сжалпэ кода, сар во пэс андярэл, кодэлэса, со запистромэ андэ Библия, пала кода, сар трэбуй тэ андярэл пэс о ԥрал, кай тэ ашэл старейшынаса чи служэбнонэ помошникоса. И вонэ на лэна тэ диқэн пэ кода, ӷанэн во драго тэ дэл дума пэ кодэя шыб, пэ сави дэн дума андэ собрания, чи най (1 Тим. 3:1—10, 12, 13; Титу 1:5—9). w20.08 30, абз. 15, 16

Бут ко гиндой, кай о мануш авэла бахтало кати тоди, кала лэстэ авэла лашо зор, бут ловэ или кала андо ери авэла вся драго. Но о Иаково пистросардя, кай и чачуни радость дэл лэ Дэвлэско свынто духо и кацави радость на прожал, со бы тэ на авэл лэ манушэстэ андэ жызня (Гал. 5:22). О христианино авэла па чачимастэ бахтало, кала во полэл, кай во уӷодий лэ Дэвлэсти и терэл кадя, сар сытярэл о Иисусо (Луки 6:22, 23; Кол 1:10, 11). Кадэя радость, сави ԥабол кай о христианино андо ди, када сар фонарё. Во светий, сави бы тэ на авэл поӷода, балвал чи брышын. И яг андэр лэстэ на парашэл тэ ԥабол, важ кода кай вой андрэ тала стэкла. Кадяжэ и о христианино на парашэл тэ лошавэл, саво бы ԥаримос тэ на авэл андэ лэстири жызня. Када проблемы лэ зорэса, нинай ловэ, можэт лэстар подасанпэ или пэр лэстэ тасавэл о родо или авэр мануша, кай во патял андо Иегова. Со май бут ԥаримос андэ жызня кай о христианино, со май бари радость лэстэ авэла андо ди. И кала амэндэ исин проблемы, через кода кай амэ лэ Иеговастирэ свидетеля, када сыкавэл, кай амэ па чачимастэ лэ Иисусостирэ ученикоря (Матф. 10:22; 24:9; Иоан. 15:20). Акэ васо о Иаково пистросардя и алава, савэ адиносарас андо стихо по дес. w21.02 28, абз. 6

Кала ту диқэс библейски стихоря, савэ поможын тэ авэс спокойно и тэ патяс лэ Иеговасти, висытюв лэн наизусть. Сар када тэ терэс? Адиносар лэн вслух или випистросар и сто лэн, кай тэ авэн по видно ҭан. О Иегова приԥэндя, кай о Иисусо Навино вся и время полокэс тэ адиной и книӷа, андэ сави сас о законо. Када поможысардоп лэсти андэ вся тэ андярэл пэс мудро. Кадяжэ када поможысардоп лэсти тэ на дарал и смило тэ андярэл лэ Дэвлэстирэ народос (Иис. Н. 1:8, 9). Андэ Библия исин бут стихоря, савэ дэн зор тэ авас спокойни тоди, кала амэ пала варисо пэрэжываем чи дарас (Пс. 27:1—3; Прит. 3:25, 26). И собрания анэн амэнди бут лашимос. Амэн подритярэн и библейски речи, лэ ԥралэндирэ и лэ ԥэяндирэ каминтарии и общения лэнца (Евр. 10:24, 25). Кадяжэ можно тэ росԥэнас лэ друӷости анда собрания, пала со амэ пэрэжываем. w21.01 6, абз. 15, 16

Кала тумэ болделэ, кадя тумэ сыкадэ, кай патян лэ Иеговасти, и о Иегова приля тумэн андэ пэско ери. Но трэбуй и май англэ тэ патян лэ Иеговасти, особенно, кала прилэн варисави ришэния андэ пэстири жызня. Инке важно тэ патян лэ Иеговасти, кала витидэн варисавэ развличении, кала витидэн бути или кала камэн тэ домардён варисо андэ жызня. На надеинпэ кати пэ кода, сар тумэ полэн (Прит. 3:5, 6). Родэн советоря андэ Библия и терэн кадя, сар котэ пистромэ. Если тумэ лэна кадя тэ терэн, тоди тумэ лэна тэ радуин лэ Иеговас и затерэна патив лэ ԥралэндар и лэ ԥэяндар андэ собрания. Амэ трэбуй тэ сэрас, кай амэ всаворэ найсовершэни и можэм тэ терас ошыбки. Но через када на трэбуй тэ гиндон, кай будэр на трэбуй тэ пристон бут зор андэ служэния лэ Иеговасти. w21.03 6, 7, абз. 14, 15

Если тиро родо на дэл тути тэ служыс лэ Иеговасти, или можэт котэ, кай ту жувэс амари дила заԥандадэ, или тути на дэн спокойно тэ служыс, тоди тути поможына и алава, савэ запистромэ андэ 2 Тимофею 1:12—16 и 4:6—11, 17—22. Лэн о апостоло Павло пистросардя, кала бэшэлас андо баруно. Англа кода, сар тэ адинос кадэла стихоря, спэрва подэ дума лэ Иеговаса и росԥэн, со тутэ по ди, пала со ту пэрэжываеш. И манг, кай во тути тэ поможый тэ виарақэс андэ лэ Павлостирэ алава совето, сар пэс тэ андярэс, кала тутэ кацаво ԥаримос. О Иегова ԥэндя, кай о Павло трэбуй тэ ӷанэн, кай и мануша лэна лэс тэ вэрыцын, важ кода кай во ля тэ патял андо Иисусо (Деян. 21:11—13). О Иегова на парашэлас тэ ашунэл лэстирэ молитвы и вся и время дэлас лэсти зор (2 Тим. 4:17). Кадяжэ о Иегова ԥэндя, кай лэ Павлостэ авэла лашимос, саво о Павло кадя фартэ аштярэлас. И инке о Иегова терэлас кадя, кай лэ Павлостирэ друӷоря тэ на парашэн лэсти тэ поможын и тэ на ашавэн лэс. w21.03 18, абз. 14, 15, 19