Сентябрё

О Иегова стердя кадя, кай о Пётро набут тэ парувэл и алава андо пророчество анда книӷа Иоиль (Деян. 2:16, 17). И алава «посли кода» о Пётро парудя пэ алава «андэ послидни деса» (катэ и дума жал пала послиднё время англа кода, сар розмардэ о Иерусалимо андо 70 бэрш лэ И. Х.). О Дэл дэла пэско свынто духо «разнонэ манушэнди». Када сыкавэл, кай кадэва пророчество анда книӷа Иоиль стердяпэ кати тоди, сар прожыля най ек шэл бэрш. Посли кода, сар андэ пэрво вико о Дэл дя пэско свынто духо лэ христианонэнди, вонэ линэ тэ росԥэнэн пала лэстэ. Прожыля время и пала Иегова уӷангля вся и люма. Кала о апостоло Павло пистросардя пэско письмо важ и колоссяноря (када сас варикай андэ 61 бэрш лэ И. Х.), можно сас тэ ԥэнэн, кай лащи весть важ о Дэл «росԥэндэ всаворэнди пэ вся люма» (Кол. 1:23). Кала о Павло ԥэндя пала разни мануша, во дя дума пала мануша, савэ жувэнас андэ лэстири время. Андэ амарэ деса пала Дэл уӷанглэ фартэ бут мануша. И лащи весть росԥэнэнпэ «жы кай ла ԥувьятирэ краёря»! (Деян. 13:47). w20.04 6, 7, абз. 15, 16

О Иегова любий кажнонэс андар мэндэ, кадяжэ и кодэлэн, ко одмарделя лэ стадостар (Матф. 18:12—14). О Дэл дя алав, кай лэла тэ родэл пэстирэ бакрорэн, савэ хасарделэ, и поможыя лэнди тэ рий лащи дружба лэ Дэвлэса. Во ԥэндя, кай тэ спасый лэн, во стерэла кадя, сар стердоп о израильско пастухо, савэстэ хасарделяпэ о бакроро (Иез. 34:12—16). Спэрва о пастухо родэлас пэстирэ бакрорэс. Пэ када моӷло тэ ужал бут время и зор. Кала во лэс виарақэлас, во андярэлас лэс палпалэ андо стадо. Потом, если лэ бакрорэстэ варисо дуқалас и во мэрэлас боқатар, о пастухо диқэлас пала лэстэ, пэрэԥандэлас лэсти и рана, ԥиравэлас лэс пэ пиқэ и праварэлас. Лэ старейшынонэнди, савэ диқэн пала лэ Дэвлэско стадо, трэбуй тэ терэн кадяжэ, кай тэ поможын кодэлэнди, ко отжыля ла собраниятар (1 Пет. 5:2, 3). И старейшыноря родэн кацавэ ԥралэн и ԥэян, поможын лэнди тэ ринпэ андэ собрания и анда вся оди поможын лэнди тэ ашэн лэ Иеговастирэ друӷонэнца. w20.06 20, абз. 10

О Иисусо ԥэндя, кай о зэрно пэ маля ужэ трэбуй тэ стидэн. Камэлас о Иисусо кадэлэ алавэнца тэ ԥэнэн, кай лэстири лащи весть прилэна бут мануша? Най. Андэ Свынто Писания сас ԥэндо, кай андэр лэстэ патяна найбут мануша (Иоан. 12:37, 38). Инке, во диқэлас, со манушэстэ андо ди (Матф. 9:4). О Иисусо май бут шолас сама пэ кодэла, ко моӷ тэ патял андэр лэстэ. Но всаек во росԥэнэнас пала Дэл всаворэ манушэнди и на жалуияс о зор пэ када. Амэ най сар о Иисусо, амэ нэ можэм тэ диқас, со андо ди. Тоди, пэ скати дэ фартэ амэнди трэбуй тэ старысавас тэ на гиндосарас вэрыто пала мануша, савэ жувэн пэ амаро учаско важ и служэния чи важ варисаво ек мануш! Диқэн пэ всаворэ мануша, сар пэ ԥрала и ԥэя. Сгиндон, со о Иисусо ԥэндя пэстирэ учениконэнди. О зэрно пэ маля ужэ трэбуй тэ стидэн. Мануша, савэнди амэ росԥэнас важ о Дэл, моӷут тэ парудён и тэ ашэн лэ Иисусостирэ учениконэнца. О Иегова ԥэнэн, кай вонэ лэсти куч (Агг. 2:7). Если амэ диқас пэ мануша кадя жэ, сар о Иегова и о Иисусо, тоди амэ ласа тэ старысавас май драго тэ полас лэн и кода, со лэнди чалёл. Амэ ласа пэс тэ андярас лэнца, най сар чужонэнца, ай сар ԥралэнца и ԥэянца, савэ моӷут тэ патян амэнца андо ек Дэл. w20.04 13, абз. 18, 19

Андэ лэ Дэвлэско Алав, и Библия, ворта ԥэнэнпэ, кай трэбуй май фартэ тэ любисарас лэ Иисусос, кай о Иегова тэ авэл лошало. Ек анда возможность тэ ашас лэ Иисусостирэ друӷонэнца, када май драго тэ уӷанас лэс. Важ када адинон и книӷи, савэ пистросардэ о Матфеё, о Марко, о Лука и о Иоанно. Кала адиносарас и гиндосарас пала кода, сар драго о Иисусо обжаласпэ лэ манушэнца, тоди амэндэ андо ди авэла любовь и патив каринг лэстэ. Хоть о Иисусо сас Ӷосподино важ пэстирэ ученикоря, во на андярэлас пэс лэнца, сар рабонэнца. Во росԥэнэнас, со лэстэ по ди и пэстирэ гиндоря. О Иисусо полэлас лэндири дук и ровэлас, кала вонэ ровэнас (Иоан. 11:32—36). И дажэ лэстирэ вороӷоря полэнас, кай во сас друӷоса кодэлэнди, ко ашунэнас лэстири весть (Матф. 11:19). Кала амэ старысавас тэ андярас пэс лэ манушэнца, сар о Иисусо пэстирэ учениконэнца, тоди амэнди май вушэро лэнца тэ ладисарас. Кадяжэ андэ жызня авэла бут лош и радость. Ай кадяжэ о Иисусо ашэла амэнди инке май пашэ. w20.04 22, 24, абз. 9, 10

Каринг 1870 бэрш и Великобритания правияс май бутэ ҭанэнца, чем любо авэр страна. Латэ сас само зорали армия. Андо пророчество Даниила ԥэнэнпэ пала найбаро роӷо, саво победисардя лэ тринэн аврэн роӷонэн. Найбаро роӷо, када и Великобритания, ай трин авэр роӷоря, када и страны и Франция, и Испания и и Нидерланды (Дан. 7:7, 8). И Великобритания сас южно царё жы каринг 1917 бэрш. Андэ кодэя время и США ашэля само барвали страна пэ вся и люма. Вонэ линэ тэ терэн бут дила ла Великобританияса. Кала сас и Пэрво мирово война, и США и страна Великобритания стердэ о доӷоворо, кай тэ терэн и военно дила. Сар ԥэндя о Даниило, южно царё стидя «фартэ баро и зорало войско». Кадя, и правителя анда кадэла дуй страны, стидэ само баро и ашунгло правительство андэ люма. Кодэла времятар о Англо-Американско правительство ашэля южно царё. И кадя авэла до конца. w20.05 4, 5, абз. 7, 8

О паи на запаӷой и на испарийпэ, важ кода кай амари Ԥув находийпэ лэ Қамэстар по лашо ҭан. Тэ авэл вой хоть набут май пашэ каринг о Қам, вся о паи испарисайлоп и и ԥув авелоп, сар и пустыня, пэ сави нинай жызня. Ай тэ авелоп вой чуть май дур лэ Қамэстар, вся о паи пэр латэ запаӷосайлоп и амари ԥув авелоп вся андо лёдо. Через кода, кай о Иегова стодя амари ԥув пэ само лашо ҭан лэ Қамэстар, пэр латэ вся и время исин о паи. О Қам терэл кадя, кай о паи тэ испарийпэ па ԥув и анда океаноря и тэ стидэлпэ андэ тучи. Кадэва паи ашэлпэ упрэ варикай дэш дес, ай потом пэрэл сар брышын чи йв. Кадя о паи рийпэ упалэ андэ океаноря и андэ всаворэ пая, и кадя терэлпэ вся и время. И кода, кай о паи на кончийпэ, доԥэнэн, кай о Иегова фартэ зорало и мудро (Иов 36:27, 28). w20.05 22, абз. 6

О Иисусо ԥэнэн пэстирэ учениконэнди, тэ на парашэн тэ мангэнпэ пала свынто духо (Луки 11:9, 13). Через пэско свынто духо о Иегова дэл амэнди зор. Во дажэ можэт тэ дэл амэнди «зор, саво май баро обычнонэстар» (2 Кор. 4:7). Важ кода кай амэндэ исин свынто духо, амэ можэм тэ пэрэандярас любо ԥаримос. О свынто духо кадяжэ поможыя амэнди тэ терас и дила андэ собрания. Лэ Дэвлэско духо дэл амэнди зор тэ терас май драго кода, со ужэ ӷанас, кай май драго тэ служысарас лэ Иеговасти. Амэ полас, кай о лашимос, саво амэндэ исин андэ служэния, лэ Иеговастар, ай най кодэлэстар, кай амэндэ драго вижал тэ терас кадэя дила. Амэ можэм тэ сыкавас лэ Иеговасти пэстири блаӷодарность пала лэско свынто духо, если ласа тэ мангаспэ, кай кадэва духо тэ поможый амэнди тэ полас пэстирэ нэправильни гиндоря и кода, со камэлпэ (Пс. 139:23, 24). Кала амэ мангаспэ пала када, о Иегова пэстирэ духоса можэт тэ сыкавэл амэнди, андэр со трэбуй тэ парудювас. Потом амэ трэбуй тэ мангаспэ, кай лэ Дэвлэско духо тэ дэл амэнди зор тэ улас лэн. Кадя амэ сыкаваса лэ Иеговасти, кай терас вся, кай о Иегова тэ на парашэл тэ подритярэл амэн пэстирэ свынтонэ духоса (Эф. 4:30). w20.05 28, абз. 10—12

Кала амэ зашаспэ пала Дэл, амэ терас сар о Иисусо. О Иисусо росԥэнэнас лэ манушэнди пала пэстирэ Дадэско алав и сытярэлас, саво па чачимастэ во. И фарисеёря сытярэнас, кай о Иегова фартэ строӷо, лэсти ԥарэс тэ уӷодис, кай лэсти пэ вся всаек и кай во жэстоко. Ай о Иисусо сытярэлас, кай лэско Дад полэл лэ манушэн, на грабийпэ тэ холявэл, любящё и камэл тэ простий. И инке о Иисусо вся и время андярэлас пэс точно кадя, сар лэско Дад (Иоан. 14:9). И амэ, сар и о Иисусо, можэм тэ росԥэнас лэ манушэнди пала Иегова, кай во любящё и добро. Кадя амэ злас о хохаимос, саво ԥэнэн по Дэл. Через амарэ алава и амари дила и мануша диқэн, саво о Иегова па чачимастэ. w20.06 6, 7, абз. 17, 18

Андо интэрнэто исин лашимос. Через лэстэ можно тэ дас дума лэ родоса, лэ друӷонэнца. Но шонас тумэ сама, кай дэкала котэ и мануша вистон пэстирэ карточки и видео, кай тэ путён пэса? Здэлпэ, кай вонэ кабута ԥэнэн: «Диқэн пэр мандэ!» Ай дэко подпистрой каринг пэстирэ чи каринг аврэндирэ карточки варисо найдраго чи билажавардо. Ай када на сжалпэ кодэлэса, со пистромэ андэ Библия. Андэр латэ пистромэ, кай трэбуй тэ на заваздэн о шэро и тэ стон патив пэ авэр (1 Пет. 3:8). Кала тумэ бэшэн андо интэрнэто, пушэн пэстар: «Моӷут па мэрнэ карточки чи видео, савэ мэ вистав, чи па кода, со мэ подпистросарав каринг лэндэ, тэ гиндон, кай мэ путював? На лэна авэр манди тэ завидуин?» Лэ христианонэнди на трэбуй тэ хвалин корко пэс. Вонэ терэн, сар пистромэ андо стихо по дес. И мануша андэ кадэя люма, савяса правий о Сатана, терэн вся, кай тэ авэн май лашэ аврэндар. Амэ на аваса кацавэ, сар вонэ, если на ласа тэ гиндосарас пала пэстэ бут (1 Иоан. 2:16). w20.07 6, 7, абз. 14, 15

Англа кода, сар тэ ашэл христианиноса, о апостоло Павло сас наӷло мануш, саво ӷонияс лэ Иисусостирэ учениконэн (Деян. 7:58). Екжэно о Иисусо на домэкля лэ Павлос, савэс тоди ӷанэнас, сар Савл, тэ ӷоний лэ христианонэн. Во задя дума лэ Павлоса па нэбо и стердя кадя, кай во тэ парашэл тэ диқэл. Кай упалэ тэ диқэл, лэ Павлости прижыляпэ тэ мангэл помощь кодэлэндар, кас во ӷонияс. Во на гиндояс пала пэстэ бут и приля и помощь лэ христианиностар, савэс ақарэнас Анания. И ля упалэ тэ диқэл (Деян. 9:3—9, 17, 18). Прожыля время, и о Павло ашэля ашунглэ манушэса андэ христианско собрания. Но во никала на бистрэлас, со сас, кала лэса задя дума о Иисусо па нэбо. О Павло старыияспэ никала тэ на гиндой пала пэстэ бут. Ай кадяжэ во прилэлас и помощь, сави дэнас и ԥрала и ԥэя, и ԥэндя: «Вонэ линэ фартэ ман тэ подритярэн» (Кол. 4:10, 11). w20.07 18, 19, абз. 16, 17

Хоть кай о Иегова со май баро зор, во всаек дэсо анда пэстири дила, дэл тэ терэн аврэнди. Кадя во стодя лэ Иисусос тэ авэл Царёса андо небесно Царство и дя власть лэ муршэнди и лэ жувлянди, савэн 144 000 и савэ лэна тэ правин лэса. Канешно, англа кода, сар о Иегова тэ стол лэ Иисусос Царёса и Пэрвосвященикоса, во лэс сытярэлас (Евр. 5:8, 9). Кадяжэ во сытярэл кодэлэн, ко лэла тэ правий лэса, но во на лэла тэ следий пала кажно лэнго шаго. О Иегова патял, кай вонэ стерэна вся, сар во када аштярэл (Отк. 5:10). Если амаро небесно Дад, савэсти на трэбуй никастири помощь, дэл аврэнди тэ терэн дэсо анда пэстири дила, тоди, канешно, и амэнди трэбуй кадя тэ терас. О хулай андо ери и старейшыноря терэн сар о Иегова, кала дэн аврэнди тэ терэн дэсо анда пэстири дила. Ай кадяжэ вонэ старыинпэ тэ на следин пала кажно лэнго шаго. Блаӷодаря кадэлэсти най кати вся и дила авэла стерди, ай инке можно тэ сытярэс аврэн тэ терэн варисо нэво. Када поможыя лэнди тэ патян, кай лэндэ вижала тэ стерэн кадэя дила (Ис. 41:10). w20.08 9, 10, абз. 5, 6

Сар амэ трэбуй тэ диқас пэ Иеговастирэ бакрорэ, савэ хасарделэпэ? Со амэндар аштярэл о Дэл? Подам дума пала кода, сар андярэлас пэс о Иисусо. Во ӷанэнас, кай важ о Иегова куч всаворэ лэстирэ бакрорэ. Важ када во терэлас вся, кай «кодэла бакрорэ андэ израильско народо, савэ хасарделэпэ», тэ ринпэ каринг о Дэл (Матф. 15:24). Сар лашо пастухо, о Иисусо столас вся пэско зор, кай тэ на хасардёлпэ ни ек лэ Иеговаско бакроро (Иоан. 6:39; 10:11). О апостоло Павло ԥэндя, кай и старейшыноря анда эфесско собрания, терэнас кадя сар о Иисусо: «Тумэ трэбуй тэ дэн зор кодэлэнди, касти во трэбуй и тэ сэрэн лэ Ӷосподостирэ лэ Иисусостирэ алава: „Май бари бах, кала дас, чем кала лас“» (Деян. 20:17, 35). Сар дицол анда кадэла алава, кай и старейшыноря исин особо дила, када тэ заботинпэ пала лэ Иеговаско народо. Акэ со ԥэнэн ек старейшына анда Испания, савэс ақарэн Сальвадоро: «Кала мэ гиндосарав, сар о Иегова любий пэстирэ бакрорэн, савэ хасарделэпэ, манди камэлпэ тэ стерав вся, со па мэрно зор, кай тэ поможысарав лэнди. Мэ патяв, о Иегова камэл, кай мэ тэ заботисавав пала кодэла, ко лэстар отжыля». w20.06 23, абз. 15, 16

О Иегова лэла тэ аштярэл и время, кала амэ ашаса совершэни. Када авэла, кала лэла тэ кончийпэ лэ Иисусостири Тысячелетнё правления. Ай жы каринг кодэя время во камэл тэ простий амэнди амарэ ӷрехоря. Трэбуй тэ терас, сар о Иегова, тэ шас сама, со исин лашо андэ мануша и тэ на холявас пэр лэндэ. О Иисусо и анӷелоря фартэ радуинаспэ, кала и ԥув сас создано. Но погиндон, савэ вонэ авэна лошалэ тэ додиқэн и ԥув, пэ сави жувэн ек и совершэни мануша, савэ любин лэ Иеговас и савэ лошалэ, кай лэсти служын. Ай савэ лошалэ авэна кодэла, ко правия вмести лэ Иисусоса, кала диқэна, скати лашимос анэн всаворэ манушэнди кода, со вонэ терэн (Откр. 4:4, 9—11; 5:9, 10). Сави дэ райкани авэла тоди жызня, кала и мануша лэна тэ ровэн кати ла радостятар, ай о насвалимос, биды и смэрть будэр никала на авэна. Ай акана трэбуй тэ сытювас кай амаро небесно Дад, саво любящё, мудро и ӷанэн тэ аштярэл. Тоди, саво бы ԥаримос амэндэ тэ на авэл, амэ на парашаса тэ лошавас (Иак. 1:2—4). Амэ фартэ блаӷодарни лэ Иеговасти, кай авэла кацави время, кала кодэла, ко мулинэ, лэна упалэ тэ жувэн! (Деян. 24:15). w20.08 19, абз. 18, 19

И Библия, када кучутно подарко амарэ небеснонэ Дадэстар. Во дя кадэя книӷа амэнди, важ кода кай фартэ амэн любий. Котэ во дэл атветоря пэ сами важни вопросоря андэ амари жызня. Катар ляпэ и жызня? Васо амэ жувас? Со аштярэл амэн англэ? О Иегова камэл, кай всаворэ лэстирэ бэяцэ тэ уӷанэн и атветоря пэ кадэла вопросоря. Важ када во терэлас кадя, кай и мануша, савэ жувэнас дэлмут, тэ камэн тэ пэрэандярэн и Библия пэ бут шыба. Адес вся и Библия чи дэсо андар латэ можно тэ адинос май бут чем пэ 3 000 шыба! Пала вся и время, скати жувэн и мануша, кати и Библия пэрэандярдэ пэ фартэ бут шыба и кати вой исин почти кажнонэстэ. Амэ можэм тэ сыкавас, кай амэ блаӷодарни лэ Иеговасти пала Библия, если кажно дес адиносарас ла, гиндосарас пала кода, сости амэ сытювас андар латэ, и если ласа тэ старысавас тэ терас кадя, сар уӷанас. Инке амэ сыкавас, кай блаӷодарни лэ Дэвлэсти, кала на умэкас и возможность тэ росԥэнас и весть анда Библия аврэ манушэнди (Пс. 1:1—3; Матф. 28:19, 20). w20.05 24, 25, абз. 15, 16

Амэ бут сости можэм тэ сытювас кай о пророко Иеремия. О Иегова ԥэндя лэсти тэ росԥэнэн пала лэстэ лэ манушэнди, савэ подасанаспэ лэстар и ԥэнэнас пэр лэстэ найлашэ алава. О Иеремия камля тэ парашэл тэ росԥэнэн важ лэстэ, но во нэ моӷ тэ ашэл мулком. Лэстэ сар яг ԥаболас оди андэ служэния лэ Дэвлэсти, во нэ моӷ тэ ашэл мулком (Иер. 20:9). Кадяжэ, если амэндэ авэла андо ди лэ Дэвлэско чачимос, амэ нэ сможэм тэ ашас мулком. Важ када амэнди трэбуй кажно дес тэ адиносарас и Библия и тэ гиндосарас, со котэ пистромэ. Кадя амэ аваса лошалэ и амэн андэ служэния лэна тэ ашунэн май бут мануша (Иер. 15:16). Важ када трэбуй тэ мангас лэ Иеговас, кай тэ поможый амэнди. Во поможыя правильно тэ диқас пэр пэстэ, кала терас ошыбки и кала амэндэ найлашо зор. Ай кадяжэ кала умэкэнпэ и вас, важ кода кай амэнди на дэн тэ терас почотно дила андэ лэ Иеговастири арӷанизацыя, или кала и мануша на ашунэн амэн андэ служэния. И пала вся, пала со пэрэжываем, можэм тэ росԥэнас амарэ небеснонэ Дадэсти лэ Иеговасти. Во поможыя тэ улас о ԥаримос анда оди! w20.12 27, абз. 20, 21

Дэсавэ ԥэянца амэ диқаспэ кати андо Зало Царства. Важ када, кала амэ лэн котэ диқас, амэ трэбуй тэ шас сама лэн, анда вся оди тэ пушас лэндар, сар вонэ, сар лэндэ и дила, и тэ подас дума лэнца. О Иисусо витидэлас время, кай тэ подэл дума и тэ виашунэл лэ жувлян, савэ кандэнас лэс (Луки 10:38—42). Во полэлас, кай дэсавэнди ԥарэс кодэлэстар, кай вонэ екжэнэ. Но во ԥэндя, кай о мануш можэт тэ авэл бахтало, дажэ кала во найжэнато чи наймиростэ или, кала лэстэ нинай ери (Луки 11:27, 28). О мануш авэла па чачимастэ бахтало кати тоди, кала и служэния лэ Иеговасти авэла лэстэ пэ пэрво ҭан (Матф. 19:12). Амэ тожэ трэбуй тэ сытювас кай о Иисусо. Амэ можэм тэ ақарас лэ ԥэян анда собрания пэстэ цэрэ, кай тэ побэшас лэнца, тэ хас и тэ подас дума. Но кала дас дума, трэбуй тэ следисарас, кай посли амарэ алава тэ авэл лэндэ драго по ди (Рим. 1:11, 12). Кадяжэ и старейшыноря трэбуй тэ диқэн пэ ԥэя, савэ наймиростэ, сар о Иисусо. Вонэ трэбуй тэ андярэн пэс ла ԥьяса андэ собрания кадяжэ, сар пэстиря чаче ԥьяса чи сар пэстиря даса. Вонэ моӷут тэ витидэн время англа кода, сар залэлпэ и собрания или посли собрания, кай тэ подэн дума ла ԥьяса. w20.09 21, абз. 7—9

Андо Израилё о мануш сеияс и семена осенью, кала прожанас и пэрви брышында, ай сар прожанас и послидни брышында, во стидэлас о уражаё (Мар. 4:28). Амэнди кадяжэ трэбуй тэ ӷанас тэ аштярас, сар и аштярэлас кадэва мануш, но када можэт тэ авэл найвушэро. Найсовершэни мануша сразу камэн тэ диқэн, со вижыля анда кода, со вонэ стердэ. Но кай тэ авэл уражаё, трэбуй кай о мануш тэ на парашэл тэ диқэл пала кода, со камэл тэ посадий. Спэрва, во трэбуй тэ пэрэӷанавэл и ԥув, потом тэ посадий, и тэ на бистрэл тэ шол паи и тэ вишынэл и чар. Кадяжэ и амэ, кала сытярас лэ манушэн па Библия, трэбуй вся и время тэ стас зор. Амэ нэ можэм тэ застависарас лэ манушэс, савэс сытярас па Библия, кай во май фартэ тэ патял лэ Дэвлэсти. Инке, кадэва мануш можэт найдраго тэ гиндой пала авэр или лэсти можэт тэ авэл всаек пэ вся. Кацавэ гиндоря шонпэ пэ бурьяноря, савэ во трэбуй тэ вишынэл ку корнё анда оди. И пэ када трэбуй время. Дэкала дажэ лэ Иисусостирэ ученикоря най сразу полэнас, сости во лэн сытярэлас (Иоан. 14:9). Если амэ ӷанас тэ аштярас, кала росԥэнас пала Дэл, амэ на ласа тэ холявас, кала и мануша на ашунэн амэн. Но и дажэ тоди, кала амэн камэн тэ ашунэн, амэ всаек трэбуй тэ аштярас. Ласа тэ сэрас, кай амэ кати садисарас и шас паи, но барярэл о Дэл (1 Кор. 3:6). w20.09 11, 12, абз. 10, 11

Важно, кай о изучающё тэ ԥирэл пэ собрании. Би кадэлэско во нэ сможэт тэ болдёл. Кала о мануш ԥирэл пэ собрания, лэсти дружба лэ Дэвлэса ашэл май лащи. Дэсавэ ԥрала и ԥэя росԥэнэн лэ манушэнди, каса вонэ изучают, кай пэ собрания вонэ смоӷут тэ уӷанэн май бут, чем пэ изучения. Вмести шон сама по стихо анда Евреям 10:24, 25 и сыкав, саво лашимос лэсти анэна и собрании. Анда оди росԥэн лэсти, со най дэлмут сас пэ собрания, и можэт через када лэсти авэла май интересно, чем кала ту просто ақарэса лэс пэ собрания. Можэт кода, со во диқэла и ашунэла пэрво разо, поможыя лэсти тэ полэл, кай када на шолпэ пэ қандири, андэ сави во варикала ԥирэлас (1 Кор. 14:24, 25). Пэ собрания во сможэт тэ уӷанэн манушэн, савэндар можэт тэ сытёл и савэ поможына лэсти май фартэ тэ дружый лэ Дэвлэса и тэ болдёл. w20.10 10, 11, абз. 14, 15

О свынто духо поможыя тути тэ терэс кадя, сар уӷанэс анда Библия. Трэбуй тэ мангэспэ сар о псалмопевцо, саво ԥэндя: «Сытяр ман, Иегова, па тиро дром. Мэ жувава па тиро чачимос. Поможысар манди всаворэ одеса тэ дарав тутар» (Пс. 86:11). Трэбуй тэ на парашэс тэ адинос и май драго тэ полэс и Библия, ай кадяжэ и литература, сави дэл лэ Иеговастири арӷанизацыя. Но тути трэбуй най просто май бут тэ уӷанэс, ай трэбуй всаворэ одеса тэ патяс, кай кода, со запистромэ андэ Библия, чачимос и тэ терэс кадя, сар уӷанэс. Андэ када тути поможыя лэ Иеговаско свынто духо. Инке важно тэ подритярэс лэ ԥралэн и ԥэян андэ собрания (Евр. 10:24, 25). Важ кода кай вонэ тиро ери, савэса ту служыс еқэ Дэвлэсти лэ Иеговасти. Кадяжэ ту трэбуй тэ мангэспэ, кай о Иегова тэ дэл тути пэско свынто духо, кай анда вся оди тэ дэс каминтарии и драго тэ ӷотовишся каринг пэстирэ задании. Кадя сыкавэса лэ Иеговасти и лэстирэ Шавэсти, кай ту любис лэстирэ служытелёнэн, савэ лэсти фартэ куч (Иоан. 21:15—17). Важ када трэбуй тэ кандэс лэ Иеговас и тэ прилэс вся, со дэл лэстири арӷанизацыя. w20.10 24, абз. 15—17

Кала о Иисусо ужэ трэбуй сас тэ парашэл тэ служый пэ ԥув, и лэс трэбуй сас тэ умарэн, тоди и апостолоря мэклэ лэс и занашлэ. Холяйля о Иисусо пэр лэндэ? Посли кода, сар во рисайля каринг и жызня, во ԥэндя дэсавэ жувлянди, савэ сас лэстирэ ученицы: «На даран! Жан, ԥэнэн мэрнэ ԥралэнди, кай вонэ тэ жан андэ Галилея. Котэ вонэ диқэна ман» (Матф. 28:10). Хоть и апостолоря лэс и ашадэ, во всаек ԥэнэнас, кай вонэ лэстирэ ԥрала, и на парашэлас лэнди тэ патял. Сар и лэско Дад, о Иисусо сас ӷотово тэ простий и тэ жалуий лэн анда вся оди (2 Цар. 13:23). Амэ кадяжэ, сар и о Иисусо, жалуисарас амарэ ԥралэн и ԥэян, савэ парашэлэ тэ росԥэнэн пала Иегова. Амэ пэрэжываем пала лэндэ. Вонэ амарэ ԥрала и ԥэя, и амэ лэн фартэ любисарас! Амэ сэрас, сар вонэ росԥэнэнас пала Дэл анда вся оди. Дэко бэршэнца служыяс лэ Дэвлэсти (Евр. 6:10). Амэ фартэ пала лэндэ скучисарас! (Луки 15:4—7). Амэ тожэ можэм тэ ақарас амарэ ԥралэн и ԥэян, савэ ашэлэ неактивни, пэ собрания. Если андо Зало Царства авэн и ԥрала или и ԥэя, савэ ашэлэ неактивни, амэ можэм екжэнэ анда вся оди тэ пашувас каринг лэндэ. w20.11 6, абз. 14—17

О Иаково, о Иоанно и лэндири дэй манглэ лэ Иисусос тэ стерэл кода, со лэсти нащи сас тэ терэл. О Иисусо долӷо на гиндосардя и ԥэндя, кай, ко авэла андо небесно Царство пэ право риг лэстар, ай ко пэ лево, можэт тэ ришый кати лэско Дад (Матф. 20:20—23). Кадя о Иисусо сыкадя, кай полэл, кай лэсти най вся можно тэ терэл. Во на гиндояс пала пэстэ бут и никала на терэлас кода, со о Иегова лэсти на дэлас (Иоан. 12:49). Сар амэ можэм тэ сытювас кай о Иисусо? Амэ шаспэ по Иисусо, саво на заваздэлас о шэро, кала терас, сар пистромэ андо адесутно стихо. Важ када, кала амэндар мангэн тэ подԥэнас варисо, амэ на камас тэ дас совето пэстар и на камас тэ грабисавас тэ ԥэнас пэрво, со дэл андо шэро. Вместо када амэнди трэбуй тэ шас сама пэ советоря анда Библия и анда амари литература. Кадя амэ сыкаваса, кай на гиндосарас пала пэстэ бут и нэ можэм тэ ӷанас и атветоря пэ всаворэ вопросоря. Ай кадяжэ сыкаваса, кай лэ Дэвлэстирэ советоря всегда май лашэ, чем амарэ (Отк. 15:3, 4). w20.08 11, 12, абз. 14, 15

Пала со тути трэбуй тэ погиндос, если камэс тэ ԥэнэс лэ друӷости, кай во терэл варисо нэправильно? Спэрва трэбуй тэ пушэс пэстар акэ со. На вистос ту пэс фартэ годявэрнэса? Кацаво мануш, саво гиндой, кай во фартэ годявэрно, ԥэнэн кати пэстирэ советоря, ай най па Библия. Во на полэл аврэн. Но если ту диқэс, кай трэбуй тэ подэс дума, тоди ԥэн лэ друӷости, со во терэл най кадя, и пуш лэстар, со во гиндой пала када. Када можэт тэ поможый лэсти тэ полэл, со во терэл най кадя. Дик, кай тирэ советоря тэ авэн па Библия, и на бистэр, кай тиро друӷо дэла отчото англа Дэл, ай най англа тутэ (Рим. 14:10). На гиндосар, кай ту вся полэс правильно, ай фэдэр дик, со ԥэнэнпэ андэ Библия, и сытюв лэ Иисусостар, саво полэлас лэ манушэн (Прит. 3:5; Матф. 12:20). Када фартэ важно, важ кода кай о Иегова тут полэла кадяжэ, сар ту полэс лэ манушэн (Иак. 2:13). w20.11 21, абз. 13

Чалелоп тумэнди, если бы пала тумэндэ тэ гиндон кати па кода, савэ тумэ па муй, савэ тумэ пэса чи па кода, калэ тумэ чи парнэ? Файма, на чалелоп. Сар дэ драго, кай о Иегова на сындой амэн па кода, савэ амэ пар пэстэ! Например, кала о Самуило диқэлас пэ Иессеёстирэ шавэ, во на додиқля кода, со додиқля о Иегова. О Дэл ԥэндя лэ Самуилости, кай ек анда лэ Иессеёстирэ шавэ авэла царё андо Израилё. Но ко када авэла? Кала о Самуило додиқля лэ Елиавос, лэ Иессеёстирэ барэдэрэс шавэс, во погиндосардя: «Када и исин кодэва, кас витидя о Иегова». О Самуило погиндосардя, кай о Дэл стола лэ Елиавос царёса, важ кода кай во сас шукарно мурш. Но о Иегова ԥэндя лэ Самуилости: «На дик пэ кода, саво во пар пэстэ и кай во вучо, важ кода кай мэ на витидэм лэс». Сости када сытярэл амэн? О Иегова ԥэндя: «О мануш диқэл кода, со диқэн и яқа, ай о Иегова диқэл оди» (1 Сам. 16:1, 6, 7). Амэ трэбуй тэ обжаспэ амарэ ԥралэнца и ԥэянца кадя жэ, сар о Дэл. w20.04 14, абз. 1; 15, абз. 3

О Иисусо жалас паша зэлэ́ни маля, пэ савэ барёлас, файма, о ячменё (Иоан. 4:3—6). Инке варикай штар шон ашэласпэ, кай тэ стидэн о зэрно. Важ када ученикоря удивисайлэ, кала о Иисусо ԥэндя кацавэ алава: «Ваздэн яқа и обдиқэн и маля. Вонэ парнелэ, кай тэ стидэн о зэрно» (Иоан. 4:35, 36). Со о Иисусо камля тэ ԥэнэн кадэлэ алавэнца? О Иисусо дэлас дума най пала зэрно, ай пала мануша. Сгиндосарам, со сас дэ май англал. О Иисусо росԥэнэнас важ о Дэл ла самаритянкати и вой патяя лэсти, хоть андэ кодэя время и иудеёря обнашэнас лэ самаритянонэн. Кала о Иисусо росԥэнэнас, кай и маля «парнелэ, кай тэ стидэн о зэрно», и самаритяноря, савэ ашундэ пала лэстэ кодэла жувлятар, прастае каринг лэстэ, кай тэ уӷанэн май бут (Иоан. 4:9, 39—42). Ек учоно, саво полэл и Библия, ԥэндя: «Кода, кай и мануша прастае каринг о Иисусо, сыкавэл, кай вонэ сас, сар о зэрно, саво ужэ вибареля и лэс трэбуй тэ стидэн». w20.04 8, абз. 1, 2

Пэ собрания амэ сытювас, сар май драго тэ пользуемся всаворэса, со дэл амари арӷанизацыя важ и служэния. Важ када трэбуй инке май драго тэ ӷотовимся каринг амарэ собрании, драго тэ ашунас, со котэ ԥэнэнпэ, ай тоди тэ прилас вся када андэ пэстири жызня. Если амэ ласа кадя тэ терас, тоди кажно андар мэндэ авэла «лашо воино кай о Иисус Христос» (2 Тим. 2:3). Инке амэн подритярэн милионоря анӷелоря. Погиндон, скати зор еқэ анӷелостэ (Ис. 37:36). Если ек кацаво дэ зорало, тоди со моӷут тэ стерэн милионоря анӷелоря? Када сыкавэл, кай нисаво мануш, ни и найвужэ нэ смоӷут тэ авэн май зоралэ лэ Иеговастар и лэстирэ анӷелонэндар. Ай если во амэнца, тоди амэнди най состар тэ дарас лэ вороӷонэндар, скати лэн тэ на авэл (Суд. 6:16). На бистрэн пала када, кала камэн тэ шон дар андэр тумэндэ пэ бути, андэ школа или о родо, саво на служый лэ Иеговасти. Сэрэн, кай тумэ най екжэнэ! Если тумэ кандэна лэ Иеговас, тоди во авэла пэ тумари риг. w21.03 29, 30, абз. 13, 14

Можэт, о апостоло Павло ԥэндя лэнди и алава анда Исаия 22:13. Котэ ԥэнэнпэ, савэ гиндоря сас кай и израильтяноря. Вонэ камэнас кати ек, када тэ жувэн кадя, сар лэнди чалёл. Можно тэ ԥэнэс, кай вонэ гиндонас, кай жувэн кати еқвар андэ жызня. Важ кода лэндири дружба лэ Дэвлэса отжыля лэндэ по дуйто ҭан. Кацавэ жэ гиндоря и адес кай и мануша. Амэ патяс, кай о Иегова рия каринг и жызня лэ манушэн. Када трэбуй тэ дицол дажэ тоди, кала амэ витидас пэсти друӷонэн. И ԥрала и ԥэя анда Коринфо линэ тэ дружын кацавэ манушэнца, савэ на патянас, кай и мануша ринапэ каринг и жызня. Вонэ жувэнас еқэ десэса и на загиндонаспэ, со авэла англэ. Адес амэнди тожэ на трэбуй тэ дружысарас кацавэ манушэнца, савэ жувэн кати важ пэстэ и на гиндон пала кода, со авэла англэ. Через кацавэ мануша амаро гиндо можэт тэ парудёл. Кадяжэ вонэ моӷут тэ парувэн амарэ лашэ привычки и дажэ тэ стерэн кадя, кай амэ тэ стерас бэзэх англа Иегова. Важ када о Павло ԥэндясас лэ ԥралэнди и лэ ԥэянди: «Загиндонпэ и терэн правильно и будэр на терэн бэзэх» (1 Кор. 15:33, 34). w20.12 9, абз. 3, 5, 6

Андэ кадэва стихо росԥэнэнпэ, ко кас трэбуй тэ кандэл андэ лэ Дэвлэско ери, саво исин по нэбо и пэ ԥув. О Иегова хулай пэ вся, и лэстэ пэ вся исин власть. Лэс кандэн всаворэ лэстирэ бэяцэ по нэбо и пэ ԥув (Рим. 14:10; Эф. 3:14, 15). Но о Дэл дя и лэ Иисусости власть, кай во тэ диқэл пала собрании. И о Иисусо полэл, кай пала када во дэла отчёто англа Иегова (1 Кор. 15:27). Кадяжэ о Иегова дя власть лэ хуласти андо ери. Саво жэ трэбуй тэ авэл о хулай андо ери? О хулай драго диқэла пала ери, если полэла, со лэстар аштярэл о Иегова. Ай инке лэсти важно тэ полэл, васо о Иегова стодя, кай во тэ авэл хулай по ери, и сости во можэт тэ сытёл кай о Иегова и кай о Иисусо. Васо важ о мурш када важно тэ полэл? Важ кода кай о Иегова дя, кай о мурш тэ хулаий андо пэско ери и во аштярэл, кай о хулай лэла када тэ терэл правильно (Луки 12:48б). w21.02 2, абз. 1—3

Исин кода, со амэнди фэдэр тэ забистрас. Кадэлэсти амэ можэм тэ сытювас кай о Иегова. Хоть во можэт вся тэ сэрэл, но если во диқэл, кай амэ каисавас, тоди во простисарэл амэн и бистрэл амарэ ошыбки (Пс. 25:7; 130:3, 4). Во камэл, кай и амэ тэ простисарас кодэлэн, ко амэн холярэл, и тэ на сэрас кода, со вонэ най кадя стердэ (Матф. 6:14; Луки 17:3, 4). Кай тэ сыкавас, кай амэ блаӷодарни лэ Иеговасти пала амари годи, амэ трэбуй тэ пользуемся ласа кадя, кай тэ слависарас кодэлэс, ко ла амэнди дя. Дэко пользуеца ласа кати важ пэстэ. Вонэ екжэнэ ришают, со драго, ай со най. Но амэн создал о Иегова. Важ када во пэ бутэстэ май драго ӷанэн, со важ амэндэ авэла драго, ай со най (Рим. 12:1, 2). Кала амэ кандас лэс, амэнди по ди драго (Ис. 48:18). И амэ полас, васо жувас. Амэ жувас, важ кода кай тэ прославляем амарэ небеснонэ Дадэс и Создателёс, и кай тэ терас вся, кай во амэнца тэ абурой (Прит. 27:11). w20.05 23, 24, абз. 13, 14

Со поможыя амэнди ковлэс тэ обжаспэ лэ ԥралэнца и лэ ԥэянца андэ собрания? Амэ фэдэр лэн поласа и ковлэс лэнца ласа тэ обжаспэ, если лэн май драго уӷанаса. И кадэлэсти на трэбуй тэ мишает кода, скати лэнди бэрш и сави лэндэ нацыя. Сэрэн, о Ионафано сас барэдэр лэ Давидостар пэ 30 бэрш. Но вонэ всаек сас лашэ друӷоря. Ай тумэ можэте тэ авэн друӷоря андэ собрания кодэлэнди, ко май ԥуро или май тэрно тумэндар? Кадя амэ можэм тэ сыкавас, кай любисарас всаворэ ԥралэн (1 Пет. 2:17). Всаворэ андэ собрания моӷут тэ авэн амэнди пашутнэ друӷоря? Най. Нинай нисо андэ кода, кай амэ май бут время проандярас кодэлэнца, каса амэндэ исин варисо общё. Например, о Иисусо ԥэнэнас, кай всаворэ апостолоря лэсти друӷоря, но о Иоанно лэсти сас май куч (Иоан. 13:23; 15:15; 20:2). Но када на сыкавэл, кай во сас лэско любимчико (Мар. 10:35—40). w21.01 23, 24, абз. 12, 13

Кала о апостоло Павло сас андэ Афины, во дэлас дума лэ манушэнца анда авэр народоря най кадя, сар лэ иудеёнэнца андэ синагога. О Павло шутя сама, сар вонэ присытелэ тэ тэлён лэ Дэвлэсти (Деян. 17:22). Потом во старыияспэ тэ виарақэл варисо, соса шолпэ кода, сар вонэ тэлёнас и сар тэлён лэ чачунэ Дэвлэсти. О Павло камэлас тэ терэл вся, кай о чачимос пала Дэл тэ дожал каринг оди. Во ԥэндя, кай лэстири весть лэ «Дэвлэстар, савэс нико на диқля», и кай афиняноря лэсти и тэлён. Хоть и о миро анда авэр народоря на ӷанэнас и Свынто Писания, о Павло на гиндояс, кай вонэ на ашунэна пала Дэл. Во диқэлас, кай вонэ шонпэ по спило зэрно, саво трэбуй тэ стидэн. О Павло парудя о гиндо и закамля тэ росԥэнэн важ о Дэл кадя, кай вонэ тэ полэн. Сар и о Павло, шон сама пэ кода, сар жувэл о миро. Полэн, андэр со патял о миро по тумаро учаско важ и служэния. Саво кай о мануш цэр чи вурали? Со можно тэ полас пэ лэско алав, пэ кода, сар во утидэлпэ, со за причоска кай о мануш, савэ алава во ԥэнэн. Можно па вся када тэ полас, савэ дэвлэсти во патял? w20.04 9, 10, абз. 7, 8