Марто

Ко кадэла бакрорэ андэ притча, сави запистромэ андэ Матфеё 25:31—36? Када праведни мануша, савэ жувэн андэ послидни деса и надеинпэ вечно тэ жувэн пэ ԥув, то есть када «авэр бакрорэ». Кадэла мануша предано подритярэн лэ памазаниконэн. Сар? Вонэ дэн лэнди зор па вся и ԥув тэ росԥэнэн «и лащи новость пала Царство» и тэ поможын лэ манушэнди тэ ашэн ученикоря (Матф. 24:14; 28:19, 20). Кажно бэрш дэсавэ курте англа Вечеря «авэр бакрорэ» поможын лэ Христостирэ ԥралэнди. Вонэ участвуют андэ кампания и ақарэн всаворэн пэ кадэя важно события. Кадяжэ вонэ терэн вся, со трэбуй, кай и Вечеря тэ прожал андэ кажно собрания. «Авэр бакрорэ» всаворэ одеса поможын лэ Христостирэ ԥралэнди андэ кадэя дила. Вонэ на бистрэн лэ Иисусостирэ алава: «Кода, кай тумэ стердэ када важ ек анда мэрнэ цынёне ԥрала, тумэ стердэ и важ мандэ» (Матф. 25:37—40). w22.01 22, абз. 11, 12

Амэ можэм тэ сытювас лэ Иисусостар, сар пэс тэ андярас аврэнца. Лэ Иисусости ашэля фартэ жалко лэ манушэс, савэстэ тернёлас и тила и савэс во виличисардя. Авэр разо во поля, со сас по ди кай и манушни, савятэ сас ԥаро насвалимос бут бэрша. Инке во полэлас и жалуияс кодэлэн, ко хасардя пэстирэ чачен. Если амэ сытюваса лэ Иисусостар, тоди амэ ласа тэ терас кадяжэ, сар тердоп о Иегова (Мар. 1:40, 41; 5:25—34; Иоан. 11:33—35). Тоди амари дружба лэ Иеговаса авэла инке май лащи. Если амэ терас, сар о Иисусо, тоди на домэкаса, кай через кода, со исин андэ кадэя люма, амэ тэ стас и служэния лэ Иеговасти по дуйто ҭан. Андэ послиднё вэчэро англа пэстири смэрть о Иисусо ԥэндя: «Мэ победисардэм кадэя люма» (Иоан. 16:33). Со во кадэлэса камля тэ ԥэнэн? Во авеля тэ злэл о хохаимос, саво ԥэнэн по Иегова. И важ када во никала на бистрэлас, васо авеля пэ ԥув. Важ о Иисусо о Иегова сас вся и время по пэрво ҭан. Лэс на змарэлас кода, сар андярэн пэс авэр мануша, сар вонэ гиндон, и со камэн тэ домардён андэ жызня. Ай со можно тэ ԥэнас пала амэндэ? Амэн бут со можэт тэ змарэл андэ кадэя люма, кай и служэния лэ Иеговасти тэ на авэл по пэрво ҭан. Но если важ амэндэ, сар важ о Иисусо, ӷлавно тэ терас кода, со камэл о Дэл, тоди и амэ сможэм тэ победисарас кадэя люма (1 Иоан. 5:5). w21.04 3, 4, абз. 7, 8

О апостало Павло сэрэлас пала лэ Иисусостирэ алава, кай «о Дэл кадя фартэ любий лэ мирос, кай отдя пэстирэ Шавэс, саво лэстэ ек кацаво, кай кажно, ко сыкавэл, кай патял андэр лэстэ... тэ жувэл вечно» (Иоан. 3:16; Рим. 6:23). Чаче, о Павло фартэ патялас лэ Дэвлэсти. Во ӷанэнас, кай о Иегова камэл тэ простий дажэ кодэлэн, ко стердя баро бэзэх, но потом каийпэ (Пс. 86:5). О Павло патялас, кай о Иегова фартэ любий лэ мирос, важ кода и отдя пэстирэ Шавэс андэ жэртва. Шон сама, андэ Галатам 2:20 о Павло пистрой и алава, савэндар ашэл май вушэро по ди: «[Лэ Дэвлэско Шаво] сыкадя пэстири любовь каринг мандэ и отдя пэс важ мандэ». О Павло ԥэндя, кай нико и нисо на заставия лэ Иеговас, кай во тэ парашэл амэн тэ любий. Во на гиндояс: «Мэ полав васо о Иегова любий аврэ пэстирэ служытелёнэн, ай ман най васо тэ любий». Во ԥэндя лэ христианонэнди, савэ жувэн андо Римо: «О Христос муля важ амэндэ, кала амэ самас инке ӷрешникоря» (Рим. 5:8). Да, о Иегова любий всаворэ пэстирэ служытелёнэн! О Павло ӷанэнас, кай о Дэл лэс любий. Во ӷанэнас, сар о Иегова андярдя пэс лэ израильтянонэнца, кай во на грабияс тэ холявэл пэр лэндэ, полэлас и жалуияс лэн. w21.04 22, абз. 8, 9; 23, абз. 10

Поможысар, кай о изучающё тэ полюбий лэ Иеговас. Кала проандярэс и изучения, вся и время шув сама, кай о мануш тэ полэл, саво о Иегова. Поможысар, кай о изучающё тэ полэл, кай о Иегова бахтало Дэл, кай во подритярэл кодэлэн, ко лэс любий (1 Тим. 1:11; Евр. 11:6). Росԥэн лэсти, кай если во лэла тэ прилэл и советоря анда Библия, када анэна лэсти лашымос. И кадя во полэла, кай о Иегова чаче лэс любий (Ис. 48:17, 18). Со май фартэ о мануш лэла тэ любий лэ Иеговас, со май фартэ во закамэла тэ парувэл пэстири жызня. Кай о мануш, саво изучает и Библия, тэ болдёл, лэсти прижалапэ варисостар тэ отԥэндёл. Можэт, варикасти прижалапэ тэ парувэл и бути. Аврэнди трэбуй тэ ашавэн кодэлэ друӷонэн, савэ на любин лэ Иеговас. Ай дэкасти можэт тэ авэл ԥарэс кодэлэстар, кай пэр лэстэ тасавэл о родо, важ кода кай во служый лэ Иеговасти. О Иисусо дя алав, кай кодэва, ко ашэла лэско ученико, на лэла тэ гиндой, кай во евья служый лэ Дэвлэсти. Кацавэ манушэстэ авэла баро ери анда ԥрала и ԥэя андэ собрания (Мар. 10:29, 30). w21.06 4, абз. 8, 9

О апостало Павло сыстосардя амари служэния ла бутяса пэ мал. Кадэва примеро сыкавэл, кай на хутила просто тэ сеис о зэрно. Пэр пэстэ и по Аполоссо во ԥэндя, кай вонэ шонпэ по мануш, саво терэл пэ мал. Важ када во ԥэндя: «Мэ садисаравас, о Аполоссо шолас о паи». Ай пэ коринфяноря во ԥэндя, кай вонэ сар лэ Дэвлэстири мал (1 Кор. 3:6—9). Сар лэ Дэвлэстирэ служытеля, амэ най кати кабута сеисарас о зэрно, но и инке шас паи пэр лэстэ, када кала проандярас лэ манушэса изучения Библии. Но амэ полас, кай о зэрно барярэл о Дэл. Када бари бах, кай амэ росԥэнас пала Иегова аврэнди и проандярас изучения Библии! Када бахтали дила! О апостало Павло андо форо Фессалоника поможысардя бутэ манушэнди тэ ашэн лэ Иисусостирэ ученикоря. И акэ со во ԥэндя пэ када: «Када тумэ, кас амэ аштярасас, амари радость, амари бах! Амэ ласа тэ абуросарас андэр тумэндэ англа амаро Ӷосподо англа Иисус Христос, кала во упалэ авэла. Да, тумэ амари слава и радость» (1 Фес. 2:19, 20; Деян. 17:1—4). w21.07 3, абз. 5; 7, абз. 17

О Иегова кажнонэс андар мэндэ андя андэ пэстири арӷанизацыя (Иоан. 6:44). Када сыкавэл, кай анда милиардоря мануша, савэ жувэн пэ ԥув о Иегова шутя сама именно пэр тутэ. Во диқля тиро ди, саво можэт тэ полюбий лэс (1 Лет. 28:9). О Иегова ӷанэн тут, во драго тут полэл и фартэ любий. Сар жэ драго када тэ ӷанас! О Иегова фартэ заботийпэ и любий най кати амэн, но и всаворэ ԥралэн и ԥэян андэ собрания. О Иисусо росԥэндя пала када розлашо примеро, андэ саво лэ Иеговас сыстосардя лэ пастухоса. Если анда стадо, андэ саво сто душ бакрорэ хасардёла хоть ек, во ашавэл кадэла девяносто девять и жал тэ родэл кадэлэ бакрорэс. И кала во лэс арақля, на ля тэ просытярэл лэс, ай наоборот фартэ обрадосайля. Сости амэ анда када сытювас? Кажно ԥрал и ԥэй андэ собрания фартэ куч важ о Иегова. О Иисусо ԥэндя: «Мэрно небесно Дад на камэл, кай тэ хындёл хоть ек анда кадэла прости мануша» (Матф. 18:12—14). w21.06 20, абз. 1, 2

Кала амэ розмышляем пала амари надежда и пала лэ Иеговастири любовь, амэ лас инке май фартэ лэс тэ любисарас, и амари дружба лэса ашэл инке май састи (Рим. 8:38, 39). Амэ камас тэ жувас па лэ Иисусоско примеро (1 Пет. 2:21). Англа Вечеря амэ андэ Библия адиносарас и розмышляем пала послиднё курко, кала о Иисусо жувэлас пэ ԥув, ай кадяжэ пала лэстири смэрть и воскресения. Потом пэ Вечеря амэ ашунас и речь, андэ сави росԥэнэнпэ пала лэ Иисусостири любовь каринг амэндэ (Эф. 5:2; 1 Иоан. 3:16). Кала амэ адиносарас, кай о Иисусо пожэртвовал пэса, и розмышляем пала када, амэ камас тэ андярас пэс кадя, сар во пэс андярэлас (1 Иоан. 2:6). Амэ камас тэ ашаспэ андэ лэ Дэвлэстири любовь (Иуды 20, 21). Кай о Иегова амэн тэ любий, амэ трэбуй андэ вся тэ кандас лэс, тэ прославляем лэско алав и тэ радосарас лэско ди (Прит. 27:11; Матф. 6:9; 1 Иоан. 5:3). И Вечеря поможый амэнди инке май фартэ тэ закамас тэ жувас кажно дес кадя, кабута амэ ԥэнас лэ Иеговасти: «Мэ камав тэ ашавпэ андэ тири любовь вечно». w22.01 23, абз. 17; 25, абз. 18, 19

О Иегова дя амэнди выборо. Када сыкавэл, кай амэ можэм екжэнэ тэ витидас, сар тэ жувас. О Иегова фартэ лошало, кала амэ витидас тэ служысарас лэсти (Пс. 84:11; Прит. 27:11). Кадяжэ во дя выборо тэ прилас бут авэр ришэнии андэ пэстири жызня. Амэ можэм сар о Иисусо тэ прилас кацави ришэния, кай тэ гиндосарас май бут пала авэр, чем пала пэстэ. Еқвар о Иисусо пэстирэ апосталонэнца росԥэнэнас пала Дэл и вонэ закамлэ тэ отцыён. Вонэ жылэ андо тихо ҭан, кай екжэнэ тэ побэшэн, но и мануша уӷанглэ, кай вонэ авэна, и жылэ каринг лэндэ. Вонэ камлэ, кай о Иисусо тэ росԥэнэн лэнди пала Дэл. Но кала о Иисусо додиқля лэ манушэн, во на росхоляйля пэр лэндэ, во жалуисардя лэн и ля бут сости тэ сытярэл лэн (Мар. 6:30—34). Если амэ сар о Иисусо на жалуисарас пэско зор важ авэр, кадя амэ прославляем амарэ Дэвлэс лэ Иеговас (Матф. 5:14—16). w21.08 3, абз. 7, 8

О Иегова любий, кай вся тэ авэл разно. Када и растении, и жывотни, и мануша. Важ када во амэн никаса на сыстой. Во ӷанэн, савэ амэ и со кажнонэстэ андо ди (1 Сам. 16:7). Во кадяжэ полэл и ӷанэн, со амэ можэм тэ терас и со амэндэ на вижала тэ стерас. Кадяжэ полэл, андэ саво ери амэ барелям. Во никала на лэла тэ мангэл амэндар тэ стерас кода, со амэ нэ сможэм. Амэнди трэбуй тэ диқас пэр пэстэ кадя, сар диқэл пар мэндэ о Иегова. Тоди амэ на ласа тэ заваздас о шэро и на ласа тэ терас наоборот, тэ затасавас пэс (Рим. 12:3). Сар жэ амэ лошалэ тэ служысарас вмести амарэ ԥралэнца и ԥэянца андэ собрания (Евр. 13:7). Амэ можэм тэ сытювас лэндар, сар май драго тэ служысарас (Флп. 3:17). Но исин разница, кала ту просто камэс тэ сытёс варисости лэ манушэстар или кала ту лэс тэ сыстос пэс лэса. w21.07 20, абз. 1, 2

Если лэс тэ диқэс пэ жывотни и пэ растения, тэ роздиқэс о нэбо, кай исин бут черӷая, тоди можно тэ полэс, кай Создателё исин (Пс. 19:1). И со май бут ту лэса тэ уӷанэс, со май фартэ лэса тэ патяс, кай вся создал о Иегова. Кала ту май драго уӷанэс, сар вся андэ люма создано, тоди ту шос сама, со кажно тварения ԥэнэн пала Иегова (Рим. 1:20). Например, о Қам най кати дэл татимос и свето. Во кадяжэ дэл ультрафиолето, саво можэт тэ римон о зор лэ манушэсти. Важ када о Иегова стердя кадя, кай пэ ԥув тэ авэл кацави оболочка, пэ сави ԥэнэн озоново слоё, сави фэрий, кай о Қам тэ на римой амаро зор. Ай сар ту гиндос, хэба када ляпэ корко пэстар? Чи када стердя варико, ко фартэ любий и заботийпэ пала мануша? w21.08 17, абз. 9, 10

Амэ трэбуй тэ на парашас тэ сыкавас амари любовь и тоди, кала о мануш ужэ болделя (1 Иоан. 4:20). Но дэкала када можэт тэ авэл найвушэро. Например, кала амэ диқас, кай кадэва мануш терэл варисо най кадя и на полас васо во кадя пэс андярэл. Амэ на камас тэ гиндосарас пала лэстэ вэрыто. Наоборот, амэ стаса патив пэр лэстэ и на ласа тэ гиндосарас, кай амэ «май лашэ аврэндар» (Флп. 2:3; Рим. 12:10). Кай тэ авас андэ лэ Иеговаско ери, амэнди трэбуй андэ вся лэс тэ кандас. Например, о Иисусо сытярэлас, кай амэ трэбуй тэ полас и тэ жалуисарас всаворэ манушэн, дажэ пэстирэ вороӷонэн (Луки 6:32—36). Дэкала када фартэ найвушэро тэ терас, но амэнди трэбуй тэ сытювас тэ гиндосарас сар о Иисусо и тэ терас сар во. Если амэ андэ вся старысавас тэ кандас лэ Иеговас и сытювас лэ Иисусостар, тоди амэ сыкаваса, кай камас вся и вечность тэ авас андэ лэ Иеговаско ери. w21.08 6, абз. 14, 15

Сытюв тэ патяс, кай о Иегова поможыя тути. Кала амэ патяс лэ Иеговасти и отдас пэско зор андэ служэния лэсти, тоди во дэла амэнди бут блаӷословения. Андэ Библия росԥэнэнпэ пала мануша, савэ пристонас бут зор, кай тэ терэн варисо важ о Иегова. Вонэ спэрва трэбуй сас варисо тэ стерэн, ай тоди о Иегова лэн блаӷословияс. Например, лэ Авраамос о Иегова блаӷословисардя кати тоди, кала во ашадя пэско цэр и «жыля, хоть на ӷанэнас, каринг жал» (Евр. 11:8). Кадяжэ о Иегова блаӷословисардя лэ Иаковос кати тоди, кала во вся и рят борияспэ лэ анӷелоса (Быт. 32:24—30). Ай и израильтяноря смоӷли тэ пэрэжан о Иордано и тэ зажан андэ Обетованно ԥув, кати тоди кала и рашая зажылэ андо паи (Иис. Н. 3:14—16). Инке ту можэш тэ сытёс кай лэ Иеговастирэ служытеля, савэ жувэн андэ амари время и савэ патянас лэ Иеговасти и камэнас май бут тэ терэн важ лэстэ. w21.08 29, 30, абз. 12—14

Ԥрала и ԥэя андэ бэршэндэ, тумэ ӷанэн, сар варикала сас андэ лэ Иеговастири арӷанизацыя и полэн, кай бут со паруделя. И акана тумэ андэ служэния трэбуй тэ терэн па аврятэ. И дажэ если варико андар тумэндэ най дэлмут болделя, тумэ бут сости можэте тэ сытярэн лэ май тэрнэн. Авэла драго, если вонэ уӷанэна, сар о чачимос пала Иегова парудя тумари жызня ужэ андэ кадэла бэрша, и сости тумэ сытелэ важ кодэла бут бэрша, савэ тумэ прожудэ. Если тумэ лэна тэ росԥэнэн лэ тэрнэнди пала кода, со тумэ сытелэ важ и жызня, тоди о Иегова дэла тумэнди бут блаӷословении (Луки 6:38). И тэрнэ и май ԥурэ ԥрала и ԥэя бут, со моӷут тэ терэн. Кай и ԥрала и ԥэя, савэ андэ бэршэндэ, исин мудрость и вонэ бут сости сытелэ андэ пэстири жызня. Ай кай май тэрнэ исин бут зор. И кала вонэ проандярэн время вмести, кадя вонэ подритярэн ек еқэс (Рим. 1:12). Сар жэ драго тэ диқэс, кала и тэрнэ и ԥрала и ԥэя, савэ андэ бэршэндэ, най кати вмести терэн лэ Иеговастири дила, но и дружын. Кадя вонэ прославляют амарэ небеснонэ Дадэс лэ Иеговас и подритярэн всаворэ ԥралэн и ԥэян андэ собрания! w21.09 8, абз. 3; 13, абз. 17, 18

Бут евреёря на закамлэ тэ патян андо Иисусо, важ кода кай вонэ гиндонас, кай о Христос нэ можэт тэ авэл умардо по столбо. По столбо умэрэнас кати лэ преступниконэн и лэ ӷрешниконэн (Втор. 21:22, 23). И евреёря, савэ на патяе андо Иисусо, на закамлэ тэ прижанэн, кай во найдошало и кай во на затердя, кай лэс тэ умарэн. Лэс сындосардя хохавно и найсправедливо сындо (Луки 22:54; Иоан. 18:24). Инке по сындо камэнас тэ виарақэн пала со тэ дошалярэл лэ Иисусос, кай потом тэ умарэн лэс. Ай посли кода, сар лэндэ на вижыля тэ дошалярэн лэ Иисусос, о ӷлавно рашай закамля тэ астарэл лэс по алав (Матф. 26:59; Мар. 14:55—64). И дажэ посли кода, сар о Иисусо рисайля каринг и жызня, и сындомаря потиндэ лэ римсконэ воинонэнди бут рупунэ монеты, кай вонэ тэ хохавэн, васо и моӷила лэ Иисусостири ашэля шущи (Матф. 28:11—15). w21.05 11, 12, абз. 12, 13

О Иегова можэт андэ любо время тэ улэл кадэя найлащи люма. Но во када на терэл. Во аштярэл. И амэ трэбуй тэ авас блаӷодарни лэ Иеговасти пала лэстири терпения. Всаворэ лэ Адамостирэ потомкоря, кала арақадён, вонэ ужэ нэсовершэни. Но о Иегова всаек лэн любий и заботийпэ пала лэндэ (1 Иоан. 4:19). И во дажэ ужэ стодя о дес о и часо, кала улэла вся о ԥаримос лэ манушэндар. Кала амэ гиндосарас, сар о Иегова любий амэн, када придэл зор тэ на умэкас и вас, пока на авэла лэско дес. О Иегова само лашо примеро важ амэндэ андэ кода, сар во виритярэл о ԥаримос. О Иисусо фартэ шолпэ пэ пэско Дад. Кала во сас пэ ԥув, во важ амэндэ пэрэандярдя бут ԥаримос. Пэр лэстэ ԥэнэнас найлашэ алава и хохавэнас. Ай кадяжэ лэс фартэ жэстоко умардэ по столбо (Евр. 12:2, 3). Но лэсти фартэ придэлас зор кода, кай лэско Дад виритярэл о ԥаримос и во сытёлас лэстар. Када придэла зор и амэнди. w21.07 12, 13, абз. 15—17

Кажно дес амэ диқас, сар о Иегова полэл и жалуий (Пс. 103:10—14). О Иисусо тожэ полэлас и жалуияс пэстирэ учениконэн, хоть вонэ терэнас бут со най кадя. Во дажэ отдя пэстири жызня, кай лэ манушэндирэ ӷрехоря тэ простинпэ (1 Иоан. 2:1, 2). Кай андэ лэ Иеговаско ери всаворэ тэ ладин, амэнди трэбуй анда вся оди тэ простисарас ек еқэс (Эф. 4:32). Но дэкала када найвушэро, и кай тэ простис варикас, трэбуй тэ пристос зор. Еқа ԥьяти андэ када поможысардя и статья анда «Сторожэво башня», сави называлась «Анда вся оди простин ек еқэс». И гиндоря анда кодэя статья поможысардэ лати тэ полэл, пэ скати дэ важно тэ простий аврэн и саво лашымос када анэн. Инке андэ кодэя статья ԥэнэнаспэ, кай кала амэ камас тэ простисарас варикас, када на сыкавэл, кай кодэва мануш пэс правильно андярдя или кабута нинай нисо, кай во кадя стердя. Кала простис, када улэс и холи анда пэско ди, и кадэлэстар тути ашэл май спокойно. Если амэ простисарас лэ ԥралэн и лэ ԥэян и на ритярас пэр лэндэ холи, тоди амэ сыкавас, кай любисарас лэн и сытювас андэ када амарэ небеснонэ Дадэстар лэ Иеговастар. w21.09 23, 24, абз. 15, 16

О Иисусо любияс о чачимос пала Дэл и пала кода, со во загиндосардя. И во жувэлас кадя, сар уӷодно лэ Дэвлэсти, и росԥэнэнас пала када аврэнди (Иоан. 18:37). Лэ Иисусостирэ ученикоря тожэ любинас о чачимос пала Дэл (Иоан. 4:23, 24). О апостало Пётро ԥэндясас, кай и христианоря жувэн па чачимос анда Библия (2 Пет. 2:2). И христианоря андо пэрво вико любинас о чачимос пала Дэл, через када вонэ отԥэндёнас всаворэстар, со на чалёлас лэ Дэвлэсти. Вонэ парашэлэ тэ ритярэн и традицыи, савэ сас андэ лэндири вера, и тэ терэн кода, со чалёл лэ манушэнди или лэнди екжэнэнди (Кол. 2:8). Кадяжэ и адес терэн и христианоря. Вонэ камэн тэ жан па чачуно дром. Вонэ патян андэ кода, со пистромэ андэ Библия и жувэн па лэ Иеговаско законо (3 Иоан. 3, 4). Лэ Дэвлэстирэ служытеля на ԥэнэн, кай вонэ драго вся полэн, со пистромэ андэ Библия. Дэкала вонэ нэправильно полэн, сости сытярэл и Библия, или прилэн нэправильни ришэния андэ арӷанизацыя. Но кала вонэ май точно полэн со камэл о Дэл, тоди вонэ сразу ӷотови тэ парудён. w21.10 21, 22, абз. 11, 12

Андэ кодэя время, кала жувэлас о Давидо, круӷом фороря ваздэнас и стины, кай и мануша тэ фэринпэ лэ вороӷонэндар. Кадя жэ и о Иегова через пэстири предано любовь фэрий амари дружба лэса. Амэн фэрий ужэ кода, кай амэ лэстирэ друӷоря, и када блаӷодаря кодэлэсти, кай во амэн предано любий (Иер. 31:3). Кай тэ сыкавэл, сар о Иегова фэрий пэстирэ народос, о Давидо шукарнэс пистросардя: «Ту, мэрно Дэл, мэрно надёжно ҭан, кай мэ фэрисавав, Дэл, саво предано любий ман». Кадяжэ андэ авэр Псалом во ԥэндя пала Иегова: «Во предано любий ман, во мэрно састо форо, во надёжно ҭан, кай мэ фэрисавав, мэрно спасителё, мэрно щито. Лэстэ мэ виарақлэм ҭан, кай тэ гарадював» (Пс. 59:17; 144:2). Васо о Давидо пистросардя, кай лэ Иеговастири предано любовь шолпэ по састо форо и по ҭан, кай фэринпэ? О Дэл лэла тэ терэл вся, кай тэ фэрий амари дружба лэса. И кай бы амэ тэ на авас, само ӷлавно, кай амэ на парашас тэ служысарас лэсти. w21.11 6, абз. 14, 15

Еқвар, кала о Иисусо лэ учениконэнца сас пэ моря, вазгляпэ бари балвал. Через када о Иисусо сыкадя лэ учениконэнди, андэр со лэнди на хутилэлас вера (Матф. 8:23—26). Пока сас бари балвал, ай и волны зашонас и лодка, о Иисусо спокойно совэлас. И ученикоря фартэ пэрэдарайлэ, жунгадэ лэс и линэ тэ мангэн тэ спасый лэн. Но пэ када о Иисусо ԥэндя: «Со тумэ кадя пэрэдарайлэ? Кай жэ тумари вера?» Андэ жызня кай кажно андар мэндэ можэт тэ авэл «бари балвал». Возможно, котэ, кай тумэ жувэн, тердяпэ бида андэ природа. Или тумэндэ можэт тэ авэл ԥаримос, саво сар бари балвал, например проблема лэ зорэса. И важ када тумэ умэклэ и вас и на ӷанэн, со тэ терэн. Хоть дэкала тумэ можэте фартэ тэ пэрэжываете, на домэкэн, кай через кадэла гиндоря тумэ тэ на допатян лэ Иеговасти. На бистрэн, сар о Иегова ужэ поможыяс тумэнди (Пс. 77:11). Када придэла тумэнди зор инке май фартэ тэ патян, кай во никала тумэн на ашавэла! w21.11 22, абз. 7, 10

Варико можэт тэ гиндой: «Мэ и кадя ритярав кадэя заповедь и никала на лэм нисо чужо». Но можно тэ чорэс и па аврятэ. Например, о торӷовцо, саво дилярэлас пэ висоря, можно тэ ԥэнэс, чорэлас. Андэ Левит 19:13 ԥэнэнпэ: «На хохавэн пашутнэс». Дицол, кай если о мануш хохавэл, када почти ек, кала чорэл. Важ када тэ дилярэн андэ дила, када всаек со тэ чорэн. Если андэ восьмо заповедь просто ԥэнэнпэ, кай нащи тэ чорэн, то андэ книӷа Левит пала кадэва законо росԥэнэнпэ май драго, кай амэ ни андэр со тэ на хохавас. Авелоп драго тэ погиндосарас, сар о Иегова диқэл пэ кода, кала чорэн и дилярэн. Амэ можэм тэ пушас пэстар: «Кала мэ адиносарав Левит 19:11—13, диқав мэ, кай манди трэбуй дэсо тэ парував андэ пэстири жызня? Трэбуй мэ, например, па аврятэ тэ андярав мэрни дила и бути?» w21.12 9, 10, абз. 6—8

Ту можэш андэ молитва тэ росԥэнэс лэ Иеговасти пала ошыбки, савэ ту тердян важ о дес и тэ мангэс лэстар прощения. Канешно, если о мануш стердя баро бэзэх, тоди лэсти авэла трэбуй помощь лэ барэдэрэ ԥралэндар. Вонэ виашунэна лэс, дэна совето па Библия и поможына. Вонэ вмести лэса мангэнапэ лэ Иеговасти, кай во тэ простий, и кай лэстэ упалэ тэ авэл лащи дружба лэ Иеговаса (Иак. 5:14—16). Кадяжэ гиндосар пэ скати дэ куч о выкупо. Можэт и тиро ди нащи тэрпий, кала ту гиндос пала кода, саво ԥаримос сас кай лэ Дэвлэско Шаво. Но со май бут ту лэса тэ гиндос пала выкупо, со май фартэ ту лэса тэ любис лэ Иеговас и лэстирэ Шавэс. Кажно бэрш амэ авас пэ Вечеря, ай кадяжэ ақарас тэ авэн пэр латэ всаворэн ко камэл. Кадя амэ лас инке май фартэ тэ цэнисарас о выкупо. Важ амэндэ бари бах тэ росԥэнас аврэнди важ лэ Иеговаско Шаво! w21.04 18, 19, абз. 13—16

Сар андярдя пэс о Иисусо, кала каринг лэстэ авелэ бут мануша? Во тоди сас по плай. Англа када о Иисусо вся и рят мангэласпэ. Во сас фартэ цыено. Но кала во додиқля лэ манушэн, лэсти ашэля лэн фартэ жалко. И о Иисусо най кати исцэлисардя лэ насвалэн, но и ԥэндя ашунгли речь, сави акана амэ ӷанас, сар Наӷорно проповедь (Луки 6:12—20). О Иисусо на жалуияс пэстири время важ авэр. Погиндосарам, со сас по ди кай о Иисусо, кала лэсти ԥэндэ и найлащи новость пала Иоанно Крестителё. Во кати уӷангля, кай лэстирэ друӷос казнисардэ. Кала о Иисусо када ашундя, во жыля «андо спокойно ҭан, кай тэ побэшэл екжэно» (Матф. 14:10—13). Но кала о Иисусо авеля интя, котэ ужэ сас фартэ бут мануша, савэ авелэ май пэрви лэстар (Мар. 6:31—33). О Иисусо полэлас, кай кадэлэ манушэнди трэбуй помощь лэ Дэвлэстар. «Лэсти ашэля лэн фартэ жалко», и важ када «во ля бутэсти лэн тэ сытярэл» (Луки 9:10, 11). w22.02 21, абз. 4, 6

Со тэ терас, если амэ полям, кай обидели варикас анда собрания? Сар и о Иаково, амэ трэбуй анда ди тэ мангаспэ лэ Иеговасти. Амэ можэм тэ мангас, кай во тэ поможый амэнди тэ поладисарас амарэ ԥралэса или ԥьяса. Кадяжэ амэ трэбуй тэ проверим, со амэндэ андо ди. Например, тэ задас пэсти кацавэ вопросоря: «Ӷотово мэ тэ бистрав пала пэстири ӷордость, анда вся оди тэ мангав прощения и тэ помирисавав? Со авэла по ди кай о Иегова и кай о Иисусо, если мэ стерава вся, кай тэ поладисарав мэрнэ ԥралэса или ԥьяса?» Если амэ погиндосараса пала кацавэ вопросоря, када поможыя амэнди тэ ашунас лэ Иисусос и тэ пашувас кай о ԥрал или ԥэй, кай тэ помирисавас. Кала амэ жас тэ помирисавас лэ ԥралэса, амэ трэбуй тэ бистрас пала пэстири ӷордость (Эф. 4:2, 3). Старыинпэ тэ поможын лэсти тэ помирийпэ амэнца. Давайте тэ сэрас: тэ помиринпэ амарэ ԥралэса май важно, чем тэ розлэнпэ, ко сас право, ай ко най (1 Кор. 6:7). w21.12 26, абз. 13—16

Лэ Иисусости сас ԥарэс по ди через кода, кай бут мануша анда народо на закамлэ тэ ашунэн и лащи новость пала Царство. Важ када о Иерусалимо авэла розмардо, бутэн умарэна, ай кодэлэн, ко пэрэжувэла кадэя бида, залэна андо плено (Луки 21:20—24). Вся вижыля кадя, сар и ԥэндя о Иисусо. Ай сар и мануша котэ, кай тумэ жувэн, ашунэн и лащи новость пала Царство? Если ла прилэн фартэ мало мануша, давайте погиндосараса, сости амэ сытювас анда 19 ӷлава Луки. О Иегова заботийпэ пала мануша. Лэ Иисусостирэ ясва напоминают амэнди, сар дэ фартэ о Иегова пэрэжывает пала мануша. Во «на камэл, кай варико тэ мэрэл, но камэл, кай всаворэ тэ каинпэ» (2 Пет. 3:9). Адес амэ сыкавас кацави жэ любовь каринг и мануша, сар о Иегова, если терас вся, кай тэ доандярас лэнди о чачимос пала Дэл (Матф. 22:39). w22.01 16, абз. 10—12

Амари вера ашэл май састи, кала амэ гиндосарас, со о Иегова ужэ стердя важ пэско народо и лично важ амэндэ. Амэ лас инке май фартэ тэ любисарас лэ Иеговас. И любовь со май фартэ поможыя амэнди тэ кандас лэ Иеговас, тэ жас пэ жэртвы, кай тэ радосарас лэс и тэ виритярас любо ԥаримос (Матф. 22:37—39; 1 Кор. 13:4, 7; 1 Иоан. 5:3). Нинай нисо май цэно, чем и пашутни дружба лэ Иеговаса! (Пс. 63:1—7). Сэрэн, кай кала мангаспэ, изучаем и розмышляем — амэ тэлювас лэ Иеговасти. Сар о Иисусо, виарақэн спокойно ҭан, кай тэ проандярэн время лэ Иеговаса. На домэкэн, кай варисо тэ отвлекает тумэн. Мангэн лэ Иеговас тэ поможый тумэнди тэ авэн внимательни, кала терэн лэстири дила. Если амэ ужэ адес старысавас май годявэрнэс тэ используем пэстири время, о Иегова блаӷословия амэн, и амэ ласа вечно тэ жувас андо раё пэ ԥув! (Мар. 4:24). w22.01 31, абз. 18—20

Если амэ варисо стердям, значит, амэ пала када гиндосарасас. Акэ васо о Иисусо сытярэлас, кай амэ тэ на мэкас андо шэро нисаво гиндо, саво моӷ тэ анэн каринг о баро бэзэх (Матф. 5:21, 22, 28, 29). Всаворэ амэ камас тэ радосарас амарэ небеснонэ Дадэс. Хэба най? Важ када, сар дэ важно тэ отшас любо гиндо, саво можэт тэ анэн каринг и бида. О Иисусо ԥэндя: «Со вижал анда муй, жал анда ди» (Матф. 15:18). И чаче: кода, пала со амэ дас дума, драго сыкавэл, со амэндэ андо ди. Задэн пэсти кацавэ вопросоря: «Если манди нэ выӷодно тэ ԥэнав чачимос, на гиндосарав мэ тоди, кай можно набут тэ прихохавав? На домэкав мэ пэсти тэ заиӷрываю кодэлэса, каса най андо брако? На ашэл важ мандэ нормально дэкала тэ ԥэрясую пала билажавардимос или тэ обзываю варикас? Вижал мандэ тэ ашавпэ спокойно, кала ман варико холярдя?» Да, исин пала со тэ погиндосарас. Кай тэ злас и «пурани личность», амэнди трэбуй тэ отшас пэстар и найпативали дума. w22.03 5, абз. 12—14

На аштярэн, пока варико дэла тумэнди совето — фэдэр екжэнэ пашон аврэндэ и пушэн, андэр со тумэ трэбуй тэ парудён. Када поможыя тумэнди тэ авэн май мудри и тэ ашэн май пашэ каринг о Иегова. Важ када терэн вся пэстиря ригатар, кай тэ арақэн совето. Кала авелоп драго тэ пушас совето кай амарэ ԥрала и ԥэя? Роздиқаса дэсавэ ситуацыи: 1) Ек вазвещятелё ақарэл пэ изучения Библии лэ христианинос, савэстэ исин лашо опыто, ай посли пушэл лэстар, сар тэ ашэл инке май лашо учителё. 2) И ԥэй, сави най миростэ, камэл тэ тинэл пэсти нэви ӥда, и важ када мангэл авря ԥья ворта тэ ԥэнэн лати, со вой гиндой. 3) Лэ ԥралэсти пэрво разо динэ тэ ԥэнэн библейско речь. Во мангэл, кай ек опытно барэдэр ԥрал внимательно тэ виашунэл лэстири речь и тэ дэл совето, пэр со лэсти тэ шол сама. Дэкала дажэ лэ ԥралэнди, савэ ужэ бут бэрша росԥэнэн речи, авелоп драго тэ мангэн совето кай авэр докладчикоря (Прит. 19:20). w22.02 13, абз. 15—17

О Иегова амэн кадяжэ любий, сар любияс лэ Иисусос, кала во инке сас пэ ԥув (Иоан. 5:20). О Иегова заботияспэ, кай лэ Иисусостэ тэ авэл вся, кай лэстири дружба лэса тэ авэл лащи, кай лэсти тэ авэл драго по ди и кай лэстэ тэ авэл вся, со трэбуй важ и жызня. Инке во хвалияс лэ Иисусос и ԥэнэнас, кай любий лэс (Матф. 3:16, 17). О Иисусо полэлас, кай лэско небесно Дад андэ любо маменто лэсти поможыя, и важ када о Иисусо никала на гиндояс, кай во екжэно. Сар и о Иисусо, кажно андар мэндэ ӷанэн, кай о Иегова любий лэс. Кати погиндосар, скати о Иегова терэл важ тутэ. Во приля тут андэ пэско ери, андэ саво исин бут ԥрала и ԥэя, савэ подритярэн, кала тути ԥарэс и савэ паша тутэ, кала ту лошавэс (Иоан. 6:44). И кай ту тэ на парашэс тэ патяс андо Иегова, во через пэстири арӷанизацыя бут со дэл, кай амари дружба лэса тэ авэл май лащи. И во дажэ кажно дес заботийпэ, кай амэндэ тэ авэл вся, со трэбуй важ и жызня (Матф. 6:31, 32). Со май бут ту лэса тэ гиндос, кай о Иегова тут любий, со май фартэ и ту лэса лэс тэ любис. w21.09 22, абз. 8, 9

Сави ту андярэсас жызня англа кода, сар лян тэ изучаеш и Библия лэ Иеговастирэ свидетелёнэнца? Бутэнди андар мэндэ дажэ страшно пала када тэ гиндосарас. Амэ домэкасас, кай кадэя люма тэ влияет пар мэндэ и тэ сыкавэл со лашо, ай со най. Если кадя сас и тумэндэ, тоди «тумэндэ на сас надежда и тумэ жувэнас пэ кадэя люма би лэ Дэвлэско» (Эф. 2:12). Но кала ту лян тэ изучаеш и Библия, ту уӷанглян, кай исин небесно Дад, саво фартэ любий тут. Тутэ появисайля бари жэлания тэ подружыспэ лэса и тэ авэс андэ лэско баро ери. Но кадяжэ, ту полян, кай трэбуй бут со тэ парувэс, например, сар ту жувэс, сар андярэс пэс и пала со гиндос. Тути трэбуй авэла тэ присытёс тэ жувэс кадя, сар камэл о Иегова (Эф. 5:3—5). О Иегова — амаро Создателё и небесно Дад, и во можэт тэ стол андэ пэско ери правила, со и сар тэ терас. И во ԥэнэн, кай инке англа кода, сар тэ болдювас, амэ трэбуй тэ стерас вся, кай тэ злас и «пурани личность латиря диласа». w22.03 2, абз. 1—3

«Авэр бакрорэ» фартэ ради тэ авэн пэ Вечеря сар ӷостёря. Вонэ тожэ розмышляют пала пэстири надежда. Например, и речь пэ Вечеря май бут шол сама пэ кода, со о Иисусо и 144 000 памазаникоря стерэна важ «авэр бакрорэ» андэ Тысячелетнё правления. Кадэла небесни правителя лэна тэ поможын лэ Царёсти, лэ Иисусости Христости, тэ стерэл пэ ԥув раё и кай всаворэ мануша, савэ предани лэ Дэвлэсти, тэ ашэн совершэни. Милионоря мануша, савэ авэн пэ Вечеря сар ӷостёря, радостяса прецтавляют, сар исполняца и библейски пророчества, например анда Исайя 35:5, 6; 65:21—23 и Откровение 21:3, 4. Кала вонэ прецтавляют пэс и пэстирэ чачен андо раё пэ ԥув, када придэл лэнди зор тэ аштярэн о лашымос, саво авэла англэ, и никала тэ на парашэн тэ служын лэ Иеговасти (Матф. 24:13; Гал. 6:9). w22.01 21, абз. 5—7

Со када выкупо? Када цэмин, сави потиндя о Иисусо, кай тэ витинэл кода, со хасардя о Адамо (1 Кор. 15:22). Васо амэнди трэбуй о выкупо? Важ кода кай андэ лэ Дэвлэско справедливо законо ԥэнэнаспэ, кай трэбуй тэ отдэн жызня важ и жызня (Исх. 21:23, 24). О Адамо хасардя пэстири совершэно жызня, и важ када па лэ Дэвлэско законо о Иисусо трэбуй сас тэ отдэл пэстири совершэно жызня (Рим. 5:17). Кадя во ашэля «Вечно Дад» важ кодэла, ко патял андо выкупо (Ис. 9:6; Рим. 3:23, 24). О Иисусо отдя пэстири жызня, важ кода кай любияс лэ Иеговас и лэ манушэн (Иоан. 14:31; 15:13). Кадэя любовь поможысардя лэсти тэ на парашэл тэ кандэл лэ Иеговас жы каринг и смэрть. Блаӷодаря кодэлэсти кай о Иисусо муля, лэ манушэндэ авэла кацави жызня, сави о Иегова загиндосардясас важ лэндэ. w21.04 14, абз. 2, 3