Авӷусто

Май ӥто всаворэстар о Иисусо дэлас дума пала римски воиноря, савэ примардэ лэс каринг о столбо. Хоть лэ Иисусоса обжылэпэ нэсправедливо, во на ля тэ холявэл и тэ сындой кодэлэн, ко камля, кай во тэ мэрэл (1 Пет. 2:23). Амэнди трэбуй тэ сытювас лэ Иисусостар и тэ простисарас аврэн (Кол. 3:13). Дэсавэ мануша, ай дэкала дажэ амаро родо, моӷут тэ на дэн амэнди тэ служысарас лэ Иеговасти. Важ кода кай вонэ на камэн тэ полэн, андэр со амэ патяс, и сар амэ жувас. Вонэ дажэ моӷут тэ хохавэн пар мэндэ, тэ ԥэнэн найлашэ алава, тэ вишон и тэ ԥабарэн амари литература, ай можэт дажэ камэн тэ умарэн амэн. Но на трэбуй тэ ритярас пэр лэндэ холи. Фэдэр авэла тэ мангас лэ Иеговас, кай вонэ тэ полэн андэр со амэ патяс и тэ патян андо Иегова (Матф. 5:44, 45). Да, тэ простис дэкала фартэ ԥарэс. Особенно, если амэнца обжылэпэ нэсправедливо. Но если амэ ритярас андэ амаро ди и холи, тоди амэнди авэла ԥарэс ла тэ улас (Пс. 37:8). Ай кала простисарас кодэлэн, ко амэн холярдя, када анэна амэнди лашымос, и амари жызня авэла май бахтали (Эф. 4:31, 32). w21.04 8, 9, абз. 3, 4

Сар жэ дуқал оди, кала лэ манушэс, саво тути куч, исключин анда собрания! Можэт и тумэндэ сас кацаво? Кати погиндон, сар ԥарэс сас лэ Иеговасти, кала лэстар одбанделэ дэсавэ лэстирэ шавэ и анӷелоря! (Иуды 6). Ай сар дэ ԥарэс лэсти сас кодэлэстар, сар терэнас и израильтяноря! Во лэн фартэ любияс, ай вонэ упалэ и упалэ жанас против лэстэ (Пс. 78:41). И лэ Иеговасти кадяжэ ԥарэс, кала лэс ашавэл варико анда тумаро родо. И во, сар нико авэр, полэл, со тумэндэ по ди. Амаро Дэл полэл тумэн и жалуий, и во дэла зор и подритярэла. Часто и родителя гиндон, кай вонэ моӷли варисо тэ стерэн, кай лэнго бэято тэ на парашэл тэ служый лэ Иеговасти. И вонэ загиндонпэ, со вонэ стердэ най кадя. Ек ԥрал, савэстирэ шавэс исключисардэ анда собрания, дошалярэлас андэ када пэс, и лэсти дажэ снинаспэ найлашэ сунэ. Кацави жэ бида сас еқа ԥьятэ. Вой нащи виарақэлас пэсти ҭан, кала латирэ шавэс исключисардэ анда собрания. Вой ля тэ гиндой, со стердя най кадя, васо лако шаво на полюбисардя лэ Иеговас? w21.09 26, абз. 1, 2; 27, абз. 4

Бут мануша ӷанэн, кай амэ на прожылям нисави школа важ и рашая. Важ када вонэ гиндон, кай амэ нэ можэм тэ росԥэнас аврэнди пала Дэл. Трэбуй драго тэ ӷанас, чачимос кода, со ԥэнэн и мануша, чи най. Именно кадя и терэлас о Лука. Кала во пистрояс и Евангелия, во спэрва вся драго розуӷанэнас. Во камэлас, кай вся со во пистрой, тэ авэл точно и кай вся, со лэна и мануша тэ адинон пала Иисусо тэ авэл чачимос (Луки 1:1—4). И евреёря, савэ жувэнас андо форо Верия терэнас кадяжэ сар и о Лука. Кала вонэ пэрво разо ашунглэ пала Иисусо, вонэ закамлэ май драго тэ уӷанэн чачимос када чи най (Деян. 17:11). Кадяжэ адес важно, кай ту май драго тэ уӷанэс и тэ сыстос кода, сости сытярэн лэ Иеговастирэ свидетеля, и кода, со ԥэнэнпэ андэ Библия. Инке трэбуй тэ уӷанэс, сар лэ Иеговаско народо служый лэсти андэ амарэ деса. Лэ манушэс, саво када вся драго уӷанэна, на змарэла кода, со дэн дума пала лэ Иеговастирэ свидетеля и сар найдраго лэнца андярэн пэс и мануша. w21.05 3, 4, абз. 7, 8

Ай андэ тири собрания, исин кацавэ ԥрала и ԥэя, савэн трэбуй тэ шос сама и тэ сыкавэс, кай вонэ куч андэ собрания? Дэкала лэ ԥралэнди и лэ ԥэянди трэбуй, кай амэ тэ авас паша лэндэ. Дэкасти фартэ ԥарэс андэ кодэва дес, кала о родо, саво на служый лэ Иеговасти стол празникоря, савэ нэ уӷодни лэ Иеговасти. Ай аврэнди фартэ ԥарэс, кала пашол о дес, андэ саво ужыля лэнго пашутно мануш. Если амэ андэ кодэва маменто аваса паша лэндэ, тоди вонэ полэна, кай вонэ куч амэнди и амэ заботисавас пала лэндэ (Флп. 2:20). Лэ Иеговастирэ служытеля дэкала моӷут тэ гиндон, кай кабута вонэ екжэнэ и никасти на трэбуй. И лэндэ пэ када исин бут причины. Но на ласа тэ бистрас, кай о Иегова ӷанэн вся, со амэндэ по ди и полэл амэн. Во вся и время подритярэл амэн и терэл када через и ԥрала и ԥэя андэ собрания (Матф. 12:48—50). Ай амэ можэм тэ сыкавас пэстири блаӷодарность лэ Иеговасти, если поможысарас андэ собрания кодэлэнди, касти трэбуй помощь. И со амэндэ тэ на авэл по ди, амэ трэбуй тэ на бистрас, кай о Иегова никала амэн на ашавэла. w21.06 13, абз. 18—20

О Иисусо на хасарэлас и радость андэ служэния, хоть дэсавэ мануша на камэнас лэс тэ ашунэн. Со лэсти андэ када поможыяс? Во полэлас, кай лэ манушэнди важно тэ ашунэн о чачимос пала Дэл и камэлас лэнди андэ када тэ поможый. Кадяжэ во ӷанэнас, кай дэсавэ анда кодэла, ко на камэнас спэрва тэ ашунэн, потом прилэна о чачимос. Например, кала о Иисусо сас пэ ԥув лэстирэ чаче ԥрала спэрва на ашэлэ лэстирэ ученикоря, хоть во росԥэнэнас пала лэ Дэвлэско Царство трин епашэса бэрш (Иоан. 7:5). Но кала во муля и рисайля каринг и жызня по нэбо, вонэ патяе лэ Иисусости и ашэлэ лэстирэ ученикоря (Деян. 1:14). Амэ на ӷанас, ко анда мануша прилэла о чачимос анда Библия, ай ко на прилэла. Дэсавэ манушэнди трэбуй май бут время, чем аврэнди. Кодэла, ко амэн спэрва на ашунэнас, потом моӷут тэ ашэн лэ Иеговастирэ служытеля, важ кода кай вонэ диқэн, сар амэ пэс андярас, и кай амэ на парашас тэ лошавас. w21.05 18, абз. 17, 18

Андэ алава, савэ ԥэндя о Иисусо, исин дуй важни маменторя. Во ԥэндя, кай трэбуй тэ росԥэнас лэ манушэнди важ лэ Дэвлэско Царство и сыкадя, сар када тэ терас (Луки 8:1). Но во ԥэндя, кай най всаворэ мануша лэна тэ ашунэн амэн (Луки 9:2—5). Кадяжэ о Иисусо ԥэндя, кай пала када ашунэна и мануша па вся и ԥув (Матф. 24:14; Деян. 1:8). Инке о Иисусо ԥэндя тэ проандярас изучения Библии кодэлэнца, ко камэл тэ уӷанэн пала Дэл, кай вонэ тэ жувэн па лэ Дэвлэско законо. О Иисусо ԥэндя, кай кадэя дила лэна тэ терэн жы каринг амарэ деса, «пока на поджала и время кадэла люмати» (Матф. 28:18—20). Ай ужэ андэ книӷа Откровение ԥэнэнпэ, кай всаворэ лэ Иисусостирэ ученикоря трэбуй тэ поможын лэ манушэнди, кай вонэ тэ уӷанэн пала Иегова (Отк. 22:17). w21.07 3, абз. 3, 4

Андэ кадэя люма всаворэ мануша старыинпэ тэ авэн май лашэ ек еқэстар. Например, барвало мануш важ пэско бизнэсо можэт тэ стерэл вэрыто аврэ манушэсти. О спортсмено, кай тэ вицэлэл, можэт нарошно тэ стерэл варисо аврэ спортсмености. Ай о мануш, саво сытёл андо университето, можэт тэ хохавэл, кай тэ здэл о экзамено. Но андэ Библия пистромэ, кай када «и дила, сави терэл и ӷрешно тила», и амэ полас, кай и христианоря нащи кадя тэ терэн (Гал. 5:19—21). Но можэт тэ авэл кацаво, кай лэ Иеговаско служытелё екжэно на полэл, сар можэт тэ стерэл кадя, кай машкар ԥрала и ԥэя андэ собрания тэ авэл холи. Трэбуй тэ гиндосарас пала лэ Дэвлэстирэ служытеля, савэ на андярэнас пэс кадя, кай вонэ май лашэ аврэ манушэндар. w21.07 14, абз. 1, 2

Если амэ предано любисарас, амэ подритярас кодэлэн, ко умэкля и вас. Амэ сар христианоря, савэ всегда ӷотови тэ дэн зор аврэнди, камас тэ авас паша кодэла, касти ԥарэс или ко умэкля и вас. Амэ любисарас амарэ ԥралэн и ԥэян и терас вся, со па амаро зор, кай тэ подритярас лэн (Прит. 12:25; 24:10). Амэ камас тэ терас кадя, сар ԥэндя о апостало Павло: «Подритярэн кодэлэн, касти ԥарэс по ди, поможын кодэлэнди, касти найвушэро, на холявэн ни пэр кастэ» (1 Фес. 5:14). Часто кодэлэсти, касти ԥарэс, трэбуй, кай варико лэс внимательно тэ виашунэл и тэ ԥэнэн, кай любий лэс. Если тумэ заботинапэ пала ек цэно лэ Иеговаско служытелё, ӷанэн, во обязательно пэ када шола сама. Важ кода кай андэ Притчи 19:17 ԥэнэнпэ: «Ко терэл лашымос лэ чорорэсти, кодэва залэл лэ Иеговасти, и о Дэл дэла лэсти наӷрада важ када». w21.11 10, абз. 11, 12

Со ужэ акана амэ можэм тэ терас, кай тэ авас ӷотови каринг и время, сави авэла англэ? Само ӷлавно — амэнди трэбуй правильно тэ диқас по мищимос и тэ авас ӷотови тэ ашавас вся, со амэндэ исин. Трэбуй тэ авас довольни и тэ цэнисарас и дружба лэ Иеговаса. Со май драго амэ уӷанас амарэ Дэвлэс, со май фартэ лас тэ патяс, кай во можэт тэ спасый амэн, кала дэла о Гого анда Магого. Лэ Дэвлэско служытелё о Давидо ӷанэнас, кай о Иегова всегда моӷ лэс тэ подритярэл. И алава анда адесутно стихо поможын тэ полас, катар во када ӷанэнас. Кала о Давидо сас тэрно, во вижыля против о Голиафо и ԥэндя: «Адес о Иегова отдэла тут андэ мэрнэ вас» (1 Сам. 17:46). Потом о Давидо служыяс лэ Саулости, саво най еқвар камэлас лэс тэ умарэл. Но «о Иегова сас лэ Давидоса» (1 Сам. 18:12). О Давидо диқэлас, сар о Дэл лэсти поможыяс, и важ када во ӷанэнас, кай лэско небесно Дад никала лэс на ашавэла. w22.01 6, абз. 14, 15

Кала о Иегова лэл тэ терэл варисави дила, во на грабий ла май ӥто тэ дотерэл, и лэстэ жал пэ када время скати трэбуй. Во терэл када, кай пэр лэстэ тэ стон патив и кай аврэнди тэ авэл драго. Када дицолас тоди, кала о Иегова по набут и на грабияс тэ терэл и ԥув важ и мануша. Андэ Библия ԥэнэнпэ, кай во стодя ла тэ тердёл састэс и стердя кадя, кай вой тэ авэл круӷло (Иов 38:5, 6; Пс. 104:5). И кажно разо, кала о Иегова терэлас варисо, во витидэлас время, кай потом тэ диқэл, сар во стердя кадэя дила (Быт. 1:10, 12). Прецтавь пэсти, сар лошавэнас и анӷелоря, кала диқэнас, сар пэ ԥув и по нэбо по набут ашэлас вся май шукарнэс. Лэнди фартэ чалёлас, сар о Иегова када терэлас и вонэ всаворэ ӷромко хвалинас лэс. Амэ ӷанас, кай кала о Иегова создавал и ԥув, пэ када лэстэ ужыля тысячи бэрша. Но кала во дотердя кадэя дила, тоди во ԥэндя, кай када «фартэ драго» (Быт. 1:31). w21.08 9, абз. 6, 7

О Иисусо андэ пэстири притча росԥэнэн пала мурш, саво тидяпэ тэ ладэл андо баро дром. И во роздя пэстирэ рабонэнди ловэ, пэ савэ ԥэнэнас таланторя и ԥэндя, кай вонэ тэ терэн варисави дила пэр лэндэ. Во полэлас, со можэт тэ стерэл кажно кадэва рабо. Важ када еқэ рабости во дя панч таланторя. Аврэ рабости во дя дуй таланторя, ай лэ тритонэсти дя ек таланто. Пэрви дуй раборя линэ драго тэ терэн и дила, сави во лэнди дя. Ай о трито рабо дажэ на ля нисо тэ терэл кадэлэ ловэнца. И важ када лэско ӷосподино фартэ пэр лэстэ росхоляйля. Пэрви дуй раборя фартэ драго стердэ пэстири дила, сави дя лэнди о ӷосподино. Вонэ пристодэ бут зор и лэндэ вижыля тэ затерэн дувар май бут ловэ. Важ када лэнго ӷосподино най кати похвалисардя лэн, но и дя лэнди тэ терэн инке май бари дила. w21.08 21, абз. 7; 22, абз. 9, 10

Андэ послидни деса дицол, кай лэ Иеговастэ фартэ бари терпения. Во дэл лэ манушэнди время, кай вонэ тэ каинпэ. Важ кода кай во «на камэл, кай варико тэ мэрэл» (2 Пет. 3:9). Но во най долӷо лэла тэ тэрпий. Кодэлэн, ко на закамэла тэ залэл лэстири риг, аштярэл кода жэ со сас лэ фараоноса. О Иегова через о Моисеё ԥэндя лэсти: «Мэ ужэ дэлмут бишалдоп пэр тутэ и пэ тиро народо страшно бида и стрисардоп тут па ԥув. Но мэ на умардэм тут, кай тэ сыкавав тути мэрно зор и кай па вся и ԥув тэ уӷанэн мэрно алав» (Исх. 9:15, 16). Кадяжэ и андэ амарэ деса всаворэ мануша уӷанэна лэ Иеговаско зор и прижанэна, кай во ек чачуно Дэл (Иез. 38:23). Кала о Дэл май англэ «тиноя» о нэбо и ԥув, сар ԥэнэнпэ андо адесутно стихо, всаворэ, ко на закамэна тэ прижанэн, кай во правителё, авэна умардэ пэ вся и вечность, сар и о фараоно. w21.09 18, 19, абз. 17, 18

Тумэндэ можэт тэ дуқал оди кодэлэстар, кай варико анда чаче ашадя лэ Иеговас. Дэсавэ ԥрала и ԥэя моӷут тэ ԥэнэн кацавэ алава, савэндар ашэл инке май ԥарэс. Со тоди тэ терас? Можэт най всаворэ моӷут тэ подтидэн правильни алава (Иак. 3:2). Амэ всаворэ нэсовершэни, важ када трэбуй тэ полас, кай варико, можэт, на ӷанэнас, со тэ ԥэнэн или най нарошно ԥэнэна кода, состар ашэла ԥарэс по ди. На бистрэн пала лэ Павлостирэ алава: «На холявэн ек пэ ек и анда вся оди простин ек еқэс, если варикастэ исин васо тэ холявэл пэ авэр» (Кол. 3:13). На парашэн тэ шон сама лэ ерес, андэ саво исключисардэ варикас. Акана лэнди, сар никала трэбуй, кай лэн тэ подритярэн и тэ заботинпэ пала лэндэ (Евр. 10:24, 25). Дэкала лэндэ по ди кацаво, кабута лэн исключисардэ. Но нащи кадя тэ гиндон! Особенно фартэ важно тэ хвалисарас и тэ придас зор лэ тэрнорэ ԥралэнди и ԥэянди, кастирэ родителя ашадэ лэ Иеговас. w21.09 29, абз. 13, 14; 30, абз. 16

Кала и ԥрала и ԥэя андэ бэршэндэ общяюца лэ тэрнэнца андэ собрания, када анэн лашымос всаворэнди (Рим. 1:12). И тэрнэ ԥрала и ԥэя андэ собрания инке еқвар моӷут тэ додиқэн, сар о Иегова заботийпэ пала служытеля, савэ лэс на парашэн тэ кандэн. Ай и ԥурэ ԥрала и ԥэя моӷут тэ полэн, сар лэн любин и цэнин. Ай инке лэнди фартэ чалёл тэ росԥэнэн аврэнди, сар о Иегова блаӷословияс лэн пала кода, кай вонэ лэс на парашэнас тэ кандэн. Прожан бэрша и о шукаримос лэ манушэстар ужэ ужал. Но андэ лэ Иеговастирэ яқа кодэла, ко лэс на парашэн тэ кандэн, ашэн кати май шукарнэ (1 Фес. 1:2, 3). Ай вся важ кода, кай вся пэстири жызня кадэлэ христианоря домэкэнас, кай лэ Иеговаско свынто духо тэ парувэл лэн и вонэ тэ авэн лэсти уӷодни. Если амэ май драго уӷанас лэ ԥурэ ԥралэн и ԥэян и сытювас лэндар, тоди амэнди май вушэро авэла тэ полас, пэ скати вонэ дэ куч, и амэ трэбуй пэр лэндэ тэ стас бари патив! Кай андэ собрания тэ авэл драго и бахталэс, важно, кай и молодёж тэ цэний лэ ԥралэн и лэ ԥэян, савэ андэ бэршэндэ. Ай и ԥурэ ԥрала и ԥэя трэбуй тэ цэнин лэ тэрнэн. w21.09 7, абз. 15—18

Трэбуй тэ терас вся, кай тэ на обжаспэ строӷо аврэнца, ай кадяжэ фартэ важно тэ сытювас кай о Иегова, саво анда вся оди полэл и жалуий (Эф. 2:4). Тэ полас и тэ жалуисарас трэбуй най кати андо ди, но и тэ дицол када пэ дила. Амэ трэбуй тэ полас, сави помощь амэ можэм тэ дас амарэ родости, лэ ԥралэнди и лэ ԥэянди андэ собрания и лэ сосидонэнди. Например, амэ можэм лэн тэ подритярас, тэ поприлас па цэр, ай можэм тэ андярас хамос. Ай важ кодэла, ко найдэлмут рисайля андэ собрания, амэ можэм тэ авас друӷоря. И если ласа тэ росԥэнас аврэнди пала Дэл, кадя амэ со май драго сыкаваса, кай полас и жалуисарас аврэн (Иов 29:12, 13; Рим. 10:14, 15; Иак. 1:27). Чаче, амэ бут андэр со можэм тэ сыкавас, кай полас и жалуисарас лэ манушэн! Просто трэбуй тэ авас май внимательни. Тоди амаро небесно Дад лэла тэ лошавэл, важ кода кай во анда вся оди полэл и жалуий всаворэ манушэн! w21.10 13, абз. 20—22

Андо 23 Псалом о Давидо росԥэнэн, со па чачимастэ куч, — бут блаӷословении кай о мануш, саво витидя лэ Иеговас пэстирэ Пастухоса. Во андярэл лэ Давидос па праведни дрома и предано подритярэл, со бы тэ на авэл. Но о Давидо полэл, кай и служэния лэ Иеговасти на фэрий лэс лэ ԥаримастар. Дэкала андэ лэстири жызня моӷут тэ авэн трудности и дажэ вороӷоря. Но важ кода, кай о Иегова — лэско пастухо, во ԥэнэн: «На дарава никастар». Кай о Давидо сас вся, со трэбуй, кай тэ авэл лэ Иеговаско друӷо. Важ када, кай тэ авэл бахтало, лэсти на трэбуй сас бут мищимос. Во сас довольно кодэлэса, со дэлас лэсти о Иегова. Само ӷлавно важ лэстэ сас, кай о Иегова блаӷословий и фэрий лэс. Лэ Давидостирэ алава сыкавэн, пэскати дэ важно амэнди правильно тэ диқас по мищимос. w22.01 3, 4, абз. 5—7

Всегда сас и мануша, савэ на камэнас тэ ашунэн лэ Иеговастирэ служытелёнэн. Например, о Ноё андярэлас приӷоворо лэ Иеговастар варикай 40 или 50 бэрш (2 Пет. 2:5). О Ноё надеияспэ, кай и мануша приашундёнапэ, но о Иегова на ԥэндя, кай кадя авэла. Кала во дя лэ Ноёсти задания тэ строий о ковчеӷо, во ԥэндя: «Ту зажаса андо ковчеӷо, и туса зажана тирэ шавэ, тири хулаи и тирэ боря» (Быт. 6:18). Важ кода кай о ковчеӷо сас най фартэ баро па размеро, о Ноё полэлас, кай каринг лэстэ приашундёна набут мануша (Быт. 6:15). Но, сар амэ ӷанас, кацавэ манушэн совсем на сас (Быт. 7:7). О Иегова на гиндояс, кай о Ноё най драго стердя и дила, сави во лэсти дя. Наоборот, андэ Библия пала лэстэ ԥэнэнпэ, кай во «стердя кадя, сар ԥэндя лэсти о Дэл. Точно кадя во и стердя» (Быт. 6:22). w21.10 26, абз. 10, 11

Погиндон, со сас по ди кай и Руфь, кала вой ашундя алава, савэ запистромэ андо адесутно стихо! Вой бут со стердя важ и Ноеминь, подритярэлас и ровэлас ласа, жыля ласа андо баро дром, ай кодэя ԥэнэн: «О Иегова рисардя ман шушэ вастэнца». И када англа Руфь! Кабута вся, со вой стердя важ и Ноеминь, сас евья. Наверно, важ и Руфь сас фартэ обидно када тэ ашунэл. Но вой всаек на одбанделя пэстиря сасуятар (Руфь 1:3—18). Можэт, скати бы тумэ тэ на стон зор, кай тэ поможын ла ԥьяти, сави умэкля и вас, вой всаек ԥэнэна тумэнди варисо ӷрубо. Старыинпэ тэ на прилэн када фартэ пашэ каринг оди, на одбандён ла ԥьятар и мангэн лэ Иеговас тэ поможый тумэнди тэ полэн, сар май драго ла тэ подритярэн (Прит. 17:17). Возможно, ԥэй, савятэ ԥаримос, спэрва можэт тэ отԥэндёлпэ, кай амэ тэ дас лати помощь. Но кодэва, ко предано любий, на ашавэла пэстирэ друӷос андэ бида (Гал. 6:2). w21.11 11, абз. 17—19

Кала андэ Библия пистромэ алава «свынто» и «святость», обычно дэлпэ дума, сар правильно тэ тэлювас лэ Иеговасти, сар вужэс тэ андярас пэс и пала кода, со свынто. Кадэла алава сыкавэн, кай варисо или варикас отделисардэ важ и служэния лэ Иеговасти. Аврэ алавэнца, амэ свынти, если жувас и тэлювас лэ Иеговасти кадя, сар во камэл, и если амэндэ исин лащи дружба лэса. Кати погиндон: тумэ можэте тэ авэн друӷоря лэ свынтонэ Дэвлэсти! Но особено лэл лэ одестар, кала амэ гиндосарас, со андэ Библия пистромэ пала лэ Иеговастири святость. О Иегова свынто андэ вся. Када сыкавэн и алава, савэ ԥэндэ и серафиморя: «Свынто, свынто, свынто, о Иегова, хулай пэ войскоря!» (Ис. 6:3). И серафиморя находинпэ паша лэ Иеговаско престоло. Канешно, кай тэ авэн паша свынто Дэл, вонэ екжэнэ трэбуй тэ авэн свынти. w21.12 3, абз. 4, 5

Бут тэрнэ мануша пэрэжывают, кала трэбуй тэ ришын, соса лэна тэ залэнпэ андэ жызня. Еқа ригатар, и учителёря и лэнго родо, савэ на служын лэ Иеговасти, моӷут тэ подԥэнэн лэнди тэ жан тэ сытён андо университето и тэ виарақэн лащи бути. Но када можэт тэ залэл фартэ бут время. Ай авря ригатар, и родителя и ԥрала и ԥэя андэ собрания моӷут тэ подԥэнэн лэнди май бут тэ служын лэ Иеговасти. Но со поможыя лэ тэрнэ ԥралэнди и ԥэянди, савэ любин лэ Иеговас, тэ прилэн мудро ришэния? Амарэ любими тэрнэ ԥрала и ԥэя, проадинон Эфесянам 5:15—17 и погиндон пала кадэла алава. Пушэн пэстар: «Со камэл мандар о Иегова? Сави ришэния радуия лэс? Со мэ тэ витидав, кай годявэрнэс тэ использую мэрни время?» Сэрэн: «андэ кадэла деса бут найлашымос» и кадэя люма, савяса правий о Сатана, ӥто на ашэла. w22.01 27, абз. 5

Кала о Иаково ашэля предано лэ Иисусоско ученико? Посли кода, сар о Иисусо рисайля каринг и жызня, «во сыкаделя лэ Иаковости, потом всаворэ апосталонэнди» (1 Кор. 15:7). Када парудя вся лэ Иаковостири жызня. Во сас лэ апосталонэнца андэ упруни комната андо Иерусалимо, кала вонэ аштярэнас, кай пэр лэндэ тэ сжал о свынто духо (Деян. 1:13, 14). Ӷэт май интя во служыяс андо руководящё совето (Деян. 15:6, 13—22; Гал. 2:9). Ай инке, варикай жы кай 62 бэрш н. э., во через о свынто духо пистросардя о письмо лэ христианонэнди, савэ сас памазаникоря. Кадэва письмо анэн лашымос и амэнди адес, и нэважно, кай амэ надеисавас тэ жувас — по нэбо чи пэ ԥув (Иак. 1:1). И сар ԥэндя о Иосифо Флавиё, о иудейско ӷлавно рашай о Анано Младшо приԥэндя, кай лэ Иаковос тэ казнин. Жы каринг пэстири смэрть о Иаково ашэляпэ верно лэ Иеговасти. w22.01 8, абз. 3; 9, абз. 5

Сости амэ сытювас анда лэ Иисусостирэ алава, савэ запистромэ андо адесутно стихо? Пэрво, амэ на трэбуй тэ аштярас, кай о Иегова авэла тэ фэрий амэн любона бидатар. О Иисусо пэрэандярдя вся о ԥаримос. Можэт и амэнди прижалапэ тэ хасарас пэстири жызня через кода, кай амэ на парашас тэ кандас лэ Иеговас (Матф. 16:24, 25). Но амэ можэм точно тэ ӷанас, кай о Иегова на домэкэла ԥаримос, саво най па амаро зор (1 Кор. 10:13). Дуйто, амэнца, сар и лэ Иисусоса, моӷут тэ обжанпэ нэсправедливо (1 Пет. 2:19, 20). Кодэла, ко на дэн амэнди спокойно тэ служысарас лэ Иеговасти, терэн када най важ кода, кай амэ терас варисо най кадя, ай важ кода кай амэ на терас, сар всаворэ мануша андэ кадэя люма и росԥэнас о чачимос пала Дэл (Иоан. 17:14; 1 Пет. 4:15, 16). О Иисусо полэлас, васо о Иегова домэкля, кай лэстэ тэ авэл кацаво ԥаримос. Но дэсавэ лэ Иеговастирэ служытеля, савэ на парашэн лэс тэ кандэн, моӷут тэ на дополэн, васо о Иегова домэкэл, кай андэ лэндири жызня тэ авэл ԥаримос (Авв. 1:3). Но амаро Дэл, саво полэл и жалуий и саво на грабий тэ холявэл, ӷанэн, кай вонэ всаек патян лэсти. Лэнди просто фартэ ԥарэс, и о Иегова терэл кадя, кай лэнди тэ авэл май вушэро по ди (2 Кор. 1:3, 4). w21.04 11, абз. 9, 10

Лэ Иеговасти чалёл амари поклонения кати тоди, кала амэ тэлювас лэсти кадя, сар во камэл, анда вся оди любисарас лэс и стас патив пэр лэстэ. Амэ полас, кай во достойно, кай амэ тэ тэлювас лэсти. И амэ камас тэ отдас лэсти андэ служэния со май лашо. И молитва ужал андэ поклонения лэ Иеговасти. Андэ Писания ԥэнэнпэ, кай амарэ молитвы — када, сар драго стердо фимиамо, саво сԥабарэнас андэ свынто бари катуна и андо храмо. О фимиамо сас приятно лэ Иеговасти. Кадяжэ и кала амэ мангаспэ анда вся оди, када фартэ чалёл амарэ Дэвлэсти (Втор. 33:10; Прит. 15:8). Лэсти приятно, кала амэ ԥэнас пала пэстири любовь и блаӷодарность. О Иегова камэл, кай амэ тэ росԥэнас пала пэстирэ пэрэжывании, со амэ фартэ камас и пэр со надеисавас. Англа кода, сар тэ мангаспэ, авелоп драго тэ погиндосарас, со амэ камас тэ ԥэнас лэ Иеговасти. Кадя амарэ молитвы авэна важ лэстэ, сар со май лашо фимиамо. w22.03 20, абз. 2; 21, абз. 7

Андо Армагеддоно амэ на ласа тэ витидас, кас о Иегова трэбуй тэ жалуий, ай кас най (Матф. 25:34, 41, 46). Ласа амэ тэ доверяем лэ Иеговасти или холяваса и парашаса тэ служысарас лэсти? Дицол, кай трэбуй тэ сытювас тэ доверяем лэ Иеговасти ужэ акана, и тоди амэ ласа андэ вся тэ доверяем лэсти и май англэ. Прецтавьте, кай тумэ ужэ андо раё. Будэр нинай хохавнэ веры и жадно камерческо система. Инке нинай политическо система, сави поумардя милионоря манушэн и андя лэ мирости фартэ бут ԥаримос и бида. Андэ амари жызня ужэ нинай найлашо зор, ԥуримос и смэрть. Лэ Сатанас и лэ бэнгэн шутэ андэ пропасть пэ 1 000 лет. О Иегова улэла вся о найлашымос, саво вонэ стердэ, кала жылэ против лэстэ (Отк. 20:2, 3). Сар жэ амэ аваса бахталэ, кай доверяли лэ Иеговасти! w22.02 6, 7, абз. 16, 17

О Иисусо старыияспэ тэ поможый лэ манушэнди тэ на споринпэ и тэ примиринпэ. Например, во сытярэлас, кай если амэ камас, кай лэ Иеговасти тэ авэл уӷодно амари служэния, амэнди трэбуй тэ примирисавас амарэ ԥралэса (Матф. 5:23, 24). Во най еқвар поможыяс лэ апосталонэнди, кай вонэ тэ парашэн тэ споринпэ, «ко андар лэндэ май баро» (Луки 9:46—48; 22:24—27). Тэ ладис аврэнца — када най просто никаса тэ на спориспэ. Амэ трэбуй тэ старысавас тэ поможысарас лэ манушэнди тэ ладин ек еқэса (Флп. 4:2, 3; Иак. 3:17, 18). Амэ можэм тэ пушас пэстар: «Пэр со мэ ӷотово тэ жав, кай тэ поладисарав аврэнца? Если о ԥрал или ԥэй тердя манди больно, ритярав мэ холи андо ди? Ӷотово мэ пэрво тэ жав тэ помирисавав или гиндосарав, кай када трэбуй тэ стерэл кодэва, ко, па мэрнятэ, дошало?» w22.03 10, абз. 10, 11

Дэлмут андэ Библия сас запистромэ ек пророчество, кай лэ Дэвлэско народо авэла ӷотово тэ терэл дила и лэла тэ служый лэ Иеговасти тала лэ Иисусоско руковоцтво (Пс. 110:3). Адес амэ диқас, сар исполнийпэ кадэва пророчество. Лэ Дэвлэстирэ служытеля проандярэн милионоря часоря андэ служэния и терэн када бесплатно и анда вся оди. Кадяжэ вонэ поможын, кай лэ ԥралэндэ и лэ ԥэяндэ тэ авэл вся, со трэбуй, подритярэн лэн, кай лэнди тэ авэл драго по ди, и дэн зор, кай вонэ тэ на дурён лэ Иеговастар. И сар жэ бут время ужал кай и барэдэр ԥрала, кай тэ подӷотовят пэстирэ задании пэ собрании и тэ авэн каринг и ԥрала и ԥэя пэ пастырски посещении! Васо всаворэ вонэ када терэн? Важ кода кай любин лэ Иеговас и лэ манушэн (Матф. 22:37—39). О Иисусо всегда май бут гиндояс пала авэр, чем пала пэстэ, и кадя ашадя амэнди розлашо примеро. Амэ пристас вся о зор, кай тэ сытювас лэстар андэ када (Рим. 15:1—3). И, кала амэ жувас па лэско примеро, када анэн амэнди бут лашымос. w22.02 20, абз. 1, 2

Бут израильтяноря сас земледельцоря. Лэ работникости, савэс наймисардэ, трэбуй сас тэ отдэн и ловэ важ и бути андэ кодэва жэ дес, а то лэсти авелоп найсоса тэ праварэл пэстирэ ерес. Лэ Иеговасти сас жалко кацавэ манушэс и важ када во ԥэндясас: «Отдэн и ловэ лэсти андэ кодэва жэ дес, пока на бэшэла о қам, важ кода кай во чороро и лэстири жызня зависит кадэлэ ловэндар» (Втор. 24:14, 15; Матф. 20:8). Адес бутэ манушэнди видэн и зарплата най кажно дес, ай еқвар или дувар андо шон. И всаек о принцыпо, пэ саво ритярдёлпэ о законо анда Левит 19:13, поджал и андэ амарэ деса. Дэсавэ барэдэра пэ бути розбарвадёнпэ кодэлэстар, кай потинэн лэ работниконэнди пэ бутэстэ май набут, чем трэбуй. Вонэ ӷанэн, кай бут мануша соӷласинапэ тэ терэн дажэ важ и копийки, важ кода кай найкаринг тэ терэнпэ. Но о христианино трэбуй справедливо тэ потинэл лэ работникости, савэс наймисардя. w21.12 10, абз. 9, 10

Посли кода сар лэ Иисусос примардэ каринг столбо, лэстэ пэрэшутеля андо муй и во фартэ камэлас тэ пэл. Лэсти трэбуй сас варико андэ када тэ поможый. О Иисусо на гиндояс, кай тэ мангэл помощь варикастар, када найдраго. И амэ нащи кадя тэ гиндосарас. Если амэнди трэбуй варисо тэ стерас, тоди амэ терас када екжэнэ, кала амэндэ исин пэ када зор. Но если амэндэ нинай зор, амэ можэм тэ мангас помощь, кай авэр ԥрала и ԥэя анда собрания. Например, если о ԥрал или и ԥэй андэ бэршэндэ, вонэ моӷут тэ мангэн варикас анда собрания, кай лэн тэ андярэн андо маӷазино или каринг о врачо. Ай если варикасти ԥарэс по ди, тоди можно тэ мангэн лэ барэдэрэ ԥралэн или варикас анда собрания, кай вонэ тэ поможын или тэ виашунэн (Прит. 12:25). На ласа тэ бистрас, кай и ԥрала и ԥэя любин амэн и фартэ камэн тэ поможын амэнди андо ԥаримос (Прит. 17:17). Но вонэ нэ моӷут тэ полэн, со амэндэ по гиндо, и кай амэнди трэбуй помощь, если амэ лэн пала када на мангаса. w21.04 11, 12, абз. 11, 12

Найвушэро, кала варисо парудёл андэ жызня. Дэсавэнди, ко служыяс полновремено фартэ бут бэрша, прижыляпэ тэ парувэн и назначения. Авэр трэбуй сас тэ ашавэн пэстири любимо служэния через и ԥурэ бэрша. Канешно, кадэлэстар можэт тэ авэл ԥарэс по ди. Но если тумэндэ паруделя варисо андэ жызня, старыинпэ тэ диқэн пэ вся лэ Иеговастирэ яқэнца. Адес во терэл бари дила, и амэнди випэля бари бах тэ авас лэстирэ сотрудникоря (1 Кор. 3:9). Амэнди моӷут тэ дэн разни задании андэ арӷанизацыя, но лэ Иеговастири любовь каринг амэндэ никала на парудёл. Важ када, если варисо паруделя андэ тумари жызня, на тратин бут время и зор, кай тэ полэн, васо када тердяпэ. Вместо кода, кай вся и время тэ задэн пэсти вопросо: «Васо варикала сас май фэдэр, чем щяс?» — мангэн лэ Иеговас тэ поможый тумэнди правильно тэ диқэн пэ ситуацыя (Эккл. 7:10). Старыинпэ, кай тумэндэ тэ авэл лашо настроё. Блаӷодаря кадэлэсти, амэ на хасараса и радость и на парашаса предано тэ служысарас лэ Иеговасти. w22.03 17, абз. 11, 12

Кас предано любий о Иегова? Андэ Библия ԥэнэнпэ, кай можно бут со тэ любис. Например, о мануш можэт тэ любий тэ залэлпэ ла ԥувьяса, тэ любий вино, вулей, совето, знания, мудрость и бут со инке (2 Лет. 26:10; Прит. 12:1; 21:17; 29:3). Но тэ любис предано вся када нэвозможно. Каринг всаворэ мануша о Иегова сыкавэл предано любовь? Най, кати каринг пэстирэ друӷоря. Во дэл алав, кай лэндэ авэла райкани жызня англэ и кай во лэн никала на ашавэла. О Иегова сыкавэл пэстири любовь каринг всаворэ мануша. О Иисусо ԥэндя еқэ манушэсти, савэс ақарэнас Никодимо: «О Дэл кадя фартэ любий лэ мирос, кай отдя пэстирэ Шавэс, саво лэстэ ек кацаво, кай кажно, ко сыкавэл, кай патял андэр лэстэ, тэ на мэрэл, ай тэ жувэл вечно» (Иоан. 3:1, 16; Матф. 5:44, 45). w21.11 2, абз. 3; 3, абз. 6, 7

И жызня андэ кадэя люма фартэ ԥари. Амэнди трэбуй тэ сытювас тэ пэрэандярас любо ԥаримос ужэ акана, важ кода кай англэ авэла инке май ԥарэс (Матф. 24:21). Сар жэ фартэ амэ аштярас кодэя время, кала вся када прожала и будэр на авэла ԥаримос андэ амари жызня! И аштярас кодэя время, кала дажэ по гиндо на авэла кода, саво ԥаримос амэ пэрэжудям (Ис. 65:16, 17). О Иисусо ԥэндя: «Тумэ фэрина пэстири жызня кодэлэса, кай виритярэн о ԥаримос» (Луки 21:19). Кай тэ виритярас вся о ԥаримос, саво исин амэндэ андэ жызня, амэнди трэбуй тэ сытювас кай кодэла мануша, савэндэ вижыля када тэ стерэн. Со май драго ӷанэн тэ пэрэандярэл о ԥаримос, када о Иегова. Пока о Сатана правий кадэла люмаса, андэр латэ фартэ бут ԥаримос. И если о Иегова закамэла, во сможэт сразу вся када тэ улэл. Но во аштярэл кодэя время, сави во стодя, кай тэ улэл вся пэско ԥаримос (Рим. 9:22). w21.07 8, абз. 2—4