Сентябрё

Дэсавэ манушэнди на хутилэлас кода, кай о Иисусо лэн сытярэлас. Вонэ камэнас варисо май бут. Во на ля тэ терэл нисавэ чудеса важ лэндэ, и важ када кадэла мануша на закамлэ тэ патян андо Иисусо (Матф. 16:4). О пророко Исаия пистросардясас пала Христос: «Во на лэла тэ цыпий и ӷромко тэ дэл дума и пэ вулицы на ашундёла лэско ӷолосо» (Ис. 42:1, 2). Кала о Иисусо служыяс пэ ԥув, во никала на шолас фартэ бут сама пэр пэстэ. Во на строияс барэ храморя, на ԥиравэлас варисави ӥда, кай тэ дицол, кай во варисаво важно мануш. Во на мангэлас, кай пэр лэстэ тэ стон бари патив и тэ ԥэнэн варисаво ашунгло алав. Кала во сас по сындо во на ля тэ сыкавэл нисавэ чудеса, кай тэ уӷодий лэ царёсти лэ Иродости, саво моӷ тэ прилэл ришэния, кай лэс тэ на умарэн (Луки 23:8—11). Да, кала о Иисусо сас пэ ԥув, во терэлас чудеса. Но само ӷлавно важ лэстэ сас, када тэ росԥэнэн пала Дэл. И во дажэ ԥэндя пэстирэ учениконэнди: «Важ када мэ и авелэм» (Мар. 1:38). w21.05 4, абз. 9, 10

Амэ родас кодэлэ манушэн, ко камэл тэ уӷанэн пала Дэл (Деян. 13:48). Но кай вонэ тэ ашэн лэ Иисусостирэ ученикоря, амэнди трэбуй тэ поможысарас лэнди тэ полэн, тэ прилэн и тэ терэн кадя, сар уӷанэн анда Библия (Кол. 2:6, 7; 1 Фес. 2:13). Кажно ԥрал чи ԥэй андэ собрания можэт тэ поможый лэ манушэсти, саво изучает и Библия, кай лэстири дружба лэ Иеговаса тэ авэл май лащи. Например, амэ анда вся оди шас сама лэс, кала во авэл пэ собрания, и сыкавас, сар амэ полас ек еқэс (Иоан. 13:35). Лэ ԥралэсти или ла ԥьяти, савэ проандярэн и изучения Библии, трэбуй бут время и зор, кай тэ поможын лэ манушэсти. Важ кода кай лэстэ моӷут тэ авэн найлашэ привычки и во присытеля тэ жувэл па пэстирэ законоря (2 Кор. 10:4, 5). И можэт прожала най ек шон англа кода, сар о мануш закамэла тэ болдёл. Но када ашэл, кай тэ пристас бут зор! w21.07 3, абз. 6

Патяс амэ, кай кода, сости сытярэн лэ Иеговастирэ свидетеля, када чачимос, и кай лэ Дэвлэсти уӷодно, сар амэ лэсти тэлювас? О апостало Павло фартэ патялас, кай виарақля о чачимос пала Дэл (1 Фес. 1:5). Во най просто патялас, ай во драго вся розуӷанэнас, кай «всаворэ алава андэ Писания лэ Дэвлэстар» (2 Тим. 3:16). Каринг со андя кода, кай во драго розуӷанэнас? Андэ Свынто Писания о Павло виарақля, со доԥэнэн, кай о Иисусо када о Христос, савэс о Дэл бишалдя пэ ԥув. Но и барэдэра андэ веры на камэнас андэ када тэ патян. Кадэла мануша, савэ притерэнаспэ, кай патян андо Дэл, ԥэнэнас, кай патян, но пэ дила када на дицолас (Титу 1:16). О Павло цэнияс и Свынто Писания, важ када на витидэлас, андэр со тэ патял, ай андэр со тэ на патял. И во ԥэндя кацавэ алава: «Мэ на парашавас тэ росԥэнав вся лэ Дэвлэстири воля» (Деян. 20:27). w21.10 18, абз. 1, 2

Амэ трэбуй тэ полас, хоть амэ росԥэнас пала Иегова и проандярас и изучения Библии, но авэла о мануш тэ служый лэ Иеговасти чи най, зависит лэ Иеговастар (1 Кор. 3:6, 7). Лэсти куч кажно мануш. Важ амэндэ бари бах тэ терас ек дила лэстирэ Шавэса. Амэ сар и о Иисусо росԥэнас о чачимос лэ манушэнди анда всаворэ народоря, пока на авеля и само бари бида, сави инке никала на сас (Агг. 2:7). Амэ андэ служэния шаспэ, пэ спасателя, савэ вилэн лэ манушэн тала завалоря. Важно кай всаворэ тэ терэн кадэя дила, хоть можэт най кажно спасателё виарақэла лэ манушэн тала завалоря. Кацаво жэ можно тэ ԥэнас и пала амари служэния. Амэ на ӷанас скати манушэн сможэм тэ спасысарас анда лэ Сатанастири люма. Но амэ ӷанас точно, кай о Иегова поможый кажнонэсти андар мэндэ, кай амэ тэ стерас кадэя дила. О ԥрал Андреас анда Боливия ԥэнэн, кай если болдёла хоть дажэ ек мануш, када блаӷодаря кодэлэсти, кай кажно андар мэндэ пристодя пэ када бут зор. Давайте ласа и дальшэ тэ цэнисарас амари служэния и тэ терас када баря лошаса. Тоди о Иегова блаӷословия амэн и и служэния анэна амэнди май бут радость! w21.05 19, абз. 19, 20

Любо охотнико камэл тэ астарэл лэ жывотнонэс или тэ умарэл лэс. И во када терэл по разному. Пала када дажэ пистромэ андэ Библия (Иов 18:8—10). Но сар о охотнико астарэл лэ жывотнонэс? Во шол сама со чалёл лэ жывотнонэсти, со во хал, кай ԥирэл, сар андярэл пэс. Точно кадяжэ терэл и о Сатана. Во драго розуӷанэн савэ амэ. Во шол сама, каринг амэ ԥирас, со амэ терас и со амэнди чалёл. Кадя во полэл, сар амэн тэ змарэл па лэ Иеговаско дром. Но андэ Библия пистромэ, кай дажэ если лэ Сатанастэ вижала тэ змарэл амэн, амэ всаек можэм тэ рисавас каринг о Иегова и дажэ можэм тэ стерас вся, кай тэ на подаспэ лэсти. Бут бэрша о Сатана камэл тэ змарэл лэ манушэн па лэ Дэвлэско дром через и ӷордость и жадность. Во сар охотнико, саво камэл тэ астарэл лэ жывотнонэс (Пс. 91:3). Но када на сыкавэл, кай лэстэ точно вижала када тэ стерэл. Васо? Важ кода кай о Иегова росԥэнэн амэнди пала лэ Сатанастирэ ловушки, через савэ во камэл тэ змарэл амэн па правильно дром (2 Кор. 2:11). w21.06 14, абз. 1, 2

И ԥрала и ԥэя, савэ андэ бэршэндэ, па чачимастэ фартэ куч андэ собрания. Андэ Библия ԥэнэнпэ, кай лэнди сиди бал, када, сар шукарно винко лэндэ по шэро (Прит. 20:29). Но всаек дэкала амэ можэм тэ на шас сама пэр лэндэ. Но если амэ сытювас тэ додиқас, савэ вонэ амэндэ па чачимастэ райканэ, тоди амэ поласа, кай вонэ важ амэндэ фартэ куч. И када на сыстоса нисавэ барвалимаса. Важ о Иегова фартэ куч лэстирэ служытеля, савэ андэ бэршэндэ. Во лэн драго ӷанэн и цэний, савэ вонэ. Лэсти чалёл, кала вонэ подԥэнэн лэ тэрнэ ԥралэнди и ԥэянди андэ собрания (Иов 12:12; Прит. 1:1—4). Кадяжэ лэ Иеговасти фартэ куч, кай вонэ виритярэн о ԥаримос (Мал. 3:16). И хоть лэндири жызня на сас спокойно, вонэ всаек на парашэлэ тэ патян андэр лэстэ. И вонэ на парашэлэ тэ аштярэн о лашымос англэ, ай наоборот, инке май фартэ линэ тэ патян андэ када. Ай инке о Иегова лэн фартэ любий важ кода, кай вонэ андэ ԥурэ бэрша на парашэн тэ росԥэнэн пала лэстэ аврэ мирости (Пс. 92:12—15). w21.09 2, абз. 2, 3

Кажно андар мэндэ трэбуй тэ пушэл пэстар: «Драго манди по ди, кала мэ гиндосарав, кай мэ май лашо аврэндар? Сыстосарав мэ пэс аврэнца? Важ кастэ мэ лавпэ тэ терав варисави дила андэ собрания? Кай тэ доԥэнав, кай мэ май лашо всаворэндар или май лашо варисавэ ԥралэстар или ԥьятар? Или мэ просто камав тэ отдав лэ Иеговасти вся со май лашо?» Андэ Библия ԥэнэнпэ, кай на трэбуй тэ сыстосарас пэс аврэнца. Если ту лэс тэ гиндос, кай ту май лашо аврэндар, тоди ту можэш тэ ашэс ӷордо. Ай авря ригатар, если ту лэса тэ гиндос, кай ту май хужэ аврэндар, тоди ту лэса пала када тэ пэрэжываеш (Рим. 12:3). Давайте тэ на бистрас, кай о Иегова полюбисардя амэн най важ амари шук, кай амэндэ бут друӷоря, или кай амэ ӷанас шукарнэс тэ дас дума. О Иегова амэн полюбисардя важ кода, кай амэ полюбисардям лэс и камас тэ кандас лэстирэ Шавэс (Иоан. 6:44; 1 Кор. 1:26—31). w21.07 14, 15, абз. 3, 4

Кай тэ гиндос пала пэстэ драго, тути трэбуй тэ мангэспэ, тэ изучаеш и Библия и тэ гиндос пала кода, со проадиносардян. Манг лэ Иеговас тэ поможый тути никала тэ на бистрэс пала када. И тоди через о свынто духо о Дэл поможыя тути тэ на сыстос пэс аврэнца, тэ на завидуис аврэнди, ай кадяжэ тэ на гиндос пала пэстэ бут (2 Лет. 6:29, 30). О Иегова ӷанэн, со амэндэ по ди. Кадяжэ во ӷанэн, сар дэ ԥарэс амэнди тэ на шаспэ пэ мануша андэ кадэя люма и тэ на терас кадя, сар вонэ. И кала о Иегова диқэл, сар амэ старысавас, во амэн инке май фартэ любий. Кай тэ полас, сар о Иегова амэн любий, амэнди поможый о примеро анда Библия пала дэй и пала лако бэято (Ис. 49:15). Кадяжэ точно о Иегова амэн любий, кала диқэл, кай амэ пэрэандярас бут ԥаримос андэ жызня и пристас бут зор, кай тэ на парашас тэ служысарас лэсти. Через кадэва гиндо, амэнди фартэ драго по ди! w21.07 24, 25, абз. 17—19

Амэ аваса май бахталэ, кала и служэния лэ Иеговасти важ амэндэ авэла со май ӷлавно. Важ када трэбуй «анда вся оди» тэ служыс лэ Иеговасти и тэ терэс май бут дила андэ собрания (Деян. 18:5; Евр. 10:24, 25). Драго ӷотовься каринг кажно собрания, кай тирэ атветоря тэ дэн зор лэ ԥралэнди и лэ ԥэянди. Если тути и ԥрала динэ пэ собрания тэ стерэс речь или тэ сыкавэс, сар можно тэ задэс дума лэ манушэса пала Дэл или тэ адинос анда Библия, тоди драго стер када. Ай если вонэ тут манглэ тэ стерэс авэр дила, тоди сыкав, кай пэр тутэ можно тэ надеиспэ, и стер вся каринг кодэя время, каринг сави трэбуй. Никала на гиндосар, кай вся, со ту терэс важ о Иегова, када вся евья. Наоборот, старысав варисости тэ сытёс (Прит. 22:29). Со май бут ту пристоса зор андэ служэния лэ Иеговасти, со май лащи дружба тутэ авэла лэса. Кадя ту авэса инке май лошало (Гал. 6:4). И кадяжэ тути авэла май вушэро тэ радуиспэ важ авэр ԥрала и ԥэя, кала лэнди дэн тэ терэн андэ собрания дила, сави ту камлян тэ терэс (Гал. 5:26). w21.08 22, абз. 11

На ашэн ӷорди и сытён лэ Иеговастар. Исин дэсаво насвалимос, кала и артэрии андо ди моӷут тэ замардён, и тоди во ужэ нэ можэт тэ марэлпэ, сар трэбуй. Кадя жэ через и ӷордость амаро ди можэт тэ ашэл баруно, и амэ парашаса тэ приашундювас каринг лэ Дэвлэско алав. О Иегова дя лэ фарисеёнэнди бут доказательства, кай о Иисусо — када о Христос. Но через и ӷордость лэнго ди ашэля баруно, и вонэ отԥэнделэ тэ патян кодэлэсти, со диқлэ пэстирэ яқэнца (Иоан. 12:37—40). Кадя вонэ пэрэԥандадэ пэсти о дром каринг и вечно жызня (Матф. 23:13, 33). Па лэнго примеро амэ диқас, сар дэ важно тэ домэкас, кай лэ Дэвлэско Алав и о свынто духо тэ влияют пэ амаро гиндо и пэ амарэ ришэнии. О Иаково сас смирено, и важ када во сас ӷотово тэ сытёл лэ Иеговастар. Блаӷодаря кадэлэсти во кадяжэ ашэля лашо учителё. w22.01 10, абз. 7

Если амэ на парашас тэ мангаспэ, тоди о Иегова ашунэна амарэ молитвы (Кол. 4:2). Амэнди можэт тэ сдэлпэ, кай о Иегова на ашунэн. Но па чачимастэ во дэл атвето андэ кодэя время, кала када трэбуй (Евр. 4:16). Важ када на трэбуй тэ дошалярас лэ Иеговас, кай во на дя кода, со мангасас. Например, бут мануша мангэнпэ, кай тэ авэл лэ Дэвлэско Царство и тэ улэл кадэя най лащи люма. О Иисусо ԥэндя, кай пала када трэбуй тэ мангаспэ (Матф. 6:10). И авэла найгодявэрнэс тэ парашас тэ патяс лэ Иеговасти, важ кода кай и мануша аштярэнас, кай о раё пэ ԥув ужэ авэла, ай лэс инке нинай! (Авв. 2:3; Матф. 24:44). Авэла годявэрнэс, если амэ на парашаса тэ мангаспэ лэ Иеговасти пала када и тэ патяс, кай во дэла атвето и кадэла люмати авэла конец андэ кодэя время, дес и часо, андэ саво стодя о Иегова. И трэбуй тэ сэрас, кай о Иегова витидя важ када именно кодэя время, сави поджала всаворэ манушэнди, савэ лэс любин (Матф. 24:36; 2 Пет. 3:15). w21.08 10, абз. 10, 11

И ԥрала и ԥэя, савэ андэ бэршэндэ, сыкавэн, кай вонэ най ӷорди, кала полэн, кай ужэ нэ моӷут тэ стерэн скати важ о Иегова, скати терэнас андэ тэрнэ бэрша. Например, и раёни барэдэр ԥрала, кала лэнди ашэл 70 лет, вонэ трэбуй тэ ашавэн пэстири служэния. И када можэт тэ авэл найвушэро, важ кода кай вонэ всаворэ одеса заботинаспэ пала ԥрала и ԥэя. Но вонэ полэн, кай андэ кадэя служэния трэбуй тэрнэ ԥрала, савэндэ бут зор. Кадэла раёни барэдэр ԥрала шонпэ пэ левиторя андо Израилё, савэ ашавэнас пэстири служэния андэ свынто катуна, кала лэнди ашэлас 50 бэрш. Но вонэ всаек сас бахталэ кодэлэстар, кай моӷут тэ поможын кодэлэ левитонэнди, савэ сас май тэрнорэ (Чис. 8:25, 26). Кадяжэ и раёни барэдэр ԥрала, кала ашавэн пэстири служэния, всаек лошалэ. Вонэ ужэ нэ моӷут тэ заботинпэ пала бут собрании сразу, но вонэ бут со моӷут тэ терэн, кай тэ придэн зор лэ ԥралэнди и лэ ԥэянди андэ кодэя собрания, андэ сави вонэ служын. w21.09 8, 9, абз. 3, 4

Андэ Луки 15:11—32 пистромэ пала шаво, саво ужыля цэрал. Кадэва тэрно мануш закамля тэ жувэл, сар лэсти чалёл. Во ужыля вобще андэ авэр страна. Во терэлас вся, со лэсти камэласпэ. Но кала лэстэ андэ жызня ашэля бут ԥаримос, во загиндосайля и поля, пэ скати лэсти фэдэр сас тэ жувэл андэ лэ дадэско цэр. Сар ԥэндя о Иисусо, во обгиндосайля, ришыл тэ рийпэ цэрэ и тэ мангэл кай пэско дад прощения. Вижал, андэ кадэва маменто, кала во поля, кай фартэ найдраго стердя, во ля тэ парудёл. Лэсти трэбуй сас инке варисо тэ стерэл. Кай кадэва тэрно мануш каисайля, дицолас па лэстири дила. Када най просто лащи притча. Андэр латэ исин фартэ важни принцыпоря важ и барэдэр ԥрала, кала вонэ лэн тэ розлэнпэ андэ кода, чаче о христианино каийпэ чи най. w21.10 5, абз. 14, 15

Кала о апостало Павло дэлас дума пала лэ Агеёско пророчество, во ԥэндя: «кай тэ ашэлпэ кода, со састэс тердёл». Сар када тэ полас? О Павло пистросардя: «Важ када кай амэ ӷанас, кай амэндэ авэла Царство, саво састэс тердёл, амэ трэбуй тэ андярас пэс кадя, кай о Дэл тэ дэл амэнди о лашымос, саво на затердям. Через када амэ можэм тэ служысарас лэ Дэвлэсти кадя, сар во камэл, када баря пативаса и тэ дарас лэстар» (Евр. 12:28). Посли кода, сар о Иегова «тиноя» о нэбо и ԥув, кадэла люматар ашэлапэ кати о прахо, ай лэ Дэвлэско Царство лэла тэ тердёл вечно, и лэс нико никала на розмарэла! (Дан. 2:44; Пс. 110:5, 6). Время ашэляпэ совсем набут! И мануша трэбуй тэ витидэн, савэ дромэса тэ жан. Тэ жан па дром, саво андярэл каринг и вечно жызня или па дром, саво андярэл каринг и смэрть. Аврэ алавэнца, лэна вонэ тэ жувэн кадя, сар сытярэн и мануша андэ кадэя найлащи люма или парувэна пэстири жызня андэ лащи риг и лэна тэ жувэн кадя, сар чалёл лэ Дэвлэсти (Евр. 12:25). И кала амэ росԥэнас пала Дэл, амэ можэм тэ поможысарас лэ манушэнди тэ витидэн, касти вонэ лэна тэ служын. Пристам зор, кай тэ родас кацавэ манушэн и тэ сэрас пала лэ Иисусостирэ алава: «Па вся и ԥув росԥэнэна и лащи новость пала Царство, кай ла тэ ашунэн всаворэ народоря, и тоди поджала и время кадэла люмати» (Матф. 24:14). w21.09 19, абз. 18—20

Барэдэр ԥрала, тумари обязаность, — тэ подритярэн кодэлэн, кастэ варико анда родо ашадя лэ Иеговас (1 Фес. 5:14). Общяйтесь кацавэ ԥралэнца и ԥэянца жы каринг и собрания и посли латэ. Авэн каринг лэндэ, мангэнпэ лэнца. Ақарэн лэн пэ служэния и дэкала проандярэн лэнца семейно изучения. Лэнди фартэ трэбуй кадэя помощь. Полэн лэн, жалуин, шон сама и заботинпэ пала лэндэ (1 Фес. 2:7, 8). О Иегова «на камэл, кай варико тэ мэрэл, но камэл, кай всаворэ тэ каинпэ» (2 Пет. 3:9). Дажэ кала о мануш стердя баро бэзэх, важ о Иегова лэстири жызня всаек куч. Кати погиндон, кай во отдя пэстирэ любимонэ Шавэс, кай тэ витинэн амэн анда бэзэх! Важ кода кай о Иегова полэл и жалуий, во процырдэл пэско вас кодэлэнди, ко ашадя лэс, и ԥэнэн, кай вонэ тэ ринпэ палпалэ. И кай тэ полас, сар о Иегова аштярэл кацавэ манушэн, о Иисусо росԥэндясас о примеро пала дад и пала шаво, саво жылятар цэрал (Луки 15:11—32). w21.09 30, 31, абз. 17—19

Варико через найлашо зор или ԥурэ бэрша ужэ нэ можэт кадя бут тэ служый и тэ поможый лэ манушэнди тэ ашэн лэ Иисусостирэ ученикоря. Дажэ если када кадя, амэ всаек можэм тэ лошавас, кай хоть набут терас варисо важ лэ Дэвлэстири дила. Шам сама пэ ек ситуацыя анда лэ Давидостири жызня. Во и лэстирэ 600 воиноря уӷанглэ, кай и амаликитяноря захутилдэ лэндирэ еря и залинэ вся лэнго хабэ. Тоди о Давидо пэстирэ манушэнца ля тэ ӷонийпэ пала лэндэ. Но 200 воиноря вимарделэ анда зор и нэ смоӷли тэ прастэн пала бандиторя. И всаек, посли кода, сар о Давидо победисардя лэ вороӷонэн, во поровну роздя и бажын всаворэ пэстирэ манушэнди (1 Сам. 30:21—25). Анда када амэ бут сости сытювас. Кажно разо, кала варико ашэл лэ Иеговаско служытелё, када бари бах важ вся и собрания. И кажно вазвещятелё, саво терэлас вся, со сас па лэско зор, можэт тэ радуийпэ всаворэ ԥралэнца и ԥэянца, кай кадэва мануш ля тэ служый лэ Иеговасти. О Дэл диқэл, саво зор амэ пристас и савэ одеса када терас. Именно важ када во амэн и блаӷословия. Кадяжэ о Иегова поможый амэнди тэ на хасарас и радость андэ служэния, дажэ если амэ терас совсем набут (Иоан. 14:12). Патян, если тумэ на сдэнпэ и на умэкэн и вас, о Иегова тумэнца фартэ довольно! w21.10 28, абз. 15—17

Часто ԥрала и ԥэя, савэ ужэ андэ бэршэндэ, пэрэжывают, кай нэ моӷут тэ служын лэ Иеговасти, сар варикала. И со май ԥурэ вонэ ашэн, со май фартэ вонэ пала када пэрэжывают. Чаче, жан бэрша и лэнго зор ашэл май хужэ. Но вонэ бут со полэн и бут со пэрэжудэ андэ жызня. Через када вонэ моӷут тэ подԥэнэн лэ тэрнэнди, кай вонэ тэ терэн бут дила андэ лэ Дэвлэстири арӷанизацыя. Если и ԥрала и ԥэя, савэ андэ бэршэндэ, камэн тэ поможын лэ тэрнэ ԥралэнди и ԥэянди андэ собрания, тоди лэнди трэбуй тэ на авэн ӷорди. Када сыкавэл, кай вонэ трэбуй тэ на гиндон, кай май лашэ аврэндар (Флп. 2:3, 4). Тэ стерэн варисави дила андэ собрания можно по разному, но, ӷлавно, тэ вижал драго и тэ авэл па Библия. Кала и ԥрала и ԥэя, савэ андэ бэршэндэ, полэн када, тоди вонэ на лэна тэ гиндон, кай трэбуй тэ терэн вся по старинке, кадя, сар вонэ присытелэ (Эккл. 7:10). Чаче, кадэла ԥрала и ԥэя бут со полэн андэ жызня и моӷут тэ поможын лэ тэрнэ ԥралэнди и ԥэянди. Но вонэ трэбуй тэ полэн, кай «андэ кадэя люма вся парудёлпэ» и, можэт, лэнди трэбуй тэ сытён тэ терэн варисо па аврятэ андэ лэ Иеговастири арӷанизацыя (1 Кор. 7:31). w21.09 8, абз. 1, 3

О Иегова на камэлас, кай машкар лэско народо тэ авэл варисаво билажавардимос. О Иегова свынто андэ вся. И кай и израильтяноря тэ сэрэн пала када, пэ сомнакуни пластина по тюрбано кай о само баро рашай, сас пистромэ: «О Иегова свынто» (Исх. 28:36—38). Кадэя надпись дэлас всаворэнди, ко ла диқэл, тэ сэрэн, кай о Иегова свынто. Но най всаворэ израильтяноря моӷли тэ диқэн лэ само барэ рашас. Тоди можно тэ ԥэнэс, кай вонэ на ӷанэнас када? Най. Всаворэ мурша, жувля и бэяцэ ашунэнас пала када, кала адинонас лэ Моисеёско законо (Втор. 31:9—12). Прецтавьте, кай тумэ тердён вмести всаворэнца и ашунэн кацавэ алава: «Мэ о Иегова, тумаро Дэл. [...] Авэн свынти, важ кода кай мэ свынто». «Авэн свынти важ мандэ, важ кода кай мэ, о Иегова, свынто» (Лев. 11:44, 45; 20:7, 26). w21.12 3, абз. 6, 7

Дэкала найвушэро тэ парашас тэ пэрэжываем. Дэсавэ моӷут тэ пэрэжывают пала кода, со тэ хан, со тэ лэн пэр пэстэ и кай тэ жувэн. Можэт, вонэ жувэн андэ найбарвали страна. Котэ лэнди ԥарэс тэ затерэн ловэ, кай тэ проправарэн лэ ерес. Или о хулай андо ери можэт тэ мэрэл, и ужэ найкасти тэ позаботийпэ пала ери. Дэсавэ хасардэ и бути и о доходо. Со поможыя тэ улас пэстар и пэрэжывании? Трэбуй тэ надеисавас по Иегова. На бистрэн: амаро любящё небесно Дад, о Иегова, дэл алав, кай позаботияпэ пала амэндэ, если лэстири дила андэ амари жызня по пэрво ҭан (Матф. 6:32, 33). Во ужэ сыкадя, кай всегда зритярэл пэстирэ обещяния (Втор. 8:4, 15, 16; Пс. 37:25). Если о Иегова диқэл пала птицы и пала цвиторя, то, канешно, и амэ на трэбуй тэ пэрэжываем, со тэ хас и андэр со тэ утидаспэ (Матф. 6:26—30; Флп. 4:6, 7). Через и любовь и родителя заботинпэ пала пэстирэ бэяцэ. Кадяжэ и амаро небесно Дад через и любовь дэл амэнди вся, со трэбуй важ и жызня. Да, амэ можэм тэ патяс, кай о Иегова позаботияпэ пала амэндэ! w21.12 17, абз. 4—5; 18, абз. 8

Ай тумэндэ сас кацаво, кай тумэнца нэсправедливо андярдэ пэс и ԥрала и ԥэя андэ собрания? Сгиндосарам пала Иосифо. Лэса нэсправедливо андярдэ пэс лэстирэ чаче ԥрала. Но во вся пэско зор отдэлас андэ служэния лэ Иеговасти. О Иегова лэс блаӷословисардя, важ кода кай во аштярэлас, кала во зашолапэ пала лэстэ и пэрэандярэлас о ԥаримос андэ пэстири жызня. Прожыля время и о Иосифо простисардя пэстирэ ԥралэн, савэ стердэ, кай лэстири жызня тэ авэл фартэ ԥари. И во поля, кай о Иегова вся и время диқэлас пала лэстэ и поможыяс лэсти (Быт. 45:5). И амэнди, сар и лэ Иосифости, авэла май вушэро по ди, кала амэ вся отдаса андэ лэ Иеговастири вас, кай во тэ стерэл тэ авэл справедливость (Пс. 7:17; 73:28). Если и тути ԥарэс кодэлэстар, кай туса обжылэпэ нэсправедливо или авэр варисаво ԥаримос, тоди трэбуй тэ сэрэс, кай «о Иегова паша кодэва, ко бидаса умардо, и фэрий кодэлэс, касти ԥарэс по ди» (Пс. 34:18). О Иегова любий тут, важ кода кай ту аштярэс и патяс, кай во улэла тутар о ԥаримос (Пс. 55:22). Во справедливо Дэл и диқэл вся (1 Пет. 3:12). Важ када если тутэ ԥаро маменто андэ жызня и ту на ӷанэс, со тэ терэс, на бистэр, кай важно тэ на парашэс тэ аштярэс лэ Иеговас. w21.08 11, абз. 14; 12, абз. 16

Тэ витидас тэ жас дромэса, саво сыкавэл о Иегова, авэла важ амэндэ со май лащи ришэния. Важ када трэбуй тэ витидас, со май важно. Дэкала, кай годявэрнэс тэ используем амари время, амэнди прижалпэ тэ витидас анда лашэ ришэнии со май лащи. Кай тэ полас када май драго, давайте вспомним о случаё, кала о Иисусо авелясас в ӷости кай и Марфа и кай и Мария. И Марфа сас кадя радо, кай лэндэ авеля кацаво ӷостё, кай закамля тэ стол мисяйля, сар пэ ябьявэстэ. Ай и Мария кай сас андэ кадэя время? Кай тэ на умэкэл кацави возможность, вой «бэшля паша лэ Ӷосподостирэ пэрнэ и ля тэ ашунэл лэс». Канешно, кай и Марфа на сас вэрыто гиндо, но и Мария «витидя со май лашо» (Луки 10:38—42). Наверно потом и Мария дажэ на сэрэлас, со сас по столо андэ кодэва дес, но амэ можэм точно тэ ԥэнас: вой вся пэстири жызня на бистрэлас кодэя лэ Иисусостири дума. И Мария цэнияс кажно минута, кала лэндэ зажалас лэ Дэвлэско Шаво. Кадя жэ и амэ трэбуй тэ цэнисарас кажно возможность тэ проандярас время лэ Иеговаса. w22.01 27, абз. 5, 6

Хоть о Ахаво и прижангля, кай сас дошало англа Иегова, всаек кода, сар во пэс андярэлас, на сыкавэлас, кай во каисайля. Уля во лэ хохавнэ дэвлэс лэ Ваалос анда пэско царство? Най. Ԥэндя во лэ народости тэ тэлён кати лэ Иеговасти? Най. Посли кода, сар о Ахаво муля, дицэля, со гиндояс пала лэстэ о Иегова. Кала о Иосафато блаӷополучно рисайля цэрэ, о Иегова бишалдя каринг лэстэ лэ пророкос, савэс ақарэнас Ииуё. Во трэбуй сас тэ ԥэнэн, кай нащи сас лэстэ тэ авэл варисави дила лэ Ахавоса. О пророко ԥэндя лэсти: «Хэба трэбуй тэ поможыс лэ найлашэ манушэнди и тэ любис кодэлэн ко шол вэрыцыя по Иегова?» (2 Лет. 19:1, 2). Кати погиндон, если о Ахаво чаче тэ каийпэ анда вся оди, тоди ԥэндоп о пророко пэр лэстэ, кай во найлашо мануш и шол вэрыцыя по Иегова? Дицол, кай о Ахаво прижангля, кай во дошало, кати пэ алава, ай пэ дила на дицэля, кай во каисайля. Сости амэ сытювас анда кода, со сас лэ Ахавоса? Кала во ашундя, кай лэстирэ ерес умарэна, во прижангля пэстири дош. Када сас правильно. Но андэ кода, сар пэс андярэлас о Ахаво потом, дицэля, кай во па чачимастэ на каисайля. Вижал, кала о мануш каийпэ, лэсти на хутила просто тэ ԥэнэн, кай во стердя нэправильно. w21.10 3, абз. 4, 5, 7, 8

О Исайя сас пророко. И андэ Библия ԥэнэнпэ, кай лэстири хулаи сас пророчица, и, наверно, о Иегова дэлас лати дила, кай вой тэ пэрэдэл лэстирэ алава (Ис. 8:1—4). Вижал, важ о Исайя и лэстири хулаи само ӷлавно андэ жызня сас и служэния лэ Иеговасти. И еря андэ амари время моӷут кадя жэ, сар о Исайя и лэстири хулаи, тэ пристон бут зор андэ служэния лэ Иеговасти. Если о хулай и хулаи вмести лэна май драго тэ изучают и пророчества анда Библия и тэ диқэн, кай вонэ всегда исполняюца, тоди вонэ лэна май фартэ тэ патян лэ Иеговасти (Титу 1:2). Кадяжэ авэла драго, кай о хулай и хулаи тэ погиндон, со лично вонэ моӷут тэ стерэн, кай тэ исполняца кадэла пророчества. Например, ек андар лэндэ, када лэ Иисусостирэ алава: «Па вся и ԥув росԥэнэна и лащи новость пала Царство, кай ла тэ ашунэн всаворэ народоря, и тоди поджала и время кадэла люмати». Со май драго вонэ полэна, кай и библейски пророчества точно исполняюца, со май фартэ вонэ закамэна тэ терэн май бут андэ служэния лэ Иеговасти. w21.11 16, абз. 9, 10

О Иисусо пэрэжывал пала пэстири дэй, сави андэ кодэя время ужэ сас ԥивли. Во ԥэндя, кай пала лэстири дэй тэ заботийпэ о Иоанно. О Иисусо любияс ла Мария и пэрэжывал пала латэ. Во ӷанэнас, кай о Иоанно драго диқэла пала латэ и поможыя, кай латири вера андо Дэл тэ авэл май састи. Кадэлэ десэстар о Иоанно ашэля важ и Мария сар чачо шаво. Во заботияспэ пала латэ, сар пала пэстири дэй. О Иисусо сыкадя бари любовь каринг кадэя манушни, сави сар кати во арақаделяпэ, фэрияс лэс, заботияспэ и диқэлас пала лэстэ. И дажэ англа лэстири смэрть, вой сас паша лэстэ! Сости амэ сытювас анда лэ Иисусостирэ алава? Амэнди моӷут тэ авэн май пашэ и ԥрала и ԥэя анда собрания, чем амаро ери. О родо можэт тэ на дэл амэнди тэ служысарас лэ Иеговасти и дажэ тэ парашэл амэнца тэ дэл дума. Но сар ԥэндясас о Иисусо, если амэ лэ Иеговаса и андэ лэстири арӷанизацыя, тоди амэ нисо на хасараса, ай наоборот амэндэ авэла вся май бут. Андэ собрания и ԥрала и ԥэя важ амэндэ авэна, сар дад и дэй, и сар ԥрал и ԥэй (Мар. 10:29, 30). Андэ собрания амэ всаворэ, сар ек баро ери, андэ саво всаворэ любин ек еқэс, любин лэ Иеговас и патян лэсти. Со тумэндэ кадэлэстар по ди? (Кол. 3:14; 1 Пет. 2:17). w21.04 9, 10, абз. 7; 11, абз. 8

Если амэ предано любисарас, амэ камас тэ терас май бут, чем амэндар аштярэн. Адес бут чачунэ христианоря сыкавэн, кай предано любин лэ ԥралэн и лэ ԥэян. Вонэ дажэ сыкавэн предано любовь каринг кодэла, кас на ӷанэн лично. Например, кала терэлпэ бида андэ природа, вонэ сразу авэн тэ поможын. Ай если андэ собрания варикасти трэбуй помощь, вонэ на аштярэн, кала лэн мангэна пала када. Кадэлэса вонэ шонпэ пэ христианоря анда Македония, савэ жувэнас андо пэрво вико. Кодэла христианоря екжэнэ жувэнас найбарвалэс, но вонэ сас ӷотови бут состар тэ отԥэндёнпэ, кай тэ поможын кодэлэнди, касти сас инке май ԥарэс. Кадя и адес бут христианоря терэн «дажэ май бут», чем лэндар аштярэн (2 Кор. 8:3). И внимательни барэдэр ԥрала шон сама по лашымос, саво терэн и ԥрала и ԥэя, и хвалин лэн пала када. Да, лашэ, приятни алава моӷут тэ придэн амэнди зор, кай амэ и дальшэ тэ сыкавас предано любовь (Ис. 32: 1, 2). w21.11 11, абз. 14; 12, абз. 21

Амэ ӷанас, кай амэнди всаворэнди дэкала трэбуй совето. Например, амэ екжэнэ можэм тэ мангас, кай кодэва, пэр кастэ амэ стас патив, тэ подԥэнэн амэнди, андэр со амэ трэбуй тэ парудювас. Ай можэт, о ԥрал или и ԥэй пэрэжывают пала амэндэ и на ашэн мулком, если диқэн, кай амэ можэм тэ стерас варисо най кадя (Гал. 6:1). Кадяжэ, если варико андар мэндэ ужэ стердя бари ошыбка, лэсти трэбуй тэ дэн строӷо совето. Сави бы тэ на авэл ситуацыя, амэнди трэбуй тэ приашундювас каринг кода, со амэнди подԥэнэн. Можэт тэ авэл кадя, кай о совето дажэ спасыя амэнди и жызня! (Прит. 6:23). Андо адесутно стихо ԥэнэнпэ: «Внимательно ашун, кала дэн дума и мудри». Нинай ни ек мануш, саво ӷанэн вся. Всегда исин варико, ко ӷанэн май бут амэндар (Прит. 12:15). Вижал, если амэ ӷотови тэ приашундювас каринг о совето, када сыкавэл, кай амэ найӷорди. Аврэ алавэнца, амэ прижанас, кай най вся па амаро зор и кай амэнди трэбуй помощь. О мудро царё Соломоно пистросардя: «Если пушэс совето бутэ манушэндар, тоди вся вижала» (Прит. 15:22). w22.02 8, абз. 1, 2

Кай о мануш па чачимастэ тэ каийпэ, лэсти трэбуй тэ стерэл варисо май бут, чем просто тэ мангэл прощения. Лэсти трэбуй андо ди и андэ годи вся тэ парувэл. Во трэбуй тэ ашавэл пэстири найлащи жызня и упалэ тэ жувэл кадя, сар ԥэнэн о Иегова (Иез. 33:14—16). Лэстири дружба лэ Иеговаса фартэ римосайля. Важ када во трэбуй вся и время тэ гиндой пала кода, сар жэ упалэ тэ рий ла. Со ту терэса, если уӷанглян, кай тиро друӷо стердя баро бэзэх? Кала ту лэса тэ гаравэс о бэзэх, саво стердя тиро друӷо, ту терэса лэсти кати хужэ. И всаек на вижала тэ угаравэс лэско бэзэх, важ кода кай о Иегова вся диқэл (Прит. 5:21, 22). Ту поможыса пэстирэ друӷости, если ԥэнэса, кай во тэ жал каринг и барэдэр ԥрала и пала вся тэ росԥэнэн. Важ кода кай вонэ заботинпэ, кай амэндэ тэ авэл вся драго. Но если во на закамэла тэ росԥэнэн лэнди пала пэско бэзэх, ту трэбуй екжэно када тэ стерэс. Кадя ту сыкавэса, кай ту чаче лэско друӷо. w21.10 7, абз. 19—21

Кажно христианино трэбуй тэ сытёл лэ Иисусостар и тэ жал пэ жэртвы важ авэр. Андэ Библия ԥэнэнпэ, кай о Иисусо «шутяпэ по рабо» (Флп. 2:7). Лашо рабо или слуӷа родэл возможность тэ уӷодий пэстирэ ӷосподиности. Амэ лэ Иеговастирэ раборя и, можно тэ ԥэнас, сар слуӷоря важ амарэ ԥрала и ԥэя. И амэ камас тэ терас вся, кай тэ уӷодисарас лэнди. Задэн пэсти кацавэ вопросоря: «Камав мэ тэ жав пэ жэртвы важ авэр? Аштярав мэ, пока манди най еқвар ԥэнэна, кай мэ тэ терав уборка по канӷрэсо или тэ диқав пала Зало Царства?» Можэт, тумэ полинэ, кай трэбуй андэ варисостэ тэ парудён, но най фартэ камэлпэ када тэ терэн. Если када кадя, анда ди мангэнпэ лэ Иеговасти. Ворта ԥэнэн лэсти, кай тумэнди на хутилэл зор тэ парудён и мангэн лэс, кай «тумэ тэ камэн и тэ терэн дила» (Флп. 2:13). w22.02 22, 23, абз. 9—11

О Иисусо андярэлас пэс по доброму и сас уступчиво, дажэ кала када сас найвушэро (Матф. 11:29, 30). Например, кала и финикиянка помангля лэс тэ исцэлий латиря бэята, спэрва о Иисусо отԥэндя лати. Но кала во додиқля латири састи вера, во жалуисардя ла и исцэлисардя латиря щя (Матф. 15:22—28). Хоть о Иисусо сас добро, дэкала во сас строӷо. Если во диқэлас, кай варикасти трэбуй тэ парудёл, во дэлас совето. Кала о Пётро камля тэ помешает лэсти тэ стерэл лэ Дэвлэстири дила, во англа всаворэ дя лэсти строӷо совето (Мар. 8:32, 33). Но о Иисусо на камля тэ лажаварэл лэ Петрос, наоборот, кадэлэса во сыкадя лэ Петрости и аврэ учениконэнди, кай вонэ тэ на надеинпэ пэр пэстэ. Канешно, лэ Петрости сас нэприятно, но када андя лэсти лашымос. Дэкала, кай тэ сыкавас пэстири доброта каринг кодэла, кас амэ любисарас, амэнди прижалпэ ворта тэ дас лэнди совето. Если тумэнди трэбуй када тэ стерэн, сытён лэ Иисусостар и дэн совето па Библия. w22.03 11, абз. 12, 13

Амэ восхваляем лэ Иеговас, кала ԥэнас аврэнди, саво дэ райкано амаро Дэл и сави удивительно дила во терэл (Пс. 34:1). Если амэндэ андо ди исин блаӷодарность, амэ закамаса бут со тэ росԥэнас лэ манушэнди пала лэстэ. Кала амэ витидас время, кай тэ порозмышляем пала вся, со о Иегова стердя важ амэндэ, амэ полас, кай амэндэ исин бут васо тэ восхваляем лэс. Тэ росԥэнас аврэнди пала лэстэ — када лащи возможность тэ «анас лэ Дэвлэсти хвалебно жэртва, када плодо амаря шыбатар». Кадяжэ, сар амэ розмышляем, со амэ камас тэ ԥэнас лэ Иеговасти андэ молитва, амэ трэбуй май данглал тэ погиндосарас, со амэ ԥэнаса лэ манушэнди андэ служэния. Амэ камас, кай амари «хвалебно жэртва» тэ авэл со май лащи, важ када всаворэ одеса росԥэнас лэ манушэнди пала Дэл. w22.03 21, абз. 8