Октябрё

Само ӷлавно важ амэндэ, кода, со пистромэ андэ Библия. Но дэкасти здэлпэ, кай амари вера фартэ просто и кода, андэр со амэ патяс, на сжалпэ кодэлэса, со лэнди камэлпэ. Ай со поможыя амэнди тэ на парашас тэ патяс, кала и мануша ԥэнэн кацаво? О апостало Павло пистросардя лэ христианонэнди, савэ жувэнас андо Римо: «Кай о мануш тэ патял, спэрва во трэбуй тэ ашунэл, ай кай тэ ашунэл, трэбуй варико лэсти тэ росԥэнэн пала Христос» (Рим. 10:17). Вижал, кай о мануш тэ патял андо Дэл, лэсти трэбуй драго тэ ӷанэн и Свынто Писания, ай най тэ терэл варисавэ обрядоря, савэ терэн андэ авэр религии, савэ бы вонэ шукарнэ и интересни тэ на авэн. Амэнди трэбуй драго тэ ӷанас, со пистромэ андэ Библия и тоди амари вера авэла састи. Андэ Библия пистромэ: «Ко на патял, нэ сможэт тэ уӷодий лэ Дэвлэсти» (Евр. 11:1, 6). Кай тэ полас, кай уӷанглям о чачимос пала Дэл амэнди на трэбуй нисавэ чудеса па нэбо. Амэ трэбуй просто драго тэ изучаем и Библия. w21.05 5, абз. 11, 12

Кай о апостало Павло сас бут ԥаримос. Лэс марэнас, бэшарэнас андо бар и камэнас тэ умарэн (2 Кор. 11:23—25). Лэстэ сас найлашэ гиндоря пала пэстэ (Рим. 7:18, 19, 24). Ай инке лэсти сас фартэ ԥарэс кодэлэстар, кай лэстэ сас найлашо зор, и во дажэ мангэлас лэ Иеговас, кай лэстэ кадэва насвалимос тэ на авэл (2 Кор. 12:7, 8). О Иегова придэлас зор лэ Павлости, кай во тэ на парашэл тэ служый лэсти, дажэ андо ԥаримос. Например, кала о Павло сас андо Римо, лэс бэшардэ тала барунарицко охрана и лэсти нащи сас тэ вижал цэрал. Но во всаек всаворэ одеса на парашэлас тэ росԥэнэн пала Дэл лэ барэ манушэнди, савэндэ сас власть (Деян. 28:17; Флп. 4:21, 22). И инке во росԥэнэнас пала Дэл лэ римсконэ охраниконэнди и «всаворэнди, ко каринг лэстэ авэлас» (Деян. 28:30, 31; Флп. 1:13). Андэ кодэя время о Павло пистросардя письморя, савэ идоси подритярэн лэ христианонэн. w21.05 21, абз. 4, 5

Спэрва о царё У́ззия сас лашо правителё, во драго андярэлас и война, драго строияс, драго диқэлас пала хабэ. И андэ Библия ԥэнэнпэ, кай о Дэл сас лэса, важ када лэстэ вся вижалас (2 Лет. 26:3—7, 10). Но андэ Библия кадяжэ ԥэнэнпэ, кай кала лэстэ ашэля бари власть, во ля тэ гиндой пала пэстэ фартэ бут. Через када во хасардя вся. О царё У́ззия ашэля ӷордо, и важ када во на закамля тэ прилэл о совето, ай стердя па пэстирятэ. Во парашэля тэ кандэл лэ Иеговас. Во зажыля андо храмо, кай по жэртвеннико тэ ԥабарэл и смесь, сави драго қандэл. Ай па лэ Дэвлэско законо, када терэнас кати и рашая. Важ када кай во пэс кадя ӷордо андярдя, о Иегова просытярдя лэс, и во ашэля прокажонно (2 Лет. 26:16—21). Ай можэт варико андар мэндэ тэ ашэл кацаво жэ ӷордо, сар и о царё У́ззия? Да, если лэла тэ гиндой пала пэстэ фартэ бут. На трэбуй тэ бистрас, кай если амэ драго ӷанас тэ терас варисави дила или кала амэндэ исин почотно дила андэ собрания, када вся блаӷодаря лэ Иеговасти (1 Кор. 4:7). И если о мануш ашэла ӷордо, тоди о Иегова на дэла лэсти тэ терэл почотно дила андэ собрания. w21.06 16, абз. 7, 8

О Иисусо полэлас, кай андэ служэния най всегда авэна интересни случаёря. Чаче тэ ԥэнас, амэ дажэ на ӷанас, бут мануша, касти и ученикоря тоди росԥэнэнас пала Дэл, ашэлэ христианоря чи най. О Иисусо камля тэ сытярэл пэстирэ учениконэн тэ полэн важно гиндо. Май бари радость андэ служэния авэла най кодэлэстар, кала амэн драго ашунэн, ай тоди, кала амэ полас, кай лэ Иеговасти приятно тэ диқэл, кай амэ всаворэ одеса служысарас (Гал. 6:7—9). Если амэ, со бы тэ на авэл, на парашас тэ росԥэнас пала Дэл, тоди амэндэ авэла вечно жызня. О земледельцо старыийпэ тэ сеий о зэрно и тэ шол пэр лэстэ паи. Кадя жэ и амэ, сар ԥэндя о Павло, сеисарас, кала терас «кода, со камэл о духо». Аврэ алавэнца, амэ терас кадя, сар амэнди о Иегова подԥэнэн через пэско свынто духо. О Иегова дэл алав, кай кодэлэстэ, ко на умэкэла и вас и на сдэлапэ, авэла вечно жызня. И када нэ зависит, поможысардям амэ варикасти тэ болдёл чи най. w21.10 26, абз. 8, 9

Акэ со сас лэ Иисусоса и лэстирэ учениконэнца. Вонэ вся о дес служынас и фартэ цыелэ. Вонэ закамлэ тэ отцыён. Но кордэ каринг вонэ авелэ тэ отцыён, лэн ужэ аштярэнас фартэ бут мануша. Кала о Иисусо лэн додиқля, лэнди ашэля лэн фартэ жалко, и «во ля бутэсти лэн тэ сытярэл». О Иисусо стодя пэс пэ лэнго ҭан. Во ӷанэнас, кай лэндэ фартэ ԥари жызня и кай лэнди трэбуй тэ уӷанэн пала лэ Дэвлэско Царство. Важ када во закамля лэнди тэ поможый, хоть сас и фартэ цыено. Адес и мануша пэрэандярэн кацаво жэ ԥаримос. И кати здэлпэ, кай лэндэ вся роздраго андэ жызня. Па чачимастэ лэнди ԥарэс и вонэ, сар бакрорэ би пастухоско. О апостало Павло пистросардя, кай кацавэ мануша жувэн би лэ Дэвлэско. Вонэ на ӷанэн, кай англэ о Дэл дэла лащи жызня (Эф. 2:12). Трэбуй тэ полас пэ скати дэ важно тэ росԥэнас лэ манушэнди пала Дэл. Кала амэ ласа тэ полас и тэ жалуисарас лэ манушэн, када фартэ поможыя амэнди андэ служэния. И кала ласа тэ изучаем лэнца и Библия, када со май лашо, со амэ можэм тэ стерас важ лэндэ. w21.07 5, абз. 8

О ӷордо мануш гиндой кати пала пэстэ. Кодэва, ко завидуий аврэнди, най кати камэл пэсти, со исин кай авэр мануш, но и камэл, кай кодэлэ манушэстэ совсем тэ на авэл кода, пэр со ля тэ завидуий. Вижал, кала варико лэл тэ завидуий аврэсти, тоди во ужэ лэл тэ вэрыцый кодэлэ манушэс. Кала о мануш ӷордо и завидуий аврэнди, када сар и мэл сави попэрэл андо керасино, саво шон андо самолёто. О самолёто сможэт тэ звурял, но кадэя мэл на дэла лэсти тэ бэшэл пэ ԥув и во розмардёла. Важ кода кай о двиӷателё нэ сможэт драго тэ терэл. Кадяжэ и о ӷордо мануш можэт тэ служый лэ Иеговасти, но када най пэ долӷонэстэ. Если во на лэла андэ када тэ парудёлпэ, тоди англэ лэс на аштярэл нисо лашо (Прит. 16:18). Во парашэла тэ служый лэ Иеговасти и кадэлэса стерэла вэрыто и пэсти и аврэнди. Тэ на гиндос, кай ту май лашо аврэндар тути поможына лэ Павлостирэ алава анда книӷа Филиппийцам: «На терэн нисо анда холи или кала гиндон кати важ пэстэ. На гиндон, кай тумэ май лашэ аврэндар, ай гиндон, кай авэр май лашэ тумэндар» (Флп. 2:3). w21.07 15, 16, абз. 6—8

Дэкасти здэлпэ, кай андэ Библия трэбуй тэ авэн атветоря пэ всаворэ вопросоря. Но чаче андэ када трэбуй тэ патяс? Уӷанам, со ԥэндя о апостало Павло пала када. Лэ ԥралэнди и лэ ԥэянди во ԥэнэнас: «Вся драго розуӷанэн» (1 Фес. 5:21). Во полэлас, кай бут со можэт тэ на ӷанэн (1 Кор. 13:9, 12). Да, кадя жэ, сар и о Павло, амэ адес бут со на полас. Но во драго ӷанэнас ӷлавно чачимос пала Иегова, и важ када во фартэ патялас, кай вся, со во уӷангля, када чачимос. Кай тэ полас, чаче амэ виарақлям о чачимос пала Дэл чи най, можно тэ сыстосарас, сости сытярэн и сар жувэн лэ Иеговастирэ свидетеля кодэлэса, сар жувэлас о Иисус Христос. w21.10 18, 19, абз. 2—4

Сомнакунэ амарэ ԥрала и ԥэя, савэ андэ бэршэндэ, тумэ можэте тэ поможын аврэнди, и нэ важно, служын тумэ полновременно чи най. Кала варисо парудёл андэ жызня, на хасарэн и радость. Погиндон, со тумэ можэте тэ терэн важ о Иегова и тэ на гиндон пала кода, со тумэ нэ можэте тэ терэн. О царё Давидо фартэ камэлас тэ строий о храмо важ о Иегова. Но кала во уӷангля, кай най во лэла тэ строий, ай о тэрно Соломоно, о Давидо на холяйля. Во дажэ ля тэ поможый и дя бут зор андэ када (1 Лет. 17:4; 22:5). О Давидо на гиндояс, кай фэдэр во тэ строисардоп о храмо и лэстэ када май драго вижылоп, чем кай о Соломоно, важ кода кай во сас инке тэрноро и най вся ӷанэнас (1 Лет. 29:1). О Давидо полэлас, кай нэ важно, ко лэла тэ терэл кадэя дила, ԥуро чи тэрно, или ко бут со полэл. Во ӷанэнас, кай вся зависит лэ Иеговастар. Кадяжэ, сар и о Давидо, и ԥрала и ԥэя, савэ андэ бэршэндэ, на парашэн тэ служын анда вся оди лэ Иеговасти дажэ тоди, кала лэндири дила андэ служэния парудёл. И вонэ патян, кай о Иегова лэла тэ подритярэл лэ тэрнэ ԥралэн и лэ ԥэян, савэ вместо лэндэ терэн и дила андэ служэния лэ Иеговасти. w21.09 9, абз. 4; 10, абз. 5, 8

Кала амэ камас варисо тэ стерас важ о Иегова, тоди исин смысло андэ жызня. Но исин и ек маменто. Трэбуй тэ стерэс кода, со па тиро зор и тэ на сыстос пэс аврэнца. Ай если ту лэса тэ сыстос пэс аврэнца, тоди тутэ умэкэнапэ и вас и ту лэса тэ гиндос, кай май хужэ аврэндар (Луки 14:28). Ту служыс лэ Иеговасти и када сыкавэл, кай ту андэ лэско баро ери, андэ саво тут фартэ всаворэ любин. О Иегова тут фартэ цэний. Ту важ лэстэ особенно. Во закамля туса тэ дружый, най важ кода кай ту май лашо аврэндар, ай важ кода кай во додиқля, кай ту найӷордо мануш, ту на заваздэс о шэро, ту камэс тэ сытёс и тэ парудёс. Мангас тут, на параш тэ патяс, кай о Иегова цэний тут пала вся, со ту терэс андэ служэния лэсти. Кода, кай ту виритярэс о ԥаримос, на парашэс тэ кандэс лэ Иеговас, сыкавэл, кай тутэ «шукарно и лашо ди» (Луки 8:15). Важ када на параш тэ терэс андэ служэния вся, со па тиро зор. Тоди ту лэса тэ лошавэс, кала диқэса пэр пэстэ и на лэса тэ сыстос пэс аврэнца (Гал. 6:4). w21.07 24, абз. 15; 25, абз. 20

Дэкала амэнди прижалпэ тэ аштярас, кала о Иегова стерэла, кай тэ авэл справедливость. Например, кала и барэдэр ԥрала уӷанэн, кай андэ собрания варико стердя бэзэх, вонэ лэн тэ мангэн лэ Иеговастар мудрость, кай тэ прилэн правильно ришэния и тэ диқэн пэ када лэ Иеговастирэ яқэнца (Иак. 3:17). И барэдэр ԥрала камэн тэ поможын лэ манушэсти, кай во тэ рийпэ каринг о Иегова (Иак. 5:19, 20). Кадяжэ вонэ терэн вся, кай тэ фэрин и тэ подритярэн лэ ԥралэн и лэ ԥэян андэ собрания, кай лэнди ԥарэс кодэлэстар, кай варико андэ собрания стердя бэзэх (2 Кор. 1:3, 4). Кала и барэдэр ԥрала розлэн кацави дила вонэ трэбуй спэрва драго пала вся тэ уӷанэн. Ай пэ када можэт тэ ужал бут время. Тоди вонэ мангэнпэ, подтидэн лашэ стихоря, савэ поможына лэ манушэсти, саво стердя бэзэх, и тоди дэн совето па Библия, кай во тэ парудёл (Иер. 30:11). И барэдэр ԥрала на грабин тэ прилэн и ришэния. Кала вонэ терэн кадя сар сытярэл лэн о Иегова, тоди када анэн лашымос всаворэнди андэ собрания. w21.08 10, 11, абз. 12, 13

Кала андо Израилё сас боқалимос, и Ноеминь пэстирэ хуласа и пэстирэ шавэнца ля тэ жувэл андо Моаво. Но через дэсави время латэ муля о хулай. Латирэ шавэ жэнисайлэ, но потом прожыля время и вонэ тожэ мулинэ (Руфь 1:3—5). Через кадэя бида и Ноеминь умэкля и вас. Лати сас фартэ ԥарэс, и вой дажэ ля тэ гиндой, кай андэ латири бида дошало о Иегова. Акэ савэ алава ԥэнэнас и Ноеминь: «О Иегова бишалдя пэр мандэ бида»; «Фартэ бут ԥаримос манди дя о Дэл тэ пэрэандярав»; «О Иегова одбанделя мандар» (Руфь 1:13, 20, 21). О Иегова драго ӷанэнас, кай кала мудро мануш умэкля и вас, «тоди во можэт тэ стерэл дилимос» (Эккл. 7:7). Важ када во подритярдя пэстиря служытельница через и Руфь, сави ла предано любияс, и дя лати помощь. Нежно и анда вся ди и Руфь подритярдя пэстиря сасуя. Вой придя лати зор, кай латэ упалэ тэ авэл лащи дружба лэ Иеговаса. w21.11 9, абз. 9; 10, абз. 10, 13

Тэ цэнисарас и дила, сави амэндэ ужэ исин андэ собрания, када на сыкавэл, кай амэ на камас май бут тэ терас андэ служэния лэ Иеговасти. Амэ най просто камас тэ терас важ о Дэл кода, со па амаро зор. Но амэнди трэбуй тэ домардювас тэ стерас важ о Иегова кода, со загиндосардям. Например, када амэнди поможыя май драго тэ росԥэнас лэ манушэнди пала Дэл и тэ поможысарас лэ ԥралэнди и лэ ԥэянди. И важно, тэ на бистрас, кай най вся па амаро зор, тэ гиндосарас пала авэр май бут, чем пала пэстэ и тэ авас мудри. Тоди амэндэ вижала тэ стерас и дила, сави амэ загиндосардям важ о Иегова (Прит. 11:2; Деян. 20:35). Со ту можэш тэ стерэс важ о Дэл? Манг кай о Иегова, кай во тэ поможый тути тэ диқэс, со ту можэш тэ стерэс, ай со нэ сможэш (Прит. 16:3). Например, ту можэш тэ лэс подсобно пианерско, или тэ авэс общё пианеро или тэ служыс андо Вефилё чи тэ строис варисавэ здании андэ лэ Дэвлэстири арӷанизацыя. Ай можэш тэ сытёс авэр шыб, кай потом тэ дэс дума андэ служэния аврэ манушэнца или тэ пэрэладас кордэ, кай дэн дума пэ кадэя шыб. w21.08 23, абз. 14, 15

Лэ Иеговасти чалёл тэ сыкавэл пэстири предано любовь (Ос. 6:6). О Дэл аштярэл амэндар, кай амэ ласа тэ цэнисарас и предано любовь (Мих. 6:8, сноска). Но, кай тэ ӷанас, сар када тэ терас, трэбуй спэрва тэ полас, со када предано любовь. Андэ «Нэвя люмако переводо» и алава «предано любовь» и «предано тэ любис» пистромэ варикай 230 раз. Со ужал андэ кадэя любовь? Кодэва, кастэ вой исин, во предано, пэр лэстэ можно тэ надеиспэ и во анда вся оди шол сама аврэн. Часто кадэва алав андэ Библия ԥэнэн каринг о Дэл, но кадяжэ када можэт тэ поджал каринг и любовь машкар и мануша. Нико нэ можэт тэ сыкавэл кадэя любовь кадя, сар о Иегова. Пала кадэя любовь пистросардя о Давидо андо пэско Псалом: «Иегова, тири предано любовь жы каринг о нэбо... Сар дэ куч тири предано любовь, мэрно Дэл! Тала тирэ крылоря и мануша гарадён» (Пс. 36:5, 7). Ай амэ цэнисарас кадэя лэ Иеговастири любовь кадя, сар о Давидо? w21.11 2, абз. 1, 2; 3, абз. 4

Лэ Иеговастэ фартэ баро ери. Када о Иисусо, во пэрво анда вся тварения, и фартэ бут анӷелоря (Кол. 1:15; Пс. 103:20). Кадяжэ и мануша, савэ на парашэн лэс тэ кандэн, моӷут тэ ԥэнэн по Иегова Дад. Пала када ԥэндясас о Иисусо пэстирэ учениконэнди: «Мэ жав каринг мэрно Дад и тумаро Дад» (Иоан. 20:17). Важ када, кала амэ болдювас, амэ ашас сар ек ери, андэ саво всаворэ любин ек еқэс (Мар. 10:29, 30). О Иегова най сар начальнико, саво камэл, кай всаворэ би алавэско лэс тэ кандэн. Во любящё Дад, саво андэ любо маменто виашунэна амэн и поможыя. О Иисусо камэл, кай о Иегова и важ амэндэ кадяжэ тэ авэл, сар Дад, сар и важ лэстэ. И най евья андэ пэрви алава андэ пэстири ашунгли молитва во ԥэндя: «Амаро... Дад». Андэ Свынто Писания по Иегова ԥэнэн и «Всемоӷущё», и «Создателё», и «Царё пэ вечность» (Быт. 49:25; Ис. 45:18; 1 Тим. 1:17). О Иисусо моӷ тэ ԥэнэн, кай амэ кадя пэр лэстэ тэ ԥэнас, но во ԥэндя, кай амэ тэ ԥэнас пэр лэстэ «Дадэ». w21.09 20, абз. 1, 3

О Иегова най еқвар бишалэлас пэстирэ пророконэн каринг о царё Манассия, кай тэ ԥэнэн, со лэса авэла, если во на парудёла. Но во нисо на камэлас тэ ашунэн. И тоди о Иегова стердя кадя, кай пэ Иудея динэ и ассирийцоря. Вонэ шутэ пэр лэстэ и цэпоря, андярдэ андо Вавилоно и шутэ андо бар. Котэ во фартэ загиндосайля пала пэстири жызня. Во анда вся оди прижангля, кай дошало англа Иегова. Но када инке най вся. О Манассия ля фартэ тэ мангэл лэ Иеговас, кай тэ простий лэс. Дицол, кай во мангэласпэ най еқвар пала када (2 Лет. 33:10—13). О Манассия ашэля авэр мануш, када дицолас па лэстирэ молитвы. Важ кода кай во анда вся оди мангэласпэ, о Иегова рисардя лэсти лэстири правления. И андэ кода, сар о Манассия андярэлас потом пэстири жызня, дицолас, кай во па чачимастэ каисайля. w21.10 4, абз. 10, 11

О Акила и Прискилла ашадэ пэско цэр, пэстири бути, пэ сави вонэ терэнас и катуны, пэрэлаглэ андэ авэр форо и бут со инке парудэ андэ пэстири жызня. Кала вонэ линэ тэ жувэн андо Коринфо, вонэ всегда служынас ла собранияса и подритярэнас лэ ԥралэн и лэ ԥэян вмести лэ Павлоса. Потом вонэ най еқвар пэрэладэнас андэ разни фороря, кай на хутилэлас кодэлэн, ко росԥэнэнас пала Дэл (Деян. 18:18—21; Рим. 16:3—5). Да, лэндэ па чачимастэ сас интересно и бахтали жызня! И еря андэ амари время моӷут тэ сытён кай о Акила и Прискилла и тэ стон лэ Дэвлэско Царство по пэрво ҭан андэ пэстири жызня. Авелоп драго, кай о шаво и щей, инке кала общяюца, ужэ тэ подэн дума, со авэла ӷлавно андэ лэндири жызня. Если вонэ вмести стон цэли андэ служэния лэ Дэвлэсти и старыинпэ тэ домардён лэн, тоди вонэ домэкэн, кай лэ Дэвлэско свынто духо май фартэ тэ влияет пэ лэндири жызня (Эккл. 4:12). w21.11 17, абз. 11, 12

Амэ трэбуй каринг оди тэ прилас лэ Дэвлэстирэ алава пала кода, кай трэбуй тэ стас патив пэ родителя. Давайте тэ на бистрас, кай о законо тэ стас патив по дад и дэй жал сразу посли алава «Авэн свынти, важ кода кай мэ, тумаро Дэл Иегова, свынто» (Лев. 19:2). Тумэ можэте тэ пушэн пэстар: став мэ патив пэ родителя? Можэт, тумэ полэн, кай най вся и время андярэнас пэс лэнца кадя, сар трэбуй. Да, кода, со сас, на парувэса, но тумэ можэте тэ стон цэль адесутнэ десэстар тэ стерэн вся па аврятэ. Погиндон: «Моӷу мэ тэ проандярав лэ родителёнэнца май бут время? Трэбуй лэнди варисави помощь па цэр? Подритярав мэ лэн, кай лэнди тэ авэл драго по ди и кай вонэ тэ на хасарэн и радость андэ служэния?» Кадэла вопросоря поможына тумэнди май драго тэ ритярэн лэ Дэвлэстири заповедь анда Левит 19:3. w21.12 4, 5, абз. 10—12

О царё Давидо стердя барэ ӷрехоря. Например, во соблазнил ла Вирсавия и дажэ умардя латирэ хулас (2 Сам. 11:2—4, 14, 15, 24). Када андя ԥаримос най кати лэсти, но и кадяжэ лэстирэ ерести (2 Сам. 12:10, 11). Пэ авэр разо во сыкадя, кай най андэ вся надеийпэ по Иегова, кала най па законо закамля тэ стерэл перепись, скати воиноря андэ лэстири армия. Со кадэлэстар вижыля? Варикай 70 000 израильтяноря похынделэ через и эпидемия (2 Сам. 24:1—4, 10—15). Ԥэндоп тумэ, кай во нэдостойно, кай о Дэл лэс тэ простий? О Иегова кадя на гиндояс. Во шутя сама, кай о Давидо всегда сас лэсти предано и кай во каисайля анда вся оди. Важ када о Иегова простисардя лэ Давидос. Во ӷанэнас, кай о Давидо фартэ любий лэс и камэл тэ терэл, со сас правильно. Ай тумэ блаӷодарни лэ Иеговасти, кай во додиқэл варисо лашо андар мэндэ? (1 Цар. 9:4; 1 Лет. 29:10, 17). w21.12 19, абз. 11—13

О Иисусо полэлас и жалуияс лэ манушэн, савэндэ сас варисаво внешнё нэдостатко. Сэрэн, савэ алава во ԥэндя важ о Иоанно Крестителё? «И корэ диқэн, и ланганэ ԥирэн, и прокажони исцэлинпэ, и кашукэ ашунэн, и мулэ ринпэ каринг и жызня» (Луки 7:20—22). Всаворэ, ко диқэлас лэ Иисусостирэ чудеса, прославляли лэ Дэвлэс. И христианоря тожэ камэн тэ полэн и тэ жалуин лэ инвалидонэн, тэ сыкавэн лэнди пэстири доброта, тэ шон сама лэн и тэ авэн терпеливи лэнца. Адес амэндэ нинай зор лэ Иеговастар тэ терас чудеса. Но во дя амэнди задания тэ росԥэнас пала лэско Царство и пала раё пэ ԥув кодэлэнди, ко па чачимастэ коро и ко, можно тэ ԥэнас, коро, кай на ӷанэн лэ Дэвлэс (Луки 4:18). Бут мануша ужэ акана камэн прославлять лэ Дэвлэс, кала ашунэн амэндар и лащи новость, кай всаворэ ашэна зоралэ. w21.12 9, абз. 5

О Иаково шолас сама пэ Писания. Во призындярдя примеро пала Иово и сыкадя, кай о Иегова всегда блаӷословий кодэлэн, ко лэсти предано. Дицол, кай о Иаково сытярэлас простонэ алавэнца. Кадя во шолас сама най пэр пэстэ, ай по Иегова. Уроко: дэн дума просто и сытярэн па Библия. Амари цэль — тэ сыкавас, кай о Иегова мудро и заботливо Дэл, ай най кай амэ фартэ годявэрнэ и бут ӷанас (Рим. 11:33). Кай тэ домардювас када, амэ трэбуй всегда тэ дас дума па Библия. Например, амэ проандярас и изучения лэ манушэса. Если во пушэл совето, авелоп драго тэ на ԥэнас, со амэ тердоп пэ лэско ҭан. Пэ бутэстэ май фэдэр тэ поможысарас лэсти, кай во екжэно тэ порозмышляет пала примероря анда Библия и тэ полэл, со о Иегова гиндой пала када и со лэстэ авэла по ди. Блаӷодаря кадэлэсти о мануш закамэла тэ радуий лэ Иеговас, ай най амэн. w22.01 11, абз. 9, 10

Лэ Дэвлэсти най всаек, сар амэ обжаспэ кодэлэнца, ко паша амэндэ. И дума на жал кати пала кода, кай тэ на стерас лэнди вредо. Кай о христианино тэ радуий лэ Дэвлэс, во трэбуй тэ любий лэ манушэн, сар корко пэс. Пала кода, пэскати дэ важно кадэя заповедь, ԥэндя и о Иисусо. Еқвар о фарисеё мангля лэс тэ ԥэнэн, сави заповедь андо законо само важно. О Иисусо атветил: «Любин пэстирэ Дэвлэс лэ Иеговас всаворэ́ одеса, всаворя́ жызняса и всаворя́ годяса». Ай потом во, кала дэлас дума пала дуйто само важно заповедь, ԥэндя и алава анда Левит 19:18: «Любин лэ манушэн, сар корко пэс» (Матф. 22:35—40). Амэндэ исин бут возможности тэ сыкавас пэстири любовь каринг и мануша, савэ паша амэндэ. Например, важ амэндэ трэбуй тэ авэл фартэ важно и заповедь анда Левит 19:18: «На рисарэн, на ритярэн холи пэ мануша анда тумаро народо». w21.12 10, 11, абз. 11—13

О Иисусо процырдя о вас и спасысардя лэ апосталос лэ Петрос. Вижал, пока о Пётро диқэлас по Иисусо, во моӷ тэ жал па паи. Но кала во ля тэ диқэл, со терэлпэ круӷом лэстэ, во пэрэдарайля, засомневался и ля тэ тасол (Матф. 14:24—31). Амэ можэм тэ сытювас анда лэ Петроско примеро. Кала о Пётро ля тэ жал па паи, лэстэ дажэ андо гиндо на сас, кай во можэт запэрэжывать и тэ лэл тэ тасол. Во камэлас тэ тердёл по паи и тэ дожал каринг пэско Ӷосподо. Но о Пётро парашэля тэ диқэл по Иисусо. Канешно, амэ нэ можэм тэ жас па паи, но амэнди трэбуй вера, кай тэ пэрэандярас о ԥаримос. Если амэ парашас тэ диқас по Иегова и лэстирэ обещянии, тоди амэ тасоваса андэ пэстирэ проблемы. Сави бы буря тэ на авэл андэ амари жызня, амэ трэбуй тэ надеисавас по Иегова и, кай во можэт тэ поможый. w21.12 17, 18, абз. 6, 7

Кала мангаспэ, изучаем и розмышляем — амэ тэлювас лэ Иеговасти. Кала амэ мангаспэ, амэ общяемся амарэ небеснонэ Дадэса, саво амэн фартэ любий. Ай кала изучаем и Библия, амэ май драго уӷанас лэ Дэвлэс, савэстар жал и мудрость (Прит. 2:1—5). Кала амэ розмышляем, амэ май драго уӷанас пала лэ Иеговастирэ розлашэ качестворя, ай кадяжэ пала кода, со во загиндосардя важ и ԥув и важ амэндэ. Со инке можэт тэ авэл май лашо кадэлэстар? Но со поможыя амэнди май драго тэ используем амари время? Если исин возможность, витидэн спокойно ҭан. Роздиқаса лэ Иисусоско примеро. Англа кода, сар тэ начнёца лэстири служэния пэ ԥув, во проандярдя андэ пустыня 40 дней (Луки 4:1, 2). Андэ кодэва спокойно ҭан о Иисусо моӷ тэ мангэлпэ лэ Дадэсти и тэ гиндой, со аштярэл лэстар о Иегова. Кадя лэ Дэвлэско Шаво драго подӷотовился каринг о ԥаримос, саво лэстэ трэбуй сас тэ авэл. w22.01 27, 28, абз. 7, 8

Со, если о барэдэр ԥрал или авэр христианино ԥэнэн амэнди, андэр со амэ трэбуй тэ парудювас? Если о мануш погиндосардя пала амэндэ, виарақля лашо библейско принцыпо и дя амэнди совето, значит, во амэн любий, и амэ важ лэстэ куч. Авелоп драго, кай амэ пэстиря ригатар тэ прилас кацаво совето. Чачимос тэ ԥэнас, фартэ найвушэро тэ прилас совето, саво дэлпэ ворта. Амэ дажэ можэм тэ холявас. Погиндон: всаворэ амэ полас, кай нэсовершэни, но кала варико шол сама пэ амари ошыбка, амэнди сразу ашэл нэприятно (Эккл. 7:9). Тоди камэлпэ сразу тэ виболдаспэ анда кадэя ситуацыя. И амэ дажэ можэм тэ дошалярас лэ манушэс, саво дя о совето, и тэ авас нэдовольни кодэлэса, сар во лэс ԥэндя. Андо шэро моӷут тэ авэн кацавэ гиндоря: «Да ко во кацаво, кай тэ дэл манди советоря?! Мэк пэр пэстэ диқэл». Если амэ и дальшэ ласа кадя тэ гиндосарас, тоди амэ можэм тэ промэкас лашо совето или ласа тэ обратисавас кати кодэлэндэ, ко всегда пэ амари риг. w22.02 8, 9, абз. 2—4

Сар тумэ гиндон, кала амэ попэраса андо раё, авэла амэнди вушэро всегда и андэ вся тэ доверяем лэ Иеговасти? Вспомним, сар линэ тэ андярэн пэс и израильтяноря почти сразу, сар вижылэ анда Египто. Дэсавэ линэ тэ жалуинпэ, кай камэн тэ хан кодэва хамос, саво лэндэ сас андо Египто. Ай пала манна, сави лэнди дя о Иегова, вонэ ԥэнэнас: «Амэнди вэрыцысайля кадэва ӷитко марно» (Чис. 11:4—6; 21:5). Ай со, если и амэ кадя ласа тэ андярас пэс посли само бари бида? Амэ на ӷанас, скати жала время и зор, кай посли Армагеддоно тэ стерас порядко пэ ԥув и кай упалэ тэ авэл раё. Можэт, спэрва и жызня авэла найвушэро. На ласа амэ тоди тэ жалуемся пэ кода, со дэла амэнди о Иегова андо раё? Полэн ек важно гиндо: со май фартэ амэ акана блаӷодарни лэ Иеговасти пала вся, со во амэнди дэл, со май бари блаӷодарность амэндэ авэла май англэ. w22.02 7, абз. 18, 19

Пала преданость, сави «авэр бакрорэ» сыкавэн каринг и памазаникоря, росԥэнэнпэ андэ Захария 8:23. Андэ кадэва пророчество «о иудеё» — када и памазаникоря, ай «и дэш мануш анда всаворэ нацыи» — када «авэр бакрорэ» (Рим. 2:28, 29). Тумэ шутэ сама, кай и дэш мануш «астардёна пала лэ иудеёстири ӥда»? Вижал, вонэ предано подритярэн лэ памазаниконэн и вмести лэнца служын лэ Иеговасти. Сар исполнисайля пророчество анда Иезекииль 37:15—19, 24, 25? Блаӷодаря лэ Иеговасти и памазаникоря и «авэр бакрорэ» вмести терэн ек дила. Андо пророчество ԥэнэнпэ пала дуй рувля. «Лэ Иудастири рувли» сыкавэл пэ памазаникоря, савэ лэна тэ правин па нэбо, важ кода кай имено анда кадэя племя жылэ и царёря андо Израилё. Ай «лэ Ефремостири рувли» — пэ мануша, савэ надеинпэ тэ жувэн пэ ԥув. О Иегова трэбуй тэ стидэл лэн вмести, кай вонэ тэ ашэн сар ек рувли и тэ служын лэ Дэвлэсти, кала правия ек Царё — о Иисус Христос (Иоан. 10:16). w22.01 22, абз. 9, 10

О Иисусо росԥэнэнас пала мануша, савэ поможынас лэ чорорэнди, кати кай када тэ уӷанэн авэр. Хоть вонэ и терэнас лащи дила, лэ Иеговасти када на чалёлас (Матф. 6:2—4). Лашымос — када кала амэ вужэ одеса терас правильно дила. Важ када амэ можэм тэ пушас пэстар: «Мэ просто ӷанав, со када лашымос или мэ сыкавав када пэ дила? Васо мэ камав тэ терав лашымос?» Екжэно о Иегова на бэшэл би дилако и через пэско свынто духо варисо терэл (Быт. 1:2). Важ када и качестворя, савэ жан лэ свынтонэ духостар, трэбуй тэ дицон пэ дила. Например, о Иаково пистросардя: «И вера би дилако мули» (Иак. 2:26). Кадэла алава поджан каринг всаворэ качестворя, савэ ужан андэ лэ свынтонэ духоско плодо. Со май бут зор амэ ласа тэ пристас, со май бари помощь амэнди лэла тэ дэл лэ Иеговаско духо. w22.03 11, 12, абз.14—16

Лэ Дэвлэстирэ служытеля терэн бут лащи дила, но о апостало Пётро шутя сама пэ ек. Англа кода, сар тэ ԥэнэн, кай и христианоря трэбуй тэ авэн свынти, во пистросардя: «Мэк тумари годи авэла ӷотово важ и дила» (1 Пет. 1:13). Со во камля кадэлэса тэ ԥэнэн? И помазани лэ Христостирэ ԥрала трэбуй сас «везде тэ росԥэнэн пала райканэ [лэ Иеговастирэ] качестворя» (1 Пет. 2:9). Адес када терэн всаворэ христианоря. Май важно кадэлэстар нисо нинай. Важ амэндэ, сар важ лэ Дэвлэско свынто народо, бари бах тэ проповедуем и тэ поможысарас лэ манушэнди тэ ашэн ученикоря! (Мар. 13:10). Важ када амэ пристас вся пэско зор, кай тэ терас кадэя дила. Если амэ кадя терас, амэ сыкавас, кай любисарас лэ Иеговас и лэ манушэн, савэ паша амэндэ, и камас тэ авас свынти андэ вся. w21.12 13, абз. 18

О апостало Павло вся и время старыияспэ тэ додиқэл варисо лашо андэ ԥрала и ԥэя. Во полэлас, кай если варико стердя ошыбка, када инке на сыкавэл, кай во найлашо мануш. Во любияс лэ ԥралэн и лэ ԥэян и цэнияс лэн важ лэндирэ лашэ качестворя. Хоть кадэла ԥрала и ԥэя най всегда андярэнас пэс правильно, о Павло патялас, кай лэндэ лашо ди и кай лэнди просто трэбуй помощь. Погиндосарам, сар о Павло поможысардя дуе ԥэянди анда собрания андэ Филиппы (Флп. 4:1—3). И Эводия и Синтихия сас холинатирэ ек пэ ек. Но о Павло на грабияс тэ сындой лэн, ай шутя сама по лашымос, саво исин андэр лэндэ. Кадэла ԥэя сас предани лэ Иеговасти и ужэ бут бэрша служынас лэсти. О Павло ӷанэнас, кай о Иегова лэн любий. Важ када во тожэ старыияспэ драго тэ гиндой пала лэндэ и тэ поможый лэнди тэ помиринпэ. Кадя во на хасардя пэстири радость андэ служэния лэ Иеговасти и на парашэля тэ дружый лэ ԥралэнца и лэ ԥэянца анда кодэя собрания. w22.03 30, абз. 16—18

Блаӷодаря кодэлэсти, кай о Дэл дэл амэнди спокойство андо ди, ашэл май вушэро, и амэ лас май набут тэ пэрэжываем. Роздиқаса, со сас андэ жызня кай и ԥэй Люсия. Вой росԥэнэн: «Манди часто прижалпэ тэ борисавав лэ гиндонэнца, кай мэ екжэни. Дэкала манди дажэ здэлпэ, кай о Иегова на любий ман. Но тоди мэ сразу жэ росԥэнав лэсти, со мандэ по ди. И молитва поможый манди тэ улав кацавэ гиндоря». Кадэва примеро сыкавэл, кай и молитва поможый амэнди тэ авас спокойни (Флп. 4:6, 7). Если амэнди фартэ ԥарэс через кода, кай хасардям варикас анда чаче, амэ патяс, кай о Иегова и о Иисусо поможына амэнди. Инке амэ камас тэ полас и тэ жалуисарас лэ манушэн андэ служэния, важ кода кай кадя терэн о Иегова и о Иисусо. И, канешно, амэнди придэл зор, кай амаро небесно Дад и лэско Шаво полэн амэн, ӷанэн амарэ слабости и камэн тэ поможын амэнди вся тэ виритярас. Амэ фартэ аштярас, кала о Иегова зритярэла пэстири обещяния и «виқосэла всаворэ ясва па... [амарэ] яқа» (Отк. 21:4). w22.01 15, абз. 7; 19, абз. 19, 20

О Иисусо росԥэндя пала дуй разни дрома: пала буӷло и пала тисно дром (Матф. 7:14). Трито дром нинай. Амэ трэбуй тэ витидас, па саво дром амэ ласа тэ жас. Када само важно ришэния, сави амэ кати можэм тэ прилас, важ кода кай кадэлэстар зависит, ласа амэ тэ жувас вечно чи най. О «буӷло» дром витидэн бут миро, важ кода кай пар лэстэ вушэро тэ жан. Бут мануша ашэнпэ пэ кадэва дром и жувэн кадя, сар всаворэ. Вонэ нащи полэн, кай када о Сатана камэл, кай вонэ тэ жан кадэлэ дромэса, саво андярэл каринг и смэрть (1 Кор. 6:9, 10; 1 Иоан. 5:19). Но кадяжэ о Иисусо шутя сама, кай о тисно дром найвушэро тэ виарақэн. Васо? Шон сама, кай андэ авэр стихо во ԥэндя, кай авэна хохавнэ пророкоря (Матф. 7:15). w21.12 22, 23, абз. 3—5