Июнё

О Иегова сас лэ Иовоско пашутно друӷо. Лэстэ сас баро и дружно ери, ай кадяжэ во сас фартэ барвало (Иов 1:1—5). Но потом важ ек дес во хасардя почти вся. Во ашэляпэ пэ кали ԥув. Спэрва во хасардя пэско барвалимос (Иов 1:13—17). Ай тоди во уӷангля, кай всаворэ лэстирэ бэяцэ мулинэ. Прецтавьте, со сас по ди кай о Иово и кай лэстири хулаи, кала вонэ уӷанглэ, кай лэндирэ дэш бэяцэ мулинэ андэ ек дес! Вонэ сас умардэ бидаса. Амэ полас васо о Иово «росшындя пар пэстэ ӥда и... пэля пэ чанга» (Иов 1:18—20). Потом о Сатана заля кай о Иово лэско зор и стердя, кай пэр лэстэ будэр тэ на стон патив (Иов 2:6—8). Раньшэ и мануша пативалэс обжанаспэ лэса и пушэнас лэстар совето (Иов 31:18). Ай акана вонэ линэ лэс тэ обнашэн. Во ашэляпэ екжэно. Лэстар одбанделэ лэстирэ ԥрала, друӷоря и дажэ лэстирэ слуӷоря, савэ сас андэ лэско цэр (Иов 19:13, 14, 16). w22.06 21, абз. 5, 6

Всаворэ, ко ужэ болделя, трэбуй тэ приашундён каринг лэ Павлоско совето. Во ԥэндя лэ христианонэнди андо Эфесо, кай вонэ тэ ашэн сар «взросли мануша» (Эф. 4:13). Аврэ алавэнца, вонэ трэбуй сас тэ пристон зор, кай тэ барён духовно. Канешно тутэ ужэ исин любовь каринг о Иегова, но ту можэш тэ стерэс, кай вой тэ ашэл инке май бари. Сар? О апостало Павло ԥэндя пала када андэ Филиппийцам 1:9. Во мангэласпэ, кай и христианоря анда Филиппы «инке май фартэ и май фартэ тэ любин». Дицол, кай амэ можэм инке май фартэ тэ любисарас лэ Иеговас. Важ када лэ христианонэнди трэбуй «май бут тэ уӷанэн и май драго тэ полэн, со камэл о Дэл». Со май бут амэ уӷанас пала Иегова, со май фартэ амэ лэс любисарас, цэнисарас лэстирэ качестворя и кода, сар во обжалпэ амэнца. Тоди амэндэ появийпэ инке май бари жэлания тэ радосарас лэс, и амэ на ласа тэ терас нисо, со на чалелоп лэ Иеговасти. Амэ пристас вся о зор, кай тэ полас, со о Иегова аштярэл амэндар, и старысавас тэ терас кадя, кай во тэ авэл амэнца довольно. w22.08 2, 3, абз. 3, 4

И книӷа Свынто тайна сас пистромэ най важ всаворэ мануша, ай важ лэ Иеговастирэ служытеля. Сар лэ Дэвлэско народо, амэ дэсо терас, кай кадэла пророчества тэ исполнинпэ. О апостоло Иоано пистросардя, кай и пророчества анда Свынто тайна лэна тэ исполнинпэ «андэ лэ Ӷосподоско дес» (Св. Т. 1:10). О Иоано пистросардя и книӷа Свынто тайна андо 96 бэрш н. э., и трэбуй сас тэ прожан бут бэрша, пока «лэ Ӷосподоско дес» на авэла (Матф. 25:14, 19; Лука 19:12). Сар сыкавэл и Библия, кадэва дес авеля андо 1914 бэрш, кала о Иисусо ля тэ правий по нэбо. Кадэлэ бэршэстар и пророчества анда книӷа Свынто тайна линэ тэ исполнинпэ и тэ влияют по лэ Дэвлэско народо. Да, амэ жувас андэ «лэ Ӷосподоско дес»! (Св. Т. 1:3). w22.05 2, абз. 2, 3

Лэ зверёс астардэ, ай лэса и лэ хохавнэ пророкос. И о зверё и о хохавно пророко слинэ жундэ, кала лэн шутэ андо озеро ягаса, саво фартэ ԥаболас. Када сыкавэл, кай кала кадэла лэ Дэвлэстирэ вороӷоря инке лэна тэ правин, вонэ авэна уничтожэни. Сар када влияет пар мэндэ? Сар христианоря, амэ трэбуй тэ сыкавас пэстири преданость каринг о Дэл и каринг лэско Царство (Иоан. 18:36). Важ када амэ на залас никастири риг андэ политика. Но када можэт тэ авэл фартэ найвушэро. И власти тасавэн пар мэндэ, кай амэ андэ вся лэн тэ подритярас. Кодэлэнди, ко терэл кадя, сар вонэ камэн, стон лэ зверёско знако (Св. Т. 13:16, 17). О Иегова фартэ нэдовольно кацавэ манушэнца, и вонэ хасарэна и возможность тэ жувэн вечно (Св. Т. 14:9, 10; 20:4). Важ када фартэ важно нисар тэ на участвуем андэ политика, сар бы пар мэндэ тэ на тасавэн. w22.05 10, 11, абз. 12, 13

Можэт ту камэс тэ сытёс тэ терэс варисави полезно дила. Када лащи цэль. Если ту лэса тэ сытёс тэ терэс разно дила, тоди тутэ вижала тэ терэс май бут андэ служэния лэ Иеговасти. Например, трэбуй фартэ бут мануша, кай тэ строин филиалоря, Залоря важ и канӷрэсоря, ай кадяжэ Залоря Царства. Бут анда вазвещятеля, савэ терэн пэ кадэла стройки, на ӷанэнас тэ терэн кадэя дила раньшэ, но сытелэ кай авэр опытни ԥрала и ԥэя. Адес и ԥрала и ԥэя сытён тэ диқэн пала Залоря важ и канӷрэсоря и пала Залоря Царства. О Иегова, «Царё пэ вечность», и о Иисусо, «Царё анда царёря», терэн удивительно дила через амарэ ԥрала и ԥэя (1 Тим. 1:17; 6:15). Амэ фартэ камас всаворэ одеса тэ терас дила и тэ используем пэстирэ способности, кай тэ прославляем лэ Иеговас, ай най пэс (Иоан. 8:54). w22.04 24, абз. 7; 25, абз. 11

О Соломоно сас барвало ла люмако (1 Цар. 10:7, 14, 15). Ай о Иисусо жувэлас па аврятэ: лэстэ на сас бут мищимос и дажэ на сас пэско цэр (Матф. 8:20). Кай о Соломоно и кай о Иисусо сас разно достатко, но через кода, кай и мудрость лэнди дэлас о Дэл Иегова, вонэ правильно диқэнас по мищимос. О Соломоно прижанэнас, кай и ловэ трэбуй. Пэр лэндэ амэ тинас, со трэбуй важ и жызня, ай дэкала, со анэн амэнди радость. Хоть о Соломоно и сас фартэ барвало, во полэлас, кай исин кода, со май куч, чем и ловэ. Во пистросардя: «Фэдэр пала мануш драго тэ дэн дума, чем тэ авэл барвало» (Прит. 22:1). Инке о Соломоно шутя сама, кай и мануша, савэ любин и ловэ, ридко довольни кодэлэса, со лэндэ исин (Эккл. 5:10, 12). Кадяжэ во ԥэнэнас, кай найгодявэрнэс тэ надеисавас по барвалимос, важ кода кай адес во исин, ай тэся ужэ можэт тэ на авэл (Прит. 23:4, 5). w22.05 21, абз. 4, 5

Если амэ гиндосарас пала блаӷословении, савэ амэндэ исин ужэ акана, када поможый, кай амари дружба лэ Иеговаса тэ ашэл май састи. Ай кала амэ розмышляем, со инке о Иегова дэла амэнди май англэ, амари надежда тэ тэлювас лэсти вечно ашэл инке май састи. Када поможыя, кай амэндэ тэ авэл инке май бари радость андэ служэния лэ Иеговасти. Ӥто о Иегова улэла кадэва найлашо миро. Амэ уверени, кай амаро справедливо Дэл на домэкэла, кай лэ сатанастири люма тэ авэл май долӷо, чем трэбуй (Ис. 25:9). Амэ терпеливо аштярас, кала о Иегова амэн спасыя. Ай пока кадэя время инке на авеля, давайте тэ цэнисарас, кай амэндэ исин возможность тэ мангаспэ, тэ изучаем и Библия, тэ прилас андэ жызня кода, со уӷанглям, и тэ розмышляем пала пэстирэ блаӷословении. И тоди о Иегова обязательно поможыя амэнди вся тэ виритярас радостяса. w22.11 13, абз. 18, 19

Хоть андэ Библия най пистромэ, сар болделя о Тимафеё, амэ можэм тэ погиндосарас, саво дэ бахтало дес када сас важ и Эвника (Прит. 23:25). Латэ вижыля тэ поможый пэстирэ бэятости тэ полюбий лэ Иеговас и лэ Иисусос. Кай лэ Тимафеёстирэ родителя сас разно религия. Лэско дад сас ӷреко, ай лэстири дэй и баба — еврейки (Дила 16:1). Наверно, о Тимафеё инке сас подростко, кала и Эвника и Лоида ашэлэ христианки. Но лэско дад на ашэля христианино. Саво дром витидэла о Тимафеё? Амарэ ԥэя кадя жэ, сар и Эвника, всаворэ одеса любин пэско ери. Вонэ фартэ камэн, кай лэндирэ бэяцэ тэ служын лэ Иеговасти. И о Иегова фартэ цэний вся, со вонэ терэн (Прит. 1:8, 9). Во ужэ поможысардя бутэ ԥэянди тэ сытярэн пэстирэ бэятонэн тэ полюбин и истина. w22.04 16, абз. 1—3

Ӥто о Иегова дэла лэ барэ манушэнди андэ политика гиндо «тэ стерэн кода, со во загиндосардя». Каринг со када анэна? И правительства, и «дэш царёря», дэна пэ хохавнэ веры и уничтожат лэн (Св. Т. 17:1, 2, 12, 16). Катар амэ ӷанас, кай и время важ о Вавилоно Велико ӥто закончица? Кай тэ полас када, давайте вспомним пала дэлмутно форо Вавилоно. Лэс фэрияс бари лэн Евфрато. Андэ книӷа Свынто тайна ԥэнэнпэ, кай и милионоря мануша, савэ подритярэн о Вавилоно Велико, сыстонпэ ла лэнаса (Св. Т. 17:15). Котэ кадяжэ ԥэнэнпэ, кай и лэн вишутёла. Аврэ алавэнца, и хохавнэ веры хасарэна пэстирэ манушэн (Св. Т. 16:12). Адес бут мануша на виарақэн атветоря пэ пэстирэ вопросоря и ашавэн и хохавнэ веры. Кадя исполнийпэ кадэва пророчество. w22.07 5, 6, абз. 14, 15

Кала амэ простисарас, амэ сыкавас, кай блаӷодарни лэ Иеговасти. Еқвар о Иисусо росԥэндя и притча. Во сыстосардя лэ Дэвлэс лэ царёса, саво простисардя лэ рабости баро вужылимос. Ай кодэва рабо на жалуисардя пэстирэ друӷос, саво лэсти сас вужыло пэ бутэстэ май набут (Матф. 18:23—35). Сости о Иисусо камля амэн тэ сытярэл? Если амэ па чачимастэ блаӷодарни, кай о Иегова жалуий амэн анда вся оди, амэ ласа тэ старысавас тэ простисарас аврэн (Пс. 103:9). Бут бэрша палпалэ андэ «Сторожэво башня» ԥэнэнаспэ: скати бы амэ тэ на простисарас аврэн, када никала на сыстояпэ кодэлэса, сар простий о Иегова через лэ Иисусостири жэртва. Если амэ простисарас аврэн, о Иегова простия амэн. О Иегова жалуий кодэлэн, ко жалуий аврэн (Матф. 5:7). О Иисусо шутя сама пэ кадэва гиндо, кала сытярэлас, сар трэбуй тэ мангаспэ (Матф. 6:14, 15). w22.06 10, абз. 8, 9

О Иисусо жувэлас пэ ԥув сар мануш. Во андэ вся шоласпэ пэ пэско Дад (Иоан. 14:9). И блаӷодаря лэсти амэ уӷанглям и полюбисардям лэ Иеговас. Кадяжэ амэнди анэн бари польза, кай о Иисусо диқэл пала христианско собрания и сытярэл амэн, сар тэ жувас, кай о Иегова тэ авэл амэнца довольно. Инке лэ Дэвлэско Шаво муля важ амэндэ. Блаӷодаря кадэлэсти, амэндэ исин надежда пэ лащи жызня англэ. Кала о Иисусо рисайля каринг и жызня, о Иегова приля лэстири жэртва, сави «терэл, кай амэ тэ авас вужэ всаворэ ӷрехонэндар» (1 Иоан. 1:7). Акана о Иисусо фартэ зорало бесмертно Царё. О Иегова стидя ужэ почти всаворэ́ ла жувлятирэ потомконэн. Если пэрво часть анда кадэва пророчество ужэ исполнисайля, тоди амэ можэм тэ патяс, кай и дуйто часть тожэ исполнияпэ. Амэ уверени, кай ла жувляко потомко ростасавэла о шэро лэ сапэсти. Сар жэ авэна ради лэ Дэвлэстирэ служытеля, кай о Сатана авэла уничтожэно! Важ када, ԥрала и ԥэя, на сдэнпэ. Амэ можэм андэ вся тэ патяс амарэ Дэвлэсти. Через ла жувлятирэ потомкоря «блаӷословинапэ всаворэ народоря пэ ԥув». w22.07 18, абз. 13; 19, абз. 19

Амэнди прижалпэ тэ парувас пэстирэ цэли, важ кода кай варисо можэт тэ парудёл андэ жызня. Например, о Павло бут со стердя, кай андэ Фисалоники тэ авэл нэви собрания. Но через и вороӷоря лэ Павлости прижыляпэ тэ ужал анда кодэва форо (Дила 17:1—5, 10). Тэ ашэлопэ во котэ, када андоп бида лэ ԥралэнди и лэ ԥэянди. Лэ Павлости прижыляпэ тэ парувэл пэстири цэль, но во на умэкля и вас. Во мангля лэ Тимафеёс тэ позаботийпэ пала христианоря анда Фисалоники (1 Фес. 3:1, 2). И ԥрала и ԥэя сас фартэ блаӷодарни важ и помощь. Амэ можэм тэ сытювас кай о Павло. Можэт, амэ стодям англа пэстэ варисави цэль, но потом андэ жызня варисо паруделя, и амэ полям, кай будэр нэ можэм тэ домардювас ла (Эккл. 9:11). Если кацаво жэ сас и тутэ, стов англа пэстэ авэр цэль, сави тутэ вижала тэ домардёс. w22.04 25, 26, абз. 14, 15

Амэндэ исин розлащи надежда по лашымос, саво авэла англэ, и када придэл зор. Давайте роздиқаса дэсавэ гиндоря анда Библия, савэ моӷут тэ подритярэн амэн, кала исин трудности. Андэ пэско Алав о Иегова обещяет, кай нисо, дажэ баро ԥаримос, «нэ смоӷут тэ одлэн амэндар [лэстири] любовь» (Рим. 8:38, 39). Инке амаро Дэл «пашэ каринг всаворэ, ко ақарэл лэс» андэ молитва (Пс. 145:18). О Иегова ԥэнэн, кай если амэ ласа тэ надеисавас пэр лэстэ, тоди амэндэ вижала тэ виритярас любо ԥаримос и дажэ тэ на хасарас и радость андэ кадэва маменто (1 Кор. 10:13; Иак. 1:2). Инке андэ Библия ԥэнэнпэ, кай амарэ трудности най пэ долӷонэстэ, ай англэ амэн аштярэл и вечность (2 Кор. 4:16—18). О Иегова дэл алав, кай улэла кодэлэс, кастар жан всаворэ трудности — лэ Сатанас и всаворэн, ко терэн о найлашымос (Пс. 37:10). Авелоп драго тэ висытювас дэсавэ библейски стихоря, савэ придэна зор андэ ԥари время. w22.08 11, абз. 11

Тумэ варикала гиндонас, кай кажнонэ десэса ашэл май ԥарэс тэ жувас па лэ Иеговаско законо? Если да, тоди погиндон пала лэ Иеговастири обещяния, кай амари праведность авэла сар «волны андэ моря» (Ис. 48:18). Прецтавьте пэсти, кай тумэ тердён англа моря и диқэн, сар и волны ек пала ек дэнпэдап андо бэрэӷо. Лэна тумэ тэ пэрэжываете, кай вдруг и волны тердёна? Канешно, най! И тумэ ӷанэн, кай кадя авэла вся и время. Тумари праведность можэт тэ авэл кацави жэ, сар и волны андэ моря. Сар када тэ полас? Тумэ можэте всегда тэ жувэн па лэ Дэвлэстирэ праведни законоря. Со андэ када поможыя? Кажно разо, кала трэбуй тэ прилэн ришэния, спэрва погиндон, со тумэндар аштярэл о Иегова, ай тоди терэн кадя. Сави бы ԥари ришэния тэ на авэл, вся и время сэрэн: тумаро небесно Дад всегда паша тумэндэ. Во дэла зор, кай тумэ кажно дес тэ жувэн па лэско праведно законо (Ис. 40:29—31). w22.08 30, абз. 15—17

Сар прожала и 1 000 лет, лэ Сатанас котар вимэкэна. И тоди во старыияпэ тэ одындярэл лэ совершэнонэ манушэн лэ Иеговастар. Кала авэла кадэя испытания, кай и мануша авэла возможность тэ доԥэнэн, кай вонэ стон патив по лэ Дэвлэско алав и пэ лэско право тэ правий (Св. Т. 20:8—10). Кодэлэстар, сар кажно мануш пэс андярэла, дицола, авэла лэско алав пэ вся и время запистромэ андэ книӷа важ и жызня чи най. Дэсавэ мануша — амэ точно на ӷанас скати лэн — кадя жэ сар о Адамо и Ева отԥэндёна, кай о Иегова тэ авэл пэр лэндэ хулай. Со лэн аштярэл? О атвето амэ диқас андэ Свынто тайна 20:15: «И кажнонэс, кас на виарақлэ андэ ла жызнятири книжка, шутэ андо озеро ягаса». Аврэ алавэнца, кодэла мануша, савэ жана против о Иегова, навсегда авэна уничтожэни. Но май бут мануша виритярэна и послиднё испытания. w22.09 23, 24, абз. 15, 16

Андо пэрво вико дэсавэ андэ собрания ԥэнэнас, кай лэ нэвэ христианонэнди анда най евреёря, трэбуй тэ терэн обрезания. Возможно, вонэ када камэнас тэ стерэн, кай лэн тэ на сындон и евреёря (Гал. 6:12). О апостало Павло на сас соӷласно кадэлэса, но во на ля тэ тердёл пэ пэско, ай смирено мангля совето кай и апосталоря и старейшыноря андо Иерусалимо (Дила 15: 2). Блаӷодаря кадэлэсти андэ собрания ашэля мирно и радосно (Дила 15:30, 31). Если появийпэ варисаво розладо, май фэдэр тэ пушэн совето кодэлэндар, кас о Иегова стодя тэ заботинпэ пала собрания. Часто библейско руковоцтво можно тэ виарақас андэ амарэ публикацыи, савэ вимэкэл лэ Иеговастири арӷанизацыя. Если амэ ласа тэ терас кадя, сар ԥэнэнпэ андэ кадэла указании и на ласа тэ тердювас пэ пэско, тоди андэ собрания авэла ладо. w22.08 22, абз. 8, 9

Бутэнди андар мэндэ дэкала камэлпэ тэ росԥэнас пэстирэ пэрэжывании лэ друӷости. Но када най вся и время вушэро. Дэкала можэт тэ авэл фартэ ԥарэс тэ росԥэнэс аврэ манушэсти кода, со по ди. Ай инке амэнди можэт тэ авэл больно, если амаро друӷо росԥэндя аврэнди пала кода, соса амэ лэса поделисайлям. Сар жэ важ амэндэ куч и друӷоря, савэнди амэ можэм тэ росԥэнас, со амэндэ по ди, и вонэ пала када никасти на росԥэнэна! И старейшыноря, савэ на росԥэнэн и секреторя, важ и ԥрала и ԥэя, сар «ҭан, кай тэ гарадён ла балвалятар и сар ҭан, кай тэ фэринпэ лэ барэ брышындэстар» (Ис. 32:2). Со бы амэ тэ на росԥэнас лэнди, амэ ӷанас, кай вонэ никасти пала када на ԥэнэна. Важ када амэнди вушэро каринг лэндэ тэ обратисавас. Амэ на випушас лэндар кодэя инфармацыя, пала сави амэнди на трэбуй тэ ӷанас. И амэ цэнисарас лэндирэ хулаян, кай вонэ на старыинпэ тэ випушэн пэстирэ хуландар чужи секреторя. Амэнди фартэ куч, кай и старейшыноря на росԥэнэн пэстирэ хулаянди пала кода, соса делинпэ лэнца и ԥрала и ԥэя. w22.09 11, абз. 10, 11

Фартэ ӥто о Иегова зашолапэ пала пэстирэ предани служытеля андэ «само бари бида» (Матф. 24:21; Дан. 12:1). Кала и объединёни правителя, о Гого анда Магого, ваздэнапэ и холяса жана против лэ Иеговаско народо па вся и ԥув, о Дэл защития кодэлэн, ко ашэлпэ лэсти предано. Дажэ если всаворэ 193 ӷосударства, савэ ужан андэ ООН, стидэнапэ против лэ Иеговаско народо, када всаек на сыстояпэ лэ зорэса, саво исин кай о Всевышнё и кай лэстирэ небесни войскоря. О Иегова дэл алав: «И мэ ашава инке май ашунгло и злава о хохаимос, саво пэр мандэ, и дава тэ уӷанэн бутэ народонэнди, и вонэ уӷанэна, кай мэ о Иегова» (Иез. 38:14—16, 23). Кала о Гого жала против лэ Иеговастирэ служытеля, о Иегова сразу уничтожыт всаворэ́ «ла ԥувьятирэ царёнэн» андэ война Армагеддоно (Св. Т. 16:14, 16; 19:19—21). Кала лэ Иеговастирэ вороӷонэн будэр на авэла, «кати и праведни лэна тэ жувэн пэ ԥув и кодэла, ко вужэ андэ лэ Дэвлэстирэ яқа, ашэнапэ пэр латэ» (Прит. 2:21). w22.10 16, 17, абз. 16, 17

Амэ на диқас, со андо ди кай о мануш, — кати «о Иегова росполэл, васо о мануш вся када терэл» (Прит. 16:2). О Дэл любий разнонэ манушэн. Во на диқэл, сави кай о мануш нацыя и сави культура. Во ԥэнэн амэнди: «Ԥэрнавэн и тумэ пэско ди» (2 Кор. 6:13). Важ када давайте тэ любисарас амарэ ԥралэн и ԥэян и тэ на сындосарас лэн. Кадяжэ амэ на сындосарас кодэлэн, ко най андэ лэ Дэвлэско народо. Линоп тумэ тэ сындон пэстирэ родос, саво най лэ Иеговаско свидетелё, и тэ гиндон: «Во никала на авэла андэ истина»? Если амэ кадя ласа тэ терас, амэ сыкаваса, кай вистас пэс, кай амэ май праведни, чем авэр. О Иегова инке дэл «всаворэ манушэнди, кай бы вонэ тэ на жувэн» возможность тэ каинпэ (Дила 17:30). Никала на бистрэн, кай кала амэ гиндосарас, кай май праведни чем авэр, важ о Иегова када нэправедно. Мэк тумари любовь каринг лэ Дэвлэстирэ праведни законоря и май дур анэн тумэнди радость и придэл зор аврэнди. Мэк кадэя любовь пашарэл тумэн каринг о Иегова. w22.08 31, абз. 20—22

О Иегова дя амэнди важно дила — тэ проповедуем. Но амэ ӷанас, кай дэсавэ мануша лэна тэ тасавэн пар мэндэ. Ай май англэ вонэ лэна тэ преследуют амэн инке май фартэ (Дан. 11:44; 2 Тим. 3:12; Св. Т. 16:21). Но всаек амэ уверени, кай о Иегова дэла амэнди зор када тэ виритярас. Васо? О Иегова всегда поможыяс пэстирэ служытелёнэнди тэ стерэн лэстири дила. Давайте роздиқаса примеро пала пророко Иезекиилё, саво росԥэнэнас пала Дэл лэ евреёнэнди андо вавилонско плено. Савэ мануша жувэнас котэ, кай проповедовал о Иезекиилё? О Иегова ԥэндя пала лэндэ, кай вонэ «ӷруби и упрями мануша» и «найкандино народо». Важ када о Иегова най еқвар ԥэндя лэ Иезекиилёсти: «На дар» (Иез. 2:3—6). О Иезекиилё моӷ тэ стерэл лэ Дэвлэстири дила, важ кода кай: 1) лэс бишалдя о Иегова, 2) лэсти дэлас зор о свынто духо и 3) лэс подритярэнас и алава анда лэ Дэвлэско Алав. w22.11 2, абз. 1, 2

Всаворэ жундэ тварении пэ ԥув создани, кай тэ жувэн кати дэсави время. Но най и мануша. Лэнди о Иегова дя удивительно возможность тэ жувэн вечно. О Иегова создал амэн кадя, кай амэндэ тэ авэл бари жэлания тэ жувас. Андэ Библия ԥэнэнпэ: «Во дажэ стодя вечность андэ лэ манушэнго ди» (Эккл. 3:11). Када инке ек причина, сави сыкавэл, кай и смэрть важ амэндэ вороӷо (1 Кор. 15:26). Если амэ занасвайлям, амэ терас вся, кай тэ виличисавас. Амэ ԥирас андэ больница и прилас драба, кай тэ на хасарас пэстири жызня. Кала мэрэл варико анда амарэ чаче — нэ важно, ԥуро во сас или тэрно, — амэ нэ можэм тэ прилас када, сар кадя и трэбуй тэ авэл. Амэнди фартэ ԥарэс кадэлэстар (Иоан. 11:32, 33). Если о Иегова создал амэн кадя, кай амэндэ тэ авэл жэлания тэ жувас, и дя амэнди лашэ способности, када значит, кай во камэл, кай амэ тэ жувас вечно. w22.12 3, абз. 5; 4, абз. 7

Андэ кадэя ԥари время бут амарэ ԥрала и ԥэя насвавэн, даран или лэнди здэлпэ, кай вонэ екжэнэ. Важ када виарақэн возможности тэ общяетесь лэ ԥралэнца и лэ ԥэянца. Через и пандэмия амэнди, возможно, прижалапэ тэ на пашувас ек еқэстэ, дажэ кала амэ находисавас машкар ԥрала и ԥэя. Андэ кадэя время амэндэ по ди можэт тэ авэл кадя жэ, сар кай о апостало Иоано. Во фартэ камэлас лично тэ диқэлпэ пэстирэ друӷоса, савэс ақарэнас Гаё (3 Иоан. 13, 14). Но о Иоано полэлас, кай када нэвозможно, и важ када пистросардя лэсти письмо. Если ту полэс, кай нэ можэш лично тэ авэс лэ ԥралэндэ и лэ ԥэяндэ, позвонисар лэнди или бишал сообщения. Кала амэ общяемся лэнца, амэндэ по ди ашэл спокойно и амэ полас, кай амэ най екжэнэ. Если ту фартэ пэрэжываеш, подэ дума лэ барэдэрэ ԥралэнца андэ собрания и на отԥэндюв, кала вонэ камэн тути тэ поможын (Ис. 32:1, 2). w22.12 17, абз. 6, 7

Андэ Библия ԥэнэнпэ, кай дэсави время во сас заԥандадо андэ цэпоря (Пс. 105:17, 18). Лэстири жызня ашэлас инке май ԥари: во сас слуӷо, ай акана ашэля барунари. Сас тутэ варикала кацави ситуацыя, сави ашэлас май ԥари и май ԥари, хоть ту и фартэ мангэсаспэ? Кацаво можэт тэ авэл. О Иегова на фэрий амэн лэ ԥаримастар андэ кадэя люма, савяса правий о Сатана (1 Иоан. 5:19). Но ту можэш тэ авэс уверено, кай о Иегова драго ӷанэн, со тути прижалпэ тэ пэрэандярэс, и во заботийпэ пала тутэ (Матф. 10:29—31; 1 Пёт. 5:6, 7). Во дэл алав: «Никала на ашавава тут и никала на мэкава тут» (Евр. 13:5). О Иегова можэт тэ поможый амэнди, дажэ если здэлпэ, кай и ситуацыя на парудёл андо лашымос. w23.01 15, 16, абз. 7, 8

И Свынто Писания сыкавэл, кай о Дэл на одбандёла амэндар, если амэ шылисаваса. И израильтяноря терэнас бэзэх против о Иегова упалэ и упалэ. Но кала вонэ анда вся оди каинаспэ, во лэн простияс. И христианоря андэ пэрво вико тожэ ӷанэнас, кай о Иегова лэн любий. О апостало Павло через о свынто духо ԥэндя лэ ԥралэнди и лэ ԥэянди, кай вонэ «анда вся оди тэ простин... и тэ подритярэн» лэ манушэс, саво стердя баро бэзэх, но ӷэт май интя каисайля (2 Кор. 2:6, 7; 1 Кор. 5:1—5). Сар приятно тэ адиносарас, кай о Иегова на отшолас пэстирэ служытелёнэн, савэ шылинаспэ! Наоборот, во терэлас пэрво шаӷо каринг лэндэ, сытярэлас и ақарэлас, кай вонэ упалэ тэ ашэн лэстирэ друӷоря. Во дэл алав, кай адес кадя жэ лэла тэ обжалпэ кодэлэса, ко тердя бэзэх, но каийпэ (Иак. 4:8—10). И Библия росԥэнэн пала лэ Дэвлэстири мудрость, любовь и справедливость. Кадэя книӷа сыкавэл, кай о Иегова камэл, кай амэ пала лэстэ тэ уӷанас май бут и тэ авас лэстирэ друӷоря. w23.02 7, абз. 16, 17

Канешно, амэ драго полас, васо трэбуй тэ шас сама пэ кода, со терэлпэ андэ люма. Вся када сыкавэл, кай исполнинпэ и библейски пророчества. Например, о Иисусо ԥэндя пала событии, савэ поможына тэ полас, кай пашол и время кадэла люмати, савяса правий о Сатана (Матф. 24:3—14). О апостало Пётро побудисардя амэн тэ авас внимательни каринг кода, сар исполнинпэ и пророчества, кай амари вера тэ ашэлпэ састи (2 Пёт. 1:20, 21). О Пётро поможый амэнди тэ полас, васо трэбуй тэ изучаем и библейски пророчества. Во побудий амэн тэ аштярас «лэ Иеговаско дес» (2 Пёт. 3:11—13). Васо? Най важ кода, кай тэ полас о дес и о часо, кала авэла Армагеддоно (Матф. 24:36; Лука 12:40). Амэ камас андэ кадэя время, сави ашэляпэ, тэ андярас пэс вужэс англа Дэл и тэ стас бари патив пэр лэстэ. Тэ андярас пэс правильно и анда вся оди тэ служысарас лэ Иеговасти кадя, кай во тэ диқэл амари бари любовь каринг лэстэ. Ай важ када амэнди трэбуй тэ диқас пала пэстэ. w23.02 16, абз. 4, 6

Ужэ адес амэ, о «найбаро стадо», трэбуй дэсо тэ терас, кай тэ жувас андо раё. Амэнди трэбуй тэ сыкавас лэ Дэвлэстирэ Шавэсти пэстири любовь. Например, амэ можэм тэ подритярас лэ памазаниконэн, лэстирэ ԥралэн. О Иисусо ԥэндя, кай во лэла тэ сындой лэ бакрорэн па кода, сар вонэ обжанаспэ лэстирэ ԥралэнца (Матф. 25:31—40). Амэ можэм тэ подритярас лэ Христостирэ ԥралэн, если ласа тэ поможысарас лэнди тэ росԥэнэн и лащи новость пала лэ Дэвлэско Царство и тэ сытярэн лэ манушэн, кай вонэ тэ ашэн лэстирэ ученикоря (Матф. 28:18—20). Кай тэ уӷодисарас лэ Иеговасти, амэнди на трэбуй тэ аштярас, кай тэ авэл о раё пэ ԥув. Амэ можэм ужэ адес тэ авас чесни андэ пэстирэ алава и дила и правильно тэ андярас пэстири жызня. И канешно, амэ можэм тэ авас предани лэ Иеговасти, пэстирэ хуласти или хулаяти, ай кадяжэ лэ ԥралэнди и лэ ԥэянди андэ собрания. Если амэ жувас па лэ Дэвлэско законо ужэ адес андэ кадэва найлашо миро, амэнди авэла май вушэро тэ кандас лэ Иеговас андо раё. Ту ужэ акана можэш тэ сытёс тэ терэс варисо полезно, кай када тэ приӷодийпэ тути андо раё пэ ԥув. Ай кадяжэ тэ терэс вся, кай тутэ тэ авэн кацавэ качестворя, савэ чалён лэ Иеговасти. w22.12 11, 12, абз. 14—16

Амэ любисарас амарэ Царёс лэ Иисусос, важ кода кай во розлашо Правителё. Екжэно о Иегова сытярэлас лэс и дя лэсти власть тэ правий (Ис. 50:4, 5). Погиндон, лэ Дэвлэско Шаво бут состар отԥэндёлас, важ кода кай любияс (Иоан. 13:1). О Иисусо ашэл, кай ту лэс тэ любис, сар пэстирэ Царёс. Во ԥэндя, кай кодэла, ко чаче любин лэс, сыкавэн када пэ дила и терэн кадя, сар во приԥэндя. О Иисусо ԥэнэн пэр лэндэ, кай вонэ лэстирэ друӷоря (Иоан. 14:15; 15:14, 15). Сави жэ дэ бари бах — тэ авас друӷоря лэ Иеговастирэ Шавэсти! Ту полян, кай о Иисусо андярэл пэс смирено и андэ вся шолпэ пэ пэско Дад. Кадяжэ ту уӷанглян, кай о Иисус праварэлас лэ боқалэн, подритярэлас кодэлэн, ко умэкля и вас, и дажэ исцэлияс лэ насвалэн (Матф. 14:14—21). Ту диқэс, сар о Иисусо адес руководий ла собранияса (Матф. 23:10). И ту уӷанглян, кай о Иисусо, сар Царё андэ лэ Дэвлэско Царство, стерэла англэ инке май бут лашымос. Сар ту можэш тэ сыкавэс, кай лэс любис? Если терэса кадя, сар во. Ай важ када трэбуй тэ дэс алав лэ Иеговасти и тэ болдёс. w23.03 4, абз. 8, 10

О Иегова фартэ драго создал о нэбо, и ԥув и моря, — вся када бутэсти сытярэл пала лэстэ (Пс. 104:24, 25). Кадяжэ погиндон, сар о Иегова создал лэ манушэс. Во дя амэнди способность тэ любисарас и природа, ай кадяжэ тэ диқас, тэ ашунас, тэ ласпэ, тэ зумавас, тэ ашунас о запахо. Вся када поможый тэ радосавас кодэлэсти, кай о Иегова создал вся разно. Андэ Библия исин инке ек важно причина, васо амэнди трэбуй тэ шас сама пэ лэ Иеговастирэ тварении. Вонэ сыкавэн лэстирэ качестворя (Рим. 1:20). Например, андэ природа можно тэ диқас, сар о Иегова вся идеально стердя. Андэ када дицол лэстири мудрость. Погиндон кадяжэ пала разно хамос, саво амэнди фартэ чалёл. Када доԥэнэн, кай о Дэл фартэ любий лэ манушэн. Кала розмышляем пала тварении, амэ полас, саво о Иегова, саво лэстэ характеро, и камас тэ пашувас каринг лэстэ. w23.03 16, абз. 4, 5

И жызня андэ кадэя люма ашэл май ԥари. Важ када амэнди авэла май ԥарэс тэ доверяем ла Библияти. И мануша моӷут тэ подшон амэнди гиндоря, кай андэ Библия нинай чачимос и кай о Иегова на стодя лэ кандинэ и годявэрнэ рабос. Если амэ уверени, кай андэ лэ Дэвлэско Алав нинай хохаимос, то сможэм тэ ашаспэ састэ, со бы и мануша тэ на ԥэнэн. Амэ ласа тэ жувас па лэ Иеговаско законо «вся и время, до конца» (Пс. 119:112). Амэнди на авэла лажаво тэ росԥэнас аврэнди пала чачимос анда Библия и тэ ԥэнас, кай вонэ тэ прилэн лэс андэ пэстири жызня (Пс. 119:46). Амэ сможэм тэ виритярас фартэ баро ԥаримос, дажэ и приследовании, и тэ на хасарас терпения и радость (Кол. 1:11; Пс. 119:143, 157). Через о чачимос амэндэ андэ жызня исин смысло, амэ можэм тэ ашаспэ спокойни и ӷанас, сар пэс тэ андярас. Кадяжэ о чачимос дэл амэнди райкани надежда пэ лащи жызня, сави авэла май англэ андэ лэ Дэвлэско Царство. w23.01 7, абз. 16, 17

Андэ рят англа пэстири смэрть о Иисусо долӷо мангэласпэ пала пэстирэ ученикоря: «Мангав тэ фэрис лэн лэ Найлашэстар» (Иоан. 17:15). Сави дэ бари любовь сас кай о Иисусо! Ӥто во екжэно трэбуй сас тэ пэрэандярэл баро ԥаримос, но во на гиндояс пала пэстэ, ай пэрэжывал пала апосталоря. Амэ старысавас тэ терас кадя жэ, сар о Иисусо, важ када на гиндосарас кати пала пэстэ. Амэ часто мангаспэ важ и ԥрала и ԥэя. Кадя амэ кандас лэ Иисусос и терас, сар во приԥэндя: «Любин ек еқэс». Канешно, лэ Иеговасти чалёл, кай амэ анда вся оди любисарас амарэ ԥралэн и ԥэян. Амарэ молитвы пала лэндэ моӷут лэнди фартэ тэ поможын, важ када андэ лэ Дэвлэско алав ԥэнэнпэ: «Кала анда вся оди мангэлпэ кодэва, ко кандэл лэ Дэвлэс, кай кацави молитва исин баро зор» (Иак. 5:16). Амарэ ԥралэнди и ԥэянди фартэ трэбуй, кай амэ тэ мангаспэ пала лэндэ, важ кода кай андэ лэндири жызня бут ԥаримос. w22.07 23, 24, абз. 13—15