Апрелё

Кай лэ Иеговастирэ служытеля, савэ жувэнас андэ библейско время, сас трудности, савэ вонэ совсем на аштярэнас. Вспомним лэ Иаковос. Лэско дад, о Исако, ԥэндя лэсти тэ лэл пэсти хулая анда лэ Лаваностирэ щея, во сас лэнго родо, саво тожэ служыяс лэ Дэвлэсти. О Исако ԥэндя лэ шавэсти, кай о Иегова анда вся оди лэс блаӷословия (Быт. 28:1—4). О Иаково кангля пэстирэ дадэс. Во ужыля анда Ханаано и авеля андэ лэ Лаваноско цэр, савэстэ сас дуй щея — Лия и Рахиль. О Иаково полюбисардя ла цыкня щя, ла Рахиля. Кай тэ жэнийпэ пэр латэ, во соӷласисайля тэ терэл бути кай лако дад 7 бэрш (Быт. 29:18). Но о Лавано хохаимаса жэнисардя лэ Иаковос пэ пэсти барэдэр щей, пэ Лия. О Иаково кацаво нэожыдал. О Лавано мэкля, кай во через куртестэ тэ жэнийпэ пэ Рахиль, но кати, если во лэла тэ терэл и бути инке 7 бэрш (Быт. 29:26, 27). Инке о Лавано андярэлас пэс лэ Иаковоса най чесно андэ дилови вопросоря. Варикай вся вмести о Лавано хохаимаса обжаласпэ лэ Иаковоса 20 бэрш! (Быт. 31:41, 42). w23.04 15, абз. 5

Кастэ амэ можэм тэ взвисавас пала помощь и совето? Атвето пэ када вопросо амэ ӷанас — амэ можэм тэ взвисавас каринг о Иегова. Во екжэно амэнди пала када ԥэнэн. Во камэл, кай лэстирэ служытеля тэ мангэнпэ часто. Андэ Библия дажэ ԥэнэнпэ: «На́ парашэн тэ мангэнпэ» (1 Фес. 5:17). Амэ можэм свободно тэ мангаспэ лэсти и тэ родас лэско руковоцтво, саво поможый амэнди андэ всаворэ ситуацыи андэ жызня (Прит. 3:5, 6). О Иегова — фартэ щедро Дэл. Важ када амэ можэм лэсти тэ мангаспэ андэ любо время. О Исусо ӷанэнас, кай лэ Иеговасти фартэ куч и молитвы, савэ ԥэнэн лэстирэ служытеля. Англа кода, сар тэ авэл о Исусо пэ ԥув, во диқэлас, сар лэско Дад атвечал пэ молитвы. Например, о Исусо сас рядом лэ Иеговаса, кала во атвечал пэ молитва ла Аннати, лэ Давидости, лэ Ильясти и бутэ служытелёнэнди, савэ лэс кандэнас (1 Сам. 1:10, 11, 20; 1 Цар. 19:4—6; Пс. 32:5). Важ када о Исусо сытярэлас пэстирэ учениконэн, кай вонэ тэ мангэнпэ часто и тэ патян, кай о Иегова дэла атвето пэ лэндирэ молитвы (Матф. 7:7—11). w23.05 2, абз. 1, 3

О ӷлавно рашай о Иодаё даралас лэ Иеговастар. Особено када драго дицэля тоди, кала и власть андэ Иудея заля андэ пэстирэ вас и Аталия, ла Иезавелятири щей. Вой сас жэстоко и дилявэлас пала власть. Вой умардя почти всаворэ́ лэ царёстирэ потомконэн, ай вонэ прижанас лати внукоря! (2 Лет. 22:10, 11). Лэ Иодаястири хулаи, и Иехошева, спасысардя еқэс анда кадэла бэяцэ, лэ Иоасос. Вонэ лэ хуласа гаравэнас пэстэ кадэлэ шаворэс и заботинаспэ пала лэстэ. Кадя о Иодаё и Иехошева фэрисардэ лэ Давидоско царско колено, кай во тэ ашэлпэ. О Иодаё сас верно лэ Иеговасти и на тинояспэ даратар англа Аталия. Кала лэ Иоасости сас 7 бэрш, о Иодаё упалэ доԥэндя, кай верно лэ Иеговасти. Во закамля тэ стерэл, кай о Иоасо тэ авэл царё. Если лэстэ када вижылоп, тоди по престоло бэшлоп лэ Давидоско потомко. Ай если най, во, наверно, хасардоп пэстири жызня. Блаӷодаря лэ Иеговасти лэстэ вижыля кода, со во загиндосардя. w23.06 17, абз. 12, 13

О царё Навуходоносоро моӷ тэ погиндой, кай о Даниило ваздэлпэ против лэстэ, и важ када тэ казний лэс. Но лэ Даниилос када на тердярдя — во сыкадя и смилость и росԥэндя о суно. Со поможыяс лэ Даниилости вся и жызня тэ авэл смило? Жы бэятостар во диқэлас ла дако и лэ дадэско райкано примеро (Втор. 6:6—9). Кадяжэ, о Даниило, канешно жэ, ӷанэнас най кати и ӷлавни лэ Дэвлэстирэ законоря, кацавэ сар и Дэш заповеди, но во кадяжэ ӷанэнас и разни детали андо законо. Например, со лэ израильтянонэнди можно сас тэ хан, ай со нащи (Лев. 11:4—8; Дан. 1:8, 11—13). О Даниило кадяжэ драго ӷанэнас вся, со сас лэ Дэвлэстирэ народоса, и диқэлас, каринг саво баро ԥаримос андя кода, кай и мануша на кандэнас лэ Иеговас (Дан. 9:10, 11). Важ вся пэстири долӷо жызня о Даниило най еқвар диқэлас, сар лэс подритярэлас о Иегова и лэстирэ фартэ зоралэ анӷелоря. И када доԥэнэнас лэсти, кай о Иегова лэс никала на ашавэла (Дан. 2:19—24; 10:12, 18, 19). w23.08 3, абз. 5, 6

И Ревекка сас годявэрни. Вой кадяжэ сас смило и ӷанэнас, кала и со тэ терэл (Быт. 24:58; 27:5—17). Инке вой обжаласпэ аврэнца пативаса и ӷанэнас тэ кандэл (Быт. 24:17, 18, 65). Ту тожэ можэш тэ авэс найӷордо и тэ подритярэс кодэлэн, касти о Иегова дя право тэ хулаий. Тоди ту сыкавэса райкано примеро андо ери и андэ собрания. Инке о христианино трэбуй тэ авэл сэжо. И Эсфирь сас сэжо и на гиндояс пала пэстэ фартэ бут, дажэ кала ашэля царица. Вой приашунделя каринг о совето, саво дя лати лако упэрвых ԥрал, о Мардохеё (Эсф. 2:10, 20, 22). Сар ту можэш тэ шоспэ пэ Эсфирь? Пуш совето аврэндар и прилэ кода, сости вонэ тут сытярэн (Тито 2:3—5). Андэр со инке и Эсфирь сас сэжо? Вой сас шукарни пэса, но на старыияспэ тэ шол бут сама пэр пэстэ (Эсф. 2:7, 15). w23.12 19, 20, абз. 6—8

О Иегова на камэл, кай амэ фартэ пэс тэ дошалярас. Если амэ росԥэндям пала бэзэх, каисайлям и терас вся, кай будэр лэс тэ на терас, амэ можэм тэ патяс, кай о Иегова амэн простисардя (Дила 3:19). О Иегова на камэл, кай посли када амэ и дальшэ пэс тэ дошалярас. Во ӷанэн, саво дэ баро вредо када можэт тэ анэн (Пс. 31:10). Если амэнди авэла фартэ ԥарэс по ди, амэндэ на вижала и дальшэ тэ прастас (2 Кр. 2:7). Важ када, если тумэ фартэ пэс дошалярэн, сэрэн, кай о Иегова — када «Дэл, саво простий» (Пс. 130:4). Кодэлэнди, ко каийпэ анда вся оди, во дэл алав: «Мэ... пала лэндирэ бэзэха будэр на лава тэ сэрав» (Иер. 31:34). Када сыкавэл, кай о Иегова на лэла тэ напоминает тумэнди пала бэзэха, савэ тумэ тердэ. На схан пэс, если через пэстирэ ошыбки тумэ не можэте тэ терэн варисави дила андэ собрания. О Иегова будэр на гиндой пала тумарэ бэзэха — на трэбуй када тэ терэн и тумэ. w23.08 30, абз. 14, 15

Кала сас и пандэмия КОВИДО-19, кодэла, ко приашундёлас каринг и найнадёжно инфармацыя, сас бут пэрэжывании. Ай кай лэ Иеговастирэ свидетеля, савэ приашундёнас каринг и указании, савэ дэл лэ Дэвлэстири арӷанизацыя, кацаво на сас (Матф. 24:45). Амэ на трэбуй тэ шас сама пэ кода, со па чачимастэ важно (Флп. 1:9, 10). И отвлечении моӷут тэ чорэн амари время и зор, савэ амэ моӷли бы тэ отдас пэ май полезно дила. И обычно дила, кацави сар хамос, пимос, бути и отдыхо, моӷут амэн тэ отвлекают, если авэна по пэрво ҭан андэ амари жызня (Лука 21:34, 35). Кроме када, амэ кажно дес ашунас бут новости пала беспорядкоря андэ страны и пала спороря андэ политика. Сэрэн, кай када можэт тэ авэл ловушка, важ кода кай амэ можэм тэ залас варикастири риг андэ гиндоря или андо ди. О Сатана использует всаворэ кадэла способоря важ ек ӷлавно цэль — кай амэ май набут тэ камас тэ терас кода, со правильно. w23.07 16, 17, абз. 12, 13

Важ лэ Иеговаско народо и Вечеря, кай тэ сэрас пала лэ Исусостири смэрть, — када само важно дес андо бэрш. Када ек события, сави приԥэндя о Исусо тэ справисарас (Лука 22:19, 20). Амэ фартэ аштярас и Вечеря. Васо? И Вечеря поможый амэнди тэ погиндосарас, васо кадя дэ куч о выкупо. Вой поможый амэнди вся и время тэ сэрас пала кода, сар амэ можэм тэ сыкавас пэстири блаӷодарность важ лэ Исусостири жэртва (2 Кр. 5:14, 15). Кадяжэ, кала амэ стидаспэ вмести, амэ подритярас ек еқэс (Римо 1:12). Кажно бэрш пэ Вечеря авэн бут ԥрала и ԥэя, савэ парашэлэ тэ ԥирэн пэ собрании. Кала амэ лэн драго прилас, када лэл лэн лэ одестар, и вонэ моӷут тэ закамэн тэ ринпэ каринг о Иегова. Инке пэ Вечеря авэн ӷостёря. Бутэнди андар лэндэ чалёл кода, со вонэ диқэн, ашунэн, и тоди вонэ закамэн, кай лэнца тэ изучают и Библия. Инке амэ аштярас и Вечеря, важ кода кай вой стидэл всаворэ ԥралэн и ԥэян еқэҭанэ. Акэ васо и Вечеря кадя куч амарэ одести! w24.01 8, абз. 1—3

О Иегова домэкля, кай лэско кучутно Шаво тэ отдэл пэстири жызня пала мануша. Через када моӷут тэ простинпэ амарэ бэзэха и амэ можэм тэ авас лэ Дэвлэстирэ друӷоря (1 Иоан. 4:10). Со май бут амэ гиндосарас пала кода, пэр со жылэ о Иегова и о Исусо, со май драго амэ полас, сар дэ фартэ вонэ любин кажнонэс андар мэндэ (Гал. 2:20). Кадэва подарко о Иегова стердя важ кода, кай фартэ любий. Во сыкадя пэстири любовь, кала отдя кода, со сас само куч лэстирэ одести, — лэ Исусос. Во домэкля, кай лэско Шаво тэ мучийпэ и тэ мэрэл важ амэндэ. О Иегова на ритярэл андэр пэстэ кода, со лэстэ по ди. Во ворта ԥэнэн пала када (Иер. 31:3). О Иегова пашардя амэн каринг пэстэ, важ кода кай любий (Сыстон Второзаконие 7:7, 8.) Нисо и нико не можэт тэ одлэл амэндар лэстири любовь (Римо 8:38, 39). Со тутэ по ди, кала ту гиндос важ лэ Иеговастири любовь? w24.01 28, абз. 10, 11

Важ и христианоря, савэн о Дэл витидя тэ правин по небо, фартэ куч лэндири надежда. Акэ савэ лашэ алава ԥэндя пала када ек андар лэндэ, о ԥрал Фрэдэрико Фрэнцо: «Амэ надеисавас най евья. Кода, пэр со надеийпэ кажно анда 144 000, савэ анда найбаро стадо, точно авэла. Када авэла кадя, сар амэ и прецтавить пэсти не можэм». Кадэла алава о ԥрал Фрэнцо ԥэндя андо 1991 бэрш. Инке во ԥэндя: «Амэ... на бистэрдям пэ скати дэ куч кадэя надежда. [...] Со май долӷо амэ аштярас, со май фартэ амэ цэнуисарас ла. Дажэ если прижалапэ тэ аштярас милионоря бэрша, када ашэл. Мэ цэнисарав пэстири надежда май фартэ, чем варикала». Бутэ лэ Иеговастирэ служытелёнэндэ адес исин авэр надежда. Вонэ кадя жэ сар и о Авраамо надеинпэ тэ жувэн вечно пэ ԥув, кала лэла тэ правий лэ Дэвлэско Царство (Евр. 11:8—10, 13). Сави надежда амэндэ тэ на авэл — када вечно тэ жувас пэ ԥув или по небо, амэ лошаса аштярас кадэя время. И амари надежда можэт тэ ашэл инке май састи. w23.12 9, 10, абз. 6—8

Дэлмут по входо андэ свынто катуна сас харкумуно жэртвенико, пэ саво андэ жэртва лэ Иеговасти анэнас лэ жывотнонэн (Исх. 27:1, 2; 40:29). Но через кадэла жэртвы лэ народости най полностью простинаспэ и бэзэха (Евр. 10:1—4). И жэртвы, савэ вся и время анэнас андэ свынто катуна, сыкавэнас, кай англэ авэла отдини жэртва, сави полностью витинэна лэ манушэн лэ бэзэхэстар. О Исусо ӷанэнас, кай о Иегова бишалдя лэс пэ ԥув, кай во тэ отдэл пэстири жызня сар выкупо важ и мануша (Матф. 20:28). Кала о Исусо болделя, во сыкадя, кай ӷотово тэ стерэл кода, со камэл о Иегова (Иоан 6:38; Гал. 1:4). О жэртвенико, пэ саво, ԥэнэса, муля о Исусо, — када лэ Дэвлэстири «воля». Вой сас андэ кода, кай лэско шаво тэ анэн андэ жэртва пэстири совершэно манушыкани жызня. О Исусо отдя пэс «еқвар и пэ вся и время», кай тэ витинэл лэ бэзэхэстар кажнонэс, ко андэр лэстэ патял (Евр. 10:5—7, 10). w23.10 26, 27, абз. 10, 11

Кай амаро ди тэ авэл ӷотово каринг и Вечеря, англа када трэбуй тэ погиндосарас пала лэ Исусостири жэртва. Екжэнэ амэ не смоӷли бы тэ улас пэстар о ӷрехо и смэрть (Пс. 49:7, 8). Важ када о Иегова отдя пэстирэ Шавэс важ амэндэ. Када сас фартэ бари жэртва важ о Иегова и важ о Исусо. Со май бут амэ гиндосарас пала када, со май фартэ амэ лас тэ цэнисарас о выкупо. О Адамо стердя ӷрехо и кадя во хасардя и возможность тэ жувэл вечно най кати важ пэстэ, но и важ всаворэ пэстирэ бэяцэ. Кай тэ рий по ҭан кода, со хасардя о Адамо, о Исусо отдя пэстири идеально жызня сар жэртва. Кала лэ Дэвлэско Шаво жувэлас пэ ԥув, «во на стердя нисаво бэзэх и ни еқвар на хохадя» (1 Пёт. 2:22). Важ када каринг кодэя время, сар о Исусо тэ мэрэл, лэстири жызня сас точно кацави, сави хасардя о Адамо (1 Кр. 15:45; 1 Тим. 2:6). w24.01 10, абз. 5, 6

Посли воскресения о Исусо зажыля андо Свынто май анда свынти андо духовно храмо, кай через и время паша лэстэ авэна всаворэ избрани. Амэ полас, саво порядко андэ вужи поклонения о Иегова камэл, кай адес тэ авэл. Андэр лэстэ ӷлавно лэ Исусостири жэртва и лэстири рашаицко дила. Кадэва порядко пэ бутэстэ май лашо кодэлэстар, саво сас раньшэ. О ӷлавно рашай андо Израилё зажалас лэ жывотнонэстирэ ратэса андо Свынто май анда свынти андэ катуна, сави стердэ и мануша. Ай о Исусо зажыля андо небо — андэ со май свынто ҭан анда всаворэ, кай тэ тердёл англа Иегова. Котэ во пэрэдя лэ Дэвлэсти пэско право пэ совершэно манушыкани жызня, кай тэ улэл о бэзэх (Евр. 9:24—26). Лэ Исусостири жэртва пэ вся и время стрий о бэзэх. Амэ всаворэ можэм тэ тэлювас лэ Иеговасти андэ лэско духовно храмо, кай бы амэ тэ на жувас, по небо или пэ ԥув. w23.10 28, абз. 13, 14

Погиндосар, саво ҭан залэл о Исусо по небо. Во Царё и Ӷлавно Рашай, саво жалуий. Блаӷодаря лэсти амэ можэм тэ пашувас «каринг лэ Дэвлэско троно, саво здиқэл пар мэндэ па пэско баро ковло ди». Аврэ алавэнца, амэ можэм тэ мангаспэ лэ Дэвлэсти и тэ патяс, кай во жалуия амэн и, «кала када трэбуй», поможыя амэнди (Евр. 4:14, 15). Амэ камас кажно дес тэ розмышляем пала кода, со о Иегова и о Исусо стердэ и терэн важ амэндэ. Через лэндири любовь амэ тожэ камас тэ любисарас лэн и анда вся оди тэ тэлювас лэ Иеговасти (2 Кр. 5:14, 15). Ек анда способоря тэ сыкавас лэ Дэвлэсти и лэстирэ Шавэсти, сар дэ фартэ амэ лэн любисарас, — када тэ поможысарас лэ манушэнди тэ ашэн лэ Иеговастирэ свидетеля и лэ Исусостирэ ученикоря (Матф. 28:19, 20). О апостало Павло имено кадя и терэлас. Во ӷанэнас, кай о Иегова камэл, кай и «разни мануша тэ уӷанэн о чачимос и тэ спасынпэ» (1 Тим. 2:3, 4). О Павло отдэлас вся пэско зор пэ служэния и росԥэнэнас важ о Дэл всаворэнди, касти кати моӷ. Важ када во моӷ тэ ԥэнэн, кай «стердя вся, со сас па лэско зор, кай тэ поможый со май разнонэ манушэнди и тэ спасый хоть дэсавэн андар лэндэ» (1 Кр. 9:22, 23). w23.10 22, 23, абз. 13, 14

Амэ часто адиносарас кадэла алава андэ служэния, кай тэ сыкавас, сави авэла жызня андо раё. Сар жэ амэ можэм тэ доԥэнас аврэнди — и корко пэсти — кай вся авэла чаче кадя, сар запистромэ андэ Свынто тайна 21:3, 4? Посли кода, сар о Иегова дя алав тэ стерэл пэ ԥув раё, во доԥэнэн, васо амэ можэм тэ патяс лэсти. Пала када запистромэ андэ Свынто тайна 21:5, 6: «Кодэва, ко бэшэл по троно, ԥэндя: „Мэ терав вся нэво!“ — и инке ԥэндя: „Запистросар, важ кода кай кадэла алава чачунэ и лэнди исин патяимос“. Потом во ԥэндя манди: „Вся ашэля кадя, сар сас ԥэндо! Мэ А́льфа и Аме́га, пэрво и послиднё“». w23.11 3, абз. 3—5

Если о тэрно ԥрал сытеля тэ гиндой кадя, сар о Иегова, када лэла тэ дицол па кода, сар во утидэлпэ и сави лэстэ причоска. Часто и мода андэ кадэя люма заандярэн и мануша, савэ андярэн пэс билажавардэс, и на стон патив по Иегова. Кадэла мануша на гиндон кадя, сар во. Вонэ вимэкэн кацави ӥда, кай вой тэ авэл фартэ обцырди, или кай и мурша через латэ тэ шонпэ пэ жувля. Пала со лэла тэ гиндой о ԥрал, кала витидэл со тэ лэл пэр пэстэ? Если во андэ вся камэл тэ терэл кадя, сар о Христос, во шола сама пэ принцыпоря анда Библия, ай кадяжэ пэ ԥрала андэ собрания, савэндэ састи дружба лэ Иеговаса. Во можэт тэ пушэл пэстар: «И ӥда, сави мэ камав тэ лав пэр пэстэ, поджал важ о христианино? Дицол па мэрни ӥда и па мэрни причоска, кай мэ став патив пэ авэр? Кала и мануша диқэна пэр мандэ, полэна вонэ, кай мэ служысарав лэ Дэвлэсти?» (1 Кр. 10:31—33). Если важ о тэрно ԥрал важно, со гиндой о Иегова и со лэстэ андо ди, тоди во затерэла лашо алав най кати лэ ԥралэндар и лэ ԥэяндар анда собрания, но и пэстирэ небеснонэ Дадэстар. w23.12 26, абз. 7

Дэлмут лэ Дэвлэстирэ народос кадя жэ приследовал и о «южно царё» (Дан. 11:40). Например, в начале андо 20 вико бутэ ԥралэн шонас андо баруно важ кода, кай вонэ на залэнас никастири риг андэ политика, ай дэсавэ бэятонэн, савэ сас лэ Иеговастирэ свидетеля, исключали анда школа. Но послидни бэрша и предани лэ Иеговастирэ служытеля, савэ жувэн котэ, кай правий кадэва царё, пэрэандярэн авэр ԥаримос. Например, кала андэ страна жан и выборы, кай о христианино можэт тэ авэл гиндо тэ подритярэл варисави политическо партия или манушэс. Тэ ӷолосует во на жала, но, можэт, андэ пэско ди и годи во ужэ заля варикастири риг. Сар жэ важно тэ на залас никастири риг андэ политика, най кати пэ дила, но и андо ди и годи! (Иоан. 15:18, 19). w23.08 12, абз. 17

Па ла жызняко дром амэ трэбуй тэ прастас кадя, кай тэ получисарас и наӷрада (1 Кр. 9:24). О Исусо ԥэндя, кай амэнди тэ на авэл ԥарэс «бутэ хамастар, бутэ пимастар и разнона дилатар» (Лука 21:34). Кадэва и авэр библейски стихоря поможына тэ диқас, андэр со трэбуй тэ парудювас, кай и дальшэ тэ прастас па дром, саво андярэл каринг и вечно жызня. Амэ ӷанас, кай допрастаса жы каринг о финишо, важ кода кай о Иегова дэла амэнди пэ када зор (Ис. 40:29—31). Важ када на здэнпэ! Сытён кай о апостало Павло, саво отдэлас вся пэско зор, кай в концэ тэ получий и наӷрада (Флп. 3:13, 14). Нико на прастэла па кадэва дром важ тумэндэ, но лэ Иеговастирэ зорэса тумэндэ вся вижала. Во поможыя тумэнди тэ терэн пэстири дила и тэ ашавэн кода, со лишнё. Лэ Иеговастирэ зорэса тумэндэ вижала тэ на здэнпэ, кала прастэн па ла жызняко дром, и тэ победин! w23.08 31, абз. 16, 17

Вспомните, со тердяпэ, кала лэ Исусости сас 12 бэрш. Кала о Иосифо и Мария ринаспэ анда Иерусалимо, вонэ шутэ сама, кай лэ Исусос лэнца нинай (Лука 2:46—52). Вонэ, сар родителя, трэбуй сас тэ следин, кай лэндирэ бэяцэ тэ авэн паша лэндэ. Но кала вонэ виарақлэ лэ Исусос, и Мария ля тэ ԥэнэн, кай через лэстэ вонэ бут пережывали. Но о Исусо дя дума ласа просто и пативалэс. Хоть о Иосифо и Мария «на полинэ лэстирэ алава», во на парашэлас «тэ кандэл лэн». Амарэ кучутнэ бэяцэ и подросткоря, ай тумэнди ԥарэс тэ кандэн лэ родителёнэн, особено кала вонэ шылинпэ или кала тумэ на дополэн ек еқэс? Со тумэнди поможыя? Гиндон, со по ди кай о Иегова. Андэ Библия ԥэнэнпэ, кай, кала тумэ кандэн лэ родителёнэн, «када уӷодно лэ Барэ Хуласти» (Клс. 3:20). О Иегова диқэл, кала и взросли тумэн на полэн или кала вонэ стон правила, савэ здэнпэ най справедливи. Но если тумэ всаек лэн кандэн, о Иегова кадэлэсти фартэ радуийпэ. w23.10 7, абз. 5, 6

Прецтавь кацави ситуацыя: о однокласнико ԥэнэн, кай лэ Иеговастирэ свидетеля трэбуй па аврятэ тэ диқэн пэ кода, кала о мурш жувэл муршэса или и жувли жувляса. Возможно, амэнди трэбуй тэ ԥэнас лэсти, кай амэ прижанас, кай кажно можэт тэ витидэл сар тэ жувэл (1 Пёт. 2:17). Наверно, посли када амэндэ вижала тэ росԥэнас лэсти, сар лэ Дэвлэско законо поможый тэ авас бахталэ. Кала варико несоӷласно амэнца и тердёл пэ пэско, амэнди на трэбуй сразу тэ гиндосарас, кай полас, андэр со во патял. Например, о однокласнико ԥэнэн, кай тэ патяс андо Дэл, када дилимос. Сыкавэл када, кай во анда вся оди патял андэ эволюцыя и драго розлэлпэ андэ када? Или можэт во просто пэрэԥэнэн кода, со ашундя варикастар? Тоди сыкав лэсти по амаро сайто jw.org, сар о Дэл вся создал. Или бишал лэсти ссылка по сайто. Наверно, ӷэт май интя во закамэла тэ подэл дума пала кода, со адиносардя или диқля пэр лэстэ. Через кода, кай амэ стас патив пэ авэр, возможно, вонэ закамэна тэ уӷанэн май бут пала Библия. w23.09 17, абз. 12, 13

Дажэ если амэ шылисавас, о Иегова можэт и дальшэ тэ патял амэнди и тэ блаӷословий амэн, если амэ парудювас и на парашас тэ надеисавас пэр лэстэ (Прит. 28:13). О Самсоно на сас идеально мануш и дажэ стердя бари ошыбка, кала патяя ла Далилати. Но во на парашэля тэ служый лэ Иеговасти и о Дэл на одбанделя лэстар. Во домэкля, кай о Самсоно тэ терэл инке ек бари дила. О Дэл диқэлас по Самсоно сар по мануш, савэстэ састи вера. Када дицол анда 11 ӷлава Евреёря. Котэ машкар верни лэ Дэвлэстирэ служытеля пистромэ лэ Самсоноско алав. Сави дэ бари бах тэ служысарас лэ небеснонэ Дадэсти! Во фартэ любий амэн и ӷотово тэ дэл зор андэ ԥари время. Важ када давайте тэ мангас лэ Иеговас кадя жэ, сар о Самсоно: «Вспомни пала мандэ и дэ манди зор» (Суд. 16:28). w23.09 7, абз. 18, 19

Амэ сэрас, кай лэ Иеговаско дес ӥто авэла, и важ када росԥэнас всаворэнди и лащи новость. И всаек дэкала амэндэ на хутилэл смилость тэ задас дума пала Библия. Васо? Важ кода кай дарас, со пала амэндэ гиндона и мануша или со амэнца стерэна. Кадя жэ сас лэ Петроса. И рят, кала лэ Исусос андярдэ по сындо, о Пётро отԥэнделя, кай во лэ Исусоско ученико. Во дажэ най еқвар ԥэндя, кай вобще на ӷанэн лэс (Матф. 26:69—75). Но ӷэт май интя кадэва жэ апостало сыкадя пэстири вера. Во пистросардя: «Кодэлэстар, состар лэн шол андэ дар, на́ даран и ни пала со не пережывайте» (1 Пёт. 3:14). Лэ Петростирэ алава дэн амэнди зор тэ улас и дар англа мануша. Со амэнди поможыя андэ када? О Пётро пистросардя: «Полэн лэ Христос сар Барэ Хулас андэ пэско ди» (1 Пёт. 3:15). Сар када тэ полас? Амэнди важно тэ гиндосарас важ кода, саво зор и сави власть кай о Исусо Христос, амаро Ӷосподо и Царё. w23.09 27, абз. 6—8

Амэнди трэбуй тэ авас осторожни, кай тэ на попэрас андэ «евутни дила, сави жал ла тэмнотатар» (Еф. 5:11). Сар амэ ужэ ӷанас, кала о мануш диқэл, ашунэл или дэл дума пала варисо найвужо и билажавардо, во ашэл май пашэ, кай тэ стерэл бэзэх (Быт. 3:6; Иак. 1:14, 15). И мануша андэ лэ Сатанастири люма камэн амэнди тэ доԥэнэн, кай тэ андярэс найвужи и билажаварди жызня — када нармально (2 Пёт. 2:19). О Сатана вся и время старыияспэ тэ задилярэл о шэро лэ манушэнди, кай вонэ тэ на полэн, со лашо, ай со най (Ис. 5:20; 2 Кр. 4:4). Акэ васо андэ бут киноря, передачи и сайторя ԥэрдо кода, со на сжалпэ лэ Иеговастирэ законоса. О Сатана старыийпэ тэ зашол амэнди андо шэро гиндо, кай если о мануш андярэл пэс найвужэс и билажавардэс — када лащи и вэсэло жызня и кадэлэстар нисо найлашо на авэла (Еф. 5:6). w24.03 22, абз. 8—10

И израильтяноря ԥиравэнас и свынто катуна пэса, кала пэрэжанас ҭан ҭанэстар. Ла использовали варикай 500 бэрш жы каринг кода, сар андо Иерусалимо построисардэ о храмо (Исх. 25:8, 9; Чис. 9:22). Кадэя катуна сас ҭан, каринг и израильтяноря авэнас, кай тэ анэн лэ Дэвлэсти жэртвы (Исх. 29:43—46). Но и свынто катуна кадяжэ сыкавэлас варисо май лашо. Вой сас «тень [кодэлэсти], со терэлпэ по небо». О апостало Павло ԥэндя, кай вой «сыкавэл кода, исин щас» — баро лэ Иеговаско духовно храмо (Евр. 9:9). Ай када сыкавэл, кай кала о Павло пистрояс о Письмо лэ евреёнэнди, о духовно храмо ужэ сас. Во появисайля андо 29 бэрш н. э. Андэ кодэва бэрш о Исусо болделя и ля тэ служый сар «ӷлавно рашай» андэ лэ Иеговаско духовно храмо (Евр. 4:14; Дила 10:37, 38). w23.10 25, 26, абз. 6, 7

Кай о христианино тэ барёл духовно, во трэбуй тэ авэл гибко. Пала со жал и дума? Амэнди трэбуй тэ авас блаӷоразумни — то есть тэ ӷанас, сар тэ андярас пэс, кала варисо андэ жызня парудёл, и тэ стас патив пэ кода, со гиндон и витидэн авэр. Амэ служысарас лэ Иеговасти и важ када камас тэ авас блаӷоразумни. Ай инке амэ камас тэ авас смирени и тэ жалуисарас анда вся оди. Пала Иегова ԥэнэнпэ, кай во скала, важ кода кай во састо и лэс нисо на змарэла (Втор. 32:4). Но о Иегова инке и блаӷоразумно Дэл. Андэ кадэя люма вся и время варисо парудёл. Но амаро Дэл гибко и во ӷотово сразу жэ варисо тэ парувэл, кай тэ исполница лэско замысло. О Иегова создал лэ манушэн пар пэстэ и стердя кадя, кай вонэ моӷут тэ присытён каринг кода, со ӥто парудёл. Кадяжэ через и Библия во дя амэнди принцыпоря, савэ поможына амэнди тэ прилас годявэрнэ ришэнии, саво бы ԥаримос амэндэ тэ на авэл. Лэ Иеговаско примеро и принцыпоря, савэ во амэнди дя, сыкавэн, кай хоть во и састо, сар скала, всаек во блаӷоразумно. w23.07 20, абз. 1—3

Андэ Библия ԥэнэнпэ, кай екжэно о Дэл сыстосардя пэс ла даса, сави любий пэстирэ бэятос (Ис. 66:12, 13). Прецтавьте, сар вой лэл пэстирэ бэятос пэ вас и састэс облэл. Если во кати заровэл, вой ӥто авэл каринг лэстэ. Кала амэ пала варисо пережываем, амэ тожэ можэм тэ патяс, кай о Иегова амэн любий. Во на одбандёл амэндар, кала амэ шылисавас. Андэ дэлмутни время и израильтяноря упалэ и упалэ терэнас лэ Иеговасти дуқанэс. Но кала вонэ каинаспэ и ринаспэ каринг лэстэ, во ԥэнэнас, кай на парашэля лэн тэ любий. Акэ савэ алава во ԥэндя лэнди: «Ту куч андэ мэрнэ яқа, ту ашэс, кай мэ тэ став патив пэр тутэ, и мэ тут любисарав» (Ис. 43:4, 5). Лэ Иеговастири любовь каринг амэндэ на парудёл. Дажэ кала амэ фартэ шылисавас о Иегова на отԥэндёлпэ амэндар. Если амэ каисаваса и рисаваса каринг лэстэ, тоди диқаса, кай во на парашэля амэн тэ любий. Во дэл алав, кай «анда оди простия» (Ис. 55:7). Андэ Библия ԥэнэнпэ, кай кала о Иегова простий, во «здиқэл пэр тумэндэ» (Дила 3:19, сноска). w24.01 27, абз. 4, 5

О Иегова можэт тэ поможый амэнди андэ ԥари ситуацыя. Например, амэ одмангаспэ кай о начальнико по канӷрэсо. Или мангас, кай амэнди тэ парувэн о ӷрафико пэ бути, кай амэ тэ авас пэ собрания. Кала амэ терас кода, со па амаро зор, амэ дас лэ Иеговасти возможность, кай во амэнди тэ поможый. И можэт тэ авэл пэ бутэстэ май фэдэр, чем амэ аштярасас. Тоди амэ ласа инке май фартэ тэ патяс лэ Иеговасти. О Ездра сас найӷордо и мангэлас лэ Иеговас пала помощь. Дэкала через и бари отвецтвеность о Ездра фартэ пэрэжывал. Но кажно разо во сыкавэлас, кай во найӷордо и взвияспэ каринг о Иегова (Езд. 8:21—23; 9:3—5). Авэр мануша диқэнас, сар о Ездра надеияспэ по Иегова и када поможыяс лэнди май фартэ тэ патян. Вонэ подритярэнас лэс и камэнас тэ терэн кадя жэ, сар во (Езд. 10:1—4). Если ту фартэ пэрэжываеш пала родо, кай лэнца тэ авэл вся драго, и пала кода, сар лэн тэ проправарэс, тоди росԥэн пала вся када лэ Иеговасти. w23.11 17, 18, абз. 15—17

О Иегова ԥэндя по Авраамо, кай во уӷодий лэсти. Кадэва мануш ужылятар анда пэстири страна, жувэлас андэ катуны и сас ӷотово тэ анэн андэ жэртва пэстирэ шавэс, савэс фартэ любияс. Но када на сыкавэл, кай о Дэл аштярэл, кай и амэ тэ терас кадя жэ. Па чачимастэ, амэндэ исин бут сар тэ сыкавас пэстири вера пэ дила. Амэ можэм анда вся оди тэ шас сама нэвэ манушэн андэ собрания, тэ поможысарас лэ ԥралэнди и лэ ԥэянди, савэнди трэбуй помощь, и тэ заботисавас пала пэско ери (Римо 15:7; 1 Тим. 5:4, 8; 1 Иоан. 3:18). Ай инке ек фартэ важно дила, сави сыкавэла, кай амэндэ исин вера, када анда вся оди тэ росԥэнас пала Дэл (1 Тим. 4:16). Всаворэ амэ можэм тэ сыкавас пэ дила, кай патяс лэ Иеговасти. Амэ уверени, кай лэстирэ алава исполнинапэ и вся, со во терэл, када со май фэдэр. И тоди амэ сможэм тэ уӷодисарас лэ Дэвлэсти и во ԥэнэна пар мэндэ, кай амэ лэстирэ друӷоря. w23.12 2, абз. 3; 6, абз. 15

О апостало Павло взвисайля каринг и каринфяноря лэ алавэнца анда адесутно стихо. Кадэла алава поджан каринг всаворэ мурш андэ христианско собрания. О мануш, савэстэ лащи дружба лэ Иеговаса, жувэл па лэ Дэвлэско законо и андэ пэстири жызня вся и время прилэл лэ Дэвлэстирэ принцыпоря (Лука 2:52). Васо лэ тэрнэ ԥралэнди трэбуй тэ старыинпэ тэ авэн кацавэ? Кай о мурш андо ери и андэ собрания исин бут обязаности. Тэрно ԥрал, наверно, ту гиндос пала кода, со авэла англэ, саво ту авэса? Возможно, тутэ исин цэль тэ авэс пианероса или помошнико андэ собрания, ай тоди тэ служыс сар барэдэр ԥрал. Можэт, ту закамэса тэ жэниспэ и кай тутэ тэ авэн бэяцэ (Еф. 6:4; 1 Тим. 3:1). Если ту витидэса варисо анда када, тутэ появинапэ нэвэ обязаности. Кай лэн тэ стерэс, тутэ трэбуй тэ авэл састи дружба лэ Иеговаса. w23.12 24, абз. 1, 2

О Иегова ԥэндя лэ барэдэрэ ԥралэнди андэ собрания тэ диқэн пала лэстирэ бакрорэ, савэн во фартэ цэнуий. Кадэла ԥрала, сар заботливи пастухоря, цэнин пэстири служэния (Иер. 23:4; 1 Пёт. 5:2). Сар жэ амэ блаӷодарни лэ Иеговасти пала кадэла мурша, пэ савэ можно тэ надеиспэ. Лэ барэдэрэ ԥралэнди авелоп драго тэ роздиқэн о примеро лэ Гедеоноско, саво сас сындомари (Евр. 6:12). Во сас кодэва, ко фэрий лэ Дэвлэско народо и диқэл пала лэстэ (Суд. 2:16; 1 Лет. 17:6). Сар и во, адес и барэдэр ԥрала заботинпэ пала лэ Дэвлэско народо андэ ԥари и нэспокойно время (Дила 20:28; 2 Тим. 3:1). Всаворэ амэ бутэсти можэм тэ сытювас кай о Гедеоно. Во полэлас, со па лэско зор, ай со най, сас найӷордо и кандино мануш. Кадяжэ, кай тэ стерэл вся пэстири дила, сави о Иегова лэсти дя, во трэбуй сас бут со тэ виритярэл. Нэважно, барэдэр ԥрала амэ или най, амэ можэм тэ цэнисарас кацавэ манушэн. Давайте подритяраса кадэлэ ԥралэн, савэ пристон бут зор, кай тэ терэн и дила (Евр. 13:17). w23.06 2, абз. 1; 3, абз. 3