Маё

Андо пэрво вико кай и христианоря сас ԥаримос — «па вся и ԥув... [сас] баро боқалимос». И хула́я андэ еря пэрэжывали, кай лэндирэ ерести авэла най со тэ хан. Ай со можно тэ ԥэнас пала тэрнэ ԥрала и ԥэя, савэ гиндонас инке май бут тэ служын? Можэт, вонэ гиндонас, кай лэнди прижалапэ тэ отстон пэстирэ планоря. Но хоть лэндэ и сас ԥаримос, и христианоря смоӷли лэс тэ виритярэн. Вонэ на парашэнас тэ росԥэнэн и лащи новость везде, кай вонэ сас, и анда вся оди поделисайлэ лэ ԥралэнца и лэ ԥэянца андэ Иудея кодэлэса, со лэндэ сас (Дила 11:29, 30). Лэнди динэ вся, со трэбуй, и вонэ лично диқлэ, кай о Иегова пала лэндэ заботийпэ (Матф. 6:31—33). Вонэ, возможно, ашэлэ инке май пашэ каринг и ԥрала и ԥэя, савэ поможысардэ лэнди. Ай кодэла, ко терэнас и пожэртвовании или поможынас варисар па аврятэ, сас бахталэ кодэлэстар, кай делинаспэ аврэнца (Дила 20:35). w23.04 16, абз. 12, 13

Дэкала о Иегова можэт тэ поможый амэнди через и мануша, савэ лэсти на служын. Например, о Иегова побудисардя, кай о царё Артаксерксо тэ одмэкэл лэ Неемияс, кай во тэ рийпэ андо Иерусалимо и тэ ваздэл о форо (Неем. 2:3—6). Адес о Иегова тожэ можэт тэ поможый амэнди через кодэла, ко лэсти на служын. Амэнди на трэбуй тэ аштярас, кай о Иегова лэла всегда тэ атвечает пэ молитвы варисар нэобычно. Но кажно разо, кала во атвечает пэ молитва, во дэл имено кода, со трэбуй, кай амэ лэс никала тэ на ашавас. Важ када старыинпэ тэ шон сама, сар во тумэнди атвечает, и гиндон пала када (Пс. 66:19, 20). Амари вера дицол най кати тоди, кала мангаспэ лэ Иеговасти, но и кала прилас лэстирэ атветоря, савэ бы вонэ тэ на авэн (Евр. 11:6). w23.05 12, абз. 13, 15, 16

Амэ дям алав тэ служысарас лэ Иеговасти вечно и тэ андярас лэстири время. Амэ трэбуй тэ ритярас пэско алав. Тэ жувас кадя, сар амэ ԥэндям важ амэндэ най ԥарэс. Важ кода кай тэ андярас лэ Дэвлэстири время — када и исин амари жызня (Тайна 4:11). О Иегова создал амэн пар пэстэ и дя амэнди жылания тэ ӷанас лэс. Важ када амэ камас тэ пашувас каринг лэстэ и амэнди чалёл тэ терас кода, со во камэл. Ай инке, кала амэ кандас лэ Дэвлэс и терас кадя, сар лэско Шаво, амэндэ появийпэ май бут зор (Матф. 11:28—30). Важ када на парашэн тэ терэн вся, кай май фартэ тэ любин лэ Иеговас. Кай када тэ вижал, розмышляйте пала кодэва лашымос, саво во ужэ тумэнди дя, и пала кодэва, саво во дэла англэ. Со май фартэ тумэ лэна тэ любин лэ Дэвлэс, со май вушэро тумэнди авэла лэс тэ кандэн (1 Иоан. 5:3). Ай кадяжэ терэн кадя, сар о Исусо. Со поможысардя лэсти тэ стерэл вся, со камэл о Дэл? Во мангэлас помощь кай о Иегова и вся и время сэрэлас пала наӷрада (Евр. 5:7; 12:2). Сар и о Исусо, мангэн кай о Иегова зор и никала на бистрэн пала наӷрада, сави во дэла, — када и вечно жызня. w23.08 27, 28, абз. 4, 5

Амэнди всаворэнди чалён терпеливи мануша. Амэ стас патив по мануш, саво на вижал андар пэстэ, дажэ если лэстэ сразу нинай кода, со во камэл. Кала амэ шылисавас, амэ цэнисарас, кай авэр терпеливи каринг када. И канешно, амэ блаӷодарни лэ ԥралэсти или ла ԥьяти, савэ изучали амэнца и Библия. Вонэ на мэклэ амэн, хоть амэ и най сразу поласас и приласас кода, со уӷанасас. Но со май фартэ амэ блаӷодарни лэ Иеговасти, саво сыкавэл каринг амэндэ фартэ бари терпения! Но ԥэнаса чачимос: хоть амэ цэнисарас аврэндири терпения, екжэнэ тэ авас терпеливи амэнди найвушэро. Амэнди можэт тэ авэл найвушэро тэ на холявас, кала тердювас андэ пробка, особено, если грабисавас. Или амэ можэм тэ вижас андар пэстэ, кала авэр терэн кода, со амэнди фартэ на чалёл. Ай дэкала можэт тэ здэлпэ, кай амэ кадя и на доаштярдюваса о нэво миро, саво камэл тэ дэл о Иегова. Андэ кацавэ ситуацыи амэ трэбуй тэ сытювас тэ тэрписарас. w23.08 20, абз. 1, 2

О Иегова ԥэндя лэ Гедеоности, кай во тэ отбишалэл пэстирэ халавдэн май бут, чем епаш. О Гедеоно моӷ тэ гиндой: «Нэужэли када обязательно? Сар жэ амэ тоди победисараса?» И всаек о Гедеоно кангля. И барэдэр ԥрала андэ амарэ деса сытён кай о Гедеоно — вонэ терэн кадя, сар ԥэнэн лэ Иеговастири арӷанизацыя, кала варисо трэбуй тэ парувэн или тэ стерэн па аврятэ (Евр. 13:17). О Гедеоно кандэлас лэ Иеговас, хоть лэсти сас страшно тэ терэл и дила, через сави во моӷ тэ хасарэл и жызня (Суд. 9:17). О Иегова ԥэндя, кай во лэс подритярэла. Важ када о Гедеоно анда вся оди патялас, кай во сможэт тэ фэрий лэ Дэвлэско народо. Адес андэ дэсавэ страны амари дила заԥандадэ. И барэдэр ԥрала, савэ котэ жувэн, лэн примеро лэ Гедеоностар. Вонэ смило проандярэн и собрании и ԥэнэн лэ ԥралэнди и лэ ԥэянди сар тэ служын. Кадяжэ и барэдэр ԥрала анда вся оди росԥэнэн пала Дэл, хоть через када моӷут тэ попэрэн андо баруно, тэ хасарэн и бути или дажэ и жызня. Кала авэла и бари бида, лэ барэдэрэ ԥралэнди трэбуй авэла смилость, кай тэ прилэн и указании, савэ вонэ получина андэ кодэя время. w23.06 5, 6, абз. 12, 13

О Иегова стердя кадя, кай пала лашымос, саво стердя кадэва ӷлавно рашай, сас запистромэ андэ Библия важ амэндэ (Римо 15:4). Ай кала о Иодаё муля, лэс па особеному притидэ, и кадэлэса стодэ патив пэр лэстэ. Амэ адиносарас: «Лэс гарадэ лэ царёнэнца андэ лэ Давидоско форо, важ кода кай андо Израилё во терэлас лашымос важ о чачуно Дэл и лэско цэр» (2 Лет. 24:15, 16). Кода, со амэ ӷанас пала Иодаё, поможый, кай амэндэ тэ авэл дар англа Дэл. И барэдэр ԥрала андэ собрания моӷут тэ сытён лэ Иодаёстар. Вонэ моӷут драго тэ диқэн пала собрания и тэ на парашэн тэ фэрин лэ Иеговастирэ бакрорэн (Дила 20:28). Лэ Иодаёско примеро кадяжэ подритярэл и кодэлэн, ко андэ бэршэндэ. Если вонэ даран лэ Иеговастар и никала лэс на ашавэн, кода, со вонэ терэн важ лэстэ, фартэ куч. Лэ тэрнэ ԥралэнди и ԥэянди авелоп полезно тэ шон сама пэ кода, сар о Иегова диқэлас по Иодаё. Вонэ моӷут тэ сытён лэ Иеговастар и тэ сыкавэн бари патив лэ ԥралэнди и лэ ԥэянди, савэ андэ бэршэндэ. Важ амэндэ фартэ куч кодэла, ко служын лэ Иеговасти ужэ бут бэрша (Прит. 16:31). Всаворэ амэ можэм тэ кандас и тэ на парашас тэ подритярас кодэлэн, «ко руководий» машкар амэндэ (Евр. 13:17). w23.06 17, абз. 14, 15

Ав мудро, кай тэ полэс, пэскати дэ часто можэш тэ дэс каминтарии. Если амэ часто ваздас о вас, о ԥрал, саво проандярэл и статья, можэт тэ гиндой, кай во обязано тэ пушэл кати амэн. Тоди кай авэр на авэла жылания тэ ваздэн о вас (Эккл. 3:7). Кала пэ встреча исин бут кодэла, ко ваздэл о вас, амэн моӷут тэ пушэн най кадя часто, сар амэ камас. Важ и вся и встреча амэн моӷут ни еқвар тэ на пушэн, важ када амэ можэм тэ растроимся. Но на трэбуй тэ прилас када пашэ каринг оди (Эккл. 7:9). Со ту можэш тэ терэс, если тут пушэн най кадя часто, сар ту камлоп? Сар бы тэ на авэл, внимательно ашун, сар авэр дэн каминтарии, и посли собрания хвалисар лэн важ лэндирэ атветоря. Кала ту хвалис лэ ԥралэн и лэ ԥэян, када лэн можэт тэ подритярэл кадя жэ, сар ту ԥэндоп каминтариё. w23.04 23, 24, абз. 14—16

Изучайте лэ Дэвлэско алав и розмышляйте. Сар и витка састэс тердёл через пэстирэ барэ корнёря, кадя и амэ сможэм састэс тэ тердювас, если амари вера андо лэ Дэвлэско Алав авэла састи. Кала и витка барёл, латирэ корнёря ужан май дур андэ ԥув. Кала амэ изучаем и розмышляем, амари вера ашэл май састи и кадя амэ май фартэ патяс, кай о дром, саво сыкавэл амэнди о Дэл, со май лашо (Клс. 2:6, 7). Погиндон, сар о Иегова фэрияс пэстирэ служытелёнэн дэлмут, и сар лэнди поможынас лэстирэ указании и советоря. Например, о Иезекиилё диқля видения, андэ сави о анӷело драго измерял о храмо. О пророко внимательно пала када диқэлас. Кадэя видения придя лэсти зор. Андэр латэ исин важни урокоря и важ амэндэ. Вой сытярэл амэн, сар тэ ритярас лэ Иеговастирэ нормы важ и вужи поклонения (Иез. 40:1—4; 43:10—12). Амэнди кадяжэ трэбуй тэ витидас время, кай май драго тэ полас о чачимос анда лэ Дэвлэско Алав и тэ розмышляем пала лэстэ. Амэндэ можэт тэ авэл предано ди, если амэ амэ ласа андэ вся тэ патяс лэ Иеговасти (Пс. 112:7). w23.07 18, абз. 15, 16

Андэ Библия росԥэнэнпэ пала бут мурша, савэ любинас лэ Иеговас и заботинаспэ пала лэско народо. Вонэ ашэн, кай лэндар тэ сытёс. Ту можэш тэ сытёс кай и христианоря андэ собрания или кай пэстирэ чаче, кастэ састи дружба лэ Дэвлэса (Евр. 13:7). Но со май лашо примеро важ амэндэ сыкавэл о Исусо Христос (1 Пёт. 2:21). Погиндосар, со тути чалёл андо характеро, саво исин кай кадэла мурша, и старысав тэ терэс кадя, сар вонэ (Евр. 12:1, 2). Например, о мануш, саво драго гиндой, на грабийпэ сразу варисо тэ терэл. Во вся обгиндой и шол сама, сар пэ када диқэл о Дэл. Важ када присто о зор, кай тэ сытёс и тэ на парашэс здраво тэ гиндос. Кала прилэс ришэнии, спэрва уӷан, со пала када гиндой о Иегова. Тоди старысав тэ полэс, васо кода, со во ԥэнэн, — када со май лащи ришэния. Потом тер кадя, сар уӷанглян. Тоди, кода, со ту витидэса, лэла тэ радуий лэ Иеговас (Пс. 119:9). Кадя тири дружба лэ Иеговаса авэла пэ бутэстэ май лащи (Прит. 2:11, 12; Евр. 5:14). w23.12 24, 25, абз. 4, 5

Андэ школа лэ тэрнэ христианонэнди моӷут тэ задэн вопросоря пала лэндири вера. Сар и родителя моӷут тэ сытярэн пэстирэ бэятонэн тэ отвечают ковлэс? (Иак. 3:13). Дэсавэ родителя пэ семейно изучения репитируют лэ бэятонэнца, савэ лэндэ моӷут тэ авэн ситуацыи. Вонэ витидэн темы, савэ моӷут тэ авэн андэ школа, розлэн лэн и сыкавэн, сар и бэяцэ моӷут тэ дэн дума ковлэс и пативалэс. Важ кода кай и родителя репетируют лэ бэятонэнца разни ситуацыи, вонэ сытён тэ объяснин аврэнди, андэр со патян. Кадя и бэяцэ лэн екжэнэ тэ полэн, кай ла Библияти можно тэ патян. Каринг бут статьи пэ тема «И тэрнэ мануша пушэн» по сайто jw.org исин схемы важ и тэрнэ мануша. Вонэ поможын лэ тэрнэ ԥралэнди и ԥэянди тэ састярэн пэстири вера и тэ подӷотовяца, сар тэ отвечают пэстирэ алавэнца. Кала вся о ери роздиқэл кадэла статьи, тоди и бэяцэ и родителя сытён тэ зашонпэ пала пэстири вера ковлэс и пативаса. w23.09 17, абз. 10; 18, абз. 15, 16

Сас тутэ кацаво, кай ту стодян англа пэстэ дэвликони цэль, но тэ домардёс ла на вижалас? Кацаво сас бутэндэ. Например, о Филипо стодя цэль тэ мангэлпэ май часто. Ай инке во камэлас тэ сытёл тэ росԥэнэн андэ молитва кода, со по ди. Но лэсти сас ԥарэс тэ виарақэл время, кай тэ помангэлпэ. И Э́рика стодя цэль тэ на опаздывает пэ встречи важ и служэния. Но вой всаек почти кажно разо варикай заритярдёлас. Если тутэ исин цэль, сави ту нисар нэ можэш тэ домардёс, када на сыкавэл, кай тутэ никала на вижала када тэ стерэс. Дажэ пэ найбари цэль часто трэбуй время и зор. Кода, кай ту камэс тэ домардёс пэстирэ цэли, ужэ сыкавэл, кай важ тутэ куч и дружба лэ Иеговаса и ту камэс тэ отдэс лэсти вся со май лашо. О Иегова цэнуий, кай ту старыиспэ, но во на аштярэл, кай ту лэса тэ терэс кода, со нэ можэш (Пс. 103:14; Мих. 6:8). Важ када тири цэль трэбуй тэ авэл па тиро зор. w23.05 26, абз. 1, 2

Кай и смили мануша можэт тэ авэл дар. Но вонэ на домэкэн, кай кадэя дар тэ на дэл лэнди тэ терэн правильно. О Даниило сас фартэ смило тэрно мануш. Во изучал лэ Дэвлэстирэ пророконэндирэ книжки, например, лэ Иеремияско пророчество. Блаӷодаря кадэлэсти, во поля, кай ӥто закончица о вавилонско плено, саво жалас бут бэрша (Дан. 9:2). Канешно, кода, кай и библейски пророчества исполнисайлэ, поможысардя, кай о Даниило май фартэ тэ патял лэ Иеговасти. Ай кала о мануш андэ вся патял лэ Дэвлэсти, во можэт тэ авэл фартэ смило (Сыстон Римо 8:32, 37—39.) Но со май ӷлавно, о Даниило часто мангэласпэ пэстирэ небеснонэ Дадэсти (Дан. 6:10). Во прижандёлас лэ Иеговасти андэ пэстирэ бэзэха и росԥэнэнас вся, со лэстэ по ди. Кадяжэ во мангэлас лэ Дэвлэстар помощь (Дан. 9:4, 5, 19). О Даниило сас кацаво жэ мануш, сар и амэ. Ай значит, во на арақаделя сразу смило. Во ашэля кацавэса блаӷодаря кодэлэсти, кай изучал и Свынти Лила, мангэласпэ лэ Иеговасти и патялас лэсти. w23.08 2, абз. 4; 4, абз. 7

Кала амэ кандас лэ властен, када анэн лашымос и амэнди, и аврэнди. Погиндон екжэнэ: если амэ ритярас и законоря, тоди амэнди на прижалапэ тэ андярас наказания (Римо 13:1, 4). Кадяжэ, если кажно андар мэндэ кандэл лэ властен, тоди вонэ диқэн, кай лэ Иеговастирэ свидетеля — кандино народо. Акэ случаё, саво сас бут бэрша палпалэ андэ Нигерия. Еқвар пэ собрания андо Зало Царства авелэ халавдэ. Вонэ родэнас кодэлэн, через кастэ сас барэ беспорядкоря против кода, кай тэ потинэн и налоӷоря. Но кала о начальнико уӷангля, кай катэ стидэпэ лэ Иеговастирэ свидетеля, во ԥэндя лэ халавдэнди тэ ужан. Во ԥэндя: «Лэ Иеговастирэ свидетеля всегда потинэн и налоӷоря». Кажно разо, кала тумэ ритярэн и законоря, тумэ терэн кадя, кай пала лэ Иеговаско народо тэ жал лашо алав. И англэ када можэт тэ фэрий тумарэ ԥралэн и ԥэян. w23.10 9, абз. 13

Дэсавэ лэ Иеговастирэ служытеля ужэ фартэ долӷо аштярэн, кала пашола и время кадэла люмати. Амэнди, сар манушэнди, можэт тэ здэлпэ, кай лэ Дэвлэстири обещяния заритярдёл. Кода, кай о Иегова полэл, со по ди кай лэстирэ служытеля, дицол андэ алава, савэ во ԥэндя лэ пророкости лэ Авакумости: «Важ кода кай кадэя видения инке трэбуй тэ авэл андэ время, сави стодя о Дэл. Кодэя время, андэ сави вой авэла, ӥто пашол и дажэ, сар заритярдёлапэ, аштяр ла, важ кода кай вой авэла андэ время, сави стодя о Дэл» (Авв. 2:3). Сас кадэла алава кати важ о Авакумо? Или лэстирэ алава поджан адес и каринг амэндэ? Через о свынто духо о апостало Павло призындярдя кадэла алава каринг и христианоря, савэ анда вся оди аштярэн о раё пэ ԥув (Евр. 10:37). Да, амэ можэм тэ авас уверени: дажэ если амэнди здэлпэ, кай лэ Иеговастири обещяния заритярдёл, вой обязательно исполнияпэ! w23.04 30, абз. 16

И израильтяноря на прилинэ кода, со доԥэнэнас, кай о Маисеё дэлас дума лэ Иеговастирэ алавэстар (Чис. 14:10, 11). Со вижыля? О Дэл на домэкля, кай кодэла мануша тэ зажан андэ ԥув, пала сави во дя алав, кай дэла лэнди (Чис. 14:30). Но дэсавэ израильтяноря терэнас кадя, сар ԥэнэнас о Иегова. Например, о Дэл ԥэндя пала Халево: «Во анда вся ди кандэлас ман» (Чис. 14:24). О Иегова блаӷословисардя лэс и дажэ домэкля, кай во екжэно тэ витидэл ҭан, пэ саво жувэла андо Ханаано (Иис. Н. 14:12—14). Лашо примеро кадяжэ сыкадэ и израильтяноря, савэнди о Дэл домэкля тэ зажан андэ ԥув, пала сави дя алав. Вонэ терэнас кадя, сар ԥэнэнас о Иегова. Кала барэдэрэса андо народо ашэля о Исусо Навино, вонэ вся и жызня стонас пэр лэстэ бари патив кадя жэ, сар по Маисеё (Иис. Н. 4:14). Важ када о Иегова блаӷословисардя лэн и дя лэнди ԥув, пала сави дя алав (Иис. Н. 21:43, 44). w24.02 21, абз. 6, 7

Па пульсо о врачо можэт тэ полэл, здорово амаро ди или най. Точно кадя жэ амэ можэм тэ полас, пэскати дэ фартэ амэ любисарас лэ Дэвлэс па кода, сар амэ обжаспэ аврэнца. Если амэ диқас, кай амари любовь каринг ԥрала и ԥэя ашэл май слабо, када можэт тэ сыкавэл, кай амэ лям май набут тэ любисарас лэ Дэвлэс. Ай если амэ на бистрас пэ дила тэ сыкавас и любовь каринг и ԥрала и ԥэя, анда када дицол, кай амари любовь каринг о Дэл ашэлпэ састи. Но если амари любовь каринг ԥрала и ԥэя ашэл май слабо, када бари проблема. Када нащи тэ ашавас кадя. Васо? Када сыкавэл, кай амари дружба лэ Дэвлэса най кацави дэ састи. О апостало Иоано пала када ԥэндя кадя: «Кодэва, ко на любий пэстирэ ԥралэс, савэс диқэл, не можэт тэ любий лэ Дэвлэс, савэс на диқэл» (1 Иоан. 4:20). Сости амэ анда када сытювас? О Иегова довольно амэнца кати тоди, кала амэ любисарас ек еқэс (1 Иоан. 4:7—9, 11). w23.11 8, абз. 3; 9, абз. 5, 6

Кала о царё Иоасо сас тэрно, во андярэлас пэс правильно. Во ашэляпэ би дадэско, кала инке сас бэято. Андэ кодэя время во приашундёлас каринг о ӷлавно рашай о Иодаё. Кадэва мануш барярэлас и сытярэлас лэс, сар пэстирэ шавэс. Блаӷодаря лэсти о Иоасо приля мудро ришэния — тэ служый лэ Иеговасти и тэ поможый андэ када лэ народости. Во дажэ стидя лэ манушэн, кай вонэ тэ стерэн ремонто андэ лэ Иеговаско храмо (2 Лет. 24:1, 2, 4, 13, 14). Тэрнэ мануша, если и родителя сытярэн тумэн тэ любин лэ Иеговас и тэ андярэн лэстири время, тоди диқэн пэ када, сар по кучутно подарко (Прит. 2:1, 10—12). И родителя моӷут тэ сытярэн по разному. Если тумэ приашундён каринг лэндирэ алава, савэ вонэ ԥэнэн па Библия, кадэлэстар вонэ авэна май бахталэ. Ай само ӷлавно, када радуия лэ Дэвлэс и тумари дружба лэса ашэла инке май састи (Прит. 22:6; 23:15, 24). Хэба када на сыкавэл, кай трэбуй тэ терэн кадя, сар терэлас о тэрно Иоасо? w23.09 8, 9, абз. 3—5

О Иегова дэл алав, кай лэла тэ ашунэл амарэ молитвы. О Иегова любий пэстирэ служытелёнэн, савэ на парашэн лэс тэ кандэн. Важ када во вся время внимательно лэн виашунэл (Пс. 10:17; 37:28). Но када на сыкавэл, кай во дэла амэнди вся, пала со амэ лэс мангас. Варисо, возможно, во дэла кати андо раё пэ ԥув. Кала о Иегова ашунэл амарэ молитвы, во сэрэл пала кода, со загиндосардя важ и люма (Ис. 55:8, 9). О Иегова камэл, кай пэ ԥув тэ авэн бут мурша и жувля, савэ анда вся оди камэн лэсти тэ служын. Но о Сатана доԥэнэн, кай и мануша би лэ Дэвлэско моӷут тэ авэн бахталэ (Быт. 3:1—5). Кай о Иегова тэ сыкавэл, кай о Сатана хохавно, во домэкля, кай и мануша тэ правин екжэнэ. И через кода, кай и власть андэ лэ манушэндирэ вас, андэ люма фартэ бут ԥаримос (Эккл. 8:9). Амэ полас, кай о Иегова на улэла када адес. w23.11 21, абз. 4, 5

О Иегова дя алав, кай через о Авраамо авэна блаӷословлёни бут народоря. Но кала лэ Авраамости сас 100 бэрш, ай ла Саррати 90, о шаво, пала саво о Дэл дя алав, кадя и на арақаделя. Лэ манушэнди моӷло тэ здэлпэ, кай када невозможно, кай лэ Авраамостэ и ла Сарратэ тэ авэл бэято. Када сас бари проверка важ и вера лэ Авраамости. Но во надеияспэ и патялас, кай авэла дадэса важ и бут народоря (Римо 4:18, 19). Сар амэ ӷанас, кода пэр со во надеияспэ, исполнисайля. Лэстэ арақаделя о Исако — шаво, савэс во фартэ аштярэлас (Римо 4:20—22). Кода, со амэ уӷанглям пала Авраамо, сыкавэл, кай амэ можэм тэ уӷодисарас лэ Дэвлэсти. Во можэт тэ прижанэн амэн найдошалэнца и кай амэ лэстирэ друӷоря. Имено пала када пистросардя о Павло: «Но и алава “прижангля лэс” пистромэ най кати важ лэстэ [важ о Авраамо], но и важ амэндэ. О Дэл и амэн прижанэна найдошалэнца, важ кода кай амэ патяс андэр лэстэ, кай во рисардя каринг и жызня амарэ Барэ Хулас лэ Исусос» (Римо 4:23, 24). Сар и лэ Авраамости, амэнди трэбуй тэ патяс, тэ сыкавас када пэ дила, ай кадяжэ тэ надеисавас. w23.12 7, абз. 16, 17

Кала исин ԥаримос, через саво появийпэ и дар, о Иегова шол сама най кати по ԥаримос, но и пэ кода, со кай о мануш андо ди. Например, о Иегова диқэлас, сар жэстоко обжанаспэ лэ израильтянонэнца андо Египто, и полэлас, сар лэнди сас ԥарэс (Исх. 3:7). Кала амэндэ исин барэ проблемы через и дар, амэ можэм тэ на диқас, сар о Иегова заботийпэ пала амэндэ. Со тоди тэ терас? Мангэн, кай о Дэл тэ поможый тумэнди тэ додиқэн, сар во тумэн подритярэл (2 Цар. 6:15—17). Можэт, тумэн подритярдя и речь или каминтариё пэ собрания? Или тумэнди придя зор варисави статья, видео или дили пэ амаро сайто? Ай можэт, варико сыкадя библейско стихо или росԥэндя о гиндо, через саво тумари вера ашэля май састи? Кала амэнди дэн зор и ԥрала и ԥэя андэ собрания, ай кадяжэ и Библия, дэкала амэ можэм тэ гиндосарас, кай кабута кадя и трэбуй тэ авэл. Но па чачимастэ када кучутнэ подаркоря лэ Иеговастар (Ис. 65:13; Мар. 10:29, 30). Вонэ доԥэнэн, кай о Иегова любий амэн и пэр лэстэ вся и время можно тэ надеиспэ (Ис. 49:14—16). w24.01 4, 5, абз. 9, 10

Англа кода, сар о Исусо тэ жал по нэбо, во ԥэндя пэстирэ учениконэнди, кай вонэ тэ росԥэнэн пала лэстэ «андо Иерусалимо, па вся Иудея и Сама́рия и па вся ԥув» (Дила 1:8; Лука 24:46—48). Потом, посли када прожыля набут время, и иудейски барэдэра андэ вера астардэ лэ Петрос и лэ Иоанос и андэ́ лэн андо Ӷлавно иудейско сындо. Вонэ приԥэнэнас, кай кадэла верни лэ Дэвлэстирэ служытеля тэ парашэн тэ проповедуют и дажэ ԥэнэнас, кай умарэна лэн (Дила 4:18, 21). О Пётро и о Иоано ԥэндэ: «Диқэн екжэнэ, хэба правильно англа Дэл тэ ашунас тумэн, ай най лэ Дэвлэс? Важ када амэ не можэм тэ на ԥэнас пала кода, со диқлям и ашундям» (Дила 4:19, 20). Кала лэ Петрос и лэ Иоанос одмэклэ, и ученикоря линэ тэ мангэн лэ Иеговас, кай во лэнди тэ поможый тэ терэн кода, со во камэл. О Иегова дя атвето пэ лэндири одяли молитва (Дила 4:31). w23.05 5, абз. 11, 12

О Иегова и о Исусо сас вмести фартэ бут бэрша. Важ кадэя время лэндэ ашэля фартэ пашутни дружба, савяса на сыстояпэ ни ек дружба андэ люма. О Иегова ворта ԥэнэнас лэ Исусости, кай во лэс любий. Амэ адиносарас пала када андо стихо пэ адес. О Иегова моӷ просто тэ ԥэнэн: «Када кодэва, ко уӷодно манди». Но во камэлас, кай амэ тэ ӷанас, сар дэ фартэ во любий лэ Исусос. Важ када во ԥэндя: «Када мэрно любимо Шаво». О Иегова абурояс кодэлэса, со о Исусо ужэ стердя. О Дэл патялас, кай во на подвэдия лэс и май дур (Еф. 1:7). Лэско Шаво на домэкэлас ни ек гиндо, кай о Иегова лэс на любий. О Исусо диқэлас кадэя любовь и сас уверено андэр латэ. Вой дицолас андэ вся лэстири жызня, важ када во часто дэлас дума пала латэ (Иоан. 3:35; 10:17; 17:24). w24.01 28, абз. 8

Погиндосар пала кацави ситуацыя: о мануш, саво тути куч, дэл дума пала тутэ абисо. Ту ӷанэс, кай када хохаимос, но дэсавэ лэн тэ патян андэ када. Ай со инке май хужэ, кадэла мануша лэн тэ пэрэԥэнэн кадэва хохаимос и бут ко патял лэнди. Со тутэ авэла по ди? Через кацаво хохаимос тутэ лэла тэ дуқал оди. Када поможый амэнди тэ полас, со сас по ди кай о Иегова, кала лэско лашо алав замэлярдэ. Ек лэско небесно шаво ԥэндя пала лэстэ хохаимос пэрвона жувляти, ла Евати. И вой андэ када патяя. Важ када и пэрви мануша жылэ против о Иегова и кадя о бэзэх и смэрть пэрэжылэ пэ всаворэ мануша (Быт. 3:1—6; Римо 5:12). Через кода, кай о Сатана розындярдя о хохаимос, адес терэнпэ войны, смэрть и ԥаримос. Хэба лэ Иеговасти на сас дуқанэс через кадэва хохаимос и через кода, со во андя? Канешно, сас. И всаек, о Иегова на ритярэл и холи андо ди. Наоборот, во ашэлпэ бахтало Дэл (1 Тим. 1:11). w24.02 8, абз. 1, 2

Сости тумэ можэте тэ сытён кай о Иосифо? Ужэ акана полэн, со́ лэна тэ терэн, если авэла ситуацыя, сави подмарэла тумэн каринг о бэзэх. Сытён сразу тэ отԥэндён кодэлэстар, со гряца лэ Иеговасти. На́ домэкэн пэсти дажэ о гиндо пала кода, со андоп дук лэ Дэвлэстирэ одести (Пс. 97:10; 119:165). Тоди тумэ на подэнапэ лэ бэзэхэсти. Но со, если ту всаек най ӷотово тэ отдэс пэстири жызня лэсти и тэ болдёс? Тоди ту можэш тэ стерэс кадя, сар о Давидо. Ԥэн лэ Иеговасти андэ молитва: «Уӷан ман, мэрно Дэл, и продик мэрно ди. Уӷан май драго ман и полэ, пала со мэ фартэ загиндосавав. Роздик, нинай андэр мандэ варисо кацаво, со даравэл ман по найлашо дром, и андяр ман па дром каринг и вечность» (Пс. 139:23, 24). Кацави молитва сыкавэла, кай ту родэс помощь кай о Иегова и пристос о зор тэ домардёс пэстири цэль — тэ дэс алав тэ жувэс важ лэстэ и тэ болдёс. О Иегова блаӷословий кодэлэн, ко «старыийпэ тэ андярэл лэстири время» (Евр. 11:6). w24.03 6, абз. 13—15

О ӷлавно рашай сас лэ народоско прецтавителё англа Дэл. Пэрво ӷлавно рашай андо Израилё сас о Аароно. О Иегова стодя лэс пэ кадэя служэния андэ кодэва жэ дес, кала важ и поклонения линэ тэ используют и свынто катуна. Но, сар росԥэндя о апостало Павло, «и рашая не моӷли вечно тэ терэн пэстири дила, важ када авэнас авэр рашая и терэнас кадэя дила посли лэндэ» (Евр. 7:23—26). Кодэла ӷлавни рашая сас найсовершэни, и важ када лэнди трэбуй сас тэ анэн жэртвы важ пэстирэ бэзэха. Андэ када и сас бари разница машкар ӷлавни рашая андо Израилё и машкар само баро Ӷлавно рашай, о Исусо Христос. Амаро Ӷлавно рашай, о Исусо Христос, служый андэ «ла чачуня катунако свынто ҭан; кадэя катуна стодя о Иегова, ай най о мануш» (Евр. 8:1, 2). О Павло росԥэндя, кай о Исусо «жувэл вечно, важ када во никала на парашэла тэ авэл рашай». О апостало кадяжэ ԥэндя, кай о Исусо «на маӷрисайля лэ бэзэхэстар, отделимэ кодэлэндар, ко терэл неправильно» и кай «лэсти на трэбуй... кажно дес тэ анэн жэртвы» важ пэстирэ бэзэха, сар када терэнас и ӷлавни рашая андо Израилё. w23.10 26, абз. 8, 9

«О пурано небо» сыкавэл и манушыканэ правительства, савэнца хулаий о Сатана и лэстирэ бэнга (Матф. 4:8, 9; 1 Иоан. 5:19). О алав «ԥув» андэ Библия можэт тэ сыкавэл лэ манушэн, савэ жувэн пэ ԥув (1 Лет. 16:31; Пс. 96:1). Амэ полас, кай «пурани ԥув» — када вэрыти мануша, савэ жувэн адес. О Иегова на лэла просто тэ лашарэл «о небо» и «ԥув», савэ исин акана. Во совсем лэн улэла. Во парувэла лэн по «нэво небо» и пэ «нэви ԥув» — када нэво правительство и нэвэ мануша. О Иегова стерэла, кай и ԥув и мануша упалэ тэ авэн идиальни. Во улэла вся о найлашымос и виличия лэ манушэн. О Исая ԥэндя, кай амари ԥув ашэла, сар росшукарно парко, кацаво жэ, сар сас о Эдэмско садо. Кажно андар мэндэ лэла тэ полэл, сар парудёл и лэл зор. Кодэла, ко ланган, на диқэн или на ашунэн, авэна зоралэ. И дажэ кодэла, ко мулинэ, ринапэ каринг и жызня! (Ис. 25:8; 35:1—7). w23.11 4, абз. 9, 10

И «бари бида» залэлапэ нэожыдано (Матф. 24:21). Но кадэя бида на шолпэ пэ бут авэр биды, важ кода кай амэ ӷанас, кай вой авэла. Варикай 2 000 бэрш палпалэ о Исусо ԥэндя пэстирэ учениконэнди, кай трэбуй тэ авэн ӷотови каринг кадэя бида. Если амэ ӷотови, амэнди авэла май вушэро тэ пэрэандярас кодэя ԥари время и тэ подритярас аврэн (Лука 21:36). Амэнди трэбуй авэла тэ ӷанас тэ пэрэандярас и ԥари время, кай тэ кандас лэ Иеговас — тэ кандас и тэ патяс, кай во амэн фэрия. Со амэ тераса, если амарэ ԥрала хасарэна пэско хабэ? (Авв. 3:17, 18). Амэнди трэбуй авэла тэ жалуисарас лэн анда вся оди, кай тэ поможысарас. Сар амэ пэс андяраса, кала и объединёни правительстворя дэна пар мэндэ и амэнди прижалапэ дэсави время тэ гарадювас еқэҭанэ аврэ ԥралэнца и ԥэянца? (Иез. 38:10—12). Амэнди трэбуй авэла фартэ тэ любисарас лэн, кай вмести тэ виритярас кадэя ԥари время. w23.07 2, абз. 2, 3

О хулай и хулаи моӷут бутэсти тэ сытён кай о Акила и Прискилла. Кадэлэ ерес любинас бут христианоря андо пэрво вико (Римо 16:3, 4). Вонэ терэнас бути, росԥэнэнас важ о Дэл и поможынас аврэнди. Вся када вонэ терэнас вмести (Дила 18:2, 3, 24—26). Всегда, кала пистромэ андэ Библия пала Акила и Прискилла, лэндирэ алава пистронпэ вмести, ай най по ек. Сости и еря моӷут лэндар тэ сытён? Погиндон, сави дила тумэ камэн тэ терэн. Наверно, ла фартэ бут. Можэте тумэ тэ терэн кадэя дила вмести, ай най по ек? Например, о Акила и Прискилла вмести росԥэнэнас пала Дэл. Ай тумэндэ вижал часто тэ служын ек еқэса? О Акила и Прискилла кадяжэ вмести терэнас бути. Дажэ если тумэ терэн бути андэ разни ҭана, вижал тумэндэ тэ терэн вмести цэрутни дила? (Эккл. 4:9). Кала тумэ лэдуй терэн варисави дила, тумэ авэна сар ек команда, и тумэндэ авэла возможность тэ подэн дума ек еқэса. w23.05 22, 23, абз. 10—12

Всаворэн амэн дэкала лэл и дар. Например, кала пала Давидо ӷонияспэ о царё Сауло, во закамля тэ унашэл андо форо Гато. Ӷэт май интя о Ахишо, саво сас царё андэ кодэва форо, уӷангля, кай о Давидо — када кодэва фартэ опасно халавдо, пала саво и израильтяноря пистросардэ и дили. Андэр латэ ԥэнэнаспэ, кай о Давидо умардя най ек тысяча филистимлянонэн. О Давидо «ля фартэ тэ дарал» (1 Сам. 21:10—12). Во пэрэжывал, кай о Ахишо закамэла тэ умарэл лэс. Со поможысардя лэ Давидости тэ на мэкэл и дар андо ди? Андо 56 Псалом о Давидо росԥэнэн, со лэстэ сас по ди, кала во сас андо форо Гато. Андэ кадэва Псалом во росԥэнэн, васо во дарал и сар лэстэ вижыля када тэ улэл. Кала лэсти сас страшно, во надеияспэ по Иегова (Пс. 56:1—3, 11). И када сас най евья. О Иегова поможысардя лэ Давидости тэ стерэл варисо необычно — тэ притерэлпэ дилорэса! О Ахишо будэр лэстар на даралас и приԥэндя, кай лэс май ӥто тэ видаравэн. Кадя лэ Давидостэ вижыля тэ унашэл (1 Сам. 21:13—22:1). w24.01 2, абз. 1—3

Пала кастэ ԥэнэнпэ андо стихо пэ адес? Пала памазаникоря, савэ авэна рисардэ каринг и жызня! О послиднё памазанико жала по небо тоди, кала ашэлапэ набут время, кай тэ закончица и бари бида. Пэрво дила, сави вонэ лэна тэ терэн — када тэ марэнпэ. Кати погиндосар! Дэсавэ памазаникоря ужэ андэ бэршэндэ и лэндэ набут зор. Но, кала вонэ ринапэ каринг и жызня, кай тэ жувэн по небо, вонэ ашэна сар анӷелоря. Вонэ авэна зоралэ и бисмертни. Вонэ лэна тэ марэнпэ вмести пэстирэ Царёса, лэ Исусоса, саво победий пэстирэ вороӷонэн. Посли кода, сар прожала и война Армагедоно, вонэ вмести лэ Христоса лэна тэ поможын лэ манушэнди тэ ашэн идеальни. И памазаникоря фартэ любин пэстирэ ԥралэн и ԥэян, савэ жувэн пэ ԥув. Кала вонэ жана по небо, вонэ смоӷут тэ стерэн важ лэндэ пэ бутэстэ май бут, чем кала сас пэ ԥув сар найидеальни мануша! w24.02 6, 7, абз. 15, 16

Дэсавэ ужэ ӷотови тэ отдэн пэстири жызня лэ Дэвлэсти и тэ болдён, но нисар нащи стерэн када. Лэндэ моӷут тэ авэн кацавэ пэрэжывании: «Ай со если ӷэт май интя мэ стерава баро бэзэх и ман исключина анда собрания?» Если тутэ исин кацавэ гиндоря, патя, кай о Иегова поможыя тути андэ вся тэ уӷодис лэсти (Клс. 1:10). Кадяжэ во дэла зор тэ андярэс пэс правильно. Па лэ ԥралэндири и лэ ԥэяндири жызня дицол, кай о Дэл поможый лэнди андэ када и пэр лэстэ можно тэ надеиспэ (1 Кр. 10:13). Анда христианско собрания исключин кати набут манушэн. Када доԥэнэн, кай о Иегова поможый пэстирэ служытелёнэнди тэ на парашэн лэс тэ кандэн. Всаворэ мануша адес най идиальни и кажнонэс цырдэл тэ терэл варисо нэправильно (Иак. 1:14). Но тэ подэспэ кадэлэсти чи най — витидэс ту. Кажно ришает екжэно, со лэла тэ терэл. Дэсавэ ԥэнэн, кай о мануш нэ можэт тэ зритярэл пэско ди, савэс цырдэл каринг о найлашымос. Но када най кадя. Ту можэш тэ сытёс тэ зритярэс пэстирэ нэправильни жылании. w24.03 5, абз. 11, 12