Кала амэ дас совето...

1. Ко трэбуй тэ дэл совето и васо?

ЧАЛЁЛ тути тэ дэс советоря? Варикасти када чалёл. Ай варико лажал или дажэ дарал када тэ терэл. Сар бы тэ на авэл, дэкала амэнди трэбуй тэ дас совето аврэнди. Васо? О Иисусо ԥэндя, кай лэстирэ чачунэ ученикоря лэна тэ любин ек еқэс (Иоан. 13:35). И амэ сыкавас када, кала дас лэ ԥралэсти или ла ԥьяти совето, кала када трэбуй. Андэ Библия ԥэнэнпэ, кай амэ ашас май пашэ ек каринг ек, кала анда ди дас советоря (Прит. 27:9).

2. Со трэбуй тэ терэн и старейшыноря и васо? (Кадяжэ диқэн и рамка «Советоря, савэ амэ ашунас пэ собрания андэ будни деса».)

² И старейшыноря трэбуй драго тэ ӷанэн, сар тэ дэн лашо совето. Имено лэнди о Иегова и о Иисусо приԥэндэ тэ заботинпэ пала ԥрала и ԥэя (1 Пёт. 5:2, 3). Сар вонэ када терэн? Вонэ росԥэнэн речи, андэ савэ сытярэн па Библия. Ай инке вонэ дэн лэ ԥралэнди и лэ ԥэянди совето лично. Если варико дуреля лэ Дэвлэстирэ народостар, вонэ поможын лэсти тэ рийпэ палпалэ. Со поможыя лэ старейшынонэнди и всаворэнди амэнди тэ дас лашэ советоря?

3. а) Сар тэ сытювас тэ дас лашэ советоря? (Исайя 9:6; кадяжэ диқэн и рамка «Сытюв кай о Иисусо тэ дэс совето»). б) Со амэ роздиқаса андэ кадэя статья?

³ Андэ Библия пистромэ пала мануша, савэ дэнас аврэнди лашэ советоря. Амэ можэм бутэсти лэндар тэ сытювас. Само лашэ советоря дэлас о Иисусо. Пэр лэстэ дажэ ԥэндо «Мудро советнико». (Проадинон Исайя 9:6.) Андэ кадэя статья амэ роздиқаса дуй ситуацыи: кала амэндар мангэн совето и кала амэндар на мангэн совето, но амэ полас, кай лэс трэбуй тэ дас. Кадяжэ амэ подаса дума, васо трэбуй годявэрнэс тэ витидас, кала тэ дас совето, и сар када тэ терас правильно.

КАЛА АМЭНДАР МАНГЭН СОВЕТО

4, 5. Пала со трэбуй тэ погиндосарас, кала варико мангэл амэндар совето? Росԥэнэн примеро.

⁴ Кала варико взвийпэ каринг амэндэ пала совето, сар амэ трэбуй пэс тэ андярас? Канешно, амэнди приятно, кай амэнди патян, и амэ сразу жэ камас тэ поможысарас. Но спэрва трэбуй тэ пушас пэстар: «Драго мэ розлавпэ андэ кадэя ситуацыя, кай тэ дав лашо совето?» Дэкала фэдэр авэла тэ на ԥэнас нисо, ай тэ бишалас лэ манушэс каринг кодэва, ко па чачимастэ драго розлэлпэ андэ када.

⁵ Роздиқаса примеро. Ԥэнаса, тиро пашутно мануш фартэ занасвайля. Во ԥэнэн, кай виарақля разни варианторя, сар тэ лечийпэ, и мангэл, кай ту тэ потԥэнэс лэсти, со во тэ витидэл. Можэт, тути здэлпэ, кай ту драго ӷанэс, сар авэла правильно. Но ту най врачо и ту на сытелян, сар тэ лечис аврэн. Важ када само лащи помощь, сави ту можэш лэсти тэ дэс, — када тэ поможыс лэсти тэ виарақэл врачос.

6. Со авелоп драго тэ стерас англа кода, сар тэ дас совето?

⁶ Ай со, если амэ драго розласпэ андэ ситуацыя и гиндосарас, кай можэм тэ дас лашо совето? Можэт, амэ всаек витидаса набут тэ поаштярас и тэ на дас о ответо сразу. Васо? Андэ Притчи 15:28 пистромэ: «О праведно мануш андэ пэско ди обгиндой, со тэ ԥэнэн». Важ када, дажэ если амэ ӷанас, со тэ ԥэнас, фэдэр спэрва май драго тэ розуӷанас, тэ мангаспэ и вся тэ обгиндосарас. Тоди амэ ласа точно тэ ӷанас, кай амаро совето на розжалпэ лэ Иеговастирэ гиндоса. Када драго дицол па кода, со сас кай ек лэ Дэвлэско мануш, савэс ақарэнас Нафано.

7. Сости амэ сытювас анда кадэва случаё лэ Нафаноса?

⁷ О Давидо ԥэндя лэ Нафаности, кай камэл тэ строий о храмо важ о Иегова. О Нафано сразу жэ ԥэндя лэсти: «Тер вся, со загиндосардян». Но када на зжаласпэ кодэлэса, со камэлас о Дэл. Англа кода сар тэ дэл лэ Давидости совето, о Нафано спэрва трэбуй сас тэ уӷанэн, со пала када гиндой о Иегова (1 Лет. 17:1—4). Кадэва случаё сытярэл: кала амэндар мангэн совето, авелоп годявэрнэс тэ на грабисавас тэ дас дума (Иак. 1:19).

8. Васо на трэбуй тэ грабис тэ дэс совето?

⁸ Васо инке авелоп драго тэ погиндосарас, англа кода сар тэ дас варикасти совето? Прецтавь, кай о мануш, саво приашунделя каринг тутэ, прилэл решэния, савятар лэсти авэла вэрыто. Тоди андэ када авэла и тири дош. Важ када трэбуй тэ на грабис тэ дэс совето.

КАЛА АМЭНДАР НА МАНГЭН СОВЕТО

9. Пэр со трэбуй тэ шон сама и старейшыноря, англа кода сар тэ дэн совето? (Галатия 6:1).

⁹ Дэкала и старейшыноря трэбуй тэ дэн совето лэ ԥралэсти или ла ԥьяти, савэ «змарделэ» па правильно дром. (Проадинон Галатия 6:1.) Можэт, кацаво христианино инке на стердя баро бэзэх, но во андярэл пэс найгодявэрнэс и жал най андэ кодэя риг. И старейшыноря камэн тэ поможын кадэлэ манушэсти тэ ашэлпэ по дром, саво андярэл каринг и вечно жызня (Иак. 5:19, 20). Англа кода сар тэ дэн совето лэ манушэсти, вонэ трэбуй тэ полэн, кай во па чачимастэ змарделя па правильно дром. Лэнди трэбуй тэ сэрэн: дажэ если лэнди на чалёл и решэния, сави приля кадэва мануш, када инке на сыкавэл, кай во андярэл пэс неправильно англа Иегова (Римо 14:1—4). Ай со, если о ԥрал или и ԥэй чаче дурён лэ Дэвлэстар? Со тоди трэбуй тэ терэн и старейшыноря?

10—12. Сар о старейшына трэбуй тэ дэл совето, саво лэстар на манглэ? (Кадяжэ диқэн и картинка.)

¹⁰ Тэ дэс совето кодэлэсти, ко пала када на мангля, можэт тэ авэл фартэ ԥарэс. Васо? О апостало Павло ԥэндя, кай кацаво христианино можэт инке екжэно на полэл, кай терэл неправильно. Важ када и старейшыноря спэрва трэбуй дэсо тэ стерэн, кай лэ манушэсти тэ авэл май вушэро тэ приашундёл каринг о совето.

¹¹ Тэ дэс совето, саво тутар на аштярэн, — када сар тэ барярэс варисо пэ састи ԥув. Спэрва о мануш ӷанавэл, кай и ԥув тэ ашэл май ковли. Потом во садий и семечка и шол паи пэр латэ. Можно тэ ԥэнэс, кай о старейшына трэбуй тэ стерэл кадя жэ. Спэрва во трэбуй тэ ковлярэл лэ манушэско ди. О старейшына витидэл время, кай тэ поджал каринг о ԥрал. Во ԥэнэн лэсти, кай заботийпэ пала лэстэ и важ када камэл тэ подэл дума лэса. Если о старейшына пашэ одеско и ковлэс обжалпэ аврэнца, тоди тэ прилэн о совето лэстар авэла май вушэро.

¹² Кала о старейшына диқэлпэ лэ ԥралэса, во на парашэл тэ ковлярэл лэско ди. Например, во можэт тэ ԥэнэн, кай всаворэ амэ дэкала шылисавас и амэнди трэбуй совето (Римо 3:23). Ковлэс и баря пативаса о старейшына сыкавэла лэ ԥралэсти па Библия, андэр со во шылисайля. Кала о ԥрал полэла, со во стердя най кадя, о старейшына росԥэнэна лэсти, со во трэбуй тэ стерэл, кай тэ парудёл. И потом о старейшына анда ди ԥэнэна, со кай о ԥрал ужэ драго вижал тэ терэл, и мангэлапэ вместе лэса (Иак. 5:15).

13. Сар и старейшыноря тэ уӷанэн, кай о мануш правильно поля лэнго совето?

¹³ Дэкала лэ манушэсти ԥэнэс ек, ай во ашунэл совсем авэр. Важ када и старейшыноря трэбуй точно тэ ӷанэн, кай о мануш правильно поля лэнго совето. Вонэ моӷут ковлэс тэ задэн лэсти вопросоря (Эккл. 12:11). И тоди дицола, полэл о мануш, со лэсти трэбуй тэ парувэл и васо.

ПОГИНДОСАР, КАЛА И САР АВЭЛА ПРАВИЛЬНО ТЭ ДЭС СОВЕТО

14. Васо амэнди нащи тэ дас совето анда холи?

¹⁴ Амэ най идеальни, важ када амари дила или дума можэт варикасти тэ на чалёл (Клс. 3:13). Андэ Библия ворта ԥэнэнпэ, кай дэкала амэ дажэ холявас ек пэ ек (Эф. 4:26). Андэ кацаво маменто амэнди нащи тэ дас совето. Васо? Важ кода кай «через и холи о мануш на терэл и правильно дила, сави уӷодно лэ Дэвлэсти» (Иак. 1:20). Если амэ дас совето анда холи, кадэлэстар можэт тэ авэл инке май вэрыто. Када на сыкавэл, кай амэнди нащи тэ росԥэнас, со амэндэ по ди, лэ манушэсти, саво амэн холярдя. Амэнди просто трэбуй тэ подаштярас, кала прожала амари холи. Райкано примеро сыкадя о Елиуё, саво дя лашо совето лэ Иовости.

15. Сости амэ можэм тэ сытювас кай о Елиуё? (Кадяжэ диқэн и картинка.)

¹⁵ Най ек дес о Елиуё ашунэлас, сар о Иово зашоласпэ пала пэстэ, кала лэс дошалярэнас лэстирэ найчачунэ друӷоря. Лэсти сас жалко лэ Иовос. Но лэс фартэ холярдя, кай о Иово гиндояс май бут пала пэстэ и камэлас тэ доԥэнэн, кай во май право, чем о Дэл. Но о Елиуё на ӷульдя андэ дума. Ай кала лэсти динэ алав, во дя дума лэ Иовоса ковлэс и пативалэс. Кадя лэстэ вижыля тэ дэл лэ Иовости лашо совето (Иов 32:2; 33:1—7). Сости амэ сытювас анда кадэва случаё? Амэндэ вижала тэ дас лашо совето, если амэндэ андо ди нинай холи и кала амэ када терас ковлэс и пативалэс (Эккл. 3:1, 7).

АВ ӶОТОВО ТЭ ДЭС И ТЭ ПРИЛЭС О СОВЕТО

16. Сости амэ сытювас анда Псалом 32:8?

¹⁶ О Иегова дэл алав: «Подԥэнава тути и лава тэ диқав пэр тутэ» (Проадинон Псалом 32:8.) Кадэла алава сыкавэн, кай о Иегова никала на парашэла тэ сытярэл амэн. Во най кати дэл амэнди лашэ советоря, но и поможый тэ прилас лэн. Саво дэ райкано примеро важ амэндэ! Кала ту дэс совето лэ манушэсти, мэк во диқэл, кай ту любис лэс и ӷотово тэ поможыс лэсти тэ прилэл лащи решэния.

17. Саво лашымос анэн амэнди и советоря, савэ и старейшыноря дэн па Библия? (Исайя 32:1, 2).

¹⁷ Адес сар никала трэбуй лашэ советоря (2 Тим. 3:1). Андэ Библия и старейшыноря сыстонпэ «лэ барэ паеса андэ пустыня». (Проадинон Исайя 32:1, 2.) Васо? Важ кода кай вонэ дэн лашэ советоря па Библия, савэ придэн амэнди зор тэ терас лэ Иеговастири дила. О друӷо, саво ӷанэн, со ту камэс тэ ашунэс, но саво ԥэнэн кода, со тути трэбуй тэ ашунэс, па чачимастэ котор сомнак! Лэстирэ алава сар «и сомнаконэ ԥаба по рупуно... тэляри» (Прит. 25:11). Давайте тэ сытювас тэ дас лашэ советоря и тэ приашундювас, кала кацавэ советоря дэн амэнди.