Можэм амэ тэ уӷанас варисо нэво анда прости библейски темы?

1. Сар о чачимос анда Библия парудя амари жызня?

КАЛА амэ уӷанглям о чачимос анда Библия, када парудя амари жызня. Например, кала амэ уӷанглям, кай лэ Дэвлэс ақарэн Иегова, амэ лям тэ пашувас каринг лэстэ (Ис. 42:8). Инке амэнди ашэля май вушэро по ди, кала амэ полям, кай амарэ чаче на мучинпэ посли кода, сар лэн на ашэл (Эккл. 9:10). Ай кала амэ уӷанглям, кай пэ ԥув авэла раё, амэ парашэлям тэ пережываем пала кода, со амэн аштярэл англэ. Амэ лям тэ патяс, кай ласа тэ жувас най 70 или 80 бэрш, ай вечно (Пс. 37:29; 90:10).

2. Васо о Пётро ԥэндя лэ христианонэнди, савэ болделэ бут бэрша палпалэ, кай лэнди трэбуй тэ погиндон пала прости библейски темы?

² Амэнди никала на трэбуй тэ бистрас, сар дэ важно драго тэ розласпэ андэ прости библейски темы. Пэско дуйто письмо о апостало Пётро пистросардя лэ христианонэнди, савэ ужэ «ашэлэ май састэ андо патяимос». (Проадинон 2 Пётро 1:12, 13.) О Пётро полэлас, кай машкар ԥрала и ԥэя авэна и вэрыти мануша, савэ закамэна тэ змарэн лэн па правильно дром (2 Пёт. 2:1—3). О Пётро камля тэ придэл зор лэ ԥралэнди и лэ ԥэянди, кай вонэ тэ фэринпэ кацавэ манушэндар. Важ када во инке еқвар шутя сама пэ кода, со вонэ ужэ ӷанэнас. О чачимос анда Библия поможысардоп лэнди тэ на парашэн тэ кандэн лэ Иеговас.

3. Васо амэ всаворэ трэбуй май бут тэ гиндосарас пала прости библейски темы? Росԥэнэн примеро.

³ Дажэ если амэ болделям бут бэрша палпалэ, амэ можэм бут сости тэ сытювас анда прости библейски темы. Призындяраса примеро. Если тэ дэс прости овощи лэ лашэ поварости, во ӷанэн, сар андар лэндэ тэ стерэл вкусно и шукарно хамос. Ай если тэ дэс кадэла жэ овощи лэ манушэсти, саво кати сытёл тэ гитой, во сможэт тэ гитой кати варисо просто. Кода жэ можно тэ ԥэнэс и пала лэ Иеговастирэ мануша. Кодэла, ко дэлмут болдэ, и кодэла, ко кати ля тэ сытёл па Библия, по разному диқэн пэ прости библейски темы. Наверно, кодэла времятар, сар ту болделян, тири жызня паруделя или ту лян тэ терэс авэр дила важ о Дэл. Если андэ тири нэви ситуацыя ту лэса май бут тэ гиндос пала библейско чачимос, саво ту ужэ дэлмут ӷанэс, тоди ту сможэш бут сости тэ сытёс. Давай роздиқаса трин кацавэ библейски темы и уӷанаса, сости всаворэ амэ можэм тэ сытювас.

О ИЕГОВА ВСЯ СТЕРДЯ

4. Кала амэ уӷанглям, кай вся стердя о Иегова, сар када парудя амари жызня?

⁴ «Кодэва, ко вся построисардя, — када о Дэл» (Евр. 3:4). Амэ ӷанас, кай и ԥув и вся, со исин пэр латэ, стердя о годявэрно и зорало Дэл. Во дя амэнди жызня и во ӷанэн пала амэндэ вся. Но со инке май важно, во любий амэн и ӷанэн, со амэнди трэбуй, кай амэ тэ авас бахталэ. Кадэва просто гиндо — кай вся стердя о Иегова — фартэ парудя амари жызня и амэ па чачимастэ полям, состэ амэ жувас.

5. Со поможыя амэнди тэ на гиндосарас пала пэстэ бут? (Исайя 45:9—12).

⁵ Если амэ сэрас, кай вся стердя о Иегова, када поможыя амэнди тэ на гиндосарас пала пэстэ бут. Например, кала о Иово ля тэ шол сама май бут пэр пэстэ и ля тэ доԥэнэн, кай во май право лэ Дэвлэстар, о Иегова задя лэсти дэсавэ вопросоря (Иов 38:1—4). Када поможысардя лэ Иовости тэ полэл, кай о Иегова никала на шылийпэ и вся терэл правильно. Нико на трэбуй тэ гиндой, кай во май годявэр лэ Дэвлэстар. Пала када жэ ԥэнэнас и о Исайя: «Хэба ԥэнэна и ӷлина пэстирэ мастерости: „Со ту терэс?“». (Проадинон Исайя 45:9—12.)

6. Кала инке амэнди важно тэ гиндосарас, пэскати дэ годявэрно и дэ зорало о Дэл? (Кадяжэ диқэн и картинка.)

⁶ О христианино, саво ужэ дэлмут андярэл лэ Дэвлэстири время и бут сости сытеля, можэт тэ лэл май бут тэ надеийпэ пэр пэстэ, ай най по Иегова (Иов 37:23, 24). Но со, если во погиндоя, пэскати дэ годявэрно и дэ зорало о Иегова? (Ис. 40:22; 55:8, 9). Если во вся и время лэла тэ сэрэл, кай вся стердя о Иегова, када поможыя лэсти тэ на гиндой пала пэстэ бут и тэ на надеийпэ пэр пэстэ.

7. Со поможысардя еқа ԥьяти тэ присытёл, кай и ԥрала линэ тэ ԥиравэн и шор?

⁷ Уӷанаса важ и Рахе́ла анда Словения. Кала вой старыийпэ тэ ритярэл андо шэро, кай вся стердя о Иегова, када поможый лати правильно пэс тэ андярэл, если варисо парудёл андэ лэ Дэвлэско народо. Вой росԥэнэн: «Дэкала манди найвушэро тэ прилав кода, со ԥэнэн и ԥрала. Например, посли кода сар вижылясас и Обращения лэ Руководящонэ советостар № 8 пала 2023 бэрш, мэ всаек дэмас наздив, кала пэрво разо додиқлэм пэ сцена лэ ԥралэс, савэстэ сас шор. Важ када мэ мангаваспэ лэ Иеговсти тэ поможый манди тэ присытював каринг када». И Рахела поля, кай о Иегова, саво стердя вся и люма, фэдэр всаворэндар ӷанэн, сар и каринг тэ андярэл пэстирэ народос. Если тути тожэ ԥарэс тэ присытёс каринг кода, со паруделя, вити́дэ время, кай драго тэ погиндос, саво дэ годявэрно и дэ зорало тиро небесно Дад (Римо 11:33—36).

ВАСО О ДЭЛ ДОМЭКЭЛ, КАЙ О МИРО ТЭ МУЧИЙПЭ

8. Саво лашымос кодэлэстар, кай амэ ӷанас, васо о Дэл домэкэл, кай о миро тэ мучийпэ?

⁸ Васо о Дэл домэкэл, кай о миро тэ мучийпэ? Дэсавэ на ӷанэн васо и важ када холявэн по Дэл или гиндон, кай лэс вобще нинай (Прит. 19:3). Но амэ ӷанас: и мануша мучинпэ важ кода, кай пэр лэндэ пэрэжыля о бэзэх и вонэ ашэлэ найидеальни, ай най важ кода, кай о Дэл бишалэл пэр лэндэ бида. Кадяжэ амэ ӷанас, васо о Иегова идоси на уля кадэя найлащи люма. Во аштярэл, кай инке чимало мануша тэ ашэн май пашэ каринг лэстэ и пэстирэ яқэнца тэ диқэн, сар во улэла вся о ԥаримос и бида (2 Пёт. 3:9, 15). Кала амэ ӷанас о чачимос, кадэлэстар амэнди ашэл май вушэро по ди и амэ ашас инке май пашэ каринг амаро Дэл.

9. Кала амэнди инке май фартэ трэбуй тэ сэрас, васо о Иегова домэкэл, кай миро тэ мучийпэ?

⁹ Амэ полас, кай амэнди трэбуй тэ доаштярдювас, кала о Иегова улэла вся о ԥаримос. Но если мэрэл варико анда амарэ пашутнэ или амэнца и амарэ родоса найдраго обжанпэ, амэ можэм тэ на дополас, васо о Иегова кадя долӷо нисо на терэл (Авв. 1:2, 3). Кала амэндэ кацаво по ди, важно тэ сэрас, васо о Иегова домэкэл, кай лэстирэ друӷоря тэ пэрэандярэн кацаво ԥаримос (Пс. 34:19)a. Ай инке важно тэ гиндосарас важ кода, со о Дэл камэл тэ стерэл англэ. Во дэл алав, кай вся о ԥаримос ашэлапэ дур и будэр никала на авэла.

10. Со придэл зор амаря ԥьяти, сави хасардя пэстиря да?

¹⁰ Кала амэ ӷанас, васо о Иегова домэкэл, кай о миро тэ мучийпэ, када можэт тэ поможый амэнди тэ пэрэжувас дажэ само бари бида. И Энн, сави жувэл пэ ек острово андо Индийско океано, росԥэнэн: «Дэсавэ бэрша палпалэ на ашэля мэрня да. Манди сас фартэ ԥарэс, но мэ най еқвар ԥэнавас пэсти, кай о Иегова найдошало. Наоборот, во камэл, кай будэр нико тэ на мучийпэ. Во дэл алав, кай ваздэла амарэ чачен. Кала мэ гиндосарав пала када, мандэ по ди ашэл фартэ спокойно».

11. Амэ ӷанас, васо о Иегова домэкэл, кай о миро тэ мучийпэ. Сар када поможый амэнди тэ росԥэнас важ лэстэ?

¹¹ Кала амэ ӷанас, васо о Иегова домэкэл, кай и мануша тэ мучинпэ, амэ камас тэ росԥэнас важ лэстэ аврэнди. Андэ пэско письмо о апостало Пётро сыкадя: о Иегова тэрпий, важ кода кай камэл, кай и мануша тэ каинпэ и тэ спасынпэ. Потом о Пётро пистросардя, со трэбуй тэ терэн и христианоря: «Погиндон, савэ манушэнца тумэ трэбуй тэ авэн. Тумэнди трэбуй тэ андярэн пэс сар свынти и па тумари дила трэбуй тэ дицол бари патив каринг о Дэл» (2 Пёт. 3:11). Ек анда кацави дила — тэ росԥэнэс важ о Дэл. Сар и амаро Дад, амэ любисарас лэ манушэн. Амэ камас, кай вонэ тэ жувэн андэ лэ Дэвлэско шукарно раё. О Иегова дэл время лэ манушэнди пэ тумарэ краёря, кай лэндэ тэ авэл возможность тэ уӷанэн лэс и тэ ашэн лэстирэ друӷоря. Кати погиндон: тумэ терэн ек дила лэ Иеговаса, кай со май бут мануша тэ уӷанэн важ лэстэ, пока на авэла о Армагедоно! (1 Кр. 3:9).

АМЭ ЖУВАС АНДЭ «ПОСЛИДНИ ДЕСА»

12. Андэр со амэ лас тэ патяс инке май фартэ, кала полас, кай жувас андэ «послидни деса»?

¹² Андэ Библия сас точно запистромэ, савэ авэна и мануша андэ «послидни деса» (2 Тим. 3:1—5). Хутила кати тэ диқэс, со терэлпэ андэ люма, и ту полэса, кай вся кадя и исин. Адес и мануша андярэн пэс со май вэрыто и май вэрыто. Через када амэ лас инке май фартэ тэ патяс кодэлэсти, со пистромэ андэ Библия (2 Тим. 3:13—15).

13. Со амэ можэм пэстар тэ пушас? (Лука 12:15—21).

¹³ Если амэ ласа тэ сэрас, кай жувас андэ послидни деса, амэнди авэла май вушэро тэ ритярас андо шэро кода, со па чачимастэ важно. О Иисусо шутя пэ када сама, кала росԥэндя о примеро, саво запистромэ андо Лука 12:15—21 (проадинон). Васо по барвало мануш ԥэнэнпэ «найгодявэрно»? Най важ кода, кай лэстэ сас бут мищимос, ай важ кода, кай во тратияс пэстири время най пэ кода, со трэбуй. Во тидэлас о барвалимос важ пэстэ, но на старыияспэ «тэ ашэл барвало андэ лэ Дэвлэстирэ яқа». Сас найгодявэрнэс фартэ бут тэ гиндой важ кода, со тэ стерэл англэ, кала лэсти ашэляпэ тэ жувэл совсем набут. О Дэл ԥэндя лэсти: «Адес и рят ту мэрэса». Сости амэ можэм тэ сытювас? Каринг о Армагедоно ашэлпэ набут время. Важ када авелоп драго тэ пушас пэстар: «Сар мэ камав тэ жував? Ритярав мэ андо шэро кода, со па чачимастэ важно? Со мэ приԥэнав мэрнэ бэятонэнди и сар сытярав лэн тэ жувэн? Пэр со ужал мэрни время, о зор и ловэ: кай мэ май драго тэ жував или кай тэ стидав о барвалимос по небо?»

14. Васо авелоп драго тэ гиндосарас пала кода, кай амэ жувас андэ послидни деса?

¹⁴ Кала амэ полас, кай жувас андэ послидни деса, када можэт тэ поможый амэнди тэ прилас правильни решэнии. Кадя и вижыля кай амари ԥэй, савя ақарэн Ми́ки. Вой росԥэнэн: «Мэ любисарав лэ жывотнонэн, важ када посли школа мэ фартэ камавас тэ жав тэ сытював, кай тэ ашав учоно, саво драго розлэлпэ андэ жывотни. Ай инке мэ камавас тэ ашав общё пианеро и тэ терав лэ Дэвлэстири дила котэ, кай трэбуй помощь. Дэсавэ ԥрала и ԥэя анда собрания ԥэндэ манди драго тэ погиндосарав, вижала мандэ тэ терав май бут важ о Дэл, если мандэ о шэро авэла замардо бутяса. Вонэ шутэ мэрни сама, кай ӥто кадэла люматар нисо на ашэлапэ. Ай акэ англэ мандэ авэла вся и вечность, кай май драго тэ розуӷанав пала любо жывотно. Важ када мэ на лэм тэ тратисарав бут время, кай тэ ашав учоно, и закамлэм тэ прожав найбарэ курсоря, пэ савэ жылоп время май набут. Потом мэ виарақлэм бути, сави на мешыияс манди тэ авав общё пианеро. Ай ӷэт май интя мэ пэрэлаглэм андо Эквадоро, кай на хутилэнас мануша тэ росԥэнэн важ о Дэл». Акана и Мики поможый пэстирэ хуласти, саво раёно старейшына, тэ терэл и дила андэ кодэя страна.

15. Васо на трэбуй тэ умэкас и вас, если варико най сразу приашундёл каринг и лащи новость? Росԥэнэн примеро. (Кадяжэ диқэн и картинка.)

¹⁵ На трэбуй тэ умэкас и вас, кала и мануша най сразу взвинпэ пэ лащи новость, сави амэ росԥэнас. Вонэ моӷут тэ парудён. Погиндосарам пала лэ Иисусоско ԥрал, о Иаково. Во барёлас вместе лэ Иисусоса, диқэлас, сар во терэл чудеса и сар пар лэстэ дицолас, кай во кодэва Избрано, пала саво сас ԥэндо. Ай инке о Иаково диқэлас, кай о Иисусо сытярэлас лэ манушэн кадя, кай лэса нико не моӷ тэ сыстойпэ. Но во най сразу патяя андо Иисусо, ай кати посли кода, сар о Иисусо рисайля каринг и жызня. И тоди о Иаково баря хваткаса ля тэ терэл лэ Дэвлэстири дила!b (Иоан. 7:5; Гал. 2:9). Важ када на гиндон, кай ужэ на вижала тэ лэн лэ одестар лэ ерес и лэ родос, савэ пока на камэн тэ приашундён каринг и лащи новость. Кадяжэ на парашэн тэ авэн кодэлэндэ, ко раньшэ на камэлас тумэн тэ ашунэн. Амэ жувас андэ послидни деса, важ када андэ кадэя время тэ росԥэнас важ о Дэл трэбуй, сар никала. Кода, со амэ ԥэнаса лэ манушэнди адес, можэт май интя тэ спасый лэнди и жызня. Дажэ если амарэ алава лэна лэн лэ одестар кати посли кода, сар залэлапэ и само бари бида, возможно, лэндэ инке авэла время тэ прилэн правильно решэнияc.

ВСЯ И ВРЕМЯ ШОН САМА ПЭ ЛЭ ИЕГОВАСТИРЭ СОВЕТОРЯ

16. Васо всаворэ амэ трэбуй най еқвар тэ шас сама пэ прости библейски темы? (Кадяжэ диқэн и рамка «Райканэ инструменторя, кай тэ поможысарас аврэнди».)

¹⁶ О Иегова дэл амэнди помощь май драго тэ уӷанас и тэ полас о чачимос анда Библия. Например, важ кодэла, ко най свидетелё, исин библейско речь кажно курко, дэсавэ статьи и видеоря по сайто и разни журналоря. Хоть амэ драго ӷанас и темы, савэ котэ росԥэнэнпэ, амэнди трэбуй упалэ тэ шас пэр лэндэ сама. Када поможыя амэнди май фартэ тэ любисарас лэ Иеговас, тэ патяс лэсти и май драго тэ росԥэнас аврэнди о чачимос анда Библия (Пс. 19:7).

17. Андэ савэ ситуацыи важно тэ гиндосарас пала прости библейски темы?

¹⁷ Амэ, лэ Иеговастирэ свидетеля, лошавас кажно разо, кала лас май драго тэ полас кода, сости сытярэл и Библия. Но амэ на парашас тэ цэнисарас и кодэла пэрви библейски темы, через савэ амэ ашэлям май пашэ каринг о Иегова. Амэ ӷанас, кай о Иегова — када само зорало и само годявэрно Дэл, саво стердя вся. Кала амэ ритярас кадэва гиндо андо шэро, када поможыя амэнди тэ приашундювас каринг кода, со ԥэнэн и ԥрала, и тэ на гиндосарас, кай амэ ӷанас, сар май драго. Инке амэ полас, васо о Иегова домэкэл, кай о миро тэ мучийпэ. Када поможый амэнди тэ аштярас лэ Иеговас, кала варико анда амарэ чаче или амэ екжэнэ пэрэандярас ԥаримос. Ай кала амэ гиндосарас, сар тэ тратисарас пэстири время, зор и ловэ, то авелоп годявэрнэс тэ на бистрас, кай амэ жувас андэ послидни деса и трэбуй тэ терас кода, со па чачимастэ важно. Давай тэ на парашас тэ цэнисарас лэ Иеговастирэ советоря, важ кода кай вонэ придэн амэнди зор, поможын тэ ашас годявэрнэ и анда вся ди тэ тэлювас амарэ Дэвлэсти.