Цэнисар и возможность тэ мангэспэ

1. Сар амэ трэбуй тэ диқас пэ молитва?

АМАРО Создателё, о Иегова, стодя бари патив пар мэндэ — во дя амэнди возможность тэ мангаспэ лэсти. Амэ можэм тэ росԥэнас лэ Дэвлэсти вся, со амэндэ по ди, андэ любо время, пэ любо шыб и пала када амэнди на трэбуй май англал тэ доԥэндювас лэса. Кай бы амэ тэ на авас — дажэ андэ больница или андо баруно, — амаро любящё небесно Дад ашунэн амэн. И амэ фартэ блаӷодарни лэсти!

2. Сар о царё Давидо сыкадя, кай важ лэстэ сас куч и возможность тэ мангэлпэ?

² Важ о царё Давидо сас куч и возможность тэ мангэлпэ. Андэ ек пэско псалом во дилабэлас лэ Иеговасти: «Мэк авэл мэрни молитва сар фимиамо, саво стердо англа тутэ» (Пс. 141:1, 2). Кала жувэлас о Давидо, и рашая использовали о фимиамо важ и служэния лэ Дэвлэсти и терэнас лэс фартэ драго (Исх. 30:34, 35). Важ када о Давидо най евья ԥэндя пала фимиамо. Во драго гиндояс, со во камэл тэ ԥэнэн пэстирэ небеснонэ Дадэсти. Канешно, амэ камас тэ терас кадя жэ, кай амарэ молитвы тэ чалён лэ Иеговасти.

3. Со амэндэ трэбуй тэ авэл андо ди, кала амэ мангаспэ и васо?

³ Кала амэ мангаспэ, амэ трэбуй тэ терас када пативалэс. Погиндон пала удивительни видении, савэ диқлэ о Исайя, о Иезекиилё, о Даниило и о Иоанно. Кадэла видении сас разни, но всаек андэ варисостэ шонаспэ. Вонэ сыкавэн, кай о Иегова — када само баро Царё. О Исайя додиқля «лэ Иеговас. Во бэшэлас по вучо престоло» (Ис. 6:1—3). О Иезекиилё андэ видения диқля, кай о Иегова бэшэл пэ пэстири небесно колесница, ай «круӷом лэстэ сас свето, саво шоласпэ пэ радуӷа» (Иез. 1:26—28). Андэ пэстири видения о Даниило диқля кодэлэс, пэр кастэ ԥэнэн «Ԥурэдэр бэршэнца». Во сас утидо андэ парни ӥда, и «лэско престоло сас сар яг, саво фартэ ԥабол» (Дан. 7:9, 10). Ай о Иоанно диқля лэ Иеговас, саво бэшэл по престоло, и круӷом лэстэ «блестияс и изумрудно радуӷа» (Отк. 4:2—4). Чаче, лэ Иеговастири слава со май бари, ласа нисо на сыстояпэ! Кала амэ гиндосарас пала када, амэ ашас инке май блаӷодарни, кай амэндэ исин возможность тэ мангаспэ. Ай инке, када поможый амэнди тэ на бистрас, кай важно тэ обратисавас каринг о Иегова баря пативаса. Но пала со амэнди трэбуй тэ мангаспэ?

«ВАЖ КАДА МАНГЭНПЭ КАДЯ»

4. Пала со о Иисусо сытярэлас тэ мангаспэ со май пэрво? (Матфея 6:9, 10).

⁴ Проадинон Матфея 6:9, 10. Андэ пэстири ашунгли дума по плай, о Иисусо сытярэлас пэстирэ учениконэн тэ мангэнпэ. Во росԥэндя, сар када трэбуй тэ терэн, кай лэндирэ молитвы тэ чалён лэ Дэвлэсти. Посли алава «важ када мангэнпэ кадя» о Иисусо ԥэндя, со ужал андэ лэ Иеговаско замысло: кай лэ Дэвлэско алав тэ авэл свынто, кай тэ авэл о Царство, саво улэла всаворэ́ лэ Иеговастирэ вороӷонэн, и кай май англэ тэ авэл лашымос важ и всаворэ мануша. Если амэ на бистрас пала када тэ мангаспэ, амэ сыкавас, кай лэ Иеговаско замысло важ амэндэ важно.

5. Ашунэл о Иегова и молитвы пала кода, со трэбуй лично амэнди?

⁵ Кадяжэ о Иисусо сыкадя, кай кала амэ мангаспэ пала кода, со трэбуй лично амэнди, када тожэ правильно. Амэ можэм тэ мангас лэ Иеговас, кай во тэ дэл амэнди, со тэ хас, тэ простий амэн, тэ поможый тэ на подаспэ кодэлэсти, со камэлпэ, но нащи, и тэ фэрий лэ Сатанастар (Матф. 6:11—13). Кала амэ терас кадя, амэ прижанас, кай амэнди трэбуй помощь лэ Дэвлэстар и сыкавас, кай камас лэс тэ радосарас.

6. Трэбуй амэ алав андэ алавэстэ тэ пэрэԥэнас и молитва, сави дя о Иисусо? Росԥэнэн.

⁶ О Иисусо на аштярэлас, кай лэстирэ ученикоря лэна алав андэ алавэстэ тэ пэрэԥэнэн и образцово молитва. Кала о Иисусо екжэно мангэласпэ, во росԥэнэнас лэ Дэвлэсти пала разни маменторя, савэ сас важ лэстэ важни (Матф. 26:39, 42; Иоан. 17:1—26). Кадяжэ и амэ можэм тэ росԥэнас андэ молитва вся, пала со амэ пэрэжываем. Кала амэнди трэбуй тэ прилас и ришэния, важно тэ мангас, кай о Иегова тэ дэл мудрость (Пс. 119:33, 34). Ай кала амэ ласпэ пала нэви дила, авелоп драго тэ мангаспэ, кай тэ полас, сар драго тэ стерас ла (Прит. 2:6). И родителя моӷут тэ мангэнпэ пала бэяцэ, ай и бэяцэ — пала родителя. И канешно, амэ всаворэ можэм и дажэ трэбуй тэ мангаспэ пала кодэла, ко изучает и Библия и касти росԥэнас пала Дэл. Но кала амэ обратисавас каринг о Дэл андэ молитва, амэ трэбуй най кати тэ мангас варисо.

7. Васо андэ молитва трэбуй тэ хвалисарас лэ Иеговас?

⁷ Кала мангэнпэ, на бистрэн тэ хвалин лэ Иеговас. Нико на ашэл, кай лэс тэ хвалин май бут, чем лэ Дэвлэс. О псалмопевцо ԥэндя: «Ту, Иегова, добро Дэл, полэс и жалуис анда вся оди, на грабис тэ холявэс, никала на ашавэс и тири преданно любовь фартэ бари» (Пс. 86:5, 15). О Иегова — райкано Дэл и терэл удивительно дила, важ када амэндэ исин бут, васо лэс тэ хвалисарас!

8. Пала со амэ можэм тэ блаӷодарисарас лэ Иеговас? (Псалом 104:12—15, 24).

⁸ Важно най кати тэ хвалисарас лэ Иеговас, но и тэ блаӷодарисарас лэс пала лэстирэ райканэ подаркоря. Например, можно тэ ԥэнас лэсти наис пала шукарнэ цвиторя, лашо хамос и пашутнэ друӷоря. Амаро любящё небесно Дад амэнди бут со дэл, кай амэ тэ радосавас ла жызняти. (Проадинон Псалом 104:12—15, 24.) Но май фартэ амэ блаӷодарни лэсти, кай во дэл амэнди вся важ и лащи дружба лэса и кай амэндэ исин райкани надежда.

9. Со поможыя амэнди тэ на бистрас тэ блаӷодарисарас лэ Иеговас? (1 Фессалоникийцам 5:17, 18).

⁹ Со амэ можэм тэ терас, кай тэ на бистрас тэ блаӷодарисарас лэ Иеговас? Стерэн о списко, пала со тумэ мангэнас андэ молитва, и дэкала продиқэн лэс, кай тэ полэн, сар о Иегова атветил тумэнди. Посли када блаӷодарин лэ Дэвлэс пала помощь. (Проадинон 1 Фессалоникийцам 5:17, 18.) Погиндон акэ пала со. Кала амэнди ԥэнэн наис, амаро ди радуийпэ. О Иегова тожэ фартэ радуийпэ, кала амэ сыкавас лэсти пэстири блаӷодарность (Кол. 3:15). Но исин инке ек причина тэ блаӷодарисарас амарэ Дэвлэс.

БЛАӶОДАРИН ЛЭ ИЕГОВАС ПАЛА ЛЭСКО ЛЮБИМО ШАВО

10. Васо амэ трэбуй тэ блаӷодарисарас лэ Иеговас, кай во бишалдя лэ Иисусос пэ ԥув? (1 Петра 2:21).

¹⁰ Проадинон 1 Петра 2:21. Амэнди трэбуй тэ блаӷодарисарас лэ Иеговас, кай во бишалдя пэстирэ любимонэ Шавэс, кай во тэ сытярэл амэн. Кала амэ адиносарас пала лэ Иисусостири жызня, амэ бут со уӷанас пала Иегова и пала кода, сар тэ радосарас лэско ди. Если амэ патяс андэ лэ Иисусостири жэртва, амэндэ авэла лащи дружба лэ Иеговаса (Рим. 5:1).

11. Васо амэ мангаспэ через о Иисусо?

¹¹ Амэ блаӷодарни лэ Иеговасти, кай можэм тэ мангаспэ лэсти через лэско Шаво. И имено через лэстэ о Иегова атвечает пэ амарэ молитвы. Если амэ мангаспэ через о Иисусо, о Иегова ашунэла, пала со амэ мангас, и дэла кода, со амэнди трэбуй. Акэ со ԥэндя о Иисусо: «И со бы тумэ тэ на манглоп через мэрно алав, мэ стерава када, кай о Дад тэ авэл ашунгло через о Шаво» (Иоан. 14:13, 14).

12. Сави инке исин причина тэ блаӷодарисарас лэ Иеговас важ лэско Шаво?

¹² Блаӷодаря кодэлэсти, кай о Иисусо отдя пэстири жызня пала амэндэ, о Иегова можэт тэ простий амарэ ӷрехоря. Андэ Библия ԥэнэнпэ, кай о Иисусо — када Пэрвосвященико, «саво бэшля па право вас кай лэ Дэвлэско престоло по нэбо» (Евр. 8:1). Во «помошнико, саво паша Дад» (1 Иоан. 2:1). Амэ фартэ блаӷодарни лэ Иеговасти, кай амэндэ исин кацаво Пэрвосвященико. Во най кати полэл и жалуий амэн, но и «мангэл важ амэндэ» лэ Дэвлэс (Рим. 8:34; Евр. 4:15). Амэ всаворэ нэсовершэни. Если о Иисусо тэ на отдиноп пэстири жызня, амэндэ вобще на авелоп и возможность тэ мангаспэ. Чаче, амэ никала нэ сможэм тэ отблаӷодарисарас лэ Иеговас важ о кучутно подарко — лэско любимо Шаво!

МАНГЭНПЭ ПАЛА ԤРАЛА И ԤЭЯ

13. Сар андэ рят англа пэстири смэрть о Иисусо сыкадя пэстири любовь каринг и ученикоря?

¹³ Андэ рят англа пэстири смэрть о Иисусо долӷо мангэласпэ пала пэстирэ ученикоря: «Мангав тэ фэрис лэн лэ Найлашэстар» (Иоан. 17:15). Сави дэ бари любовь сас кай о Иисусо! Ӥто во екжэно трэбуй сас тэ пэрэандярэл баро ԥаримос, но во на гиндояс пала пэстэ, ай пэрэжывал пала апостолоря.

14. Андэр со дицол амари любовь каринг и ԥрала и ԥэя?

¹⁴ Амэ старысавас тэ терас кадя жэ, сар о Иисусо, важ када на гиндосарас кати пала пэстэ. Амэ часто мангаспэ важ и ԥрала и ԥэя. Кадя амэ кандас лэ Иисусос и терас, сар во приԥэндя: «Любин ек еқэс» (Иоан. 13:34). Канешно, лэ Иеговасти чалёл, кай амэ анда вся оди любисарас амарэ ԥралэн и ԥэян. Амарэ молитвы пала лэндэ моӷут лэнди фартэ тэ поможын, важ када андэ лэ Дэвлэско алав ԥэнэнпэ: «Кала анда вся оди мангэлпэ кодэва, ко кандэл лэ Дэвлэс, кай кацави молитва исин баро зор» (Иак. 5:16).

15. Васо амарэ ԥралэнди и ԥэянди трэбуй, кай амэ тэ мангаспэ пала лэндэ?

¹⁵ Амарэ ԥралэнди и ԥэянди фартэ трэбуй, кай амэ тэ мангаспэ пала лэндэ, важ кода кай андэ лэндири жызня бут ԥаримос. Амэ можэм тэ мангас лэ Иеговас тэ поможый кодэлэнди, касти ԥарэс через и природно бида, ӷражданско война, преследовании, насвалимос или через авэр бида. Кадяжэ важно тэ мангаспэ пала ԥрала и ԥэя, савэ на жалуин пэс и поможын кодэлэнди, ко попэля андэ бида. Возможно, ту лично ӷанэс варикас андар лэндэ. Кала амэ мангаспэ пала лэндэ, амэ можэм тэ ԥэнас лэндирэ алава. Кадя амэ сыкаваса чачуни ԥралицко любовь.

16. Васо амэ трэбуй тэ мангаспэ пала назначени ԥрала?

¹⁶ И ԥрала, савэн стодэ тэ диқэн пала христианско собрания, фартэ блаӷодарни, кала амэ мангаспэ важ лэндэ. И если бы амэ када тэ на терас, лэнди авелоп пэ бутэстэ май ԥарэс тэ терэн пэстири дила. Акэ со пала када пистросардя о апостоло Павло: «Мангэнпэ и пала мандэ, кай кала мэ лава тэ дав дума, о Дэл тэ поможый манди тэ подтидав кодэла алава, савэ трэбуй, и смило тэ росԥэнав аврэнди и свынто тайна пала радосно новость» (Эф. 6:19). Адес амэнца служын бут ԥрала, савэ кадя жэ, сар и о Павло, бут состар отԥэндёнпэ важ авэр. И любовь побудия амэн тэ мангас лэ Иеговас, кай во тэ подритярэл лэн.

КАЛА АМЭ МАНГАСПЭ АНГЛА АВЭР

17, 18. Кала амэн моӷут тэ помангэн тэ ԥэнас и молитва англа авэр и пала со амэнди трэбуй тэ сэрас?

¹⁷ Дэкала амэн мангэн тэ ԥэнас и молитва англа авэр. Например, ек ԥэй ақарэл авря ԥья пэ изучения Библии и мангэл, кай вой тэ обратийпэ каринг о Дэл. И ԥэй, савя ақардэ, можэт тэ на ӷанэн, со терэлпэ андэ жызня кай и изучающё и важ када вой, возможно, закамэла тэ помангэлпэ посли изучения. Кадя лати авэла май вушэро тэ полэл, пала со тэ мангэлпэ важ и изучающё.

¹⁸ Лэ ԥралэсти моӷут тэ ԥэнэн, кай во тэ мангэлпэ пэ встреча важ и служэния или пэ собрания. Пала со во трэбуй тэ сэрэл? Важно тэ ритярэл андо шэро, васо всаворэ авелэ. Андэ молитва на трэбуй тэ дэл совето ла собранияти или тэ терэл объявлении. Кадяжэ пэ дили и молитва обычно жал пять минут. Важ када о ԥрал, саво мангэлпэ, на трэбуй тэ дэл дума бут, особено кала во мангэлпэ англа встреча (Матф. 6:7).

МЭК И МОЛИТВА АВЭЛ ВАЖНО АНДЭ ТУМАРИ ЖЫЗНЯ

19. Со поможыя амэнди тэ авас ӷотови каринг лэ Дэвлэско дес?

¹⁹ Со май пашэ лэ Иеговаско дес, со май куч важ амэндэ трэбуй тэ авэл и молитва. Акэ васо о Иисусо ԥэндя: «Вся и время терэн кода, со камэл о Дэл, мангэнпэ анда вся оди, вся и время, кай тумэ тэ обжан вся, со трэбуй тэ авэл» (Луки 21:36). Если амэ вся и время мангаспэ лэ Иеговасти, тоди амэндэ авэла лащи дружба лэса и амэ аваса ӷотови каринг лэ Дэвлэско дес.

20. Сар амарэ молитвы моӷут тэ шонпэ по фимиамо, савэстэ лашо запахо?

²⁰ Пала со амэ адес подям дума? Важно тэ цэнисарас и возможность тэ мангаспэ. Ӷлавно, со трэбуй тэ ԥэнас андэ пэстирэ молитвы — када, со ужал андэ лэ Иеговаско замысло. Кадяжэ авелоп драго тэ блаӷодарисарас лэ Дэвлэс пала лэско Шаво и пала Царство, кай правий о Христос. Инке трэбуй тэ мангаспэ пала амарэ ԥрала и ԥэя. И канешно, амэ можэм тэ мангас лэ Иеговас, кай во тэ позаботийпэ пала кода, со трэбуй амэнди важ и жызня и кай амэндэ тэ авэл лащи дружба лэса. Если амэ гиндосарас, пала со ласа тэ мангаспэ, када сыкавэл, кай важ амэндэ куч и возможность тэ обратисавас каринг о Дэл. Тоди амарэ алава лэна тэ чалён лэ Иеговасти, сар о фимиамо, савэстэ лашо запахо (Прит. 15:8).