«Сындомари всаворя ԥувьяко» жалуий анда ди. Патя лэсти!

1. Со о Иегова ԥэндя лэ Авраамости?

О АВРААМО сэрэлас кадэя дума вся пэстири жызня. Через о анӷело о Дэл ԥэндя лэсти, кай тидэлпэ тэ стрий па ԥув и фороря Садомо и Гамора. Через када о Авраамо ля тэ пэрэжывает. Во пушля: «Хэба ту умарэса лэ праведнонэ манушэс лэ ӷрешникоса? [...] Хэба о Сындомари всаворя ԥувьяко можэт тэ обжалпэ нэсправедливо?» О Иегова терпеливо виашундя пэстирэ кучутнэ друӷос и ԥэндя, кай во никала на умарэла кодэлэн, ко ритярэл лэско законо (Быт. 18:23—33). Кадэва гиндо подритярэл и амэн всаворэн.

2. Васо амэ можэм тэ патяс, кай о Иегова вся и время сындой правильно и жалуий анда оди?

² Кала амэ уӷанас, саво приӷоворо виандярэл о Дэл, амэ дэкала можэм тэ на дополас, васо кадя. О апостало Павло пистросардя пала Иегова: «Нико нэ можэт тэ росполэл, сар во гиндой!» (Римо 11:33). Но амэ можэм тэ патяс, кай о Иегова вся и время сындой правильно и жалуий анда оди. Васо? Важ кода кай во, най сар и мануша, во ӷанэн, «со андо ди кажнонэ манушэстэ» (1 Цар. 8:39; 1 Сам. 16:7; 1 Лет. 28:9). Хэба када на сыкавэл, кай лэсти можно тэ патяс?

3, 4. Савэ вопросоря амэндэ моӷут тэ авэн и со амэ роздиқаса андэ кадэя статья? (Иоано 5:28, 29).

³ И всаек амэндэ моӷут тэ авэн вопросоря кацавэ жэ, сар кай о Авраамо. Амэ можэм тэ гиндосарас: «Нэужэли кодэлэндэ, кас о Дэл умардя, нинай нисави надия?» Например, погиндосарам пала мануша анда Садомо и Гамора. Можэт хоть варико андар лэндэ тэ рийпэ каринг и жызня, кала «жундёна кодэла, ко терэлас... нэправильно»? (Дила 24:15).

⁴ Дэсавэ маменторя пала кода, сар о Дэл рия каринг и жызня лэ манушэн, амэ ужэ ӷанас. Давайте пала када подаса дума. Найдэлмут амэ лям май драго тэ полас кода, пала со пистросардя о апостало Иоано андэ пэстири книжка. Во пистросардя пала дуй ӷрупы мануша, савэ ринапэ каринг и жызня. Дэсавэ мануша жундёна, кай тэ жувэн вечно, ай авэр — кай тэ тердён англа сындоa. (Проадинон Иоано 5:28, 29.) Када поможысардя амэнди май драго тэ полас и авэр гиндоря. Например, пала лэ Иеговастирэ справедливи сындоря. Пала лэндэ амэ май драго уӷанаса андэ кадэя и андэ авэр статья. Спэрва подам дума пала кода, со амэ на ӷанас, ай тоди роздиқаса, со амэ ӷанас.

СО АМЭ НА ӶАНАС

5. Со раньшэ ԥэнэнаспэ андэ амарэ публикацыи пала кодэла, кас о Иегова умардя андэ Садомо и Гамора?

⁵ Раньшэ андэ амарэ публикацыи ԥэнэнаспэ, кай и мануша, савэ андярэнас пэс нэправильно и савэн умардя о Иегова, на авэна рисардэ каринг и жызня, например, и мануша анда Садомо и Гамора. Но посли кода сар амэ инке май драго роздиқлям кадэва вопросо и бут мангасаспэ, амэ полям, кай нэ можэм када ворта тэ ԥэнас. Васо?

6. а) Призындярэн авэр примероря, кала о Иегова умарэлас кодэлэн, ко терэлас нэправильно. б) Можно тэ ԥэнас, кай о Иегова умардя лэн пэ вся и время?

⁶ Андэ Библия росԥэнэнпэ и пала авэр случаёря, кала о Иегова умарэлас кодэлэн, ко терэлас нэправильно. Например, во умардя лэ манушэн, кала сас о потопо. Жундэ ашэлэпэ кати о Ноё и лэско ери. Кадяжэ о Иегова ԥэндясас лэ израильтянонэнди тэ умарэн семь народоря, савэ жувэнас пэ ԥув, пала сави о Дэл дя алав. Ай ӷэт май интя о Иегова бишалдясас лэ анӷелос, саво важ и рят умардя 185000 ассирийсконэ халавдэн (Быт. 7:23; Втор. 7:1—3; Ис. 37:36, 37). Сыкавэл и Библия, кай всаворэ кадэла мануша сас умардэ пэ вся и время и лэндэ нинай надия упалэ тэ жувэн? Най. Васо кадя можно тэ ԥэнас?

7. Если тэ дас дума пала мануша, савэ мулинэ андо потопо или тоди, кала захутилэнас о Ханаано, со амэ на ӷанас пала лэндэ? (Диқэн и картинка пэ обложка.)

⁷ Хоть кодэла мануша сас умардэ, амэ на ӷанас, сави ришэния о Дэл сар сындомари приля пала кажно андар лэндэ. Кадяжэ амэ на ӷанас, сас лэндэ возможность тэ уӷанэн пала Иегова и тэ каинпэ чи най. Андэ Библия ԥэнэнпэ, кай о Ноё «росԥэнэнас пала... [лэ Дэвлэско] законо» (2 Пёт. 2:5). Но андэр латэ на ԥэнэнпэ, кай кала во строияс баро ковчеӷо, во старыияспэ тэ росԥэнэн пала потопо кажнонэ манушэсти па вся и ԥув. Кадяжэ можно тэ ԥэнас и пала мануша, савэ жувэнас андо Ханаано. Амэ на ӷанас, сас лэндэ возможность тэ уӷанэн пала Иегова и тэ парудён чи най.

8. Со амэ на ӷанас пала мануша анда Садомо и Гамора?

⁸ Ай со амэ можэм тэ ԥэнас пала мануша, савэ сас андо Садомо и Гамора? Машкар лэндэ жувэлас о Лото, саво андярэлас пэс правильно. Но пистромэ варикай, кай во росԥэнэнас пала Дэл котэ всаворэ́ манушэнди? Най. И мануша андэ кодэла фороря чаче андярэнас пэс фартэ вэрыто. Но полэнас вонэ, кай терэн нэправильно? Если тэ сэрас, машкар саво миро вонэ жувэнас, возможно, на полэнас. Еқвар, ӷурто мурша анда Садомо камэнас тэ терэн нахально билажавардимос лэ Лотостирэ ӷостёнэнца. Андэ Библия ԥэнэнпэ, кай паша лэско цэр стидэпэ «всаворэ мурша анда Садомо — и шаворэ, и ԥурэ» (Быт. 19:4; 2 Пёт. 2:7). Анда дума лэ Иеговастири и лэ Авраамостири дицол, кай май бут мануша анда кодэла фороря сас найлашэ (Быт. 18:32). О Дэл умардя лэн справедливо. Но сыкавэл када, кай ни ек андар лэндэ на рияпэ каринг и жызня, кала «жундёна кодэла, ко терэлас... нэправильно»? Амэ нэ можэм ворта када тэ ԥэнас, важ кода кай ӷанас, кай амаро Дэл жалуий анда оди.

9. Со амэ на ӷанас пала Саламоно?

⁹ Андэ Библия кадяжэ росԥэнэнпэ пала дэсавэ мануша, савэ ритярэнас лэ Дэвлэско законо, но ӷэт май интя парашэлэ када тэ терэн. Например, о царё Саламоно. Во драго ӷанэнас, ко када о Иегова и сар трэбуй лэс тэ полэл. О Иегова лэс блаӷословияс. И всаек прожыля время, и о Саламоно ля тэ тэлёл лэ хохавнэ Дэвлэнди. О Иегова росхоляйля через лэстирэ бэзэха, савэ анэнас о найлашымос лэ израильтянонэнди инке бут викоря (1 Цар. 11:5—9; 2 Цар. 23:13). Андэ Библия ԥэнэнпэ, кай о Саламоно муля, и лэс притидэ (1 Цар. 11:43). Пэ дэлмутни еврейско шыб о алав «муля» дословно сыкавэл, кай о Саламоно сас «притидо лэ папонэнца». Кадэва жэ алав андэ Библия пистромэ, кала и дума жал пала лэ Дэвлэстирэ мануша, савэ лэс кандэнас, например, пала царё Давидо. (Сыстон 1 Цар. 2:10.) Но сыкавэл када, кай о Саламоно рияпэ каринг и жызня? И Библия ворта на сыкавэл, кай кадя авэла. Ай сар тоди тэ полас и алава, кай «кодэлэс, ко муля, будэр на дошалярэса андо бэзэх»? (Римо 6:7). Вонэ тожэ на сыкавэн, кай всаворэ, ко муля, ринапэ каринг и жызня, кабута через пэстири смэрть лэ манушэстэ появийпэ право тэ жувэл упалэ. Кала о Иегова рий лэ манушэс каринг и жызня, када лэско подарко. Амаро любящё Дэл дарий лэс кодэлэнди, касти камэл тэ дэл возможность тэ служын лэсти вечно (Иов 14:13, 14; Иоан. 6:44). Дэла во кадэва подарко лэ Саламоности? О Иегова ӷанэн ответо, ай амэ най. Но амэ точно ӷанас, кай о Иегова андярэла пэс справедливо.

СО АМЭ ӶАНАС

10. Со кай о Иегова по ди, кала во сындой лэ манушэн? (Иезекииль 33:11). (Диқэн кадяжэ и картинка.)

¹⁰ Проадинон Иезекииль 33:11. Андэ кадэва стихо о Иегова ԥэнэн амэнди, со лэстэ по ди, кала во сындой лэ манушэн. О апостало Пётро лэ Дэвлэстирэ зорэса инке еқвар ԥэндя и алава, савэ пистросардя о пророко Иезекиилё, кай о Иегова «на камэл, кай варико тэ хасарэл и жызня» (2 Пёт. 3:9). Кадэла алава фартэ подритярэн амэн. Амэ ӷанас, кай о Иегова никастар на одлэл и жызня пэ вся и время, если пэ када нинай бари причина. Во анда вся оди жалуий, кала пэ када исин возможность.

11. Ко на рияпэ каринг и жызня и катар амэ када ӷанас?

¹¹ Ай исин мануша, савэ точно на ринапэ каринг и жызня, чи най? Андэ Библия ԥэнэнпэ кати пала дэсавэ кацавэ манушаb. О Исусо ворта сыкадя, кай на рияпэ каринг и жызня о Иуда Искариото (Мар. 14:21; кадяжэ диқэн Иоано 17:12c). Кадэва мануш жыля против о Иегова и лэско Шаво, во екжэно витидя кадэва дром (Диқэн Марко 3:29). Инке о Исусо ԥэндя кадэва жэ гиндо пала дэсавэ барэдэра андэ вера, савэ тасавэнас пэр лэстэ. Во ԥэндя, кай лэндэ на авэла надия тэ жувэн упалэ (Матф. 23:33). О апостало Павло пистросардя, кай кодэва, ко отжыля лэ Дэвлэстирэ чачимастар и на каисайля, тожэ на рияпэ каринг и жызня (Евр. 6:4—8; 10:29).

12. Со амэ уӷанас пала кода, кай о Иегова жалуий анда оди? Призындярэн примероря.

¹² Ай со амэ ӷанас пала кода, кай о Иегова жалуий анда оди? Сар во сыкадя, кай «на камэл, кай варико тэ хасарэл и жызня»? Диқаса, сар о Дэл сыкавэлас, кай жалуий анда ди дэсавэ манушэн. Ек андар лэндэ — када о царё Давидо. Во ашэля дошало андэ барэ бэзэха. Например, во изменисардя андо брако и умардя манушэс. Но о Давидо каисайля, важ када о Иегова жалуисардя и простисардя лэс (2 Сам. 12:1—13). О царё Манасия май бут время андэ пэстири жызня терэлас фартэ вэрыто дила. Но о Иегова диқля, кай во каисайля, и простисардя лэс (2 Лет. 33:9—16). Кадэла примероря поможын амэнди тэ полас, кай о Иегова вся и время, кала исин возможность, жалуий анда оди. Во рия каринг и жызня кацавэ манушэн, важ кода кай вонэ полинэ пэстири дош и каисайлэ андэ пэстирэ бэзэха.

13. а) Васо о Иегова жалуисардя лэ манушэн анда Ниневия? б) Со о Исусо ԥэндя пала ниневитяноря?

¹³ Кадяжэ о Иегова жалуисардя лэ манушэн анда Ниневия. О Дэл ԥэндя лэ Ионасти: «Мэ ӷанав пала лэндири найлащи дила». Но кала вонэ каисайлэ, о Иегова сыкадя каринг лэндэ пэско лашымос и простисардя лэн. О Дэл сыкадя, кай лэстири жалость каринг и мануша, пэ бутэстэ май бари чем кай о Иона. Кала о Иона росхоляйля, лэ Дэвлэсти прижыляпэ тэ ԥэнэн лэсти упалэ, кай и мануша анда Ниневия нэ моӷли тэ полэн, «со лашо, ай со най» (Иона 1:1, 2; 3:10; 4:9—11). Ӷэт май интя о Исусо росԥэндя пала Иона, кай тэ сыкавэл, пэ скати дэ справедливо о Иегова и сар дэ фартэ во жалуий лэ манушэн. О Исусо ԥэндя, кай и мануша анда Ниневия, савэ каисайлэ, ринапэ каринг и жызня «кала авэла о сындо» (Матф. 12:41).

14. Со авэла лэ манушэнца анда Ниневия, савэ ринапэ каринг и жызня и «тердёна англа сындо»?

¹⁴ Андэ саво сындо жундёна и мануша анда Ниневия? О Исусо сытярэлас, кай авэна мануша, савэ «тердёна англа сындо» (Иоан. 5:29). Во ԥэнэнас пала пэстири Тысячелетнё правления, кала «жундёна кодэла, ко терэлас правильно и ко терэлас нэправильно» (Дила 24:15). И мануша, савэ андярэнас пэс нэправильно, «тердёна англа сындо». Када сыкавэл, кай о Иегова и о Исусо лэна тэ диқэн, сар вонэ пэс андярэн и сар вонэ прилэн кода, сости сытён. Если варисаво мануш анда Ниневия, саво рисайля каринг и жызня, отԥэндёла тэ тэлёл лэ Иеговасти, во на домэкэла лэсти тэ жувэл дальшэ (Ис. 65:20). Всаворэ, ко закамэна вмести амэнца тэ тэлён лэ Иеговасти кадя, сар во камэл, получина и вечно жызня! (Дан. 12:2).

15. а) Васо нащи тэ ԥэнас, кай нико анда мануша, савэ сас умардэ андэ Садомо и Гамора, на рияпэ каринг и жызня? б) Сар тэ полас и алава, савэ запистромэ андэ Иуда 7? (Диқэн и рамка «Пала со дэлас дума о Иуда?».)

¹⁵ О Исусо ԥэндя, кай лэ манушэнди анда Садомо и Гамора «андэ лэ Сындоско дес» авэла май вушэро, чем кодэлэнди, ко отшутя лэс и кода, сости во сытярэлас (Матф. 10:14, 15; 11:23, 24; Лука 10:12). Со о Исусо камля кадэлэса тэ ԥэнэн? Можэт, во призындярдя примеро, кай тэ сыкавэл, кай и мануша андэ лэстири время андярэнас пэс май хужэ, чем и мануша анда Садомо и Гамора? Най, амэ полас, кай када сас най кадя. Кала о Исусо ԥэндя пала ниневитяноря, савэ жундёна «кала авэла о сындо», во на призындярдя варисаво примеро, ай ԥэндя пала кода, со авэла. «Лэ Сындоско дес» и время, «кала авэла о сындо», пала сави ԥэнэнас о Исусо, када ек время. Важ када, пэскати амэ полас, кала о Исусо дэлас дума пала мануша анда Садомо и Гамора, во тожэ ԥэнэнас пала кода, со авэла, ай най просто призындярэлас примеро. Кадя жэ сар и мануша анда Садомо и Гамора, и ниневитяноря андярэнас пэс фартэ вэрыто. Но кай и мануша анда Ниневия сас возможность тэ каинпэ. Кадяжэ погиндосараса, кай о Исусо ԥэнэнас пала кодэла, ко ринапэ каринг и жызня и «тердёна англа сындо». Ко кадэла мануша? Када «кодэла, ко терэлас найлашымос» (Иоан. 5:29). Важ када амэ гиндосарас, кай лэ манушэндэ анда Садомо и Гамора исин надия. Возможно, дэсавэ андар лэндэ лэна тэ жувэн упалэ. И амэ сможэм тэ сытярас лэн лэ чачимасти пала Иегова и пала Исус Христос.

16. Со амэ ӷанас пала кода, сар о Иегова лэла ришать, кас тэ рий каринг и жызня? (Иеремия 17:10).

¹⁶ Проадинон Иеремия 17:10. Кадэва стихо инке еқвар доԥэнэн амэнди кода, со амэ точно ӷанас: о Иегова вся и время диқэл оди и розуӷанэн и гиндоря. Кала во лэла тэ ришает, кас тэ рий каринг и жызня, во лэла справедливо тэ сындой кажнонэ манушэс. О Иегова авэла састо, кала када трэбуй, и жалуия анда оди всегда, кала авэла возможность. Важ када амэнди на трэбуй тэ гиндосарас, кай варисаво мануш на авэла рисардо каринг и жызня, если андэ Библия пала када ворта на ԥэнэнпэ.

«СЫНДОМАРИ ВСАВОРЯ ԤУВЬЯКО» ВСЕГДА АНДЯРЭЛ ПЭС СПРАВЕДЛИВО

17. Со авэла лэ манушэнца, савэ мулинэ?

¹⁷ Кодэла времятар сар о Сатана, о Адамо и Ева жылэ против о Иегова, мулинэ ужэ милиарды мануша. Смэрть — када амаро баро вороӷо. Через латэ на ашэля бутэ манушэн (1 Кр. 15:26). Со лэн аштярэл? 144000 лэ Исусостирэ ученикоря авэна рисардэ каринг и бисмертно жызня по нэбо (Тайна 14:1). Ай бут мурша и жувля, савэ кандэнас лэ Иеговас, ринапэ каринг и жызня пэ ԥув. Када авэла андэ Тысячелетнё лэ Христостири правления, кала «жундёна кодэла, ко терэлас правильно». И если вонэ виритярэна и послиднё проверка и на парашэна тэ ритярэн лэ Дэвлэско законо, тоди вонэ лэна тэ жувэн пэ ԥув вечно (Дан. 12:13; Евр. 12:1). Кадяжэ, кала авэла Тысячелетнё правления, ринапэ каринг и жызня кодэла, ко «терэлас нэправильно». Када кодэла мануша, савэ никала на служынас лэ Иеговасти, и дажэ кодэла, ко терэнас найлашымос. Лэндэ авэла возможность тэ парудёнпэ и тэ ашэн лэ Иеговастирэ манушэнца (Лука 23:42, 43). Но дэсавэ мануша екжэнэ витидэ тэ жан против о Иегова. Важ када во на рия лэн каринг и жызня (Лука 12:4, 5).

18, 19. а) О Иегова сар сындомари, прилэла справедливо ришэния пала кажно, ко муля. Васо амэ андэ када патяс? (Исайя 55:8, 9). б) Со амэ роздиқаса андэ авэр статья?

¹⁸ Можэм амэ тэ патяс, кай кала о Иегова лэла тэ сындой, во вся и время андярэла пэс правильно? Да! О Авраамо поля па пэстири жызня, кай о Иегова, идиально «Сындомари всаворя ԥувьяко», лэстэ бари мудрость и во жалуий анда оди. О Дэл сытярдя пэстирэ Шавэс и дя лэсти вся о право тэ андярэл о сындо (Иоан. 5:22). Лэ манушэндирэ одя сар пэ палматэ кай о Иегова и кай о Исусо (Матф. 9:4). Важ када, кала вонэ лэна тэ сындон кажнонэ манушэс, вонэ терэна када справедливо.

¹⁹ Давайте вся и время тэ патяс лэ Иеговасти. Во всегда прилэл правильни ришэнии! Амэ полас, кай амэнди на прижал тэ авас сындомаря, када прижал кати лэ Иеговасти. (Проадинон Исайя 55:8, 9.) Важ када амэ отдас вся о сындо андэ вас лэсти и лэстирэ Шавэсти лэ Исусости. Во Царё, саво кадя жэ сар лэско Дад, справедливо и жалуий анда оди (Ис. 11:3, 4). Ай со можно тэ ԥэнас пала кода, сар о Иегова и лэско Шаво лэна тэ сындон лэ манушэн, кала авэла и бари бида? Со амэ на ӷанас, ай со ӷанас? Ответоря пэ кадэла вопросоря амэ роздиқаса андэ авэр статья.