На мэк и дар андэ пэско ди — надеисав по Иегова

1. Васо амэ дэкала дарас?

ВСАВОРЭН амэн дэкала лэл и дар. Но блаӷодаря кодэлэсти, кай амэ изучаем и Библия, амэ на дарас лэ мулэндар и лэ бэнгэндар. Амэ на дарас кодэлэстар, со можэт тэ терэлпэ андэ люма. Амэ жувас андэ фартэ ԥари время. Андэр латэ терэлпэ бут «страшнимос» (Луки 21:11). Исин опасни, жэстоки мануша, войны и мэримос лэ насвалимастар. Кадяжэ амэ можэм тэ дарас, кай пар мэндэ лэла тэ тасавэл о правительство андэ страна или о родо холявэла через амари вера. Дэсавэ пэрэжывают, кай на виритярэна кацаво ԥаримос, саво терэлпэ акана или саво можэт тэ авэл англэ.

2. Сави ситуацыя сас кай о Давидо, кала во авеля андо форо Гато?

² О Давидо тожэ дэкала даралас. Например, кала пала лэстэ ӷонияспэ о царё Сауло, во закамля тэ унашэл андо форо Гато, кай жувэнас и филистимляноря. Ӷэт май интя о Ахишо, саво сас царё андэ кодэва форо, уӷангля, кай о Давидо — када кодэва фартэ опасно халавдо, пала саво и израильтяноря пистросардэ и дили. Андэр латэ ԥэнэнаспэ, кай о Давидо умардя най ек тысяча филистимлянонэн. О Давидо «ля фартэ тэ дарал» (1 Сам. 21:10—12). Во пэрэжывал, кай о Ахишо закамэла тэ умарэл лэс. Со поможысардя лэ Давидости тэ на мэкэл и дар андо ди?

3. Со поможысардя лэ Давидости тэ улэл пэстири дар? (Псалом 56:1—3, 11).

³ Андо 56 Псалом о Давидо росԥэнэн, со лэстэ сас по ди, кала во сас андо форо Гато. Андэ кадэва Псалом во росԥэнэн, васо во дарал и сар лэстэ вижыля када тэ улэл. Кала лэсти сас страшно, во надеияспэ по Иегова. (Проадинон Псалом 56:1—3, 11.) И када сас най евья. О Иегова поможысардя лэ Давидости тэ стерэл варисо нэобычно — тэ притерэлпэ дилорэса! О Ахишо будэр лэстар на даралас и приԥэндя, кай лэс май ӥто тэ видаравэн. Кадя лэ Давидостэ вижыля тэ унашэл (1 Сам. 21:13—22:1).

4. Сар амэ можэм май фартэ тэ патяс лэ Иеговасти? Росԥэнэн примеро.

⁴ Если амэ патяс лэ Иеговасти, када поможыя амэнди тоди, кала амэ дарас. Сар тэ сытювас инке май фартэ тэ надеисавас по Иегова? Роздиқаса кацаво примеро. О мануш фартэ занасвайля. Спэрва кадэя новость лэс даравэл. Но акэ во уӷанэн, кай лэс лэла тэ личий фартэ лашо врачо. О врачо драго ӷанэн, сар личийпэ кадэва насвалимос, и во ужэ поможысардя бутэ манушэнди. Инке кадэва мануш диқэл, кай о врачо анда вся оди шол сама лэс и драго виашунэл. Во диқэл, кай о врачо па чачимастэ лэс полэл. Кала во росԥэнэн, сар лэла тэ личий, о мануш полэл, кай пэр лэстэ можно тэ надеийпэ и лэсти най состар тэ дарал. Кадяжэ амэ камас анда вся оди тэ патяс лэ Иеговасти. Важ када амэнди трэбуй тэ погиндосарас пала кода, со о Иегова ужэ стердя, со во терэл акана и со во камэл тэ стерэл англэ. Имено кадя терэлас о Давидо. Давайте роздиқаса, со во пистросардя андо 56 Псалом, и погиндосараса, сар амэ тожэ можэм май фартэ тэ патяс лэ Иеговасти и тэ на мэкас и дар андэ пэско ди.

СО О ИЕГОВА УЖЭ СТЕРДЯ?

5. Пала со гиндояс о Давидо, кай тэ улэл пэстири дар? (Псалом 56:12, 13).

⁵ Кала андэ жызня кай о Давидо сас опасность, во май бут шолас сама пэ кода, со о Иегова ужэ стердя. (Проадинон Псалом 56:12, 13.) Во присытеля вся и время тэ гиндой пала Дэл. Например, о Давидо гиндояс пала кода, со о Дэл создал. Када поможыяс лэсти тэ сэрэл, кай лэ Иеговастэ исин баро зор и кай во фартэ любий лэ манушэн (Пс. 65:6—9). Кадяжэ о Давидо гиндояс, сар о Дэл обжалпэ всаворэ́ пэстирэ служытелёнэнца анда вся оди (Пс. 31:19; 37:25, 26). Лэс лэлас лэ одестар, кай о Иегова заботийпэ лично пала лэстэ. О Дэл подритярэлас и фэрияс лэс жы бэятостар (Пс. 22:9, 10). Драго дицол, кай кала о Давидо гиндояс пала када, во лэлас май фартэ тэ патял лэ Иеговасти!

6. Со поможыя тэ надеисавас по Иегова, кала амэ дарас?

⁶ Кала ту дарас, пуш пэстар: «Со о Иегова ужэ стердя?» Погиндосар пала кода, со во создал. Например, дик пэ птицы и цвиторя. О Иегова заботийпэ пала лэндэ, хоть во на стердя лэн пар пэстэ и вонэ нэ моӷут тэ служын лэсти. Если во кадя драго диқэл пала лэндэ, во, канешно, позаботияпэ и пала тутэ (Матф. 6:25—32). Кацавэ гиндоря поможына май фартэ тэ патяс лэ Иеговасти. Погиндосар кадяжэ пала кода, сар во подритярэл пэстирэ служытелёнэн. Ту можэш май бут тэ уӷанэс пала кадэла мурша и жувля, савэ жувэнас андэ дэлмутни или андэ амари времяa. Кадяжэ на бистэр, со о Иегова стердя лично важ тутэ. Сар во пашардя тут каринг пэстэ? (Иоан. 6:44). Сар во дэлас атветоря пэ тирэ молитвы? (1 Иоан. 5:14). И сар через кода, кай о Иисусо отдя пэстири жызня, ту можэш тэ радуиспэ кажно дес и тэ ӷанэс, васо жувэс? (Эф. 1:7; Евр. 4:14—16).

7. Сар и Ванеса сытеля кай о Даниило тэ улэл и дар?

⁷ Кай амари ԥэй Ванесаb анда Гаити сас ԥари ситуацыя. Ек мурш, саво жувэлас найдур, долэласпэ латэ: во звонияс лати кажно дес и бишалэлас найлашэ сообщении. И Ванеса ворта лэсти ԥэндя, кай машкар лэндэ нисо нэ можэт тэ авэл. Но через када во ашэля май холинако и инке май фартэ ля тэ долэлпэ каринг латэ. Ай инке во дажэ ля тэ даравэл ла. И Ванеса ԥэнэн: «Мэ сымас пэрэдаради». Сар и ԥэй уля пэстар и дар? Вой стердя вся, кай тэ фэрий пэс. Ек барэдэр ԥрал анда собрания поможысардя лати тэ обратийпэ андэ ваздии. Кадяжэ вой гиндояс пала кода, сар о Иегова зашоласпэ пала пэстирэ верни служытеля андэ дэлмутни время. Вой ԥэнэн: «Пэрво, пала кастэ мэ погиндосардэм, када сас о пророко Даниило. Во на сас дошало ни андэр со, ай лэс шутэ андэ яма кай и боқалэ леворя. Дажэ андэ кодэя ситуацыя о Иегова позаботисайля пала лэстэ. Мэ тожэ манглэм лэ Иеговас, кай во тэ лэл кадэя дила андэ пэстирэ вас. Посли када мэ ужэ най кадя фартэ даравас» (Дан. 6:12—22).

СО О ИЕГОВА ТЕРЭЛ АКАНА?

8. Андэр со патялас о Давидо? (Псалом 56:8).

⁸ Хоть андо Гато лэ Давидос моӷли тэ умарэн, во на домэкля, кай и дар тэ лэл понад лэстэ о вэрхо. Вместо када во шутя май бут сама пэ кода, сар о Иегова фэрий лэс имено акана. Во диқэлас, кай о Иегова андярэл лэс, фэрий и полэл, со лэстэ по ди. (Проадинон Псалом 56:8.) Кай о Давидо кадяжэ сас друӷоря, савэ лэс на ашавэнас. Кацавэ сар о Ионафано и о ӷлавно рашай о Ахимелехо. Вонэ подритярэнас лэс и заботинаспэ пала лэстэ (1 Сам. 20:41, 42; 21:6, 8, 9). И хоть о царё Сауло камэлас тэ умарэл лэ Давидос, лэстэ вижыля тэ фэрийпэ. Вся када поможыяс лэсти тэ патял, кай о Иегова фартэ драго ӷанэн, со во пэрэжувэл и сар лэсти дэ ԥарэс по ди.

9. Со о Иегова ӷанэн пала кажно андар мэндэ?

⁹ Кадяжэ и амэнца. Кала исин ԥаримос, через саво появийпэ и дар, о Иегова шол сама най кати по ԥаримос, но и пэ кода, со кай о мануш андо ди. Например, о Иегова диқэлас, сар жэстоко обжанаспэ лэ израильтянонэнца андо Египто, и полэлас, сар лэнди сас ԥарэс (Исх. 3:7). О Давидо сас уверено, кай о Иегова ӷанэнас, саво лэстэ ԥаримос и сар лэсти дэ ԥарэс (Пс. 31:7). Дажэ кала через пэстирэ ошыбки лэ Дэвлэско народо попэрэлас андэ бида, «лэсти ашэлас ԥарэс» (Ис. 63:9). Кала тумэ пэрэдарадэ, о Иегова полэл, со тумэндэ по ди и камэл тэ поможый тумэнди тэ улэн и дар.

10. Васо ту патяс, кай о Иегова заботийпэ пала тутэ и поможыя тэ виритярэс любо ԥаримос?

¹⁰ Кала амэндэ исин барэ проблемы через и дар, амэ можэм тэ на диқас, сар о Иегова заботийпэ пала амэндэ. Со тоди тэ терас? Мангэн, кай о Дэл тэ поможый тумэнди тэ додиқэн, сар во тумэн подритярэл (2 Цар. 6:15—17). Можэт, тумэн подритярдя и речь или каминтариё пэ собрания? Или тумэнди придя зор варисави статья, видео или дили пэ амаро сайто? Ай можэт, варико сыкадя библейско стихо или росԥэндя о гиндо, через саво тумари вера ашэля май састи? Кала амэнди дэн зор и ԥрала и ԥэя андэ собрания, ай кадяжэ и Библия, дэкала амэ можэм тэ гиндосарас, кай кабута кадя и трэбуй тэ авэл. Но па чачимастэ када кучутнэ подаркоря лэ Иеговастар (Ис. 65:13; Мар. 10:29, 30). Вонэ доԥэнэн, кай о Иегова любий амэн и пэр лэстэ вся и время можно тэ надеиспэ (Ис. 49:14—16).

11. Со поможысардя ла Айдати тэ улэл пэстири дар?

¹¹ И А́йда, сави жувэл андо Сенегало, старыияспэ тэ шол сама, сар о Иегова подритярэл ла андэ ԥари время. Кадя сар вой барэдэр бэята андо ери, и родителя аштярэнас латар, кай вой лэла лэн тэ проправарэл. Но и Айда камэлас тэ служый пианероса. Вой ля май набут тэ терэл бути, и важ када ля тэ затерэл май набут ловэ. Латирэ чаче сас пэр латэ холинатирэ и дошалярэнас ла. Вой ԥэнэн: «Мэ фартэ пэрэжывала, кай мандэ на авэла зор тэ заботисавав пала родителя и вся о ери одбандёла мандар. Мэ дажэ лэм тэ дошалярав лэ Иеговас, кай вся зажыля кадя дэ дур». Тоди вой ашундя и речь пэ собрания. И Айда ԥэнэн: «О ԥрал шутя сама пэ ек гиндо, кай, со бы тэ на пусавэл амаро ди, о Иегова полэл амари дук. И барэдэр ԥрала и друӷоря ԥэнэнас манди, кай о Иегова ман любий. И кадя понабут мэ лэм май фартэ лэсти тэ патяв. Кала мэ мангаваспэ, мэ ӷанавас, кай во манди поможыя. Кала мэ диқавас, сар о Иегова дэл атвето пэ мэрни молитва, мандэ по ди сас фартэ спокойно». Прожыля время, и Айда виарақля бути, сави поможысардя лати най кати тэ авэл пианеро, но и лэ ловэнца тэ подритярэл пэстирэ родителёнэн. Вой ԥэнэн: «Мэ сытелэм всаворэ одеса тэ надеисавав по Иегова. Акана, сар кати мэ мангавпэ, мэрни дар сразу ужал».

СО О ИЕГОВА СТЕРЭЛА АНГЛЭ?

12. Андэр со патялас о Давидо, сар ԥэнэнпэ андо Псалом 56:9?

¹² Проадинон Псалом 56:9. Андэ кадэва стихо амэ диқас, со инке поможыяс лэ Давидости тэ улэл пэстири дар. Хоть лэс вся кадяжэ инке моӷли тэ умарэн, во гиндояс пала кода, со о Иегова стерэла важ лэстэ англэ. О Давидо ӷанэнас, кай андэ время, сави трэбуй, о Иегова зашолапэ пала лэстэ и спасыя лэс, важ кода кай о Дэл ужэ ԥэндя, кай во авэла царё андо Израилё (1 Сам. 16:1, 13). О Давидо патялас: кода, пала со о Иегова дя алав, точно авэла.

13. Со о Иегова стерэла важ амэндэ англэ?

¹³ Со о Иегова обещяет тэ стерэл важ кажно андар мэндэ? Амэ на аштярас, кай во амэн лэла тэ фэрий всаворэ́ ԥаримастарc. Но амэ ӷанас, кай люби проблемы, савэнца амэнди прижалпэ тэ борисавас адес, о Иегова улэла андо раё пэ ԥув (Ис. 25:7—9). Кай амаро Создателё исин баро зор, кай тэ рий кодэлэн, кас нинай, тэ улэл о насвалимос, о ԥаримос па оди и всаворэ́ вороӷонэн (1 Иоан. 4:4).

14. Пала со амэ можэм тэ розмышляем?

¹⁴ Кала тут шол андэ дар, погиндосар пала кода, со о Иегова стерэла англэ. Прицтавь, сар дэ драго авэла тэ жувэс андэ люма, кай на авэла лэ Сатанас и найлашэ манушэн. Круӷом тутэ кати кодэла, ко любин и ритярэн лэ Дэвлэско законо. Кажно дес ту ашэс май пашэ каринг кода, кай тэ авэс идиально. По регионально канӷрэсо андо 2014 бэрш и ԥрала сыкадэ, сар о дад поможый пэстирэ ерести тэ розмышляет пала надежда, сави пистромэ андэ Библия. Вонэ дэнас дума, сар авелоп пистромэ и алава анда 2 Тимофею 3:1—5, если пэ ԥув тэ авэл о раё: «Андо раё пэ ԥув авэла фартэ бахтали жызня. И мануша любина най кати пэс, лэна тэ любин лэ Дэвлэско чачимос, авэна сэжи, лэндэ авэла ковло ди, вонэ лэна тэ славин лэ Дэвлэс, тэ кандэн лэ родителёнэн, тэ авэн блаӷодарни, на придэна, лэна тэ любин аврэн, тэ ладин андэ дума, кадяжэ лэна драго тэ дэн дума пала авэр, тэ ритярэн пэс андэ вас, на авэна жэстоки, лэна тэ любин лашымос, авэна надёжни, лэна тэ уступин ек еқэсти, на авэна ӷорди, лэна тэ любин лэ Дэвлэс май фартэ, чем и развличении, всаворэ́ одеса лэна тэ стон патив по Дэл. Кацавэ манушэнца дружысар». Ай тумэ дэн дума андо ери или лэ друӷонэнца пала кода, сави жызня авэла андо раё пэ ԥув?

15. Со поможысардя ла Таняти тэ на ашавэл лэ Иеговас, хоть вой и даралас?

¹⁵ Роздиқаса, со сас андэ жызня кай и ԥэй Таня анда северно Македония. Кала вой ля тэ изучает и Библия, пэр латэ линэ фартэ тэ тасавэн и родителя. Но вой гиндояс пала кода, со о Иегова стерэла важ латэ англэ, и када поможысардя лати тэ на мэкэл и дар андэ пэско ди. Вой ԥэнэн: «Дэсо анда кода, состар мэ даравас, кадя и тердяпэ. И мама марэлас ман посли кажно собрания. И родителя дажэ ԥэнэнас, кай умарэна ман, если мэ ашава лэ Иеговаско свидетелё». Прожыля время, и ла Таня видарадэ анда цэр. Сар вой диқля пэ вся када? Вой росԥэнэн: «Мэ шутэм май бут сама пэ кода, сави мандэ авэла бахтали вечно жызня, если мэ на ашавава лэ Иеговас. Кадяжэ мэ гиндосаравас: дажэ если мэ варисо хасарава щяс, о Иегова рия манди пэбутэстэ май бут андо раё пэ ԥув, ай вся о найлашымос бистэрдёлапэ». И Таня на отԥэнделя лэ Иеговастар. Лэстирэ зорэса вой смоӷла тэ арақэл, ка́й тэ жувэл. Адес вой миростэ пала райкано ԥрал, лэндэ бахтало ери, и вонэ вмести служын лэ Иеговасти полновремено.

ТЕРЭН ВСЯ, КАЙ МАЙ ФАРТЭ ТЭ ПАТЯН ЛЭ ИЕГОВАСТИ

16. Со поможыя амэнди тэ ашаспэ смили, кала лэна тэ исполнинпэ и алава анда Луки 21:26—28?

¹⁶ Кала авэла и бари бида, «и мануша лэна кадя тэ даран... кай дажэ лэна тэ хасарэн и сознания». Но лэ Дэвлэстирэ служытеля ашэнапэ састэ и смили. (Проадинон Луки 21:26—28.) Васо амэ на домэкаса, кай и дар тэ зажал андо ди? Важ кода кай ласа тэ надеисавас по Иегова. И Таня, пала сави ԥэнэнаспэ май упрэ андэ статья, росԥэнэн, кай кода, со сас латэ андэ жызня, поможый тэ виритярэл нэвэ трудности. Акэ латирэ алава: «Мэ па пэстири жызня полэм, кай нинай кацаво ԥаримос, саво авелоп най па лэ Иеговаско зор. Любо найлашымос андэ амари жызня во можэт тэ пэрэбандярэл андо лашымос». Инке вой ԥэнэн: «Дэкала здэлпэ, кай тиря жызняса хулаин авэр мануша. Но када най кадя — о Иегова май зорало, чем любо мануш. Дажэ о баро ԥаримос варикала точно прожала».

17. Сар амэнди поможына и алава анда ӷодово тексто по 2024 бэрш? (Диқэн и картинка пэ обложка.)

¹⁷ Адес исин бут, со амэн можэт тэ даравэл. Но кадя, сар и о Давидо, амэ можэм тэ на домэкас, кай и дар тэ заԥандэл амэнди и вас. По 2024 бэрш сас витидо о стихо, кай пистромэ лэ Давидостирэ алава, савэ во ԥэндя лэ Иеговасти: «Кала мэ дарав, мэ надеисавав пэр тутэ» (Пс. 56:3). Андэ ек справочнико пала кадэва стихо ԥэнэнпэ кадя: «О Давидо отшолас и гиндоря, савэ моӷли тэ зашон андэр лэстэ и дар. Вместо кода, кай тэ шол сама пэ пэстирэ проблемы, во надеияспэ по Иегова, пэ пэско Спасителё, саво лэс обязательно фэрия». Мэк и алава анда кадэва стихо подритярэн тут вся о бэрш. Сэр пала лэстэ особено тоди, кала исин дар. Витидэ время, кай тэ гиндос пала кода, со о Иегова ужэ стердя, со во терэл акана и со во стерэла англэ. Тоди ту, кадя жэ сар и о Давидо, сможэш тэ ԥэнэс: «Лэ Дэвлэсти мэ патяв, нисостар на дарав» (Пс. 56:4).