Referințea anda o Caieto anda i întrunirea „Amari viața sar creștini hai i predicarea”
© 2025 Watch Tower Bible and Tract Society of Pennsylvania
7-13 IULIA
SUMNACAI ANDA O LIL LE DEVLESCO PROVERBE 21
Dumes goghiaver le Iehovastar cai ajutin tut te avel tut iech familia fericime
w03 15/10-M 4 ¶5
Sar te cheras lașe alosarimata?
Le alosarimata cai cheras-len cana sighiaras daștin te na aven lașe. Andel Proverbe 21:5 phenel-pe: „Le planuri codolesche vreanico, îngăren ciaces co miștimos, tha sea codola cai sighiaren, arăsăn ciaces ciore.” Sar exemplo, le tărne cai astaren te meren zurales pala varecaste ci trebun te sighiaren te căsătorin-pe. Dacă cheren cadea, daștin te dichen pe penghi morci chichi de ciace sile le dumes cai phendea-len o William Congreve: „Codola cai căsătorin-pe sigo, va fala-len pharo.”
g 7/08-M 7 ¶2
Sar daștin te avel tumen iech familia fericime
Aven umilo. „Na cheren chanci anda iech spirito cai cherel te han tumen sau te aven puchiarde barimastar, tha pherde umilința dichen le coaveren că sile mai bare tumendar.” (Filipeni 2:3) But nehachiarimata aven cana o rrom hai i rromni sile phuchiarde. Hai cana silen iech pharimos von doșaren-pe iech averes ando than te den penghi zor te aven umilo caște na duchaven-pe. I umilința va ajutila tumen te na roden tumaro ciacimos.
w06 15/9-M 28 ¶13
„Bucurisar tut la rromniasa che tărnimaschi”
13 So întâmplol-pe dacă le pharimata cai si tumen andi familia aven anda sar phiraven tumen iech averesa? Trebul te den tumari zor dacă camen te lașiaren cadaia. Daștil-pe că san sicade te phenen iech averesche dumes cai duchaven (Proverbe 12:18). Cadea sar dichleam ando articolo cai nachlea, cadaia daștil te anel bare pharimata. Ande iech verseto phenel-pe: „Mai mișto te beșes ando șuco than sar iecha rromniasa cai hal-pe sea o timpo hai cai holiarel-pe” (Proverbe 21:19). Iech rromni cai dichel că mașcar late hai laco rrom si cado pharimos daștilas te pușel-pe: „Prin sar phiravav man si mânre rromesche pharo te beșel manța? I Biblia phenel le rromenghe: „Iubin vi mai dur tumare rromnian hai na șioren tumari holi pe lende” (Coloseni 3:19). Iech rrom daștilas te pușel-pe: Daștilas mânro șudro phiraimos te cherel mânra rromnia te rodel iubirea ande aver than? Si ciaces, na-i niciech motivo cai te del ciacimos varecas te cherel buchia sexualo melale. Tha, cana dichas le pericolea hachiaras vi mai mișto chichi de importanto si te das duma claro anda orisavo nehachiarimos.
Cuci bara anda o lil le Devlesco
w05 15/1-M 17 ¶9
Buchia anda o Regato cai aghies pheren-pe
9 O Isus ci mai avel opre pe iech măgarii, anda codoia că vo aghies si iech Rege zuralo. Anda leste citisaras că jial opre po iech grast, cai andi Biblia si iech simbolo anda o războio (Proverbe 21:31). Andi Revelația 6:2 phenel-pe: „Dichta: iech parno grast! Codoles cai beșelas pe leste sas-les iech arco. Sas lesche dini iech coroana hai dea anglal sar iech victorioso caște îngărel ji co sfârșito peschi victoria.” Mai but, o David phendea anda o Isus: „O Iehova va îngărela mai dur chio zuralimos anda o Siono hai va phenela: „Jia te rais ando mașcar che dușmanengo”. (Psalmo 110:2)
14-20 IULIA
SUMNACAI ANDA O LIL LE DEVLESCO PROVERBE 22
Goghiaver dumes le Iehovastar cai ajutin amen te bariaras amare șiavorren
w20.10-M 27 ¶7
Va slujina le Devlesche tumare șiave cana va bariona?
7 Dacă san căsătorime camen te avel tumen șiavorre? Dacă da, pușen tumen: „Sam manușa umilo hai zurale ando pachiamos cai o Iehova avelas te del ande amare vasta iech cuci viața?”. (Ps. 127:3, 4) Dacă si tumen șiave daștinas te pușen tumen: „Sicavas amare șiaven chichi de importanto si i phari buchi?”. (Ecl. 3:12, 13) „Cheras sea so daisaras caște ferisaras-len la lumeatar le Satanoschi?” (Prov. 22:3) Si pharo te ferisaras-len sea le buchiandar. Tha, țâra po țâra hai pherde iubirea daștin te ajutin-len te hachiaren că cana va nachena prin pharimata trebun te roden ajutorii ando Lil le Devlesco. (Citisar Proverbe 2:1-6.) Sar exemplo, dacă iech jeno andai familia mechel o ciacimos, ajutin tumare șiaven te sichion anda o Lil le Delvesco sostar si importanto te așen loialo le Iehovasche. (Ps. 31:23) Sau, cana merel tumenghe varecon drago, sicaven le șiavenghe versetea andai Biblia cai daștin te zuriaren-len hai te den-len pacea ando ilo. (2 Cor. 1:3, 4; 2 Tim. 3:16)
w19.12 26-M ¶17-19
Dadale hai deiale, sicaven tumare șiaven te iubin le Iehovas
17 Sicaven penghe șiavorren de cana sile zurales țâne. Cana o dad hai i dei sicaven penghe șiavorren mai sigo si vi mai mișto anda lende. (Prov. 22:6) Te gândisaras amen co Timotei, cai arăslea te phirel le apostolosa Pavel. I dei le Timoteioschi, i Eunice hai leschi mami, i Lois, sicadeles de încă de „țâno șiavo”. (2 Tim. 1:5; 3:15)
18 Iech aver dad hai dei anda Côte d’Ivoire cai bușion Jean-Claude hai Peace, ajutisarde penghe șiov șiavorren te iubin le Iehovas hai te camen te slujin lesche. So ajutisardea-len te cheren cadaia? Von line-pe pala o exemplo cai mechle-les amenghe i Eunice hai i Lois. Von phenen: „Astardeam te șioas ando ilo amare șiavengo o Lil le Devlesco, încă de cana sas-le țâne șiavorre”. (Deut. 6:6, 7)
19 Sar daștil iech dad hai iech dei te șiol ando ilo penghe șiavengo o Lil le Devlesco? I duma „te șiol” însemnol ca vareso te așel andi goghi varecaschi. Caște cheren cadaia, i dei hai o dad trebun te cheren penghe timpo te beșen penghe șiavorrența ande fiesavo ghies. Poiechdata, daștil-pe că le daden ci ciaiol-len te phenen sa codol buchia mai butivar. Tha cadea o dad hai i dei daștin te ajutin penghe șiaven te hachiaren o Lil le Devlesco hai te cheren so sichion.
w06 1/4-M 9 ¶4
Dadale hai deiale, aven iech lașio exemplo anda tumare șiavorre!
Jianas că, le șiavorre sile șiavorre, hai butivar ci camen te așunen penghe dadestar hai deiatar (Geneza 8:21). So daștin te cheren le dada hai le deia? Andi Biblia phenel-pe: „Ando ilo le șiavesco si dilimos, tha i rovli cai ortosarel va duriarela-les lestar” (Proverbe 22:15). Anda chichiva, cadai buchi si prea nasul hai purani. Tha i Biblia ci dichel mișto o marimos hai o abuzo, adică le buchia jiungale cărde zorasa ieche șiavorresche. Chiar cana poiechdata „i rovli” referil-pe ca i autoritatea cai si le dades hai la deia, von trebun te cheren cadaia iubireasa, ca lenghe șiave te hachiaren că lengo dad hai lenghi dei roden sea o timpo lengo miștimos. (Evrei 12:7–11)
21-27 IULIA
SUMNACAI ANDA O LIL LE DEVLESCO PROVERBE 23
Dumes goghiaver le Iehovastar anda o pimos
w04 1/12-M 19 ¶5, 6
Te dichas cadea sar trebul o pimos
5 Tha so întâmplol-pe varecasa cai piel pimos tha lel sama te na fal-pe că silo mato? Pe chichiva manușa cai pile but ci dichiol-pe că sile mate. Tha, codo cai pachial că o pimos ci cherel lesche chanci hohavel-pe corcoro (Ieremia 17:9). Țâra po țâra o manuș daștil te arăsel te na mai daștil te beșel bi pimasco hai te avel ‘astardo sar sclavo catar i but mol’ (Tit 2:3). Dichen so dumes phendea iech jiuvli goghiaver anda varecaste cai ci mai daștil te așel bi pimasco: „Varecon arăsel machiardo țâra po țâra bi te del peschi sama” (Drinking: A Love Story, de Caroline Knapp). Si ciacies, o but pimos daștil te șiol amen andi phuv!
6 O Isus phendea: „Len sama pe tumende te na pharion tumare ile bute habenesa hai bute pimasa hai le pharimatanța la viațache, hai codo ghies te avel bi te ajucăren tumen opral tumende, sar iech athaimos. Anda codoia că va avela pe sea codola cai beșen pe sea i phuv” (Luca 21:34, 35). Chiar cana varecon ci arăsel te machiol, o pimos daștil te sovliarel-les hai te cherel-les chandino, vi fizico, tha vi spiritualo. So va întâmplola-pe dacă o ghies le Iehovasco va arachela-les cadea?
it-1-E 656
O machiarimos
Andi Biblia phenel-pe că si nasul. I Biblia phenel că si nasul cana pias ji cana machioas. O manuș goghiaver cai scriisardea o lil Proverbe phendea chichi de but nasulimos cherel o pimos: „Con rovarel-pe? Con îngrijoril-pe? Con hal-pe? Con rovel? Con si duchado anda chanceste? Cas siles lole iacha? Codolen cai beșen but timpo te pien mol, codolen cai phiren te roden mol hamisardi. Na dich ca i loli mol cai strălucil ando paharo, hai cai nachaves-la sigo, cai ji la urmă dandarel sar iech sap hai mechel pesco venino sar iech vipera, [daștil te anel nasfalimata (sar avelas, i ciroza hepatico), nasfalimata ca i goghi (delirium tremens) hai chiar merimos]. Che iacha va dichena buchia dilivane [o pimos daștil te cherel varecas te na mai gândil mișto; te dichel angla peste buchia cai nai-le ciace; ande leschi goghi si buchia cai ci întâmplosarde-pe, tha del duma anda lende sar cana sile ciace; na-i lesche lajiav anda so cherel] hai chio ilo va phenela buchia melale [o manuș phenel hai cherel buchia cai mai anglal ci cherelas-len]”. (Pr 23:29-33; Os 4:11; Mt 15:18, 19)
Anda o machiardo phenel-pe mai dur: „Va avela te aves sar iech manuș cai beșel ando mașcar la mareaco [sar varecon cai daral te na tasavel-pe ando pai hai ji la urmă te na mai jianel pestar], sar iech manuș cai beșel opre po catargo [opre po catargo simțol-pe o mai but sar mișchil-pe i barca; sa cadea o machiardo silo ando pericolo te merel, te cherel iech accidento, iech ataco cerebralo, te hal-pe varecasa sau aver buchia]. «Dine man dab, tha ci duchal man. Marde man, tha ci jianglem chanci [phenel o machiardo sar cana del duma corcoro pesa; vo ci jianelas pestar hai so bari duch anelas lesche cadaia]. Cana va avela te ușteav, caște mai piav vareso? [Acana trebul te sovel caște nachel lesche o machimos, tha anda codoia că o pimos si ande lesco rat abia ajucărel te uștel caște piel pale.]»” Vo va arăsela cioro, tha na anda codoia că hal le love po pimos, tha anda codoia că na-i iech manuș cai te încărel peschi duma hai na-i în stare te jial ca i buchi. (Pr 23:20, 21, 34, 35)
Cuci bara anda o lil le Devlesco
w04 1/11-M 31 ¶2
Pușimata catar amare cititori
Sar exemplo, i obezitatea na-i sea o timpo anda codoia că iech manuș hal ji cana ci mai jianel pestar. Iech manuș daștil te avel thulo anda codoia că siles iech nasfalimos sau țârdel-pe anda iech familia cai si cadea. Trebul te hachiaras că i obezitatea si iech nasfalimos cai thuliarel, hai i lăcomia si cana ande le manușeschi goghi si numai o haben. Ande iech dicționaro andi gajicani șib phenel-pe: „I obezitatea si cana varecon thuliol but anda codoia că chidel-pe ande lesco corpo prea but thulimos”. Tha, i lăcomia si cana varecon hal ji cana ci mai jianel pestar. Cadea că, ci daisaras te phenas că iech manuș silo cadea pala chichi de thulo silo, tha pala chichi de but hal hai pala sar dichel o haben. Iech manuș daștil te na avel thulo sau te avel slabo tha te hal ji cana ci mai jianel pestar. Mai but, ande iech than anda aver le manușa dichen diferime o thulimos.
28 IULIA–3 AUGUSTO
SUMNACAI ANDA O LIL LE DEVLESCO PROVERBE 24
Zuriar tut angla te aven tut phare ghiesa
it-2-E 610 ¶8
Le persecuții
Sa cadea, le creștini dichen caring o pochinimos cai va avela-len dacă ci mechen-pe. Anda cado pochinimos o Isus phendea: „Fericime sile codola prasade anda codoia că încăren co ciacimos, că lengo va avela o Regato le Devlesco!”. (Mt 5:10) Le creștini sile zuriarde anda codoia că jianen că le mule va avena uștiade pale viațate hai anda codoia că jianen castar avel cadai speranța. Cadaia del-len zuralimos hai ajutin-len te așen loialo le Devlesche chiar cana aver daraven-len că va mudarela-len. O baro pachiamos cai andea-les lenghe o merimos le Isusosco, cărdea-len te na mechen-pe darade codole murșendar jiungale. (Ev 2:14, 15) Caște așen loialo cana le coaver așenas lenghe contra, le creștini trebunas te gândin mișto le buchia. „Te avel tumen sa codoi gândirea sar le Cristososchi Isus cai. . . . așundea le Devlestar ji co merimos, da, iech merimos po stâlpo de tortură.” (Flp 2:5-8) „Anda i bucuria cai sas șiuti angla leste, [o Isus] suportisardea o stâlpo de tortură, ci sas lesche lajiav.” (Ev 12:2; dich vi 2Co 12:10; 2Te 1:4; 1Pe 2:21-23)
w09 15/12-M 18 ¶12,13
Te așias bucurime cana nachas prin pharimata
12 Andel Proverbe 24:10 phenel-pe: „Dacă meches tut perado ando ghies le necazosco, țâni va avela chi zor”. Aver verseto phenel: „Iech ilo voime cherel i fața te strălucil, tha i duch le ileschi phagărel o spirito” (Prov. 15:13). Chichiva phrala arăsen te aven cadea de perade, că ci mai citin andai Biblia hai ci mai gândin-pe ca so citisarde. Manghen-pe numai anda codoia că trebul hai așen dur le phralendar. Cadea că, dacă sam perade but timpo, cadaia daștil te cherel amenghe but nasulimos (Prov. 18:1, 14).
13 Cana sam perade si mișto te gândisaras amen ca le buchia cai anen amenghe bucuria hai ca le lașe buchia cai si amen ande amari viața. O David phendea: „Mânri plăcerea, o mânro Del, si te cherav so tu cames” (Ps. 40:8). Cana nachas prin phare ghiesa, te zuriaras vi mai dur amaro pachiamos! So daștil te vazdel amen cana sam perade si te citisaras ande fiesavo ghies anda o Lil le Devlesco hai te gândisaras amen leste (Ps. 1:1, 2; Iac. 1:25). Andi Biblia hai ca le întruniri arachas lașe dumes cai zuriaren amen hai cheren amen bucurime (Prov. 12:25; 16:24).
w20.12-M 15
Pușimata catar amare cititori
Andel Proverbe 24:16 phenel-pe: „Codo orta, chiar cana va perela efta var, va vazdela-pe”. Del-pe duma cade anda iech manuș cai păcătuil mai butivar, tha pala codoia si iertime le Devlestar?
O verseto ci camel te phenel cadaia. O verseto del duma anda iech manuș cai nachel prin pharimata mai butivar, tha de fiesavi data siles o zuralimos te vazdel-pe.
I duma „perel”, anda Proverbe 24:16, ci referil-pe ca iech păcato, tha ca sar nachel iech manuș prin mai but pharimata, iech pala aver. Ande cadai lumea nasul, ieche manușes orta daștilas te avel-les iech nasfalimos sau aver pharimata. O guverno chiar daștilas te așen lesche contra. Cu sea cadala, vo pachial-pe zurales ando Del că va avela pașa leste hai că va ajutila-les te nachel părdal orisavo pharimos. Na-i cadea că dichleam amare iachența sar o mai butivar le manușa le Iehovasche așen zurale andel pharimata? Sostar? I Biblia promitil amenghe că „O Iehova si pașa sea codola cai peren hai vazdel sea codolen cai sile șiute tele ca i phuv catar lenghe pharimata”. (Ps. 41:1-3; 145:14-19)
Cuci bara anda o lil le Devlesco
w09 15/10-M 12
Pușimata catar amare cititori
Andel ghiesa biblico, dacă iech murș camelas ‘te vazdel pesco chăr’, adică te lel pesche rromni, trebulas te pușel-pe: Som pregătime te lav sama mânra rromniatar hai le șiavorrendar cai daștinas te aven amen? Mai anglal te cherel pesche iech familia, vo trebulas te cherel buchi ca pesche phuvea hai te chidel i recolta. Andi Biblia Galaction hai Radu cado verseto silo cadea: „Cher chi buchi mișto avri po câmpo hai av vreanico pe chi phuv, pala codoia daștis te les tuche rromni hai te vazdes chio chăr”. Daisaras te las amen vi aghies pala cado verseto?
Da. Iech murș cai camel te lel pesche rromni trebul te pregătil-pe mișto anda cadai bari buchi. Dacă silo sastevesto, va trebula te cherel buchi. Si ciaces, iech murș trebul te cherel buchi caște lel sama pesca familiatar, tha trebul te cherel vi aver vareso. O Lil le Devlesco phenel că iech murș cai ci lel sama pesca familiatar, ci sicavel lache iubirea hai ci lel sama te zuriarel laco pachiamos silo mai nasul sar iech manuș bi pachiamasco! (1 Tim. 5:8) Cadea că, cana pregătil-pe te lel pesche rromni, iech murș trebulas te pușel-pe: Daștiv te încărav o chăr? Daștiv te avav o șăro la familiaco hai te zuriarav-la te bariarel pesco pachiamos? Va avela te daștiv te sichioav andai Biblia ande fiesavo curco mânra rromniasa hai le șiavorrența? O Lil le Devlesco sicavel chichi de importanto si ca iech murș te cherel cadal buchia (Deut. 6:6-8; Ef. 6:4).
Cadea că, cana iech murș camel te lel pesche rromni trebul te gândil-pe mișto ca o verseto anda Proverbe 24:27. Sa cadea, iech jiuvli daștil te pușel-pe dacă sili pregătime te avel rromni hai dei. Si mișto ca iech rrom hai leschi rromni te șion penghe pușimata sar cadala cana camen te cheren șiavorre (Luca 14:28). Cana len-pe pala cadal sfaturi, le Iehovasche manușa va dena penghi zor te așen dur le buchiandar cai anen duch hai va avela-len iech familia fericime.
4-10 AUGUSTO
SUMNACAI ANDA O LIL LE DEVLESCO PROVERBE 25
Dumes goghiaver le Iehovastar anda sar te das duma
w15 15/12-M 19 ¶6, 7
Le lașe dumes sile iech daro șucar
6 Le dumes anda Proverbe 25:11 sicaven că si importanto te alosaras mișto cana te das duma. Cade citisaras: „Sar le sumnacune phabaia andel coșulețea rupune, cadea si iech duma phendi co momento lașio.” Le sumnacune phabaia sile șucar; tha cana sile șiute andel coșulețea rupune, sile vi mai șucar. Sa cadea, cana alosaras o mai lașio momento te phenas vareso, amare dumes daștin te aven mai șucar hai zurale. Sar?
7 Le dumes cai phenas-len le manușesche daștin te aven so siles nevoia pe thaneste. Tha, cana ci alosaras o mai lașio momento te das duma, daștilas-pe ca o manuș te na camel te așunel amen. (Citisar Proverbe 15:23.) Sar exemplo, ande martia 2011, sas iech baro izdraimos phuveaco hai iech tsunami cai rimosardea but forurea anda Japonia. Code mule mai but sar 15 000 manușa. Chiar cana vi le Martori le Iehovasche anda codo than nachle prin cadal pharimata, anda lende cado sas o mai lașio momento te den duma le manușența duchade andai Biblia caște tachiaren lenghe ile. Tha but manușa de cothar sasle budiști hai ci jianenas chanci andai Biblia. Anda codoia, von ci dine duma anda i speranța că le mule va avena uștiade pale viațate, tha von alosarde cado lașio momento caște sicaven lenghe andai Biblia sostar nachen prin cadal ducha le manușa bidoșale.
w15 15/12-M 21 ¶15,16
Le lașe dumes sile iech daro șucar
15 Si zurales importanto te las sama sar das duma averența. Cana o Isus dea duma andi sinagoga anda Nazareto, o foro ande savo barilea, le manușa „așenas uimime catar le șucar dumes cai înclenas anda lesco mui” (Luca 4:22). Cana das duma șucar, covliaras le ile le manușenghe hai zuriaras-len. (Prov. 25:15) Cadea sar o Isus, vi amen daisaras te das duma șucar, te avas lașe hai te las sama so si ando ilo le manușesco. Sar exemplo, cana dichlea le bute manușen că cărde sea so daisarde caște arăsăn leste te așunen-les, le Isusosche cărdilea lesche mila lendar „hai astardea te sicavel-len but buchia” (Mar. 6:34). Chiar cana sas-lo prasado, o Isus ci prasadea parpale (1 Pet. 2:23).
16 Poiechdata si pharo te das duma lașimasa codolența cai prinjianas-len mișto, sar avenas le jenența andai familia hai le pașarde amalența andai congregația. Daisaras te arăsas te na încăras amen parpale cana phenas lenghe vareso. Chiar cana o Isus sas amal le discipolența vo ci pachiaia că daștil te del duma lența bi te încărel-pe parpale. Cana chichiva anda lesche mai pașarde discipoli astarde te han-pe mașcar pende anda con si o mai baro, o Isus ortosardea-len lașimasa hai dea duma anda iech țâno șiavorro caște ajutil-len te paruven-pe. (Mar. 9:33, 37) Cadea sar o Isus, vi le phure roden te ortosaren „ando spirito le lașimasco” (Gal. 6:1).
w95 1/4-M 17 ¶8
Te zuriaras amen te sicavas iubirea hai te cheras buchia lașe! – Sar?
8 Savore daisaras te zuriaras amen iech averes cana slujisaras amare Devlesche. Ciaces, o Isus zuriarelas codolen cai așunenas-les. Vo iubilas i predicarea hai dichlea-la sar iech bari pachiv. Vo phendea că cadaia si sar o haben anda leste. (Ioan 4:34; Romani 11:13) Sar daisaras te sicavas vi amen că sam bucurime cana jias andi predicarea? Bi te așaras amen, daisaras te phenas le phralenghe amare șucar experiențea caște zuriaras-len. Cana acharas averen te aven amența andi predicarea, te gândisaras amen sar daisaras te zuriaras-len te den duma bucuriasa le manușența anda amaro Baro Creatorii, o Iehova (Proverbe 25:25).
Cuci bara anda o lil le Devlesco
it-2-E 399
I blândețea
Iech manuș silo blândo anda codoia că siles pachiamos hai silo siguro că vareso sau varecon del-les zuralimos. Vo ci mechel-pe țârdino le buchiandar nasul hai lel-pe pala le lașe principii. Codo cai ci silo blândo ci simțosarel-pe andi siguranța, silo holiardo, nai-les pachiamos, nai-les speranța hai chiar ci jianel caring te lel-la. Anda iech manuș cai n-ai blândo i Biblia phenel: „Sar iech foro perado cai ci mai siles ziduri, cadea si o manuș cai ci daștil te încărel parpale pesco phiraimos.” (Pr 25:28) Vo ci silo zuralo hai „ci mai siles ziduri” angla lesche jiungale gânduri cai spiden-les te cherel buchia nasul.
11-17 AUGUSTO
SUMNACAI ANDA O LIL LE DEVLESCO PROVERBE 26
Beș dur ‘le manușestar bi goghiaco’
it-2-E 729 ¶6
O brâșând
Le anotimpuri. Anda le dui bare anotimpuri anda o Them Promiso, daisaras te phenas că o milai sas o timpo șuco hai o ivend o timpo brâșândalo. (Dich vi Ps 32:4; Cân 2:11) Anda o mașcar le șionesco aprilia ji ando mașcar le șionesco octombria, delas mai țâra o brâșând. Ande codo timpo chidelas-pe i recolta. Andel Proverbe 26:1 sicavel-pe că ci sas vareso normalo te del o brâșând cana chidelas-pe i recolta. (Dich vi 1Sa 12:17-19.) Ando ivend mai sas chichiva ghiesa bi brâșândesco. Anda codoia că sas iech timpo șudro, avri sas zurales șâl cana delas o brâșând. (Ezr 10:9, 13) Cadea că, iech adăposto sas lașio ande codol ghiesa șâlale. (Is 4:6; 25:4; 32:2; Iov 24:8)
w88 1/9-M 13 ¶12
O ortomos îngărel ca pacea
12 Daștil-pe că chichiva manușa trebun ortosarde mai zurales, cadea sar sicavel-pe vi andel Proverbe 26:3: „O bicio si anda o grast, o hamo anda o măgarii, hai i rovli anda o dumo codolengo bi goghiaco.” Poiechdata o Iehova mechlea le israelițen te nachen prin pharimata, anda codoia că von cărde penghe nasulimos corcore. Von risarde o dumo le Iehovasche hai ci așunde lestar. Cana nachle prin sea cadal buchia, dichle penghe iachența că ci sas chonic caște ajutin-len. Cadea că, ande pengo pharimos astarde te manghen le Iehovas te ajutil-len, hai vo ajutisardea-len sar de fiesavi data (Psalmo 107:11-13). Tha codola bi goghiaco ci așunen de fiesavi data cana sile ortosarde: „Pala so silo ortosardo mai butivar, o manuș șăralo va avela phagărdo bi te ajucărel-pe hai ci va mai avela sastiarimos anda leste” (Proverbe 29:1).
it-2-E 191 ¶4
Bango, bi pânrengo
Andel proverbe. O goghiaver rege Solomon phendea: „Sar iech manuș cai șinel pesche pânre [hai cadea arăsăl bi pânrengo], hai duchavel-pe coroco, cadea si o manuș cai șiol codoles bi goghiaco te cherel iech buchi”. Si ciaces, codo cai șiol ieche manușes bi goghiaco te cherel buchi anda leste, rodel numai pesco miștimos hai si sar cana șinel pesche pânre. Jianas ciaces că vo va dichela că leschi buchi ci va jiala mișto. (Pr 26:6)
Cuci bara anda o lil le Devlesco
it-1-E 846
Dilo
Codo cai phenel parpale dilimata codolesche bi goghiaco „pala lesco dilimos”, hai del duma sau cherel buchia sar vo, sicavel că ciaiol-les so cherel o dilo. Caște na avas sar o manuș bi goghiaco, trebul te cheras so phenel-pe andel Proverbe: „Na phen parpale dilimata codolesche bi goghiaco pala lesco dilimos.” Tha, o verseto andal Proverbe 26:4, 5 sicavel că si mișto te phenas parpale codolesche bi goghiaco „pala lesco dilimos”, adică cana codo bi goghiaco pachial zurales iech buchi cai ci si mișto hai cai ci anel lesche niciech miștimos, amen trebul te ajutisaras-les te hachiarel vo corcoro că na-i mișto so pachial.
18-24 AUGUSTO
SUMNACAI ANDA O LIL LE DEVLESCO PROVERBE 27
Sostar si mișto te avel amen ciace amala
w19.09-M 5 ¶12
O Iehova dichel cuci pesche manușen umilo
12 Codo umilo bucuril-pe cana primal iech sfato. Sar exemplo, te phenas că san ca iech întrunirea. Des duma mai bute phralența, hai iech mașcar lende țârdel tut de iech rig caște phenel tuche că si tut vareso mașcar le danda. Daștil-pe că si tuche lajiav pe thaneste, tha pala codoia mulțumis lesche că phendea tuche. Cadea că trebulas te dichas cuci o tromai ieche phralesco cai del amen iech sfato cana si amen nevoia! Trebul te dichas codole phrales sar iech amal, na sar iech dușmano. (Citisar Proverbe 27:5, 6) (Gal. 4:16).
it-2-E 491 ¶3
Vecino
Cu sea cadala, o lil Proverbe zuriarel amen te pachias amen ande amare amala hai te mangas lengo ajutorii cana si amen nevoia: „Na mech che amales, nici che dadesche amales hai na jia andre ando chăr che phralesco ando ghies che pharimasco; mai lașio si iech vecino [șakén] cai si pașă sar iech phral cai si dur.” (Pr 27:10) Codo cai scriisardea cado proverbo camel te sicavel că trebul te dichas cuci ieche pașarde amales. Butivar rodas mai sigo lesco ajutorii sar te mangas o ajutorii ieche neamosco cai silo dur, chiar cana si amaro phral. Daștil-pe că amaro phral ci daștil sau ci jianel te ajutil amen cadea sar cherel-la iech ciacio amal.
Cuci bara anda o lil le Devlesco
w06 15/9-M 19 ¶12
Buchia importanto anda o lil Proverbe
27:21. Le așarimata daștin te sicaven con sam ciaces. Cana țârdas i atenția caring o Iehova cana sam așarde hai sam zuriarde te slujisaras lesche mai dur, cadaia sicavel că sam manușa umilo. Tha dacă das amen bare cana sam așarde, va dichela-pe că ci sam umilo.
25-31 AUGUSTO
SUMNACAI ANDA O LIL LE DEVLESCO PROVERBE 28
I diferența mașcar codo nasul hai codo orta
w93 15/5-M 26 ¶2
Les tut pala o Iehova ande sea so cheres?
‘CODO orta silo tromano sar iech leo’ (Proverbe 28:1). Vo sicavel pachiamos, pachial-pe ando Lil le Devlesco hai cherel i buchi le Iehovaschi pherdo tromai chiar cana nachel prin pharimata.
it-2-E 1139 ¶3
Goghiaverimos
Codola cai duriaren-pe le Devlestar. O manuș cai astarel te cherel buchia nasul ci mai încărel conto le Devlestar cana alosarel te cherel vareso. (Iov 34:27) Vo mechel pesche iles te coriarel-les, ci dichel chichi de nasul si lesche droma hai cadea hasarel pesco goghiaverimos. (Ps 36:1-4) Chiar cana phenel că anel închinarea le Devlesche, ci șiol po iechto than so manghel o Del lestar, tha lel-pe pala le sicaimata le manușenghe cai ciaion-les mai but. (Is 29:13, 14) Vo phenel ca n-ai cadea de nasul so cherel hai că si numai iech „chelimos”. (Pr 10:23) Cadea, vo arăsel sea mai nasul, bi goghiaco, ci duchal-les chancestar, hai pachial că o Del ci daștil te dichel lesco nasulimos. (Ps 94:4-10; Is 29:15, 16; Ier 10:21) Prin sea so cherel, vo phenel că „O Iehova ci silo ciaces” (Ps 14:1-3) hai ci pachial ande Leste. Anda codoia că ci lel-pe pala so phenel o Del, iech manuș sar cado ci dichel mișto le buchia, le pharimata hai ci cherel lașe alosarimata. (Pr 28:5)
it-1-E 1211 ¶4
Loialitatea
Iech manuș daștil te așel loialo numai dacă siles iech baro pachiamos ando Del hai pachial că lesco zuralimos va salvila-les. (Ps 25:21) O Del phenel amenghe că va avela „iech scuto” hai „iech garaimos” anda codola cai phiren loialo, hai va ferila lengo drom. (Pr 2:6-8; 10:29; Ps 41:12) Anda codoia că von den penghi zor te aven mișto dichle le Iehovasatar, cadaia ajutil-len andi viața hai ajutil-len te na așiaven-pe te cheren so șiute penghe andi goghi. (Ps 26:1-3; Pr 11:5; 28:18) Vi o Iov dichlea că codo bidoșalo daștil te avel duchado anda o neciacimos cai cheren-les codola nasul sau chiar daștil te merel cadea sar von. Tha, o Iehova jianel prin so nachen codola orta hai phenel lenghe că va avela-len iech baro pochinimos, lengo viitorii va avela pherdo pacea hai va bucurina-pe catar sea so si lașio. (Iov 9:20-22; Ps 37:18, 19, 37; 84:11; Pr 28:10) Cadea sar le Iovos, i loialitatea cherel ieche manușes te avel mișto dichlo le coaverendar, na o barvalimos. (Pr 19:1; 28:6) Le șiavorren cai silen iech dad hai dei sar cadala, daisaras te phenas că sile fericime. (Pr 20:7) Prin so cheren lengo dad hai lenghi dei, den vi penghe șiavorrenghe iech baro barvalimos, adică mechen lenghe iech lașio anav hai iech bari pachiv.
Cuci bara anda o lil le Devlesco
w01 1/12-M 12 ¶1
Sar te na cheres iech infarcto spiritualo
Cana pachias tut prea but ande tute. But manușa cărde infarcto anda codoia că pachiaie prea but că von na-i sar te peren nasfale. Le mai but ci camle te jian co doctorii, prasanas cadai buchi hai phenenas că nai-len sostar te jian. Sa cadea, chichiva daștin te pachian că nai sar te peren anda codoia că sile de but bărșa co ciacimos. Von daștinas te na mai dichen so si ande lengo ilo. Cadaia daștilas te șiol ando pericolo lengo amalimos le Iehovasa hai lengo pachiamos. Si zurales importanto te gândisaras amen ca so phendea o Pavel te cheras caște na pachias amen prea but ande amende: „Cadea că, codo cai pachial că beșel ande pânrănde te lel sama te na perel tele”. De cathar hachiaras că ci trebul te bâstras că sam manușa imperfecto hai că trebul te dichas sea o timpo sar si amaro pachiamos. (1 Corinteni 10:12; Proverbe 28:14)