Abrili

Malandzra ya Yehovha ya nkameni lowu khalutiki ma kumane ni swikazratu leswi a ma nga swi yimelanga. Vona xikombiso xa Yakobe. Papayi wake a mu byele leswaku a txhata ni mun’we wa vana va Labani, lweyi a a li xaka dzravu tlhelo mugandzreli wa Yehovha. (Gen. 28:1-4) Yakobe a yingisete papayi wake. Kutani a suke Kanana a yendzra a ya kaya ka Labani lweyi a a ni vana vabidzri va xisati, ku nga Leya na Rakele. Yakobe a a zrandzra Rakele lakakuva a pfumele ku tizrela Labani ku dzringana 7 wa malembe akuva a txhata na Rakele. (Gen. 29:18) Kambe a hi swone leswi yentxekiki. Labani a kanganyise Yakobe, a yentxa leswaku a txhata ni n’wanake wa mativula, Leya. Labani a pfumelele leswaku Yakobe a txhata na Rakele ntsrhaku ka vhiki, kambe a a ta fanela ku tlhela a mu tizrela ku dzringana 7 wa malembe. (Gen. 29:26, 27) Labani a nga dumbekanga ka mabindzru lawa a ma hambiki na Yakobe. Labani a xolole Yakobe ku dzringana 20 wa malembe!—Gen. 31:41, 42. Xihondzro Xa Ku Zrindzra 04/2023 p. 15 § 5

Loko u djula ku txhaveleliwa ni ku kongomisiwa, xana i mani lweyi u tsrutsrumelaka kwake? Hinkwezru ha yi tiva nhlamulo ya xivutiso lexi. Hi nga tsrutsrumela ka Yehovha Xikwembu Nkulukumba hi ku tizrisa xikhongoto. Nakone hi swoleswo hi swi yentxaka. Yene a li “khongotani minkama hinkwayu” kumbe ku va hi phikelela a swikhongotweni. (1 Tes. 5:17) Hi ni ntsrhunxeko wa ku khongota ka Yehovha hi kombela nkongomiso wake ka ntxhumu wun’wana ni wun’wana a wuton’wini byezru. (Amapr. 3:5, 6) Nakunene, Yehovha i Xikwembu Nkulukumba lweyi a hananaka. Xikombiso xa leswo i mukhandlu lowu a hi pfuleliki wa ku khongota kwake nkama wun’wana ni wun’wana lowu hi wu djulaka. Yesu a a swi tiva leswaku a swikhongoto i swa lisima swinene ka Yehovha. A nga si ta lani misaveni a vone ndlela leyi Papayi wake a a swi hlamula ha yone swikhongoto swa vavanuna ni vavasati va ku dumbeka. Hi xikombiso, Yesu a a li tlhelweni loko Yehovha a hlamula swikhongoto leswi sukelaka mbilwini swa malandzra yake ya ku fana na Ana, Davhida, Eliya ni van’wana. (1 Sam. 1:10, 11, 20; 1 Tih. 19:4-6; Amaps. 32:5) Hi leswi yentxiki Yesu a kutxa vadondzrisiwa vake ku khongota nkama ni nkama na va tiyiseka leswaku Yehovha a ta va hlamula!—Mat. 7:7-11. Xihondzro Xa Ku Zrindzra 05/2023 p. 2 §§ 1, 3

Muprista lwenkulu Yehoyada a a mu txhava ngopfu Yehovha. Leswo swi tikombe loko n’wana wa Yezabele, Ataliya, a sungule ku fuma a Yuda na nga na mfanelo. A a bihe ngopfu nakone a a ni makwanga, handle ka leswo, a a swi djula ngopfu ku va hosi lakakuva a dlaye ni vatukulu vake akuva a kota ku tlhaselela kungu dzrake! (2 Makr. 22:10, 11) Kambe mun’we ka vatukulu vake, ku nga Yehowaxi, swi kotekile ku va a huluka hikuva a fihliwe hi Yehoxabati, nsati wa Yehoyada. Yene ni nuna wake va fihle ntsrongwana lweyi ni ku tlhela va mu hlayisa. Ku ve hi ndlela leyi Yehoyada na Yehoxabati va sizreleliki lixaka dzra Davhida. Yehoyada a a dumbekile ka Yehovha nakone a nga pfumelanga ku txhavisiwa hi Ataliya. Loko Yehowaxi a ni 7 wa malembe Yehoyada a tlhele a kombisa ku dumbeka kwake ka Yehovha. Yene a ve ni kungu dzra leswaku a ta yentxisa kuyini akuva a beka Yehowaxi lweyi a a li wa lixaka dzra Davhida leswaku a va hosi. Loko kungu dzrake a dzro ka dzri nga fambi ha hombe, handle ka ku ganaganeka Yehoyada a a ta fa. Kambe hi ku tovokisiwa hi Yehovha mintxhumu hinkwayu yi fambe hi lani a yi kunguhatiwe ha kone. Xihondzro Xa Ku Zrindzra 06/2023 p. 17 §§ 12-13

Swi nga yentxeka na hosi Nebukadnetsara a pimise leswaku Daniyele a a li nala nakone a a ta zrumela leswaku a dlayiwa. Kambe Daniyele hi xixixi a dzri tlhamuxelile lozro dzra hosi. I yini lexi nga ha vaka xi pfune Daniyele akuva a va ni xixixi a wuton’wini byake? Handle ka ku ganaganeka na a ha li mumpshwa a dondzre ka xikombiso xa vapswele vake. (Deut. 6:6-9) Daniyele a a tiva milawu ya masungulo, ya ku fana ni 10 wa Milawu ya Moxe nakone a a tiva milawu leyi yentiki ya ku fana ni mintxhumu leyi Vaisrayele a va fanela ku yi da ni leyi a va nga fanelanga va yi da. (Lev. 11:4-8; Dan. 1:8, 11-13) Daniyele a dondzre mayelana ni vhanu va Xikwembu Nkulukumba nakone a a dzri tiva buyelo dzra kuva va nga yingiseti milawu ya Yehovha. (Dan. 9:10, 11) Daniyele a khalute hi ka swiyimu swinyingi swa ku kazrata a wuton’wini byake nakone hinkwaswu leswo swi mu yentxe a tiyiseka leswaku swi nge na mhaka leswi nga ha yentxekaka, minkama hinkwayu Yehovha ni tintsrumi take a va ta mu pfuna.—Dan. 2:19-24; 10:12, 18, 19. Xihondzro Xa Ku Zrindzra 08/2023 p. 3 §§ 5-6

Rabeka a a li wansati wa wutlhazri ni xixixi, nakone a a tiva ndlela ni nkama wa ku yentxa mintxhumu. (Gen. 24:58; 27:5-17) Nambitanu, minkama hinkwayu a a kombisa xihlonipho ni ku titsongahata. (Gen. 24:17, 18, 65) Loko na wene u tibeka hansi u tlhela u seketela lava Yehovha a va nyikiki wutiyanguleli ku fana na Rabeka, u ta va xikombiso lexinene a ndangwini ni le bandleni. Ku dzringanisela i tsrhamela ledzri vakriste hinkwavu lava wupfiki va fanelaka ku va na dzrone. Esteri a a li nandzra wa ku dumbeka wa Yehovha ni lwa dzringaniselaka. Leswi a a dzringanisela, a nga zanga a tikhuza loko a ve nsati wa hosi. Yene a yingisete xitsratsriyo xa primu wake Mordekayi a tlhela a xi landzra. (Est. 2:10, 20, 22) Na wene, u nga yentxa leswi fanaka hi ku dzringanisela u va u djuletela switsratsriyo leswinene u va u swi landzra a wunton’wini byaku. (Tit. 2:3-5) Esteri a tlhele a kombisa ku dzringanisela hi ndlela yimbeni. Yene a a ‘xongile e mphuzri’, nambitanu, yene a a nga djuli ku xiyiwa hi vhanu hinkwavu.—Est. 2:7, 15. Xihondzro Xa Ku Zrindzra 12/2023 pp. 19-20 §§ 6-8

Ku tsrhamela ku titwa nandzru i ntsrhwalu lowu hi fanelaka ku wu txukumeta. Loko hi hlaye xidoho xezru, hi tisolile ni ku yentxa hinkwaswu leswi hi swi kotaka akuva hi nga ha phindhi swihoxo swoleswi swa swin’we hi nga tiyiseka leswaku Yehovha a hi dzrivalelile. (Mint. 3:19) Ntsrhaku ka loko hi yentxe hinkwaswu leswo, Yehovha a nga swi djuli leswaku hi tsrhamela ku titwa nandzru. Awa swi tiva leswaku matsrhamela lawo ma nga hi yentxa hi nga nyonxi. (Amaps. 31:10) Loko hi tsrhamela ku titwa na hi tsrhikeleleke ngopfu hi nga ha godola ku tama hi tsrutsruma ka mpalisanu wa wutomi. (2 Kor. 2:7) Loko u tsrhamela ku titwa nandzru, beka miyanakanyu yaku ka leswaku ‘a ku dzrivalela’ ka ntiyiso ku le ka Yehovha. (Amaps. 130:4) Yehovha a byela lava tisoliki hakunene a ku: ‘Ndzri nga ka ndzri nga ha dzrimuki a swihono swaku.’ (Yer. 31:34) Leswo swi tlhamuxela leswaku Yehovha a nge ti ku khatisa kumbe ku ku yavanyisa hi swihoxo leswi u samiki u swi yentxa a nkameni lowu khalutiki. U nga tsrhameli ku titwa nandzru loko swihoxo leswi u samiki u swi yentxa a nkameni lowu khalutiki swi ku yentxe u luza xiyavelo xa kukazri a bandleni. Yehovha a nga tsrhameli ku yanakanya hi swihoxo leswi u swi yentxiki. Kutani wene u swi yentxela yini swoleswo? Xihondzro Xa Ku Zrindzra 08/2023 pp. 30-31 §§ 14-15

Hi nkama wa ntungu wa COVID-19, Timboni ta Yehovha leti landzreleliki minkongomiso leyi nyikeliwiki hi nhlengeletanu, a ti vanga na kone ku vilela loku lava yingisetiki madzrungula lawo ya madzrimi va viki na kone. (Mat. 24:45) A hi fanelanga hi pfumela ku luzekeliwa hi “leswi nga swa lisima ngopfu”. (Filp. 1:9, 10) Loko hi hingeletiwa, hi luza nkama wunyingi ni ntamu, leswi a hi ta swi tizrisa akuva hi yentxa mintxhumu ya lisima. Mintxhumu leyi tolovelekiki ya siku ni siku ya ku fana ni ku da, ku nwa, ku hunghata ni ntizro swi nga ha ndzruluka xihinga loko hi swi pfumelela kuva swi va swa lisima ngopfu a wuton’wini byezru. (Luk. 21:34, 35) Siku ni siku hi lavisana ni madzrungula lama yelanaka ni switereka kun’we ni mavonela lama yelanaka ni politika. Hi fanela ku tivonela akuva hi nga hingeletiwi hi timhaka leti. Loko hi nga tivoneli hi nga ha sungula ku yima ni tlhelo dzra kukazri ka timhaka leti, he miyanakanywini kumbe he mbilwini. Sathana a tizrisa mintxhumu ya ku hambanahambana hi nkongometo wa ku tsranisa ku tiyimisela kwezru ka ku yentxa leswi lulamiki. Xihondzro Xa Ku Zrindzra 07/2023 pp. 16-17 §§ 12-13

Ka vhanu va Yehovha, siku dzra xidzrimuxo i siku dzra lisima swinene ndzreni ka lembe. I xiyentxakalu xa xin’we lexi Yesu a leletiki hi ku kongoma leswaku hi xi xiyisisa. (Luk. 22:19, 20) Xi hi dzrimuxa ndlela leyi hi nga kombisaka ku tlangela ha yone xitlhavelo xa Yesu. (2 Kor. 5:14, 15) Xi tlhela xi hi nyika mukhandlu wa ku tikholisa hi ku “tiyisana” ni vamakwezru. (Rom. 1:12) Nakone van’wana va teka xiboho xa ku sungula dondzro ya Bibele hi mhaka ya leswi va nga swi twa ni ku swi vona ka xidzrimuxo. Yanakanya ndlela leyi xidzrimuxo xi pfunaka ha yone leswaku hi va ni wumun’we a misaveni hinkwayu. Hinkwaswu leswo, swi yentxa leswaku xidzrimuxo xi va xa lisima kwezru! Xihondzro Xa Ku Zrindzra 01/2024 p. 8 §§ 1-3

Loko hi yanakanyisisa hi hinkwaswu leswi patsrekaka ka xitizrulo lexi Yehovha na Yesu va hi hakeleliki xone, hi ta ya hi yi twisisa ha hombe ndlela leyi va zrandzraka ha yone mun’wana ni mun’wana wezru. (Gal. 2: 20) Xitizrulo a xi hakele hi kola ka lizrandzru ledzri a nga na dzrone ha hine. Yehovha a kombise lizrandzru dzrake ha hine, hi ku nyikela ntxhumu lowu a wu hlawulekile ngopfu swinene kwake, ku nga Yesu. Yehovha a pfumelele kuva N’wanake a hlupheka a tlhela a fa hi nkonta yezru. Yehovha a nga hi zrandzri swi gamela mbilwini ntsena, kambe a kombisa lizrandzru dzrake hi ndlela leyikulu. (Yer. 31:3) Yehovha a hi kokele kwake hikusa awa hi zrandzra. (Dzringanisa na Deuteronoma 7:7, 8.) A ku na mhunu nambi ntxhumu lexi nga hi hambanisaka ni lizrandzru ledzro. (Rom. 8:38, 39) Xana lizrandzru ledzro dzri yentxa leswaku wene u titwa hi ndlela yini? Xihondzro Xa Ku Zrindzra 01/2024 p. 28 §§ 10-11

A vakriste lava totiwiki va dzri nyika lisima ngopfu a dumbo dzravu dzra ku ya matilweni. Mun’we ka lava totiwiki, makwezru Frederic Franz, khambi dzrimbeni a hlaye ndlela leyi a a titwa ha yone, a te: “Ha tiyiseka ka leswaku a dumbo dzrezru dzri ta hetiseka, nakone hinkwezru lava 144.000 hi ta yamukela leswi Xikwembu Nkulukumba a hi dumbisiki swone. A hakelo dzrezru dzri ta va dzra ku nyonxisa ngopfu hi ndlela ya ku a hi ngi ngi sama hi yi pimisa.” Hi 1991 makwezru Franz a te: “[Hine] a hi tsrhiki ku nyika lisima dumbo dzrezru. . . . Nkama lowu hi dzri zrindzrelaka hi ya hi dzri nyika lisima. I ntxhumu lowu nakunene swi nyonxisaka ku wu yimela. . . . Ni ya ni dzri nyika lisima dumbo dzrezru ku tlula khale.” Swi nge na mhaka leswaku dumbo dzrezru i ku hanya hi lani ku nga helikiki a matilweni kumbe a paradeyisini lani misaveni, hinkwezru hi ni xivangelo xa ku va hi nyonxa. Nakone a dumbo ledzri dzra ku nyonxisa dzri nga ha ya dzri tiya ngopfu swinene. Xihondzro Xa Ku Zrindzra 12/2023 p. 9 § 6; p. 10 § 8

Hi tlhelo dzra le handle dzra tabernakele a ku ni altari dzra kobre ledzri ka dzrone a ku hiseliwa Yehovha magandzrelo ya swihazri. (Eks. 27:1, 2; 40:29) Kambe, magandzrelo lawo a ma nga helisi swidoho swa vhanu hi ku helela. (Heb. 10:1-3) Magandzrelo lawo a ma tsrhamela ku nyikeliwa nkama ni nkama a tabernakeleni, nakone a ma tizra swanga xikombiso xa leswaku a nkameni lowu taka a ku ta va ni xitlhavelo xin’we lexi a xi ta nyikeliwa, lexi a xi ta helisa swidoho swa vhanu hinkwavu. Yesu a a swi tiva leswaku Yehovha a mu zrumele lani misaveni akuva a ta nyikela wutomi byake swanga mhunu wa nyama leswaku a tizrula vhanu vanyingi. (Mat. 20:28) Xileswo, ka babatiso dzrake Yesu a tikombekise mahlweni ka Yehovha akuva a yentxa leswi Yehovha a a swi djula. (Yoh. 6:38; Gal. 1:4) Yesu a nyikele wutomi byake “kan’we swi helela kolanu” akuva a helisa xidoho hi ku helela ka hinkwavu lava va kombisaka lipfumelo kwake.—Heb. 10:5-7, 10. Xihondzro Xa Ku Zrindzra 10/2023 pp. 26-27 §§ 10-11

A ku na lexi a hi ta xi yentxa akuva hi tihuluxa ka xidoho ni lifu. (Amaps. 49:7, 8) Yehovha a zrumele Yesu leswaku a nyikela wutomi byake leswaku a hi huluxa. Yehovha na Yesu va tikazrate ngopfu. Nkama lowu hi yanakanyisisaka hi leswi Yehovha na Yesu va nga hi yentxeliki swone, ku tlangela kwezru ka xitizrulo ku ta ya ku yengeseleka. Loko Adamu a dohile, yene ni vanake va luzekeliwe hi mukhandlu wa ku hanya hi la ku nga helikiki. Xileswo, akuva hi kuma leswi Adamu a swi luziki, Yesu a nyikele wutomi byake lebyi hetisekiki swanga xitlhavelo. Nkama lowu na a ha hanya lani misaveni, Yesu “a nga dohanga, nambi mazritu ya wukanganyisi a ma kumekanga a non’wini wake”. (1 Pet. 2:22) Nkama lowu Yesu a nga fa, a kote ku hakela hi wutomi lebyi hetisekiki lebyi Adamu a byi luziki.—1 Kor. 15:45; 1 Tim. 2:6. Xihondzro Xa Ku Zrindzra 01/2024 p. 10 §§ 5-6

Ntsrhaku ka loko Yesu a pfuxiwile, a nghene ka mbangu wa ku Xwengisisa ka tempele dzra moya. A wugandzreli bya ku Xwenga ka Yehovha byi ti seketele ka xitlhavelo xa xitizrulo lexi nyikeliwiki ha Yesu Kriste ni ka ntizro wake swanga muprista lwenkulu. A muprista lwenkulu a a nghena ni ngati ya swihazri swanga xitlhavelo ka mbangu wa ku Xwengisisa, ku nga mbangu lowu a wu yakiwe hi mavoko ya vhanu. Kambe Yesu “a nghene tilweni” hi ku kongoma, ku nga mbangu lowu xwengiki ngopfu ku tlula mimbangu hinkwayu akuva a tikombekisa mahlweni ka Yehovha. Yesu a nyikele wutomi byake lebyi hetisekiki swanga mhunu wa nyama akuva ku buyeliwa hine hikuva a “susa xidoho hi ku tiyentxa gandzelo.” (Heb. 9:24-26) A swi na mhaka leswaku dumbu dzrezru i dzra ku hanya a misaveni kumbe a matilweni, hinkwezru hi nga gandzrela Yehovha ka tempele dzrake dzra moya. Xihondzro Xa Ku Zrindzra 10/2023 p. 28 §§ 13-14

Yanakanya hi leswi Yesu a nga ku swi yentxeni a matilweni swanga Hosi ni Muprista wezru lwenkulu Hi kola kwake, hi nga kota ku tsrhindzrekela ka “xiluvelo xa timpswalu letikulu” ta Xikwembu Nkulukumba hi xikhongoto, ku kombela ku dzrivaleliwa swidoho swezru ni leswaku a hi “pfuna hi nkama wa kone”. (Heb. 4:14, 15) U nga pfumeleli siku dzri khaluta na u nga yanakanyisisanga hi leswi Yehovha na Yesu va hi yentxelaka swone. Lizrandzru ledzri va nga na dzrone ha hine dzri fanela ku hi khumba timbilu ni ku hi kutxa ku yentxa leswi hi nga swi kotaka a ntizrweni wa Yehovha. (2 Kor. 5:14, 15) Yin’we ya tindlela ya ku kombisa ku tlangela i ku yentxa hinkwaswu leswi hi nga swi kotaka akuva hi pfuna vhanu leswaku va va Timboni ta Yehovha ni ku va valendzreli va Yesu Kriste. (Mat. 28:19, 20) Leswi, kuve leswi mupostola Pawulo a swi yentxiki. A a swi tiva leswaku ku zrandzra ka Yehovha i “kuva vhanu hinkwavu va huluxiwa va tlhela va wu tiva hahombe ntiyiso”.—1 Tim. 2:3, 4. Xihondzro Xa Ku Zrindzra 10/2023 pp. 22-23 §§ 13-14

Wunyingi byezru hi kotisa ku dondzra tindzrimana leti loko hi li nsin’wini, akuva hi txhavelela vhanu ni ku va komba ndlela leyi wutomi byi taka va xiswone la misaveni loko yi ta va paradeyisi. Hi nga tipfunisa kuyini hine kun’we ni ku pfuna vambeni akuva va kholwa ka leswaku a swidumbiso leswi nga ka Mpfuletelo 21:3, 4 swi ta hetiseka? Yehovha a hi nyike swivangelo leswi twisisekaka swa leswaku a swidumbiso swake swi ta hetiseka. Ka tindzrimana leti landzrelaka, hi kuma swivangelo swa kuva hi kholwa ka swidumbiso swa Yehovha mayelanu ni paradeyisi. Hi dondzra leswi: “Lweyi a tsrhamiki xiluvelweni a ku: ‘Lavisa! Ni yentxa mintxhumu hinkwayu yi va leyimpshwa.’ A tlhela aku: ‘Tsrala, hikusa a mazritu lawa ma dumbeka nakone i ya ntiyiso.’ A tlhela a ni byela a ku: ‘A mazritu lawo ma hetisekile! Hi mine Alfa na Omega, masungulo ni magamu.’”—Mpful. 21:5, 6a. Xihondzro Xa Ku Zrindzra 11/2023 p. 3 §§ 3-5

Djaha dzri nga kombisa leswaku dzra yanakanya i ku teka swiboho leswinene mayelanu ni ndlela leyi dzri yambalaka ni ku tilungisa ha yone. Ha kanyingi, a mimoda yi hambiwa yi tlhela yi hangalasiwa hi vhanu lava kalaka va nga yo hloniphi milawu ya Yehovha ya mahanyela. Mapimisela ya ku biha lawa vhanu lava va nga na wone ma tikomba ka muxaka wa mpahla leyi va yi hambaka, yi manya ngopfu nakone a yi tikombi leswaku i ya xinuna kumbe i ya xisati. Loko djaha dzri hlawula swa ku yambala, dzri ta kombisa leswaku dzri djula ku va mukriste lweyi a wupfiki hi ku pfumelela minsinya ya milawu ya Bibele yi dzri kongomisa nakone dzri ta va xikombiso lexinene a bandleni. Dzri nga ha tivutisa leswi: ‘Xana leswi ni swi hlawulaka swi kombisa leswaku ni ni mayanakanyela lamanene ni leswaku xana na va hlonipha van’wana? Xana ndlela leyi ni yambalaka ha yone ni ndlela leyi ni langutekaka ha yone swi yentxa van’wana va swi vona leswaku ni nandzra wa Yehovha?’ (1 Kor. 10:31-33) Djaha ledzri dzri yanakanyaka ha hombe a dzri nga tinyonxeliwa hi vamakwezru a bandla ntsena kambe dzri ta tlhela dzri nyonxeliwa hi Papayi wa dzrone wa le matilweni, Yehovha. Xihondzro Xa Ku Zrindzra 12/2023 p. 26 § 7

A nkameni lowu khalutiki a ‘hosi ya nyingitimu’ na yone yi tsrhame yi hlasela vhanu va Yehovha. (Dan. 11:40) Hi xikombiso, ndzreni ka 1950 ku ya ka 1990, vamakwezru vanyingi va khomeleliwile nakone vanavu va hlongoliwe xikole hi kola ka wukalatlhelo. Namunhla, ‘hosi ya nyingitimu’ ya ha tama yi dzringa ku dumbeka ka vhanu va Xikwembu Nkulukumba hi ndlela leyi tlhotekiki. Hi xikombiso, hi nkama wa hlawula mani mukriste a nga ha dzringeka kuva a yima ni ntlawa wa kukazri wa politika kumbe ku hlawula muzrangeli wa kukazri. I ntiyiso leswaku a nge ti vhota, kambe a nga ha yima ni tlhelo dzra kukazri he mbilwini kumbe he miyanakanywini. Kambe akuva hi va ni wukalatlhelo hi lani ku heleliki hi fanela ku tivonela ka leswi hi swi yanakanyaka!—Yoh. 15:18, 19. Xihondzro Xa Ku Zrindzra 08/2023 p. 12 § 17

Swanga hi leswi kutani hi nga ka mpalisanu wa wutomi hi fanela ku ‘tsrutsruma hi ndlela leyi taka yentxa leswaku hi ganya’. (1 Kor. 9:24) Yesu a hlaye leswaku hi nga ha “bindzriwa hi ku da ngopfu, ku nwa ngopfu ni hi mivilelo ya wutomi”. (Luk. 21:34) A ti ndzrimana leti ni tin’wana ti nga hi pfuna kuva u xiya lomu hi nga ha yampswisaka kone akuva hi tama hi va ka mpalisanu wa wutomi. Hi nga tiyiseka leswaku hi nga hlula ka mpalisanu wa wutomi hikusa Yehovha a ta hi nyika ntamu lowu hi wu vilelaka. (Eza. 40:29-31) U nga heli ntamu! Yetisela mupostola Pawulo, lweyi a tikazratiki hi lani a kotiki ha kone akuva a kuma hakelo. (Filp. 3:13, 14) A nga kone lweyi a nga ku tsrutsrumelaka ka mpalisanu lowu, kambe hi ku pfuniwa ha Yehovha u ta swi kota. Yehovha a ta ku pfuna ku zrwala mintsrhwalu yaku ni ku ku pfuna ku txukumeta leyi nga ha ku yentxaka u nga nyonxi. Hi ku pfuniwa hi Yehovha, u ta swi kota ku heta ni ku ganya ka mpalisanu wa wutomi! Xihondzro Xa Ku Zrindzra 08/2023 p. 31 §§ 16-17

Loko Yesu a ni 12 wa malembe, vapswele vake va tlhelele kaya mu siya Yerusalema. (Luk. 2:46-52) A ku li wutuyanguleli bya Yosefa na Mariya akuva va tiyiseka leswaku a vana hinkwavu va kone a ntlaweni nkama lowu va mukaka. Loko va mu kumile, Mariya a nyike nandzru Yesu hi leswi a va tlhanyisiki nhloko hikuva va fambe va mu djuletela! Yesu inhaka a li yene a nga va nyika nandzru. A matsrhan’wini ya leswo, Yesu a hlamule hi ndlela ya xitxhavu. Kambe Yosefa na Mariya “a va swi twisisanga leswi a a va byela swone.” Nambitanu, Yesu “a tame a va yingiseta.”Xana swa ku kazratela ku yingiseta vapswele vaku loko va yentxa swihoxo kumbe va nga ku twisisi? I yini lexi nga ku pfunaka? Yanakanya hi ndlela leyi Yehovha a titwaka ha yona. A Bibele dzri hlaya leswaku loko u yingiseta vapswele vaku, “leswo swi nyonxisa Hosi.” (Kol. 3:20) Yehovha awa swi tiva leswaku swi nga yentxeka minkama yin’wana vapswele vaku va nga ku twisisi kumbe va ku bekela milawu leyi tikombaka ingiki a yi twisiseki. Nambitanu, loko u yingiseta vapswele vaku u ta nyonxisa Yehovha. Xihondzro Xa Ku Zrindzra 10/2023 p. 7 §§ 5-6

Swi nga yentxeka mudondzrikuloni a hlaya leswaku Timboni ta Yehovha ti fanela ku txintxa ndlela leyi ti ma vonaka ha yone ma gay. Kumbexana swi nga va swinene ku mu tlhamuxela leswaku ha va hlonipha ni ku pfumela leswaku mun’wana ni mun’wana a ni mfanelo ya ku titekela swiboho. (1 Pet. 2:17) Swi nga yentxeka hi va ni mukhandlu wa ku va hi mu tlhamuxela ndlela leyi minsinya ya milawu yi hi pfunaka ha yone akuva hi nyonxa. Loko hi bulisana ni mhunu lweyi a vulavulaka hi ku tiyiseka ka mhaka ya kukazri, a hi fanelanga hi tekela ku yanakanya leswaku ha swi tiva leswi yentxaka mhunu lweyo a pimisa hi ndlela leyo. Hi xikombiso, a wu ta yentxa yini loko mudondzrikuloni a hlaya leswaku a nga kholwi ka Xikwembu Nkulukumba? A wu ta vhela u yanakanya leswaku a kholwa ka dondzro ya ku titumbulukela ka mintxhumu? Swi nga yentxa o phindha leswi a swi twiki ka van’wana kambe yene hi ntshima a ngi ngi sama a pimisa hi mhaka leyi. Kumbexana u nga mu komba ntxhumu wa kukazri mayelanu ni ntumbuluku ka jw.org, kumbe siku dzrimbeni mi nga ha bula mayelanu ni nhlokomhaka ya kukazri kumbe vhidiyu ledzri nga ka jw.org. Loko hi kombisa xihlonipho swi ta nabyala kuva vhanu va djula ku dondzra leswi yengetelekiki hi Bibele. Xihondzro Xa Ku Zrindzra 09/2023 p. 17 §§ 12-13

Hi nga tiyiseka ka leswaku Yehovha a nga hi tizrisa nakone a ta hi tovokisa nambiloko hi yentxa swihoxo, loko hi tikazratela ku lulamisa swihoxo swezru ni ku tama hi mu dumba. (Amapr. 28:13) Samisoni a a nga hetisekanga, kambe nambitanu, a nga tsrhikanga ku tizrela Yehovha nambiloko a yentxe xihoxo xa ku tekana na Delila. Nakone Yehovha a nga mu tsrhikanga Samisoni. Yehovha a tlhele a tizrisa Samisoni hi ndlela ya ku hlamalisa. Nakone Yehovha a ha vona Samisoni swanga wanuna wa lipfumelo dzra ku hlamalisa, leswo swi yentxe leswaku a kumeka ka nxaxamelo wa lava ku dumbeka lowu hi wu kumaka ka Vaheberu ndzrima 11. A hi ku nyonxisa ka swone ku tiva leswaku hi tizrela Papayi lweyi a nga ni lizrandzru ledzrikulu lwa djulaka ku hi tiyisa, ngopfu ngopfu loko hi titwa na hi hele ntamu! Kutani ku fana na Samisoni, a hi tameni hi khongota ka Yehova hi mu kombela hi ku: ‘Ndzri yanakanye, ndzra ku khongota, ndzri hanane ntamu swoswi ku hela.’—Abaṭ. 16:28. Xihondzro Xa Ku Zrindzra 09/2023 p. 7 §§ 18-19

Ha swi tiva leswaku a siku dzra Yehovha kutani dzri kusuhi, xileswo hi djula ku yentxa hinkwaswu hi nga swi kotaka akuva hi zrezrela van’wana madzrungula lamanene. Kambe minkama yin’wana hi nga ha heleliwa hi xixixi. Ha yini? Hikusa hi nga ha pfumelela ku txhava ku hi nghena hi lani swi viki ha kone ka Petro. Ka wusiku lebyi Yesu a khomiwiki ha byone, Petro a txhave ku hlaya leswaku i mudondzrisiwa wa Yesu, nakone a txhave ku hlaya leswaku a a mu tiva. (Mat. 26:69-75) Kambe hi ku famba ka nkama, Petro a tsrale leswi na a tiyiseka: “Mi nga swi txhavi leswi va swi txhavaka, nambi ku li ku kazrateka.” (1 Pet. 3:14) Mazritu ta Petro ma hi tiyisekisa leswaku na hine hi nga swi kota ku hlula ku txhava vhanu. I yini lexi nga hi pfunaka ku hlula ku txhava vhanu? Petro a te: “A timbilwini tenu xwengisani Kriste swanga Hosi.” (1 Pet. 3:15) Leswo swi patsra ku yanakanyisisa hi wukulu ni ntamu lowu Hosi yezru Yesu Kriste a nga na wone. Xihondzro Xa Ku Zrindzra 09/2023 pp. 27-28 §§ 6-8

Hi fanela ku tivonela akuva hi nga patsreki ka “mintxhumu leyi kalaka yi nga pfuni ntxhumu leyi lumbaka munyama”. (Efe. 5:11) A ntiyiso hi leswaku loko mhunu a vona, a yingiseta kumbe a khanela mintxhumu ya ku biha, swi kumeka swi nabyalile kuva a yi yentxa. (Gen. 3:6; Yak. 1:14, 15) Misava ya Sathana yi dzringisa ku hi kanganyisa minkama hinkwayu, hi ku hi byela leswaku leswi Yehovha a liki swi bihile nakone a swi basanga hi swone swi nga swinene. (2 Pet. 2:19) Man’we ya maqhinga lawa Sathana a ma tizrisaka ku sukela khale i ku pfilunganyisa vhanu leswaku va nga swi tivi leswi bihiki ni leswi nga swinene. (Eza. 5:20; 2 Kor. 4:4) Xileswo, mafilme manyingi, minongonoko ya matelevhizawu ni mapajina manyingi ya internet ma kombisa mintxhumu leyi lwisanaka ni milawu ya Yehovha ya ku lulama! Sathana a zama ku hi kholwisa leswaku a swiyentxo leswi kalaka swi nga basanga a swi nge hi vavisi.—Efe. 5:6. Xihondzro Xa Ku Zrindzra 03/2024 p. 22 §§ 8-10

A tabernakele a dzri tsrhame ku fana ni tende ledzri Vaisrayele a va ta dzri teka va fambafamba na dzrone lomu va yaka kone loko va zruzra. Dzri tizrisiwe ku dzringana kolomu ka 500 wa malembe ku ko ku yakiwa a tempele a Yerusalema. (Eks. 25:8, 9; Atinhl. 9:22) A tabernakele, a ku li mbangu lowu Vaisrayele a va tlhangana kone akuva va gandzrela ni ku hisela kone magandzrelo. (Eks. 29:43-46) Kambe a tabernakele a dzri tlhela dzri yimela ntxhumu wa ku yampswa lowu Yehovha a a ta wu nyika Vakriste. A tabernakele a dzri “fanekisela a mintxhumu ya le tilweni,” nakone a dzri yimela tempele ledzrikulu dzra moya dzra Yehovha. Mupostola Pawulo a hlaye leswaku “a tende [kumbe tabernakele] ledzri, dzri yimela mintxhumu leyi yentxekaka swoswi.” (Heb. 9:9) Kutani nkama lowu Pawulo a tsraleliki Vaheberu, a tempele dzra moya kutani a dzri li dzra xivizri ka Vakriste. Dzri sungule ku va kone hi lembe dzra 29 N.Y. Hi lembe ledzro, Yesu a babatisiwile ni ku totiwa hi moya wa ku Xwenga nakone a sungule ku tizra swanga “muprista lwenkulu” wa Yehovha ka tempele dzra moya.—Heb. 4:14; Mint. 10:37, 38. Xihondzro Xa Ku Zrindzra 10/2023 pp. 25-26 §§ 6-7

Hi fanela kuva lava nabyaliki loko ku humelela swikazratu a wuton’wini byezru. Akuva hi kota ku titwananisa ni ku txintxa a wuton’wini byezru hi fanela ku titwananisa ni swiyimu swa van’wana nakone leswi taka hi pfuna ku yentxa leswo i ku yanakanyela. Swanga malandzra ya Yehovha hi djula ku kombisa leswaku ha yanakanyela nakone hi djula kuva vhanu lava titsrongahataka ni ku kombisa wunene. Yehovha a vitaniwa “Zribye” hikusa a yime a tiya a nga tsrekatsreki. (Deut. 32:4) Kambe hi tlhelo dzrin’wana awa yanakanyela. A swiyentxakalu a misaveni hinkwayu swi txintxa hi ku kahlula, kambe Xikwembu Nkulukumba a ha tama a va xiswoswo akuva a hetisisa nkongometo wake. Yehovha a vumbe vhanu hi xifananiso xake, xileswo hi ni wuswikoti bya ku titwananisa ni ku txintxa loku nga ha humelelaka a wuton’wini byezru. A Bibeleni hi kuma minsinya ya milawu leyi hi pfunaka ku teka swiboho swa wutlhazri swi nge na mhaka swikazratu leswi hi nga ha kumanaka na swone a wuton’wini. A xikombiso xa Yehovha ni minsinya ya milawu leyi a hi nyikiki yone swi hi pfuna ku twisisa leswaku nambi leswi a nga “zribye”, yene a tlhela a yanakanyela. Xihondzro Xa Ku Zrindzra 07/2023 p. 20 §§ 1-3

A Bibele dzri fanisa Yehovha ni mamana lweyi a nga ni lizrandzru. (Eza. 66:12, 13) Yanakanya hi mamana lweyi a hlayisaka n’wanake hi lizrandzru nakone loko hi xaniseka hi nga tiyiseka leswaku Yehovha awa hi zrandzra. A nga hi heleli mbilu loko hi txhuka hi yentxa mintxhumu ya ku biha. (Amaps. 103:8) Minkama yin’wana, Vaisrayele a va khunguvanyisa Yehovha, nambitasu ntsrhaku ka loko va tisolile a va kombe leswaku awa va zrandzra hi ku va byela mazritu lawa: ‘U ni lisima mahlweni kwanga, u ni ku twala, nangwesu ndzri ku zrandzrile.’ (Eza. 43:4, 5) A lizrandzru dzra Xikwembu Nkulukumba a dzri txintxanga. Nambiloko hi yentxa swihoxo leswikulu, loko hi tisola hi va hi tlhelela ka Yehovha, hi ta swi vona leswaku a ha tama a hi zrandzra. Yene a dumbisa leswaku a ta hi dzrivalela ‘ku nge ha mpimo’. (Eza. 55:7) A Bibele dzri tlhamuxela lidzrivalelo dzra Yehovha swanga “ku wisa” ka Yehovha.—Mint. 3:19. Xihondzro Xa Ku Zrindzra 01/2024 p. 27 §§ 4-5

Yehovha a nga hi pfuna loko hi langutana ni swikazratu. Hi xikombiso, loko hi kombela ka vatholi vezru akuva va hi pfumelela ku ya a makongresu, kumbe ku hantla hi khumuka ntizrweni akuva hi kumeka ka mintlhanganu hinkwayu, hi pfula mikhandlu ya ku vona Yehovha na a tovokisa minzamu yezru a wuton’wini byezru. Hi nga ha hlamalisiwa hi ku vona mabindzru lawa ma nga ha va ka kone hi kola ka leswo. Kutani, hi taya hi mu dumba ngopfu Yehovha. Ezra hi ku titsrongahata a khongote ka Yehovha a kombela mpfunu. Minkama hinkwayu loko Ezra a titwa na a kazratekile hi kola ka mintizro leyi a a li na yone, a a khongota ka Yehovha. (Ezr. 8:21-23; 9:3-5) Leswi Ezra a a dumba Yehovha, vhanu van’wana a va mu seketela nakone a va yetisela lipfumelo dzrake. (Ezr. 10:1-4) Loko hi txhuka hi kazrateka hi kola ka minhlatiyelo ya wutomi kumbe wuhlayiseki bya ndangu wezru, hi fanela ku khongota ka Yehovha hi ku dumba. Xihondzro Xa Ku Zrindzra 11/2023 p. 18 §§ 15-17

Yehovha a a nga hlayi swone leswaku loko hi djula ku voniwa swanga lava lulamiki hi fanela ku yentxa hinkwaswu leswi Abrahamu a swi yentxiki. Hi nga kombisa hi tindlela tinyingi leswaku hi ni lipfumelo hi kola ka swiyentxo swezru. Hi nga va yamukela hi ndlela leyinene lava vo ko sungula ku ya mintlhangan’wini, hi pfuna vamakwezru lava kumanaka ni swikazratu ni ku yentxela va ndangu wezru leswinene, ku yentxa hinkwaswu leswi Yehovha a swi yamukelaka ni ku swi tovokisa. (Rom. 15:7; 1 Tim. 5:4, 8; 1 Yoh. 3:18) Yin’we ya tindlela ta lisima ya ku kombisa leswaku hi ni lipfumelo i ku zrezra madzrungula lamanene ya Mfumu hi nkhikhi. (1 Tim. 4:16) Hinkwezru hi nga kombisa hi mintizro leswaku hi ni lipfumelo dzra leswaku hinkwaswu leswi Yehovha a hi dumbisaka swone swi ta hetiseka ni leswaku leswi a hi yentxelaka swone i swinene kwezru. Loko hi yentxa leswo, hi nga tiyiseka leswaku Xikwembu Nkulukumba a ta hi vona swanga lava lulamiki nakone hi tava vanghanu vake. Xihondzro Xa Ku Zrindzra 12/2023 p. 2 § 3; p. 6 § 15

Na a li kusuhi ni ku fa, Hosi Davhida a tsratsriye n’wanake, Solomoni hi mazritu lama nga henhla. (1 Tih. 2:1, 3) A xitsratsriyu lexi i xa lisima ka vavanuna hinkwavu lava djulaka ku va vakriste lava wupfiki. Akuva leswo swi koteka, va fanela ku dondzra ku yingiseta milawu ya Xikwembu Nkulukumba ni ku tizrisa minsinya ya malawu ya Bibele a wuton’wini byavu. (Luk. 2:52) Ha yini swi li swa lisima kuva madjaha ma va vakriste lava wupfiki? Wanuna lweyi a nga mukriste a ni wutiyanguleli byinyingi bya lisima a ndangwini ni le bandleni. Wene swanga djaha, swi nga ha yentxeka u yanakanye hi wutiyanguleli lebyi u nga ha vaka na byone a nkameni lowu taka. Swi nga yentxeka u ni kungu dzra ku ngenela ntizro wa nkama hinkwawu, ku va nandzra wa wutizreli nakone hi ku famba ka nkama u va nkulu wa bandla. Swi nga yentxeka u djula ku txhata ni ku va ni vana. (Efe. 6:4; 1 Tim. 3:1) Akuva u kota ku hetisisa wutiyanguleli lebyo, u fanela ku va mukriste lweyi a wupfiki. Xihondzro Xa Ku Zrindzra 12/2023 p. 24 §§ 1-2

Vakulu lava nga vakriste va yamukele xiyavelo xa ku bekisa tihamba ta lisima ta Yehovha. Vavanuna lava tinyiketeliki, va xi nyika lisima xiyavelo lexi va nyikiwiki xone xa ku tizrela vamakwavu, xileswo va tikazrata ngopfu akuva va va ‘vabyisi lava byisaka hi ndlela leyinene’. (Yer. 23:4; 1 Pet. 5:2) Hi tlangela ngopfu hi ku va hi va ni vavanuna lava a mabandleni! Muyavanyisi Gidiyoni i xikombiso lexikulu lexi vakulu va nga xi yetiselaka. (Heb 6:12) Yene a a sizrelela ni ku byisa vhanu va Xikwembu Nkulukumba. (Abaṭ. 2:16; 1 Makr. 17:6) Gidiyoni kun’we ni vakulu va yamukele xiyavelo xa ku hlayisa vhanu va Xikwembu Nkulukumba hi minkama ya ku kazrata. (Mint. 20:28; 2 Tim. 3:1) Gidiyoni a ve xikombiso lexinene xa ku dzringanisela, ku titsrongahata ni ku yingiseta. Swi djule kuva a tiyisela loko a li kazri a tizrela Yehovha. Hinkwezru hi fanela ku wu nyika lisima dzrikulu ntizro lowu vakulu va wu yentxaka swi nge na mhaka leswaku hi vakulu kumbe im-him. Nakone hi nga va seketela vavanuna lava tizraka ngopfu akuva va hlayisa bandla.—Heb. 13:17. Xihondzro Xa Ku Zrindzra 06/2023 p. 2 §§ 1; p. 3 § 3