Mayu

Vakriste va le dzaneni dzra ku sungula va khumbekile loko ku ve ni ndlala a ‘misaveni’. Handle ka ku ganaganeka, tinhloko ta mindangu ti kazrateke ngopfu hi leswaku ti nga swi kuma kwini swakuda swa ku tama ti wundla mindangu. Yanakanya ndlela leyi swi nga vaka swi va khumbe ha yone vampshwa lava kumbexana a va yanakanya hi ku yengesela ntizro wavu wa ku zrezra. Swi nga yentxeka va yanakanye hi ku txintxa makungu yavu. Nambileswi swiyimu swavu a swi siyana, va swi kotile ku titwananisa ni swiyimu. Va tame va zrezra hi lani a va kota ha kone nakone va yavelani leswi a va li na swone ni vamakwavu va le Yudeya. (Mint. 11:29, 30) Lava va pfuniwiki hi tlhelo dzra nyama va swi xiyile leswaku hi Yehovha lweyi a a li ku va pfuneni. (Mat. 6:31-33) Swi nga yentxeka va tame va va kusuhi ni vamakwavu lava va va pfuniki. Lava va nyikeliki hi swihanano kumbe hi ku tizrisa tindlela timbeni, va ku twile ku nyonxa loku pfaka hi ka ku hanana vambeni.—Mint. 20:35. Xihondzro Xa Ku Zrindzra 04/2023 p. 16 §§ 12-13

Yehovha a nga hlamula swikhongoto swezru hi ku yentxa leswaku vhanu lava kalaka va nga mu gandzreli va hi pfuna. Hi xikombiso, Yehovha a yentxe leswaku hosi Artaxerxe a pfumelela Nehemiya leswaku a tlhelela Yerusalema akuva a ya pfunisa ka ku pfuxeta a doropa. (Neh. 2:3-6) Ni namunhla, Yehovha a nga yentxa leswaku vhanu lava kalaka va nga mu gandzreli va hi pfuna. Hi ntolovelo swikhongoto swezru a swi hlamuliwi hi ndlela ya ku hlamalisa. Kambe tinhlamulo ta swikhongoto swezru ka Yehovha hi leti hi ti vilelaka akuva hi tama hi dumbeka kwake. Xileswo, xiya ndlela leyi Yehovha a hlamulaka ha yone swikhongoto swaku. I swa lisima kuva nkama ni nkama hi yimanyana hi yanakanyisisa hi ndlela leyi Yehovha a hlamulaka ha yone swikhongoto swezru. (Amaps. 66:19, 20) Hi fanela ku kombisa lipfumelo, ku ng ali ntsena hi ku khongota kambe ni hi ku va hi yamukela nhlamulo yin’wana ni yin’wana leyi pfaka ka Yehovha.—Heb. 11:6. Xihondzro Xa Ku Zrindzra 05/2023 p. 11 § 13; p. 12 §§ 15-16

Loko hi tinyiketele ka Yehovha hi mu dumbise ku mu gandzrela ni leswaku minkama hinkwayu hi ta yentxa ku zrandzra kwake. Nakone hi fanela ku xi hetisisa xidumbiso lexo. Ku yentxa hinkwaswu leswi hi swi dumbisiki Yehovha a swi bindzri. Phela Yehovha a hi vumbele ku yentxa ku zrandzra kwake. (Mpful. 4:11) Yehovha a hi hambe na hi ni ku navela ka ku mu tiva ni ku mu gandzrela nakone a hi vumbe hi xifaniso xake, hi leswi swi hi yentxaka hi djula ku tsrhindzrekela kusuhi na yene nakone i tovoko ku yentxa ku zrandzra kwake. Handle ka leswo, loko hi yentxa ku zrandzra ka Xikwembu Nkulukumba hi tlhela hi yingiseta n’wanake hi ta kuma ku wisisiwa. (Mat. 11:28-30) Tama u tiyisa lizrandzru dzraku ha Yehovha hi ku yanakanyisisa hi mintxhumu hinkwayu leyi a samiki a ku yentxela ni matovoko hinkwawu lawa a ha taka ku nyika. Nkama lowu lizrandzru dzraku ha Yehovha dzri yaka dzri kula, swi ta ya swi ku nabyalela ku mu yingiseta. (1 Yoh. 5:3) Yesu a swi kotile ku yentxa ku zrandzra ka Yehovha hikusa a a khongota a kombela mpfunu nakone a a beka miyanakanyu yake ka hakelo. (Heb. 5:7; 12:2) Ku fana na Yesu, khongota ka Yehovha u kombela ntamu nakone u nga txhuki u lahlekeliwa hi dumbo dzra wutomi lebyi nga helikiki. Xihondzro Xa Ku Zrindzra 08/2023 pp. 27-28 §§ 4-5

Swa nyonxisa ku hanyisana ni vhanu lava lehisaka mbilu. Ha yini leswo swi yentxeka? Hikusa hi va hlonipha ngopfu vhanu lava kotaka ku yimela ntxhumu wa kukazri na va nga hlundzrukanga. Swa xonga loko mhunu a hi lehisela mbilu nambi loko hi pfa hi yentxa swihoxo nakone hi mu tlangela ngopfu lweyi a hi dondzreliki Bibele hi leswi a hi lehiseliki mbilu nkama lowu a hi tikazratela kuva hi dondzra, ku pfumela kumbe ku tizrisa leswi hi swi dondzraka a Bibeleni. Nakone xa lisima ngopfu hi mu tlangela ngopfu Yehovha hi kuva a tama a hi lehisela mbilu! I ntiyiso leswaku hi nyonxa ngopfu loko vhanu va hi lehisela mbilu kambe swi nga yentxeka swi hi kazratela ku kombisa tsrhamela ledzro. Hi xikombiso, swi nga yentxeka swi nga hi nabyaleli ku lehisa mbilu loko hi li ka engarrafamento ngopfungopfu loko hi xwelile ka xiyentxakalu xa kukazri nakone hi nga hluleka ku lehisa mbilu loko mhunu wa kukazri a hi hlundzrukisa. Nakone hi nga vona ingiki xidumbiso xa Yehovha mayelana ni misava leyimpshwa xa hlwela. Xileswo, ka swiyimu hinkwaswu hi fanela ku lehisa mbilu hi ndlela leyi yengetelekiki. Xihondzro Xa Ku Zrindzra 08/2023 p. 20 §§ 1-2

Yehovha a byele Gidiyoni leswaku a a fanela ku pumba nhlayu yikulu ya masotxha yake kuva ma muka kaya. Swi nga yentxeka Gidiyoni a yanakanye hi ndlela leyi: ‘Xana leswi swa vileleka? Swi ta famba ha hombe swoleswi?’ Nambitanu, Gidiyoni a yingesetile. Namunhla, a vakulu va yetisela xikombiso xake hi kuva va pfumelelana ni ku txintxa loku nhlengeletanu ya Yehovha yi ku yentxaka. (Heb. 13:17) Nambiloko a kumane ni khombo kun’we ni ku txhava, Gidiyoni a yingisete Yehovha. (Abaṭ. 9:17) Ntsrhaku ka loko Yehovha a mu tiyisile, Gidiyoni a tiyiseke hi ku helela leswaku Yehohva a a ta mu pfuna ku sizrelela vhanu vake. Vakulu lava tsrhamaka a mimbangwini leyi ntizro wezru wu yilisiwaka va yetisela xikombiso xa Gidiyoni. Va kombisa xixixi nakone va zrangela ntizro wa ku hlela mintlhanganu ni ntizro wa nsimu, nambi loko ku yentxa leswo swi ta va beka ka khombo dzra kuva va pfaleliwa, va thethisiwa, va luzekeliwa hi ntizro kumbe ku lavisana ni ndzringo wun’wana ni wun’wana. Hi nkama wa nhlomulo lowukulu, swi ta djula kuva vakulu va kombisa xixixi akuva va yingiseta minkongomiso leyi va taka yi kuma nambiloko ku yentxa leswo swi ta va ni khombo. Xihondzro Xa Ku Zrindzra 06/2023 pp. 5-6 §§ 12-13

Yehovha a tsrale wudzrunguli bya Muprista Lwenkulu Yehoyada ka Bibele akuva hi kota ku dondzra ha byone. (Rom. 15:4) Nakone loko Yehoyada a file, a ve ni ndjombo ya ku lahliwa ‘mutini wa Davhia, kun’we ni tihosi hikusa afa a tizrele swinene Israyeleni Xikwembu Nkulukumba ni yindlu yakwe’. (2 Makr. 24:15, 16) A wudzrunguli bya Yehoyada byi nga hi pfuna ku kulisa ndlela leyi hi mu txhavaka ha yone Yehovha. Vakriste lava nga valaviseli va nga yetisela Yehoyada hikuva minkama hinkwayu va djuletela tindlela ta ku sizrelela bandla. (Mint. 20:28) Lava va kuliki hi ntanga va nga yetisela xikombiso xa Yehoyada, hi ku txhava Yehovha ni ku tama va dumbeka, loko va yentxa leswo Yehovha a ta tama a va tizrisa akuva a hetisisa ku zrandzra kwake. Lavampshwa va nga dondzra ka xikombiso xa Yehovha xa ku hlonipha lava kuliki, hi lani Yehovha a swi yentxiki ha kone ka Yehoyada. Va nga yentxa leswo ngopfungopfu ka lava va nga ni malembe manyingi na va tizrela Yehovha hi ku dumbeka. (Amapr. 16:31) A hi va seketeleni hi ku dumbeka ‘lava va zrangelaka’ hi ku va yingiseta.—Heb. 13:17. Xihondzro Xa Ku Zrindzra 06/2023 p. 17 §§ 14-15

A mintlhanganwini, tizrisa wuswikoti byaku bya ku yanakanyisisa loko u hlawula makhambi lawa u djulaka ku nyikela tinhlamulo. Loko u tlakula voko makhambi manyingi swi ta yentxa mufambisi a sindzriseka ku ku nyiketa akuva u hlamula nambiloko van’wana va nga si hlamula. Kutani leswo swi nga yentxa van’wana va godola ku tlakuxa voko. (Ekles. 3:7) Loko vamakwezru vanyingi va tlakuxa mavoko akuva va hlamula, swi nga yentxa hi nga swi koti ku hlamula hi lani a hi navela ha kone. Minkama yimbeni xidondzro xi nga ha hela na mufambisi a nga hi nyikanga kuva hi hlamula. Leswo swi nga ha hi heta ntamu, kambe a hi fanelanga hi yanakanya leswaku a nga hi nyiketanga hileswi a kalaka a nga hi zrandzri. (Ekles. 7:9) Loko u nga kumi mukhandlu wa ku hlamula hi lani a u djula ha kone, swi ngo yini u yingiseta ha hombe tinhlamulo ta vamakwezru kutani ntsrhaku ka ntlhanganu u va kulungela hi kola ka tinhlamulo tavu? Swi nga yentxeka vamakwezru va ta tiyisiwa hi mazritu yaku ku fana ni loko a ve yingiseta tinhlamulo taku. Xihondzro Xa Ku Zrindzra 04/2023 pp. 23-24 §§ 14-16

Dondzra Zritu dzra Xikwembu Nkulukumba u va u yanakanyisa ha dzrone. Loko timitsru ta nsinya ti ya ti yenta, a nsinya wu ya wu tiya. Hi ndlela leyi fanaka loko hi ya hi dondzra Zritu dzra Xikwembu Nkulukumba, lipfumelo dzrezru dzri ta ya dzri tiya, hi ndlela leyo hi ta tama hi yima na hi tiyile. Loko hi dondzra Zritu dzra Xikwembu Nkulukumba ni ku yanakanyisisa ha dzrone, hi ya hi tiyiseka leswaku leswi Yehovha a hi kombelaka swone i swinene kwezru. (Kol. 2:6, 7) Yanakanyisisa hi ndlela leyi minkongomiso ya Yehovha, swilayu swake ni nsizrelelo wake swi ma pfuniki ha yone malandzra yake ya le nkameni lowu khalutiki. Hi xikombiso, Ezekiel a yingelisise ha hombe loko ka xivono xa kukazri a vone ntsrumi na hi pima tempele. A xivono lexo xi mu tiyisile Ezekiel nakone xi hi dondzrisa leswaku hi nga swi kota ku yingiseta ni ku yimelela minsinya ya milawu ya Yehovha mayelanu ni wugandzreli bya ku xwenga. (Ezek. 40:1-4; 43:10-12) Nakone hi nga tlhela hi pfuneka loko hi dondzra ni ku yanakanyisisa hi wutsrhokotsrhoko bya mintxhumu leyi yentiki leyi kumekaka a Zritwini dzra Xikwembu Nkulukumba.—Amaps. 112:7. Xihondzro Xa Ku Zrindzra 07/2023 p. 18 §§ 15-16

A Bibele dzri tale hi swikombiso leswinene leswi madjaha ma nga swi yetiselaka. Swikombiso leswo, swi vulavula hi vavanuna va nkameni wa khale lava a va zrandzra Xikwembu Nkulukumba nakone va hetisise wutiyanguleli bya ku hambana hambana akuva va hlayisa vhanu va Xikwembu Nkulukumba. U nga tlhela u kuma swikombiso leswinene a makazri ka vakriste lava wupfiki a ndangwini kumbe a bandleni. (Heb. 13:7) Nakone u ni xikombiso lexi hetisekiki xa Yesu Kriste. (1 Pet. 2:21) Nkama lowu u dondzraka swikombiso leswo hi wunyaminyami, tinyiki nkama wa ku yanakanyisisa hi matsrhamela lamanene lawa vavanuna lava va ma kombisiki. (Heb. 12:1, 2) Ntsrhaku ka leswo, vona leswaku u nga va yetisela hi ndlela yini vavanuna lava. Wanuna wa ku tlhavukanya a yanakanyisisa hi hinkwaswu na a nga si yentxa ntxhumu wa kukazri. Xileswo, tikazratele ku txutxela ni ku tama u va ni wuswitoti lebyo. Sungula ku dondzra misinya ya milawu ya Bibele u tlhela u yanakanysisa leswaku ha yini yi li yinene kwaku, u gama u tizrisa minsinya ya milawu yoleyo akuva u teka swiboho leswi taka nyonxisa Yehovha. (Amaps. 119:9) Ledzro i gwansu dzra lisima ledzri taka ku pfuna ku va mukriste lwa wupfiki.—Amapr. 2:11, 12; Heb. 5:14. Xihondzro Xa Ku Zrindzra 12/2023 pp. 24-25 §§ 4-5

Vapswele va nga pfuna vanavu kuva va yangula hi ndlela ya ku zrula loko va txhuka va vutisiwa leswi va kholwaka ka swone. (Yak. 3:13) Vapswele van’wana va londzrovota wugandzreli bya ndangu akuva va wupfisa vanavu. Va dondzra hi timhaka leti ku nga ha buliwaka ha tone a xikole nakone va hamba minkombiso ya ndlela leyi va nga nyikelaka nhlamulo ha yone. Va tlhela va dondzrisa vanavu ku vulavula hi ndlela ya ku zrula ni ku tlhela va pfuna vanavu ku djula ku tiva leswi yengetelekiki. Ku wupfisa vampshwa na ka ha li nkama swi nga va pfuna akuva va tlhamuxela van’wana leswi va swi kholwaka ni ku tlhela swi va pfuna kuva va tiyiseka leswaku va ni swivangelo swinyingi leswi twalaka swa kuva va kholwa leswi Bibele dzri swi hlayaka. A nxaxamelo lowu liki “Vantshwa Va Vutisa” ka pajina dzra jw.org wu ni mabokisi lawa ma nga pfunaka vampshwa. Wone wu hambeliwe ku pfuna vampshwa akuva va tiya ka leswi va swi kholwaka ni ku va pfuna ku lulamisela tinhlamulo hi mazritu yavu. Loko ndangu wu dondzra tinhlokomhaka leti xikan’we, hinkwaswu swizro swa ndangu swi nga dondzra ndlela ya ku yimelela lipfumelo dzra swone hi ndlela ya ku zrula ni leyi taka yentxa leswaku vhanu va djula ku tama va yingiseta. Xihondzro Xa Ku Zrindzra 09/2023 p. 17 § 10; p. 18 §§ 15-16

Xana u ke u va ni kungu dzra kukazri dzra moya kambe swi ku kazratela ku dzri tlhaselela? Tiva leswaku a wu wuswaku. Hi xikombiso, Philip a xiye leswaku a a fanela ku yampswisa swikhongoto swake kambe a swi mu kazratela ku kuma nkama wa ku yentxa leswo. Kasi Erika a a ni makungu ya ku kahlula a tlhasa ka ntlhanganu wa nsimu, kambe masiku hinkwawu a a tlhasa na a xwelile. Loko u tikazratela ku tlhaselela kungu dzra kukazri kambe u nga si swi kota, u nga titwi u nga pfuni ntxhumu. Ku tlhaselela kungu dzra kukazri nambi loko dzri nabyalile, swi djula nkama ni ku tikazrata. Ntsena hi ku va u tikazrata swi kombisa leswaku u byi nyika lisima wuxaka byaku na Yehovha nakone u djula ku yentxa leswi swi taka mu nyonxisa. Swi tivi leswaku Yehovha a ku nyika lisima ku tikazrata hinkwaku loku u ku yentxaka. I ntiyiso leswaku a nga yimeli leswaku hi yentxa swa ku tlula leswi hi nga swi kotaka. (Amaps. 103:14; Mik. 6:8) Kutani loko u hlawula kungu dzra kukazri vana lwa dzringaniselaka, hlawula kungu ledzri u taka kota ku dzri tlhaselela. Xihondzro Xa Ku Zrindzra 05/2023 p. 26 §§ 1-2

Vhanu lava nga ni xixixi va nga ha txhava, kambe a va pfumeleli ku txhava loko ku va sivela ku yentxa leswi nga swinene. Daniyele a a li mumpshwa lwa nga ni xixixi. A a dondzra wuprofeta lebyi a kutani byi tsraliwile a nkameni wake ku pastra ni wuprofeta bya Yeremiya. Hi kola ka dondzro leyo, Daniyele a tlhaselele wugamu bya leswaku Vayuda a va ta tsrhama Babilona ku dzringana nkama wa kukazri. (Dan. 9:2) Ku vona ku hetiseka ka wuprofeta bya Bibele handle ka ku ganaganeka ku tiyise ndlela leyi Daniyele a a mu dumba ha yone Yehovha. Mhunu lweyi a dumbaka Yehovha hi mbilu hinkwayu awa swi kota ku kombisa xixixi lexi djulekaka. (Tlhela u vona Varoma 8:32, 37-39.) Nakone xa lisima ngopfu, minkama hinkwayu Daniyele a a khongota ka Papayi wake wa le matilweni. (Dan. 6:10) A a kombela lidzrivalelo nakone a a hlaya ndlela leyi a a titwa ha yone a tlhela a kombela mpfunu. (Dan. 9:4, 5, 19) Daniyele a a li mhunu wa ku fana na hine, xileswo a nga pswaliwanga na a ni xixixi, kambe a swi kotile ku kombisa tsrhamela ledzro hi kola ka xikhongoto ni ku dumba Yehovha. Xihondzro Xa Ku Zrindzra 08/2023 p. 3 § 4; p. 4 § 7

Ku yingiseta wuhosi swi pfuna hine kun’we ni vhanu van’wana. Hi ndlela yini? Hikusa a hi khatisiwi hikola ka ku kala ku yingiseta. (Rom. 13:1, 4) Nakone loko hi yingiseta wuhosi byi ta swi vona leswaku Timboni ta Yehovha i vhanu lavanene. Hi xikombiso, malembenyana ntsrhaku a tikweni dzra Nigéria, a masotxha ma nghene a Ndlwini ya Wugandzreli na ku famba mintlhanganu, na va djuletela lava yalaka ku hakela tinemba. Kambe a muzrangeli wavu a va kombele leswaku va huma a Ndlwini ya Wugandzreli a va a ku: “A Timboni ta Yehovha minkama hinkwayu ta hakela tinemba.” Minkama hinkwayu loko hi yingiseta milawu hi yentxa leswaku vhanu va Yehovha va va ni ndhuma leyinene. Nakone swi nga yentxeka a ndhuma leyo yi ta sizrelela vamakwezru a nkameni lowu taka. Xihondzro Xa Ku Zrindzra 10/2023 p. 9 § 13

Man’we ya malandzra ya Yehovha ma ni malembe manyingi na ma yimela ku helisiwa ka xiyimu lexi xa misava. Hi vonela dzra ximhunu, swi nga ha voneka ingiki swidumbiso swa Xikwembu Nkulukumba swa hlwela ku hetiseka. Kambe Yehovha a yi tiva ha hombe ndlela leyi malandzra yake ma titwaka ha yone, a patsre ni ku byela Habakuke a ku: ‘Hikuva xivoniso xa ha tsramela nkama wa xone, xi hantla a ku heteleleni, xi nga ka xi nga kanganyisi. Nambi xi hlwela, xi lavisele; hikusa xi ta humelela swinene, xi nga ka xi nga hlweli.’ (Hab. 2:3) Xana Yehovha e hlaya mazrito lawo akuva a txhavelela ntsena Habakuke? Kumbexana mazrito lawa ma tizra ni kwezru namunhla? Hi ku huhuteliwa, mupostola Pawulo a tizrise mazritu lawo akuva a vulavula ni vakriste lava a va yimela misava leyimpshwa. (Heb. 10: 37) Kutani, nambiloko ka mavonela yezru swi yentxa ingiki xidumbiso xa Xikwembu Nkulukumba xo hlwela ku hetiseka, xone ‘xi ta humelela swinene, xi nga ka xi nga hlweli!’ Xihondzro Xa Ku Zrindzra 04/2023 p. 30 § 16

Ntalu wa Vaisrayele a va nga kholwi leswaku Yehovha a a tizrisa Moxe swanga muyimeli wake. (Atinhl. 14: 10, 11) Hi makhambi ya ku phindaphinda, va yale leswaku i Yehovha lweyi a a tizrisa Moxe leswaku a va kongomisa. Hi kola ka leswo, Yehovha a nga va pfumelelanga kuva va nghena a Tikweni dzra Xidumbiso. (Atinhl. 14:30) Kambe, van’we ka Vaisrayele va yingisete nkongomiso wa Yehovha. Hi xikombiso, Yehovha a hlaye leswi: ‘Kalebe . . . a ndzri [landzre] hi mbilu yakwe hinkwayu.’ (Atinhl. 14:24) Xikwembu Nkulukumba a hakele Kalebe, hi ku mu pfumelela ku tsrhama ka mbangu lowu a a navela ku tsrhama ka wone, a Kanana. (Yehoš. 14:12-14) A Vaisrayele lava pfumeleliwiki ku nghena a tikweni dzra xidumbiso va hi siyele xikombiso lexinene xa ku yingiseta minkongomiso ya Yehovha. Loko Yoxuwa a ve muzrangeli wa Vaisrayele ntsrhaku ka Moxe, vone a “va mu txhava . . . masiku hinkwawu ya ku hanya kwakwe”. (Yehoš. 4:14) Yehovha a va tovokisile a tlhela a va nyika tiko dzra xidumbiso.—Yehoš. 21:43, 44. Xihondzro Xa Ku Zrindzra 02/2024 p. 21 §§ 6-7

Swanga hi leswi dotori a kotaka ku tiva leswaku mbilu yezru yi hanye ha hombe kumbe im-him, hi ku tizrisa voko dzrezru, hi ndlela leyi fanaka hi nga tiva leswaku a lizrandzru dzrezru ha Yehovha dzri le ka matsrhamela wani ka ndlela leyi hi va zrandzraka ha yone van’wana. Loko hi gungula leswaku lizrandzru dzrezru hi vamakwezru dzri holile, leswo swi nga ha hlaya leswaku na dzrone lizrandzru dzrezru ha Yehovha dzri pumbekile. Kambe loko hi tama hi kombisa lizrandzru ka vamakwezru swi kombisa leswaku lizrandzru dzrezru ha Xikwembu Nkulukumba dzri tiyile. Hi fanela ku kazrateka loko lizrandzru dzrezru hi vamakwezru dzri hola. Ha yini? Hikusa swi nga ha hlaya leswaku hi le nghozini hi tlhelo dzra moya. Mupostola Yohane a swi khanyise ha hombe loko a hi dzrimuxa leswaku: “Lweyi a kalaka a nga mu zrandzri makwavu lweyi a mu vonaka, a nge mu zrandzri Xikwembu Nkulukumba lweyi a kalaka a nga mu voni.” (1 Yoh. 4:20) Hi dondzra yini? Hi kota ku nyonxisa Yehovha ntsena loko hi ‘zrandzranana’.—1 Yoh. 4:7-9, 11. Xihondzro Xa Ku Zrindzra 11/2023 p. 8 § 3; p. 9 §§ 5-6

Loko a ha li mumpshwa, hosi Yehowaxi a teke xiboho xa wutlhazri. A a nge na papayi, xileswo a yingisete swilayu swa Yehoyada, muprista lwenkulu wa ku dumbeka. Yehoyada a wundle Yehowaxi swanga n’wanake. Nakone hi kola ka xikombiso lexinene xa Yehoyada, Yehowaxi a a tiyimisele ku tizrela Yehovha ni ku pfuna vhanu va tiko dzrake ku yentxa leswi fanaka. Yehowaxi a patsre ni ku sungula ku pfuxeta tempele dzra Yehovha. (2 Makr. 24:1, 2, 4, 13, 14) Loko vapswele vaku kumbe mhunu mun’wana va ku dondzrisa ha Yehovha ni milawu yake, u nga tiyiseka leswaku leyo i nyiko ya lisima leyi va nga ku nyikaka yone. (Amapr. 2:1, 10-12) Vapswali vaku va nga ha ku dondzrisa hi tindlela ta ku siyanasiyana. Vapswali vaku va ta nyonxa ngopfu swinene loko u tizrisa swilayu swa Bibele leswi va ku nyikaka swone. Kambe xa lisima ngopfu hi leswaku Yehovha a ta nyonxa nakone wuxaka byenu byi ta ya byi kula. (Amapr. 22:6; 23:15, 24) Leswi i swivangelo swinene swa ku yetisela xikombiso xa Yehowaxi loko a ha li mumpshwa! Xihondzro Xa Ku Zrindzra 09/2023 pp. 8-9 §§ 3-5

Yehovha a dumbisa ku yingiseta swikhongoto swezru. Yehovha a ma zrandzra ngopfu malandzra yake hikusa ma mu tizrela hi ku dumbeka, xileswo minkama hinkwayu a ta yingiseta swikhongoto swa wone. (Amaps. 10:17; 37:28) Kambe, leswo a swi hlayi swone leswaku a ta hi nyika hinkwaswu leswi hi swi kombelaka. Swin’wana swa leswi hi swi kombelaka hi to swi kuma ntsena a misaveni leyimpshwa. Yehovha a yingiseta swikhongoto swezru na a ni nkongometo wake a miyanakanywini. (Eza. 55:8, 9) Wun’we wa minkongometo yoleyo i ku tata misava hi vhanu lava nyonxiki va tlhela va va ni wumun’we hansi ka Mfumu wake. Kambe Sathana a hlaya leswaku vhanu a va ta nyonxa loko a vo ti kongomisa ha wuswavu. (Gen. 3:1-5) Ku kombisa leswaku leswi Sathana a swi hlayiki i madzrimi, Yehovha a pfumelele vhanu leswaku va tifuma. Hi nkota ya leswo, minfumu ya vhanu yi vanga swikazratu swinyingi leswi hi kumanaka na swone namunhla. (Ekles. 8:9) Ha swi twisisa leswaku Yehovha a nge te susa swikazratu leswi hinkwaswu swoswi. Xihondzro Xa Ku Zrindzra 11/2023 p. 21 §§ 4-5

Yehovha a dumbise leswaku hi kola ka Abrahamu, matiko lamanyingi a ma ta tovokisiwa. Kambe, loko Abrahamu kutani a ni 100 wa malembe nakone Sara a ni 90, kambe a va nga si va ni n’wana. Hi ku ya hi vonela dzra ximhunu, a swi tikomba ingiki Abrahamu na Sara a swi nge ti koteka leswaku va va ni n’wana. Lexo ku ve xiyimu xa ku kazrata ka Abrahamu. Kambe, “a a ni lipfumelo dzra leswaku a a tava papayi wa matiko manyingi”. (Rom. 4:18, 19) Hi wugamu, n’wana lweyi a va mu yimelile a pswaliwile. Abrahamu a ve Papayi wa Izaki. (Rom. 4:20-22) Hi lani hi swi voniki ha kone, hi nga yamukeliwa hi Yehovha hi tlhela hi voniwa swanga lava lulamiki hi lani swi viki ha kone ka Abrahamu. Ku hlaya ntiyiso, Pawulo a swi khanyise ha hombe loko a ku: “A mazritu lama liki: ‘A voniwe a li lweyi a lulamiki’ a ma tsraliwanga hi mhaka ya [Abrahamu] ntsena, kambe ni hi mhaka yezru, na hine hi ta voniwa hi li lava lulamiki, hikusa hi ni lipfumelo kwake, Yene lweyi a pfuxiki Yesu.” (Rom. 4:23, 24) Ku fana na Abrahamu, na hine hi djula ku va ni lipfumelo ledzri kombisiwaka hi mintizro ni ku va ni dumbu dzra leswaku swidumbiso hinkwaswu swa Yehovha swi ta hetiseka. Xihondzro Xa Ku Zrindzra 12/2023 p. 7 §§ 16-17

Loko u lavisana ni xiyimu lexi ku yentxaka u txhava, dzrimuka leswaku Yehovha awa xi vona xikazratu xaku ni ndlela leyi u titwaka ha yone. Hi xikombiso, Yehovha a nga vonanga ntsena xikazratu lexi Vaisrayele a va li na xone a Egipta, kambe a vone ni ‘ku xaniseka ka vhanu’ vake. (Eks. 3:7) Swi nga yentxeka u tivutisa leswaku Yehovha a ku pfunisa kuyini ku lavisana ni swikazratu. Swi ngo yini u khongota u kombela Yehovha a ku pfuna ku vona ndlela leyi a ku pfunaka ha yone. (2 Tih. 6:15-17) Yanakanya hi leswi: Xana u same u tiyisiwa hi wukaneli bya kukazri kumbe yangulo ya makwezru wa kukazri a bandleni? Xana ku ni buku dzra kukazri, vhidiyu kumbe lisimu ledzri samiki dzri ku tiyisa? Xana mhunu wa kukazri a same a ku komba mazritu kumbe tsralwa ledzri ku tiyisiki? Minkama yin’wana, hi nga ha dzrivala ndlela leyi lizrandzru dzra wumakwezru ni ku tiyisiwa loku hi ku kumaka a zritwini dzra Xikwembu Nkulukumba swi hi pfunaka ha yone. Kambe leswo i swihiwa swa ku hlamalisa leswi Yehovha a hi nyikaka swone. (Eza. 65:13; Mar. 10:29, 30) Lexo i xitiyisekiso xa leswaku Yehovha awa zro’weka ha hine. (Eza. 49:14-16) Nakone swi hi tiyisekisa leswaku hi nga mu dumba Yehovha. Xihondzro Xa Ku Zrindzra 01/2024 pp. 4-5 §§ 9-10

Na ku sale kutsrongo akuva a tlhelela matilweni, Yesu a dzrimuxe vadondzrisiwa vake leswaku a va fanela ku nyikela wumboni mayelanu na yene a “Yerusalema, a Yudeya hinkwaku ni Samariya, ku ya tlhasa mimbangwini ya le kule swinene ya misava”. (Mint. 1:8; Luk. 24:46-48) Hi ku famba ka nkama, vazrangeli va Vayuda va khome mupostola Petro na Yohane va va yisa a Sanedri. Loko va tlhasile va va txhaviselile va tlhela va va tsrimbisa ku zrezra. (Mint. 4:18, 21) Petro na Yohane va ku: “Swi kambelani ha wuswenu, leswaku swi nga va swi lulamile a mahlweni ka Xikwembu Nkulukumba kuva hi yingiseta n’wine ku tlula ku va hi yingiseta yene. Kambe hine, a hi nge tsrhiki ku vulavula hi mintxhumu leyi hi yi voniki ni ku yi yingela.” (Mint. 4:19, 20) Loko Petro na Yohane va ntsrhunxiwile, a vadondzrisiwa va hambe xikhongoto ka Yehovha va mu kombela leswaku a tama a va pfuna ku hetisisa ku zrandzra kwake. Yehovha a xi yingelile xikhongoto lexo lexi sukelaka mbilwini.—Mint. 4:31. Xihondzro Xa Ku Zrindzra 05/2023 p. 5 §§ 11-12

Ku dzringana nkama wa ku leha swinene, Yehovha kun’we ni N’wanake lweyi a zrandzrekaka va kombisane lizrandzru ledzrikulu. A wuxaka byavu i bya khale swinene ku tlula wuyaku hinkwabyu. Yehovha a kombise lizrandzru dzrake ka Yesu hi ndlela leyi xiyekaka swinene, hi lani hi dondzraka ha kone, ka tsralwa dzra namunhla. Yehovha a a ta va a hlaye leswi: ‘Hi yene lweyi ni mu yamukelaka.’ Kambe, yene a a djula leswaku hi yi tiva ndlela leyi a mu zrandzraka ha yone Yesu, xileswo a mu vitane hi “N’wananga, lweyi a zrandzrekaka”. Yehovha a a tikhuza hi wumhunu bya Yesu ni hi leswi a a ta nyikela wutomi byake. (Efe. 1:7) Nakone Yesu a a nga ganaganeki leswaku Papayi wake awa mu zrandzra. A lizrandzru dzra Yehovha a dzri li dzra ha kakunene ka Yesu lakakuva a a tiyiseka leswaku awa mu zrandzra. Hi ku phindaphinda a a hlaya na a tiyisekile leswaku Papayi wake awa mu zrandzra.—Yoh. 3:35; 10:17; 17:24. Xihondzro Xa Ku Zrindzra 01/2024 p. 28 § 8

Yanakanya hi xiyimo lexi: Mhunu lweyi u mu zrandzraka a khanela ku biha ha wene. Wene wa swi tiva leswaku i madzrimi; kambe vhanu van’wana va kholwile leswi a swi hlayiki. A xa ku biha hi leswaku vhanu volavo va ma hangalasile madzrimi wolawo nakone lava va ma twiki va ma kholwili. A wu ta titwisa kuyini hi mhaka leyi? Nakunene a swi ta ku vavisa ngopfu, a hi swone xana? Xiyimo lexi xi hi pfuna ku twisa ha hombe ndlela leyi Yehovha a titwiki ha yone loko vito dzrake dzri ntxhimisiwa. Mun’we ka vanake va moya, a hlaye madzrimi mayelanu na yene ka wansati wa ku sungula, Evha. Nakone, Evha a ma kholwile madzrimi lawo. Hi kola ka madzrimi wolawo, vapswele vezru va ku sungula va pfukele Yehovha. Xileswo, xidoho ni lifu swi hangalake ka vhanu hinkwavu. (Gen. 3:1-6; Rom. 5:12) Swikazratu hinkwaswu leswi hi swi vonaka namunhla a misaveni swa ku fana ni lifu, tiyimpi ni ku xaniseka, swi ve kone hi kola ka madzrimi ya Sathana. Xana Yehovha a titwisa kuyini loko a vona swikazratu hinkwaswu leswi vangiwaka hi madzrimi lawa? Handle ka ku ganaganeka, leswo swi mu vavise ngopfu Yehovha, kambe leswo a swi mu yentxanga a va Xikwembu Nkulukumba wa mona kumbe lwa beketelaka xiviti. Nakunene, Yehovha a ha tama a va “Xikwembu Nkulukumba lweyi a nyonxiki”.—1 Tim. 1:11. Xihondzro Xa Ku Zrindzra 02/2024 p. 8 §§ 1-2

Hi nga va ni ku tiyimisela ka ku fana ni ka Yosefa hi ndlela yini? U nga hlawula na ka ha li swoswi leswi u taka swi yentxa loko u kumana ni ndzringo. U nga hlweli ku yala loko mintxhumu yi nga fambisani ni ku zrandzra ka Yehovha, nakone u nga tsrhameli ku pimisa ha yone. (Amaps. 97:10; 119:165) Loko u yentxa leswo u ta kota ku hlula ndzringo. Swi nga yentxeka kutani u tiyiseka leswaku u kume ntiyiso ni leswaku u djula ku tizrela Yehovha hi mbilu yaku hinkwayu. Kambe swi nga ha yentxeka u titwa u nga lulamelanga ku tinyiketela ka Yehovha ni ku babatisiwa. Ka xiyimu lexi, u nga yentxa swa ku fana ni leswi Davhida a swi yentxiki. Yene a kombele Yehovha a ku: ‘Ndzri kambe, Xikwembu Nkulukumba, u tiva mbilu yanga. Ndzri dzringe, u tiva miyanakanyu yanga: u vona loko nha dzri famba hi ndlela ya ku somboloka. U ndzri fambisa hi ndlela leyi nge ke na ku hela.’ (Amaps. 139:23, 24) Yehovha a tovokisa “lava mu djuletelaka hi timbilu tavu hinkwatu”. Ku tikazrata loku u ku yentxaka akuva u babatisiwa ku kombisa leswaku na wene u djuletela Yehovha hi mbilu yaku hinkwayu.—Heb. 11:6. Xihondzro Xa Ku Zrindzra 03/2024 p. 6 §§ 13-15

A muprista lwenkulu a a yimela xitsrhungu a mahlweni ka Xikwembu Nkulukumba. A muprista lwenkulu wa ku sungula a tikweni dzra Israyele ku ve Aroni. Yene a a hlawuliwe ha Yehovha loko ku khanguliwa a tabernakele. Kambe, hi lani Pawulo a tlhamuxeliki ha kone, “vanyingi swi djule va va vaprista hi ku pfaleta van’wana hi leswi lifu dzri va siveliki ku ya mahlweni va tizra swanga vaprista.” (Heb. 7:23-26) Swanga hi leswi a va li vhanu va ku kala ku hetiseka a vaprista lavakulu a va fanela ku nyikela magandzrelo akuva va dzrivaleliwa swidoho swavu. Lani hi vona ku hambana a makazri ka vaprista lavakulu va Israyele ni muprista lwenkulu Yesu Kriste. Swanga muprista lwenkulu, Yesu Kriste “a tizra . . . ka tende dzra ntiyiso ledzri yimisiwiki hi Yehovha, ku nga li mhunu.” (Heb. 8:1, 2) Pawulo a tlhamuxele leswaku “leswi Yesu a yaka mahlweni a hanya hi lani ku nga helikiki, a wuprista byake a byi na wa ku byi siva”. Pawulo a tlhele a hlaya leswaku hi “lweyi a kalaka a nga na bati, lweyi a kalaka a nga fani ni vadohi nikutsrongo” nakone ku hambana ni vaprista lavakulu va Israyele, yene “a swi vileli kuva a nyikela a magandzrelo siku ni siku” hi kola ka swidoho swake. Xihondzro Xa Ku Zrindzra 10/2023 p. 26 §§ 8-9

Matilo ya khale” ku hlayiwa mimfumu leyi kongomisiwaka hi Sathana ni mademona yake. (Mat. 4:8, 9; 1 Yoh. 5:19) A zritu, “misava”, a Bibeleni dzri nga tizriseliwa ku vulavula hi vhanu lava tsrhamaka misaveni. (Gen. 11:1; Amaps. 96:1) Xileswo, “a misava ya khale” ku hlayiwa vhanu lava yentxaka swa ku biha. Yehovha a nge ti zama ku lulamisa matilo ni misava leyi nga kone swoswi, a matsrhan’wini ya leswo a ta swi helisa hi ku helela, a swi siva hi “matilo lamampshwa” ni “misava leyimpshwa”; leswi liki, a ta tisa Mfumu lowu taka fuma vhanu va ku lulama. Yehovha a ta yentxa vhanu ni misava swi va leswimpshwa hi ku swi yentxa swi va leswi hetisekiki. Hi lani muprofeta Ezaya a hlayiki ha kone, Yehovha a ta yentxa misava hinkwayu yi va mbangu wa ku xonga ku fana ni xizramba xa Edeni. A ku pfuxetiwa koloko ku ta voneka ni le vhanwini. Yehovha a dumbisa leswaku hi ta hanyisiwa mavabyi hinkwawu. Lava ku fa matihlo, timbheveve ni va ku limala va ta hanyisiwa nambi vafi va ta pfuxiwa.—Eza. 25:8; 35:1-7. Xihondzro Xa Ku Zrindzra 11/2023 p. 4 §§ 9-10

“Nhlomulo lowukulu” wu ta sungula swa kola ni kola. (Mat. 24:21) Kambe ku hambana ni timhangu tin’wana, wone hi wu yimelile. Kolomu ka 2.000 wa malembe lama khalutiki, Yesu a byele vadondzrisiwa vake ku tsrhama na va lulamele siku ledzri. Loko hi tsrhama na hi lulamile swi ta hi nabyalela ku tsremakanya ka xiyimu lexi xa ku kazrata ni ku pfuna van’wana ku yentxa leswi fanaka. (Luk. 21:36) Swi ta djula hi tiyisela akuva hi yingiseta Yehovha, na hi tiyiseka leswaku a ta hi sizrelela. Hi nga yentxa yini loko vamakwezru va luzekeliwa hi mintxhumu ya kukazri kumbe hinkwayu leyi va nga na yone? (Hab. 3:17, 18) Swi ta djula hi kombisa wunene akuva hi va pfuna hi leswi va swi vilelaka. Xana hi ta yangulisa kuyini loko hi kola ka nhlaselo wa matiko swi sindzrisa kuva hi ya tsrhama ka mbangu wun’we ni vamakwezru? (Ezk. 38:10-12) Hi fanela ku va ni lizrandzru ledzrikulu hi vamakwezru akuva hi kota ku lavisana ni minkama leyi ya ku kazrata. Xihondzro Xa Ku Zrindzra 07/2023 p. 2 §§ 2-3

Nuna ni nsati va nga dondzra ka xikombiso xa Akila na Prisila, vatekani lava a va hloniphiwa hi vakriste va ku sungula. (Rom. 16:3, 4) A va zrezra xikan’we ni ku tlhela va pfuna van’wana xikan’we. (Mint. 18:2, 3, 24-26) Ku hlaya ntiyiso, minkama hinkwayu loko Bibele dzri vulavula hi Akila na Prisila dzri va hlaya na va li xikan’we. Xana vatekani va nga xi yetisela hi ndlela yini xikombiso xavu? Yanakanya hi mintizro leyi mi nga na yone akuva mi yi yentxa. Xana mi nga yentxa yin’wana ya mintizro leyi xikan’we swanga vatekani? Hi xikombiso, Akila na Prisila a va zrezra xikan’we. Xana na n’wine mi nga tibekela kungu dzr aku yentxa leswi sfanaka? A va tlhela va hamba mintizro ya kukazri xikan’we. Swi nga yentxeka mi nga tizri xikan’we ka mintizro ya ku tihanyisa, kambe xana mi nga yentxa mintizro ya kukazri na mi li xikan’we ya ku fana ni ku basisa ndlwini kun’we ni ku bekisa muti? (Ekles. 4:9) Loko mi pfunana ka mintizro ya kukazri mi ta va ni wumun’we swanga ntlawa ni ku tlhela mi va ni mikhandlu yinyingi ya ku bula. Xihondzro Xa Ku Zrindzra 05/2023 pp. 22-23 §§ 10-12

Hikwezru minkama yin’wana ha txhava. Hi xikombiso, loko hosi Sawulo a hlongolise Davhida a djula ku mu dlaya, Davhida a tsrutsrumile a ya ka doropa dzra Gati a Filistiya. Akixi hosi ya Gati a gungule leswaku Davhida a a li sotxha dzra ntamu ledzri vhanu a va dzri yimbelelela va hlaya leswaku a dlaye ‘madzana ya madzana’ ya Vafilista. Loko Davhida a tive leswo ‘a txhava ngopfu’. (1 Sam. 21:10-12) Davhida a a kazratekile a tivutisa leswaku Akixi a a ta mu yentxa yini hi leswi a tiviki mhaka leyi. I yini lexi pfuniki Davhida ku hlula ku txhava koloko? Ka buku dzra Amapsalma 56, Davida a tlhamuxela ndlela leyi a titwiki ha yone nkama lowu a a li Gati. Ka Amapsalma lawa a yi beke livaleni ndlela leyi a a titwa ha yone, kambe a tlhele a kombisa leswi mu pfuniki ku hlula ku txhava koloko. Davhida a a dumba Yehovha loko a titwa na a txhava. (Amaps. 56:1-3, 11) Davhida a a ni swivangelo leswi twalaka swa ku dumba Yehovha. Hi ku tovokisiwa hi Yehovha, Davhida na a nga swi yimelanga a kume ndlela ya ku huma, a ti hambe nhlanyi. Xileswo, ka xiyimu lexo Akixi a a nga ha djuli ku mu dlaya kambe a a djula leswaku a suka a famba. Hi ndlela leyo, Davhida a hulukile.—1 Sam. 21:13–22:1. Xihondzro Xa Ku Zrindzra 01/2024 p. 2 §§ 1-3

I vamani lava hlayiwaka ka tsralwa dzra namunhla? Ku hlayiwa vatotiwa lava pfuxiwiki! Kutani loko mutotiwa wa wugamu a ya matilweni na nhlomulu lowukulu wu li kusuhi ni ku hela, xin’we xa swiyavelo swa ku sungula lexi vatotiwa va taka xi kuma i ku va va ya lwa yimpi. Tsrhaku ka loko va ta tekiwa va ya matilweni va ta va kun’we na Kriste ni tintsrumi take ta ku xwenga nakone va ta lwa ni valala. Yanakanya hi leswi, van’we ka vatotiwa lava va ha liki kone lani misaveni namunhla va duhwalile nakone a ve he na ntamu. Kambe, loko va ta pfuxiwa va ya hanya matilweni va ta va swivumbiwa swa moya, leswi nga fiki, leswi nga ni ntamu lowukulu nakone swi ta ya tipatsra na Yesu, hosi ya yimpi. Ntsrhaku ka loko yimpi ya Armagedoni yi helile, va ta tizra kun’we na Yesu akuva va pfuna vhanu leswaku va va lava hetisekaka. Handle ka ku ganaganeka, loko va ta va na va li matilweni va ta kota ku yentxela mintxhumu yinyingi vamakwezru lava zrandzrekaka lava taka va lani misaveni ku tlula leyi va kotiki ku va yentxela yone loko va ha li vhanu va ku kala ku hetiseka! Xihondzro Xa Ku Zrindzra 02/2024 pp. 6-7 §§ 15-16

Vhanu van’wana lava kutani va lulameliki ku tinyiketela ni ku babatisiwa, minkama yin’wana va ganaganeka leswaku va fanela ku swi yentxa kumbe im-him. Va nga ha tivutisa leswi: Loko ntsrhaku ka babatiso nho yentxa xidoho lexikulu ni va ni susiwa bandleni ke? Loko u txhava leswo, u nga tiyiseka leswaku Yehovha a ta ku nyika hinkwaswu leswi u swi vilelaka “ku yentxela leswaku [u] hanya hi ndlela leyi fanelekaka ka Yehovha akuva [u] mu nyonxisa”. (Kol. 1:10) Nakone a ta ku nyika ntamu lowu u wu vilelaka akuva u yentxa leswi nga swinene. Yehovha a pfune vhanu vanyingi akuva va yentxa leswi nga swinene. (1 Kor. 10:13) I hi mhaka leyo a nga vhanu vatsrongo lava susiwaka a mabandleni. Yehovha a hi pfuna kuva hi tama hi dumbeka kwake. Hinkwezru hi dzringeka ku yentxa mintxhumu ya ku biha. (Yak. 1:14) Kambe u nga hlawula leswi u taka swi yentxa loko u dzringiwa. Ntiyiso wa mhaka hi leswaku hi wene u taka tihlawulela leswi u taka swi yentxa a wuton’wini byaku. Vhanu van’wana va hlaya leswaku a swi koteki ku lawula matitwela yezru ni leswi hi nga swi yentxaka. Kambe leswo a hi ntiyiso, u nga swi kota ku lawula ku navela kwaku ka ku biha. Xihondzro Xa Ku Zrindzra 03/2024 p. 5 §§ 11-12