Inkurikizi z’Ubwibone—Woba Uzi Ukuntu Zikomeye?

WOBA urigera uhura n’umuntu arondera n’ibigirankana kugushira hasi? Kumbure umuyobozi, umukoresha, umuhagarikizi w’akazi canke mbere incuti, yoba yarakurabiye hasi akakurabana akagaye? Mbega wumvise umerewe gute kuri uwo muntu? Woba wumvise ukunze kamere yiwe? Birumvikana ko utayikunze? Kubera iki? Kubera ko ubwibone butangira canke bukaniga ikiyago.

Ubwibone buratuma umuntu akengera abandi bantu bose, kugira ngo we yame aboneka ko ari we ahambaye. Umuntu afise agatima mwene ako ni gake avuga neza abandi. Yama afise ivyo avuga vyo kunegura abandi—ati “egome, kanaka kuba ameze neza birashoboka, ariko arafise iyi ngorane canke aka kanenge.”

Mu gitabu kimwe, Thoughts of Gold in Words of Silver, ubwibone budondorwa ko ari “kamere mbi yama yica ibintu. Irasenyura umuntu, igatuma asigara ata ciza kinini kimuriko.” Vyoba none bitangaje kuba ata n’umwe yumva amerewe neza iyo ari kumwe n’umuntu w’umunyabwibone? Nkako, ubwibone bukunda gutuma umuntu abura abagenzi b’ukuri. Ico gitabu nyene kibandanya kivuga yuko “ahubwo usanga mw’isi hakundwa abicisha bugufi, si abicisha bugufi babigirana ukwiyemera, ariko hakundwa abicisha bugufi vy’ukuri.” Birabereye rero kuba Bibiliya ivuga iti: “Ubgibone bg’umuntu buzomusubiza hasi, arik’uw’umutima uciye bugufi azoronka icubahiro.”—Imigani 29:23.

Ariko rero, turetse ukuba ubwibone bugira ico bwononye ku bucuti umuntu aba afitaniye n’abantu canke icubahiro bomuhaye, ubwibone bugira ico bwononye gute ku bucuti umuntu aba afitaniye n’Imana? Imana ibona gute abanyabwibone, abanyabwishime hamwe n’abishira hejuru? Mbega ubwibone canke ukwicisha bugufi vyoba hari ico bivuze ku Mana?

Icigwa mu vy’Ukwicisha Bugufi

Umwanditsi w’Imigani yahumekewe avuga ati: “Ubgibone bgitangira imbere y’uguhona, kand’umutima wihaya witangira imbere y’ukugwa. Kugira umutima wicishije bugufi ugafatanya n’abagorwa biruta kugabangana iminyago ufatanije n’abibone.” (Imigani 16:18, 19) Ubukerebutsi buri muri ayo majambo buragaragazwa n’ivyabaye ku mujenerali Namani w’Umusiriya, uwabayeho mu gihe c’umuhanuzi Elisa w’Umwisirayeli.

Namani yari umunyamibembe. Mu kurondera icomukiza, yagize urugendo rumushikana i Samariya yiyumvira yuko Elisa yomuha umukebukano. Aho kuza kubonana na we, uwo muhanuzi yarungitse umusuku wiwe amurungikanye amabwirizwa aha Namani amusaba ko yokwiyoga incuro indwi mu Ruzi Yorodani. Namani yarababajwe n’ukuntu afashwe be n’inama agiriwe. None ni kuki uwo muhanuzi atashoboye gusohoka ngo baganire imbonankubone hako arungika umusuku? Kandi vy’ukuri, uruzi urwo ari rwo rwose rwo muri Siriya rwari rumeze nka Yorodani! Ubwibone ni yo yari ingorane yawe. None vyavuyemwo iki? Agahirwa, impanuro nziza yahawe ni yo yisunze. “Nukw’aramanuka, yībira muri Yorodani ibihetangabo ndwi, nk’uk’uwo muntu w’Imana yari yamubariye. Ako kanya umubiri wiwe uhinduka nk’uw’umwana mutoya, arahumanuka.”—2 Abami 5:14.

Rimwe na rimwe hari inyungu zihambaye umuntu akura ku kwicisha bugufi na gutoyi.

Inkurikizi z’Amanyama

Ariko rero, inkurikizi ubwibone buduteza zirashobora kuba izikomeye cane kuruta iciza gusa twotakaza canke inyungu twohomba. Hariho urundi rugero rw’ubwibone rwihishije mw’ijambo hubris ry’Ikigiriki. Nk’uko bivugwa n’incabwenge y’Umugiriki Barclay, “hubris ni ubwibone buvanze n’ubugizi bwa nabi . . . , ka kagaye karimwo ukwishima gatuma umuntu ahonyanga abandi.”

Akarorero gatomoye ka bene ubwo bwoko bw’ubwibone bukabije karaboneka muri Bibiliya. Ni ivyabaye kuri Hanuni, umwami w’i Amoni. Igitabu Étude perspicace des Écritures gisigura giti: “Biturutse ku buntu mvarukundo Nahashi yari yaragiriye Dawidi, Dawidi yatumye intumwa guhumuriza Hanuni aho aburiye se wiwe. Mugabo Hanuni, kubera yari yumvishijwe n’abaganwa biwe yuko urwo rwari urwenge rusa Dawidi yagize kugira ngo atate ico gisagara, yaratetereje abasuku ba Dawidi mu kubamwa ubwanwa bw’umusaya umwe no mu gukebamwo kubiri impuzu zabo gushika ku kibuno hanyuma arabarungika.”a Ku biraba ico kintu cabaye, Barclay avuga ati: “Ivyo bintu yari abagiriye vyaranga amanyama. Cari igitutsi, ubukazi, uguteterezwa mu bantu, ivyo vyose bifatiwe hamwe.”—2 Samweli 10:1-5.

Egome, umuntu w’umunyabwibone arashobora kuba umunyamanyama, umuntu atisoneye, atetereza abandi. Anezerwa no kubabaza umuntu ata kumwumvira imbabazi, kandi akagira akanyamuneza igihe abonye uwundi muntu amerewe nabi, ateterewe. Ariko ugusenyura canke gutesha umuntu urupfasoni bigira ingaruka z’uburyo bubiri. Bituma umuntu abura umugenzi, kandi bikanashoboka ko amuhindukira umwansi.

None Umukirisu nyakuri uwo ari we wese vyoshika gute ngo agire mwene ubwo bwibone bubabaza, kandi Shebuja yategetse ko ‘akwiye gukunda mugenziwe nk’uko yikunda’? (Matayo 7:12; 22:39) Ico ni ikintu twovuga ko gihushanye n’ukuntu Imana na Kirisitu bameze. Kuri ivyo, Barclay aravuga iki kintu kidakwiye gufatwa minenegwe: “Amanyama ni ubwibone butuma umuntu ahiga n’Imana.” Ni bwa bwibone buvuga buti: “Nta Yehova ariho.” (Zaburi 14:1, NW) Canke nk’uko vyavuzwe muri Zaburi 10:4: “Umunyakibi kubg’ubgibone bgiwe aravuga, at’Eka ntazohōra. Ivyiyumviro vyiwe vyose bihūrira mur’iri jambo, ngo Nta Mana iriho.” Ubwibone canke ubwishime mwene ubwo ico bukora si ukwonkora umuntu ku bagenzi no ku ncuti vyonyene, ariko kandi buramwonkora ku Mana. Umve ntuze iyo nkurikizi!

Ntureke ngo Ubwibone Bugukegete

Ubwibone bushobora kwibonekeza mu buryo bwinshi: hari ubwibone buva ku kwiratira igihugu, ku bwoko, ku bibanza abantu barimwo, ku mashure, ku butunzi, ku cubahiro, no ku bubasha. Ntihashobora kubura uburyo ubwibone bwokuzako bitagoranye, kandi bugakegeta kamere yawe.

Hari abantu baboneka ko bicisha bugufi igihe bari n’ivyo bagirana n’ababaruta canke abo bingana. Mugabo ni ibiki bihora bishika igihe wa muntu yahora aboneka nk’uwicisha bugufi ashikiriye ikibanza c’ubukuru? Bidatevye, aca ahinduka intwazamukazo ituma ubuzima bw’abo afata ko ari batobato bwuzura amarushwa! Ivyo vyoshobora gushika kuri bamwebamwe igihe baba bambaye umwambaro canke akaranzi kerekana ububasha bafise. N’abakozi ba Leta nyene barashobora gucika abanyabwibone mu migenderanire yabo n’abanyagihugu, bakiyumvira yuko ico abanyagihugu babereyeho ari ukubakorera, atari ugukorerwa. Ubwibone burashobora gutuma uba umunyamukazo, ntugire impuhwe; ukwicisha bugufi kwo gushobora gutuma uba umuntu w’umutima mwiza.

Yezu yari gushobora kuba umunyabwibone n’umunyamukazo mu bigishwa biwe. Yari umuntu atagira agasembwa, Umwana w’Imana, akaba yakorana n’abigishwa b’abanyagasembwa, b’amaraso ashushe, abashaka guhata ibintu. Yamara none Yezu abamwumviriza yabahaye ubutumire bumeze gute? Yavuze ati: “Ni muze kuri jewe mwese abananiwe n’abaremerewe, ndabaruhura; [nimwishireko ingogo, NW] yanje, munyigireko; kuko nd’umugwaneza, niyoroheje mu mutima; namwe muzoronka uburuhukiro bg’imitima yanyu. Kukw [ingogo, NW] yanje itababaza, n’umutwaro wanje uhwahutse.”—Matayo 11:28-30.

Twoba imisi yose twihata gukurikira akarorero ka Yezu? Canke twoba dusanga duhora tuba abahambazi, intagondeka, intwazamukazo, imburakigongwe, abanyabwibone? Nka kumwe kwa Yezu, gerageza kuruhura, ntube uwukandamiza. Niwirinde ubwibone ntibugukegete.

Ukwiyubaha Gutandukanye n’Ukwishima

Kamere bijanye mugabo nziza, ni ukwiyubaha kuri ku rugero kandi kwumvikana. Ukwiyubaha, bisobanura yuko ukwitwararika ico abandi bantu bakwiyumvirako. Uritwararika ukuntu uboneka n’ukuntu uzwi. Umugani umwe w’Ikirundi uvuga uti: “Ubana na suneba ugasuneba nka we.” Niba ushima kwifatanya n’abantu b’abanyarwangara, b’abanebwe, bifata nabi kandi bakoresha imvugo mbimbi, urumva rero ko uzoba nka bo. Inyifato zabo zizokwandukira, uhave witesha urupfasoni, nka bo.

Ariko ntiwumve, hariho ukundi kurenza urugero—ni ukugira ubwibone butuma umuntu agira ubwishime canke ubwirate. Abanyabwenge b’ivyanditswe n’Abafarizayo bo mu gihe ca Yezu barishimira imigenzo yabo hamwe n’ukuntu baboneka nk’abanyomoje mu vy’ugukurikira idini. Ku biberekeye Yezu yarabuye ati: “Ibikorwa vyabo vyose babikora kugira ngo barābge n’abantu, kukw amambe yabo yanditswemw’amajambo y’Imana bayagira manini, ubuyonga bg’impuzu zabo bakabgongereza [ngo baboneke ko basenga cane]. Bakunda ivyicaro vyo haruguru aho batumiwe, n’intebe z’icubahiro mu masinagogi, no kugirwako bgakeye mu tuguriro, no kwitwa n’abantu: Rabi.”—Matayo 23:5-7.

Igikenewe rero ni inyifato iri ku burimbane. Uribuka kandi yuko Yehova abona umutima, atabona gusa ivy’inyuma. (1 Samweli 16:7; Yeremiya 17:10) Ukwibona ubugororotsi si ukugororoka kw’Imana. Ariko ubu rero ikibazo ni iki: Twoshobora gute gutsimbataza ukwicisha bugufi nyakuri kandi tukirinda gushikirwa na za nkurikizi zikomeye z’ubwibone?

[Akajambo k’epfo]

[Ifoto ku rup. 4]

Ukwichisha bugufi gutoyi kwarazaniye Namani ivyiza vyinshi