Nitube Abafatanijwe Neza
1 Ni kangahe utangazwa n’ukuntu umubiri w’umuntu waremanywe ubuhanga? (Zab. 139:14) Urugingo rumwerumwe rwose rw’umubiri rusenyera ku mugozi umwe n’izindi. Ijambo ry’Imana rigereranya ishengero rya gikirisu n’umubiri ukora neza. Bari munsi y’Umutwe wabo, ari wo Kirisitu, abagize ishengero bose, ari bo bihimba vyaryo, ‘bateranijwe neza, bafatanijwe n’ibifashisho vy’ingingo zaryo zose.’ (Ef. 4:16a) Ku bw’ivyo, Yehova arashobora gukoresha abasavyi biwe bunze ubumwe kugira ngo barangure ibintu vy’akaroruhore.
2 Abari bagize ishengero ryo mu kinjana ca mbere bakora “bashize hamwe” mu kwitwararikana mu vyo bari bakeneye mu vy’impwemu no mu vy’umubiri. (Ibikorwa 2:44-47, UB) Bafashwe mu mugongo na Yehova, barahanganye bongera baratsinda uruhamo rukaze bafatanye mu nda. (Ivyak. 4:24-31) Baratangaza ubutumwa bw’Ubwami aho baja hose, barahetura igice c’isi cari kizwi muri ico gihe bashikiriza inkuru nziza. (Kol. 1:23) Mu bihe vya none, ishengero rya gikirisu ryararanguye ivyo bintu nyene ku rugero mbere runini rifatanye mu nda. Ni ibintu ibihe bituma haba ubwo bumwe?
3 Kwunga Ubumwe Bitumwe n’Inyigisho Iva ku Mana: Kw’isi yose, turafitaniye ubumwe biciye ku gusenga kwacu. Ivyo bishoboka gute? Turemera icese umuhora uboneka Yehova akoresha mu kuturonsa “ibifungurwa [vy’impwemu] ku gihe kibereye.” (Mat. 24:45, NW) Turakura ubwatsi kandi ku bw’ “abantu b’ingabirano” (NW) yaturonkeje ngo babe abigisha mw’ishengero. Uko twemera twicishije bugufi intunganyo Yehova yashizeho zo kutugaburira mu buryo bw’impwemu, ugutahura Ijambo ry’Imana kwacu kurongerekana maze kukatuvyurira icipfuzo dusanzwe dufise co kwigana Yezu turi abigishwa biwe. Dutegerezwa kubandanya kwiga Ijambo ry’Imana, tukihata tubigiranye ubwira kugira ngo dushike ku “kugiriranira ubumwe buva ku kwizera.” (Ef. 4:8, 11-13) Woba uterera ku bumwe bwacu bwo mu vy’impwemu mu gusoma Bibiliya ku musi ku musi?
4 Kwunga Ubumwe Biciye ku Kwifatanya kw’Abakirisu: Urukundo ruratuma twunga ubumwe mu kwifatanya cane ku makoraniro ya gikirisu. Kuri ayo makoraniro, ‘turiyumviranako.’ (Heb. 10:24, 25) Ivyo ntibirimwo gupfa kuraba gusa uko umuntu aboneka inyuma ahubwo birimwo kumenya vy’ukuri abavukanyi bacu, tukababona nk’uko Yehova ababona, tukabona ko bafise agaciro. (Hag. 2:7) Uko twumva amajambo bavuga aserura ukwizera kwabo, urukundo tubafitiye rurashika kure kandi n’ubumwe bwacu bugakomera. Woba uzwi yuko uri umuntu yitaba amakoraniro y’ishengero udahorereza?
5 Gukorana mu Ndimiro: Kwamamaza inkuru nziza turi kumwe n’abo dusangiye ukwizera biratuma twunga ubumwe mu gukora ivyo Imana igomba. Intumwa Paulo yarakunda cane ‘abakozi bakorana na we ku bw’Ubwami bw’Imana.’ (Kol. 4:11) Gusangira ivyabonywe be no gusahirizanya igihe turi mu busuku biradufasha kurangura ibanga rya gikirisu twashinzwe bikongera bigakomeza umugozi wacu wunga ubumwe.—Kol. 3:14.
6 Impwemu Yera Iratuma Haba Ubumwe: Uko twitwararika gukorana umwete ivyo Yehova agomba, araduhezagira mu kuduha impwemu yiwe. Iyo mpwemu iradufasha kurengera ibidutandukanya maze tukabana mu bumwe. (Zab. 133:1) Iratuvyurira umutima wo “kuzigamisha ubumwe buva k[u m]pwemu umugozi w’amahoro.” (Ef. 4:3) Umwe wese muri twebwe arashobora guterera agacumu k’ubumwe ku guhuza inama kuri mu basavyi b’Imana mu kugaragaza ivyamwa vy’impwemu yera mu buryo dufata abandi.—Gal. 5:22, 23.
7 Gusukura dusenyera ku mugozi umwe turi munsi y’ububemutwe bwa Kirisitu bituma “kuri we [umubiri] uronka gukura kwawo, ukubakwa mu rukundo.” (Ef. 4:16b) Ikiruta vyose, biraninahaza Yehova, we “Mana [itanga] amahoro.”—Rom. 16:20.