Outubro

Kodi imwe musanentseka toera kubvera? Dhavidhi akhanentsekambo, na thangwi ineyi, iye aphemba Mulungu: “Ndicitiseni kukhala na cifuno cakukubverani.” (Mas. 51:12) Dhavidhi akhafuna Yahova. Ngakhale tenepo, midzidzi inango akhanentseka toera kubvera; ife tisanentsekambo. Thangwi yanji? Thangwi yakutoma, tabalwa na cipendamiro cakukhonda bvera. Yaciwiri, Sathani ndzidzi onsene asatiyesera toera tikhale akukhonda bvera ninga iye. (2 Akor. 11:3) Yacitatu, tiri kukhala mu dziko yakudzala na anthu a makhaliro akukhonda bvera yakuti iri na “nzimu unaphata basa cincino muna ana akukhonda bvera.” (Aef. 2:2) Ife nee tisafunika basi ene kuwangisira toera kucalira cipendamiro cakudawa, mbwenye tisafunikambo kucalira mayesero a Sathani pabodzi na dziko ino akuti anaticitisa kukhala anthu akukhonda bvera. Kusiyapo pyenepi, tisafunikambo kubvera Yahova pabodzi na ale anaphatisira iye toera kutitsogolera. w23.10 tsa. 6 ¶1

Tisapfundzanji na cirengo cidacita Yezu ca kucinja madzi kudza vinyu? Tisapfundza kufunika kwa kukhala akucepeseka. Yezu nee adzikuza na cirengo ceneci cidacita iye, pontho cipo adzikuza na pinthu pinango pikhacita iye. Mbwenye mwakucepeseka, pontho mwakubwereza-bwereza, iye akhapasa mbiri Babace. (Juw. 5:19, 30; 8:28) Tingakhala akucepeseka ninga Yezu, ife nee tinadzikuza thangwi ya pinthu pinacita ife. Nee tisafunika kudzikuza thangwi ya pinthu pinacita ife, mbwenye thangwi ya mwai uli na ife wakutumikira Yahova. (Yer. 9:23, 24) Tisafunika kumpasa mbiri thangwi iye ndi wakuthema kupaswa mbiri. Mwandimomwene mbatidasowa ciphedzo ca Yahova, ife nee mbatidakwanisa kucita nee cinthu cibodzi cadidi. (1 Akor. 1:26-31) Tingakhala akucepeseka, nee tinafuna kupaswa mbiri na pinthu pyadidi pinacitira ife anango. Thangwi ife tisakomerwa na kudziwa kuti Yahova asaona, pontho asakomerwa na pinacita ife. (Onani Mateu 6:2-4; Aheb. 13:16) Mwandimomwene, ife tisakomeresa Yahova tingatowezera Yezu mbatikhala akucepeseka.—1 Ped. 5:6. w23.04 tsa. 4 ¶9; tsa. 5 ¶11-12

Mpostolo Paulu akulumiza Akristu toera anyerezere pinafuna anango. Tinaphatisira tani uphungu unoyu pa misonkhano? Ife tisafunika kukumbuka kuti anango asafunambo kutawira pa misonkhano. Nyerezerani basi, mungacedza na axamwali anu, kodi musalonga ndimwe basi mbamukhonda kuapasambo mwai toera alonge? Nkhabe. Imwe musafuna kuti iwo alongembo. Munjira ibodzi ene, ife tisafunambo kupasa mwai anthu azinji toera atawire pa misonkhano. Thangwi ibodzi mwa njira zadidi kakamwe zakuwangisa abale na alongo athu ndi kuapasa mwai toera alonge pinakhulupira iwo. (1 Akor. 10:24) Ife tisafunika kupereka ntawiro wacigwagwa toera anango akhalembo na mwai wakutawira. Ngakhale pakupereka ntawiro wacigwagwa, musafunika kucalira kulonga ntsonga zizinji. Mungalonga pinthu pyonsene piri pa ndima, anango nee anakhalabve na pinthu toera kulonga. w23.04 tsa. 22-23 ¶11-13

Tisafunika kukumbuka kuti cinthu cakufunika kakamwe ndi kupitiriza kuphedza anango makamaka mukuamwazira mphangwa. Ife tisafunikambo kukhala na maonero akulinganira mu utumiki wathu. Ife tisamwazira mphangwa anthu akuti asakhulupira pinthu pyakusiyana, a makhaliro akusiyana na adakuzwa m’mbuto zakusiyana. Mpostolo Paulu akhali na maonero akulinganira, pontho tinakwanisambo kupfundza na citsandzo cace. Yezu asankhula Paulu toera akhale ‘mpostolo kuna madzindza anango.’ (Aroma 11:13) Natenepa, Paulu akhamwazira mphangwa Ayuda, Agerego, anthu akupfundza, akukhonda pfundza, atongi na amambo. Toera kukhuya mitima ya anthu anewa, Paulu akhacita ‘pyonsene pikhakwanisa iye toera kuphedza anthu a makhaliro onsene.’ (1 Akor. 9:19-22) Iye akhanyerezera mwadidi mbuto idakula anthu akhacedza na iye na pikhakhulupira iwo. Pyenepi pyamphedza toera kukhala na maonero akulinganira mbacedza na m’bodzi na m’bodzi munjira yakuti mbidancitisa kufuna Mulungu. Ife tinakwanisambo kucita mwadidi utumiki wathu tingakhala na maonero akulinganira mbatinyerezera mwadidi anthu anamwazira ife mphangwa. w23.07 tsa. 23 ¶11-12

Anthu akukhurudzika nee ndi akusowa mphambvu. Tisafunika kuwangisira toera kukhala akukhurudzika tingathimbana na cinentso. Kukhurudzika ndi ubodzi mwa “misapo ya nzimu wakucena.” (Agal. 5:22, 23) Fala Yacigerego idathumburuzwa “kukhurudzika” midzidzi inango ikhaphatisirwa toera kulonga makavalo a ntsanga akuti akhafuyiwa. Maseze kavalo ineyi isakhala yakukhurudzika, pyenepi nee pisabveka kuti ndi yakusowa mphambvu. Mphapo ife anthu tinakwanisa tani kukulisa n’khaliro wakukhurudzika, mu ndzidzi ubodzi ene mbatikhala amphambvu? Toera tikwanise kucita pyenepi, ife tisafunika kuphemba nzimu wa Mulungu toera utiphedze kukulisa n’khaliro unoyu wadidi kakamwe. Pinthu pidacitika na anthu azinji pisapangiza kuti pyenepi ndi pyakukwanisika. Mboni za Yahova zizinji zisatawira mwakukhurudzika pakulonga na anyakutcinga, pontho pyenepi pisaphedza anthu toera akhale na maonero adidi thangwi ya ife.—2 Tim. 2:24, 25. w23.09 tsa. 15 ¶3

M’masomphenya, mpostolo Juwau aona akulu a mpingo 24 kudzulu mbakalambira Yahova. Iwo asimba Mulungu, pontho alonga kuti iye athema kutambira “mbiri, cilemedzo na mphambvu.” (Apok. 4:10, 11) Aanju akukhulupirika alimbo na mathangwi mazinji toera kusimba na kulemedza Yahova. Iwo ali kudzulu pabodzi na iye, pontho asandziwa mwadidi. Iwo asaona makhaliro ace kubulukira mu pinthu pinacita iye. Mu ndzidzi unaona iwo pinacita Yahova, iwo asakulumizika toera kunsimba. (Yobe 38:4-7) Ife tisafunambo kusimba Yahova m’maphembero athu, mbatilonga pinthu pinakomerwa na ife thangwi ya iye. Mu ndzidzi unaleri imwe na kupfundza Bhibhlya, yeserani kuona makhaliro a Yahova akuti musakomerwa nawo kakamwe. (Yobe 37:23; Aroma 11:33) Buluka penepo, pangani Yahova mabvero anu thangwi ya makhaliro anewa. Ife tinakwanisambo kusimba Yahova thangwi yakutiphedza pabodzi na abale na alongo athu pa dziko yonsene.—1 Sam. 2:1, 2. w23.05 tsa. 3-4 ¶6-7

Mu caka ca 1919, atumiki a Mulungu asiya kubvungazikana na Bhabhilonya Wankulu. Mu caka ceneci, “m’bandazi wakukhulupirika na wandzeru” atoma kuphata basa toera anthu a mitima yadidi atome kufamba ‘Munjira Yakucena.’ (Mat. 24:45-47; Iza. 35:8) Basa idacita anango nduli toera kusasanyira nseu yaphedza anthu adatoma kufamba mu nseu unoyu toera kupfundza pizinji thangwi ya Yahova na cifuniro cace. (Mis. 4:18) Iwo mbadakwanisambo kucinja umaso wawo mbacita pinthu pinakomeresa Yahova. Yahova nee akhadikhira kuti atumiki ace anewa acite macinjo onsene pa ndzidzi ubodzi ene. Mbwenye iye aaphedza toera acinje mwapang’ono na pang’ono. Ife tinakhala akutsandzaya kakamwe tingakwanisa kukomeresa Mulungu wathu mu pinthu pyonsene pinacita ife! Miseu yonsene isafunika kusasanyirwa toera ipitirize kukhala mwadidi. Kutomera mu caka ca 1919, basa yakusasanyira “Njira Yakucena” isapitiriza kuphedza anthu azinji toera kusiya Bhabhilonya Wankulu. w23.05 tsa. 17 ¶15; tsa. 19 ¶16

Mathubo Akutonga asapfundzisambo anyakuphedza a makomiti akusiyana-siyana a Mathubo Akutonga. Anyakuphedza anewa ali na mabasa mazinji, pontho iwo ali akukhunganyika toera kuphata mwadidi mabasa awo kuti apitirize kuphedza mabira a Kristu. Akristu onsene akudzodzwa anaenda kudzulu dhuzi na pakumala kwa nyatwa ikulu. Pa ndzidzi unoyu atumiki a Yahova anapitiriza kumulambira mwakukhulupirika. Thangwi ya kutsogolerwa na Yezu Kristu, ife nee tinasiya kulambira Yahova. Ndimomwene kuti mu ndzidzi unoyu tinapomokerwa na nsoka wa madzindza Goge wa Magoge. (Ezek. 38:18-20) Mbwenye kupomokerwa kweneku nee kunakhala mu ndzidzi uzinji, pontho nsoka unoyu nee unapembera. Iwo nee unakwanisa kucitisa mbumba ya Yahova kusiya kumulambira. Mwakukhonda penula, Yahova anapulumusa mbumba yace. Mpostolo Juwau, aona m’masomphenya “mwinji ukulu” wa mabira anango a Kristu. Pontho Juwau adzindikira kuti “mwinji ukulu” unoyu ndi ale adabuluka mu “nyatwa ikulu.” (Apok. 7:9, 14) Mwakukhonda penula, Yahova anadzatipulumusa. w24.02 tsa. 5-6 ¶13-14

Mphapo tisafunika kucitanji toera tikhale na nzimu wakucena? Tisafunika kuuphemba, kupfundza Mafala a Mulungu na kusonkhana na abale na alongo mu gulu ya Yahova yakuti isatsogolerwa na nzimu wace. Kucita pyenepi kunatiphedza toera kukulisa “misapo ya nzimu wakucena.” (Agal. 5:22, 23) Mulungu asapereka nzimu wace wakucena kuna ale anapitiriza kukhala na manyerezero adidi na makhaliro adidi. Iye nee anapitiriza kutipasa nzimu wace wakucena khala ife tisanyerezera pinthu pyakuipa na kupicita. (1 Ates. 4:7, 8) Toera tipitirize kukhala na nzimu wakucena, tisafunikambo kucalira “kupwaza maprofesiya.” (1 Ates. 5:20) “Maprofesiya” analongwa pa vesi ineyi ndi mphangwa zinatipasa Yahova mukuphatisira nzimu wace wakucena ninga mphangwa zinalonga pya ntsiku ya Yahova na pinthu pinapangiza kuti ntsiku ineyi iri dhuzi. Ife nee tisafunika kunyerezera kuti ntsiku ya Yahova peno Armajedhoni nee inabwera mu ndzidzi wathu. M’mbuto mwace, tisapitiriza kuinyerezera mukukhala na makhaliro adidi na ‘kucita pinthu pinapangiza kuti ndife anthu adaperekeka kuna Mulungu.’—2 Ped. 3:11, 12. w23.06 tsa. 12-13 ¶13-14

Kodi tisafunika kucitanji tingaona mafoto a ucipezipezi mwakukhonda dikhira? Ife tisafunika kusiya kuayang’ana mwakucimbiza. Pinakhala pyakukhonda nentsa kuna ife kucita pyenepi tingakumbuka kuti cinthu cakufunika kakamwe ndi uxamwali wathu na Yahova. Ngakhale mafoto akuti nee asapangiza ucipezipezi, anakwanisa kuticitisa kukhala na manyerezero aulukwali. Natenepa, ife tisafunika kuacalira toera tikhonde kukhala na manyerezero anewa muntima mwathu. (Mat. 5:28, 29) Nkulu wa mpingo wa ku Tailândia anacemerwa David alonga: “Ine ndisabvundzika: ‘Maseze mafoto nee asapangiza ucipezipezi, kodi Yahova asakomerwa ndingapitiriza kuyang’ana mafoto anewa?’ Njira ineyi yakunyerezera isandiphedza toera kucita pinthu mwandzeru.” Kugopa kucita pinthu pyakuti pinatsukwalisa Yahova kunatiphedza toera kucita pinthu mwandzeru. Kugopa Mulungu ndi “kutoma kwa udziwisi.” w23.06 tsa. 23 ¶12-13

“M’makwartu” analongwa panango ndi m’mipingo yathu. Yahova apikira kuti anatitsidzikiza mu ndzidzi wa nyatwa ikulu tingapitiriza kuntumikira pabodzi na abale na alongo athu. Natenepa tisafunika kuwangisira, tayu basi toera kupirira abale na alongo athu, mbwenye toera kuafuna kakamwe. Toera tidzapulumuke tisafunika kucita pyenepi! “Ntsiku ikulu ya Yahova” inadzakhala yakunentsa kakamwe kuna anthu onsene. (Sof. 1:14, 15) Ntsiku ineyi inadzakhalambo yakunentsa kuna atumiki a Yahova. Mbwenye tingakhunganyika cincino tinadzakhala akukhurudzika mbatiphedzambo anango. Ife tinadzapirira pinentso pyonsene pinafuna kudzathimbana na ife. Abale na alongo athu angathabuka, ife tinawangisira toera kuaphedza mukuabvera ntsisi na kuapasa pinafuna iwo. Tingafuna abale na alongo athu cincino, pinadzakhala pyakukhonda nentsa toera kuafuna ntsogolo. Natenepa Yahova anadzatipasa umaso wakukhonda mala mu dziko yakuti nee munadzaonekabve pidengwa, pontho nyatwa nee zinadzakumbukirwabve.—Iza. 65:17. w23.07 tsa. 7 ¶16-17

Mafala a Mulungu kazinji kene asalonga kuti anthu akukhulupirika akhali amphambvu. Mbwenye midzidzi inango, iwo akhalimbo akusowa mphambvu. Mwacitsandzo, Mambo Dhavidhi midzidzi inango akhali “wakuwanga ninga phiri,” mbwenye midzidzi inango ‘akhagopa.’ (Mas. 30:7) Nzimu wa Mulungu wapasa mphambvu kakamwe Samisoni, mbwenye iye akhadziwa kuti angasowa mphambvu za Mulungu mbadakhala ‘wakusowa mphambvu ninga anthu anango onsene.’ (Aton. 14:5, 6; 16:17) Amuna anewa akukhulupirika akhali amphambvu basi ene thangwi Yahova akhadaapasa mphambvu. Mpostolo Paulu akhadziwa kuti akhafuna ciphedzo ca Yahova toera akhale na mphambvu. (2 Akor. 12:9, 10) Iye akhathabukambo na mautenda. (Agal. 4:13, 14) Midzidzi inango iye akhanentsekambo toera kucita pinthu pyadidi. (Aroma 7:18, 19) Pontho midzidzi inango Paulu akhadzudzumika mbakhonda kudziwa pinthu pikhafunika iye kucita. (2 Akor. 1:8, 9) Ngakhale tenepo, mu ndzidzi ukhali iye wakufewa, iye akhali wamphambvu. Munjira ipi? Yahova akhapasa mphambvu Paulu toera apirire nyatwa. w23.10 tsa. 12 ¶1-2

Khala midzidzi inango musapibva kuti ndimwe wakusowa basa, kumbukani kuti Yahova akusankhulani toera kuntumikira. (Juw. 6:44) Yahova asaona pinthu pyadidi piri na m’bodzi na m’bodzi wa ife, pontho asadziwa mwadidi ntimathu. Kusiyapo pyenepi, iye asationa mwakusiyana na njira inaoneka ife. (2 Kro. 6:30) Natenepa, Yahova angalonga kuti ndimwe wakufunika kuna iye, imwe munakwanisa kun’nyindira. (1 Juw. 3:19, 20) Mbatidzati kudziwa undimomwene, anango a ife panango acita pinthu pyakuti mpaka lero pisaacitisa kupasika mulando. (1 Ped. 4:3) Ngakhale ale akuti asatumikira Yahova mu ndzidzi uzinji panango asapitiriza kuwangisira toera kusiya pinthu pinango pyakuipa. Ndiye tanimbo imwe? Kodi midzidzi inango musapibva kuti Yahova nee akulekererani? Khala ndi tenepo, ndi pyadidi kukumbuka kuti ngakhale atumiki a Yahova a mu ndzidzi wakale akhalambo na mabvero anewa. Mwacitsandzo, mpostolo Paulu akhatsukwala kakamwe mu ndzidzi ukhanyerezera iye madawo ace. (Aroma 7:24) Ndimomwene kuti mpostolo Paulu atcunyuka madawo ace buluka penepo mbabatizwa. Ngakhale tenepo, iye akhaoneka ninga “wangʼono kakamwe pakati pa apostolo” na “nyakudawa kakamwe.”—1 Akor. 15:9; 1 Tim. 1:15. w24.03 tsa. 27 ¶5-6

Cinthu cibodzi cinapfundza ife thangwi ya cisankhulo cakuipa cidacita Mambo Yeowasi ndi cakuti tisafunika kusankhula axamwali akuti asafuna Yahova, pontho asafuna kuntsandzayisa. Ife nee tisafunika kucita uxamwali basi ene na anthu a thunga yathu. Kumbukani, Yeowasi akhali mwana kakamwe kupiringana xamwali wace, Yeoyadha. Bvundzikani tenepa thangwi ya axamwali anasankhula imwe: ‘Kodi iwo asandiphedza toera ndiwangise cikhulupiro canga kuna Yahova? Kodi iwo asandiwangisa toera ndibvere midida ya Mulungu? Kodi iwo asalonga thangwi ya Yahova na pinthu pinapfundza iwo m’Bhibhlya? Asapangiza kuti asalemedza midida ya Mulungu? Kodi iwo asandipanga basi ene pinakomerwa na ine peno asandisandika ndingacita cinthu cakuipa?’ (Mis. 27:5, 6, 17) Mwandimomwene, khala axamwali anu nee asafuna Yahova, iwo nee anakuphedzani. Mbwenye khala iwo asafuna Yahova, ndzidzi onsene anakuphedzani!—Mis. 13:20. w23.09 tsa. 9-10 ¶6-7

Alfa ndi letra yakutoma ya alfabheto Wacigerego, pontho Omega ndi letra yakumalisa. Pidaphatisira iye mafala akuti “Alfa na Omega,” Yahova apangiza kuti angalonga cinthu, asacicita. Yahova apanga Adhamu na Eva kuti:“Balanani, munjipe, dzadzani dziko yapantsi mbamuitsalakana.” (Gen. 1:28) Pidalonga Yahova mafala anewa pikhali ninga alonga “Alfa.” Unadzafika ndzidzi wakuti anthu aungwiro na akubvera anadzadza dziko yapantsi mbaicitisa kukhala paraizu. Pa ndzidzi unoyu pinadzakhala ninga Yahova alonga “Omega.” Pidamala iye kucita “kudzulu, dziko yapantsi na pinthu pyonsene piri mwenemu” Yahova atipasa cinyindiro cakuti anakwanirisa cifuniro cace. Pisabveka kuti cifuniro ca Yahova kuna anthu na dziko yapantsi cinadzakwanirisika pakumala kwa ntsiku yacinomwe.—Gen. 2:1-3. w23.11 tsa. 5 ¶13-14

Ayuda mbadacita ulendo buluka ku Bhabhilonya kuenda ku Izraeli mu miyezi minai, mbwenye Yahova apikira kuti nee cinthu cibodzi mbicidaapingiza toera kucita ulendo unoyu. Ayuda akukhulupirika akhadziwa kuti mbadakhala na nkhombo zizinji kakamwe angawangisira toera kubwerera ku dziko yawo. Iwo mbadakhala na nkhombo yakulambira Yahova munjira yadidi. Mbwenye mu Bhabhilonya nee mukhali na templo ya Yahova. Kusiyapo pyenepi, mu Bhabhilonya nee mukhali na guwa toera Aizraeli apereke ntsembe ninga pikhalonga Mwambo wa Mose, pontho nee mukhali na masasanyiro a anyantsembe toera kupereka ntsembe zenezi. Pontho mu dziko ineyi mukhali na anthu azinji kakamwe akhalambira alungu authambi, kupiringana ale akhabvera midida ya Yahova. Natenepa, Ayuda akukhulupirika akhafuna kakamwe kubwerera ku dziko yawo kwakuti mbadatoma pontho kulambira Yahova munjira yadidi. w23.05 tsa. 14-15 ¶3-4

Khala tisafuna kupitiriza kufamba “ninga ana a ceza” tisafunika kukhala na ciphedzo ca nzimu wakucena. Thangwi yanji? Thangwi ndi pyakunentsa kakamwe kupitiriza na makhaliro adidi mu dziko ino inakhala ife. (1 Ates. 4:3-5, 7, 8) Nzimu wakucena unatiphedza toera kucalira manyerezero a dziko akuti asaphataniza udziwisi wa anthu na maonero akuti nee asabverana na manyerezero a Yahova. Nzimu wakucena unatiphedzambo toera kucita “ntundu onsene wa udidi, ulungami na undimomwene.” (Aef. 5:9) Njira inango toera titambire nzimu wakucena ndi kucita phembero. Yezu alonga kuti Yahova ‘anapasa nzimu wakucena ale anam’phemba.’ (Luka 11:13) Kusiyapo pyenepi, tingasimba Yahova pa misonkhano, tinakwanisambo kutambira nzimu wakucena. (Aef. 5:19, 20.) Tingakhala na nzimu wakucena, iwo unatiphedza toera kucita pinthu pinakomeresa Mulungu. w24.03 tsa. 23-24 ¶13-15

Kodi imwe musafuna kukhala akupirira kakamwe? Khala ndi tenepo citani phembero thangwi ya pyenepi. Kupirira ndi ubodzi mwa misapo ya nzimu. (Agal. 5:22, 23) Natenepa, ife tinakwanisa kuphemba nzimu wakucena na ciphedzo ca Yahova toera kukulisa n’khaliro unoyu. Tingathimbana na nyatwa zakuti zisayesera kupirira kwathu, tisafunika ‘kupitiriza kuphemba’ nzimu wakucena toera utiphedze kukhala akupirira. (Luka 11:13) Ife tinakwanisambo kuphemba Yahova toera atiphedze kuona pinthu munjira inapiona iye. Tingamala kucita phembero, tisafunika kucita pyonsene pinakwanisa ife toera tikhale akupirira ntsiku zonsene. Tingapitiriza kucita phembero toera tikhale akupirira, mbatiwangisira toera kupangiza n’khaliro unoyu, Yahova anatiphedza toera tikhale akupirira kakamwe maseze kale nee tikhali akupirira. Pontho anatiphedza toera kunyerezera pitsandzo pya m’Bhibhlya. M’Bhibhlya muli na pitsandzo pya anthu azinji adapangiza n’khaliro wakupirira. Tinganyerezera pitsandzo pyenepi, ife tinapfundza njira zizinji toera kukhala akupirira. w23.08 tsa. 22 ¶10-11

Yezu apasa cinyindiro mpostolo Pedhru cakuti Yahova mbadantsalakana. Pidalamuswa Yezu muli akufa, iye acita cirengo toera kuphedza Pedhru na apostolo anango kuti akwanise kupha ntsomba. (Juw. 21:4-6) Cirengo ceneci capasa Pedhru cinyindiro cakuti Yahova mbadantsalakana mu pinthu pikhafuna iye. Panango mpostolo Pedhru akumbuka mafala a Yezu adalonga iye kuti Yahova mbadatsalakana ale anapitiriza “kuikha pa mbuto yakutoma Umambo wa Mulungu.” (Mat. 6:33) Pyenepi pyaphedza Pedhru toera kuikha pa mbuto yakutoma basa yakumwaza mphangwa, tayu basa yakusodza. Iye amwaza mphangwa mwacipapo pa ntsiku ya Pentekoste 33 Pakumala Kubalwa kwa Kristu, mbaphedza anthu azinji kakamwe kutawira mphangwa zadidi. (Mabasa 2:14, 37-41) Mukupita kwa ndzidzi, iye aphedza Asamariya na anthu anango akuti nee akhali Ayuda toera kukhala anyakupfundza a Kristu. (Mabasa 8:14-17; 10:44-48) Mwakukhonda penula, Yahova aphatisira Pedhru munjira yadidi kakamwe toera kuphedza anthu a mitundu yonsene kuti akhale Akristu. w23.09 tsa. 20 ¶1; tsa. 23 ¶11

Pidapita pyaka piwiri pakumala kufudzwa kwa Yerusalemu na Abhabhilonya, Mambo Nabhukodhonozore wa ku Bhabhilonya alota dzimunthu ikulu kakamwe. Natenepa iye alonga kuti mbadapha amuna onsene audziwisi, kuphatanizambo Dhanyeli angacimwana kulonga ndoto zidalota iye na kufokotoza mabvekero azo. (Dhan. 2:3-5) Dhanyeli akhafunika kucita pinthu mwakucimbiza, thangwi umaso wawo ukhali pangozwi. Iye “aenda kuna mambo mbaphemba ndzidzi toera afokotoze ndoto ya mambo.” (Dhan. 2:16) Pyenepi pisapangiza kuti Dhanyeli akhali na cipapo na cikhulupiro. Thangwi Bhibhlya nee isalonga kuti Dhanyeli akhadafokotoza kale ndoto. Iye aphemba axamwali ace “kuti acite phembero kuna Mulungu wakudzulu toera aabvere ntsisi thangwi ya cibisobiso ceneci.” (Dhan. 2:18) Yahova atawira maphembero awo. Na ciphedzo ca Yahova, Dhanyeli afokotoza ndoto ya Nabhukodhonozore. Natenepa Dhanyeli pabodzi na axamwali ace nee aphiwa. w23.08 tsa. 3 ¶4

Onani nkhombo zakukhala wakupirira. Tingakhala akupirira, ife tisakhala akutsandzaya na akukhurudzika. Pontho kupirira kunatiphedza toera kukhala na ungumi wadidi na manyerezero adidi. Tingakhala akupirira, tinabverana mwadidi na anango. Kusiyapo pyenepi, mpingo usakhala wakuphatana kakamwe. Tingasoswa, kukhonda kuipirwa mwakucimbiza kunatiphedza toera tikhonde kutekeresa pinthu. (Mas. 37:8, cidzindikiro.; Mis. 14:29) Kusiyapo pyonsene, tisatowezera Babathu wakudzulu, pontho tinakhala na uxamwali wakuwanga na iye. Mwandimomwene, kupirira ndi n’khaliro wakuti usatiphedza kakamwe. Midzidzi inango ndi pyakunentsa kupirira, mbwenye na ciphedzo ca Yahova, ife tinakwanisa kupitiriza kupangiza n’khaliro unoyu. Pontho mu ndzidzi unadikhira ife mwakupirira dziko ipswa, tinakwanisa kukhala na cinyindiro cakuti “maso a Yahova asayang’anira ale anan’gopa, ale anadikhira ufuni wace wakukhonda mala.” (Mas. 33:18) Natenepa tendeni tipitirize kukhala akupirira. w23.08 tsa. 22 ¶7; tsa. 25 ¶16-17

Tiyago alonga kuti munthu unoyu panango ananyerezera kuti ali na cikhulupiro, mbwenye macitiro ace asapangiza kuti iye nee ali na cikhulupiro. (Tiya. 2:1-5, 9) Tiyago alongambo pya munthu wakuti aona ‘m’bale wace wamamuna peno wankazi wakuti ali na usiwa peno nee ali na cakudya’ mbwenye iye mbakhonda kum’phedza. Maseze munthu unoyu alonge kuti ali na cikhulupiro, mabasace asapangiza kuti iye nkhabe cikhulupiro. (Tiya. 2:14-16) Tiyago alonga kuti Raabhe akhali citsandzo cadidi thangwi iye apangiza cikhulupiro kubulukira mabasace. (Tiya. 2:25, 26) Iye akhadabva pya Yahova, pontho adzindikira kuti Mulungu akhatsalakana Aizraeli. (Yos. 2:9-11) Mabasace apangiza kuti iye akhali na cikhulupiro. Thangwi ya cikhulupiro, iye atsidzikiza Aizraeli awiri akhadaenda kaona dziko mu ndzidzi wakuti umaso wawo ukhali pangozwi. Na thangwi ineyi, maseze Raabhe akhali wakusowa ungwiro, pontho nee akhabvera Mwambo wa Mose, iye aoniwa kuti akhali wakulungama ninga Abhrahamu. Citsandzo cace cisapangiza kuti ndi pyakufunika kakamwe kupangiza kuti tiri na cikhulupiro kubulukira mabasa athu. w23.12 tsa. 5-6 ¶12-13

Ninga Akristu, ife nee tisakomerwa basi ene na kubvesesa pipfundziso pyakutoma pya m’Bhibhlya. Na ciphedzo ca nzimu wakucena wa Mulungu, ife tisafuna kupfundza “ngakhale udziwisi wakubisika wa Mulungu.” (1 Akor. 2:9, 10) Imwe munakwanisa kucita pfundziro ya munthu paekha toera kuwangisa uxamwali wanu na Yahova. Mwacitsandzo, imwe munakwanisa kupfundza kuti iye apangiza tani ufuni kuna atumiki ace a mu ndzidzi wakale, pontho pyenepi pisapangiza tani kuti iye asakufunanimbo. Imwe munakwanisambo kupfundza kuti Yahova akhafuna kuti Aizraeli amulambire tani, pontho lero asafunambo kuti timulambire tani. Peno munakwanisa kupfundza mwadidi maprofesiya analonga pya Yezu adakwanirisika mu umaso wace na mu utumiki wace pa dziko yapantsi. Imwe munatsandzaya mungapfundza mphangwa zenezi na ciphedzo ca Índice das Publicações da Torre de Vigia peno Bukhu Inaphatisira Mboni za Yahova Pakufufudza. Kupfundza mwadidi Bhibhlya kunawangisa cikhulupiro canu, pontho kunakuphedzani toera ‘kugumana cidziwiso ca Mulungu.’—Mis. 2:4, 5. w23.10 tsa. 18-19 ¶3-5

Fala yakuti “kakamwe” idaphatisira mpostolo Pedhru isabveka “kufuthula.” Khundu yaciwiri ya vesi ineyi isalonga pinthu pinafuna ife kucita tingafuna kakamwe anango. Kufuna kakamwe anango kunatiphedza toera kuphimbira madawo a abale na alongo athu. Nyerezerani meza yakuti yapswipa kakamwe makhundu anango. Ndi pyakukwanisika kufuthula nguwo toera kuphimbira makhundu mazinji adapswipa. Munjira ibodzi ene, tingafuna kakamwe abale na alongo athu tinakwanisa kuphimbira peno kulekerera ‘madawo awo mazinji kakamwe.’ Ufuni wathu kuna anango usafunika kukhala wakuwanga kakamwe toera tikwanise kulekerera madodo a abale na alongo athu, maseze pyenepi pikhale pyakunentsa kakamwe. (Akol. 3:13) Tingalekerera anango, tinapangiza kuti tisaafuna kakamwe, pontho tisafuna kukomeresa Yahova. w23.11 tsa. 11-12 ¶13-15

Pikhali iye na pyaka 26 pyakubalwa, Mambo Yosiya atoma kusasanyira templo. Mu ndzidzi ukhacitwa basa ineyi, iwo agumana “bukhu ya Mwambo wa Yahova udaperekwa na Mose.” Pidabva Yosiya pikhalerwi mwambo unoyu, iye acita pinthu mwakubverana na pidalembwa mwenemo. (2 Kro. 34:14, 19-21) Kodi imwe musafuna kuleri Bhibhlya ntsiku zonsene? Panango musapicita kale pyenepi; mphapo musakomerwa napyo? Kodi imwe musaikha cidzindikiro m’mavesi anaona imwe kuti anakuphedzani mu umaso wanu? Pikhali Yosiya na pyaka 39 pyakubalwa, iye acita madodo akuti ancitisa kuphiwa. Iye anyindira ndzeru zace m’mbuto mwakusaka citsogolero ca Yahova. (2 Kro. 35:20-25) Tisapfundzanji? Mwakukhonda tsalakana khala ndife nkulu peno mwana peno khala tiri kupfundza Bhibhlya mu pyaka pizinji, tisafunika kupitiriza kusaka citsogolero ca Yahova. Pyenepi pisaphataniza kuphemba citsogolero cace ndzidzi onsene, kupfundza Mafalace na kubvera uphungu wa Akristu akukola mwauzimu. Tingacita pyenepi, tinacalira kucita madodo makulu, pontho tinakhala akutsandzaya.—Tiya. 1:25. w23.09 tsa. 12 ¶15-16

Bhibhlya isalonga pitsandzo pya akazi azinji akuti akhafuna Yahova mbantumikira. Iwo akhali ‘akulinganira mu pinthu pikhacita iwo,’ pontho akhali “akukhulupirika mu pinthu pyonsene.” (1 Tim. 3:11) Lero, atsikana anakwanisa kutowezera citsandzo ca akazi anagumanika m’mipingo akuti asafuna kakamwe Yahova. Atsikana, mukuona tani kusankhula alongo acitsandzo cadidi mbamutowezera makhaliro awo adidi? Onani makhaliro adidi ali na iwo, buluka penepo onani kuti munatowezera tani makhaliro anewa. Kucepeseka ndi n’khaliro wakufunika kakamwe kuna Akristu. Nkazi angakhala wakucepeseka, iye anakwanisa kukhala na uxamwali wakuwanga na Yahova, pontho na anango. Mwacitsandzo, nkazi wakuti asafuna Yahova, pontho ndi wakucepeseka, asabvera pitsogolero pidakhazikisa Babathu wakudzulu. (1 Akor. 11:3) Pitsogolero pyenepi pisalonga kuti mbani adasankhulwa toera kutsogolera mpingo na banja. w23.12 tsa. 18-19 ¶3-5

Yahova asafuna kuti mamuna afune nkazace, atsalakane pifuno pyace, akhale xamwali wadidi kuna iye mbamphedza toera akhale na uxamwali wakuwanga na Yahova. Kukulisa luso yakunyerezera, kulemedza akazi na kukhala akunyindirika pinakuphedzani toera kukhala mamuna wadidi. Mungasemba, panango munakhala baba. Munapfundzanji na citsandzo ca Yahova toera mukhale baba wadidi? (Aef. 6:4) Yahova apanga mwanace Yezu kuti asanfuna, pontho asakomerwa naye. (Mat. 3:17) Mungakhala na ana, citani pyonsene pinakwanisa imwe toera ndzidzi onsene mupangize kuti musaafuna. Pontho asimbeni na ntima onsene thangwi ya pinthu pyadidi pinacita iwo. Anyakubala akuti asatowezera citsandzo ca Yahova asaphedza anawo toera akhale amuna na akazi akukola mwauzimu. Imwe munakhunganyika toera kukhala baba wadidi mungapangiza ufuni kuna anthu a pabanja panu na a mu mpingo mbamuatsalakana mwadidi. Kusiyapo pyenepi, munakwanisa kuapanga kuti musaafuna, pontho ndi akufunika kuna imwe.—Juw. 15:9. w23.12 tsa. 28-29 ¶17-18

Ngakhale kuti ndife atumiki akukhulupirika a Yahova, ife tisathimbana na nyatwa, pontho tisabva kupha ninga anthu anango onsene. Kusiyapo pyenepi, ife tisafunika kupirira kutcingwa na anthu akuti asaida atumiki a Yahova. Maseze Yahova nee anatitsidzikiza toera tikhonde kucitikirwa na pinthu pyenepi pyakuipa, iye asapikira kuti anatiphedza. (Iza. 41:10) Na ciphedzo cace, ife tinakwanisa kupitiriza kukhala akutsandzaya, kucita pisankhulo pyadidi na kupitiriza kukhala akukhulupirika kuna iye maseze titambe nyatwa zakunentsa kakamwe. Yahova apikira kutipasa “ntendere wa Mulungu.” (Afil. 4:6, 7) Ntendere unoyu ndi kukhurudzika kunakhala na ife tingakhala na uxamwali wakuwanga na iye. Pontho ntendere unoyu, “usapiringana kubvesesa konsene”; pyenepi pisabveka kuti ntendere unoyu ndi wadidi kakamwe kupiringana pinanyerezera ife. Mwacitsandzo, kodi imwe mwatoma kale kucita phembero kuna Yahova, buluka penepo mbamukhala wakukhurudzika? Imwe mwakhala wakukhurudzika thangwi Yahova akupasani “ntendere wa Mulungu.” w24.01 tsa. 20 ¶2; tsa. 21 ¶4

Kufuna Mulungu kusacitisa anthu akukhulupirika kufunambo kusimba dzina yace. Dhavidhi akhadziwa kuti angasimba dzina ya Yahova ali kusimba Yahova. Nakuti dzina ya Yahova isaphataniza makhaliro ace, pyenepi pisatikumbusa makhaliro ace adidi na pinthu pyadidi kakamwe pinacita iye. Dhavidhi akhafuna kusimba dzina ya Pai wace thangwi Yahova ndi wakucena. Iye akhafuna kucita pyenepi na ‘makhundu onsene a manungo ace,’ pyenepi pisabveka, na ntimace onsene. Munjira ibodzi ene, Alevi akhatsogolera basa yakusimba Yahova. Iwo adzindikira mwakucepeseka kuti mafala awo nee mbadakwana toera kusimba dzina yakucena ya Yahova. (Nee. 9:5) Mwakukhonda penula, kucepeseka kwawo kwatsandzayisa kakamwe Yahova. w24.02 tsa. 9 ¶6

Yahova nee anaona kuti mwacimwana kukwanirisa cifuno canu. (2 Akor. 8:12) Pfundzani na mipingizo inathimbana na imwe. Kumbukani pinthu pidakwanisa imwe kucita. Bhibhlya isalonga kuti “Mulungu nee ndi wakukhonda kulungama toera aduwale basa yanu.” (Aheb. 6:10) Natenepa, imwe nee musafunikambo kuduwala pinthu pidacita imwe. Nyerezerani pinthu pidakwanisa imwe kucita ninga kukhala na uxamwali na Yahova, kucedza na anango thangwi ya iye peno kubatizwa. Imwe mwathambaruka mbamukwanirisa pifuno pyauzimu pikhali na imwe, natenepa munakwanisambo kuthambaruka mpaka kukwanirisa pifuno piri na imwe cincino. Na ciphedzo ca Yahova, imwe munakwanisa kukwanirisa pifuno pyanu. Mu ndzidzi unawangisira imwe toera kukwanirisa pifuno pyanu pyauzimu, lekani duwala kuona ciphedzo ca Yahova na nkhombo zinakupasani iye. (2 Akor. 4:7) Mungakhonda kubwerera nduli, munatambira nkhombo zizinji kakamwe.—Agal. 6:9. w23.05 tsa. 31 ¶16-18

Yahova ndzidzi onsene asasaka njira zakupangiza kuna atumiki ace kuti asaafuna, pontho asatsandzaya kakamwe na pinacita iwo. Bhibhlya isalonga maulendo mawiri akuti Yahova apanga Yezu kuti iye akhali Mwanace wakufunika na ule anakomerwa na iye. (Mat. 3:17; 17:5) Kodi imwe musafuna kubva Yahova mbakupangani mafala ninga anewa? Lero, Yahova asaphatisira Bhibhlya toera kulonga na ife. Ife tinakwanisa “kubva” Yahova mbalonga kuti ndife akutawirika kuna iye tingaleri mafala a Yezu anagumanika m’bukhu ya Mateu, Marko, Luka na Juwau. Yezu atowezera mwadidi kakamwe makhaliro a Babace. Natenepa, tingaleri mafala adidi adalonga Yezu kuna anthu akusowa ungwiro, ife tinakwanisa kunyerezera kuti ndi Yahova analonga mafala anewa kuna ife. (Juw. 15:9, 15) Tingathimbana na pinentso nee pisabveka kuti nee ndife akutawirika kuna Yahova. M’mbuto mwace, unoyu unakwanisa kukhala mwai toera kupangiza kuti tisafuna kakamwe Mulungu na kun’nyindira.—Tiya. 1:12. w24.03 tsa. 28 ¶10-11