Setembro

Mulungu apasa mphambvu Yezu toera kumalisa nyatwa zonsene za anthu. Kubulukira mu pirengo pidacita iye, Yezu apangiza kuti ali na mphambvu toera kumalisa nyatwa zakuti nee tinakwanisa kuzimalisa tekhene. Mwacitsandzo, iye ali na mphambvu toera kumalisa madawo na nyatwa zonsene zinaoneka thangwi ya madawo anewa, kuphatanizambo mautenda na kufa. (Mat. 9:1-6; Aroma 5:12, 18, 19) Pirengo pidacita iye pyapangiza kuti iye anakwanisa kuwangisa “ntundu onsene” wa utenda, ngakhale kulamusa anthu muli akufa. (Mat. 4:23; Juw. 11:43, 44) Kusiyapo pyenepi, iye alimbo na mphambvu toera kumalisa pyondzi na kukunda mizimu yakuipa. (Marko 4:37-39; Luka 8:2) Ndi pyakuwangisa kakamwe kudziwa kuti Yahova apasa mphambvu Mwanace toera kucita pinthu pyenepi! Ife tinakwanisa kukhala na cinyindiro cakuti nkhombo zinafuna kubweresa Umambo wa Mulungu ndi zandimomwene. Pirengo pidacita Yezu pikhali iye pa dziko yapantsi pisapangiza kuti iye anadzacita pinthu pyenepi pa dziko yonsene, thangwi iye ndi Mambo wa Umambo wa Mulungu. w23.04 tsa. 3 ¶5-7

Khala imwe muli mu mpingo ukulu pontho musaona kuti kazinji kene imwe nee musathonywa toera kutawira imwe panango munanyerezera kuti nee munatawirabve pa misonkhano. Mbwenye lekani kusiya kulamusa manja toera kutawira. Panango pinakhala mwadidi kukhunganya mitawiro mizinji. Natenepa, mungakhonda kupaswa mwai toera kutawira ndima zakutoma, imwe munakhala na miyai toera kutawira ndima zinango peno makhundu anango. Mu ndzidzi unakhunganyika imwe Pfundziro ya Ncenjezi, nyerezerani kuti ndima ibodzi na ibodzi isabverana tani na nsolo unakhunganyika imwe. Mungacita pyenepi, imwe munakhala na mitawiro yadidi toera kutawira mu ndzidzi wa Pfundziro ya Ncenjezi. Cinthu cinango cinafuna kukuphedzani ndi kukhunganyika mitawiro mu ndima zakuti zisalonga pya undimomwene wa Bhibhlya wakuti ndi wakunentsa kuufokotoza. Thangwi yanji? Thangwi anthu azinji nee asathukula manja toera kutawira ndima zenezi. Mphapo ndiye tani khala musapitiriza kukhonda paswa mwai wakutawira pa misonkhano? Misonkhano mbidzati kutoma, pangani m’bale anatsogolera Pfundziro ya Ncenjezi ndima inafuna imwe kutawira. w23.04 tsa. 21-22 ¶9-10

Zuze akhaphatisira pitsogolero pya Yahova, pontho pyenepi pyam’phedza toera kukhala mamuna wadidi. M’maulendo matatu, iye atambira pitsogolero pya Mulungu thangwi ya banja yace. M’maulendo anewa, iye abvera na ntima onsene, maseze pikhali pyakunentsa toera kucita pyenepi. (Mat. 1:20; 2:13-15, 19-21) Thangwi yakubvera pitsogolero pya Yahova, Zuze atsidzikiza Mariya, am’phedza mbantsalakana. Mwandimomwene pinthu pidacita Zuze pyacitisa Mariya kumulemedza na kunfuna kakamwe. Amuna akumanga banja, imwe munakwanisa kutowezera citsandzo ca Zuze mukusaka uphungu wa m’Bhibhlya toera kutsalakana banja yanu. Mungaphatisira uphungu unoyu maseze pikhale pyakunentsa, munapangiza kuti musafuna nkazanu, pontho munakhala na banja yakutsandzaya. Mulongo Vanuatu, wakuti ali m’banja mu pyaka pyakupiringana 20 alonga: “Mamunanga angasaka pitsogolero pya Yahova mbapiphatisira, ine ndisamulemedza kakamwe. Ndisapibva kuti ndiri wakutsidzikizika, pontho ndisanyindira pisankhulo pyace.” w23.05 tsa. 21 ¶5

Ayuda akhafuna kubwerera ku Bhabhilonya akhafunika kukhala “mbumba yakucena” kuna Mulungu wawo. (Dheu. 7:6) Mbwenye pyenepi nee pikhabveka kuti nee akhafunika kucita macinjo toera kukomeresa Yahova. Ayuda azinji abalwa ku Bhabhilonya, pontho akhadamala dzolowera kunyerezera na kucita pinthu ninga Abhabhilonya. Pakupita pyaka 69 pidamala Ayuda akutoma kubwerera ku Izraeli, Ntongi Neemiya adzumatirwambo pidadzindikira iye kuti ana anango adabalwa mu Izraeli nee akhadziwa cilongero ca Ayuda. (Dheu. 6:6, 7; Nee. 13:23, 24) Kodi ana anewa mbadakwanisa tani kufuna Yahova na kumulambira, khala iwo nee akhabvesesa Cihebheri, cilongero cidaphatisirwa kakamwe toera kulemba Mafala a Mulungu? (Esd. 10:3, 44) Natenepa, Ayuda anewa akhafunika kucita macinjo makulu, mbwenye mbapidakhala pyakukhonda nentsa kuna iwo toera kucita macinjo anewa mu Izraeli, thangwi anthu akhatoma pontho kulambira Yahova munjira yadidi.—Nee. 8:8, 9. w23.05 tsa. 15 ¶6-7

Mwakukhonda tsalakana khala tiri na cifuno cakuwanga peno ndife akudzitonga, midzidzi inango tinathimbana na mipingizo. Mwacitsandzo, “pinthu pyakukhonda kudikhirwa” panango pinatikwatira ndzidzi wakuti mbatidauphatisira toera kukwanirisa pifuno pyathu. (Ekle. 9:11) Panango tinathimbana na pinentso pyakuti pinaticitisa kubwerera nduli mbatisowa mphambvu. (Mis. 24:10) Thangwi yakusowa kwathu ungwiro, panango tinacita madodo akuti nee anatiphedza toera kukwanirisa cifuno cathu. (Aroma 7:23) Peno panango tinapibva kuti taneta. (Mat. 26:43) Mphapo ninji pinafuna kutiphedza tingathimbana na mipingizo? Kumbukani kuti mungathimbana na mipingizo nee pisabveka kuti munacimwana kukwanirisa cifuno canu. Bhibhlya isalonga kuti panango tinathimbana na pinentso mwakubwereza-bwereza. Kusiyapo pyenepi, isapangiza pakweca kuti ife tinakwanisa kuyesera pontho kukwanirisa cifuno cathu. Mwandimomwene, mungapitiriza kuwangisira mwakukhonda tsalakana mipingizo inathimbana na imwe munapangiza kuti musafuna kukomeresa Yahova. Iye asatsandzaya kakamwe angaona kuti muli kuwangisira toera kukwanirisa pifuno pyanu! w23.05 tsa. 30 ¶14-15

Basa ya upainiya isaphedza aphale kupfundza kuphata basa mwadidi na anthu akusiyana-siyana. Isaaphedzambo toera kuona kuti anaphatisira tani mwandzeru kobiri inawina iwo. (Afil. 4:11-13) Njira yadidi toera kutoma kupita m’basa ya ndzidzi onsene ndi kutumikira ninga mpainiya wakuphedza, pyenepi pisakhunganya munthu toera atome kutumikira ninga mpainiya wa ndzidzi onsene. Munthu angatoma kutumikira ninga mpainiya, panango anacemerwa toera aphate mabasa anango a ndzidzi onsene, ninga basa yakumanga peno kutumikira ku Bheteli. Abale onsene asafunika kuwangisira kuti atumikire ninga akulu a mpingo toera aphedze abale na alongo mu mpingo. Bhibhlya isalonga kuti munthu anawangisira toera kuphata mabasa anewa “asafuna basa yadidi.” (1 Tim. 3:1) Pakutoma, m’bale asafunika kukhala wakuthema toera kutumikira ninga ntumiki wakutumikira. Atumiki akutumikira asaphedza akulu a mpingo munjira zizinji. Akulu a mpingo pabodzi na atumiki akutumikira, mwakucepeseka asatumikira abale na alongo, pontho asamwaza mphangwa mwaphinga. w23.12 tsa. 28 ¶14-16

Mambo Yosiya akhali na pyaka 16 pyakubalwa pidatoma iye kusaka Yahova. Iye akhafuna kupfundza thangwi ya Yahova na kucita cifuno cace. Mbwenye umaso ukhali wakunentsa kuna mambo unoyu. Thangwi mu ndzidzi unoyu, anthu azinji akhalambira alungu authambi, natenepa Yosiya akhafunika kuphedza anthu toera asiye kucita pyenepi. Pontho iye acita pyenepi. Mbadzati kukhala na pyaka 20 pyakubalwa, Yosiya atoma kufudza ulambiri wauthambi mu Yuda na Yerusalemu. (2 Kro. 34:1-2) Maseze ndimwe m’phale kakamwe, imwe munakwanisa kutowezera citsandzo ca Yosiya mukusaka Yahova na kupfundza thangwi ya makhaliro Ace. Pyenepi pinakucitisani kufuna kuperekeka kuna iye. Mphapo kuperekeka kweneku kunakhuya tani umaso wanu? Luke wakuti abatizwa na pyaka 14 pyakubalwa alonga: “Kutomera lero, ndinaikha kutumikira Yahova pa mbuto yakutoma mu umaso wanga mbandiwangisira toera kuntsandzayisa.” (Marko 12:30) Pinakhala pyakutsandzayisa kakamwe kuna imwe mungasankhula kucitambo pibodzi pyene! w23.09 tsa. 11 ¶12-13

Pidalemba mpostolo Paulu tsamba ineyi kuna Akristu a ku Tesalonika, mpingo unoyu ukhadamala kwene kukhazikiswa. Abale akhatsogolera mu mpingo unoyu panango nee akhali na maluso, pontho panango akhacita madodo. Ngakhale tenepo iwo akhafunika kulemedzwa. Mu ndzidzi unafendedzera ife cifupi na nyatwa ikulu, panango tinafuna kakamwe citsogolero ca akulu a mpingo kupiringana cincino. Pa ndzidzi unoyu, panango nee tinakwanisa kutambira pitsogolero pya abale a ku ofesi ikulu ya Mboni za Yahova na ofesi ya dziko yathu; natenepa ndi pyakufunika kakamwe kutoma cincino kufuna na kulemedza akulu a mpingo wathu. Mwakukhonda tsalakana pinafuna kucitika, tendeni tipitirize kukhala na manyerezero adidi, tayu kuona madodo awo, mbwenye tisafunika kuona kuti amuna anewa akukhulupirika asatsogolerwa na Yahova mukuphatisira Kristu. Ninga capeu ca utale cakuti cikhatsidzikiza nsolo wa nyankhondo, cidikhiro cathu cisatsidzikiza manyerezero athu. Tisadzindikira kuti pinthu pya dziko ino ndi pyakusowa basa. (Afil. 3:8) Cidikhiro cathu cisatiphedza toera kukhala akukhurudzika. w23.06 tsa. 11-12 ¶11-12

Ale anabva mafala a “nkazi wakusowa ndzeru” asafunika kucita cisankhulo cakutawira peno kukhonda ncemerero unoyu. Pana mathangwi adidi anaticitisa kucalira makhaliro aulukwali. “Nkazi wakusowa ndzeru” analongwa m’bukhu ineyi asalonga kuti: “Madzi akuba asatapira.” (Mis. 9:17) Kodi “madzi akuba” anewa ninji? Bhibhlya isalandanisa kupita m’mabonde kwa anthu awiri akumanga banja na madzi akupha nyota. (Mis. 5:15-18) Mamuna na nkazi wakumanga manja ali na ufulu wakupita m’mabonde. Mphapo pyenepi pyasiyana tani na “madzi akuba?” Madzi akuba ndi kucita ulukwali. Thangwi anthu anacita ulukwali kazinji kene asabisa pyenepi kuna anango ninga pinacita mbava. “Madzi akuba” panango anakhala ninga akutapira khala anthu adacita ulukwali nee aphatiwa peno khala asaona kuti nkhabepo munthu anadziwa pidacita iwo. Pyenepi ndi pyakutsukwalisa kakamwe thangwi Yahova asaona pyonsene. Nkhabepo cinthu cakutsukwalisa kakamwe kupiringana kuluza uxamwali wathu na Yahova. Natenepa madzi anewa mwandimomwene nee ndi “akutapira.”—1 Akor. 6:9, 10. w23.06 tsa. 22 ¶7-9

Munacitanji mungaona kuti nee muli kucita phembero na ntima onsene peno nee musakomerwa na utumiki ninga pikhakomerwa imwe kale? Lekani kunyerezera kuti mwaluza nzimu wa Yahova. Nakuti ndimwe akusowa ungwiro, mabvero anu midzidzi inango asacinja. Mungaona kuti nee mukucitabve mabasa a Yahova mwaphinga, nyerezerani citsandzo ca mpostolo Paulu. Maseze akhawangisira kutowezera Yezu, iye akhadziwa kuti midzidzi inango nee mbadakhala na cifuno cibodzi cene toera kucita pikhafuna iye. Paulu akhali dzololo toera kucita mwadidi utumiki wace mwakukhonda tsalakana mabvero akhali na iye. Munjira ibodzi ene, lekani kucita pisankhulo mukutsogolerwa na mabvero anu akusowa ungwiro. Wangisirani toera kucita pinthu pyadidi mwakukhonda tsalakana mabvero anu. Thangwi mungapitiriza kucita pinthu pyadidi, mukupita kwa ndzidzi panango mabvero anu anacinja.—1 Akor. 9:16. w24.03 tsa. 11-12 ¶12-13

Ife tinakwanisambo kupangiza ufuni kuna abale na alongo athu tingakhala axamwali awo. (2 Akor. 6:11-13) Azinji a ife ali m’mipingo yakuti muli na abale na alongo adakuzwa munjira zakusiyana, pontho ali na makhaliro akusiyana. Ife tinakwanisa kupangiza ufuni kuna abale anewa onsene tingaona makhaliro awo adidi. Tingaona anango ninga munaaona Yahova, tinapangiza kuti tisaafuna. Ufuni unadzakhala wakufunika kakamwe mu ndzidzi wa nyatwa ikulu. Mphapo nyatwa ineyi ingatoma Yahova anatitsidzikiza tani? Onani pitsogolero pidapereka Yahova kuna atumiki ace mu ndzidzi ukhafuna kupomokerwa nzinda wa Bhabhilonya: “Mbumba yanga, pitani m’makwartu mwanu, pontho fungani misuwo. Bisalani mu ndzidzi wakucepa, mpaka kuipirwa kwa Mulungu kumale.” (Iza. 26:20) Panango ife tinadzafunikambo kutowezera pitsogolero pyenepi mu ndzidzi wa nyatwa ikulu. w23.07 tsa. 6-7 ¶14-16

Khalani na maonero akulinganira. Bvundzikani: ‘Kodi anthu asandiona ninga munthu wakulinganira peno asandiona ninga waukali wakuti nee asabva maonero a anango? Kodi ndisabvesera anango mbandicita pinafuna iwo khala ndi pyakukwanisika?’ Tingakhala akulinganira kakamwe tinapangizambo kuti tisatowezera mwadidi Yahova na Yezu. Ife tisafunika kukhala akulinganira pinthu pingacinja mu umaso wathu. Macinjo anewa panango anatibweresera nyatwa zakukhonda dikhira. Mwacitsandzo, panango tinathimbana na nyatwa za ungumi. Panango tinathimbana na utcerengi mu dziko inakhala ife peno mautongi anacitisa kuti umaso wathu ukhale wakunentsa kakamwe. (Ekle. 9:11) Panango pinakhala pyakunentsa kuna ife, gulu ingatiphemba toera titumikire Yahova munjira inango peno ku mbuto inango. Ife, tinakwanisa kukhala na maonero akulinganira tingacita pinthu pinai: (1) kudzindikira kuti pinthu pyacinja, (2) kunyerezera pinthu pya ntsogolo, (3) kuona pinthu pyadidi pinaticitikira na (4) kuphedza anango. w23.07 tsa. 21-22 ¶7-8

Pikhali mprofeta Dhanyeli m’phale akwatwa na anyankhondo a Bhabhilonya, mbaendeswa ku Bhabhilonya kutali na dziko yace. Maseze iye akhali m’phale, iwo aona makhaliro ace adidi. Iwo aona na maso awo kuti Dhanyeli akhali ‘wakusowa cilema, wa maonekero adidi,’ pontho akhadabuluka pabanja yakufunika. (1 Sam. 16:7) Na thangwi ineyi, Abhabhilonya ampfundzisa toera atumikire pa nyumba ya mambo. (Dhan. 1:3, 4, 6) Yahova akhafuna Dhanyeli thangwi ya makhaliro ace adidi. Mwandimomwene, mu ndzidzi udalonga Yahova kuti Dhanyeli akhali ninga Nowa na Yobe, panango Dhanyeli akhali na pyaka 20 pyakubalwa. Natenepa, Yahova aona kuti Dhanyeli akhali wakulungama ninga Nowa na Yobe akuti atumikira Mulungu mwakukhulupirika mu pyaka pizinji. (Gen. 5:32; 6:9, 10; Yobe 42:16, 17; Ezek. 14:14) Pontho Yahova apitiriza kufuna Dhanyeli mu umaso wace onsene.—Dhan. 10:11, 19. w23.08 tsa. 2 ¶1-2

Mungafuna kugula nyumba, pakutoma musaonesesa kuti nyumba ineyi yamangwa tani. Ife tinakwanisambo kucita pibodzi pyene mu ndzidzi unapfundza ife Bhibhlya. Mungaleri Bhibhlya mwakucimbiza, basi ene munadziwa “pipfundziso pyakutoma pya mafala a Mulungu.” (Aheb. 5:12) Mbwenye ninga nyumba yakuti musafunika kupita nkati toera kuiona mwadidi, imwe musafunikambo kupfundza Bhibhlya toera kuidziwa mwadidi. Njira ibodzi ya kupfundza mwadidi Bhibhlya ndi kuona kuti mphangwa zakusiyana-siyana za m’Bhibhlya zisabverana tani. Wangisirani toera kubvesesa pinakhulupira imwe na mathangwi anakucitisani kunyindira kuti pinthu pyenepi ndi pyandimomwene. Toera kubvesesa Mafala a Mulungu tisafunika kupfundza mwadidi undimomwene unagumanika m’Bhibhlya wakuti usaoneka ninga wakunentsa. Mpostolo Paulu apanga abale na alongo kuti apfundze mwadidi Mafala a Mulungu toera ‘abvesese mwadidi ugugumi, ulaphi, cengo na kuzika’ kwa undimomwene. Mbadacita pyenepi, iwo ‘mbadakhala na mitcitci na akuwanga’ mu cikhulupiro. (Aef. 3:14-19) Ife tisafunikambo kucita pibodzi pyene. Tendeni tione kuti tinapfundza tani Mafala a Mulungu toera kubvesesa mwadidi mphangwa zinagumanika mwenemo. w23.10 tsa. 18 ¶1-3

M’Bhibhlya muli na pitsandzo pizinji pya anthu anango adapangiza kupirira. Panango pinakhala pyadidi kupfundza thangwi ya anthu anewa. Mwacitsandzo, maseze Dhavidhi adzodzwa mbali m’phale toera kukhala mambo wa Izraeli, iye adikhira pyaka pizinji toera kutonga. Simeoni na Yana alambira Yahova mwakukhulupirika mu ndzidzi ukhadikhira iwo kubalwa kwa Mesiya. (Luka 2:25, 36-38) Mu ndzidzi unapfundza imwe pitsandzo pyenepi, yeserani kutawira mibvundzo iyi: Ninji pidaphedza munthu unoyu toera kupirira? Kodi iye aphedzeka tani thangwi ya kupirira? Ndinatowezera tani citsandzo cace? Imwe munaphedzekambo mungapfundza pitsandzo pya ale akuti nee apangiza kupirira. (1 Sam. 13:8-14) Panango munabvundzika: ‘Ninji pidaacitisa toera kukhonda khala akupirira? Ninji pidaacitikira thangwi yakukhonda kwawo kukhala akupirira?’ w23.08 tsa. 25 ¶15

Mpostolo Pedhru akhali wakukhulupirika, pontho iye nee atawirisa kuti cinthu cinango cincitise kusiya kutowera Yezu. Mwacitsandzo, ulendo unango Yezu alonga cinthu cakuti anyakupfundzace nee acibvesesa. (Juw. 6:68) M’mbuto mwakusaka kubvesesa pidalonga Yezu, anthu azinji asiya kuntowera. Mbwenye Pedhru nee acita pyenepi. Iye akhadziwa kuti basi ene ndi Yezu akhali na “mafala anapasa umaso wakukhonda mala.” Yezu akhadziwa kuti Pedhru na apostolo anango mbadansiya. Ngakhale tenepo, Yezu apasa cinyindiro Pedhru cakuti iye mbadakhala pontho wakukhulupirika. (Luka 22:31, 32) Yezu akhadziwa kuti “ntima usafuna, mbwenye manungo mbakufewa.” (Marko 14:38) Natenepa, maseze Pedhru alonga kuti nee akhadziwa Yezu, Yezu nee ansiya. Pidalamuswa iye muli akufa, Yezu aonekera kuna Pedhru, panango mu ndzidzi wakuti Pedhru akhali ekhene. (Marko 16:7; Luka 24:34; 1 Akor. 15:5) Pyenepi pyawangisa kakamwe Pedhru wakuti akhadatsukwala thangwi ya pinthu pyakuipa pidacita iye! w23.09 tsa. 22 ¶9-10

Mulungu asalekerera peno kuphimbira madawo a ale anan’khulupira. Iye asaalekerera na ntima onsene. (Mas. 32:1, 2) Iye asaaona ninga akusowa mulando na akulungama thangwi ya cikhulupiro cawo. Maseze Abhrahamu, Dhavidhi na atumiki anango akukhulupirika akhaoniwa na Mulungu ninga anthu akulungama, iwo akhali anthu akusowa ungwiro na akudawa. Mbwenye thangwi ya cikhulupiro cawo, Mulungu akhaaona kuti ndi akusowa mulando angaalandanisa na ale akuti nee akhantumikira. (Aef. 2:12) Ninga pidalonga mpostolo Paulu mu tsamba yace, cikhulupiro ndi cakufunika kakamwe toera tikhale na uxamwali na Mulungu. Abhrahamu na Dhavidhi akhali axamwali a Mulungu thangwi yakun’khulupira. Ife tinakwanisambo kukhala axamwali a Mulungu thangwi ya cikhulupiro cathu. w23.12 tsa. 3 ¶6-7

Akristu onsene ali na mwai wakupereka ntsembe kuna Yahova mukuphatisira ndzidzi wawo, mphambvu zawo na pinthu piri na iwo toera kuphedzera Umambo wa Mulungu. Ife tinapangiza kuti tisakomerwa na kulambira Yahova tingacita pyonsene pinakwanisa ife m’basa yace. Mpostolo Paulu alonga pinthu pyakuti tisafunika kupicita ndzidzi onsene pakulambira Mulungu. (Aheb. 10:22-25) Pinthu pyenepi ndi kucita phembero kuna Yahova, kumwaza mphangwa, kugumanyikana pa misonkhano ya mpingo na kuwangisana unango na ndzace ‘mu ndzidzi unaona ife kuti ntsiku ya Mulungu iri kufika.’ Anju wa Yahova alonga mafala awa kawiri toera kuagomezera: “Lambira Mulungu!” (Apok. 19:10; 22:9) Natenepa, nee tisafunika kuduwala undimomwene unoyu wakufunika kakamwe thangwi ya templo ikulu yauzimu ya Yahova na kupereka takhuta thangwi ya nkhombo iri na ife yakulambira Mulungu wathu wankulu! w23.10 tsa. 29 ¶17-18

Tonsene tisafuna “tipitirize kufunana unango na ndzace.” Mbwenye ndi pyakufunika kakamwe kuna ife kukumbuka mafala adalonga Yezu kuti: “Ufuni wa anthu azinji unadzathowa.” (Mat. 24:12) Yezu nee alonga kuti anyakupfundzace azinji mbadasiya kufunana unango na ndzace. Mbwenye ife tisafunika kucita mphole-mphole toera tikhonde kutawirisa kuti makhaliro akusowa ufuni a anthu a dziko akhonde kuticitisa kutsalakana anango mwakusowa ufuni. Natenepa tendeni tidinge mbvundzo wakufunika kakamwe wakuti: Ninji pinafuna kutiphedza toera kudziwa khala ufuni wathu kuna abale na alongo nee uli kuthowa? Njira ibodzi toera kudziwa khala ufuni wathu uli kuthowa peno nkhabe ndi kuona njira inatsalakana ife pinthu mu umaso wathu. (2 Akor. 8:8) Cibodzi mwa pinthu pyenepi ndi cidalonga mpostolo Pedhru. Iye alonga: “Kupiringana pyonsene, funanani kakamwe unango na ndzace, thangwi ufuni usaphimbira madawo mazinji kakamwe.” (1 Ped. 4:8) Natenepa, pinthu pinafuna kucita ife m’bale peno mulongo angacita madodo peno angatitsukwalisa, pinatiphedza toera kudziwa khala ufuni wathu uli kuthowa peno nkhabe. w23.11 tsa. 10-11 ¶12-13

Ife nee tinakwanisa kubvera ntemo wa Yezu wakupangiza ufuni khala basi ene tisapangiza ufuni kuna anthu angasi mu mpingo mbwenye kuna anango nkhabe. Ndimomwene kuti panango tinakhala na uxamwali wa ponda ndi pondembo na anango kupiringana anango, ninga pidacita Yezu. (Juw. 13:23; 20:2) Mbwenye mpostolo Pedhru alonga kuti tisafunika kuwangisira toera kufuna abale na alongo athu onsene, thangwi iwo ndi ninga anthu a pabanja pathu. (1 Ped. 2:17) Pedhru alonga kuti “funanani kakamwe unango na ndzace, na ntima onsene.” (1 Ped. 1:22) Mafala akuti “kufuna kakamwe” asabveka kufuna munthu maseze pikhale pyakunentsa toera kupangiza ufuni kuna munthu unoyu. Mwacitsandzo, ndiye tani khala m’bale peno mulongo atitsukwalisa? Pakutoma panango tinafuna kum’bwezera pinthu pyakuipa pidacita iye, m’mbuto mwakupangiza ufuni. Mbwenye Pedhru apfundza na Yezu kuti kucita pyenepi nee kusakomeresa Mulungu. (Juw. 18:10, 11) Natenepa mukupita kwa ndzidzi iye alemba: “Lekani kubwezera pyakuipa kuna munthu adakucitirani pyakuipa, peno kutikana munthu adakutikanani. Mbwenye pakutawira, longani mafala adidi.” (1 Ped. 3:9) Mungafuna kakamwe abale na alongo anu, imwe munakhala wakukoma ntima na wacitsalakano. w23.09 tsa. 28-29 ¶9-11

Ife tisadzumatirwa tingaona mwana mbakula mu ndzidzi wakucepa. Pisaoneka ninga mwana nkhabe funika kucita cinthu toera akule. Mbwenye toera tikhale Nkristu wakukola, tisafunika kuwangisira. (1 Akor. 13:11; Aheb. 6:1) Ife tisafunika kuwangisira toera tikhale na uxamwali wakuwanga na Yahova. Tisafunikambo kukhala na ciphedzo ca nzimu wakucena toera tikhale na makhaliro adidi, tikhale na luso yakucita pinthu munjira yadidi, pontho tisafunika kukhala akukhunganyika toera ticite mabasa akusiyana-siyana a ntsogolo. (Mis. 1:5) Mu ndzidzi udacita Yahova anthu iye acita mamuna na nkazi. (Gen. 1:27) Maonekero a mamuna na nkazi ndi akusiyana, pontho iwo asiyanambo munjira zinango. Yahova apasa amuna na akazi mabasa na maluso akusiyana toera akwanise kucita mwadidi mabasa awo.—Gen. 2:18. w23.12 tsa. 18 ¶1-2

Kodi Yezu akhafunambo kuti anango aphatisire dzina ya Pai wace? Inde. Atsogoleri anango a mauphemberi akakhulupira kuti kukhali kusowa cilemedzo kulonga dzina ya Mulungu, mbwenye Yezu nee atawirisa kuti nsambo unoyu wakuti nee ukhabverana na Malemba uncitise kusiya kupasa mbiri dzina ya Pai wace. Ulendo unango Yezu awangisa mamuna wakuti akhali na madimonyo, pontho akakhala mu cisa ca Jerazeno. Anthu agopa kakamwe Yezu mbadembetera toera abuluke mu cisa cawo. (Marko 5:16, 17) Ngakhale tenepo, Yezu akhafuna kuti anthu a mu cisa ceneci adziwe dzina ya Mulungu. Na thangwi ineyi, Yezu apanga mamuna adawangisa iye toera apange anthu kuti iye awangiswa na Yahova. (Marko 5:19) Mpaka lero Yezu asafuna kuti dzina ya Pai wace idziwike pa dziko yonsene ya pantsi! (Mat. 24:14; 28: 20) Tingacita khundu yathu toera kudziwisa dzina ya Yahova tisatsandzayisa kakamwe Mambo wathu, Yezu Kristu. w24.02 tsa. 10 ¶10

Ndi mwai ukulu kakamwe kuna ife kucita khundu ya gulu ya Yahova ntsiku zino zakumalisa. Umaso mu dziko ino usapitiriza kukhala wakunentsa kakamwe, mbwenye Yahova atipasa abale na alongo toera kutiphedza. (Mas. 133:1) Iye asatiphedza toera tikhale na banja yakutsandzaya. (Aef. 5:33–6:1) Pontho iye asatipasa udziwisi toera tikhale na ntendere wa m’manyerezero. Ngakhale tenepo, ife tisafunika kuwangisira toera tipitirize kutumikira Yahova mwakukhulupirika. Thangwi yanji? Thangwi midzidzi inango tisatsukwala thangwi ya pinthu pinalonga anango peno pinacita iwo. Kusiyapo pyenepi, midzidzi inango tisatsukwala thangwi ya madodo athu, makamaka khala tisacita madodo mabodzi ene mwakubwereza-bwereza. Natenepa ife tisafunika kupirira m’basa ya Yahova (1) tingatsukwaliswa na m’bale peno mulongo, (2) tingatsukwaliswa na ndzathu wa m’banja, pontho (3) tingatsukwala thangwi ya madodo athu. w24.03 tsa. 14 ¶1-2

Kazinji kene, ife tisabva pitsandzo pya abale na alongo adawangisira toera kucita pizinji m’basa ya Yahova. Panango iwo akurusari Xikola ya Amwazi Mphangwa a Umambo peno aenda kaphedzera kumbuto iri na amwazi mphangwa akucepa. Khala makhaliro anu asakutawirisani, imwe munakwanisambo kukhazikisa cifuno ceneci. Atumiki a Yahova asasaka njira zakucita pizinji m’basa yace. (Mabasa 16:9) Mphapo ndiye tani khala cincino imwe nee munakwanisa kucita pyenepi? Lekani kunyerezera kuti nee ndimwe wakufunika thangwi yakucimwana kucita pyenepi. Cakufunika ndi kupitiriza kupirira. (Mat. 10:22) Lekani duwala kuti Yahova asatsandzaya mungacita pinakwanisa imwe mwakubverana na makhaliro anu. Pyenepi ndi pyakufunika kakamwe toera mukwanise kupitiriza kutowera Yezu pakumala kubatizwa.—Mas. 26:1. w24.03 tsa. 10 ¶11

Yahova apikira kuti anatilekerera tingatcunyuka. (Mas. 86:5) Natenepa tingatcunyuka na ntima onsene madawo athu, tinakwanisa kukhala na cinyindiro cakuti pinalonga iye ndi pyandimomwene, thangwi iye atilekerera kale. Kumbukani kuti Yahova ndi wakulinganira. Na thangwi ineyi, iye nee asafuna kuti ticite pizinji kupiringana pire pinakwanisa ife. Yahova asakomerwa na pyonsene pinacita ife, tingapicita na ntima onsene. Kusiyapo pyenepi, imwe munakwanisa kunyerezera pitsandzo pya m’Bhibhlya pya anthu adatumikira Yahova na ntima onsene. M’bodzi mwa iwo ndi mpostolo Paulu. Iye aphata basa mwaphinga mu pyaka pizinji, acita maulendo a nsindzo wakulapha kakamwe, pontho aphedzera toera kukhazikisa mipingo mizinji. Mbwenye mu ndzidzi udacinja makhaliro ace, iye nee akhakwanisabve kumwaza mphangwa ninga kale. Kodi Yahova asiya kukomerwa na pikhacita iye ndzidzi unoyu? Nkhabe. Paulu apitiriza kucita pikhakwanisa iye, pontho Yahova ampasa nkhombo. (Mabasa 28:30, 31) Munjira ibodzi ene, pinakwanisa ife kucita m’basa ya Yahova panango pinacinja mukupita kwa ndzidzi. Mbwenye pyakufunika kakamwe ndi mathangwi anatikulumiza toera kucita pyenepi. w24.03 tsa. 27 ¶7, 9

Kubulukira m’maphembero ace kuna Yahova, Yezu apangiza citsandzo toera anyakupfundzace acitowezere. Mu utumiki wace pa dziko yapantsi, Yezu akhacita phembero kazinji kene. Iye akhafunika kusaka ndzidzi toera kucita phembero thangwi kazinji kene akakhala na pinthu pizinji pyakucita, pontho anthu azinji akhantowera. (Marko 6:31, 45, 46) Iye akhalamuka nakweru toera akhale na ndzidzi wakucita phembero paekha. Paulendo unango, iye aphuphudza na kucita phembero mbadzati kucita cisankhulo cakufunika. (Luka 6:12, 13) Pontho namasiku a ntsiku idaphiwa iye, Yezu acita phembero mwakubwereza-bwereza mbadzati kumalisa khundu yakunentsa kakamwe ya basa yace pa dziko yapantsi. (Mat. 26:39, 42, 44) Citsandzo ca Yezu cisatipfundzisa kuti mwakukhonda tsalakana khala tiri na pinthu pizinji pyakucita, ife tisafunika kusaka ndzidzi toera kucita phembero. Ninga Yezu, ife tisafunika kupambula ndzidzi toera kucita phembero. Panango midzidzi inango tinafunika kulamuka nakweru peno kudikhira ndzidzi wakuti kunja nee kuli na dzumbi kakamwe namasiku. Tingacita pyenepi, tinapangiza kuna Yahova kuti tisapereka takhuta kakamwe thangwi ya mwai wakucita phembero. w23.05 tsa. 3 ¶4-5

Onani mafala akuti “ufuni wa Mulungu wadzadzwa” pa lemba ya ntsiku ya lero. Bukhu inango yalonga kuti “ufuni wa Mulungu usabwera kuna ife ninga madzi a mu nkulo.” Citsandzo ceneci cisapangiza kuti Yahova asafuna kakamwe Akristu akudzodzwa, pontho iwo asadziwa kuti “asafuniwa na Mulungu.” (Yuda 1) Mpostolo Juwau alemba tenepa toera kupangiza mabvero awo: “Onani ufuni ukulu udapangiza Baba kuna ife, mpaka ife kucemerwa ana a Mulungu!” (1 Juw. 3:1) Kodi Yahova asafuna basi ene Akristu akudzodzwa? Nkhabe. Iye asapangiza kuti asafuna ife tonsene. Ndi cinthu cipi cakufunika kakamwe cinapangiza kuti Yahova asatifuna? Ciomboli. Nkhabepo munthu unango adapangiza ufuni ukulu kakamwe kupiringana udapangiza Yahova!—Juw. 3:16; Aroma 5:8. w24.01 tsa. 28 ¶9-10

Vesi iri padzulu apa isapangiza cinthu cidaphedza Dhavidhi mu ndzidzi ukhagopa iye. Maseze umaso wace ukhali pangozwi, iye anyerezera pinthu pikhafuna kuncitira Yahova ntsogolo. Dhavidhi akhadziwa kuti Yahova mbadampulumusa pa ndzidzi wakuthema. Thangwi Yahova akhadalonga kuti Dhavidhi mbadakhala mambo wa Izraeli. (1 Sam. 16:1, 13) Dhavidhi akhaona pinthu pidapikira Yahova ninga pyamala kale kukwanirisika. Yahova apikira kucitanji kuna imwe? Ife nee tisadikhira kuti iye anatitsidzikiza mu nyatwa zathu zonsene. Ngakhale tenepo, mwakukhonda tsalakana nyatwa zinathimbana na ife mu dziko ino, Yahova anadzazimalisa mu dziko ipswa. (Iza. 25:7-9) Nciti wathu ali na mphambvu yakulamusa anthu muli akufa, kuwangisa mautenda na kufudza anyamalwa athu.—1 Juw. 4:4. w24.01 tsa. 6 ¶12-13

Nyerezerani kuti thangwi yanji mwaperekeka kuna Yahova mbamubatizwa. Imwe mwacita pyenepi thangwi mukhafuna kukhala kukhundu ya Yahova. Kumbukani pinthu pidakuphedzani toera kukhala na cinyindiro cakuti mwagumana undimomwene. Imwe mwadziwa Yahova, pontho mwatoma kumulemedza na kunfuna ninga Babanu wakudzulu. Imwe mwatoma kukhulupira pikhapfundza imwe, pontho pyenepi pyakuphedzani toera kutcunyuka. Imwe mwasiya kucita pinthu pinaida Yahova mbamutoma kucita pinthu pinankomeresa. Imwe mwatsandzaya kakamwe pidadziwa imwe kuti Yahova akulekererani. (Mas. 32:1, 2) Imwe mwatoma kugumanika pa misonkhano Yacikristu na kupangambo anango pinthu pyadidi kakamwe pikhapfundza imwe. Cincino ninga Nkristu wakuperekeka na wakubatizwa, imwe muli kufamba munjira inatsogolera ku umaso, pontho musawangisira toera kupitiriza munjira ineyi. (Mat. 7:13, 14) Natenepa, tisafunika kukhala dzololo na akuwanga mbatipitiriza kufuna Yahova na kubvera mitemo yace. w23.07 tsa. 17 ¶14; tsa. 19 ¶19

Munganyerezera phembero idacita imwe toera kuperekeka kuna Yahova, munakhala na mphambvu toera kucalira mayesero onsene. Mwacitsandzo, imwe nee munasirira munthu unango wakuti nee ndi nkazanu peno mamunanu. Thangwi imwe mwapikira kale kuna Yahova kuti cipo munacita pyenepi. Mungakhonda tawirisa kuti mabvero akuipa akule muntima mwanu, imwe nee munafunika kuthimbana nawo ntsogolo. Imwe ‘munacalira kupita na njira ya anyakuipa.’ (Mis. 4:14, 15) Kunyerezera citsandzo ca Yezu kunatiphedza. Iye akhali dzololo toera kukomeresa Babace. Ninga Yezu, khalani dzololo toera kucalira mwakucimbiza pinthu pyonsene pyakuti pinatsukwalisa Mulungu adasankhula imwe kutumikira. (Mat. 4:10; Juw. 8:29) Undimomwene ndi wakuti nyatwa na mayesero pinakupasani mwai toera kupangiza kuti muli dzololo toera ‘kupitiriza kutowera’ Yezu. Mu ndzidzi unacita imwe pyenepi, khalani na cinyindiro cakuti Yahova anakuphedzani. w24.03 tsa. 9-10 ¶8-10