Gulu Yakucita Cifuno Ca Yahova, tsamba 10-21

NSOLO 2

KUDZINDIKIRA MBUTO YA KRISTU M’MASASANYIRO A MULUNGU

“PAKUTOMA Mulungu achita kudzulu na pantsi,” na pinthu pyonsene pidacita iye pikhali ‘pyadidi maningi.’ (Gen. 1:​1, 31) Yahova acita anthu na cidikhiro cakudzumatirisa ca ntsogolo. Mbwenye, kupanduka kudacitika m’Edeni kwadinganyisa pang’ono makhaliro akutsanzaya a anthu. Mwandimomwene, cifuniro ca Yahova na dziko yapantsi pabodzi na anthu hacidacinja tayu. Ngakhale mukatonga iye ale adapandukira utongi wace ukulu, Mulungu apangiza kuti ana akubvera a Adamu mbadasudzulwa. Mbapadaonekambo kubwezerwa kwa ulambiri wandimomwene, na Mulungu mbadadzafudza nyakuipa pabodzi na mabasa ace onsene akuipa. (Gen. 3:​15) Ntsiku yace pinthu ­pinadzakhala pontho ‘pyadidi maningi.’ Yahova anadzakwanirisa pyenepi kubulukira mwa Mwanace, Yezu Kristu. (1 Jwau 3:⁠8) Natenepa, ndi kwakufunika kakamwe kwa ife kudzindikira mbuto ya Kristu m’masasanyiro a Mulungu.​​—⁠Mach. 4:​12; Afil. 2:⁠9, 11.

MBUTO YA KRISTU

Munanyerezera ife mbuto ya Kristu m’masasanyiro a Mulungu, tisafunika kudzindikira kuti mbuto yace isaphataniza makhundu mazinji. Yezu asatumikira ninga Muomboli wa anthu, Nyantsembe Wankulu, Nsolo wa mpingo Wacikristu, na cincino ninga Mambo wa Umambo wa Mulungu. Kunyerezera makhundu anewa kunathimizira kupereka kwathu takhuta ku masasanyiro a Mulungu na kuthimizira kufuna kwathu Yezu Kristu. Biblya isafokotoza mbuto zace zakusiyana-siyana.

Nkati mwa utumiki wa Kristu pa dziko yapantsi, pyaoneka mwadidi kuti anthu akubvera mbadagumanyizwa papswa kwa Mulungu kubulukira mwa Yezu. (Jwau 14:⁠6) Ninga Muomboli wa anthu, iye aperekeka ninga ntsembe ya anthu azinji. (Mat. 20:​28) M’njira ineyi Yezu hadatumikira ninga citsanzo ca makhaliro aumulungu basi tayu. Iye akhala munthu wakutoma m’kukwanirisa cifuniro ca Yahova kwa anthu. Iye ndi njira yathu ibodzi basi towera kutawirwa pontho pamaso pa Mulungu. (Mach. 5:​31; 2 Akor. 5:​18, 19) Kufa kwa Yezu ninga ntsembe na kulamuswa kwace muli akufa kwafungula njira kwa anthu akubvera towera atambire nkhombo zokhonda mala pantsi pa utongi wa Umambo wakudzulu wa Mulungu.

Kubulukira pa mbuto yace kudzulu, Yezu Kristu asatumikirambo ninga Nyantsembe Wankulu. Ninga Nyantsembe wathu Wankulu, iye asakwanisa “kubvera ntsisi anthu akufewa” na kuphimbira madawo a atowereri ace akuperekeka pa dziko yapantsi pano. Mpostolo Paulu afokotoza: “Nyantsembe wathu wankulu si nyantsembe tayu wakukhonda kubvera ntsisi anthu akufewa; mbwenye iye ene ayeserwa mu pyonsene sawasawa ninga ife pano; mbwenye madawo, iye hadaachita tayu.” Buluka penepo Paulu awangisa anyakukhulupira Yezu Kristu kuti aphindule kakamwe na masasanyiro a kugumanyiza papswa a Mulungu, m’kulonga kuti: “Tendeni, mphapo, na ntima wakukhulupira ku mpando wa nkhombo zache towera tibverwe ntsisi . . . [na kuphedzwa] pyadidi.”​​—⁠Aheb. 4:​14-​16; 1 Jwau 2:⁠2.

Mwakufuna Yezu asatumikirambo ninga Nsolo wa mpingo Wacikristu. Tenepa ninga anyakutowerace andimomwene a piaka dzana yakutoma nee akhafunika kukhala na ntsogoleri waumunthu, na ifembo lero nkhabe funika kukhala na ntsogoleri waumunthu. Yezu asapereka citsogolero kubulukira ku nzimu wakucena, Malemba Akucena na akumbizi akuthema akuti ali na kupitawirira pamaso pace na pamaso pa Babace Wakudzulu m’njira inatsalakana iwo nkumbi wa Mulungu. (Aheb. 13:​17; 1 Ped. 5:​2, 3) Yahova alonga mwaciprofesiya pya Yezu: “Ndankhalisa ntsogoleri na ntongi wa madziko; na iye, ndinaapangiza mphambvu zanga.” (Iza. 55:⁠4) Yezu adziwisa kukwaniriswa kwa profesiya ineyi ikhalonga pya iye mudapanga iye anyakupfunzace tenepa: “Lekanimbo kuthulwa apfundisi, thangwi mpfundisi wanu ndi mbodzi ekha, ndiye Kristu.”​​—⁠Mat. 23:⁠10.

Ninga njira ya kupangiza ciimiriro cace na kukhala kwace dzololo towera kutiphedza, Yezu acita ncemerero: “Bwerani kuna ine, imwe mwonsene akuneta na anyakulemerwa, inembo ndinadzakupumisani. Kwatani ntolo wanga, mbamupfundza kwa ine thangwi ndinawo ntima wadidi na wakukhurudzika, mbamudzagumana ntendere mu mitima mwanu, thangwi ntolo wanga ngwakusemiwa, nsekete wanga ngwakululupa.” (Mat. 11:​28-​30) M’kuyang’anira mpingo Wacikristu na ntima wadidi m’njira yakubweresa kukhurudzika ku mioyo yathu, Yezu Kristu apangiza kuti ali na mphambvu ya kukhala “nkumbizi wadidi” m’kusangizira Babace wakudzulu, Yahova Mulungu.​​—⁠Jwau 10:​11; Iza. 40:⁠11.

Pa tsamba yace yakutoma kwa Akorinto, Paulu afokotoza cinthu cinango ca mbuto ya Yezu Kristu, m’mafala awa: “Iye apangwa kutonga mpaka kuti anyamalwa ache onsene akhale pa manyalo ache. Penepo pyonsene pingakhala pa manyalo ache, mwana andzalambirambo ule adakhalisa pyonsene pa [manyalo] ache, towera Mulungu ekha akhale mwa pyonsene pa mbuto zonsene.” (1  Akor. 15:​25, 28) Mbasati kudza pa dziko yapantsi, Yezu akhatumikira kudzulu ninga ‘mphedzi [‘mesiri wa basa,’ NM],’ m’kukhala wakutoma wa pyakucitwa pya Mulungu. (Mis. 8:​22-​31) Mudatumwa Yezu pa dziko yapantsi na Mulungu, iye acita cifuno ca Mulungu m’nzidzi onsene. Iye apirira mayesero makulu na afa mwakukhulupirika kwa Babace. (Jwau 4:​34; 15:​10) Na thangwi ya kukhulupirika kwace kwa Mulungu mpaka kufa, Yezu apaswa sagwati. Mulungu amulamusa muli akufa towera akhale kudzulu na ampasa mphambvu towera kukhala Mambo wa Umambo wakudzulu. (Mach. 2:​32-​36) Ninga Mambo wa Umambo, Yezu Kristu ali na basa ­ikulu idampasa Mulungu towera kutsogolera pikwi na pikwi pya pyakucitwa pyauzimu pyamphambvu kakamwe m’kufudza maumambo a anthu pa dziko yapantsi na kubulusa uipi onsene pa dziko yapantsi. (2 Ates. 1:​6-⁠9; Apok. 19:​11-​21; 20:​1-⁠3) Buluka penepo Umambo wakudzulu wa Mulungu wakutongwa na Kristu, unadzakhala utongi ubodzi basi wa kutonga pa dziko yonsene yapantsi.​​—⁠Apok. 11:​15.

Yezu Kristu, Citsanzo cathu, ndi wangwiro. Iye aikhwa towera atitsalakane. Yahova Mulungu apasa Yezu Kristu basa ikulu kakamwe ya kukhala Ntsogoleri na Ntongi wa mbumba ya Mulungu lero. Natenepa, kudzindikira mbuto ya Kristu m’masasanyiro a Mulungu kusabveka kupitiriza kukhala akukhulupirika kwa Yahova na kuenda pabodzi na gulu yace.

Atowereri a Yezu a piaka dzana yakutoma adzindikira kakamwe mbuto ya Kristu m’masasanyiro a Mulungu. Iwo apangiza pyenepi m’kuphata basa pabodzi mwakuphatana pantsi pa usolo wa Kristu, m’kungonjera citsogolero cace cakuperekwa kubulukira ku nzimu wakucena na ku Malemba akupumirwa. (Mach. 15:​12-​21; Apok. 1:⁠1) Mpostolo Paulu alonga pya kuphatana kwa mpingo wa Akristu akudzodzwa mudalemba iye tenepa: “Tikule ntsiku zonsene towera kufikira chimo cha Kristu, thangwi iye ndiye nsolo. Mwa iye maphindi onsene a manungo anaphatana mbagumanisana thangwi ya mphambvu ya mafundo, mbabulukambo manungo onsene thangwi phindi phindi inachita pyadidi mabasa ache mpaka kurikha mwa kufunana na ndzache.”​​—⁠Aef. 4:​15, 16.

Ninga manungo aunyama, mpingo wa anyakudzodzwa na “mabira ­anango” usacitwa na piwalo pizinji pyakusiyana-siyana. Ciwalo cibodzi na cibodzi ca mpingo cingabverana na pinango na pyonsene pingaphata basa mwakuphatana pantsi pa usolo wa Kristu, mpingo usakula na tisapitiriza kukhala na ntima wakufuna wakuti “[usatiphataniza] pyadidi ninga akumangiwa na nkhambala.”​​—⁠Jwau 10:​16; Akol. 3:​14; 1 Akor. 12:⁠14-​26.

Pyakucitika pya dziko pinakwanirisa profesiya ya Biblya pisapangiza mwapakweca kuti kutomera m’caka ca 1914, Yezu Kristu apaswa mphambvu ninga Mambo wa Umambo. Iye ali kutonga cincino pakati pa anyamalwa ace. (Sal. 2:​1-​12; 110:​1, 2) Kodi pyenepi pisabvekanji kwa ale anakhala pa dziko yapantsi cincino? Kwa anyamalwa ace, Yezu ­anadzapangiza mwamphambvu mbuto yace ­ninga Mambo wa amambo na Mbuya wa ambuya munafuna iye kudzatonga nseru wa Mulungu kwa iwo. (Apok. 11:​15; 12:​10; 19:​16) Pikiro ya Yahova ya kusudzula idalongwa mudamala kwene anthu kupanduka inadzakwanirisika cincino kwa ale anatawirwa na Iye. (Arom. 16:​20) Tiri akukomerwa kakamwe kudzindikira mbuto ya Kristu m’masasanyiro a Mulungu na kukhala akuphatana m’kukwanirisa utumiki wa dziko yonsene yapantsi pantsi pa citsogolero ca Kristu nkati mwa ntsiku zino zakumalisa!

NSOLO 3

NYINDIRANI “MBANDAZI WAKUKHULUPIRIKA NA WANZERU”

“KODI mwandimomwene mbani “mbandazi wakukhulupirika na wanzeru?” Na mbvunzo unoyu, Yezu Kristu atoma kulonga nsanje wakufunika wa ciprofesiya. Unoyu usacita khundu ya ‘chidzindikiro’ cidapereka iye ca “kumala kwa pantsi pano [‘makhaliro a pinthu,’ NM].” (Mat. 24:​3, 42-​47, Mphangwa Zadidi) Yezu apangiza kuti “mbandazi” mbadakhala wakupingizika m’nzidzi wakumalisa. “Mbandazi [unoyu]” mbadapaswa basa ya kuyang’anira pyakufunika pya Umambo pa dziko yapantsi na kukhala na basa ikulu ya kupasa mbumba ya Mulungu cakudya cauzimu na “kweru.” M’kulonga pyenepi Yezu athimizira: “Mbandazi [unoyu] anasekera, mbuyache angabwera mbangumana mbakachita basa yache. Ndinakupangani kuti anankhulupirira basa ya kuonera pinthu pyache pyonsene.”

Nsanje unoyu usasosa mabvunzo akufunika kuti tiadinge. Kodi mbani “mbandazi [unoyu]”? Kodi ndi ninji “pinthu pyache”? Kodi mbodzi na mbodzi wa ife asacita khundu ipi pa nsanje unoyu waciprofesiya? Cifuno ca mabvunzo anewa si ­towera tidziwe matawiro awo basi tayu. Kudzindikira kwandimomwene pinthu pyenepi na kupitiriza kunyindira “mbandazi wakukhulupirika na wanzeru” kunatiphedza kucita cifuno ca Yahova.

KUDZINDIKIRA “MBANDAZI WAKUKHULUPIRIKA NA WANZERU”

Pa nsanje unoyu, Yezu alonga kuti “mbandazi” mbadapasa cakudya cakufunika cauzimu . Kodi mbani adasankhula Yezu towera kudyesa atowereri ace m’piaka dzana yakutoma? Na mbani adagumana iye mbakacita pyenepi mwakukhulupirika mudabwera iye pontho ninga nyakutonga wa Umambo m’1914? Ninga ndi mwakudziwika, nkhabepo munthu adakhala maso m’madzana anewa onsene a piaka. Natenepa “mbandazi wakukhulupirika na wanzeru,” asaphipirisa nsoka onsene wa mbandazi wa atowereri akudzodzwa a Kristu anakhala pa dziko yapantsi pa nzidzi wakuthonyeka. (Luka 12:​42, MZ) Inde, Kristu asaphatisira nsoka unoyu towera kumwaza mphangwa za kulonga pya kukwanirisika kwa maprofesiya a Biblya na kupereka citsogolero m’nzidzi wakuthema ca maphatisiro a midida ya Biblya m’umaso wa ntsiku na ntsiku. Ku khundu inango, cakudya cauzimu ceneci cisagawirwa anthu kubulukira m’mipingo ya Mboni za Yahova.​​—⁠Iza. 43:​10; Agal. 6:⁠16.

Kodi ndi ninji mphapo, “pinthu pyache”? Pinthu pyenepi ndi mpfuma zonsene zauzimu zinagumanika pa dziko yapantsi zidakhala za Kristu mwakubverana na utongi wace ninga Mambo wakudzulu. Pyenepi pisaphataniza pinthu pyonsene pinagumanika ku ofesi ikulu ya Mboni za Yahova, pabodzi na mafiliali, Nyumba za Umambo na Nyumba za Misonkhano za dziko yonsene yapantsi. “Pinthu pyache” pyenepi pisaphatanizambo basa ya kumwaza “mphangwa zadidi za dziko [“umambo,” NM] ya kudzulu” pa dziko yonsene yapantsi na kupfunzisa anthu anatawira. Mulungu asaphatisira “mbandazi” unoyu ninga combo towera kugumanya m’mpingo “[mwinji] ukulu wa mitundu yonsene, wa madzindza onsene, wa mbumba zonsene, wa malongero onsene,” unafuna kudzapulumuka pa nyatwa ikulu. (Luka 12:​42-​44; Mat. 24:​14; Apok. 7:​9-​14) Mwandimomwene, mwinji ukulu unoyu ndiwo unacita khundu ikulu m’kumwaza mphangwa zadidi mpaka kunkhomo kwa dziko yapantsi. Iwo asacita khundu ya “pinthu” pyakufunika pya Kristu na usafuniwa kakamwe na nsoka wa mbandazi thangwi usaaphedza mwakukhulupirika na mwaphinga.

BASA YA MATHUBO AKUTONGA

“Mbandazi wakukhulupirika na wanzeru” asawangisira kukoya kuphatana na asakhunganya kuti “pinthu pyonsene pichitwe mwakuthema pontho mwakundendemera.” (1 Akor. 14:​40, Chiverano Chachinchino) Towera kukwanirisa pyenepi m’piaka dzana yakutoma, Akristu anango akudzodzwa a nsoka wa mbandazi wakukhulupirika na wanzeru asankhulwa towera kuaimirira. Ninga aimiriri, iwo nee akhabvunza akulu anango onsene akudzodzwa pa dziko yapantsi mbasati kucita pyakusankhula tayu. Kubulukira ku mpingo wa ku Yerusalemu, iwo akhatumikira ninga mathubo akutonga a mipingo yonsene ya Akristu akudzodzwa.

Kutomera pa Pentekoste wa 33 E.C. kuenda ntsogolo, apostolo akukhulupirika a Mbuya Yezu Kristu ndiwo akhapereka citsogolero ku mpingo Wacikristu wakumala kwene kukhazikiswa. (Mach. 4:​33, 35, 37; 5:​18, 29) Cifupi na caka ca 49 E.C., kusiyapo apostolo a Yezu athimizirwa anthu anango mbaphatana na mathubo anewa akutonga. Mudatongwa nseru wa kusidzwa, mathubo anewa akhaphataniza ‘apostolo na akulu’ m’Yerusalemu. (Mach. 15:​1, 2) Ikhali basa yawo ya kudinga pinthu pikhakhuya Akristu konsene kwene. Iwo atumiza matsamba na mitemo, pyakuti pikhawangisa mipingo na kucitisa anyakupfunza kukhala akuphatana m’manyerezero na m’pyakucita. Ninga cakubwereswa, mipingo ikhatowerera citsogolero ca mathubo akutonga, yatambira nkhombo ya Yahova na yapembera.​​—⁠Mach. 8:​1, 14, 15; 15:​22-​31; 16:​4, 5.

Kufunika kwa masasanyiro anewa kusaoneka lero. Anyakudzodzwa akuti ndi Mathubo Akutonga a Mboni za Yahova lero ali na piaka pizinji m’basa yakukhulupirika na ali na luso izinji ya mafambisiro a gulu ya Yahova. Iwo asapasa mbumba ya Yahova citsogolero cauzimu, tenepa ninga pidacitwa na mathubo akutonga a piaka dzana yakutoma. Mathubo Akutonga anewa asapitirizambo kutsalakana na kutsogolera basa ya kumwaza mphangwa, kucita mabukhu a kupfunza Biblya, na kucita masasanyiro a kuikha akulu ampingo towera kucita mabasa akusiyana-siyana nkati mwa gulu. Pyenepi ndi pingasi pya pifuno pya Umambo wa Kristu pyakuti pisatsalakanwa lero. Tenepa ninga Akristu akutoma, ife tisatawira citsogolero ca akulu akukola mwauzimu cinagumanika m’Biblya na kutitsogolera m’pinthu pya ulambiri.

Tenepa ninga m’piaka dzana yakutoma, Mathubo Akutonga lero ndi anthu akusowa ungwiro. Mbwenye, Yahova aphatisira anthu akusowa ungwiro m’nzidzi wakale towera kukwanirisa cifuno cace. Iye apanga Noa kuti amange cimwadiya na amwaze mphangwa za kufudzwa kukafendedzera m’ntsiku zace. Mozese asankhulwa towera kutsogolera mbumba ya Yahova kubuluka ku Ejito. (Eks. 3:​10) Anthu akusowa ungwiro apumirwa towera kulemba Biblya. (2 Tim. 3:​16; 2 Ped. 1:​21) Yahova m’kuphatisira kwace anthu akusowa ungwiro towera kutsogolera basa yakumwaza mphangwa na ya kucita anyakupfunza lero nee kusafewesa tayu cinyindiro cathu ku gulu ya Mulungu. Mbuto mwa pyenepi, tisawangiswa thangwi tisadziwa kuti mwakusowa ciphedzo ca Yahova, Mathubo Akutonga nee mbadakwanisa kucita pyonsene pinacita iwo lero.

MATHANGWI A KUNYINDIRA “MBANDAZI WAKUKHULUPIRIKA NA WANZERU”

Pana mathangwi mazinji towera kunyindira kakamwe nsoka wa mbandazi. Yakutoma pa onsene ndi yakuti Yezu aasankhula towera aonere “pinthu pyache” pyonsene pyafukunika. Ceneci ndi cipangizo capakweca cakuti iye asaanyindira kakamwe.

Thangwi yaciwiri, Mafala a Mulungu asakulumiza Akristu kuti angonjere mwakukwana ale anatsogolera. Kodi pisatiphindulisa tani pyenepi? Ninga pyalembwa pa Ahebere 13:​17, mpostolo Paulu alonga: “Mubvere atsogoleri anu, mbamua tawira, thangwi iwo anaonera mizimu [‘miyoyo,’ CC] yanu, thangwi Mulungu anadzaabvundza pya mizimu iyi. Iwo achite mabasa awo na ntima wakukomerwa, nee na kubululira thangwi kubululira kule kunakuphedzani tayu.” Towera udidi wathu pabodzi na kutsidzikizwa mwauzimu, tisatongwa kubvera na kungonjera citsogolero cinabuluka kwa akulu ‘anaonera mizimu yathu.’

Ninga pyalembwa pa 1 Akorinto 16:​14, Paulu alonga: “Pyonsene pinachita imwe mupichite na kufunana.” Pyakusankhulwa pinacitwa m’kuphedza mbumba ya Mulungu pisakhuyiwa na nkhaliro unoyu ukulu wa kufuna. M’kulonga pya kufuna, 1 Akorinto 13:​4-⁠8 asalonga: “Munthu wakufuna anapirira mbachita pyadidi, bibvu hanachitabve tayu, pyakuipa hanachitabve tayu, anakhondambo kugaya. Munthu anafuna mu ntima mwache hananyadzika tayu, hanasaka pinthu pyache basi tayu, hanasiribzwa tayu, pyakuipa hananyerezera tayu, anachimwanambo kukomerwa napyo, anakomerwa na pinthu pyadidi pyokha. Iye anapirira pyonsene, anatawira pyonsene, anadikhira pyonsene, anakhulupira pyonsene. Kufuna kunamala tayu.” Nakuti kufuna ndiko kunatonga pyakusankhula pyonsene pinacitwa towera kuphedza anzakazi a Yahova, tiri na mathangwi mazinji a kukhala akutsidzikizika pantsi pa citsogolero ceneci. Natenepa, ceneci ndi cipangizo basi ca kufuna ca Yahova kuli mbumba yace yonsene.

Nsoka wa mbandazi wapangiza kuti uli na nzimu wa Mulungu m’kuthimbana pabodzi na kupirira mayesero mazinji adagumanikana na iwo. Khundu yakuoneka ya gulu ya Yahova lero isatambira nkhombo zizinji, natenepa, tisaiphedza na kuinyindira na ntima onsene.

TISAPANGIZA TANI KUTI TISANYINDIRA NSOKA WA MBANDAZI

Ale onsene adasankhulwa towera kulang’anira mipingo asapangiza cinyindiro cawo m’kutawira mwakukhulupirika na mwakukomerwa kukwanirisa pinaphembwa iwo kucita. (Mach. 20:​28) Ninga anyakumwaza mphangwa za Umambo, mwaphinga tisacita basa ya kupereka umboni nyumba na nyumba, maulendo akubwerezera, na kucitisa mapfunziro a Biblya a panyumba. (Mat. 24:​14; 28:​19, 20, MZ) Towera kuphindula mwakukwana na cakudya cakuinjipa cauzimu cinaperekwa na “mbandazi wakukhulupirika na wanzeru,” tisafunika kukhunganyika mwadidi na kugumanika pa misonkhano yathu yonsene Yacikristu. Pyenepi pisaphataniza misonkhano yakupambulika, ya cisa na misonkhano ya gawo inakhunganywa m’piaka pyonsene. Tisaphindula kakamwe na kuwangisana munaceza ife na abale athu pa misonkhano ineyi Yacikristu.​​—⁠Aheb. 10:​24, 25.

Cinyindiro cathu kuli “mbandazi wakukhulupirika” cisapangizwambo munaphedza ife gulu na pyakupereka pyathu pyakumanungo. (Mis. 3:​9, 10) Munaona ife abale athu na pyakusowa pyakumanungo, tisaaphedza mokhonda dembuka. (Agal. 6:​10; 1 Tim. 6:​18) Tisacita pyenepi na ntima wakufuna kakamwe abale athu, m’midzidzi yonsene tisakhala dzololo towera kusaka miyayi ya kupangiza kupereka kwathu takhuta kwa Yahova na gulu yace thangwi ya udidi unaticitira iye.​​—⁠Jwau 13:⁠35.

Njira inango yakupangiza kuti tisanyindira nsoka wa mbandazi lero ndi kuphedza na kubvera pinatonga iwo. Ngakhale kuti nee tisadziwa mwadidi mathangwi a pisankhulo pinango, tisadziwa kuti kutawira pyenepi kunadzatiphindulisa kwenda na kwenda. M’midzidzi inango pinthu pyakufunika pisafokotozwa mwadidi, na ife tisaphedza na ntima wathu onsene pidatongwa. Ninga pyakubwereswa, Yahova asatipasa nkhombo na thangwi ya kubvera kwathu Mafala ace na nsoka wa mbandazi. Natenepa tisapangiza kungonjera kwathu Mbuya, Yezu Kristu.

Inde, tiri na mathangwi mazinji towera kunyindira mwakukwana “mbandazi wakukhulupirika na wanzeru.” Sathani, mulungu wa makhaliro ano a pinthu, asacita pyonsene pinakwanisa iye towera kutikana dzina ya Yahova na gulu yace. (2 Akor. 4:⁠4) Lekani phatwa na misampha yakuipa ya Sathani. (2 Akor. 2:​11) Iye asadziwa kuti wansalira nzidzi wakucepa kakamwe kuti aponywe m’dzenje, na asayesera kukweya anthu azinji a Yahova towera afudzwe pabodzi na iye. (Apok. 12:​12) Natenepa, munathimizira Sathani mphambvu zace, tisafunika kufendedzera duzi kakamwe Yahova m’kupangiza cinyindiro cakukwana ku njira inaphatisira Iye towera kutsogolera anthu Ace lero. Sathani asacita nkhondo na “anache [‘anyakusala a mbeu ya nkazi,’ NM]”, adapaswa basa ya kutsogolera “umboni wa Kristu.” (Apok. 12:​17) Kunyindira kwathu mwakukwana kuli Yahova na masasanyiro ace kusabweresa kuphatana kwaciubale.