Acemereni
1. Kodi inatoma lini kampanya yakucemera anthu toera adzagumanike pa nsonkhano wa gawo?
1 Khala musafuna kukhunganya cakudya cakupambulika kwa acibale peno axamwali anu, cakuti cisaphemba kuwangisira kakamwe na kobiri izinji, pyenepi mbipidakucitisani kuacemera mwakugalamuka. Munjira ibodzi ene, basa izinji isacitwa toera kukhunganya phwando yauzimu inafuna kudzacitwa pa nsonkhano wa gawo. Masumana matatu mbudzati kutoma nsonkhano wa gawo, Yahova asatipasa mwai wakucemera anthu anango toera adzagumanikembo. Ninji pinafuna kutiphedza toera kudzacita basa ineyi mwakugalamuka?
2. Ninji pinafuna kudzatikulumiza toera kucita khundu mwakukwana mu ndzidzi wa kampanya?
2 Tinganyerezera cipfundziso cakutsandzayisa cinapereka Yahova m’misonkhano ya gawo, tinadzakulumizika toera kucita khundu mwakukwana mu kampanya ineyi. (Iza. 65:13, 14) Tisafunika kukumbukambo kuti makampanya athu a pacaka asabweresa maphindu mazinji. (Onani bokosi “Pisabweresa Maphindu.”) Anthu anango anafuna cemera ife anadzagumanika pa nsonkhano, mbwenye anango nkhabe. Mwakukhonda tsalakana pyenepi, kuwangisira kwathu mu ndzidzi wa kampanya kusapasa mbiri Yahova na kupangiza kupasa kwace mwakudzala manja.—Sal. 145:3, 7; Apok. 22:17.
3. Kodi micemerero inadzagawirwa tani?
3 Misoka ya akulu a mpingo isafunika kudinga kuti anagawira tani micemerero mwakukwana, kuphatanizambo khala isafunika kusiyiwa m’manyumba munakhonda kugumanika anthu peno kuiphatisira mu umboni wapakweca n’cisa cawo. Pakumala kwa sumana marevista anakwaniswambo kugawirwa pabodzi na micemerero khala mphyakuthema. Kampanya ingamala, pinadzakhala pyakutsandzayisa tani kudziwa kuti tacitambo khundu mwakugalamuka, pontho anthu azinji agumanikambo pa phwando yauzimu idatipasa Yahova!
[Bokosi pa tsamba 4]
Munadzalonganji?
Pakumala kumwanyika, munakwanisa kulonga: “Tikucita khundu mu kampanya yakuti ikucitwa pa dziko yonsene toera kucemera anthu kuti agumanike pa cakucitika cakufunika kakamwe. Ntsiku, ndzidzi na mbuto pyalembwa mu ncemerero uyu.”
[Bokosi pa tsamba 4]
Pisabweresa Maphindu
• Mu pyaka pizinji nduli, mulongo unango akhacita khundu mu kampanya yakugawira micemerero, pontho abvundzika khala kuwangisira kwace mbukudabweresa maphindu. Iye anyerezera, ‘Kodi anthu anacemera ine anadzabwera ku nsonkhano?’ N’sabudu inango namacibese pa nsonkhano wa gawo, iye aona mamuna wauphemberi Waciindya wakuti akhakhala cifupi na iye, mbamwanyika. Pisaoneka kuti mamuna unoyu akhali pa nsonkhano thangwi akhadatambira ubodzi mwa micemerero yathu. Iye akhali na mibvundzo mizinji yakuti mulongo aitawira mwaluso. Mamuna unoyu alonga kuti atsandzaya kakamwe na programu, pontho adzumatirwa kakamwe na mabvaliro na makhaliro a abale na alongo. Mu ntsiku ibodzi ene, mulongo akhala cifupi na banja inango mbatomesa makani. Iwo atambirambo ncemero na akhadabwera pa nsonkhano unoyu na maximbombo. Iwo atsandzaya kakamwe na nsonkhano, pontho acita masasanyiro toera kugumanika pontho n’Dimingu. Pyenepi pyacitisa mulongo kuona kufunika kwa kampanya yathu ya pacaka.
• Pa nsonkhano wa gawo udamala, banja ibodzi yakuti ndi apainiya a ndzidzi onsene atoma kucedza na banja inango yakuti ndi yakugwesera. Banja ineyi yalonga kuti unoyu ukhali ulendo wakutoma kugumanika pa nsonkhano wa gawo. Apainiya abvundza, “Mbani adakucemerani?” Iwo atawira, “Pidafika ife kunyumba ntsiku inango, tagumana ncemerero pantsi pa nsuwo.” Iwo aleri ncemerero, mbalemba kuntsi kwa ncemerero toera kupita ncibverano na Mboni za Yahova. Abale na alongo anango apasa cakudya banja ineyi. Iwo atsandzaya kakamwe na programu, mbacita masasanyiro akubwerera pontho mangwana mwace. Masasanyiro acitwa toera kaacedzera na kukulisa cifuno cawo.