NSOLO WA PFUNDZIRO 17
Yahova Asakufunani Kakamwe!
‘Yahova asafuna mbumba yace.’—MASAL. 149:4.
NYIMBO 108 Ufuni Wandimomwene wa Mulungu
PINAFUNA IFE KUPFUNDZAa
Babathu wakudzulu ‘asafuna m’bodzi na m’bodzi wa ife’ (Onani ndima 1)
1. Ninji pinaona Yahova kuna mbumba yace?
YAHOVA MULUNGU ‘asafuna mbumba yace.’ (Masal. 149:4) Pyenepi pisatitsandzayisa kakamwe. Yahova asaona makhaliro athu adidi, pontho iye asaona kuti tinakwanisa kucita pinthu pyadidi. Kusiyapo pyenepi, iye anakwanisa kutiphedza toera tikhale axamwali ace. Natenepa tingapitiriza kukhala akukhulupirika kuna Yahova, iye anapitiriza kukhala cifupi na ife kwenda na kwenda.—Juwau 6:44.
2. Thangwi yanji anango asanyerezera kuti nee asafuniwa na Yahova?
2 Anthu anango anakwanisa kulonga tenepa: ‘Ine ndisadziwa kuti Yahova asafuna atumiki ace ninga nsoka, mbwenye ndinakhala tani na cinyindiro cakuti iye asandifuna?’ Thangwi yanji anango asacita mbvundzo unoyu? Oksana,b wakuti akhali na umaso wakunentsa kakamwe pikhali iye mwana alonga: “Ine ndatsandzaya kakamwe pidabatizwa ine mbanditoma kutumikira ninga mpainiya. Mbwenye pidapita pyaka 15, ine ndatoma kukumbuka pinthu pyakuipa pikhacitika kuna ine mu ndzidzi ukhali ine mwana. Ine ndatoma kunyerezera kuti nee ndikhalibve wakutawirika pamaso pa Yahova, pontho nee ndathema kufuniwa na iye.” Mulongo Yua, wakuti ndi mpainiya akhalimbo na umaso wakunentsa kakamwe pikhali iye mwana, iye alonga: “Ine ndaperekeka kuna Yahova thangwi ndikhafuna kuntsandzayisa. Mbwenye ndatoma kunyerezera kuti iye nee mbadandifuna.”
3. Tinapfundzanji mu nsolo uno?
3 Ninga pidacitika na alongo adalongwa mu ndima yaciwiri, imwe musafuna kakamwe Yahova mbwenye panango munapenula khala iye asakufunani. Thangwi yanji musafunika kukhala na cinyindiro cakuti iye asakufunani? Pontho ninji cinafuna kukuphedzani toera kukunda manyerezero akuti Yahova nee asakufunani? Mu nsolo uno tinatawira mibvundzo ineyi.
THANGWI YANJI NDI PYAKUGOSWA KUPENULA KUTI NEE TISAFUNIWA NA YAHOVA?
4. Thangwi yanji ndi pyakugoswa kupenula kuti nee tisafuniwa na Yahova?
4 Ufuni ndi cinthu cakufunika kakamwe. Natenepa tingakhala na cinyindiro cakuti Yahova asatifuna, pinatiphedza toera kuntumikira na ntima onsene mwakukhonda tsalakana pinentso pinathimbana na ife. Mbwenye tingapenula kuti Yahova nee asatifuna, ‘mphambvu zathu zinacepa.’ (Mis. 24:10) Pontho tingatsukwala mbatitoma kunyerezera kuti Mulungu nee asatifuna, ife nee tinakwanisa kupirira mayesero a Sathani.—Aef. 6:16.
5. Ninji pidacitika kuna abale na alongo akhanyerezera kuti nee asafuniwa na Mulungu?
5 Abale na alongo athu anango atoma kunyerezera kuti nee asafuniwa na Yahova, natenepa cikhulupiro cawo cadzafewa. Mwacitsandzo, nkulu wa mpingo unango anacemerwa James alonga: “Maseze ndikhatumikira pa Bheteli na kuphedzera mpingo wa cilongero cinango, ine nee ndikhali na cinyindiro cakuti Yahova akhakomerwa na pinthu pikhacita ine. Kusiyapo pyenepi, ine ndatoma kupenula khala Yahova akhabvesera maphembero anga.” Eva wakuti asatumikirambo m’basa ya ndzidzi onsene alonga: “Ine ndadzindikira kuti ndi pyakugoswa kakamwe kunyerezera kuti Yahova nee asatifuna thangwi pyenepi pinacitisa munthu kukhonda tumikira Yahova na ntima onsene. Kusiyapo pyenepi, manyerezero anewa anacitisa munthu kufuna kusiya kucita mabasa auzimu mbacimwana kutumikira Yahova mwakutsandzaya.” Michael wakuti ndi mpainiya wa ndzidzi onsene, pontho asatumikira ninga nkulu wa mpingo, alonga: “Khala nee musakhulupira kuti Mulungu asakufunani, imwe munasiya kuntumikira.”
6. Tisafunika kucitanji tingatoma kupenula kuti Yahova nee asatifuna?
6 Pinthu pidacitika na abale na alongo anewa pisapangiza kuti kupenula kuti Yahova nee asatifuna kunakwanisa kuphekesa cikhulupiro cathu. Mphapo tisafunika kucitanji tingatoma kupenula kuti nee tisafuniwa na Mulungu? Mwakucimbiza ife tisafunika kusiya kunyerezera pyenepi. Phembani Yahova toera akuphedzeni kubulusa manyerezero anewa mbakupasani ‘ntendere wa Mulungu toera utsidzikize ntima wanu na manyerezero anu.’ (Masal. 139:23; Afil. 4:6, 7) Pontho kumbukani kuti nee ndimwe basi anathimbana na manyerezero anewa. Abale na alongo anango asathimbanambo na manyerezero mabodzi ene. Ngakhale atumiki a Yahova a mu ndzidzi wakale athimbanambo na manyerezero anewa. Cincino tendeni tione kuti tinapfundzanji kubulukira mu citsandzo ca mpostolo Paulu.
TINAPFUNDZANJI NA CITSANDZO CA MPOSTOLO PAULU?
7. Ndi nyatwa zipi zikhathimbana na Paulu?
7 Kodi imwe musadzudzumika midzidzi inango thangwi yakukhala na mabasa mazinji akuti nee musakwanisa kuacita onsene? Khala ndi tenepo, imwe munakwanisa kubvesesa pinthu pidacitikirwa na mpostolo Paulu. Iye nee akhadzudzumika basi ene na abale na alongo a mpingo ubodzi, mbwenye a “mipingo yonsene.” (2 Akor. 11:23-28) Kodi muli na utenda wakuti usakucitisani kukhala wakutsukwala? Paulu akhali na nyatwa yakuti ikhanthabusa kakamwe. Panango nyatwa ineyi ikhali utenda, pontho iye akhafuna kuti utenda wace umale. (2 Akor. 12:7-10) Kodi midzidzi inango imwe musatsukwala thangwi ya madodo anacita imwe? Paulu midzidzi inango akhathimbanambo na pyenepi. Iye alonga kuti ndi “munthu wakunentseka” thangwi ndzidzi onsene akhafunika kuwangisira toera kucita pinthu pyadidi.—Aroma 7:21-24.
8. Ninji pidaphedza Paulu toera kupirira nyatwa zace?
8 Maseze Paulu akhathimbana na nyatwa zizinji, iye apitiriza kutumikira Yahova. Kodi iye akhakwanisa tani kucita pyenepi? Maseze Paulu akhacita madodo, iye akhali na cikhulupiro cakuwanga thangwi ya ciomboli. Kusiyapo pyenepi, Paulu akhadziwa pikiro idalonga Yezu kuti ‘munthu onsene anan’khulupira anagumana umaso wakukhonda mala.’ (Juwau 3:16; Aroma 6:23) Mwandimomwene, Paulu akhali m’bodzi mwa ale akhakhulupira ntsembe ya ciomboli. Iye akhali na cinyindiro consene cakuti Yahova ali dzololo toera kulekerera ngakhale ale adacita madawo makulu mbatcunyuka.—Masal. 86:5.
9. Tisapfundzanji na mafala a Paulu anagumanika pa Agalata 2:20?
9 Paulu akhakhulupirambo kuti iye akhafuniwa kakamwe na Mulungu thangwi iye akhadziwa kuti Mulungu atuma Yezu toera kufera anthu. (Lerini Agalata 2:20.) Onani mafala akumalisa a vesi ineyi. Paulu alonga: ‘Mwana wa Mulungu, andifuna mbaperekeka thangwi ya ine.’ Paulu nee akhanyerezera kuti iye akhali wakuipa kakamwe munjira yakuti nee mbadafuniwa na Mulungu. Iye nee anyerezera kuti: ‘Ndisaona kuti Yahova asafuna abale anga, mbwenye iye nee asandifunambo.’ M’mbuto mwace, Paulu akumbusa Akristu a ku Roma: “Kristu atifera mu ndzidzi ukhali ife anyakudawa.” (Aroma 5:8) Natenepa nkhabepo cinthu cinafuna kuticimwanisa toera kufuniwa na Yahova.
10. Tisapfundzanji na mafala anagumanika pa Aroma 8:38, 39?
10 Lerini Aroma 8:38, 39. Paulu akhadziwa kuti ufuni wa Mulungu ndi wakufunika kakamwe. Iye alemba kuti nkhabepo pinthu ‘pinakwanisa kuticimwanisa kufuniwa na Mulungu.’ Paulu akhadziwa kuti Yahova apirira kakamwe Aizraeli. Iye akhadziwambo kuti Yahova ambvera ntsisi kakamwe. Munjira inango, Paulu akhalonga kuti: ‘Nakuti Yahova atuma Mwanace toera kudzandifera, ine nee ndisafunika kupenula kuti iye asandifuna.’—Aroma 8:32.
Pinthu pyakufunika kakamwe kuna Mulungu ndi pire pinacita ife cincino na pinafuna kucita ife ntsogolo, tayu madodo adacita ife nduli (Onani ndima 11)c
11. Maseze Paulu akhadacita madawo analongwa pa 1 Timoti 1:12-15, thangwi yanji akhali na cinyindiro cakuti akhafuniwa na Mulungu?
11 Lerini 1 Timoti 1:12-15. Pisaoneka kuti Paulu akhatsukwala kakamwe mu ndzidzi ukhanyerezera iye pinthu pidacita iye mbadzati kukhala Nkristu. Na thangwi ineyi, iye alonga kuti ndi “nyakudawa kakamwe.” Mbadzati kudziwa undimomwene, Paulu akhatcinga Akristu m’mizinda yakusiyana-siyana, mbaikha anango nkaidi, pontho iye akhapha anango. (Mabasa 26:10, 11) Mwakukhonda penula, Paulu akhatsukwala kakamwe pikhaonana iye na m’phale Wacikristu wakuti anyakubala ace aphiwa mukutawiriswa na iye. Paulu akhatsukwala kakamwe thangwi ya pinthu pidacita iye, mbwenye iye akhadziwa kuti nee mbadakwanisa kupicinja. Kusiyapo pyenepi, Paulu akhakhulupira kuti Kristu afera iye, na thangwi ineyi iye alemba: “Thangwi ya kukoma ntima kukulu kwa Mulungu, ine ndine mpostolo.” (1 Akor. 15:3, 10) Kodi pinthu pyenepi pisatipfundzisanji? Ife tisafunika kukhala na cinyindiro consene cakuti Yezu afera ife, pontho acitisa kuti tikwanise kukhala na uxamwali wakuwanga na Yahova. (Mabasa 3:19) Natenepa pinthu pyakufunika kakamwe kuna Mulungu ndi pire pinacita ife cincino na pinafuna kucita ife ntsogolo, tayu madodo adacita ife nduli, mwakukhonda tsalakana khala tikhali m’bodzi wa Mboni za Yahova peno nkhabe.—Iza. 1:18.
12. Kodi mafala anagumanika pa 1 Juwau 3:19, 20, anatiphedza tani tingakhala na mabvero akuti ndife akusowa basa peno nkhabe funiwa?
12 Munganyerezera kuti Yezu afa thangwi ya madawo anu, panango munanyerezera kuti ‘ine nee ndathema kucitirwa pyenepi.’ Thangwi yanji panango munakhala na manyerezero anewa? Thangwi ntima wathu wakusowa ungwiro unakwanisa kutinyengeza mbatitoma kunyerezera kuti ndife akusowa basa peno akukhonda funiwa. (Lerini 1 Juwau 3:19, 20.) Pyenepi pingacitika kuna ife, tisafunika kukumbuka kuti: “Mulungu ndi nkulu kupiringana mitima yathu.” Ife tisafunika kudziwa kuti Yahova asatifuna, pontho anatilekerera, maseze tikhale na mabvero akuti iye nee asatifuna peno iye nee anatilekerera. Kusiyapo pyenepi ife tisafunika kukhala na cinyindiro consene cakuti Yahova asatifuna. Toera kucita pyenepi, ife tisafunika kupfundza Bhibhlya ntsiku zonsene, kucita phembero ndzidzi onsene na kucedza na abale na alongo kazinji kene. Thangwi yanji kucita pinthu pyenepi ndi kwakufunika kakamwe?
KODI KUPFUNDZA BHIBHLYA, KUCITA PHEMBERO NA KUCEDZA NA ABALE NA ALONGO KUNATIPHEDZA TANI?
13. Kodi kupfundza Bhibhlya kunatiphedza tani? (Onani bokosi ya nsolo wakuti “Kodi Bhibhlya Yaaphedza Tani?”)
13 Imwe mungapfundza Bhibhlya ntsiku zonsene, munakwanisa kubvesesa makhaliro mazinji adidi a Yahova. Pontho munabvesesa kuti iye asakufunani kakamwe. Kunyerezera mwacidikhodikho pinthu pinapfundza imwe m’Bhibhlya ntsiku zonsene, pinakuphedzani toera kunyerezera mwadidi na “kusasanyira pinthu” pya muntima mwanu. (2 Tim. 3:16) Nkulu wa mpingo anacemerwa Kevin wakuti akhapibva kuti ndi wakusowa basa alonga: “Kuleri na kunyerezera mwacidikhodikho lemba ya Masalmo 103 pyandiphedza toera kusasanyira manyerezero anga na kubvesesa kuti Yahova asandifuna kakamwe.” Eva adalongwa mu ndima zakutoma alonga: “Dzuwa ingadoka, ndisasaka ndzidzi toera kunyerezera pinthu pyakufunika kuna Yahova. Pyenepi pisandiphedza toera kukhala na ntendere wa m’manyerezero, pontho pisawangisa cikhulupiro canga.”
14. Kodi phembero inatiphedza tani?
14 Citani phembero ndzidzi onsene. (1 Ates. 5:17) Khala musafuna kucita uxamwali na munthu unango, imwe musafunika kucedza naye kazinji kene na kumpanga mabvero anu. Munjira ibodzi ene, tisafunikambo kucita pyenepi kuna Yahova. Tingalonga mabvero athu, manyerezero athu na pinthu pinadzudzumika na ife kuna Yahova, tinapangiza kuti tisanyindira Yahova, pontho tisadziwa kuti iye asatifuna. (Masal. 94:17-19; 1 Juwau 5:14, 15) Yua adalongwa pakutoma alonga: “Ndingacita phembero ndisapanga Yahova pinthu pizinji kupiringana pire pidacitika kuna ine ntsiku ineyi. Ine ndisapanga Yahova pinanyerezera ine na mabvero anga. Mwapang’ono na pang’ono, ine ndakwanisa kuona Yahova tayu ninga patrau wa pa empreza, mbwenye ninga Baba wakuti asafuna anace.”—Onani bokosi ya nsolo wakuti “Kodi Imwe Mwaleri Kale Bukhu Iyi?”
15. Kodi Yahova asapangiza tani kuti asafuna m’bodzi na m’bodzi wa ife?
15 Kucedza na abale na alongo athu. (Tiya. 1:17) Babathu wakudzulu asapangiza kuti asafuna m’bodzi na m’bodzi wa ife mukutipasa abale na alongo akuti asapangiza ‘ufuni ndzidzi onsene.’ (Mis. 17:17) Mu tsamba idalemba Paulu kuna Akolose, iye alonga pya Akristu anango akuti amphedza, pontho alonga kuti Akristu anewa ‘am’balangaza kakamwe.’ (Akol. 4:10, 11) Ngakhale Kristu Yezu apereka takhuta kakamwe thangwi ya ciphedzo cidatambira iye kuna axamwali ace, akuti akhali aanju na anthu.—Luka 22:28, 43.
16. Kodi axamwali akukola mwauzimu anatiphedza tani toera kukhala na uxamwali wakuwanga na Yahova?
16 Kodi imwe musasaka na kutawira ciphedzo ca axamwali anu mu mpingo? Tingalonga nyatwa zathu kuna xamwali wathu wakukola mwauzimu, nee pisabveka kuti tiri na cikhulupiro cakufewa. Mbwenye pyenepi pinakwanisa kutiphedza. Onani pidalonga m’bale James adalongwa pa ndima yacixanu: “Kucita uxamwali na Akristu akukola mwauzimu kwandiphedza kakamwe. Ndingatoma kukhala na manyerezero akuipa, axamwali anewa asandibvesera mwakupirira mbandipanga kuti asandifuna. Kubulukira mwa iwo ndisakwanisa kuona kuti Yahova asandifuna, pontho asanditsalakana.” Natenepa ndi pyakufunika kakamwe kupitiriza kukhala na uxamwali wakuwanga na abale na alongo athu.
PITIRIZANI MU UFUNI WA YAHOVA
17-18. Mbani asafunika ife kubvera, pontho thangwi yanji?
17 Sathani asafuna kuti ife ticimwane kucita pinthu pyadidi. Kusiyapo pyenepi, iye asafuna kuti tikhulupire kuti Yahova nee asatifuna, pontho nee tathema kupulumuswa. Mbwenye mwakubverana na pidapfundza ife mu nsolo uno, unoyu ndi uthambi.
18 Yahova asakufunani, pontho imwe ndimwe wakufunika kakamwe kuna iye. Mungabvera Yahova, imwe ‘munapitiriza mu ufuni wace’ kwenda na kwenda ninga pinacita Yezu. (Juwau 15:10) Mbwenye lekani kubvera Sathani peno ntima wanu wakunyengeza. M’mbuto mwace, bverani Yahova wakuti asaona pinthu pyadidi kuna m’bodzi na m’bodzi wa ife. Pontho khalani na cinyindiro cakuti iye ‘asafuna atumiki ace,’ kuphatanizambo imwe.
NYIMBO 141 Umaso Ndi Wakudzumisa
a Abale na alongo athu anango nee asatawira kuti asafuniwa na Yahova. Mu nsolo uno, tinaona kuti tinakhala tani na cinyindiro cakuti Yahova asafuna m’bodzi na m’bodzi wa ife. Pontho tinaona kuti tisafunika kucitanji khala tisapenula kuti iye asatifuna.
b Madzina anango acinjwa.
c FOTO TSAMBA: Paulu mbadzati kudziwa undimomwene, iye akhatcinga Akristu mbaikha azinji mwa iwo nkaidi. Mbwenye pidakhulupira iye ntsembe ya Yezu, iye acinja, pontho awangisambo Akristu akuti anango mwa iwo akhali acibale a anthu akhatcinga iye.