Ufuni wa Mulungu Ndi wa Kwenda na Kwenda

1-2. Ndi nyatwa zipi zinatamba atumiki a Yahova azinji?

NYEREZERANI kuti bote iri pakati pa bara, pontho kuli kucitika condzi cikulu. Mabimbi makulu ali kumenya bote. Mbidasowa nangula, bote ineyi mbidaenda khundu inabhomerwa iwo na mabimbi. Nangula isaphedza toera bote ikhonde kukwatwa na mabimbi.

² Tingatamba nyatwa tisakhala ninga bote ineyi. Mabvero athu asacinja-cinja mwakucimbiza. Ntsiku ibodzi munakhala na cinyindiro cakuti Yahova asakufunani pontho asakutsalakanani. Mbwenye ntsiku inango munanyerezera kuti Yahova nee asaona nyatwa zinatamba imwe. (Mas. 10:1; 13:1) Panango, xamwali wanu anakubalangazani mbamukhurudzika mu ndzidzi ungasi. (Mis. 17:17; 25:11) Buluka penepo, imwe musapenula pontho khala Yahova asakuphedzani. Panango imwe musafika pakunyerezera kuti Yahova nee asakutsalakanani. Ninji pinafuna kutiphedza kupitiriza dzololo tingatamba nyatwa? Peno, tinakwanisa tani kupitiriza kukhala na cinyindiro cakuti Yahova asatifuna, pontho asatitsalakana?

3. (a) Ninji ‘ufuni wakukhonda mala’? (Masalmo 31:7 na 136:1.) (b) Thangwi yanji tinakwanisa kulonga kuti Yahova athema kutowezerwa pakupangiza ufuni wakukhonda mala? (Onanimbo foto.)

³ Cinthu cinafuna kutiphedza tingatamba nyatwa ndi kunyerezera ufuni wakukhonda mala wa Yahova. (Lerini Masalmo 31:7; 136:1.) Mafala adathumburuzwa kuti “ufuni wakukhonda mala” asabveka kupangiza ufuni wandimomwene ndzidzi onsene. Yahova athema kutowezerwa thangwi ndiye basi anapangiza ufuni wakukhonda mala kupiringana anthu onsene. Na thangwi ineyi, Bhibhlya isalonga kuti Yahova ndi “waufuni kakamwe.” (Eks. 34:6, 7) Bhibhlya isalongambo tenepa thangwi ya Yahova: “Ufuni wanu wakukhonda mala ndi ukulu kuna onsene anakucemerani.” (Mas. 86:5) Pyenepi pisabveka kuti: Yahova ndzidzi onsene asatsalakana atumiki ace akukhulupirika! Kukumbuka kuti Yahova ndi waufuni wakukhonda mala, kunatiphedza kupirira m’midzidzi ya nyatwa ninga pinacita nangula kuna bote.—Mas. 23:4.

KUMBUKANI KUTI UFUNI WA YAHOVA NDI UBODZI MWA UNDIMOMWENE WAKUTOMA WA M’BHIBHLYA

4. Longani undimomwene wakutoma wa m’Bhibhlya, pontho fokotozani kuti thangwi yanji ndi pyakunentsa kusiya kuukhulupira.

⁴ Cinthu cibodzi cinafuna kutiphedza kunyindira ufuni wa Yahova ndi kukumbuka kuti ufuni unoyu ndi ubodzi mwa undimomwene wakutoma wa m’Bhibhlya. Kuna imwe, mafala akuti “undimomwene wakutoma wa m’Bhibhlya” asabvekanji? Panango imwe muli kunyerezera undimomwene wakutoma udapfundza imwe m’Bhibhlya. Mwacitsandzo, imwe mwapfundza kuti dzina ya Mulungu ndi Yahova, Yezu ndi mwana m’bodzi ekha wa Mulungu, kuti anyakufa nee asadziwa cinthu, pontho anthu anadzakhala m’paraizu pa dziko yapantsi kwenda na kwenda. (Mas. 83:18; Ekl. 9:5; Juw. 3:16; Apok. 21:3, 4) Kutomera mu ndzidzi udadziwa imwe undimomwene unoyu, ndi pyakunentsa kusiya kuukhulupira. Thangwi yanji? Thangwi imwe mwabvesesa kuti unoyu ndi undimomwene. Kukumbuka kuti ufuni wa Yahova ndi ubodzi mwa undimomwene wakutoma wa m’Bhibhlya kunakuphedzani toera mukhonde nyerezera kuti Yahova nee asaona nyatwa zanu peno nee asakutsalakanani. Tendeni tione pyenepi.

5. Munakwanisa tani kusiya kukhulupira pipfundziso pyauthambi? Fokotozani.

⁵ Ninji cidakuphedzani toera kusiya kukhulupira pipfundziso pyauthambi pidatoma imwe kupfundza Bhibhlya? Panango mwalandanisa pinthu pidapfundza imwe mu uphemberi wanu wakale na pinapfundza imwe m’Bhibhlya. Mwacitsandzo, nyerezerani kuti imwe mukhakhulupira kuti Yezu ndi Mulungu wamphambvu zonsene. Mbwenye pidapfundza imwe Bhibhlya panango mwabvunzika: ‘Kodi unoyu ndi undimomwene? Pidamala imwe kubvesesa pinapfundzisa Bhibhlya, mwadzindikira kuti unoyu nee ndi undimomwene. Buluka penepo, imwe mwasiya kukhulupira pipfundziso pyauthambi mbamutoma khulupira pinalonga Bhibhlya kuti: Yezu ndi “mwana wautombo mu pinthu pyonsene pidacitwa” na “Mwana m’bodzi ekha wa Mulungu.” (Akol. 1:15; Juw. 3:18) Ndimomwene kuti pipfundziso pyauthambi pisakhala ninga “mipingizo” yakunentsa kuifudza. (2 Akor. 10:4, 5) Mbwenye pidamala imwe kupfundza undimomwene, imwe nee mwakhulupira pontho pipfundziso pyenepi pyauthambi.—Afil. 3:13.

6. Thangwi yanji munakwanisa kukhala na cinyindiro cakuti ‘ufuni wa Yahova ndi wakukhonda mala’?

⁶ Imwe munakwanisa kucita pibodzi pyene toera kunyindira pinalonga Bhibhlya thangwi ya ufuni wa Yahova. Mungatoma kupenula ufuni wa Yahova m’midzidzi ya nyatwa bvundzikani: ‘Kodi pinanyerezera ine ndi undimomwene?’ Landanisani pinanyerezera imwe na mafala anagumanika pa Masalmo 136:1, yakuti ndi lemba idabuluswa nsolo uno. Buluka penepo bvundzikani: Thangwi yanji Yahova asalonga kuti ufuni wace ndi “wakukhonda mala”? Thangwi yanji mafala akuti “ufuni wace ndi wakukhonda mala” asagumanika m’maulendo 26 mu Masalmo 136? Munjira ibodzi ene idakhulupira imwe undimomwene uzinji udapfundza imwe m’Bhibhlya, musafunikambo kukhulupira ufuni wakukhonda mala uli na Yahova kuna mbumba yace. Manyerezero akuti Yahova nee asakufunani peno nee asakutsalakanani nee ndi andimomwene. Calirani manyerezero anewa ninga pinacita imwe na pipfundziso pyauthambi.

7. Ndi mavesi api a m’Bhibhlya anatipasa cinyindiro cakuti Yahova asatifuna?

⁷ Bhibhlya isatipasa cinyindiro consene cakuti Yahova asatifuna. Mwacitsandzo, Yezu apanga anyakupfundzace kuti “imwe ndimwe akufunika kakamwe kupiringana mbalame zing’ono zizinji.” (Mat. 10:31.) Yahova apangambo mbumba yace kuti: “Ndinadzakuwangisa, inde, ndinadzakuphedza, ine ndinadzakuphata mwakuwanga na djanja yanga yamadyo yaulungami.” (Iza. 41:10.) Nyerezerani cinyindiro cinatipasa mavesi anewa. Yezu nee alonga kuti ‘panango imwe ndimwe akufunika kakamwe kupiringana mbalame zing’ono zizinji.’ Pontho Yahova nee alongambo kuti ‘panango ndinadzakuphedza.’ Mbwenye iwo alonga: “Imwe ndimwe akufunika kakamwe” na “ndinadzakuphedza.” Mungatamba nyatwa mbamutoma kupenula ufuni wa Yahova kuna imwe, malemba anewa nee anakuphedzani basi ene kudziwa kuti Yahova asakufunani, mbwenye anakuphedzanimbo kunyindira pyenepi. Malemba anewa asalonga undimomwene. Mungacita phembero mbamunyerezera pyenepi, imwe munakwanisa kulonga mafala ninga anagumanika pa 1 Juwau 4:16: “Ife tisadziwa, pontho tisakhulupira kuti Mulungu asatifuna.”a

8. Munacitanji mungapitiriza kupenula khala Yahova asakufunani?

⁸ Mphapo munacitanji mungapitiriza kupenula khala Yahova asakufunani? Landanisani mabvero anu na pinthu pinadziwa imwe. Mabvero athu midzidzi inango anakwanisa kutinyengeza, mbwenye midzidzi yonsene tinakwanisa kunyindira pinthu pinapangiza kuti pinapfundza ife ndi undimomwene. Pinapfundzisa Bhibhlya thangwi ya ufuni wa Yahova ndi undimomwene. Tinganyerezera kuti Yahova nee asatifuna tiri kukhonda n’khaliro wace wakufunika kakamwe wakuti ndi ufuni.—1 Juw. 4:8.

NYEREZERANI UFUNI UNAPANGIZA YAHOVA KUNA IMWE

9-10. Mafala adalonga Yezu akuti “Baba asakufunani” anagumanika pa Juwau 16:26, 27, asabvekanji? (Onanimbo foto.)

⁹ Tinakwanisa kupfundza pinthu pizinji thangwi ya ufuni wa Yahova tinganyerezera mafala adalonga Yezu kuna anyakupfundzace kuti: “Iye ene Baba asakufunani.” (Lerini Juwau 16:26, 27.) Yezu nee alonga basi ene mafala anewa toera kutsandzayisa anyakupfundzace. Tingabvesesa mafala a Yezu, tinaona kuti iye akhafuna kulonga thangwi ya phembero.

¹⁰ Yezu akhadapanga anyakupfundzace kuti iwo akhafunika kucita phembero mu dzina yace, tayu kuna iye. (Juw. 16:23, 24) Pikhali pyakufunika kuti iwo adziwe pyenepi. Pidamala kulamuswa Yezu muli akufa, panango anyakupfundzace akhafuna kucita phembero kuna Yezu thangwi akhali xamwali wawo. Nakuti Yezu akhaafuna kakamwe, panango iwo akhanyerezera kuti mbadabva maphembero awo mbaphemba Babace toera aaphedze. Mbwenye Yezu aapanga kuti iwo nee akhafunika kunyerezera tenepo. Thangwi yanji? Yezu alonga: “Iye ene Baba asakufunani.” Unoyu ndi ubodzi mwa undimomwene wakutoma wa Bhibhlya unalonga thangwi ya phembero. Pyenepi pisabvekanji kuna imwe? Imwe mwapfundza thangwi ya Yezu, pontho mwakhala xamwali wace. (Juw. 14:21) Ninga anyakupfundza ale, imwe munakwanisa kucita phembero kuna Mulungu na cinyindiro cakuti “iye ene Baba asakufunani.” Ndzidzi onsene unacita imwe phembero kuna Yahova, musapangiza kuti musakhulupira mafala anewa.—1 Juw 5:14.

DZIWANI PINAKUCITISANI KUPENULA

11. Thangwi yanji Sathani anakomerwa tingapenula khala Yahova asatifuna?

¹¹ Thangwi yanji musapenula khala Yahova asakufunani? Panango imwe munalonga kuti ndi Sathani anakucitisani kupenula. Pontho unoyu ndi undimomwene. Dyabo asafuna ‘kutidya,’ pontho asatsandzaya tingapenula khala Yahova asatifuna. (1 Ped. 5:8) Yahova apereka ciomboli thangwi ya ufuni unoyu. Sathani asafuna kuti tinyerezere kuti nee tathema kucitirwa pyenepi. (Aheb. 2:9) Mbani anafuna kuwina tingapenula khala Yahova asatifuna? Ndi Sathani. Pontho mbani anafuna kukhala wakutsandzaya tingasiya kutumikira Yahova? Ndi Sathani basi. Imwe musadziwa kuti ndi Sathani adaluza mwai wa kufuniwa na Yahova. Mbwenye ubodzi mwa “manyengerero” makulu a Sathani ndi kuticitisa kunyerezera kuti ndife adaluza mwai wa kufuniwa na Yahova, pontho nee tathema kufuniwa. (Aef. 6:11) Tingabvesesa pinacita nyamalwa wathu, ife tinakhala dzololo toera ‘kuthimbana na Dyabo.’—Tiya. 4:7.

12-13. Thangwi yanji kukhala a madawo kunaticitisa kupenula khala Yahova asatifuna?

¹² Pana cinthu cinango cinatipenulisa khala Yahova asatifuna. Ndi cinthu cipi ceneci? Kukhala kwathu a madawo. (Mas. 51:5; Aroma 5:12) Madawo aticitisa kukhala kutali na Nciti wathu. Iwo akhuyambo manungo athu, manyerezero athu na ntima wathu.

¹³ Madawo asaticitisa kukhala akutsukwala. Tingacita madawo tisapasika mulando, tisakhala akudzudzumika, akusowa citsidzikizo na amanyadzo. Pyenepi pinacitikambo tingakumbuka kuti ndife anthu a madawo. Mulungu nee akhafuna pyenepi mu ndzidzi udaticita iye. (Aroma 8:20, 21) Ninga karu yakuti iri na peneu yakumala nee isafamba mwadidi, ifembo thangwi ya madawo, nee tisacita pinthu munjira yadidi ninga munafuna Mulungu. Natenepa, nee ndi pyakudzumisa midzidzi inango tingapenula khala Mulungu asatifuna. Pyenepi pingaticitikira, tisafunika kukumbuka kuti Yahova ndi ‘Mulungu wankulu na wakudzumisa, wakuti asapangiza ufuni wakukhonda mala kuna ale ananfuna na kuna ale anabvera mitemo yace.’—Nee. 1:5.

14. Kunyerezera Ciomboli kunatiphedza tani kukhala na cinyindiro cakuti Yahova asatifuna? (Aroma 5:8) (Onanimbo bokosi yakuti “Khalani Akutsidzikizika ku ‘Mphambvu Yakunyengeza ya Madawo.’”)

¹⁴ Midzidzi inango tisapibva kuti nee tathema kufuniwa na Yahova. Mwandimomwene, ife nee tathemadi. Ndi pyenepi pinacitisa kuti ufuni unoyu ukhale wakupambulika kakamwe kuna ife. Nkhabe cinthu cidacita ife toera kuthema kufuniwa na Yahova. Ngakhale tenepo, Yahova apereka ciomboli toera atilekerere madawo athu. (1 Juw. 4:10) Kumbukani kuti Yezu abwera dzapulumusa anyakudawa. (Lerini Aroma 5:8.) Nee m’bodzi wa ife asacita pinthu pyonsene munjira inafuna Yahova, pontho iye nee asadikhira pyenepi kuna ife. Tingabvesesa kuti madawo anaticitisa kupenula khala Yahova asatifuna, tinakhala dzololo mbaticita pyonsene pinakwanisa ife toera tikhonde kupenula.—Aroma 7:24, 25.

PITIRIZANI KUKHALA AKUKHULUPIRIKA

15-16. Tingapitiriza kukhala akukhulupirika kuna Yahova tinakhala na cinyindiro cipi, pontho thangwi yanji? (2 Samweli 22:26)

¹⁵ Yahova asafuna kuti ‘mukhale akukhulupirika kuna iye; ceneci ndi cisankhulo cadidi kakamwe.’ (Dheu. 30:19, 20) Tingacita pyenepi, tinakwanisa kukhala na cinyindiro cakuti iye anapitiriza kukhala wakukhulupirika kuna ife. (Lerini 2 Samweli 22:26.) Tingakhala akukhulupirika kuna Yahova tinakwanisa kukhala na cinyindiro cakuti iye anakwanisa kutiphedza tingatamba nyatwa.

¹⁶ Ninga taona, bote isakhala yakutsidzikizika na nangula. Ifembo tiri na mathangwi adidi akupitiriza kukhala akukhulupirika tingatamba nyatwa. Ife tisadziwa kuti Yahova asatifuna, pontho iye anatiphedza. Ndi pyenepi pinalonga Bhibhlya. Tingapenula ufuni unoyu, tisafunika kukumbuka pinthu pidadziwa ife thangwi ya ufuni wa Yahova, m’mbuto mwakunyindira mabvero athu a mu ndzidzi unoyu. Tisafunikambo kupitiriza kukhulupira undimomwene wa m’Bhibhlya wakuti ufuni wa Yahova ndi wakukhonda mala.