Yezu Ndi Nyantsembe Wathu Wankulu Wakuti Asatibvesesa Mwadidi

1-2. (a) Thangwi yanji Yahova atuma Mwanace pa dziko yapantsi? (b) Tinapfundzanji mu nsolo uno? (Ahebheri 5:7-9)

CIFUPI na pyaka 2.000, Yahova atuma Mwanace wakufunika kakamwe pa dziko yapantsi. Thangwi yanji? Thangwi iye akhafuna kusudzula anthu na kumalisa nyatwa zidabweresa Sathani. (Juw. 3:16; 1 Juw. 3:8) Yahova akhadziwambo kuti umaso wa Yezu pa dziko yapantsi mbudan’khunganya toera akhale Nyantsembe Wankulu wadidi kakamwe wakuti asatibvesesa, asabvambo kupha ninga ife, pontho asatibvera ntsisi. Yezu akhala Nyantsembe Wankulu pidamala iye kubatizwa mu caka 29.a

² Mu nsolo uno, tinapfundza kuti umaso wa Yezu pa dziko yapantsi wan’khunganya tani toera akhale Nyantsembe Wankulu wakuti asatibvesesa. Ndi pyakufunika kubvesesa kuti iye ‘aoniwa tani kuti athema’ kucita basa ineyi. Munjira ineyi pinakhala pyakukhonda nentsa kukhala na uxamwali wakuwanga na Yahova, maseze midzidzi inango titsukwale thangwi ya madodo athu.—Lerini Ahebheri 5:7-9.

MWANA WAKUFUNIKA WA MULUNGU ABWERA PA DZIKO YAPANTSI

3-4. Ndi pinthu pipi pidacitikira Yezu pikhali iye pa dziko yapantsi?

³ Azinji a ife acita macinjo mu umaso, ninga kufuluka ku mbuto ikhakomerwa na iwo kakamwe mbasiya acibale na axamwali. Macinjo anewa ndi akunentsa. Mbwenye nkhabepo munthu adacita macinjo makulu kakamwe kupiringana Yezu. Iye akhali anju wakutoma na wakufunika kakamwe kudzulu. Yezu akhafuniwa kakamwe na Yahova, pontho ndzidzi onsene akhatsandzaya thangwi akhaphata basa pabodzi. (Mas. 16:11; Mis. 8:30) Ngakhale tenepo, Afilipi 2:7 isalonga kuti Yezu akhali dzololo toera ‘asiye pyonsene pikhali na iye’ mbasiya cidzo cikhali na iye kudzulu toera kukhala pabodzi na anthu a madawo pa dziko yapantsi.

⁴ Nyerezerani pidacitikira Yezu mu pyaka pyakutoma pidakhala iye pa dziko yapantsi. Iye abalwa m’banja yakutcerenga. Ife tisadziwa pyenepi thangwi ya ntsembe yakucepa idapereka anyakubalace pakumala kubalwa kwace. (Lev. 12:8; Luka 2:24) Kusiyapo pyenepi, mambo Herodhi pidadziwa iye kuti Yezu abalwa, iye ayesera kumupha. Toera kupulumusa umaso wa Yezu, anyakubalace athawa mbaenda kakhala ku Ejitu mu ndzidzi ungasi. (Mat. 2:13, 15) Mwandimomwene, umaso wa Yezu pa dziko yapantsi ukhali wakusiyana kakamwe na umaso wace kudzulu.

5. Ninji pidacitikira Yezu pikhali iye pa dziko yapantsi, pontho pyenepi pyan’khunganya tani toera akhale Nyantsembe Wankulu wakuti asatibvesesa? (Onanimbo foto.)

⁵ Pikhali Yezu pa dziko yapantsi, iye aona anthu mbakathabuka. Mwakukhonda penula, iye aferwa na anthu akuti akhaafuna kakamwe, kuphatanizambo Zuze wakuti akhali pai wace. Mu ndzidzi ukhamwaza iye mphangwa, Yezu aona anyamatanya, maboliboli, anyakulamala na anyakubala akuti akhathabuka thangwi yakuferwa na anawo, pontho Yezu akhaabvera ntsisi. (Mat. 9:2, 6; 15:30; 20:34; Marko 1:40, 41; Luka 7:13) Ndimomwene kuti Yezu akhadaona kale anthu mbathabuka pikhali iye kudzulu. Mbwenye mu ndzidzi ukhali iye pa dziko yapantsi, iye akhaona nyatwa zenezi munjira inango. (Iza. 53:4) Pinthu pidacitikira Yezu pa dziko yapantsi, pyamphedza toera kubvesesa mabvero, kutsukwala na kubva kupha kwa anthu. Pontho ninga anthu anango, iye akhalambo wakuneta, wakudzudzumika na wakutsukwala.

YEZU AKHABVERA NTSISI ANTHU

6. Mafala adaphatisira Izaiya asatipfundzisanji thangwi ya ntsisi za Yezu? (Izaiya 42:3)

⁶ Mu ndzidzi ukhamwaza Yezu mphangwa pa dziko yapantsi, iye abvera ntsisi anthu akhatsalakanwa mwakuipa. Thangwi yakucita pyenepi, iye akwanirisa profesiya. M’malemba Acihebheri, ale ali na cikhulupiro cakuwanga kuna Yahova asalandaniswa na munda wa maluwa wakuthirirwa mwadidi na miti mikulu yakuwanga. (Mas. 92:12; Iza. 61:3; Yer. 31:12) Mbwenye ale akuti ndi akusowa citsidzikizo na anatsalakanwa mwakuipa asalandaniswa na phesi ya kunyedzeka na nyale yakupucira. (Lerini Izaiya 42:3; Mat. 12:20) Izaiya atsogolerwa na Yahova toera kuphatisira mafala anewa mbapangiza ufuni na ntsisi zakuti Yezu mbadapangiza kuna anthu akhatsalakanwa mwakuipa na akhaoniwa ninga akusowa basa.

7-8. Yezu akwanirisa tani profesiya ya Izaiya?

⁷ Mateu apangiza kuti Yezu akwanirisa profesiya idalemba Izaiya kuti: “Iye nee anadzakhumula phesi ya kunyedzeka, pontho iye nee anadzathimisa nyale yakupucira.” Pirengo pinango pidacita Yezu pyaphedza anthu akhatsalakanwa mwakuipa akuti panango akhapibva ninga phesi ya kunyedzeka na anthu akusowa cidikhiro akuti akhapibva ninga nyale yakupucira. Mwacitsandzo, ntsiku inango, Yezu aona mamuna wakuti akhali na matanya. Mamuna unoyu panango nee akhali na cidikhiro cakuwangiswa mbakhala pontho pabodzi na abale ace na axamwali ace. (Luka 5:12, 13) Yezu aonambo mamuna wakuti nee akhakwanisa kubva na kulonga mwadidi. Nyerezerani kuti mamuna unoyu akhapibva tani mu ndzidzi ukhaona iye anango mbakacedza mwakutsandzaya, iye mbacimwana kucedzambo nawo. (Marko 7:32, 33) Mbwenye nee ndi pyenepi basi pidacita Yezu.

⁸ Mu ntsiku za Yezu, Ayuda azinji akhakhulupira kuti anthu akhaduwala na anyakulamala ali kutcunyuswa thangwi ya madawo awo peno a anyakubalawo. (Juw. 9:2) Na thangwi ineyi, anthu anewa nee akhalemedzwa, pontho akhapibva ninga akusowa basa. Yezu akwanirisa profesiya ya Izaiya pidawangisa iye anthu anewa na kuapangiza kuti Mulungu akhaatsalakana. Pyenepi pisatipfundzisanji thangwi ya Yezu?

9. Tisadziwa tani kuti Nyantsembe wathu Wankulu asatibvera ntsisi?

⁹ Lerini Ahebheri 4:15, 16. Fala Yacigerego idathumburuzwa kuti “kubvera ntsisi” isabveka kukhala na mabvero mabodzi ene akutsukwala na munthu unango. Paulu aphatisira fala ibodzi ene pa Ahebheri 10:34 toera kupangiza kuti ife tisabvera ntsisi ale ali nkaidi. Tingaleri m’Bhibhlya thangwi ya pirengo pya Yezu, tisakwanisa kuona kuti akhabvera ntsisi anthu. Iye nee akhacita pyenepi thangwi yakukakamizwa, mbwenye thangwi yakutsalakana anthu, pontho akhafuna kuaphedza. Mwacitsandzo, pidawangisa iye mamuna akhali na matanya, Yezu mbadakwanisa kucita pyenepi na kutali. Mbwenye asankhula kumphata. Panango mamuna unoyu amala pyaka pizinji nee kuphatwa. Nyerezeranimbo ndzidzi wakuti Yezu awangisa mamuna wakuti nee akhakwanisa kubva. Iye akwata mamuna unoyu mbaenda naye kumbuto yakusowa dzumbi kwakuti nee kukhali na anthu anango. Kusiyapo pyenepi, mu ndzidzi wakuti Nfarisi atsalakana mwakuipa nkazi wakutcunyuka adatsuka miyendo ya Yezu na misozi yace mbaipukuta na tsisi yace, Yezu atsidzikiza nkazi unoyu. (Mat. 8:3; Marko 7:33; Luka 7:44) Yezu nee akhacalira anthu akuti akhabva kupha na ale akhadacita madawo makulu. Mwandimomwene, iye akhafuna kuti anthu anewa aende kuna iye, pontho akhapangiza kuti akhaafuna. Tinakwanisa kukhala na cinyindiro cakuti Yezu asapitiriza kutibvera ntsisi.

IFE TISATOWEZERA NYANTSEMBE WATHU WANKULU

10. Ndi pinthu pipi pyakuti tinakwanisa kupiphatisira toera kuphedza ale akuti nkhabe kwanisa kubva na maboliboli? (Onanimbo mafoto.)

¹⁰ Ninga atowereri a Yezu, ife tisacita pyonsene pinakwanisa ife toera kupangiza ufuni kuna anango na kuabvera ntsisi. (1 Ped. 2:21; 3:8) Ndimomwene kuti nee tisakwanisa kuwangisa ale akuti nkhabe kwanisa kubva na maboliboli, mbwenye tinakwanisa kuaphedza toera akhale na uxamwali wakuwanga na Yahova. Mwacitsandzo, lero tiri na mabukhu mu pilongero pya manja pyakupiringana 100. Pontho toera kuphedza ale akuti nee asakwanisa kuona mwadidi, tiri na mabukhu Acibhraile mu pilongero pyakupiringana 60 na maaudhyu akuti asafokotoza pinapangizwa m’mavidhyu athu mu pilongero pyakupiringana 100. Pyonsene pisacitwa toera kuphedza ale akuti nkhabe kwanisa kubva na maboliboli toera akhale axamwali a Yahova na a Mwanace.

11. Gulu ya Yahova isabvera tani ntsisi anthu onsene ninga Yezu? (Mabasa 2:5-7, 33) (Onanimbo mafoto.)

¹¹ Gulu ya Yahova isawangisira toera kuphedza anthu a mitundu yonsene. Kumbukani kuti pidamala Yezu kulamuswa muli akufa, iye apasa nzimu wakucena onsene adagumanika pa phwando ya Pentekoste toera m’bodzi na m’bodzi akwanise kubvesera mphangwa zadidi “mu cilongero cace.” (Lerini Mabasa 2:5-7, 33.) Yezu asatsogolera gulu toera kubulusa mabukhu mu pilongero pyakupiringana 1.000. Pinango mwa pilongero pyenepi pisalongwa na anthu akucepa kakamwe. Mwacitsandzo, pilongero pinango pisalongwa na anthu akucepa ku Amerika do Norte na Amerika do Sul. Ngakhale tenepo, tiri na mabukhu mu pilongero pyakupiringana 160 pya mbuto zenezi toera anthu onsene analonga pilongero pyenepi akhale na mwai wakubvesera mphangwa zadidi. Mabukhu athu asabuluswambo mu pilongero pyakupiringana 20 pya Aromani. Natenepa anthu azinji analonga pilongero pyenepi ali kutumikira Yahova.

12. Ndi pinthu pipi pinango pinacita gulu ya Yahova toera kuphedza anthu?

¹² Kusiyapo kuphedza anthu toera kubvesera mphangwa zadidi, gulu ya Yahova isaphedzambo ale anagwerwa na pidengwa. Toera kucita pyenepi, Mboni za Yahova zizinji zisaperekeka toera kuphedza anthu anewa. Gulu isamangambo nyumba zadidi toera anthu agumanyikane mbapfundza thangwi ya ufuni wa Mulungu na kumulambira.

NYANTSEMBE WATHU WANKULU ANAKUPHEDZANI

13. Ndi pinthu pipi pyakuti Yezu anakwanisa kupicita toera kutiphedza?

¹³ Nakuti Yezu ndi nkumbizi wathu wadidi, iye asatipasa pinafuna ife toera tikhale na uxamwali wakuwanga na Yahova. (Juw. 10:14; Aef. 4:7) Midzidzi inango, pinthu pinaticitikira pinaticitisa kupibva ninga nyale yakupucira peno ninga phesi yakunyedzeka. Panango tinatsukwala kakamwe thangwi ya utenda ukulu, madodo adacita ife peno kukhonda kubverana na m’bale peno mulongo. Thangwi yakutsukwala kweneku, panango nee tinakwanisa kunyerezera cidikhiro cathu ca ntsogolo. Mbwenye kumbukani kuti Yezu asaona pinatamba imwe, pontho asabvesesa mabvero anu. Nakuti iye asakubverani ntsisi, anakuphedzani. Mwacitsandzo, iye anakwanisa kuphatisira nzimu wakucena toera kukupasani mphambvu mungatsukwala. (Juw. 16:7; Tito 3:6) Kusiyapo pyenepi, Yezu anakwanisa kuphatisira “amuna ninga miyoni” peno akulu a mpingo na abale na alongo toera kukuwangisani na kukuphedzani.—Aef. 4:8.

14. Tisafunika kukumbukanji tingatsukwala?

¹⁴ Mungatsukwala, kumbukani kuti Yezu ndi Nyantsembe wathu Wankulu, pontho nyerezerani kuti pyenepi pisabvekanji kuna imwe. Kumbukanimbo kuti Yahova atuma Yezu pa dziko yapantsi toera kupereka umaso wace ninga ciomboli na kubvesesa mwadidi nyatwa zathu ninga anthu a madawo. Tingatsukwala thangwi ya madodo athu, Yezu ali dzololo toera kutiphedza “pa ndzidzi wakuthema.”—Aheb. 4:15, 16.

15. Ninji pidaphedza Stefano toera kubwerera mu mpingo?

¹⁵ Yezu asatsogolerambo ale anawangisira toera kuphedza ale adasiya kutumikira Yahova. (Mat. 18:12, 13) Onani pidacitikira Stefanob wakuti akhadabuluswa mu mpingo. Pidapita pyaka 12, iye aenda ku misonkhano. Iye alonga: “Pyakhala pyakunentsa kuna ine, mbwenye ndikhafuna kutumikira pontho Yahova pabodzi na abale na alongo. Akulu a mpingo adacedza na ine andiphedza toera kukhala wakusudzuka. Midzidzi inango ndikhatsukwala kakamwe thangwi yakusiya kutumikira Yahova, pontho ndikhafuna kubwerera nduli mbwenye abale andikumbusa kuti Yahova na Yezu akhafuna kuti ndipirire. Pidabwezereswa ine mu mpingo, abale na alongo onsene atitambira mwadidi pabodzi na banja yanga. Mukupita kwa ndzidzi, nkazanga atoma kupfundza Bhibhlya, pontho lero tisatumikira Yahova pabodzi.” Nyantsembe wathu Wankulu waufuni asatsandzaya kakamwe angaona anthu akutcunyuka mbaphedzwa toera kubwerera mu mpingo.

16. Thangwi yanji musapereka takhuta kuna Yahova?

¹⁶ Pikhali Yezu pa dziko yapantsi, aphedza anthu azinji pa ndzidzi wakuthema. Lero, takwanisa kukhala na cinyindiro cakuti iye anatiphedza ndzidzi onsene unafuna ife ciphedzo. Pontho mwakukhonda dembuka, mu dziko ipswa iye anaphedza anthu a madawo toera akhale akusowa madawo. Tisapereka takhuta kakamwe kuna Yahova Mulungu wathu waufuni na wantsisi thangwi yakukhazikisa Yezu ninga Nyantsembe Wankulu wakuti asatibvesesa!